जौन देह सुस्ताये के नईखे जानत

अमुलू कहतारी, “हम अइसन माई होखे के चाहतानी जे भोरे अपना लईकन के स्कूल खातिर जगावे. ओकनी खातिर नीमन खयका बनाये, ओकनी के संघे तनी देर बोले-बतियाये. बाकिर हमरा ओकनी के जागे के चार घंटा पहिलहीं घर से निकल जाए के परेला. औरी हम रात में अबेर से आवेनी जब ऊ सब गुम्मा नींन में होलें कुल. पूरा हफ्ता हम ईहे सोचेनी कि कब अतवार आयी औरी कब हमरा 8 घंटा सूते के मिली. दिन में तीन बेर खाए के मिली औरी आपन लईकन के संघे तनी देर घर में रहे के मिली.” बाकिर आजो इ हफ्ते के दिन ह. औरी हम आ ऊ चेन्नई के उत्तर में तिरुवोत्रियूर इलाका के एगो सकरी गली में बतिआवत चलतानी. उ आपन तरकारी के ठेला धकेलातारी औरी हम अपना कॉलेज से घरे जातानी.

हम उनका के सबेरे बहरा जात देखले रहनी. औरी अब दोपहरिया में जब हम फेर से आवतानी, त अमुलू अब्बो सड़के प बाड़ी. एगो पातीर पूनम साड़ी लपेटले, उ आपन लमसम 100 किलो के ठेलागाड़ी के पूरा ताकत से ढकेलतारी. इ 2024 के गरमी के दिन ह. तिरुवल्लूर जिला में तापमान 40 डिग्री से ऊपर पहुंच गईल बा. औरी इ मौसम के सबसे गरम दिन ह जेकरा के 44.3 डिग्री सेल्सियस अकान कईल बा. इ सब बात से 41 बरीस के इ तरकारी-तिउना बेची वाली के रोजदिना के नियम में कौनो फरक नईखे. अमुलू भारत के 10 मिलियन महिला स्ट्रीट वेंडर्स में से 40 परतिसत में से एगो हई जे गरमी से जूझतारी. औरी 68 परतिसत फेरीवाला के जइसन, ऊहो लूह के बीच में, लूह के साथे बिना बिलमले कार करतारी. हमेसा बिना-खईले.

हर दिन अमुलू करकरुआ घाम में भारी ठेला खींचत अपना ग्राहक के ध्यान खींचे खातिर ठेला प धयिल तरकारिन के नाम राग में चिल्लाली. “भर दिन चिल्लयिला से हमार कान मूना जाला. बाकिर हेतना गरमी के बादो लोग हमारा से कीनेला त हमरा बाक़ी तरकारी बेचे के बल मिलेला. कई बेर त, हेतना चलला के बादो हम खाली 20 से 30 रोपया के तरकारी बेच पावेनी. (अपना लमहर जात्रा के इ हिस्सा में) कब्बो-कब्बो, हम सड़क के अरिया फुटपाथ प बईठ जानी, औरी रोये लागेनी. औरी कुछ देर बाद आपन लोर पोंछ के उम्मीद के साथे फेर से बेचे लागेनी.” उ कहेली.

उम्मीदे एगो अईसन चीज बा जौणा के चलते अमुलू आठ साल पहिले आपन काठ के ठेलागाड़ी कीनली. उ पहिली राजगीर मजूरा के कर करत रहली पांचे बरीस के उमीर से. औरी दिन भर के मस्किल से 200 रोपया कमा पावस. उनकर लईके अभी छोट रहलें कुल. औरी पढ़त रहलें. औरी एहीसे अमुलू बेसी पइसा कमाए के चाहत रहली. उनकर उम्मीद रहे कि तरकारी-तिउना बेचे से उ अइसन क पइहें.

अमुलू कहेली, “सुरु में इ बड़ी मस्किल रहे” “हमरा बेर-बेर बोखार हो जाए औरी जीउ हरला के चलते हम सड़के प खड़ा-खड़ा सूत जाईं. अइसे हम अब अपना के बना लेले बानी, बाकिर बिना आराम कईले कार कईला से हमरा सेहत प असर परता.” उ हर दिन भोरे 2:30 प जागेली औरी ओ बेरा से अपना गोड़े प रहेली. उ तिरुवल्लूर जिला के आपन गांव किलरकंडीगई (जेकरा के के. जी. कांडीगाई भी कहल जला) से लमसम 60 किलोमीटर के जात्रा क के उत्तरी चेन्नई में तर्कारीइ आ फल बेचे आवेली. औरी मौसम के परवाह कईले बिना सड़क प घूमत रहेली.

