پاری لائبریری: سال ۲۰۲۵ کی کچھ خاص باتیں

سال ۲۰۲۵ میں پاری لائبریری نے اپنے آرکائیو میں ۱۰۲ رپورٹیں شامل کیں۔ ہمارا فوکس اہل وطن کے حقوق، نفرت آمیز تقاریر، محنت سے متعلق سروے، ماحولیاتی انصاف سمیت کئی چیزوں پر رہا۔

ہمارے ادبی گوشہ میں خاص طور پر گہماگہمی رہی۔ ہم نے میگھالیائی برادریوں کی کہانیوں کی باتصویر کتابیں (ایلاری کی جینسیم، کونگ تھونگ کی دُھنیں) اور بنگال کے پٹّ چتر فنکاروں کے ذریعہ تیار کتابیں شامل کیں، جو نئے قارئین کے لیے تاریخ کی باتیں بتاتی ہیں (تاریخ کے پہلے سبق: کھیل اور گیمز، کپڑے اور لباس)۔

مانسونی سیلاب اور ریکارڈ توڑ گرمی کے بعد اس سردی میں ہمارے ارد گرد کی ہوا تیزی سے زہریلی ہو رہی ہے۔ ہماری لائبریری میں ماحولیاتی تبدیلی پر رپورٹیں پہلے کی طرح ہی بامعنی ہیں۔

ہندوستان نے سال کے پہلے نو مہینوں کے ۹۹ فیصد دنوں کے دوران شدید موسمی حالات کا سامنا کیا، جو تمام ۳۶ ریاستوں اور مرکز کے زیر انتظام علاقوں میں درج کیے گئے۔ یعنی ۲۷۳ میں سے کل ۲۷۰ دن اس قسم کے تھے۔ ان حالات میں ۴۰۶۴ لوگوں کی جانیں تلف ہوئیں، ۴۷ء۹ ملین ہیکٹیئر فصلوں پر اثر پڑا، ۹۹ ہزار ۵۳۳ گھر برباد ہوئے اور تقریباً ۵۸ ہزار ۹۸۲ جانور ہلاک ہوئے۔

لائبریری کی نئی رپورٹس ہوائی آلودگی، لو اور ماحولیاتی تبدیلی کے خطرے میں زندگی بسر کر رہے لوگوں پر مخالف اثرات سے متعلق پہلوؤں پر روشنی ڈالتی ہے۔

ہم نے غذائی تحفظ پر مبنی دستاویز شامل کیے – قومی اور بین الاقوامی تناظر میں غذائی انصاف کی وسیع سمجھ میں مدد کے لیے رسائی، استطاعت اور انسانی جسم میں جاذبیت۔ تقریباً ۲۹ فیصد عالمی آبادی، یعنی ۳۳ء۲ ارب لوگ درمیانی یا خطرناک طور پر غذائی عدم تحفظ میں زندگی بسر کرنے کو مجبور ہیں، یعنی ان کے پاس مناسب مقدار میں کھانے تک باقاعدہ رسائی نہیں ہے۔ ہم نے اپنے ملک میں زراعت پر مبنی رپورٹوں کے ساتھ اس سمجھ کو مضبوط کیا۔

ساتھ ہی حکومت ہند کی شماریات اور پروگراموں کے نفاذ کی وزارت کے ذریعہ کرائے گئے پیریاڈک لیبر فورس سرویز (پی ایل ایف ایس) پر ہماری رپورٹ بھی دیکھیں۔ ان سروے میں مزدوروں کے روزگار کی حالت اور وہ جس شعبہ (کھیتی، دوئم یا سوئم) میں کام کرتے ہیں، اس سے متعلق ڈیٹا شامل ہے۔ پی ایل ایف ایس رپورٹ محنت پر مرکوز ہمارے گوشہ کا ایک ضروری حصہ ہے، جس میں ہندوستان اور دنیا میں افرادی قوت کی بدلتی ہوئی حرکیات پر رپورٹ ملیں گی۔

ہمارے کام کاج کا مرکزی نقطہ ہمارے رضاکار ہیں جو ہر رپورٹ کے لیے ’فوکس اور فیکٹائڈز‘ تیار کرتے ہیں۔ ہمارے ساتھ کالج کے طلباء، ملازمت پیشہ اور ریٹائرڈ پروفیشنل بطور رضاکار کام کرتے ہیں، جو مشکل اور بڑے موضوعات کو آسان زبان میں منتقل کرتے ہیں۔ وہ ہمیں اپنا وقت اور صلاحیت فراہم کرتے ہیں اور اس بات کو یقینی بناتے ہیں کہ ہمارے آرکائیو تک لوگ آسانی سے پہنچیں اور وسیع معلومات سے لیس ہوں۔

فی الحال پاری لائبریری کے پاس تقریباً ۴۵۰ رضاکار ہیں، جنہوں نے شروعات سے ہی ہمارے ساتھ کام کیا ہے۔

