شیروں، انسانوں اور ترقی کی مہلک تثلیث

منوج چودھری کی زندگی کے درہم برہم ہونے میں چند سیکنڈ لگے تھے۔

’’میری ماں اور میری بیوی میری دنیا تھیں، اب میرے پاس جو کچھ ہے وہ صرف میرے دو بچے ہیں،‘‘ دیہی چندر پور میں اپنے گھر سے بات کرتے ہوئے ۳۵ سالہ منوج کہتے ہیں۔

’’میں اور میرے بچے ابھی سوئے ہوئے تھے، جب میری ماں اور بیوی جنگلوں کی طرف روانہ ہوئے تھے۔‘‘ کچھ ہی گھنٹوں بعد ۱۰ مئی ۲۰۲۵ کو، ۶۰ سالہ کانتا بُدھاجی چودھری اور ۳۰ ​​سالہ شوبھانگی اپنے گاؤں سے دو کلومیٹر دور جھاڑیدار جنگل میں شیر کے حملے میں مارے گئے تھے۔ ان کی پڑوسن ساریکا شالک شینڈے، جن کی عمر تقریباً۵۰ سال تھی، شیر کا تیسرا شکار تھیں۔

تینوں خواتین گاؤں کے دیگر لوگوں کے ساتھ تیندو کے پتے جمع کرنے جنگل گئی تھیں۔

مہاراشٹر کے چندر پور ضلع میں واقع ایک ہزار سے زیادہ افراد پر مشتمل گاؤں مینڈھا (مال) میں ماتم چھا گیا۔ گاؤں والے زیادہ تر منوج جیسے چھوٹے کسان یا بے زمین مزدور ہیں، جو موسم کے لحاظ سے ریاست اور ملک کے شہروں کی طرف ہجرت کرتے ہیں۔ ہر سال مارچ، اپریل اور مئی کے مہینوں میں وہ اپنی آمدنی میں اضافہ کے لیے جنگل سے تیندو کے پتے اور مہوا کے پھول اکٹھا کرتے ہیں۔

سندیواہی تحصیل کے گاؤں کو سرکاری ریکارڈ میں مینڈھا مال گُجاری کے نام سے درج کیا گیا ہے، لیکن گاؤں کے باہر لگے بورڈ پر گاؤں کا نام ’مینڈھا (مال)‘ لکھا ہوا ہے۔ یہ گاؤں تاڈوبا اندھاری ٹائیگر ریزرو (ٹی اے ٹی آر) کے قریب واقع ہے۔ ریزرو کا بنیادی یا محفوظ علاقہ ۶۲۵ مربع کلومیٹر میں پھیلا ہوا ہے اور اس کا ایک بفر علاقہ ہے، جوانسانی آبادی والے ریزرو کے ارد گرد تقریباً ۱۱۰۲ مربع کلومیٹر پر محیط ہے۔

محکمہ جنگلات کے تازہ ترین اعداد و شمار کے مطابق، چندر پور ضلع میں ۲۲۳ شیر ہیں، جن میں سے تقریباً ۱۲۰-۱۲۵ ٹی اے ٹی آر کی حدود میں ہیں۔ کئی گاؤں والوں نے اس بات کی تصدیق کی کہ یہ پہلا موقع تھا جب مینڈھا (مال) میں شیر نے کسی انسان کو اپنا شکار بنایا ہو۔

گاؤں والوں نے پولیس اور محکمہ جنگلات کے اہلکاروں کا حوالہ دیتے ہوئے بتایا کہ تینوں خواتین کو ایک شیرنی اور اس کے تین بچوں نے مارا تھا۔

ان ہلاکتوں نے ہنگامہ برپا کر دیا، ایک مختصر احتجاج ہوا، اور ضلع کے مقامی رکن قانون ساز اور دیگر سیاست دانوں کو سوگوار خاندان کے اراکین اور گاؤں والوں کو تسلی دینے کے لیے یہاں آنا پڑا۔

جیسے ہی منوج ۱۰ مئی کی صبح کو یاد کرتے ہیں، ان کے چہرے پر الجھن، خوف، غم و غصہ اور بے یقینی کے بادل چھا جاتے ہیں۔ ان کے بچے – ۱۰ سالہ شوہم، اور ۸ سالہ آرادھیہ – ابھی چھوٹے ہیں اور وہ ماں کے بغیر بڑے ہوں گے۔ انہیں یاد ہے کہ اس دن صبح کے ۱۱ بج چکے تھے اور وہ گاؤں کے قریب اینٹوں کے بھٹے پر تھے، جہاں وہ یومیہ اجرت پر کام کرتے تھے۔ ایک رشتہ دار بھاگتا ہوا آیا۔ تینوں خواتین ابھی تک گھر واپس نہیں لوٹی تھیں۔ وہ عموماً صبح ۹:۳۰ بجے تک گھر واپس آ جاتی تھیں۔

جب دوپہر ۱۲ بجے تک تینوں نظر نہیں آئیں، جبکہ دیگر خواتین معمول کے مطابق واپس آچکی تھیں، تو منوج اور ان کے ساتھیوں نے جنگل میں ان کی تلاش شروع کی، لیکن کوئی سراغ نہیں ملا۔ گاؤں والوں نے فوراً محکمہ جنگلات کو مطلع کیا۔ اور جنگل کے رینجرز اور گاؤں والوں نے ٹیمیں بنا کر تلاشی کا کام شروع کیا۔ آخر کار شام ۴ بجے کے قریب کھیتوں سے کچھ فاصلہ پر جھاڑی دار جنگلوں میں ان کی لاشیں ملیں۔ خواتین ۱۵ میٹر کے فاصلہ پر مردہ پڑی تھیں، ان کی لاشیں بری حالت میں تھیں۔ گاؤں والوں کا کہنا ہے کہ تین چھوٹے بچوں کے ساتھ بڑی شیرنی کے خلاف ان کے پاس کوئی موقع نہیں تھا۔

