पीपुल्स फोटोग्राफर्स कलेक्टिव के सात रतन

“एसी में लागे वाला प्रदर्शनी, हाशिया पर जिए वाला लोग के कहानी देखावे के झूठा दावा करेला. ओह फोटो में जेकर कहानी होखेला, ओकरे ऊ जगह आपन ना लागे. पढ़ाई के सिलसिला में हम एक बेर दिल्ली में लागल एगो कला प्रदर्शनी में गइल रहीं. ओहिजा गरीब-गुरबा लोग के मूरति, पेंटिंग आ फोटो सब त बहुते रहे, बाकिर पूरा माहौल एतना अभिजात किसिम के रहे कि हमहूं ओहिजा अपना के पराया महसूस करे लगनी,” 22 बरिस के हैरुनिसा कहेली.

पहिलहीं से समाज से अलग-थलग कइल जा चुकल लोग जब अइसन जगह पहुंची, त सोचीं ऊ का महसूस करी? का ऊ लोग ओह जगह के आपन मान पाई? जदि हम कबो प्रदर्शनी लगइनी, त ऊ अलग तरीका के होई. खाली देवाल पर फोटो टंगला, आ ओकरा पर बतियावला भर से काम ना चली. हम चाहब कि जेकर जिनगी के कहानी बा, ऊ खुदो ओहिजा रहे, लोग से मिले-जुले आ बतियावे. प्रदर्शनी के ओह माटी आ ओह लोग से जोड़े के चाहीं, जेकर कहानी तस्वीर में बा.” हैरुनिसा के दिमाग लगातार दौड़त रहे. कैंपस के एगो कार्यक्रम के संचालन खातिर पहुंचले से पहिले उनकरा लगे बस 20 मिनट के मोहलत रहे.

नई दिल्ली के जामिया मिलिया इस्लामिया विश्वविद्यालय में मास कम्युनिकेशन में एमए करत हेयरुनिशा, उत्तरी चेन्नई के एगो मुसलमान परिवार से आवेली. ऊ आपन इलाका के पहिल लड़की बाड़ी, जे एतना दूर पढ़े निकलल बाड़ी. ऊ कहेली, “मोहल्ला से एतना दूर पढ़े आवे वाली हम पहिल बानी. हमनी के समाज में लइकी लोग के घर में रहे आ ग्रेजुएशन से आगे ना पढ़े के नसीहत देवल जाला. 18 बरिस के होखते हमरा ऊपर बियाह करे के दबाव बढ़े लागल रहे. बाकिर हम ओहिजा से निकल अइनी. फोटोग्राफी हमरा खातिर एगो नया दुनिया के दुआर खोल देलक.”

हैरुनिसा जइसन उड़ान भरे के सपना उनकर बहिन नूर निशा भी देखेली. 20 बरिस के नूर कहेली, “कोविड के बेरा स्कूल बंद हो गइल रहे. समय काटे खातिर हम पलानी अन्ना के फोटोग्राफी कार्यशाला में नाम लिखा लेनी. ओह दिन हमरा पहिल बेर डीएसएलआर कैमरा देखे आ पकड़े के मौका मिलल. बाद में जब ‘रिफ्रेमिंग नॉर्थ चेन्नई’ प्रदर्शनी में आपन खींचल फोटो देखनी, त मन बदल गइल. ओही दिन से सोच लेले रहीं कि फोटोग्राफिए करम. पहिले हम फैशन डिजाइनर बने के सोचत रहीं,” ई कहत ऊ मुस्काए लगली.

फोटोग्राफी आजादी के राह बा. नूर निशा इहे सोचेली आउर आजो उनकर सोच नइखे बदलल. बाकिर ई खाली अपना खातिर आजाद होखे के बात नइखे, ई त दुनिया से नाता जोड़े, समाज खातिर कुछ करे आ लोग के सोच बदले के राह बा. ऊ कहेली, “भारत में एह कला के खुला नजरिया से पढ़ावे वाला संस्था गिनती के बा. हम बाहर जा के पढ़े के चाहत बानी. लरिकाई में लागत रहे घरे दुनिया बा. आज फोटोग्राफी अइसन दुनिया में ले आइल बा जेकर कवनो छोर नइखे. एह कैमरा के सहारे हम दुनिया के खोजत बानी, रोज कुछ नया सीखत बानी.”

