اروناچل میں بوگون لیوچیکلا کی بلند پرواز

’’وہ رہا غورال!‘‘ اروناچل پردیش کے مغربی کمینگ ضلع کے ایک قصبہ سِنگچِنگ کی پیچ دار سڑکوں پر خاموشی کے ساتھ ڈرائیو کرتے ہوئے ڈاکٹر امیش سری نواسن اچانک چیخ پڑتے ہیں۔

کچھ فاصلہ پر ایک چھوٹا لیکن فربہ اور بھورے رنگ کا بکرے جیسا جانور قلانچیں مارتا ہوا سڑک عبور کرکے پہاڑی کے نیچے، مشرقی ہمالیہ کے جنگلوں میں داخل ہو جاتا ہے۔

’’آپ نے پہلے کبھی اسے نہیں دیکھا ہو گا،‘‘ مغربی کمینگ کے جنگلات میں ۱۳ سالوں سے کام کر رہے جنگلی حیات کے ماہر حیاتیات حیرت زدہ ہو کر کہتے ہیں۔

بھورا غورال (نیمورہیڈس غورال) بھوٹان، چین، شمالی ہندوستان، نیپال اور پاکستان کے ہمالیائی خطے میں پائی جانے والی ایک بووِڈ (جُگالی کرنے والی) نوع ہے۔ لیکن ۲۰۰۸ تک بین الاقوامی اتحاد برائے تحفظ فطرت (آئی یو سی این) نے مسکن کے نقصان اور شکار کی وجہ سے اسے ’’خطرے کے نزدیک‘‘ کے طور پر درج کیا تھا۔

’’وہ ہمیشہ جنگلوں میں کافی اندر رہتے تھے اور باہر آنے سے ڈرتے تھے،‘‘ اُمیش اس نوع کے بارے میں بات کرتے ہیں جو خاص طور پر زیریں ہمالیہ اور شمال مشرقی ہندوستان میں پائے جاتے ہیں اور جہاں انسانوں کی زیادہ موجودگی کی وجہ سے خطرے میں ہیں۔

غورال دیکھنے کے فوراً بعد سنگچنگ کے ایک کسان نیما تسیرنگ مونپا نے ہمیں چائے پیش کی اور ایک اور جانور کے نظارے سے متعلق کچھ معلومات فراہم کیں، ’’چند ہفتے قبل میں نے کھیتوں میں ایک سرخ پانڈا (ٓایلورس فلگینز) دیکھا تھا، جو یہاں سے بہت دور نہیں تھا۔‘‘ سرخ پانڈا ایک زیر خطر نوع ہے جو چین، میانمار، بھوٹان، نیپال اور ہندوستان میں پایا جاتا ہے اور پچھلی تین نسلوں کے دوران اس کی آبادی میں ۵۰ فیصد کی کمی آئی ہے اور آئی یو سی این نے خبردار کیا ہے کہ آئندہ دو دہائیوں میں حالات مزید خراب ہو سکتے ہیں۔

مقامی لوگوں کا کہنا ہے کہ سنگچنگ کے قریب جنگلی جانوروں کا دکھائی دینا محض اتفاق نہیں ہے۔ ان کا خیال ہے کہ یہ تحفظ کی ایک پائیدار کوشش کا نتیجہ ہے، جو ۲۰۱۷ میں شروع ہوئی تھی جب اروناچل کے محکمہ جنگلات نے یہاں کی بوگون قبائلی برادری کے ساتھ اشتراک کیا تھا، تاکہ پہلے غیر درجہ بند کمیونٹی جنگلات کو جوڑ کر سنگچنگ بوگون ولیج کمیونٹی ریزرو (ایس بی وی سی آر) بنایا جا سکے۔

اس کمیونٹی فاریسٹ ریزرو کی کہانی دنیا میں سب سے زیادہ بقا کے خطرے سے دوچار پرندوں میں سے ایک بوگون (لیوچیکلا بوگونورم) کی دریافت کے ساتھ شروع ہوتی ہے؛ یہ پرندہ سنگچنگ کے آس پاس کے جنگلات کے ایک چھوٹے سے دائرے میں ہی پایا جاتا ہے۔

شاذ و نادر ہی نظر آنے والے اس زیتونی سبز رنگ کے پرندے کا سر سیاہ ہوتا ہے، بھنویں چمکدار پیلے رنگ کی ہوتی ہیں اور پر سرخ نوک دار ہوتے ہیں۔ سال ۲۰۰۶ میں ایک باضابطہ نوع کے طور پر درج کیے گئے اس پرندے کا نام اس بوگون قبائلی برادری کے نام پر رکھا گیا تھا، جن کے ساتھ یہ جنگلات میں رہتے ہیں۔

