पारी के मयारू पाठक,
पारी के ये बछर भारी भरदराय वाले रहिस.
जइसने-जइसने साल 2023 बिदा होवत हे. पारी टीम ह साल भर के अपन सफर उपर नजर डारत हवय. अवेइय्या 9 दिन तक के कड़ी मं हमन जऊन ला बछर भर मं करे हवन, ओकर सबले बढ़िया जिनिस ला पहुंचाय के कोसिस करत हवन. ये मं कहिनी, कविता, लोकगीत, संगीत, पेंटिंग, फिलिम, फोटू, अनुवाद, लाइब्रेरी, फेस (चेहरा), सोशल मीडिया अऊ लइका मन के संग करे बूता, सब्बो कुछु सामिल रइही.
हमन देश भर ले आय कहिनी ला बतावत रहेन अऊ ये बछर त हमन ला उत्तर पूर्व समेत कतको नव जगा के कहिनी ला पारी मं छापे हवन. खेती-किसानी मं अपर्णा कार्तिकेयन के कड़ी महत्तम रहिस. ये कड़ी मं हमन मोंगरा, तिल, सुकसी मछरी अऊ दीगर अइसने खाये के जिनिस के दुनिया ला जाने-समझे के मऊका मिलिस. जयदीप हार्डिकर के मनखे-जानवर लड़ई के नतीजा अऊ अभ्यारण्य के तीर रहेइय्या ये लोगन मन के ऊपर येकर जानलेवा असर- ‘ये ह नवा किसिम के अकाल आय’- मं खेती ऊपर मनभावन कड़ी पढ़े जा सकथे.
पलानी कुमार ह कोंनहा मं परे लोगन मन के, मूर्ति बनेइय्या, किन्नर कलाकार मन के संगे संग तमिलनाडु के मछुआरा मन के जिनगी ला फोटू मं दिखाइन. रितायन मुखर्जी अऊ मुजामिल भट ह कश्मीर अऊ लद्दाख मं चरवाहा मन के संग घूमत जाके, ऊंच पहाड़ के जगा मं बूता करत वो मन के कठिन जिनगी अऊ बदलत मऊसम के नतीजा ले जूझत जिनगी के दस्तावेजीकरन करिन. ज्योति शिनोली ह महाराष्ट्र के गाँव-देहात मं होवत कतको बड़े अनियाव ला दरज करिस. जेन मं नवा पीढ़ी के खिलाड़ी, प्रवासी लइका मन के पढ़ई-लिखई के समस्या, महवारी ले जुरे कतको रोक-टोक अऊ कतको ला हमर आगू रखिन. बिहार के पारी फेलो उमेश कुमार राय के लिखे बिहार मं शराबबंदी ले होवेइय्या मऊत अऊ मुसहर समाज ऊपर होय अतियाचार के कहिनी मन रहिस.
हमन चिरई –चिरगुन ला बचाय अऊ ये काम मं इहाँ के लोगन मन के हाथ ला घलो कुछु लेख मं जानेन-गुनेन. विशाखा जॉर्ज के कहिनी ले पता चलथे के उदती हिमालय के बासिंदा एक ठन चिरई, बुगुन लियोसिचला के प्रजाति ह कइसने नंदावत जावत हे. प्रीति डेविड ह अपन लेख मं राजस्थान मं गहिर ढंग ले नंदावत जावत सोन चिरई (ग्रेट इंडियन बस्टर्ड), अऊ सौर ऊर्जा बिजली कारखाना मन के सेती वो मन के पवित्र जंगल ओरण मं कब्जा होवत जावत हवय.
अपन तीर-तखार के होवत घटना मन ला घलो पारी ह लिखिस. महाराष्ट्र मं किसान लोगन मन के विरोध प्रदर्सन, अपन हक मांगे सेती सड़क मं उतरे आदिवासी मन ले गोठ-बात, आंगनबाड़ी कार्यकर्ता मन के हड़ताल, जइसने-जइसने खबर मिलत गीस हमन सबू कहिनी ला छापेन. येकर बाद दिसंबर 2023 मं जब मध्य प्रदेश अऊ छत्तीसगढ़ मं चुनाव आइस, मौका मं रहिके पार्थ एम.एन ह लिखिस. ये दूनों राज के असल हकीकत ला हमर आगू मं रखिस. बुलडोजर वाले अनियाव होय धन आदिवासी मन ऊपर अतियाचार अऊ हिरासत मं मऊत, ये सब्बो असलियत ला वो हा आगू मं रखिस.
