पानी के काम, मछरी के दाम

तामिलनाडु के आर से दूर पझवेरकाडू (जेकरा के पुलीकट, इहो कहल जाला) में ज्वारनदमुख के मुहाना सांत बा. नवंबर के अमावस्या के रात. रत के 9 बजता. पानी के धार प एगो नीला नाव धार के साथे बहत खुला दरियाव के ओर बढ़ रहल बा.

नाव प सारथ कुमार, अरुण कुमार औरी सेवित कुमार खड़ियाईल बा लोग. ओ सब के गोड़ के लगे नायलोन के लपेटल जाल परल बा. इ लोग थोनिरिवु गांव के रहे वाला ह, जौन समुन्दर के आर प बसल बा. इ लोग लयिकाइयें से मछरी पकड़े के कार करता.

अइसे हम दरियाव से बेसी दूर नईखीं पोसाइल, औरी अक्सरहें दरियाव में जाए के सपनो देखीं. बाकिर हमार माई, जे हमनी के अकेलहीं पोसले बाड़ी, हमनी के सुरक्षा के ले के बेसी चिंता करस. हमनी के पानी में जाईल मने रहे.

पझवेरकाडू के हमार पहिला जात्रा तब भईल जब हम 16 साल के रहनी. हम ‘चेन्नई क्लाइमेट एक्शन ग्रुप’ से आयोजित एगो फोटोग्राफी कार्यशाला में हिस्सा लहनी. जहं फोटो पत्रकार पलानी कुमार हमार मार्गदर्शन कईलन. हम उ सब लोग के बारे में जाने खातिर उत्सुक रहनी जे लोग दरियाव के आर के आपन घर मानेला.

पानी में उतरे खातिर हमरा अभी कुछ साल औरी लागी.

आखिर हमार इ बहुत दिन के मन तब पूरा भईल जब हम पझवेरकाडू के बदलत नजारा औरी मलाह लोग के पानी के साथे बदलत नाता के बारे में जाने खातिर मछरी पकड़े वाला नीला नाव प चढ़नी.

हम ध्यान से सुनातानी, जब 30 साल के सारथ कुमार हमरा के समझावतारन, “नदी जोर से दरियाव के आर के ओर बहेला, औरी ज्वार जब उतरेला त मछरी, झींगा औरी दूसर जीव धार के साथे बहेला.”

एक घंटा बाद, रात के 10 बजे, उ जाल पसारे खातिर पहिला खंभा पानी में डालतारन. सारथ आगे कहतारन, “खंभा लगावे के मतलब बा कि आपन सांस रोक के बहत पानी के सामना कईल.” अरुण औरी सेविथ, जे लोग के उमिर 40 के लगे बा, बाक़ी खंभा लगावता. औरी इ पक्का करता कि जाल रात भर खातिर पसर जाय. हर जाल लमसम 32 मीटर लमहर होला. एगो नाव तीन चाहे चार गो जाल प्सारेला. औरी ओकरा के कम से कम 6 घंटा खातिर पानी ए छोड़ देला.

पझवेरकाडू चेन्नई से लमसम 60 किलोमीटर दूर उत्तर में, तिरुवल्लूर जिला में, पुलीकट झील के दाख्खिनी आर प बा. इ भारत के सबसे बडका नूनछार पानी वाला झील में से एगो ह, जेकर इको सिस्टम लमसम 720 वर्ग किलोमीटर क्षेत्र में पसरल बा.

इ इलाका में मछरी पकड़े वाला लमसम 40 गो बस्ती बा. जे आपन जीउका खातिर एही पानी के आसरे बा. थोनिरेवु के इ परिवार जइसन कई गो परिवार के इतिहास , उत्तरी चेन्नई के बंदरगाह औरी कल कारखाना के गली कूचा बाने से बहुत पहिले के ह. एमे से बेसी परिवार दलित समुदाय से ह.

आज रात, गांव के 10 गो औरी मलाह चार गो नाव के साथे बढ़िया पावे के आस में निकल गईल बा.

सीवान प मछरी धरे के पीछे पहिले गांव के बीच झोंझ होखे. ‘जमात मने जात के सभा’ पाडू प्रणाली के पालन करेला. इ एगो पुरान चलत आवत बेवस्था ह. जेकरा में मछरी धरे के तीन रात के बंटवारा तीन गांव के बीच होला. थोनिरेवु, लाईट हाउस औरी सेनबापल्ली- के बीच बांटल जाला. हर गांव में से लमसम 40 गो मलाह के एगो दल होला.

“हमनी जाल के पानी में लमसम 6 घंटा ले राखेनी” सारथ कहलन. “कुछ दिन हमनी खाली एक किलो झींगा ले के आवेनी. औरी कुछ दिन हमनी एक टन झींगा ले आवेनी. जब ले हमनी वापस ना आवेनी तब ले, हमनी में से केहू के ना पता रहेला कि हमनी के हाथे का आई.”

अगिला भोर में, रात में पकडल झींगा कुल के एक जघे गोट्टा कईल जाला.अरिया ले आवल जाला फेर ‘इदैपरागर’ के लगे ले जाईल जाला-इ एगो बिचौलिया होला जे मलाहन औरी महिला बिक्रेता के बीचवैया के कार करेला. जौन उ इलाका में पकडल मछरी के बेचेली.

