پنجاب کی زندگی ہے کبڈی کا کھیل

’’کوڈی، کوڈی، کوڈی، کبڈی، کبڈی، کبڈی...‘‘

مٹی کے دائرہ کے اندر آوازیں بلند ہوتی جارہی تھیں – ریڈروں (حملہ آوروں) اور اسٹاپروں (دفاع کرنے والوں) کے درمیان مقابلہ کا منظر سامنے تھا۔ مقام تھا دہلی کے باہر سنگھو اور ٹکری بارڈروں پر ۲۰۲۰-۲۰۲۱ کے کسانوں کے احتجاج کا۔ کبڈی کا رواں تبصرہ مزاحمتی نعروں اور تقریروں میں مدغم ہو رہا تھا۔ لاکھوں کسانوں اور زرعی مزدوروں نے یہاں اس وقت تک احتجاج کیا تھا جب تک کہ تین زرعی قوانین کو منسوخ نہیں کر دیا گیا۔

ستمبر ۲۰۲۱ میں ہفتہ بھر کے ٹورنامنٹ کے اختتام پرایک نیا کھلاڑی ابھرا۔ یہ کھلاڑی تھا روہتک ہریانہ سے تعلق رکھنے والا شیلو بلہارا۔ شیلو بلہارا نے بعد میں پنجاب کے کبڈی ستاروں کی اُس لیگ میں شمولیت اختیار کی، جہاں کم آمدنی والے اور پسماندہ طبقوں سے تعلق رکھنے والے نوجوان کو مالی طور پر مضبوطی مل رہی ہے۔

سرکل اسٹائل (دائرہ کار طرز کی) کبڈی ان اولین کھیلوں میں سے ایک ہے، جسے پنجاب کے گاؤوں کے لڑکے کھیلتے ہیں۔ اس کھیل کو پسند کیے جانے کی وجہ اس کی سادگی میں مضمر ہے۔ اس میں کسی ساز و سامان کی ضرورت نہیں ہوتی ہے۔ اکثر کھلاڑی جوتے بھی نہیں پہنتے ہیں۔ کھیل کے اصول و ضوابط سادہ ہیں اور یہ مٹی پر کھیلی جاتی ہے۔

چونکہ یہ کھیل جسمانی طور پر سخت محنت کا مطالبہ کرتا ہے، اس لیے یہ ان نوجوانوں کے لیے ایک اضافی کشش ہے، جو مضبوط باڈی (جسم) بنانے میں فخر محسوس کرتے ہیں۔ یہ کھیل – جسے پنجاب طرز کی کبڈی بھی کہا جاتا ہے – میلوں، عوامی اجتماعات اور مقامی ٹورنامنٹوں میں کھیلا جاتا ہے۔

پنجاب میں کبڈی کا موسم زرعی کیلنڈر کے ساتھ ساتھ چلتا ہے۔ یہ اکتوبر میں، فصل کی بوائی کے بعد شروع ہوتا ہے اور اپریل تک جاری رہتا ہے، جب فصل کی کٹائی شروع ہوتی ہے۔

باہو اکبر پور گاؤں کے ایک معمولی کسان کے بیٹے شیلو بلہارا سال ۲۰۲۵ میں ٹورنٹو کی یونائٹیڈ بریمپٹن کبڈی کلب کے سب سے زیادہ معاوضہ لینے والے کھلاڑیوں میں شامل تھے۔ کلب کے اسٹار کھلاڑی تین مہینے کے معاہدہ کے لیے ۵۰ سے ۷۰ لاکھ روپے وصول کرتے ہیں۔ بڑے اسٹاپر کے طور پر وہ اب تک ایک درجن سے زیادہ ٹریکٹر بھی جیت چکے ہیں۔

بلہارا کا عروج ان سینکڑوں نوجوانوں کی سماجی اور معاشی حیثیت میں کبڈی کی وجہ سے آئی تبدیلی کی عکاسی کرتا ہے۔