اگلی صبح پورا گاؤں اور آس پاس کے لوگ آخری رسومات میں شرکت کے لیے آئے۔

جون ۲۰۲۵ میں جب پاری نے گاؤں کا دورہ کیا تو گاؤں ابھی تک صدمہ کی حالت میں تھا۔

جب وہ پتے چننے کے لیے جھکی ہوں گی اسی وقت شیرنی پیچھے سے ان پر جھپٹ پڑی ہوگی۔ ان کی لاشیں مسخ ہو چکی تھیں، اور گاؤں والوں کا خیال ہے کہ شیرنی نے ان کو گردن سے دبوچا ہوگا، جیسا کہ وہ اپنے شکار کے ساتھ کرتی ہیں۔ لیکن جنگل کے حکام کا کہنا ہے کہ یہ آدم خور شیرنی نہیں تھی۔ شیرنی اپنے شکار کو جھاڑیوں میں چھوڑ کر جنگلوں میں واپس چلی گئی تھی۔ محکمہ جنگلات اسے حادثہ قرار دیتا ہے۔

’’اس صبح میں بھی وہاں ہوسکتی تھی،‘‘ ۶۰ سالہ کانتا بائی شینڈے کہتی ہیں۔ وہ اپنی سہیلیوں کے لیے غمگین ہیں، لیکن اس بات کا شکر ادا کرتی ہیں کہ وہ زندہ ہیں۔ کانتا بائی ساریکا سندے کی رشتہ دار اور پڑوسن تھیں۔ شینڈے اور چودھری کنبے دونوں پڑوسی ہیں۔ ہر موسم گرما میں وہ پتے توڑنے کے لیے ساتھ جاتے تھے۔

تیندو (ڈایوس پائیروس میلناکسیلون) کے پتوں کو لپیٹ کر بیڑی بنائی جاتی ہے، اور جنگلات سے متصل گاؤوں کے لیے یہ آمدنی کا ایک یقینی ذریعہ ہے۔ کانتا بائی کہتی ہیں کہ اس سانحہ نے تیندو جمع کرنے کا سیزن اچانک ختم کر دیا، جس کے نتیجہ میں انہیں اور دوسرے لوگوں کو مالی خسارہ ہوا۔ خوف کا یہ عالم تھا کہ کسی عورت نے دوبارہ جنگلوں میں قدم رکھنے کی جرأت نہ دکھائی۔ یہ مینڈھا (مال) میں ۲۰۲۵ کے تیندو جمع کرنے کے سیزن کا صرف تیسرا دن تھا۔

حالانکہ مارچ سے مئی تک پتے توڑنے کا سیزن ہوتا ہے، لیکن انہیں اکٹھا کرنے کا موسم الگ الگ گاؤوں میں الگ الگ ہوتا ہے اور اس وقت تک رہتا ہے جب تک کہ مقامی درختوں سے تمام پیداوار اکٹھا نہ کر لی جائے۔ لہذا، ایک سیزن ۱۵ دن اور تین مہینے کے درمیان ہو سکتا ہے۔

چندر پور ضلع میں مارچ سے مئی ۲۰۲۵ تک ٹی اے ٹی آر (ریاستی اور غیر محفوظ جنگلات) کے الگ الگ علاقوں میں شیروں اور چیتوں کے حملوں میں ۲۴ اموات ریکارڈ کی گئی ہیں۔ یہ خشک اور گرم ترین مہینے ہیں، جب گاؤں والے مہوا کے پھول اور تیندو کے پتے اکٹھا کرنے کے لیے جنگلوں میں داخل ہوتے ہیں۔ اور یہی وہ وقت ہوتا ہے جب بڑے گوشت خور جانور خوراک اور پانی کی تلاش میں بھٹکتے رہتے ہیں۔

’’ہمیں معلوم تھا کہ جنگل میں شیر ہیں۔ میں نے بہت سے ایسے حادثات کے بارے میں سن رکھا تھا جس میں شیروں کے حملوں میں لوگ مارے گئے تھے۔ ان میں سے بہت سے شیر ہمارے علاقے میں بھی گھوم رہے ہیں،‘‘ منوج کہتے ہیں، جن کی داڑھی بڑھی ہوئی ہے اور وہ اپنی بیوی اور ماں کی فریم شدہ تصویریں پکڑے ہوئے ہیں۔ ’’لیکن ہم نے کبھی سوچا بھی نہیں تھا کہ ایسی مصیبت ہم پر آ جائے گی۔‘‘

مینڈھا (مال) سے تقریباً ۵۰ کلومیٹر کے فاصلہ پر، ایک اور حادثہ کا ذکر کرتے ہوئے، ۵۸ سالہ ولاس جامبھولے نے بھی نہیں سوچا تھا کہ اتنی جلدی انہیں اپنے بڑے بھائی ونائک کی آخری رسومات ادا کرنی پڑیں گی۔