उ कहली, “डाक्टर कहले बाड़न कि हमारा देह में खून के कमी (एनीमिया) बा. हमरा नीमन खाए औरी सूते के जरूरत बा. बाकिर किस्मत के खराबी से हम अपना परिवार के अकेला कमाए वाला बानी.” अमुलू के मरद 45 साल के बाड़न. उ दिहाड़ी मजूर हवन. उनका रोज काम ना भेंटाला. उ जौन कमालें सब दारू प स्वाहा क देलें. उनकर मेहरारू परिवार देखे औरी कमाए दुनू कार करेली.

अमुलू सीख लेले बाड़ी कि अपना ऊपर कुछु खर्चा नईखे करे के. “जब हम बहरा रहेनी त बेसी कर के पानीये पी के गुजर करनी. कब्बो-कब्बो, भोर तरकारी बेचे के बाद, 30-40 रोपया खर्चा के डोसा खा लेनी. बाकिर दोपहरिया में 100 रोपया औरी लाग जाला. हमरा खातिर इतना रोपया कमाइल घंटन के कार ह. एहीसे हम अपना ऊपर खर्चा ना करनी. हम घरे जाए के जोहेनी. परिवार खातिर खयका बनावेनी. अक्सरहां पूरा दिन में हमार ऊहे एकमात्र खाना होला,” उ कहली.

अमुलू के बेटा दीपक, 18 साल के, दसमा में पढ़ाई छोड़ दहलन. उ अभी तनी दिन पहिले अपना माई के मदद ला लगे के फैक्ट्री में कार करे के सुरु कईले बाड़न. उनकर सतरह साल के बेटी हरिणी बारहमा में पढ़ेली. बाकिर परिवार खातिर खर्चा औरी बचत अमुलुये करेली. उ अभी एगो सौचालय बनवावतारी. एकरा बनावे के काम करे खातिर उ अपना मरद के पइसा देली.

उनकरा खातिर जिनगी बहुत मस्किल रहल बा. एकदम हमरा माई जइसन. हमार माई हमनी के पढावे खातिर केतना घरे जाके खाना बनावस. हम अमुलू के आपन माई के चलते जानेनी. हमार माई पछिला करीब तीन साल से उनकरा से तरकारी कीनेली. हम अक्सरहां उ दुनू जाना के बतियावत देखले बानी, जब हमार माई अपना पसंद के तरकारी छांटेली.

त, जब ओ दोपहरिया में अमुलू के सड़कन प घूमत देखनी, हम उनका से उनकर दिन के बारे में पुछनी. औरी ए तरे हमनी के बतियावे के सुरुआत भईल. तब से पछिला कुछ महीना ले हम उनका साथे कई बेर जतरा कईनी, अक्सर साथे कैमरा ले के.

उनका साथे चले में हमरा बुझाइल कि एगो महिला वेंडर होखे के सबसे मस्किल बात का ह. खासकर अइसन सहर में जौन एगो मेहरारू के सुरक्षा औरी जरूरत से बेपरवाह बा. “हम पूरा दिन चलेनी. औरी पानीये हमार एकमात्र ताकत ह. जब हमरा पेसाब जाए के होला त, कहीं कौनो सार्वजानिक सौचालय नईखे. एहीसे, हम सुनसान जघ़े खोजेनी. औरी दिन के अंजोरे में जानी. हमरा डर लागेला. माहवारी रहेला त हालत औरी खराब हो जाला. हमरा ढेर दोदरा हो जाला, हम चलहूं ना पाईं.” उ कहली.

चेन्नई के सड़क प पूरा दिन बितावला के बादो कुल तरकारी ना बिका पावेला. एहीसे हमनी उत्तरी चेन्नई में विमको नगर के ओर चलतानी. जहां अमुलू आपन ठेला के चक्का में सिक्कड़, ताला लगा के खड़ा क दहली. अमुलू उबरल तरकारी वाला प्लास्टिक के डिब्बा ले के कवराईपेट्टइ के ट्रेन पकड़ेली, जौन 45 मिनट के जतरा ह.

ट्रेन में, अमुलू जनाना डिब्बा में चढ़ जाली. उ कहेली, “जे दिन बिजनेस नीमन ना होला, हम उबरल तरकारी ट्रेन में बेचे के परयास करेनी.” ट्रेन से उतरला के बाद, उ एगो औटो खातिर एक किलोमीटर औरी चलेली, जौन उनका के पुडूवायल गांव के बस स्टेसन ले जाई. बस के बेरा पक्का ना होला. एकर मतलब ह 10 से 60 मिनट के औरी जोहाई. बस में बईठला के बाद, अंजातम्मनगुडी बस स्टाप ले 20 मिनट लागेला. जहां से किलरकंडीगई गांव में अमुलू के घर 2 किलोमीटर औरी दूर बा. अगर उनकर बेटा घरे होला त अपना दोपहिया गाड़ी से लेवे आ जाला. बाकिर बेसी दिन त अमुलू पैदले चलेली. एमे 25 मिनट औरी लागेला.