’’اگر میں کبڈی نہ کھیلتا، تو ایک سائیکل خریدنا بھی میرے لیےایک چیلنج ہوتا،‘‘ سونی سنگھ کہتے ہیں۔ ان کی کہانی بھی اسی دائرہ میں گھومتی ہے۔ پنجاب کے مانسا ضلع کے بھادڑا گاؤں میں ایک دلت فیملی میں پیدا ہوئے سونی کے والد ایک زرعی مزدور تھے۔ اس گاؤں پراعلیٰ ذات کی جاٹ سکھ برادری کا غلبہ تھا۔ ’’میں نے بھی فیملی کی آمدنی میں اضافہ کے لیے دوسروں کے کھیتوں میں کام کیا۔ غربت سے نجات کے لیے میں نے ایک بار مسلح افواج میں شمولیت کی کوشش کی تھی، لیکن کبڈی کھیلتے ہوئے آنکھ میں چوٹ لگنے کی وجہ سے میڈیکل میں ناکام ہو گیا،‘‘ وہ بتاتے ہیں۔

چوٹ کے بعد سونی نے پوری توجہ کھیل پر مرکوز رکھی۔ اس کھیل میں ان کی قابلیت نے ان کی فیملی کو دو کمروں کے گھر سے گاؤں کے ایک بنگلہ میں منتقل ہونے میں مدد کی۔

’’کبڈی نے مجھے پیسہ، شہرت اور عزت سب کچھ دیا۔ آج میرا پورا گاؤں اس بات پر فخر کرتا ہے کہ میں نے اپنے گاؤں کے نام کو پورے پنجاب اور بیرون ملک تک میں پہنچا دیا ہے،‘‘ ۲۷ سالہ نوجوان، جو اپنے گاؤں سے تعلق کی وجہ سے ’سونی بھادڑا‘ کے نام سے مشہور ہیں، کہتے ہیں۔

سونی پنجاب میں این آر آئی نکودر کلب کے لیے کھیلتے ہیں، اور بیرون ملک اپنا کریئر بنا چکے ہیں۔ پچھلے تین چار سالوں کے دوران وہ نیوزی لینڈ، آسٹریلیا اور انگلینڈ میں کھیل چکے ہیں۔ سونی کہتے ہیں، ’’آج تک میں نے ۱۸ سے ۲۰ موٹر سائیکلیں جیتی ہیں، جن میں ایک ہارلے ڈیوڈسن بھی شامل ہے۔‘‘

پچیس سالہ من پریت سنگھ ’منی دیال پور‘ کے نام سے مشہور ہیں۔ وہ ایک سیکورٹی گارڈ کے بیٹے ہیں۔ انہوں نے نویں جماعت کے بعد اسکول چھوڑ دیا تھا، اور کچھ وقت اسپتال میں بطور خدمت گار کام کیا تھا۔ لیکن کبڈی نے ان کی زندگی بدل دی ہے۔ سال ۲۰۲۲ کے بعد سےانہوں نے نیوزی لینڈ میں چار اور آسٹریلیا اور انگلینڈ میں دو دو سیزن کھیلے ہیں۔

’’میں نے اپنے گاؤں میں ایک گھر بنانے کا خواب دیکھا ہے۔ میں نے اپنے والد سے بھی کہا ہے کہ وہ کام پر جانا چھوڑ دیں، لیکن وہ اب بھی اپنی روزی روٹی کمانے پر اصرار کرتے ہیں،‘‘ من پریت کہتے ہیں۔ ان کا گاؤں، دَیال پور (۲۰۱۱ کی مردم شماری میں ڈائل پور درج ہے)، کپورتھلا اور جالندھر اضلاع کے درمیان واقع ہے۔

سونی اور من پریت دونوں کو بیرون ملک سائن کرنے پر تین مہینے کے لیے ۱۵ لاکھ روپے کا کانٹریکٹ ملتا ہے۔ ان کا کہنا ہے کہ یہ ایک مشکل کھیل ہے۔ اس میں گھٹنے اور کندھے کی چوٹیں عام ہیں۔ لیکن مالی منفعت اسے کم آمدنی والے کنبوں کے لڑکوں کے لیے پرکشش بنا دیتی ہے۔