’’جس دن ان کی موت واقع ہوئی، ہم نے یہ بات کی تھی کہ اس سال مہوا کا موسم کتنا مندا ہے،‘‘ برمہپوری تحصیل کے چچکھیڑا گاؤں کے پولیس پاٹل ولاس کہتے ہیں۔ (پولیس پاٹل گاؤں سطح کا قانون نافذ کرنے والا ایک اہلکار ہوتا ہے جسے ضلع کلکٹر مقرر کرتا ہے)۔ ’’وہ مہوا کے پھول اکٹھا کرنے کے لیے نکلے تھے اور کبھی واپس نہیں لوٹے،‘‘ وہ کہتے ہیں۔

ولاس کسان ہونے کے ساتھ ساتھ مہوا کے ایک چھوٹے تاجر بھی ہیں، اور اپنے ساتھی گاؤں والوں کے ذریعہ چن کر لائی گئی پیداوار کو جمع کرتے ہیں۔ یہ پھول کھانے اور دوائیوں میں استعمال ہوتے ہیں اور ان سے شراب بھی بنائی جاتی ہے۔ ان کا کہنا ہے کہ ان کے بھائی، جو ۱۳ اپریل ۲۰۲۵ کو شیر کے حملے میں مارے گئے تھے، دو ایکڑ زمین پر کھیتی کرتے تھے، اور گرمیوں میں اپنی آمدنی میں اضافہ کے لیے مہوا اور تیندو پر انحصار کرتے تھے۔

’’کاشتکاری سے آمدنی صفر ہے،‘‘ جامبھولے کہتے ہیں۔ یہ وضاحت کرنے کے لیے کہ زراعت منافع بخش کیوں نہیں ہے وہ کئی عوامل کی نشاندہی کرتے ہیں، ان میں کم پیداوری صلاحیت، لاگت میں اضافہ، پیداوار کی سستی قیمت اور کسی متبادل منسلک آمدنی کی غیر موجودگی شامل ہیں۔ ’’مہوا اور تیندو سے دو ماہ کے دوران ایک کنبے کو کم از کم ۲۵ سے ۳۰ ہزار روپے کی آمدنی ہو جاتی ہے،‘‘ وہ کہتے ہیں۔

آنجہانی ونائک کی عمر ۶۰ سال تھی۔ ان کے پسماندگان میں ان کی بیوی بَچھّلا اور بیٹا آشیش ہیں، جنہیں محکمہ جنگلات سے معاوضہ کے طور پر ۱۰ لاکھ روپے ملے تھے۔ ’’اس سے ہمارا آدمی واپس تو نہیں آئے گا،‘‘ بَچھّلا کہتی ہیں۔

جامبھولے کنبے کا تعلق مانا آدیواسی برادری سے ہے، جو درج فہرست قبائل (ایس ٹی) کے طور پر درج ہے۔ اس برادری کا چچکھیڑا گاؤں پر غلبہ ہے۔ زیادہ تر گاؤں والے چھوٹے اور پسماندہ کسان ہیں جو گرمیوں میں اپنے معاش کے لیے بغیر لکڑیوں والی جنگلی پیداوار (این ٹی ایف پی) پر انحصار کرتے ہیں۔

ولاس کے مطابق جامبھولے کی موت نے گاؤں کے دوسرے لوگوں کو خوفزدہ کر دیا۔ انہوں نے مہوا اور تیندو کے پتے جمع کرنے کے لیے جنگلوں میں جانا چھوڑ دیا، اور پھر سیزن ہی ختم ہو گیا۔ ہر ایک کنبے کو اس سال ۲۵ ہزار روپے کا نقصان اٹھانا پڑا۔ ولاس کو بھی مالی نقصان کا سامنا ہے، کیونکہ وہ پیداوار جمع کرکے اسے کمیشن پر تاجر کو منتقل نہیں کرسکے۔

چچکھیڑا میں بھی ماضی میں شیروں کے حملے میں ہلاک ہونے کے دو واقعات رونما ہوچکے ہیں، حالانکہ یہاں مویشیوں کی ہلاکتیں معمول کی بات ہے۔

اس گاؤں سے کچھ دور چچکھیڑا پنچایت کی ایک چھوٹی سی بستی ہے پاتھری، جہاں تقریباً ہر کنبہ مارچ-اپریل-مئی مہینے کے دوران مہوا اور تیندو اکٹھا کرتا ہے۔ اس سال ان میں سے کئیوں نے یہ کام نہیں کیا۔ گزشتہ نومبر میں ۶۰ سالہ چندر بھان لوکھنڈے، جو ایک دلت کسان تھے، اپنے گھر سے صرف دو کلومیٹر کے فاصلہ پر ایک کھیت کے اندر شیر کے حملے میں مارے گئے تھے۔

’’وہ دوپہر کو ہمارے مویشیوں کو چارہ دینے گئے تھے،‘‘ ان کی بیٹی مایا یاد کرتی ہیں، اس دوران ان کی ماں شانتا بائی خاموشی سے دیوار پر آویزاں اپنے شوہر کی فریم شدہ تصویر کو دیکھ رہی تھیں۔ ’’ان پر وہاں حملہ ہوا تھا،‘‘ وہ کہتی ہیں۔ ’’ہمارے ساتھ جو کچھ ہوا اس کے بعد ہم اس سال جنگل نہیں جا سکے۔‘‘ ہر سال اس فیملی کو مہوا اور تیندو سے ۲۵-۲۵ ہزار روپے کی آمدنی ہو جاتی تھی ۔ یہ بڑا نقصان ہے، وہ کہتی ہیں۔