बाकिर ई राह एकदम आसान ना रहे. सन् 2013 में बाऊजी के गुजरला के बाद लइकियन के पढ़ाई जारी रखे खातिर उनकर माई दिन-रात मिहनत कइली. बरिसन ले ऊ खटत रहली. लइकी लोग संगे बइठ के हंसे-बोले के भी समय कहां रहे, इहे चिंता रहे कि कहीं ओह लोग के पढ़ाई में कवनो रुकावट ना आ जाव.

डिजिटल जर्नलिज्म में बी. वोक. डिग्री लेला के बाद, नूर लंदन के कइएक फोटोग्राफी संस्थान के फार्म भरली. दस जगह दाखिला के मंजूरियो मिल गइल, बाकिर छात्रवृत्ति ना मिले से रह गइली. ऊ कहेली, “हम प्रयास ना छोड़ब. तबले कलेक्टिव संगे फोटोग्राफर बन के काम करब. जवन काम करे में मन की खुसी मिलेला, उहे करब. अभी जवन नया प्रोजेक्ट में काम करत बानी, ओह में हैरुनिसा आ सुबा भी संगे बाड़ी.”

तेनकासी जिला के संकरनकोविल गांव के छब्बीस बरिस के सुबागोमती एम. गांव-देहात के इलाका से आवेली. ऊ कहेली, “हमनी गांव के माहौल में पलल-बढ़ल बानी. बाऊजी गांवे में एगो दोकान चलावेलन, आ माई घर संभारेली. ना माई-बाऊजी, आ ना गांव के लोग के पत्रकारिता, चाहे फोटोग्राफी के बेसी जानकारी बा.” तीन भाई-बहिन में सबले छोट सुबा आपन मन के सुनेली. जवन बात ठान लेवेली, पूरा करके मानेली.

सुबा कहेली, “जब पहिल बेर माई-बाऊजी के कहनी कि हम पत्रकारिता करे के चाहत बानी, त ऊ लोग खुस ना भइल. कहे लागल, ‘रोड पर घूम-घूम के फोटो खींचे वाली लइकी मत बन. हमनी के ई सब पसंद नइखे.’ ऊ लोग के मन रहे कि हम बिजनेस ऐडमिनिस्ट्रेशन कोर्स करीं.” सुबा माई-बाऊजी के बात मान के बीबीए के फार्म भर देली. बाकिर ओही बीच चुप्पे से पत्रकारितो में बीए खातिर अरजी दे देली. बाद में नाम दुनो जगह आ गइल. एक ओरी बीबीए, दोसर ओरी पत्रकारिता में बीए. माई-बाऊजी पत्रकारिता पढ़ावे खातिर लोग मान गइल. “जानतानी काहे? काहेकि पत्रकारिता के पढ़ाई में खाली लइकी लोग रहे. बाकी कॉलेज में लइका-लइकी दुनो संगे पढ़त रहे!” ई सब कहत ऊ हंसे लगली. ओकरा बाद ऊ पाछू मुड़ के कबो ना देखली.

पत्रकारिता में मास्टर कइला के बाद सुबा मुख्यधारा के मीडिया से जुड़ गइली. बाकिर माई-बाऊजी के फिकिर कम ना भइल. अक्सरहा रिपोर्टिग, चाहे फोटो खींचे जाए घरिया उनकर भाई, चाहे परिवार के कवनो पुरुष सदस्य संगे जाए. बाकिर 2024 में पीपुल्स फोटोग्राफर्स कलेक्टिव से जुड़ला के बाद बहुते कुछ बदले लागल. माई-बाऊजी लोग उनकर काम के मोल समझे लागल. एह दौरान फोटोग्राफी के लेके सुबा के आपन सोच आ नजरियो आउर साफ भइल.