ٹراپیکی کوہی جنگلات کی فریم شدہ تصاویر سے گھری سنگچنگ میں اپنے کمرے میں بیٹھی شلینا پھنیا کہتی ہیں، ’’پوری دنیا کے لوگ اس پرندے کے بارے میں جانتے تھے۔‘‘

پھنیا کہتی ہیں کہ پانچ سال پہلےانہیں بوگون لیوچیکلا کے وجود کا کوئی علم نہیں تھا، لیکن آج یہ ۲۴ سالہ خاتون سنگچنگ بوگون ولیج کمیونٹی ریزرو (ایس بی وی سی آر) میں پہلی خاتون گشتی افسر اور فلم ساز ہیں جو مشرقی ہمالیہ کی ان جنگلات کی دستاویز سازی کرتی ہیں۔

اپنی کمیونٹی کو اس پرندے کے ساتھ اپنے تعلق کا احساس دلاتے ہوئے ۱۹۹۶ میں پہلی مرتبہ اسے دیکھنے والے رمنا اتریئا کہتے ہیں، ’’ایس بی وی سی آر کا مقصد اپنی حیاتیاتی تنوع کو محفوظ کرنا ہے۔ ساتھ ہی کمیونٹی اس علاقے کا استعمال کر کے جس طرح کی زندگی چاہتی ہے اسے فروغ دینے میں مدد کرنا ہے۔‘‘

انہوں نے اصرار کیا کہ اس کا نام یہاں آباد بوگونوں کے نام پر رکھا جائے، تاکہ تحفظ کی کوششوں میں کمیونٹی کی شمولیت ہو، اور مقامی لوگ اس چھوٹے پروں والی مخلوق اور اس کی رہائش گاہ (جو اب ایک محفوظ ریزرو ہے) کے ساتھ اپنے تعلق کا احساس کرسکیں۔

اروناچل پردیش کے مغربی کمینگ ضلع میں ایگل نیسٹ وائلڈ لائف سینکچُری کے نشیب میں واقع، ایس بی وی سی آر کو ہندوستان کے وائلڈ لائف پروٹیکشن ایکٹ، ۱۹۷۲ کے تحت قائم کیا گیا ہے۔ اپنے پانچ سالہ وجود میں، ۱۷ مربع کلومیٹر میں پھیلے اس کمیونٹی فاریسٹ ریزرو نے کمیونٹی تحفظ کے نئے معیارات قائم کیے ہیں۔

بوگون برادری سے تعلق رکھنے والی پھنیا جیسے مقامی لوگ ان جنگلات اور ان میں قیام پذیر جنگلی حیات کے تحفظ میں اہم کردار ادا کرتے ہیں۔ ان کا کام ۱۰ دیگر فاریسٹ افسران کے ساتھ علاقے میں گشت کرنا اور شکاریوں کو دور رکھنا ہے۔

لیکی نوربو بھی ایس بی وی سی آر کے ایک گشتی افسر ہیں، وہ درختوں کی کٹائی، شکار اور جال بچھانے جیسی غیر قانونی سرگرمیوں کے خلاف جنگل کی نگرانی کرتے ہیں۔ ’’پیڑ کاٹنے کا جرمانہ ایک لاکھ روپے  اور شکار کا جرمانہ اس سے بھی زیادہ ہو سکتا ہے،‘‘ ۳۳ سالہ بوگون قبائلی کہتے ہیں۔

کوئی انسانی سرگرمی نہ ہونے کی وجہ سے جانور اندرونی جنگل سے نکل کر چارہ کی تلاش میں ایس بی وی سی آر میں آ جاتے ہیں۔ گور بائیسن (جنگلی بھینس) کو زیر خطر نوع کے طور پر درج کیا گیا ہے، لیکن ایس بی وی سی آر میں، ’’ان کی تعداد بڑھی ہوئی لگتی ہے۔ وہ پہلے بھی آتے تھے، لیکن زیادہ تعداد میں نہیں آتے تھے۔ تنہا ہی آتے تھے،‘‘ لیکی کہتے ہیں۔

دوسرے جانور بھی اپنے جھنڈ میں ہی نظر آتے ہیں۔ سنگچنگ کے رہائشی اور بوگون برادری سے تعلق رکھنے والے ایس بی وی سی آر کمیٹی کے چیئرمین کھانڈو گلو کہتے ہیں، ’’پچھلے ۴-۳ سالوں میں ایس بی وی سی آر میں ڈھولے – یعنی جنگلی کتوں [ کوؤن ایلپینس] – کی سرگرمیوں میں بھی اضافہ ہوا ہے۔‘‘