قریبی گاؤں میڈکی (۲۰۱۱ کی مردم شماری میں مینڈکی کے طور پر درج) کے ایک سماجی کارکن سدھاکر مہاڈورے بتاتے ہیں کہ تاڈوبا کے جنگلات کے جنوب اور مغرب سے متصل اس خطہ میں معاش کا پورا نظام خطرے میں ہے۔ وہ ’اکشے سیوا سنستھا‘ چلاتے ہیں، جو جنگل کے حقوق اور معاش پر توجہ مرکوز کرنے والی تنظیم ہے۔

معاش کا نظام کچھ اس طرح ہے کہ لوگ جولائی سے ستمبر تک کھیتی کرتے ہیں۔ پھر ستمبر سے دسمبر یا مارچ تک ہجرت کرتے ہیں۔ جن کے پاس آبپاشی کی سہولتیں ہیں وہ اپنے گاؤں میں واپس آتے ہیں اور دسمبر سے مارچ کے وسط تک موسم سرما کی فصل اگاتے ہیں۔ اور مارچ کے وسط سے جون کے وسط تک جنگل کی پیداوار جمع کرتے ہیں، جن میں مہوا اور تیندو شامل ہیں۔ زیادہ تر لوگ سال میں دھان کی صرف ایک فصل اگاتے ہیں۔

اب جانوروں کے حملوں کی وجہ سے ان کی فصلوں کو خطرہ لاحق ہے۔ اب لوگ پورے سال شیروں اور چیتوں کے خوف کے سائے میں رہتے ہیں۔ ’’جیسا کہ اس سال دیکھنے کو ملا، انسانی اموات کے واقعات کی کثرت کی وجہ سے بہتوں نے جنگلوں میں نہ جا کر اپنے معاش کا ذریعہ ترک کر دیا ہے،‘‘ مہاڈورے کہتے ہیں۔ نتیجتاً لوگ زرعی سیزن کی تیاری کے لیے نجی قرض لینے لگے ہیں۔ ’’بصورت دیگر، موسم گرما کی آمدنی ان کو کھیتی کے سازو سامان خریدنے میں مدد بہم پہنچاتی ہے۔‘‘

مہاڈورے کا کہنا ہے کہ خوف نے ان علاقوں میں مزدوروں کی دستیابی کو بھی متاثر کیا ہے۔ ’’خواتین یا مرد کھیتی یا مزدوری کیوں کریں گے جبکہ انہیں معلوم ہے کہ یہ خطرناک ہے؟‘‘ وہ پوچھتے ہیں۔ ’’کھیتوں اور جنگلات کا آپس میں اتنا گہرا تعلق ہے کہ آپ کو کبھی معلوم نہیں ہوتا کہ سال کے کسی بھی حصہ میں کوئی شیر گھات لگائے بیٹھا ہوگا،‘‘ وہ کہتے ہیں۔

مہاراشٹر کے مشرقی ودربھ کے علاقے کا چندر پور ضلع انسانوں اور شیروں کے خونی اور شدید تصادم کا مرکز ہے۔ چندر پور ضلع کے چیف کنزرویٹر آف فاریسٹس (علاقائی) کے دفتر کے اشتراک کردہ اعداد و شمار کے مطابق یہاں گزشتہ دو دہائیوں میں شیر یا تیندوے کے حملوں میں تقریباً ۲۰۰۰ لوگ ہلاک ہوچکے ہیں، اور بہت سے دوسرے جنگلی جانوروں کے حملوں میں شدید طور پر زخمی ہوئے ہیں۔ پڑھیں: ’یہ ایک نئی قسم کی خشک سالی ہے‘

اعداد و شمار سے معلوم ہوتا ہے کہ جنوری ۲۰۲۱ سے تاحال شیروں اور چیتوں کے حملوں میں ۱۷۵ افراد جاں بحق ہو چکے ہیں۔

دو بڑے عوامل تصادم کی وجہ بن رہے ہیں۔ ایک طرف بڑے بنیادی ڈھانچے اور ترقیاتی منصوبے جنگلاتی راہداریوں کے ساتھ ساتھ جنگلی حیات کے مسکن کو بھی درہم برہم کر رہے ہیں؛ دوسری جانب، چھوٹے اور حاشیے کے کسان شدید معاشی تنگی کا سامنا کر رہے ہیں جس کی وجہ سے جنگل پر مبنی معاش پر ان کا انحصار بڑھ رہا ہے۔

حالانکہ گرمیوں میں تصادم کے واقعات بڑھ جاتے ہیں، کیونکہ یہی وہ وقت ہوتا ہے جب انسان شیروں کے علاقوں میں داخل ہوتے ہیں، لیکن کسانوں کو جنگلی چرندوں کے حملوں کی وجہ سے پورے سال فصلوں اور مویشیوں کا شدید نقصان اٹھانا پڑتا ہے۔

مینڈھا (مال) گاؤں چوڑی اور نئی تعمیر شدہ ناگبھیڈ-سندیواہی سڑک پر واقع ہے، جو ٹی اے ٹی آر کی حدود سے چند کلومیٹر جنوب میں واقع ہے اور ریزرو سے نکلنے والے شیروں کے لیے ایک بڑی راہداری کا حصہ ہے۔ یہ دو تحصیلیں، برہمپوری اور مول-ساولی کے ساتھ، ضلع کی سب سے زیادہ متاثرہ تحصیلیں ہیں، جن میں گھنی انسانی آبادی اور علاقائی جنگلات سے منسلک کھیت ہیں جو چندر پور کی پہچان ہیں۔ یہ تحصیلیں ٹی اے ٹی آر کے جنوب اور جنوب مغرب میں واقع ہیں، اور بڑی حد تک بڑے پروجیکٹوں سے پاک ہیں، ان پروجیکٹوں نے شیروں اور چیتوں کوبڑے پیمانے پر مغرب، شمال اور یہاں تک کہ جنوب مشرقی حصوں تک پھیلنے میں رخنہ پیدا کر کے انہیں خطرے میں ڈال دیا ہے۔

