کچھّ میں عقیدت و بھائی چارہ کی روایت

پس منظر میں ڈھول کی تھاپ سنائی دے رہی ہے۔ اس اکیلے ساز کے ساتھ جلد ہی ایک گلوکار کی روحانی آواز بھی شامل ہو جاتی ہے۔ کسی درگاہ کے باہر موجود سائل کی طرح، یہ گلوکار پیغمبر محمد کی مدح سرائی کرنے کے ساتھ ساتھ اپنے اور دوسروں کے لیے دعائیں بھی مانگتا ہے۔

یہ کچھّ میں گایا جانے والا وہ گیت ہے جس کے ذریعے ہمیں اس علاقے میں بھائی چارہ کی عظیم روایت کی جھلک دیکھنے کو ملتی ہے۔ یہ اُن خانہ بدوش چرواہوں کا علاقہ ہے جو سالوں پہلے اپنے مویشیوں کو ساتھ لے کر کچھّ کے بڑے رَن کو پار کرتے ہوئے موجودہ پاکستان کے سندھ سے کراچی تک اپنی سالانہ مہاجرت پر آتے جاتے تھے۔ تقسیم کے بعد نئی سرحدیں بنا دی گئیں اور ان کے اس سالانہ سفر کا سلسلہ ہمیشہ کے لیے بند ہو گیا۔ لیکن کچھّ اور سندھ کے ہندو اور مسلمان – دونوں مذاہب کے چرواہوں کے درمیان اس تقسیم کے بعد بھی مضبوط ثقافتی تعلقات برقرار رہے۔

صوفی تحریک، شاعری، لوک گیت، قدیم روایات اور یہاں تک کہ زبانوں کے اس شاندار میل جول اور باہمی اثرات سے ایسی مذہبی روایات ابھر کر سامنے آئیں جنہوں نے اس علاقے میں رہنے والی برادریوں کی عام زندگی، ان کے آرٹ، فن تعمیر اور مذہبی طور طریقوں کی ایک نئی فضا قائم کی۔ ان مشترکہ ثقافتوں اور بھائی چارگی کی جھلک ہمیں اس علاقے کی مقامی موسیقی میں دیکھنے کو ملتی ہے۔ حالانکہ، اب یہ بھی آہستہ آہستہ ختم ہونے لگی ہیں، لیکن موسیقی کی ان روایات پر صوفی تحریک کا گہرا اثر دیکھا جا سکتا ہے۔

پیغمبر محمد سے بے پناہ عقیدت کی ایک جھلک ہمیں نکھترانا تعلقہ کے مورگر گاؤں کے ۴۵ سالہ ایک چرواہے کشور روار کے ذریعے گائے گئے اس لوک گیت میں صاف دکھائی دیتی ہے۔

پریتی سونی، کے ایم وی ایس کی سکریٹری ارونا ڈھولکیا، کے ایم وی ایس کے پروجیکٹ کوآرڈینیٹر امد سمیجا کا ان کے تعاون، اور گجراتی ترجمہ میں بیش قیمتی مدد کے لیے بھارتی بین گور کا تہ دل سے شکریہ۔

مترجم: محمد قمر تبریز