लक्ष्मी पांडा के अंतिम लड़ाई

लक्ष्मी ऊ सब गांव के लोग में से बाड़ी जे देस के आजादी के लड़ाई में साथे रहे. ई साधारण लोग नामी होखे खातिर नेता, मंत्री चाहे राज्यपाल होखे ना गईल. ई इमानदार लोग रहे. इ लोग बड़का कुर्बानी दहल. जब देस आजाद हो गईल त अपना रोज्दिना के जिनगी में लवट आईल लोग. देस जब स्वतंत्रता के 60 वां बरिस मना रहल बा, एमे से बहुत लोग इ दुनिए से जा चुकल बा. बाकी जे बा ऊ 80 चाहे 90 साल के उमीर पार के बा. बेसी लोग ना बेमार बा, ना त कस्ट में बा. (उमीर के मामिला में लक्ष्मी अपना में एगो अप्वादे बाड़ी. उ लमसम 13 साल में आईएनए में सामिल हो गईल रहली. अब जा के ऊ 80 साल के होईहें.) स्वतंत्रता सेनानी लोग के गिनती दिन पर दिन तेजी से घटत जाता.

ओडिसा राज्य लक्ष्मी पांडा के स्वतंर्ता सेनानी के रूप में सकारता. औरी उनका के हर महीने 700 रोपया के मामूली पेंसन देला. पर साल एमे 300 रोपया बढा दहल गईल. कई साल ले ई पता ना रहे कि उनकर रोपया कहां भेजल जाय. बाकिर भारतीय स्टेट उनकरा के अभियो स्वतंत्रता सेनानी नईखे मानत. जबकि ओ बेरा के आईएनए के कई गो सदस्य उनकरा दावा के गवाही दे चुकल बा. उ कहेली, “दिल्ली में ऊ लोग हमरा से कहल कि हम जेल नईखीं गईल. औरी ई सहियो बा कि हम जेल नईखी गयील. बाकिर आईएनए के कई गो सैनिक जेल ना गयील रहे. त का एकर मतलब ई बा कि हमनी आजादी के लड़ाई ना लड़नी? अपना पेंसन खातिर हम झूठ काहे बोलेंम?”

लक्ष्मी, नेताजी सुभास चंद्र बोस के के इंडियन नेशनल आर्मी के सबसे कम उमीर के सदस्य रहली. उड़ीसा के सायद अकेला मेहरारू, जे आईएनए में आपन नाव लिखावल औरी ओ बेरा के बर्मा के कैम्प में सामिल भईल. अब, ऊ अकेले जीयत मेहरारू बाड़ी. उ कहेली कि बोस अपने उनकरा के ‘इंदिरा’ नाम दहलें ताकि ओ बेरा के सबसे नामी लड़ाका (कप्तान) लक्ष्मी सहगल के ले के कवनो भरम ना रहे. “उ हमरा से कहलन कि ई सिविर में तू इंदिरा हउ” हमरा ओ बेर एतना समझ ना रहे. बाकिर बाद में सब लोग हमरा के इंदिरा नाम से बोलावे लागल.”

लक्ष्मी के माई-बाप अंग्रेजन के बमबारी में मरा गईल लोग जुना बेर ऊ लोग बर्मा के रेलवे में कार करत रहे. ओकरा बाद “हम अंग्रेजन से लड़ जाए के चाहत रहनी. आईएनए के बड़का लोग हमरा के कवनो चीज में सामिल करे में संकोच करे. ओऊ सब कहे कि अभी हम बहुत छोट बानी. हम ओ सब से हाथ जोड़ के कहीं कि हमरा के कवनो कार दे द, चाहे ऊ केतनो छोट कार होखे. हमार भाई नकुल रथ, ऊहो एगो सदस्य रहलन. ऊ युद्ध के बेर कहीं गायब हो गईलन. कई साल बाद, केहू हमरा से कहलस कि ऊ वापिस आ गईल बदन औरी इंडियन आर्मी में आ गईल बाड़न, औरी एह बेर कश्मीर में बाड़न. बाकिर हम ई बात के सांच कईसे बूझतीं? अब, ई पचास बरिस पहिले के बात ह.”

उ बतावेली, “सिविर में हमार भेंट लेफ्टिनेंट जानकी से भईल, एकरा अलावा हम ऊंहा लक्ष्मी सहगल, औरी आईएनए के नामी सेनानी लोग के देखनी.” ऊ मन पर के कहेली, “युद्ध के अंतिम दिन में हम सिंगापुर गईनी, हमरा सोचे से, बहादुर ग्रुप के साथे.” ऊंहा पर ऊ आईएनए के तमिल दोस्त लोग के साथे रहली औरी ओ लोग के भासा के कुछ सब्द सिखली.