سال ۲۰۱۰ اور ۲۰۱۶ کے درمیان، جب شرومنی اکالی دل اقتدار میں تھی، تو پنجاب حکومت نے ہر سال کبڈی ورلڈ کپ کا انعقاد کیا اور اس کھیل کو مالی طور پر فائدہ مند کریئر میں تبدیل کر دیا۔ ایک اندازہ کے مطابق پنجاب میں اب گھریلو ٹورنامنٹس کا مجموعی سالانہ بجٹ تقریباً ۲۵۰ کروڑ روپے ہے، جب کہ بیرون ملک مقابلوں میں مزید ۱۵۰ کروڑ روپے کا اضافہ ہو جاتا ہے۔

سال ۱۹۹۰ کے بعد سے کبڈی ایشیائی کھیلوں کا حصہ رہی ہے، اور پرو-کبڈی لیگ کے ذریعہ شہری گھروں میں داخل ہوگئی ہے۔ لیکن یہ ایک مختلف انداز کا کھیل ہے، جسے معیاری شکل دیا گیا ہے، اور جو مستطیل نما کورٹ پر کھیلا جاتا ہے۔ زیادہ تر قومی اور بین الاقوامی ٹورنامنٹ سنتھیٹک مَیٹ (گدّوں) پر کھیلے جاتے ہیں۔ اب گھریلو مقابلے بھی آہستہ آہستہ مٹی کے فرش سے میٹ کی طرف منتقل ہو رہے ہیں۔ کھلاڑی میٹ کی سطحوں کے لیے ڈیزائن کیے گئے چپٹے سول والے جوتے پہنتے ہیں۔

سرکل اسٹائل کبڈی اب بھی مٹی کی سطح پر کھیلی جاتی ہے، جس کی پچ دائرہ کی شکل کی ہوتی ہے اور جس کا قطر ۲۲ میٹر ہوتا ہے۔ ہر ٹیم میں ریڈر اور اسٹاپر ہوتے ہیں۔ جب ریڈر مخالفین کے دائرہ میں داخل ہوتا ہے، تو اس کا سامنا چار اسٹاپروں سے ہوتا ہے۔ جس اسٹاپر کو ریڈر نے پہلے چھوا اسے ریڈر کو اپنے ژون میں واپس جانے سے روکنا ہوتا ہے۔ اس وقت کھیل ایک کے مقابلہ ایک کا ہو جاتا ہے، جس میں جسمانی حملے کی اجازت نہیں ہوتی ہے۔ ہر ریڈ میں ایک ہی اصول لاگو ہوتا ہے: چار اسٹاپر میدان میں اترتے ہیں، اور ہر کامیاب ریڈ کے بعد ریڈر کی ٹیم کو ایک پوائنٹ ملتا ہے، جبکہ ناکام ریڈ کے بعد مخالف ٹیم کو ایک پوائنٹ ملتا ہے۔ عام طور پر ایک ٹیم ۱۲ کھلاڑیوں پر مشتمل ہوتی ہے، لیکن کچھ دیہی ٹورنامنٹس میں کھلاڑیوں کی تعداد مختلف ہو سکتی ہے۔

اس طرز کی کبڈی میں کھیل کے باضابطہ ڈھانچے یا پہچان کا فقدان ہوتا ہے۔ یہ کھیل عوام کی حمایت سے ترقی کی منازل طے کر رہا ہے اور شاید یہ واحد ہندوستانی دیہی کھیل ہے، جو کسی باضابطہ نظام کے بغیر نہ صرف زندہ ہے، بلکہ سال در سال مضبوط ہوتا جا رہا ہے۔

