பாரி நூலகம்: 2025ம் ஆண்டு குறித்த பார்வை

2025ம் ஆண்டில் பாரி நூலகம் 102 அறிக்கைகளை சேர்த்திருக்கிறது. பழங்குடியினர் உரிமை, வெறுப்பு பேச்சுகள், தொழிலாளர் ஆய்வுகள், காலநிலை நீதி போன்ற பல விஷயங்களில் எங்களின் கவனம் இருந்தது.

குறிப்பாக எங்களில் இலக்கிய பிரிவு பரபரப்பாகவே இருந்தது. மேகாலயா மக்களின் படக்கதை புத்தகங்களை (Ilari's Jaiñsem, The Tunes of Kongthong) நாங்கள் சேர்த்தோம். வரலாற்றின் கருத்துகளை இளம் வாசகர்களுக்கு கொண்டு சேர்க்கும் வங்கத்தின் படச்சித்திரக் கலைஞர்களின் புத்தகங்களையும் (First History Lessons: Sports and Games, Clothes and Attire) சேர்த்தோம்.

வரலாறு காணாத கோடைக்கால வெப்பம், மழைக்காலம் ஆகியவற்றை தொடர்ந்து இந்த குளிர்கால காற்று விஷமாகிக் கொண்டிருக்கும் நிலையில், எங்களின் நூலகத்தில் உள்ள காலநிலை மாற்ற அறிக்கைகள் எப்போதும் போல தீர்க்கமாக இருக்கின்றன.

இந்த வருடத்தின் முதல் ஒன்பது மாதங்களின் 99 சதவிகித நாட்களில் இந்தியா தீவிர வானிலை நிகழ்வுகளை எதிர்கொண்டது. 36 மாநிலங்கள் மற்றும் யூனியன் பிரதேசங்களில் இதுவே நிலை. மொத்த 273 நாட்களில் 270 நாட்கள் இப்படித்தான் இருந்தன. இந்த நிகழ்வுகள் 4,064 உயிர்களை பறித்தது, 9.47 மில்லியன் ஹெக்டேர் பயிர்களை பாதித்திருக்கிறது, 99,533 வீடுகளை அழித்திருக்கிறது, கிட்டத்தட்ட 58,982 விலங்குகளை கொன்றிருக்கிறது.

நூலகத்தின் புதிய அறிக்கைகள் காற்று மாசு, வெப்ப அலைகள் மற்றும் காலநிலை மாற்றத்தின் தனிப்பட்ட தாக்கங்கள் ஆகியவை குறித்து இடம்பெற்றிருக்கின்றன.

உணவு பாதுகாப்பு பிரிவிலும் நாங்கள் தரவுகளை சேர்த்தோம். உணவு கிடைப்பது, பெறுவதற்கான வசதி, உடலில் உணவெடுத்துக் கொள்ளும் அளவு போன்ற தரவுகளை கொண்டு நாட்டின் அளவிலும் சர்வதேச அளவிலும் விரிவான வாசிப்புக்கு உதவுகிறோம். சர்வதேச மக்கள்தொகையில் 29 சதவிகிதமான 2.33 பில்லியன் மக்களுக்கு உணவு பாதுகாப்பு இல்லை. தொடர்ச்சியாக அவர்களுக்கு உணவு கிடைப்பதில்லை என்பதுதான் இதற்கு அர்த்தம். இந்த வாசிப்புக்கு செறிவூட்ட நம் நாட்டின் விவசாயம் சார்ந்த அறிக்கைகளை நாம் கொண்டிருக்கிறோம்.

மேலும் புள்ளியியல் மற்றும் திட்ட அமலாக்கத்துக்கான ஒன்றிய அமைச்சகம் நடத்தும் தொழிலாளர்களின் கணக்கெடுப்புகளையும் (PLFS) பாருங்கள். இந்த ஆய்வுகள் ஒவ்வொரு துறைக்கேற்ப, அதில் பணிபுரியும் தொழிலாளர்களின் வேலையின்மை மற்றும் வேலைவாய்ப்பு குறித்த தரவுகளை கொண்டிருக்கின்றன. PLFS அறிக்கைகள், தொழிலாளர் பற்றிய எங்களின் பிரிவின் முக்கியமான அங்கம். இந்தியா மற்றும் சர்வதேச அளவில் மாறி வரும் தொழிலாளர் வர்க்கத்தின் தன்மைகள் பற்றிய தரவுகளை அவை கொண்டிருக்கின்றன.

நாங்கள் அளிக்கும் ஒவ்வொரு அறிக்கைக்குமான ‘முக்கிய அம்சங்கள்’ தொகுக்கும் எங்களின் தன்னார்வலர்கள்தான் எங்களின் பணியின் இதயம். கல்லூரி மாணவர்கள் தொடங்கி, ஓய்வு பெற்ற பணியாளர்கள் வரை பலரும் தன்னார்வ பணியில் பங்கெடுத்து விரிவான தலைப்புகளையும் அடர்ந்த தரவுகளை வகைப்படுத்தி தெளிவான வாசிப்புக்கு அளிக்கின்றனர். தங்களின் நேரத்தையும் திறமையையும் எங்களுக்கு வழங்கி, தரவுகளின் பெட்டகம் செறிவுடன் இருப்பதை உறுதி செய்கிறார்கள்.

தற்போது பாரி நூலகத்தில் கிட்டத்தட்ட 450 தன்னார்வலர்கள் இருக்கின்றனர். தொடக்கம் தொடங்கி இவர்கள் பாரியுடன் இயங்கி வருகிறார்கள்.