झींगा कुल के साथे मछरी औरी केकड़ो पकड़ा जाला. बाकिर अब पकड़ाईल कुल जीव में झींगे बेसी होला. कवनो रात के, एगो मलाह 1,000 रोपया ले कमा लेला. बरखा के दिन बेसी फायदा रहेला. बाकिर ख़तरनाको बेसी रहेला. सेविथ कहेलन, “जब हमनी भारी बरखा के बेरा नदी के सीवान में आपन नाव उतारेनी, त हमनी आपन जान जोखिम में डालेनी. कब्बो-कब्बो तेज धार चाहे तूफ़ान में हमनी के जालो बह जाला.”

जो कब्बो कवनो जाल दरियाव में भुला जाला त ओ लोग के 7,000 से 8,000 ले एक जाल प नुकसान हो जाला.

सेविथ अपना दोस्त के बारे में एगो घटना बतवलन.जे तूफ़ान में अचक्के उफनात पानी में गिर गईलें. “हमनी अपना साथी वेलमुरुगन के बिलवा दहनी. सरकार हमनी के कवनो आर्थिक मदद चाहे मुआवजा ना दहलस. हमनी आपना काम प आपन जान जोखिम में डालेनी, काहे से कि हम्नीके कब्बो पटा ना होला कि आगे का होई.” पारी के उ बतावलन.

ओ सब के काम एगो चक्र में चलेला- एक रात मुहाना प मछरी पकडल, औरी दू दिन कोसास्थलैयार नदी में जाल फेंक के मछरी पकडल. ए दिन में मलाह अकेलही एगो छोटकी नाव में निकलेला. उ पानी में एगो ‘कास्ट नेट’ (एगो छोट गोल औरी वजनी जाल, जौन दूसर जाल से फरके होला. जेकर इस्तेमाल उ लोग बड़का नाव प करेला) डालेला. कुछ मिनट जोहेला. फेर उ पकड़ाईल मछरी के साथे वापिस खींच लेला. इ पकड़ में झींगा, मछरी औरी केकड़ा रहेला. गांव के बेसी लोग एहीतरे कार करेला.

सारथ एल एन टी शिपयार्ड में ड्राइवर के कार करेलन. उनका हर महीने 20,000 रोपया के कमाई हो जाला. उ कहेलन, “हमनी के इ छोट गांव में बेसी लोग रात में मछरी पकड़ेला. औरी एकरा खातिर नेट के इस्तेमाल करेला.” कुछ लोग अशोक ले लैंड में कार करेला औरी कुछ लोग एल एन टी में कार करेला.”

पानी में लमसम 10 घंटा बितावला के बाद नाव चल आवेला. जईसही हमनी आपन गोड़ बहरा धरनी, हमनी के गोड़ पल्ला, मुलायम पानी में डूब जाला. अरिया प इरुलर आदिवासी समुदाय के लोग के चारा से मछरी पकड़त देखल जा सकता. इ एगो अइसन बिधि ह जौन कई पीढी से चलल आवता.

“चारा लगा के मछरी पकडल हमनी के सबसे पुरान औरी चालत तरीका ह.” सेविथ इयाद करत कहलन. बाकिर आज हमनी खाली चारा के भरोसे मछरी पकड़ के गुजारा नईखी कर सकत.”

थोनिरेवु के एगो साथी मलाह के मन परल, “तीस साल पहिले मछरी औरी नदी के पानी दुनू बहुत नीमन हालत में रहे.” तब मछरी बेसी मिलत रहे. उनकर इसारा कोसास्थलैयार नदी के उ सब गंदगी से रहे जौन कल-कारखाना के कचरा से भइल बा.

“हमनी कई तरे के मछरी पकड़ीं. हमनी चारा वाला कांटा में नून में भेंवल ‘केलिथी’ मछरी फंसा दीं. केकड़ा ओकरा के ध ले औरी फंस जाए. एही तरे हमनी नदी के मुहाना प केकड़ा पकड़ीं.”

हालात बदल गईल बा. मलाह कुल कहेलन कि अब उ सब बेसी कर के झींगे पकड़े ला. उत्तरी चेन्नई के दरियाव के आर प पहिलही से बंदरगाह के नक्सा मौजूद बा. औरी मलाहन के कहनाम बा कि पछिला कुछ साल से दरियाव के पानी ले ओ सब के पहुंच कम हो गईल बा. गाद जमा हो गयीला से लैगून के गहराई कई जगह 3.8 मीटर से घट के करीब 2 मीटर रह गइल बा. अडानी कट्टुपल्ली बंदरगाह प्रोजेक्ट के पसराव इ अनिचित्त स्थिति के औरी गहिरा क देले बा.

सारथ कहलन, “जे (बंदरगाह) बिस्तार परियोजना पूरा हो गईल त हमनी मछरी ना पकड़ पावल जाई. चेन्नई के उत्तरी हिस्सा में तीन गो बंदरगाह काहे बा? इएकर जरुरत केकरा बा? अब इ हमनी के आपन पुरान काम ह त हमनी एकरा बिना गुजारा नयिखी कर सकत.”

इ कहानी पारी के फेलोशिप में 2025 में परकासित बा