कलेक्टिव संगे काम करत सुबा तेलंगाना, मध्य प्रदेस आ तमिलनाडु के आदिवासी आ दलित छात्र-छात्रा के कैमरा चलावल सिखावे लगली. ऊ कहेली, “एह काम से हमरा समझ में आइल कि हम सही राह पर बानी. अब हम अइसन डॉक्यूमेंट्री फोटो पत्रकार बने के सीखत बानी, जे लोग के संगे खड़ा रहेला आ लोग के आवाज बनेला. हमार गांव में आजो एगो महिला पत्रकार नइखी. एह से लइकी लोग के कैमरा पकड़े के सिखावे में हमरा सबसे जादे खुसी मिलेला.” तेनकासी के सरकारी मॉडल स्कूल में अइसने एगो फोटोग्राफी कार्यशाला के दौरान उनकर भेंट कीर्ति से भइल.

सोलह बरिस के कीर्ति एस. सम्मान पावे वाला एह टोली के सबले कम उमिर के विजेता बाड़ी. ऊ तेनकासी जिला के मायामनकुरिची गांव में रहेली आ 12वां में पढ़ेली. ऊ कहेली, “स्कूल में फोटो खींचे सीखे से पहिले लागत रहे ई काम खाली बियाह-बरात, चाहे बड़का कार्यक्रम खातिर होखेला. बाकिर अब बुझाता कि ई खाली हंसत चेहरे के कैद ना करे, आम लोग के जिनगी भी दर्ज करेला. हमरा लगे कैमरा नइखे. मोबाइले से गांव के खेत में काम करत आपन अम्मा (दादी) आ उनकर सहेली लोग के फोटो ले लीहिला.” स्कूल से दिन भर पढ़ाई करके लवटल कीर्ति, फोटोग्राफी के बात छिड़ते उत्साह से भर उठली.

अइसे उनका फोटोग्राफी पसंद बहुत बा, बाकिर ऊ एकरा में करियन ना बनावे के चाहेली. कीर्ति कहेली, “फोटोग्राफी प्रोजेक्ट नीमन लागेला, बाकिर हमरा कार्गो ऑफिसर बने के बा. बाऊजी भी खुस नइखन. उनकर मन बा, हम कल्पना चावला जइसन अंतरिक्ष यात्री बनी. ऊ हमरा ‘कीर्ति चावला’ कहके चिढ़ावेलन. बाकिर हमार मन परिवहन, हवाई सेवा, कार्गो प्रबंधन में जादे लागेला. काल्हे दाखिला के सूची निकल गइल, आ हमार नाम भारतीय समुद्री विश्वविद्यालय में आ गइल बा. अब हम ओहिजा मैरिटाइम लॉजिस्टिक्स में बीबीए करम.”

मेरिटाइम लॉजिस्टिक्स पढ़े के सपना आ फोटोग्राफी से प्यार, दुनो संगे चल रहल बा. फोटोग्राफी उनकर शौक बा. कोई आठ बरिस के रहस, जब उनकर बाऊजी संगे एगो हादसा हो गइल रहे. स्थिति कुछ ठीक भइला के बादो परिवार के जिनगी पहिले जइसन ना रहल. घर के छोट किराना दोकान आ घर-गृहस्थी के पूरा जिम्मा माई के माथ पर आ गइल. पहिल बेर कीर्ति कैमरा उठइली, त सबले पहिले आपन माई के फोटो उतरली. ऊ कहेली, “परिवार के कवनो आदमी के सफल करे के पीछे केहू चुपचाप आपन सब कुछ न्योछावर कर देवेला. हम चाहत बानी कि हमार फोटो अइसने मिहनत करे वाला के मान सम्मान देवे, जेकर मिहनत के लोग अनदेखा कर देवेला.”