2025ம் ஆண்டு முடியும் தறுவாயில், தம் அனுபவங்களையும் முக்கியமான கற்றல்களையும் பற்றி சில தன்னார்வலர்கள் பேசுவதை அளிக்கிறோம்.

யாழினி சத்தியமூர்த்தி

ஐஐடி பம்பாயில் சூழலியல் அறிவியல் மற்றும் பொறியியலில் எம்டெக் படித்து வருகிறார்

ஒவ்வொரு அறிக்கைக்கும் நான் தொகுக்கும் ‘முக்கிய அம்சங்கள்’ எனக்கு புதிய பார்வையை வழங்குகிறது. உதாரணமாக Tainted Carpets: Slavery and child labour in India’s hand-made carpet sector அல்லது Climate India 2024: An assessment of extreme weather events போன்ற அறிக்கைகள் எனக்கு கலக்கத்தை கொடுத்தது. அவற்றை ஆராய பல நாட்கள் பிடித்தன. நான் படித்துக் கொண்டிருக்கும் கல்வி சார்ந்தும் பல விஷயங்களை நான் தெரிந்து கொள்வதற்கான வாய்ப்புகளை இந்த அறிக்கைகள் வழங்கி இருக்கின்றன.

ஒரு பக்க போஸ்டரோ 500 பக்க புள்ளியியல் அறிக்கையோ, பாரி நூலகத்தின் ‘முக்கிய அம்சங்கள்’ பிரிவு, பிரச்சினையின் முக்கியத்துவத்துக்கு உங்களை இட்டுச் செல்லும். இந்த அறிக்கைகளில் பல, இன்னும் பொதுவெளியில் இல்லை என்பதுதான் துயரம்.

அபிசார் ஷெய்க்

ஊடகம் மற்றும் பொருளாதார சேவைகளில் 30 வருட அனுபவம் கொண்ட வல்லுநர்

எனக்கு நிறைய நேரம் இருந்தது. நல்ல வகையில் அதை செலவழிக்க விரும்பினேன். பாரி நூலகத்தில் தன்னார்வ பணி செய்வது சிறந்த வாய்ப்பாக இருந்தது. பாரியின் பணி மிக சரியாக இருந்தது. என்னுடைய தனிப்பட்ட ஆர்வத்தை பூர்த்தி செய்வதாகவும் அது அமைந்தது.

ஒரு வாசகராக, மேம்படுத்தப்பட்ட பட்டியலும் தேடல் சாத்தியமும் நூலகத்தில் இருக்க விரும்புகிறேன்.

ஜெர்ரி ஜோஸ்

கேரள கோட்டயத்தில் காலநிலை அறிவியலாளராக இருக்கிறார்

பாரி இணையதளம் அறிமுகப்படுத்தப்பட்ட சமயத்தில் பி.சாய்நாத் கொடுத்த உரைதான் எனக்கு அறிமுகம். “ஒரு துணைக் கண்டத்துக்குள் ஒரு கண்டமாக அமைந்திருக்கும்” கிராமங்களை ஆவணப்படுத்துவது முக்கியமான முதல் முயற்சி ஆகும். என்னுடைய தன்னார்வ பணி என்பது தொடர்ந்து விரிவடைந்து வரும் பாரி நூலகத்துக்கான என்னுடைய பங்களிப்பு ஆகும்.

‘முக்கிய அம்சங்கள்’ என்கிற முன்னிறுத்தலுடன் பாரி நூலகம், அறிக்கைகளை அளிப்பது பாராட்டத்தக்கது. விரிவான இந்த தன்மை பாரியின் இதழியலுக்கு உதவுவதாக நான் நினைக்கிறேன். என்னுடைய திறனுக்கான் வெளியிலும் அதற்கு வெளியேயும் பணியாற்றுவதன் மூலம் நானும் பல விஷயங்களை கற்றுக் கொள்கிறேன்.

2026ம் ஆண்டில், மாற்றுத்திறனாளிகள் மற்றும் மூத்தவர்களுக்கான அறிக்கைகளை முக்கிய அம்சங்களுடன் கொண்டு வருவோம் என நம்புகிறேன்.

தன் 12ம் வருடத்தில் அடியெடுத்து வைக்கும் பாரி நூலகத்தில், கிராமப்புற இந்தியா பற்றிய நம் புரிதலை மேம்படுத்தும் வகையிலான அறிக்கைகளையும் ஆவணங்களையும் நாங்கள் கொண்டு வருவோம். எங்களின் பழைய மற்றும் புதிய தன்னார்வலர்களுடன் பணியாற்ற ஆர்வத்துடன் இருக்கிறோம்.

நாங்கள் செய்யும் பணி உங்களை ஈர்த்தால், பாரி நூலகம் மற்றும் பாரிக்கு நீங்கள் பங்களிக்க விரும்பினால், இங்கு தன்னார்வலர் படிவத்தை நிரப்பவும். சுயாதீன எழுத்தாளர்களையும் செய்தியாளர்களையும் புகைப்பட கலைஞர்களையும் பட இயக்குநர்களையும் மொழிபெயர்ப்பாளர்களையும் ஆசிரியர்களையும் ஓவியர்களையும் ஆய்வாளர்களையும் நாங்கள் வரவேற்கிறோம்.

முகப்பு படம்: ஸ்வதேஷா ஷர்மா

தமிழில்: ராஜசங்கீதன்