پنجاب کے تقریباً تمام ۱۲۵۰۰ سے زیادہ گاؤوں کبڈی مقابلوں کی میزبانی کرتے ہیں۔ کسان برادری فنڈز میں اپنا حصہ ادا کرتی ہے، جب کہ گاؤں کے غیر رہائشی ہندوستانی (این آر آئی) فراخدلی سے مالی مدد فراہم کرتے ہیں۔ ریاست میں کبڈی کے مقابلوں میں داخلہ مفت ہے، کیوں کہ انہیں عام طور پر تقریب کے طور پر دیکھا جاتا ہے۔ مقابلوں کی جسامت کے لحاظ سے تماشائیوں کی تعداد ۵۰۰۰ سے ۵۰ ہزار تک ہو سکتی ہے۔

مختلف مقابلوں کی انعامی رقم میں بہت بڑا فرق ہوتا ہے۔ ایک اچھے ٹورنامنٹ کا بجٹ ۱۰ سے ۵۰ لاکھ روپے ہو سکتا ہے، اس میں کاریں، موٹر سائیکلیں، یا یہاں تک کہ کمبائن ہارویسٹر جیسے انعامات بھی شامل ہو سکتے ہیں۔ شرکت کرنے والی ہر ٹیم کو شمولیت فیس ملتی ہے، جو ۱۲ کھلاڑیوں میں بانٹ دی جاتی ہے۔ جیسے جیسے ٹیم آگے بڑھتی ہے، ادائیگیوں میں اضافہ ہوتا جاتا ہے، فاتحین کے لیے خصوصی انعامات بھی شامل ہوتے ہیں۔ انفرادی انعامات (بہترین ریڈریا اسٹاپر کے لیے) نقد اور اشیاء دونوں شکلوں میں پیش کیے جاتے ہیں۔ اونچی بجٹ والے مقابلوں میں سرفہرست کھلاڑی اکثر انفرادی انعامات، جیسے ہارلے ڈیوڈسن بائیک، ٹریکٹر یا مہندرا تھار بھی حاصل کرتے ہیں۔

سب سے بڑے ٹورنامنٹ نومبر کے بعد منعقد ہوتے ہیں، جب بہترین کھلاڑی بیرون ملک سے واپس آتے ہیں۔

’’ایک کھلاڑی، ایک تماشائی، اب ایک منتظم کے طور پر میں نے اس ٹورنامنٹ کو جیا ہے،‘‘ لیہل خورد کے رہائشی، ۴۲ سالہ بلکار سنگھ کہتے ہیں۔ ’’کبڈی کئی نسلوں سے پنجاب اور پنجابیوں کی شناخت رہی ہے۔ ہم کبڈی دیکھتے، کھیلتے اور اسٹار کھلاڑیوں کی کہانیاں سنتے ہوئے بڑے ہوئے ہیں۔‘‘

سنگرور ضلع کے لیہل خورد گاؤں کی سڑک میں کوئی خاص بات نہیں ہے۔ لیکن اس کے داخلی دروازہ پر کھڑا نائک گرجنت سنگھ کا مجسمہ ہے، جو ۱۹۷۱ کی ہند-پاک جنگ کے شہید اور ویر چکر ایوارڈ یافتہ فوجی ہیں۔ یہ گاؤں ۱۹۷۲سے اپنے بہادر بیٹے کی یاد میں ہر دسمبر میں کبڈی ٹورنامنٹ کی میزبانی کرتا آرہا ہے۔ اس سال کا ٹورنامنٹ ۱۱ سے ۱۳ دسمبر تک چلا اور نائک گرجنت سنگھ کی شہادت کے دن اختتام کو پہنچا۔

مقابلے کا آغاز ۱۱ دسمبر کوسابق فوجیوں کی تعظیم و تکریم کے ساتھ ہوا، اس کے بعد بچوں کے میچ ہوئے۔ حالانکہ تماشائیوں میں خواتین کی تعداد تقریباً نہ کے برابر تھی، لیکن منتظمین نے خواتین کا ایک نمائشی میچ منعقد کرکے ایک نئی شروعات کرنے کی کوشش کی۔ ایک نیا اضافہ ٹرالی لوڈ کرنے کا مقابلہ تھا، جس میں ٹیموں نے اناج سے بھری ۳۵ کلوگرام کی ۷۵ بوریاں منتقل کیں، اور اپنی خام طاقت اور ہم آہنگی کے لیے تماشائیوں کی داد و تحسین وصول کی۔ فائنل میچ ۲ بجے صبح تک جاری رہا۔