وائلڈ لائف انسٹی ٹیوٹ آف انڈیا کے ۲۰۱۸ کے ایک مطالعہ میں موٹے طور پر اس بات کی نشاندہی کی گئی ہے کہ مہاراشٹر کے مشرقی ودربھ کے جنگلاتی علاقے جس میں ٹی اے ٹی آر کا ذیلی علاقہ بھی شامل ہے، معدوم ہوتے ہوئے جنگلات کا ایک سلسلہ ہیں اور ان میں جنگلی جانوروں کی شکستہ گزرگاہیں بھی شامل ہیں۔ رپورٹ میں واضح نقشوں کی مدد سے دکھایا گیا ہے کہ محفوظ جنگلاتی علاقوں سے باہر کے علاقائی جنگلات رقبے اور معیار دونوں لحاظ سے سکڑتے جا رہے ہیں، جس کی بنیادی وجہ بنیادی ڈھانچے کے منصوبے، سڑکیں اور تیزی سے بڑھتی ہوئی انسانی آبادیاں ہیں۔

ماحولیاتی اور سیاسی کارکن اور غیرمنافع بخش تنظیم ایکو-پرو کے بانی بنڈو دھوترے کا کہنا ہے کہ ضلع کا ماحولیاتی نظام خستہ ہو چکا ہے جو محفوظ اور علاقائی جنگلات کے ارد گرد رہنے والی کمزور ترین برادریوں کے لیے تباہ کن نتائج کا حامل ہے۔ دھوترے برسوں سے اس بحران پر نظر رکھے ہوئے ہیں اور افسوس ظاہر کرتے ہیں کہ اس میں صرف اضافہ ہونے والا ہے۔

ان مباحثوں میں اکثر جس پہلو کو نظر انداز کر دیا جاتا ہے، وہ ہے اس خطہ میں نئی کانوں کا مسلسل بڑھنا – خاص طور پر ٹی اے ٹی آر کے مغربی حصوں کی جانب، جسے وردھا وادی کہا جاتا ہے۔

کوئلے اور دیگر اہم معدنیات، بشمول چونا پتھر اور لوہے کی دھات سے مالامال چندر پور ضلع میں۳۰ سے ​​زیادہ کوئلے کی کانیں ہیں جو بنیادی طور پر ورورا، راجورا، بلارپور اور گھگس کی تحصیلوں میں ویسٹرن کول فیلڈز لمیٹڈ (ڈبلیو سی ایل) کے ذریعے چلائی جاتی ہیں۔ اس میں نئی ​​پرائیویٹ طور پر چلنے والی اوپن کاسٹ مائنز، نصف درجن سیمنٹ فیکٹریاں، اسپنج آئرن پلانٹ، واشریز، راکھ کے ڈھیر، اور بہت کچھ شامل ہیں۔ آپ کو یہاں جو کچھ ملتا ہے وہ ماحولیاتی اور معاشی تباہی کا نسخہ ہے۔

ٹی اے ٹی آر کے جنوب مغربی کنارے پر آباد بھاتاڈی گاؤں، جو ٹائیگر ریزرو میں داخلہ کے نقطہ آغاز موہارلی گاؤں سے بمشکل چند میل کے فاصلہ پر واقع ہے، میں کوئلے کی کئی نئی کانیں ہیں اور مزید ماحولیاتی اور جنگلات کی منظوری کے لیے کوشاں ہیں۔

بھاتاڈی کانیں، جو ویسٹرن کول فیلڈز لمیٹڈ (ڈبلیو سی ایل) کے ذریعے چلائی جاتی ہیں، بڑے گڑھوں کا ایک سلسلہ ہے جو راتوں رات شیروں کے اہم مسکن سے دھول اور کوئلے کے سمندری کنویں میں تبدیل ہو گئے۔ ان گڑھوں کے کنارے کھڑے ہو کر، آپ اس سے آگے تاڈوبا کے صاف وشفاف پودوں کا ایک منظر دیکھ سکتے ہیں۔

یہ رپورٹر چندر پور میں پلا بڑھا ہے۔ ۱۹۸۰ کی دہائی میں اس قصبے کا احاطہ کئے ہوئے مخلوط اور پت جھڑ جنگلات کی جگہ اب مزدوروں کی مسلسل بڑھتی ہوئی بھیڑ بھری کالونیوں، چاروں طرف بکھرے ہوئے کچرے کے ڈھیروں، بھاری ٹرکوں کی آمدورفت، اور سرخ چکنی سڑکوں نے لے لی ہے۔ سڑکوں کے کنارے لگے درخت پر سرخ دھول کی تہیں آپ کی نظروں سے نہیں چھپ سکتیں۔ یہاں تک کہ چندر پور سپر تھرمل پاور اسٹیشن (سی ایس ٹی پی ایس) کا وسیع و عریض کیمپس - تقریباً۳۰۰۰ میگاواٹ کی نصب شدہ صلاحیت کے ساتھ مہاراشٹر کے سب سے بڑے پاور اسٹیشنوں میں سے ایک - آج عملی طور پر شہر کا ایک حصہ ہے، اور اس کے احاطے میں کئی شیر رہتے ہے، کیونکہ یہ تھرمل پلانٹ ٹی اے ٹی آر کے علاقہ میں آتا ہے۔