یہ ریزرو سنگچنگ ٹاؤن اور ایگل نیسٹ وائلڈ لائف سینکچُری کے درمیان ایک بفر کا کام کرتا ہے، جو کلاؤڈیڈ تیندوے (جلد پر بادلوں کے پیٹرن والا تیندوا)، مرمریں بلیوں، ایشیائی سنہری بلیوں اور چیتوں سمیت کئی دیگر جنگلی جانوروں سے بھرا ہوا ہے۔ ان جنگلات کو بقا کے خطرے سے دوچار ٹوپی دار لنگور، غورال، سرخ پانڈا، ایشیائی کالا ریچھ اور اروناچل کا زیر خطر مکاک (بندر) اور گور کا بھی مسکن کہا جاتا ہے۔ ایگل نیسٹ بھی کرہ ارض کی واحد جگہوں میں سے ایک ہے جہاں ۳۲۵۰ میٹر کی اونچائی پر ہاتھی پائے جاتے ہیں۔

لیکن یہاں کے پرندے دنیا بھر کے سیاحوں کو اپنی طرف متوجہ کرتے ہیں۔ ایگل نیسٹ پرندوں کی ۶۰۰ سے زیادہ انواع کا مسکن ہے، جن میں کچھ نایاب ہیں جیسے ( معدومیت کے خطرے سے دوچار ) سرخ رنگ کے پیٹ والے وارڈ ٹروگن، زیر خطر تیتر نما بلائتھ ٹریگوپَن اور ( زیر خطر ) ریشمی نیلے سرمئی خوبصورت نٹہیچ شامل ہیں۔

اب ایگل نیسٹ کے ساتھ ساتھ سنگچنگ بھی پرندوں میں دلچسپی رکھنے والوں کا ایک مقبول مقام بن گیا ہے۔ معدومیت کے شدید خطرے سے دوچار بوگون لیوچیکلا کی سیٹی جیسی دلکش آواز سننے کے لیے سیاح اس علاقے میں آتے ہیں۔ افزائش نسل کے قابل باقی ماندہ محض ۲۰-۱۴ بالغ  پرندوں کی ایک جھلک دیکھ کر پرندوں میں دلچسپی رکھنے والے لوگ خود کو خوش قسمت محسوس کرتے ہیں۔

بوگون لیوچیکلا عام طور پر جوڑوں یا چھوٹے گروپوں میں پائے جاتے ہیں۔ مشرقی ہمالیہ کے نچلے درجے کے گھنے جنگلات (سطح سمندر سے ۲۳۴۰-۲۰۶۰ میٹر کی بلندی پر واقع) ان کا واحد مسکن ہیں۔

’’ایگل نیسٹ، نمڈافا نیشنل پارک (اروناچل پردیش اور آسام ) میں بہت سے پرندے ہیں، لیکن لیوچیکلا صرف سنگچنگ میں پایا جاتا ہے۔ اگر یہ پرندہ یہاں نہ ہوتا تو لوگ نہ آتے،‘‘ ایک ماحول دوست کیمپنگ سائٹ لاما کیمپ چلانے والے انڈی گلو کہتے ہیں۔ ’’اگر یہ نظر نہ آئیں تو لوگ کئی راتوں تک یہاں ٹھہرتے ہیں،‘‘ گلو مزید کہتے ہیں۔

یہاں آنے والے سیکڑوں سیاحوں کی وجہ سے مقامی کمیونٹی مستفید ہوتی ہے۔ آج، گلو کہتے ہیں، ’’سنگچنگ میں ہر سال ۳۰۰ سے ۴۰۰ کے درمیان سیاح آتے ہیں اور اس تعداد میں اضافہ ہی ہو رہا ہے۔‘‘ سب سے زیادہ سیاح اپریل سے جون کے درمیان، مانسون سے پہلے آتے ہیں۔

اتریئا پیسہ خرچ کرنے والے مہمانوں کی آمد کو کارآمد تصور کرتے ہوئے تنقید کو خارج کرتے ہیں، ’’یہاں پیسے کی ضرورت ہے۔ صرف تنخواہ کا حصہ [تحفظ کی کوششوں کے لیے] ۱۵ لاکھ روپے سالانہ ہے۔ پیشہ کے لحاظ سے ریڈیو فلکیات دان اتریئا اروناچل پردیش میں تحفظ کی کوششوں میں مضبوطی سے شامل ہیں اور اس بات کے متعرف ہیں کہ کیسے، ’’بوگونوں نے اس کام کو اختیار کیا اور اسے جاری رکھے ہوئے ہیں۔ وہ اس کام میں ہماری امیدوں سے بھی آگے بڑھ چکے ہیں۔‘‘