تقریباً ۲۶۰۰سے زیادہ ووٹروں والے اس گاؤں کی زیادہ تر آبادی جاٹ سکھوں پر مشتمل ہے، جہاں کبڈی ٹورنامنٹ کو ایک اجتماعی ذمہ داری تصور کیا جاتا ہے۔ اس میں پوری پنچایت اپنا حصہ ادا کرتی ہے، اور اس کی تیاریاں مہینوں پہلے شروع ہو جاتی ہیں۔ اس تقریب میں ایک چھوٹی دیہی معیشت پروان چڑھتی ہے، جس میں خوانچہ والے چھولے کلچے، گنے کا رس اور مونگ پھلی بیچتے ہیں اور تین دنوں میں اتنی کمائی کر لیتے ہیں جس کے لیے انہیں اکثر ایک پورا مہینہ درکار رہتا ہے۔ کھیل کے تماشائی اکثر نوجوان ہوتے ہیں، حالانکہ ہر عمر کے مرد دوپہر تک میدان میں کھڑے ہو جاتے ہیں، لیکن جیسے ہی سورج غروب ہوتا ہے اور فلڈ لائٹیں جل اٹھتی ہیں ، بزرگ افراد گھروں کی جانب لوٹ جاتے ہیں، اور نوجوانوں کو فائنل کا مشاہدہ کرنے کے لیے چھوڑ دیتے ہیں۔ کبڈی کا کھیل دیر رات تک جاری رہتا ہے۔

خواہ کناڈا ہو، امریکہ ہو، برطانیہ ہو یا آسٹریلیا، پنجابی جہاں بھی ہجرت کرکے گئے ہیں، کبڈی کا کھیل ان کے ساتھ وہاں گیا ہے۔ بیرون ملک منعقد ہونے والے ٹورنامنٹ محض کھیلوں کے مقابلے نہیں ہوتے، بلکہ ثقافتی کارنیول ہوتے ہیں، جو دوسرے ملکوں میں مقیم برادریوں کو پنجاب کی سرزمین سے جوڑتے ہیں۔

کھیل کے بیرون ملک رابطوں پر اپنے کام کے لیے پی ایچ ڈی کی ڈگری حاصل کرنے والے پنجاب لینگویج ڈپارٹمنٹ کے ریسرچ آفیسر ڈاکٹر سُکھ درشن سنگھ چہل کہتے ہیں، ’’پنجاب سے بیرون ملک ہجرت کا سلسلہ ۲۰ویں صدی کے اوائل میں شروع ہوا۔ پنجابی جہاں بھی گئے وہ اپنے ساتھ پنجاب طرز کی کبڈی لے کر گئے۔ چونکہ ہجرت کی ابتدائی لہریں پہلے کناڈا اور انگلینڈ کی جانب تھیں، اس لیے پنجاب طرز کی کبڈی پہلے انہیں ممالک میں پہنچی تھی۔‘‘

انگلینڈ میں ٹورنامنٹوں کا انعقاد ۱۹۵۰ کی دہائی سے کیا جا رہا ہے، جس کا سیزن مئی سے اگست کے اوائل تک جاری رہتا ہے۔ کناڈا میں یہ سیزن جون سے ستمبر تک ہوتا ہے، اس کے بعد امریکہ میں ٹورنامنٹ منعقد ہوتے ہیں۔ کبڈی کا غیر ملکی کیلنڈر نیوزی لینڈ میں مارچ میں شروع ہوتا ہے، اور اپریل میں آسٹریلیا منتقل ہو جاتا ہے۔ یہ عالمی پھیلاؤ اس بات کو یقینی بناتا ہے کہ کھیل پنجاب کے سینکڑوں کھلاڑیوں کے لیے سال بھر کا ذریعہ معاش فراہم کرتا رہے۔