एतना लमहर जतरा पूरा क के जब ऊ घरे पहुंचेली, तब ले रात के लमसम 9 बज जाला. दिन के आखिर में उनका हाथ में बहुत कम पइसा होला. हाथ में तनियक उबरल तरकारी होला. औरी घर में ढेर कार उनकरा के जोहत रहेला. जब ले उ खयका बनावेली, खियावेली, बहार-सोहार (सफाई) करेली औरी सूते के तईयारी करेली, रात के 11 बज जाला.

सबेर बहुत जल्दी हो जाला- चार घंटा के भीतरे. औरी ओतने हरावे वाला होला. अमुलू कहेली, “हर दिन जब हम उठेनी, बुझाला कि हम तनिको सुतल ना रहनी. अइसन बुझाला कि बस तनी देर आंख भरमल रहे औरी अगिला दिन सुरु हो गईल.” हर सबेर, उनकरा अपना घर से 4 से 5 किलोमीटर दूर चिन्नमबेडू गांव में थोक बजार में भोरे 2:30 बजे ले पहुंचे के होला. जहंवा उ दूसर तरकारी बेचे वाली मेहरारू के संघे 50 रोपया में सामिलात के एगो ट्रक करेली.

उ कहेली, “हम लाल-लाल आंख औरी मउलाइल मुंह के साथे बजारे भागेनी. बाकिर जइसहीं तेज अंजोर, भीड़-भाड़ औरी कीने खातिर भागत लोग के देखेनी, हमरा में जान आ जाला. खेतिहर से टटका तरकारी कीनल, बेसी दाम वाला चीज खातिर मोलभाव कईल, जब हम ओकरा के फेर से बेचेम त तनियक मोनाफा कमाए के उम्मीद कईल. हम इ पक्का करेनी कि बिकाए से पहिले हमरा सबसे टटका चीज मिल जाए.”

उ टटका औरी हरिहर तरकारी कीने खातिर एक कोना के ओर दउरेली औरी आम कीने खातिर दूसरा कोना. दू घंटा हेन्ने-होन्ने भगला के बाद उ 60 से 80 किलो तरकारी ले के ओ जगह से बहिरेली. औरी उ सब के एगो ट्रक में लादेली जौना में 6-7 गो दूसर महिला बिक्रेता लोग सामिल रहेला. दिन के सुरुआत में उनका लगे 1,500 रोपया रहेला. एसे ऊ केतना कीन पावेली इ मौसम के हिसाब से बदलत रहेला. गरमी में उ बेसी फल, तरकारी कीं पावेली. अइसे, जब बरखा होला तो तरकारी के आवग कम होला औरी दाम बेसी. जेकरा चलते उनका कम चीज कीने के परेला. बेचे के बात करीं त उ बजार भाव से चलेली. कीने औरी भाड़ा के खर्चा निकलला के बाद उनका लगे मोनाफा 500 से 800 होला. बाकिर अइसनो दिन होला जब उनका कुछु ना मिलेला.

“हम इ सब तरकारी कुल के पावे खातिर बिना हरले कार करनी औरी फेर 5 किलोमीटर से बेसी के जतरा क के भर दिन केतना गलियन में घूमेनी. घरे-घरे जा के पूछेनी. बाकिर समाज में हमरा जइसन मेहरारू के मेहनत प सायदे केहू ध्यान देला चाहे हमनी के इज्जत करेला. ग्राहक बहुत कम पइसा देवे प अड़ल रहेला. बहुत मोल-मोलाई करेला. सबसे कम कीमत देवे प अड़ जाला. ऊहे लोग जे सुपर मारकेट के तय दाम के बिना कुछु कहले मान जाला, जब हमरा लगे आवेला त रोपया-रोपया खातिर झगरा करेला.” उ सामान लादला के बाद बइठत हमरा से बतियवली. एतना भाग दौड़ के बाद अभिनो उनकर सांस तेज चलता.

विमको नगर पहुंचे से पहिले उनका ट्रक में एक घंटा औरी लागी, औरी इ सवारी खातिर उनका 500 रोपया खर्चा करे के होई. “हम दीपक के नीमन जिनगी औरी आपन बेटी के बढ़िया पढ़ाई खातिर अपना के झोंकले रहेनी. ईहे एकमात्र कारन बा कि हम हर दिने कार प जानी. भले हमार देह केतनो थाकल काहे ना रहे. हमनी के बतियावत भर में उनका अंउघी लाग गईल. इ बस दू घड़ी के आराम ह, एकरा से पहिले कि एगो औरी लमहर औरी हरा देवे वाला दिन सुरु हो जाय.

अनुवाद: स्मिता वाजपेयी