آج یہ کمیونٹی علاقے کے اسکولوں میں ماحولیاتی سیاحت کے کیمپ لگاتی ہے، باقاعدہ گشت کرتی ہے اور بیداری مہم کا اہتمام بھی کرتی ہے۔ بوگونوں کو درج فہرست قبیلہ (ایس ٹی) کے طور پر درج کیا گیا ہے اور ۲۰۱۳ کی اس رپورٹ کے مطابق، ان کی آبادی ۱۴۳۲ ہے، لیکن ان کا کہنا ہے کہ ان کی آبادی اس تعداد سے کم از کم دو گنی ہے۔

پھنیا جیسے مقامی لوگ ’وائلڈ لائف ویک‘ میں حصہ لیتے ہیں تاکہ مغربی کمینگ کے اسکولوں میں طلباء کو جنگلات کی اہمیت اور ان کے حیاتیاتی تنوع سے آگاہ کیا جا سکے۔ انہوں نے اپنے بچپن میں جو کچھ دیکھا تھا اس لحاظ سے بھی یہ اہم ہے، ’’میں اپنے دوستوں کو جنگل میں جاتے، چھوٹے پرندوں کو مارتے اور کھاتے دیکھتی تھی، تو مجھے تکلیف ہوتی تھی۔ میں ان سے پوچھتی تھی، ’جب تم مرغیاں کھا سکتے ہو، جنہیں کھانے کے لیے پالا جاتا ہے، تو جنگل کو کیوں نقصان پہنچا رہے ہو؟‘‘‘

ان کے ساتھی نوربو مزید کہتے ہیں: ’’ہم پڑھائی میں زیادہ دلچسپی نہیں رکھتے تھے۔ ہم میں سے کچھ لوگ جنگل میں جاتے تھے اور کبھی کبھی اپنے شکار (بھونکنے والے ہرن، کلیج تیتر، جنگلی سؤر) کے ساتھ واپس آ جاتے تھے،‘‘ وہ کہتے ہیں۔ یہ ایسا وقت تھا جب شکار ایک شوق تھا اور پڑھائی کو ترجیح نہیں دی جاتی تھی۔

’’یہ شکار کبھی کھانے کے لیے کیا جاتا تھا؛ اور کبھی محض شوقیہ طور پر یوں ہی،‘‘ نوربو کہتے ہیں۔ وہ جنگلاتی حیات کو خطرہ پہنچانے والی یہاں کی غیرقانونی سرگرمیوں پر گہری نظر رکھتے ہیں۔

ریزرو کے قیام کے ایک اہم محرک میلو تیسر بھی تھے، جو آٹھ سال تک ضلع ویسٹ کمینگ کے ڈسٹرکٹ فاریسٹ آفیسر (ڈی ایف او) تھے۔ ’’ایس بی وی سی آر ایسا نہ ہوتا اگر ہم نے مقامی کمیونٹی کو ساتھ میں نہ لیا ہوتا،‘‘ تیسَر کہتے ہیں، جو اب زیرو ویلی کے ڈی ایف او ہیں۔ ’’ایس بی وی سی آر نے بالواسطہ اور بالواسطہ طور پر روزگار کے مواقع پیدا کیے ہیں لیکن یہ ایسا نہ ہوتا اگر ہم نے کمیونٹی کو ساتھ میں نہیں لیا ہوتا،‘‘ وہ زور دے کر کہتے ہیں۔

یہاں کے کئی کنبوں کے کم از کم ایک رکن کو باورچی، جنگلاتی عملہ، ڈرائیور اور دیگر سروس اسٹاف کے طور پر ملازمت ملی ہوئی ہے۔ فرنٹ لائن عملے کو ریاستی گرانٹس سے ملنے والی تنخواہیں اکثر تاخیر سے ملتی ہیں، اسی لیے سیاحت سے ہونے والی آمدنی کی یہاں اشد ضرورت ہے۔

بہرحال، بوگون اپنے قصبے کی کایا کلپ کا سہرا اس چھوٹے پرندے کے سر باندھتے ہیں، ’’اگر لیوچیکلا نہ ہوتا، تو سنگچنگ اس طرح تبدیل نہ ہوتا،‘‘ گلو مزید کہتے ہیں۔