’’انگلینڈ میں پنجابی برادری کبڈی سے گہرے طور پر جڑی ہوئی ہے۔ یہ ان کی ثقافت اور روایت کا حصہ ہے، اور یہ اپنی جڑوں سے جڑے رہنے کا ایک طریقہ بھی ہے،‘‘ ۴۷ سالہ برطانوی رکن پارلیمنٹ تن منجیت سنگھ ڈھیسی کہتے ہیں، جو ’تن ڈھیسی‘ کے نام سے مشہور ہیں۔

کبڈی کے پروموٹر کلونت سنگھا، جو تقریباً ۶۵ سال کے ہیں، بتاتے ہیں، ’’پنجاب سے آنے والا ایک نیا کھلاڑی انگلینڈ کے تین ماہ کے سیزن میں آسانی سے ۱۰ لاکھ روپے کما سکتا ہے، جب کہ اسٹار کھلاڑی ۴۰-۵۰ لاکھ روپے کی آمدنی حاصل کر سکتے ہیں۔‘‘

پنجاب سے باہر کناڈا سب سے بڑے کبڈی سرکٹ کی میزبانی کرتا ہے۔ کناڈا میں مقیم پروموٹر منجیت سنگھ لالی کہتے ہیں، ’’ہر سال تقریباً ۱۰۰ کبڈی کھلاڑی پنجاب سے کناڈا جاتے ہیں۔ ایک کھلاڑی ایک سیزن میں کم سے کم ۱۰ لاکھ روپے کماتا ہے، جب کہ سرفہرست ۱۰ سے ۱۵ کھلاڑی ۵۰ سے ۷۰ لاکھ روپے کے درمیان کمائی کرتے ہیں۔‘‘

کبڈی کی معیشت کھلاڑیوں کے علاوہ کوچوں، معاون عملے اور خاص طور پر کمنٹیٹروں کی کفالت بھی کرتی ہے۔

’’ایک کمنٹیٹرغیرملکی سیزن کے دوران ۱۰ سے ۱۲ لاکھ روپے کما سکتا ہے۔ مقامی طور پروہ فی ٹورنامنٹ ۱۰ سے ۲۰ ہزار روپے تک کی آمدنی حاصل کرتا ہے،‘‘ سنگرور سے تعلق رکھنے والے ۴۳ سالہ ستپال ماہی کھاڈل کہتے ہیں۔ وہ ۲۴ سال سے کمنٹری کا مائک سنبھالے ہوئے ہیں۔

ستپال کا تعلق ایک بے زمین دلت فیملی سے ہے۔ ان کے والد یومیہ اجرت پر کام کرتے تھے۔ ’’میں بھی ایک مزدور رہ جاتا۔ لیکن مجھے ریڈیو پر کھیلوں کی کمنٹری سننا اور کتابیں پڑھنا پسند تھا، جس سے میری صلاحیتوں میں بہتری آئی۔ کبڈی نے سب کچھ بدل دیا۔ آج میرے پاس ایک گھر ہے، ایک گاڑی ہے، اور میں آسٹریلیا، انگلینڈ اور کناڈا کا سفر کر چکا ہوں۔‘‘

ستپال جیسے کمنٹیٹر ٹورنامنٹ کی ریڑھ کی ہڈی کی حیثیت رکھتے ہیں۔ یہ اپنی پرجوش آوازوں سے ہزاروں شائقین کو اپنے سحر میں جکڑے رکھتے ہیں۔ وہ کھلاڑیوں کو متعارف کراتے ہیں، حکمت عملیوں کی وضاحت کرتے ہیں، جوش پیدا کرتے ہیں، اور جب ٹورنامنٹ عالمی سطح پر ہوتے ہیں تو ثقافتی پل کا کام کرتے ہیں۔