इ बात के साबित करे ला ऊ हमनी के आगे तमिल में ‘इंदिरा’ लिख के देखवली. औरी गर्व से आईएनए के गीत के पहिला पंक्ति “कदम-कदम बढ़ाये जा, खुशी के गीत गाये. यह जिन्दगी है कौम की, तू कौम पे लुटाये जा.” गवली.

“हम कुछू नईखी मांगत” उ कहली. “हम अपना देस खातिर लड़ाई लड़नी, इनाम खातिर ना. हम अपना परिवार खातिर कुछ नईखी मंगले. बाकिर, अब इ अध्याय के अंत में हमरा उम्मीद होता कि कम से कम हमार कुरबानी त सकार लहल जाय.”

खराब सेहत आ गरीबी कुछ साल पहिले उनकर डांड़ टूर दहलस. लोग के ई बात के पता तब लागल जब जयपोर के एगो पत्रकार परेश रथ पहिला बार उनकर कहानी लिखलन. रथ उनका के झुग्गी से उठा के अपना एक कोठरी वाला घर में ले अयिलन. ऊहो अपना पईसा से. सथही उनकर इलाजो करवावलन. रोग के चलते पांडा के अभी तुरंते अस्पताल में भर्ती करावल रहे. अभिन, ऊ अपना बेटा के घरे बाड़ी. सराब के बान अभी छूटल नईखे. रथ के बाद कई लोग उनकर कहानी लिखल. एक बेर त एगो राष्ट्रीय पत्रिका अपना पहिला पन्ना प लक्ष्मी के छपले रहे.

रथ बतावेलन, “हमनी जब पहिला कहानी छपनी त कुछ मदद आवे लागल. ओ बेरा के कोरापुट के कलक्टर, उषा पाधी मर्म बुझली. रेड क्रॉस से उनकरा इलाज खातिर लक्ष्मी के 10,000 रोपया मिलल. ट्रांसफर भईला प पाधी जिला छोड़ दहली. बंगाल के कुछ लोग इनका के पईसा भेजल.” बाकिर ईहो लरी कुछ दिन में टूट गयील. औरी ऊ फेर से बहुत खराब जिनगी ला मजबूर हो गईली. रथ कहेलन, “ई खाली पईसे के मामला नईखे. जे उनका सरकार से पेंशन मिले लागे त ऊ केतना दिन ओकर लाभ ले पयिहें? ई त उनका गर्व आ सम्मान के बात बा. बाकिर केंद्र सरकार त अभिनो कौनो जवाब नईखे देले.”

बहुत मसक्कत के बाद पर साल के अंत में लक्ष्मी के पाणजियागुडा गांव में एगो सरकारी जमीन के टुक्का लिखायिल ह. बाकिर, ऊ अभिनो ई बात के जाहतारी कि सरकारी योजना से उनका जमीन प घर बना के उनका मिली. औरी ऊ एही आस में बईठल बाड़ी. अभिन खातिर त रथ उनका झुग्गी के बगल में एगो नीमन कोठरी बनवावे में मदद देले बाडन. जहां जल्दिये ऊ बस जईहें.

अपना जगहो प बहुत कम्मे लोग उनका के जानेला. कुछ संगठन उनका मामला के आगे बढ़ावे खातिर आगे आईल ह. ऊ हमरा के 1 अगस्त के बतवली, “काल हम ईंहा दीप्ती के स्कूल में झंडा फहरायेम. ऊ लोग हमरा से नीहोरा कईले बा.” उनका ए बात के गर्व बा. बाकिर ऊ इ बात से फिकिर में बाड़ी कि उनका लगे “समारोह में पहीर के जाए लायक नीमन साड़ी नईखे.”

एही बीचे, आईएनए के ई पुरान सिपाही आपन अगिला लड़ाई के तईयारी करतारी. ई पुरनिया कहतारी, “नेताजी कहले रहलन ‘दिल्ली चलो’ 15 अगस्त के बाद इसने करेम. जे केंद्र सरकार तब ले हमरा के स्वतंत्रता सेनानी ना सकारी, त हम धरना प बईठ जायेंम. ‘दिल्ली चलो’ हमहूं अब ईहे करेंम.”

औरी ऊ इसने करिहें, चाहे साठ साल बादे सही. मन में आस लहले ऊ गावेली “कदम कदम बढ़ाए जा...”

फोटो: पी साईनाथ