اس پرندے کے نام کا آدھا حصہ یہاں کی کمیونٹی سے منسلک ہے، جبکہ ’’باقی کے آدھے نام، لیوچیکلا، کا ترجمہ رومانس زبانوں (لاطینی یا نیو لاطینی زبانوں) میں عمومی طور پر چکنے پرندے کے ہوتا ہے،‘‘ ایس بی وی سی آر کے گرد چہل قدمی کے دوران امیش واضح کرتے ہیں؛ گہری سبز رنگ کی پہاڑیوں اور وادیوں کی خاموشی کا وقفہ مختلف پرندوں کی آوازوں کے ذریعہ ٹوٹتا ہے۔

ہمیں معلوم ہوا کہ اس جنت میں کچھ پریشانیاں بھی ہیں۔

ایگل نیسٹ وائلڈ لائف سینکچُری میں ماہر طیور سری نواسن کی تحقیق سے معلوم ہوتا ہے کہ درجہ حرارت میں اضافے کے سبب گرمی سے تحفظ کے لیے سفید پونچھ والے رابن اور کامن گرین میگپی جیسے چھوٹے پرندے زیادہ اونچائی کی طرف جا رہے ہیں۔

یہ مشہور پرندہ ’’[اب] سطح سمندر سے ۲۳۰۰-۲۰۰۰ میٹر کی اونچائی کے درمیان صرف ۲ مربع کلومیٹر کے دائرے میں پایا جاتا ہے،‘‘ وہ کہتے ہیں۔ ’’لیکن لیوچیکلا کو حرکت کرنا ہی ہوگا، اور جب یہ حرکت کرے گا، تو یہ اونچائی کی طرف ہی جائے گا۔‘‘ اسی حقیقت کو ذہن میں رکھتے ہوئے کمیونٹی ریزرو کو ایک بڑی اونچائی والی ڈھلان پر بنایا گیا تھا۔ سری نواسن کہتے ہیں، ’’ایس بی وی سی آر کی اونچائی ۱۳۰۰ سے ۳۳۰۰ میٹر کے درمیان ہے، جو اس پرندے کے اونچائی پر جانے کی آخری حد  ہے۔‘‘ اروناچل کے پرندے گرمی کو شکست دینے کے لیے کس طرح اوپر کی طرف بڑھ رہے ہیں اس کے بارے میں مزید پڑھیں: خطرے کو بھانپ کر مسکن بدلتے اروناچل کے پرندے

لیکن سی ایف آر کا قیام تنقید سے مبرا نہیں رہ سکا۔

’’ہم اپنی زمین سے رابطہ کھو دیتے اور یہی وجہ ہے کہ میں ان لوگوں میں سے ایک تھا جنہوں نے اس کمیونٹی ریزرو کے قیام پر اعتراض کیا تھا،‘‘ مقامی ٹھیکیدار سانگ نوربو سرائے کہتے ہیں۔ ’’محکمہ جنگلات زمین لیتا ہے، لیکن بدلے میں لوگوں کو کچھ نہیں ملتا،‘‘ سنگچنگ کے رہائشی اور بوگون لوگ کہتے ہیں۔

تاہم، ایس بی وی سی آر میں پانی کا ذریعہ (واٹرشیڈ) ان کے لیے اور دوسرے مخالفین کی سوچ میں تبدیلی کا ایک اہم موڑ تھا۔ ’’سنگچنگ میں پانی کا ذریعہ نیچے کی طرف ہے جہاں سے شہر کو پانی کی فراہمی ہوتی ہے۔ اگر ہم اپنے آبی ذخائر کی حفاظت کرنا چاہتے ہیں تو ہمیں معلوم ہے کہ جنگل کی حفاظت کرنی ہوگی، اور درختوں اور جنگلات کی کٹائی کو روکنا ہوگا،‘‘ ریٹائرڈ مقامی ٹھیکیدار سرائے کہتے ہیں۔ ’’ہم اس بات کو یقینی بنانا چاہتے تھے کہ ہماری آنے والی نسلوں کو پانی ملے اور ان کا تحفظ ہو۔‘‘ ایس بی وی سی آر اس سمت میں ایک قدم ہے۔

آسام کے تیز پور سے لے کر اروناچل پردیش کے ایگل نیسٹ تک کے علاقے میں ہر جگہ بوگون لیوچیکلا کی تصویریں آویزاں ہیں۔ اس کی مقبولیت بوگون لوگوں کی کوششوں کا ثبوت ہے۔ ’’آج دنیا میں ہمارا نام ہے، شہرت ہے،‘‘ سرائے کہتے ہیں۔ ’’ہمیں اور کیا چاہیے؟‘‘

مترجم: شفیق عالم