मुकेश जदि कीर्ति के बात सुनतन, त जरूर उनका से सहमत होखतन. एह टोली के दोसर नौजवान आ सम्मानित सदस्य बाड़न, के. मुकेश, वेल्लोर जिला के मेलमोइल गांव के रहवइया बाड़न. उहो सोलहे के बाड़न आ सरकारी मॉडल स्कूल, वेल्लोर से 12वां के पढ़ाई करत बाड़न. उनकर फोटोग्राफी के सफर भी एगो चुपचाप मेहनत करे वाला आदमी, आपन बाऊजी, के सम्मान देवे से सुरु भइल. ऊ कहेलन, “हमार बाऊजी बहुते चुप्पा किसिम के आदमी बानी. घर में ऊ हमार बहिने से तनी-मनी बतियावेलन, बाकिर हमरा से कम. हम जेतना देखले बानी, माई-बाऊजी दूनो लोग आपस में बहुते कम बात करेला. माई कवनो काम कह देवेली, त बाऊजी चुपचाप कर देवेलेन. बस ओतने. गांव में भी ऊ केहू से बेसी ना बतियावस.”

फोटोग्राफी से गांव, माई-बाऊजी के प्रति आदर आ आपन प्रेरणा के बारे में मुकेश बड़ा संकोच से आ धीरे-धीरे बतियावेलन. ऊ बतावेलन कि पलानी अन्ना के माई पर लिखल फोटो-कहानी, जवन स्कूल में पढ़ावल गइल रहे, से उनकर मन बदलल. कैमरा उनकरा के आपन आ बाऊजी के जिनगी नया आंख से देखे के सिखवलस. ऊ कहेलन, “स्कूल पूरा होखला के बाद हम फोटोग्राफी में आगू बढ़म. अबही वेल्लोर के पारंपरिक धोबी परिवार के रोज के जिनगी के फोटो उतारत बानी. एह राह पर चले के हिम्मत हमरा फोटोग्राफी के क्लास आ ऊरुक्कु ओरु कुडी (हर गांव में एगो परिवार) किताब से मिलल.”

मुकेश कम बोलेलन. शायद उनका हमनी के बीच के दूरी आ भाषा के फर्क के एहसास बा. बाकिर उनकर फोटो देखला पर इहे बुझाला कि मुकेश के असली भाषा शब्द ना, फोट हवे. ऊ जेतना कम बोलेलन, ओकरा से कहीं बेसी आपन तस्वीर सब के मार्फत कह देवेलन.

पुदुकोट्टई जिला के कोतमंगलम गांव. इहंवा रहे वाला 32 बरिस के कार्तिकेयन आर. के संघर्ष भाषा से रहे. ऊ कहेलन, “हम तमिल छोड़ के दोसर कवनो भाषा ना जानीं. अंगरेजी कमजोर रहे, त कॉलेज में पढ़ाई मुश्किल से भइल.” ई बात ऊ अंगरेजी में कहत, आपन 2015 से 2021 के बीच के दिन इयाद करत बाड़न. चार बरिस इंजीनियरिंग पढ़ला के बादो, 2015 में उनका डिग्री ना मिलल. काहेकि ऊ परीक्षा पास ना कर सकलन. सरकारी आईटीआई में पढ़ाई के तमिल मीडियम रहे. बाकिर ऊ जवन कोर्स पढ़े के मन रहे, ओकरा में आउर विद्यार्थी ना मिले से कोर्स सुरुए ना भइल. बाऊजी इंजीनियरिंग पढ़ावे खातिर करजा लेले रहस, एह बात के अपराधबोध त रहे, बाकिर अंगरेजी माध्यम से पढ़ाई उनका बस के बाहर रहे. ऊ आपन सपना से बेसी माई-बाऊजी के उम्मीद के दबाव में पढ़त रहलन. कइएक बेर कोशिश के बाद 2021 में डिग्री त मिल गइल, बाकिर उनकर असली सपना, फोटोग्राफी, पर केहू के ध्यान ना गइल.

“हम हरमेसा से फिलिम बनावे के चाहत रहीं, बाकिर ई ना बुझात रहे, सुरुआत कहंवा से करीं. यूट्यूब पर कोर्स खोजत रहीं, बाकिर अंगरेजी कमजोर रहे आ तमिल में सिखावे वाला चीज बहुते कम मिलत रहे. एमजीआर सरकारी फिलिम आ टेलीविजन संस्थान में एडमिशन खातिर अप्लाई कइनी. इंटरव्यू देनी, बाकिर ठीक ना गइल. एकरा अलावे, स्कूल में नंबर कम रहला से सीट ना मिल पाइल.”