سال ۲۰۲۵ ختم ہو رہا ہے اور ہمیں اپنے کچھ باقاعدہ رضاکاروں کے تاثرات کو پیش کرتے ہوئے خوشی ہو رہی ہے جو اپنے تجربات اور اہم چیزوں کے بارے میں بتا رہے ہیں۔

یڈینی ستیہ مورتی

آئی آئی ٹی بامبے میں انوائرمنٹل سائنس اور انجینئرنگ میں ایم ٹیک کی تعلیم

وہ ہر رپورٹ جس کے لیے میں نے ’فوکس اور فیکٹائڈز‘ بنائے، انہوں نے مجھے نیا نظریہ دیا۔ کچھ رپورٹ، جیسے Tainted Carpets: Slavery and child labour in India’s hand-made carpet sector یا Climate India 2024: An assessment of extreme weather events نے مجھے پریشان کیا اور انہیں پڑھنے میں مجھے کئی دن لگے۔ مگر میں جو پڑھ رہی ہوں، اسے دیکھوں تو ان رپورٹوں پر کام کرنے سے مجھے متعلقہ موضوعات کو بہتر طریقے سے سمجھنے کے مواقع حاصل ہوئے۔

خواہ وہ ایک صفحہ کا پوسٹر ہو یا ۵۰۰ صفحات کی شماریاتی رپورٹ، پاری لائبریری کے ’فوکس اور فیکٹائڈز‘ کا ڈھانچہ آپ کو موضوعات کی جڑ تک لے جاتا ہے۔ بدقسمتی سے ان میں سے کئی رپورٹ ابھی تک مین اسٹریم کے پاس دستیاب نہیں ہے۔

ابوذر شیخ

بیش از ۳۰ سال کے تجربات پر مبنی ترسیل اور مالیاتی خدمات کے ماہر

میرے پاس خالی وقت تھا اور میں کچھ اچھا کرنا چاہتا تھا۔ پاری لائبریری کے ساتھ کام کرنا ایک شاندار موقع تھا۔ پاری جو کام کرتا ہے وہ میرے لیے بالکل صحیح تھا، کیوں کہ یہ ہمیشہ سے میری پسندیدہ چیزوں میں سے ایک رہا ہے۔

ایک قاری کے طور پر میں لائبریری میں موضوعات کی بہتر ترتیب اور تلاش کرنے کی سہولت دیکھنا چاہوں گا۔

جیری جوز

ماحولیاتی سائنس داں، کوٹّایم، کیرالہ

پاری سے میرا تعارف ویب سائٹ لانچ ہوتے وقت پی سائی ناتھ کے ایک لکچر سے ہوا تھا۔ دیہی ہندوستان کا آرکائیو بنانے کی یہ کوشش جو ’’ایک براعظم کے اندر آباد برصغیر‘‘ جیسا ہے، حوصلہ افزا اور اپنی نوعیت کی انوکھی کوشش تھی۔ اس کے لیے بطور رضاکار کام کرنا پاری کی لگاتار بڑی ہوتی لائبریری میں دور سے مدد کرنے کا میرا طریقہ ہے۔

قابل تعریف بات یہ ہے کہ لائبریری میں آسانی سے سمجھ آنے والے ’فوکس اور فیکٹائڈز‘ والی رپورٹس موجود ہیں۔ مجھے اس کا بڑھا ہوا دائرہ پاری کی صحافت کے لیے بہت فائدہ مند لگتا ہے۔ مجھے اپنی مہارت کے شعبہ میں اور اس سے باہر کی رپورٹس پر کام کرنے میں مزہ آیا، جہاں تحقیق کا کام خود میں سیکھنے کا ایک تجربہ تھا۔

امید ہے کہ ۲۰۲۶ میں ہم جسمانی معذوری اور بزرگوں پر اپنی رپورٹس کے مجموعہ کو مزید مضبوط کریں گے، جس میں تلخیص اور اہم نکات بھی شامل ہوں گے۔

پاری لائبریری اپنے ۱۲ویں سال میں داخل ہو رہی ہے۔ ہم مزید رپورٹس اور دستاویز لائیں گے جو دیہی ہندوستان کو اس کی تمام شکلوں میں سمجھنے میں ہماری مدد کریں گے۔ ہم اپنے پرانے اور نئے رضاکاروں کے ساتھ کام کرنے کے لیے پرامید ہیں اور اپنی لائبریری کو مضبوط بنائیں گے۔

اگر ہمارے کام میں آپ کی دلچسپی ہے اور آپ پاری لائبریری اور پاری میں تعاون کرنا چاہتے ہیں، تو براہ کرم یہاں دیے گئے والنٹئر فارم کو بھریں۔ ہم فری لانس اور آزاد قلم کاروں، رپورٹروں، فوٹوگرافروں، فلم سازوں، ترجمہ نگاروں، مدیروں، خاکہ نگاروں اور محققین کا استقبال کرتے ہیں کہ وہ ہمارے ساتھ کام کریں۔

کوَر ڈیزائن: سودیشا شرما

ترجمہ نگار: قمر صدیقی