’’یہ ایک گڑبڑ جھالا ہے،‘‘ دھوترے کہتے ہیں۔ ان کا خیال ہے کہ حالیہ تبدیلیاں شیروں کے طرز عمل میں کئی تبدیلیوں کا باعث بن رہی ہیں۔ ’’شیروں کی نئی نسل جنگلی علاقوں میں نہیں بلکہ انسانی بستیوں کے درمیان پروان چڑھ رہی ہے،‘‘ وہ کہتے ہیں۔ ’’کنکریٹ، کوئلے اور دھول کا جنگل میں۔‘‘

جنگلات سے مالا مال اس ضلع کے اطراف کی سڑکوں کو اس طرح چوڑا کیا گیا ہے کہ نہ صرف شیروں اور چیتوں کی، بلکہ ان کے شکار کی نقل و حرکت بھی بری طرح متاثر ہوئی ہے۔ زیر تعمیر گوسے خورد آبپاشی منصوبہ کے دائیں کنارے کی ایک بڑی نہر نے جنگلاتی لینڈ اسکیپ کو مزید نقصان پہنچایا ہے۔ اس کے بعد چندر پور-گوندیا چھوٹی لائن ریلوے کو بڑی لائن میں تبدیل کیا گیا ہے، جس کی وجہ سے جنگلی حیات کی نقل و حرکت مزید متاثر ہوئی ہے۔ ریلوے لائن کی پٹریاں گھنے جنگلات اور شیروں کی رہائش گاہوں سے گزرتی ہیں۔ دھوترے کا کہنا ہے کہ ان پٹریوں پر کئی شیر ٹرینوں کی زد میں آ کر مر چکے ہیں۔

چندر پور کے شیر ان تبدیلیوں کی وجہ سے بری طرح متاثر ہوئے ہیں– کئی شیروں، ان کے بچوں اور چیتوں کو خطرہ قرار دے کر مارا جا چکا ہے یا ٹرین حادثات میں مارے گئے ہیں۔ دریں اثنا، کانکنی اور دیگر کمپنیاں علاقے میں روز بروز ترقی کر رہی ہیں۔ مطالعات سے پتہ چلتا ہے کہ یہ پورے ہندوستان کا انتظامی مسئلہ ہے، خاص طور پر شیروں کے بڑے ریزرو کے آس پاس کا۔

چندر پور ضلع کے چیف کنزرویٹر آف فاریسٹ (علاقائی) جتیندر رام گاؤنکر کہتے ہیں، ’’یہ ایک پرانے مسئلہ کا ہی سلسلہ ہے۔‘‘ ان کا کہنا ہے کہ اگرچہ لوگوں کے ذریعہ معاش کے لیے ضروری ترقیاتی کاموں یا بنیادی ڈھانچے کی تعمیر کو نظر انداز نہیں کیا جا سکتا، لیکن اصل معاملہ یہ ہے کہ توازن کیسے قائم کیا جائے۔ ’’یہ ایک عالمی مسئلہ ہے۔‘‘ ان کا خیال ہے کہ اس کے باوجود مختلف اقدامات کی وجہ سے جانوروں – شیروں، چیتوں یا دیگر جنگلی جانوروں – کے حملوں میں انسانی اموات کی تعداد میں کمی واقع ہوئی ہے۔ ان اقدامات میں مقامی آبادی کو کھانا پکانے کی گیس فراہم کرنے سے لے کر لکڑی پر انحصار کم کرنے اور شمسی باڑ لگانے تک کے اقدامات شامل ہیں۔

محکمہ کے اندازے کے مطابق بشمول ٹی اے ٹی آر کے چندر پور میں مجموعی طور پر تقریباً ۲۵۰ شیر ہیں، جو اس ایک خطہ کے لیے شاندار تعداد ہے۔ مشرقی حصوں (برہمپوری، ناگبھیڑ) اور جنوبی حصوں (سندیواہی، ساولی اور مول) کے علاقائی جنگلات شیروں کی آبادی سے بھرے پڑے ہیں، جو بکھرتے جنگلوں کو اپنا نیا مسکن بنا رہے ہیں۔

رام گاؤنکر کہتے ہیں، ’’ٹی اے ٹی آر میں شیروں کی آبادی ضرورت سے زیادہ ہو چکی ہے، اور وہ یہاں سے نکل کر دیگر علاقوں میں منتشر ہو رہے ہیں اور ایک پریشان کن مسئلہ کا سبب بنتے جا رہے ہیں۔ تقریباً ۱۱۰۲ مربع کلومیٹر کے مرکزی اور بفر جنگلات کے ایک ہی علاقے میں جہاں ایک طرف بڑھتی ہوئی انسانی آبادی ہے، وہیں دوسری طرف شیروں اور دیگر گوشت خور جانوروں کی بڑھتی ہوئی تعداد ہے۔

’’ان میں سے زیادہ تر اموات اس سال بھی جنگلوں کے اندر ہوئی ہیں،‘‘ رام گاؤنکر کہتے ہیں۔ وہ کہتے ہیں کہ اگرچہ محکمہ یا جانور وں پر الزام لگانا آسان ہے، لیکن یہ حقیقت ہے کہ یہ ناخوشگوار اور قابل گریز حادثات اس وقت رونما ہوتے ہیں جب لوگ جنگل کے پروٹوکول کو توڑتے ہوئے جنگل میں داخل ہوتے ہیں۔