“तब हम प्राइवेट कॉलेज गइनी. ऊ लोग चार लाख रुपइया फीस मांगत रहे. एकरा अलावे एगो कैमरा, लैपटॉप, हार्ड डिस्क आ फोटोग्राफी, चाहे सिनेमैटोग्राफी के दू बरिस के अनुभवो चाहत रहे. एही बीच हमार चचेरा भाई कोयंबटूर के एगो स्टूडियो में काम दिलवा देलन. चार-पांच बरिस ले बियाह-सादी, तीज-त्योहार आ व्यावसायिक फोटो शूट करत रहनी. बाकिर धीरे-धीरे समझ में आइल कि हमार असली सपना त सिनेमैटोग्राफी बा. आउर इहो समझ आइल कि अबले हम बहुते समय गंवा चुकल रहीं.” कार्तिकेयन अगिला दू बरिस खूब किताब पढ़लन, इंटरनेट पर फिलिम देखलन आ सिनेमैटोग्राफी के बारीकी सब समझलन. एकरा बाद ऊ फेरु उहे प्राइवेट कॉलेज में नाम लिखावे गइलन. बाकिर तबले फीस 4 लाख से 6 लाख हो चुकल रहे. एतना खरचा उठावल उनकर बस के बात ना रहे.

एही बीच, 2023 में, कार्तिकेयन के मुलाकात एम.पलानी कुमार से भइल. ऊ पुदुकोट्टई जिला सरकारी मॉडल स्कूल के लइका-लइकी सभ के फोटोग्राफी सिखावे में उनकरा संगे जुड़ गइलन. अगिला तीन बरिस ले ऊ एह टोली संगे जगह जगह घूमत आ फोटोग्राफी कार्यशाला में हिस्सा लेवत रहलन. सन् 2026 में पारी में उनकर पहिल फोटो स्टोरी छपल.

“हम दू ठो शॉर्ट फिलिम शूट कर रहल बानी. एगो सन् 2022 में इंडियन फिल्म प्रोजेक्ट (आईएफपी) खातिर रहे. दोसरका तमिलनाडु में ‘नान मुदलवन शॉर्ट फिल्म्स’ के एगो मुकाबला खातिर रहे. एकरा टॉप 10 में जगह मिलल रहे. अबही हम काजू कारखाना के बारे में एगो डॉक्यूमेंट्री फिलिम पर काम कर रहल बानी.” कार्तिकेयन खाली पढ़ाई आ फोटोग्राफिए के बारे में बात ना कइलन. ऊ आपन दोस्ती, परिवार, आवे वाला दिन के बारे में भी खुल के बतियइलन. उनकर हर बात में आपन जीत पर भरोसा, मुसीबत से लड़े के जिद आ अडिग हिम्मत झलकेला.

“हम हार ना मननी. इंस्टाग्राम पर पलानी अन्ना के आपन खींचल फोटो सब भेजत रहनी,” पच्चीस बरिस के के. रविकुमार, नीलगिरि के जंगल से उठल एगो आउर जुझारू आवाज, कहलन. बोक्कापुरम गांव के बेट्टा कुरुंबा आदिवासी समाज से आवे वाला रविकुमार, नीलगिरी के विशेष रूप से कमजोर आदिवासी समूह महासंघ (एनपीवीटीजीएफ) के दफ्तर में काम करे वाला एगो साथी से फोटोग्राफी सिखलन. पुरनका कैमरा पर रोज-रोज अभ्यास से एह हुनर में उनकर हाथ साफ भइल. बाकिर जब एगो दोस्त से उनका एम. पलानी कुमार के बारे में पता चलल, त उनकर सीखे के ललक आउर बढ़ गइल.

“आखिर एक दिन पलानी अन्ना के जवाब आइल. ऊ पूछलन कि का फोटोग्राफी में हमार रुचि बा. ऊ हमरा खातिर टिकट लेलन आउर फोटोग्राफी के कार्यशाला में हिस्सा लेवे खातिर चेन्नई बोलवलन. ओहिजा हम किताब पढ़नी, अलग-अलग जगह घूमनी, फोटो खींचनी आ डॉक्यूमेंट्री फोटोग्राफी के बारीकी सिखनी. हम चाहत रहीं कि हमार समाज के बात दुनिया में दूर-दूर तक पहुंचे.”