ایک اور کمنٹیٹر، ۳۴ سالہ امن لوپوں کہتے ہیں، ’’میں نے ۲۰۰۷ میں شروعات کی تھی، اور میری پہلی بیرون ملک اسائنمنٹ ۲۰۱۰ میں کناڈا میں ملی تھی۔ تب سے میں نے ہر ایسے ملک میں ایونٹس کور کیے ہیں جہاں پروفیشنل کبڈی کھیلی جاتی ہے۔‘‘ موگا ضلع کے لوپوں گاؤں سے تعلق رکھنے والے امن کے پاس صرف ڈیڑھ ایکڑ زمین ہے۔ لیکن کبڈی کی کمنٹری سے ہونے والی کمائی نے اس بات کو یقینی بنایا ہے کہ وہ ایک ’بہتر گھر‘ میں رہیں اور ایک ایس یو وی ڈرائیو کریں۔

سابق کھلاڑی گرلال سنگھ گھنور، جو پنجاب کبڈی ایسوسی ایشن کے صدر بھی ہیں، کے لیے یہ کھیل عوامی زندگی میں داخل ہونے کا ایک لانچنگ پیڈ بن گیا۔ اب وہ عام آدمی پارٹی (آپ) کے ٹکٹ پر گھنور سے ایم ایل اے ہیں۔ پنجاب کبڈی ایسوسی ایشن ریاست کی چار اہم کبڈی ایسوسی ایشنوں میں سے ایک ہے۔ ان میں موجودہ اور سابق کھلاڑی اور پروموٹرز شامل ہیں۔ ان کے پاس ٹیمیں رجسٹرڈ ہیں اور وہ آزادانہ طور پر ٹورنامنٹس کا انعقاد کرتے ہیں۔

جب لدھیانہ کے گاؤں غالب کلاں سے تعلق رکھنے والے ۴۳ سالہ جگدیپ سنگھ، جو ’جگاّ غالب‘ کے نام سے مشہور ہیں، نے ۲۰۰۱سے ٹورنامنٹوں میں شریک ہونا شروع کیا، تو اس وقت مالی انعامات محدود تھے۔ وہ تقریباً ۲۰ سال تک کھیلتے رہے اور اب بطور کوچ اور ٹیلنٹ اسکاؤٹ کام کرتے ہیں۔ وہ کہتے ہیں کہ گزشتہ ۱۵سالوں میں اس کھیل میں پیسہ کئی گنا بڑھ گیا ہے۔

لیکن اس کھیل کی کامیابی کے ساتھ خطرناک رقابتوں میں بھی اضافہ ہوا ہے۔ سال ۲۰۲۲ میں برطانوی-ہندوستانی کھلاڑی ۳۸ سالہ سندیپ ننگل امبیاں، جو کھیل کے سرفہرست ستاروں میں سے ایک تھے اور انہوں نے منشیات کے خلاف مہم چلایا تھا، کو جالندھر کے ملّیاں خورد میں ایک ٹورنامنٹ کے موقع پر گولی مار کر ہلاک کر دیا گیا۔ پولیس کو شبہ ہے کہ قتل کبڈی کی دشمنی کی وجہ سے ہوا ہے۔

ایک اور سیاہ پہلو صنفی تفاوت ہے۔ یہاں خواتین کے لیے بہت کم مواقع دستیاب ہیں۔ یہ ایک خلا ہے جو میجر کبڈی لیگ – چار ایسوسی ایشنوں میں سے ایک – اپنے بینر تلے ہر ٹورنامنٹ میں لڑکیوں کے کم از کم ایک میچ کو شامل کرنے کی کوشش کر رہی ہے۔

مجموعی طور پر دیکھا جائے، تو کبڈی واقعی دیہی پنجاب کے دل کی دھڑکن ہے اور اپنی پہچان کو برقرار رکھے ہوئی ہے۔

کھلاڑیوں کو عوامی ہیرو کی حیثیت حاصل ہوتی ہے، اور گیتوں اور گاؤں کے اجتماعات میں ان کی تعظیم و تکریم کی جاتی ہے۔ دلجیت دوسانجھ سے لے کر آنجہانی سدھو موسے والا تک کئی گلوکاروں نے اس کھیل کو خراج تحسین پیش کیا ہے۔ ببو مان کے گیت ’’کبڈی کبڈی‘‘ کو یو ٹیوب پر ۱۱ ملین سے زیادہ بار دیکھا جا چکا ہے۔