سب سے پہلے تو انہیں کبھی بھی چھوٹے گروپوں میں یا تنہا جنگل میں داخل نہیں ہونا چاہیے۔ دوسرے، محکمہ لوگوں پر زور دے رہا ہے کہ وہ صبح سویرے جنگل میں داخل ہونے سے گریز کریں، کیونکہ یہ وہ وقت ہوتا ہے جب بڑے گوشت خور جانور سرگرم ہوتے ہیں۔ ’’لوگ جانتے تھے کہ ایک شیرنی ہے جس کے تین بچے ہیں،‘‘ رام گاؤنکر کہتے ہیں۔ ’’اگر وہ اندر جانے سے گریز کرتے، خاص طور پر صبح کے وقت، تو حادثات کو ٹالا جاسکتا تھا۔‘‘

ان سب کے باوجود پورے دیہی مہاراشٹر میں معاشی بدحالی میں اضافہ ہو رہا ہے اور یہ ضلع بھی اس سے مستثنیٰ نہیں ہے۔ انسان اور شیر کا تصادم مصیبت میں صرف اضافہ ہی کرتا ہے۔ گھاس کھانے والے جنگلی جانوروں جیسے سؤر، ہرن اور نیل گائے کے بار بار حملے کاشتکاری کے عمل میں خلل ڈالتے ہیں اور پورے سال کے دوران فصل کی پیداوار کو متاثر کرتے ہیں۔

وہ کہتے ہیں کہ ضلع میں ۳۵ ہزار سے زیادہ دیہی کنبے (صرف ٹی اے ٹی آر کے ذیلی منظر نامے میں ہی نہیں) مہوا اور تیندو جمع کرنے میں مصروف ہیں۔

محکمہ کسی ٹھیکیدار کو علاقائی جنگلات کے حصوں کو مختص کرتا ہے۔ ٹھیکیدار پتے اکٹھا کرنے کے لیے مقامی کنبوں کی خدمات حاصل کرتا ہے۔ پھر سپلائی چین میں مقامی کلیکٹرز یا گاؤں کی سطح کے تاجر آ جاتے ہیں۔ خطرہ جمع کرنے والے برداشت کرتے ہیں، ٹھیکیدار نہیں۔ مجموعی طور پر یہ کروڑوں روپے کا کاروبار ہے۔

’’عوام کو شہری یا دیہی مہاراشٹر میں کوئی بامعنی روزگار نہیں مل رہا ہے،‘‘ نیرج ہاتیکر کہتے ہیں۔ وہ ماہر معاشیات اور ریاست کے دیہی علاقوں کی غربت اور معاشی محرومی کے موضوع پر شائع ہونے والی ایک حالیہ کتاب کے مصنف ہیں۔ ’’لہذا وہ کسی بھی چیز پر بہت زیادہ انحصار کرتے ہیں جس سے انہیں کچھ آمدنی حاصل ہونے کے امکانات نظر آتے ہوں، اس میں جنگلات اور قدرتی وسائل کا حصول بھی شامل ہے۔‘‘ یہاں تک کہ مغربی گھاٹ کے گاؤں میں بھی جنگلات پر انحصار بڑھ رہا ہے، وہ مزید کہتے ہیں۔

’’[مہاراشٹر کی] معیشت ہندوستانی ریاستوں میں سب سے بڑی ہے، لیکن اسے دیہی جمود، روزگار کی کمی، اور امیر اور غریب اضلاع کے درمیان شدید تفاوت کا سامنا ہے،‘‘ ہاتیکر نے پچھلے سال فرنٹ لائن میگزین میں لکھا تھا۔

ایک مطالعہ سے معلوم ہوتا ہے کہ چندر پور ریاست کے غریب ترین اضلاع میں سے نہیں ہے، لیکن دیہی علاقوں میں آمدنی میں جمود ہے اور کسان بھی تناؤ میں ہے۔ اس کی وجہ یہ ہے کہ ضلع میں تمام کانوں اور بھاری صنعتوں کی موجودگی کے باوجود، اس لگتا ہے کہ بڑی مقامی آبادی کی ان دونوں میں سے کسی ایک میں بھی شمولیت نہیں ہے۔

واپس مینڈھا (مال) میں لوٹتے ہیں، جہاں دو سوگوار کنبے ایک رسم کی تیاری کر رہے ہیں۔ اس رپورٹر نے اس رسم سے ایک دن پہلے، ۱۴ جون ۲۰۲۵ کو گاؤں کا دورہ کیا تھا۔ گاؤں والے اس رسم کو واگھائی دیوی شانتی کہتے ہیں۔ واگھائی شیرنی کی دیوی ہیں، جو ناراض ہوسکتی ہیں اور انسانوں کی حفاظت کے لیے انہیں شانت کرنا ضروری ہے۔

پڑوسی اور رشتہ دار پورے گاؤں کی دعوت کے لیے کھانا تیار کرنے میں مدد کر رہے ہیں۔ خواتین نے کام تقسیم کر لیا ہے – کچھ ہری سبزیوں کو چھیل رہی ہیں اور کاٹ رہی ہیں، دیگر چاول کو دھو کر صاف کر رہی ہیں، جو کہ ایک بڑی مقامی فصل ہے۔ باقی دوسرے لوگ چپاتیاں بنانے کے لیے گندم کا آٹا گوندھ رہے ہیں۔

یہ رسم ۱۳ دن کی شردھا پوجا سے مختلف ہے، سوگوار شینڈے کنبے کے باہری صحن کے سامنے بیٹھ کر گندم کا آٹا گوندھتے ہوئے کانتا بائی پاری کو بتاتی ہیں۔ ’’یہ واگھائی دیوی کی شانتی [سکون] کے لیے ہے، تاکہ وہ دوبارہ کسی کو تکلیف نہ دیں،‘‘ وہ کہتی ہیں۔ اور ساتھ میں یہ بھی اضافہ کرتی ہیں کہ یہ متوفی خواتین کو خراج عقیدت پیش کرنے کے لیے بھی ہے۔