बाकिर उनकर माई के ई सब ठीक ना लागत रहे. घरवाला के छोड़ के गइला के बाद ऊ आपन पांच गो बच्चा लोग के अकेले पाल-पोस के बड़ा कइले रहस. “ऊ चाहत रहस कि हम पढ़-लिख के सरकारी नौकरी करीं. ऊ हमरा पर चिल्लास, ‘हर घड़ी कैमरा लेके काहे घूमत रहेल? ई सब छोड़. पढ़ाई कर, सरकारी नौकरी हासिल कर. ई कैमरा लेके डोलला से, फोटो लेला से घर ना चली.’ बाकिर एक दिन पलानी अन्ना आपन कुछ विद्यार्थी लोग संगे हमरा घर अइलन. माई से बात कइलन. ओह दिनवा से माई हमरा डांटल छोड़ देली. बाद में हम उनकर संघर्ष पर एगो स्टोरी कइनी. हमार पहिल फोटो प्रदर्सनी में ऊ ना जा पइले रहस. बाकिर अबकी ऊ हमरा संगे चेन्नई जइहन. चेन्नई देखे के ई उनकर पहिल मौका होई.” रवि के आवाज में खुसी साफ झलकत रहे.

“आपन लोग खातिर कुछ करे के हमार सपना बा. हम देखले बानी कि कइसे बाहिर के लोग दारू पिया के आदिवासी लोग से जमीन हड़प लेवेला. खेत में दिन भर खटावेला, बाकिर मजूरी के बदला में दारू पकड़ा देवेला. लोग के लागेला कि हमनी के पइसा के जरूरत नइखे, कि हमनी मिहनत करे वाला लोग नइखी. ऊ लोग सोचेला कि दारू के एगो बोतल खातिर हमनी कुछुओ कर सकिला. बीए कइला के बादो लोग हमरा संगे इहे सलूक करेला.”

“हमनी के बारे में बाहिर के लोग जइसन देखावेला, हमरा तनिको अच्छा ना लागे. आदिवासी लोग के जमीन पर रिसॉर्ट खड़ा करके, उहे जमीन पर हमनी से मजूरी करावेला. बाकिर हमनी गुलाम नइखी. हमनी के पहचान ई ना ह. पेट पाले खातिर हमनी जी-तुड़ मिहनत करिला. हमनी इहंवा हमार माई जइसन केतना औरत लोग बा, जे अकेले आपन लइका सब के पालत-पोसत बा. कॉफी के बगइचा से जलावन के लकड़ी बीन के लावत बा, दोसर के बगइचा में खटता आ गोइठा बेच के घर चलावत बा. एही सब चलते हम आपन माई के कहानी लिखनी. हम चाहत बानी कि हमनी आपन कहानी खुद लिखीं.” आउर आपन समुदाय के लोग के जिनगी के कहानी कैमरा में समेटत, रविकुमार पीपुल्स फोटोग्राफर्स कलेक्टिव के दोसर सदस्य लोग जइसन, अब नयका पीढ़ी के ई हुनर सिखा रहल बाड़न. ऊ रोज मासिनगुडी से बस पकड़ के दू घंटा में ऊंटी पहुंचेलन. उहंवा नीलगिरी जिला सरकारी मॉडल स्कूल के लइका-लइकी सभ के फोटोग्राफी सिखावेलन.

हैरुनिसा, नूर निशा, सुबागोमती, कीर्ति, मुकेश, कार्तिकेयन आ रविकुमार. सात चेहरा, सात कहानी, सात नजरिया. बाकिर सबके सपना एक. न्याय खातिर लड़ाई, आपन समाज के आवाज बने के जिद, आ हाथ में कैमरा. एह सफर में उनकर साथी आ मार्गदर्शक बाड़न, एम. पलानी कुमार. ई सब लोग पलानी के पीपल्स फोटोग्राफर्स कलेक्टिव के हिस्सा बा.