اور جب وقت ضرورت مدد کی بات آتی ہے، تو کھلاڑی سب سے آگے ہوتے ہیں۔ ستمبر ۲۰۲۰ میں نافذ کیے گئے تین زرعی قوانین کے خلاف دہلی کی سرحدوں پر نومبر ۲۰۲۰ میں شروع ہونے والا احتجاج ایک سال سے زیادہ عرصہ تک جاری رہا، جب تک کہ ان قوانین کو منسوخ نہیں کر دیا گیا۔ جیسے جیسے دن ہفتوں اور پھر مہینوں میں بدلتے گئے (اور یہ سلسلہ لامتناہی طور پر آگے بڑھتا رہا)، تو عوام کی حمایت بھی ملتی گئی۔ اس دوران ڈاکٹروں نے رضاکارانہ طور پر کام کیا، مقبول گلوکاروں نے پرفارم کیا، اور کبڈی کھلاڑیوں نے احتجاج کے مقام کو کھیلوں کے میدان میں تبدیل کر دیا، تاکہ حوصلہ برقرار رہے۔

سال ۲۰۲۰-۲۱ میں ملک بھر کے کسان تین زرعی قوانین کے خلاف احتجاج کرنے کے لیے اکٹھا ہوئے تھے۔ یہ قوانین تھے: زرعی پیداوار کی تجارت و کاروبار (فروغ اور سہل آمیزی) کا قانون، ۲۰۲۰؛ کاشت کاروں (کو با اختیار بنانے اور تحفظ فراہم کرنے) کے لیے قیمت کی یقین دہانی اور زرعی خدمات پر قرار کا قانون، ۲۰۲۰؛ اور ضروری اشیاء (ترمیمی) قانون، ۲۰۲۰ ہیں۔ ان قوانین کو ستمبر ۲۰۲۰ میں پارلیمنٹ سے پاس کرایا گیا۔ حکومت نومبر ۲۰۲۱ میں ان قوانین کو منسوخ کرنے پر راضی ہو گئی۔ اس احتجاج پر پاری کی اسٹوریز پڑھیں: زرعی قوانین کے خلاف احتجاجی مظاہرے: مکمل کوریج

سنگھو اور ٹکری میں، کھلاڑیوں نے صرف میچوں میں ہی حصہ نہیں لیا، بلکہ انہوں نے احتجاج میں نظم و ضبط قائم کرنے اور رسد کا انتظام کرنے کے لیے رضاکارانہ طور پر کام کیا اور لنگر میں حصہ داری ادا کی، جس سے کھیل اور معاشرہ کے درمیان تعلق کو تقویت ملی۔

فٹبالر سے کبڈی کے پروموٹر بنے ٹونی سندھو، جو ٹورنامنٹ کا انعقاد کرنے والی میجر کبڈی لیگ کے سکریٹری ہیں، کہتے ہیں کہ جب بھی کسانوں سے متعلق کوئی مسئلہ پیش آتا ہے، تو کبڈی کھلاڑی ہمیشہ سب سے پہلے سامنے آتے ہیں۔

سال ۲۰۲۰ کے افتتاحی کبڈی ورلڈ کپ میں ہندوستانی ٹیم کے کپتان رہے منگت سنگھ مانگی ان جذبات کی وضاحت کرتے ہیں، ’’کبڈی ایک دیہی کھیل ہے، جو دیہی نوجوانوں کے ذریعہ کھیلا جاتا ہے اور عوامی مدد سے جاری و ساری ہے۔ کبڈی کے کھلاڑی اس سے کیسے دور رہ سکتے ہیں؟‘‘ جالندھر ضلع کے بگاّ گاؤں کے ۴۱ سالہ نوجوان کہتے ہیں، جنہیں کبڈی کا ’’بادشاہ‘‘ بھی کہا جاتا ہے۔ ’’میں آج جو کچھ بھی ہوں وہ کبڈی اور اس کھیل کی پشت پر کھڑے عوام کی وجہ سے ہوں۔‘‘

ترجمہ نگار: شفیق عالم