بمشکل ایک کلومیٹر کے فاصلہ پر گاؤں والوں نے مینڈھا (مال) اور چارگاؤں (وڈگے)، جن کے درمیان ۲ کلومیٹر کا فاصلہ ہے، کو جوڑنے والے جھاڑی دار جنگل کے بیچ میں سیمنٹ کے دو چبوتروں پر شیرنی اور اس کے بچوں کے مجسمے نصب کرنے کے لیے پیسے جمع کیے ہیں۔ شیروں کی جارحیت کے باوجود یہ ان کے لیے ایک خراج عقیدت ہے۔ چندر پور میں اس طرح کے بہت سے واگھائی مندر ہیں، مقامی لوک کہانیوں میں یہ کہا گیا ہے کہ اگر کوئی شیرنی ناراض ہوتی ہے اور کسی انسان کو مارتی ہے، تو اسے شانت کرنے کے لیے آپ کو پوجا کرنی پڑتی ہے۔

مینڈھا (مال) کو ابھی تک اس کی ضرورت نہیں پڑی تھی۔

اس افراتفری کے درمیان، فرار کی نایاب کہانی بھی ہے۔

جس دن مینڈھا (مال) میں تین خواتین کی موت واقع ہوئی تھی، تقریباً اسی وقت چارگاؤں (وڈگے) سے متصل جنگلاتی پٹی میں تیندو کے پتے جمع کرنے گئیں کسان وندنا ونائک گجبھیے پر ایک شیر نے حملہ کیا تھا، لیکن کرشمائی طور پر وہ زندہ بچ گئی تھیں۔

’’وہ ایک نر شیر تھا،‘‘ ۵۰ سالہ وندنا کو زندگی اور موت کے درمیان حائل وہ چند لمحات واضح طور پر یاد ہیں۔ ’’میری جان میرے گروپ کی دوسری خواتین کی وجہ سے بچی تھی۔ جب انہیں معلوم ہوا کہ شیر نے پیچھے سے حملہ کیا ہے اور میں منہ کے بل گر گئی ہوں، تو انہوں نے فوراً ہی چیخنا اور اونچی آوازیں نکالنا شروع کر دیا تھا،‘‘ وہ یاد کرتی ہیں۔ ’’اس کی وجہ سے جانور ڈر گیا اور مجھے چھوڑ کر جنگلوں میں واپس لوٹ گیا۔‘‘

وہ صبح کے ۷:۳۰ سے ۸ بجے کے درمیان کا وقت رہا ہوگا۔

جب شیر پیچھے ہٹ گیا، تو وندنا نے اپنی پوری ہمت کو جمع کیا اور کھڑی ہوگئیں، حالانکہ وہ شدید طور پر زخمی تھیں اور بہت زیادہ خون بہہ رہا تھا، لیکن کچھ دوری پر حیران و پریشان کھڑی خواتین کے گروپ کی طرف چلی آئی تھیں۔ ’’گھر واپس آنے سے قبل میں کچھ دیر وہاں بیٹھی رہی،‘‘ وہ کہتی ہیں۔

وندنا گھر پہنچتے ہی بیہوش ہوگئیں۔ انہیں فوری طور پر سندیواہی کے سرکاری ہسپتال میں لے جایا گیا، جہاں ان کے زخموں پر ٹانکے لگائے گئے، انجیکشن دیے گئے اور تین دن تک علاج کے بعد وہاں سے ان کی چھٹی ہوئی تھی۔ ان کا علاج جاری ہے اور انفیکشن سے بچاؤ کے لیے وہ ہر ہفتے انجیکشن لیتی ہیں۔ وہ کہتی ہیں کہ ابھی مزید انجیکشن لگنے ہیں۔

صحت یاب ہونے کے لیے وہ سندیواہی سے تقریباً ۳۰ کلومیٹر دور تحصیل چِمور کے موٹیگاؤں میں اپنے بھائی کے گھر چلی گئی تھیں۔ ’’میں کبھی بھی تیندو کے پتے جمع کرنے واپس نہیں جاؤں گی،‘‘ چھڑی کے سہارے چلتے ہوئے وہ اعلان کرتی ہیں۔ صحت کی بحالی کے لیے وہ اپنے مائکے میں مقیم ہیں۔

ان کا سر نرم پیلے رنگ کے کپڑے میں لپٹا ہوا تھا۔ وندنا کہتی ہیں کہ شیر کے حملے کے بعد ان کے سر پر ۴۰ ٹانکے لگے تھے۔ ’’وہ مجھے میری گردن سے نہیں پکڑ سکا،‘‘ وہ حیران ہیں کہ ان کی جان کیسے بچ گئی۔

جے دیپ ہرڈیکر کی اس سیریز کی دیگر اسٹوریز پڑھیں:

’یہ ایک نئی قسم کی خشک سالی ہے‘

جنگلی جانوروں کے سامنے کسانوں کی بے بسی

مچان سے رات بھر کھیت کی پہریداری

چندرپور: جنگلی جانوروں کے خوف کے سائے میں کھیتی

کسانوں کے لیے بیداری مہم چلا رہے ’ڈُکّر والے ماما‘

’مہنگائی تو پہلے سے تھی، اب ہاتھی بھی آ گئے پریشان کرنے‘

ترجمہ نگار: شفیق عالم