गाँव-देहात मं रिपोर्टिंग करे बखत अक्सर उहाँ के अलग बात के पता चलथे. जइसने के स्मिता खटोर जब मुर्शिदाबाद जिला मं बीड़ी मजूर मन के कहिनी लिखत रहिस, उहाँ के माईलोगन मन के गीत अऊ लइका मन के खेल उपर घलो लिखिस. कुछेक खास निजी किसम के कहिनी रहिस, जइसने मेधा काले के. जेन मं वो ह एक झिन टीचर के रूप मं, बिसेस-शिक्षक मन के ऊपर उछाह ले भरे रिपोर्ट बनाईन. पारी के पत्रकार मन गाँव-देहात मं जाके उहाँ के तीज-तिहार ला लेके लिखिन. जइसने के मां बनबीबी, शैला नृत्य, चादर बदनी, पिली वेशा. हमर करा एक ठन अऊ लेख हवय, “वइसे घलो ये मन्दिर काकर आय?”
पारी के टीम जम्मो देश मं बगरे हवय. ये बात के सेती हमन देश के हर जगा ले कहिनी दे हवन. ये बछर हमन लचार गिग मजूर जइसने ऐप ले सेवा देवेइय्या लोगन मन के, अनुवाद के आनन्द अऊ प्रवासी मजूर के भाखा ले जुरे समस्या, अऊ इहाँ तक के गाँव-देहात के माईलोगन मन अपन सुस्ताय के बखत मं काय करथें, जइसने बिसय मं लिखेन. आस हवय के अवेइय्या बछर मं पारी अइसने किसम के अऊ कहिनी लेके आही.
हमन (डेरी) समंदर पार कर्नाटक के एक ठन लोक कला तिहार पीली वेशा जइसने तिहार के बारे मं लिखेन, अऊ लद्दाख के ज़ांस्कर इलाका मं याक चरवाहा मन (जउनि) के संग जाके घलो लिखेन
ग्राइंडमिल सॉन्ग प्रोजेक्ट (जांता गीत प्रोजेक्ट) जेकर ऊपर पारी ला भारी गरब हवय. नमिता वाईकर के अगुवई मं चलत ये प्रोजेक्ट ह हमर बर हिरोंदी भेंट आय. ये बछर 2023 मं हमर खजाना मं कच्छी गीत घलो भरिस. ये सब्बो कच्छ के रण के गीत के रिकॉर्डिंग आय, जऊन ला पारी के कवयित्री प्रतिष्ठा पंड्या पिरोय हवंय.
पारी मं पहिली बेर एक ठन नवा चीज आइस, ये आय आदिवासी लइका मन के बनाय पेंटिंग. ओडिशा के गाँव-देहात के स्कूल के लइका मन के हाथ ले बने ये चित्रकारी ला कनिका गुप्ता ह संकेल के रखे मं भारी जतन अऊ उदिम लगाय हवय. पश्चिम बंगाल मं देउचा पचामी कोयला खदान मं माइलोगन के अगुवई मं विरोध प्रदर्सन होईस. येकर जम्मो कहिनी कलाकार लबानी जंगी अपन चित्रन के जरिया ले बताइन.
पारी एमएमएफ फेलो बिपत मं परे शिल्पकार मन के कहिनी ला बताईन. महाराष्ट्र मं संकेत जैन ह नान-नान गाँव मं रहेइय्या अइसने करीगर मंन के बारे मं लिखीन जेन मन कुरिया, जाली जइसने चीज मन ला बनाथें. अइसनेच श्रुति शर्मा ह खेल ले दूरिहा खेल समान बनेइय्या कारीगर मन के कला अऊ जिनगी के लड़ई ला लिखीन, जऊन मं ये लोगन मन के पेशा के इतिहास, समाजिक अऊ सांस्कृतिक हिस्सा हवय. प्रकाश भुइयां ह असम के माजुली से ऊहां के रास परंपरा ऊपर लिखीन; संगीत शंकर उत्तरी केरल के थोलपावकुथु परंपरा ऊपर अऊ फैसल अहमद ह कर्नाटक के तुलुनाडु के भूत पूजा अऊ मेलमिलाप के परंपरा ला उजागर करिन.
आंध्र प्रदेश ले पारी फेलो अमृता कोसुरू ह करजा मं बूड़े परिवार के बारे में लिखिन. ये बछर पारी मं जेंडर के बात कहेइय्या कहिनी घलो बढ़ीस.
ये सब्बो के संगे संग, पारी के बेर के बेर लिखेइय्या हमर जुन्ना संगवारी मन हमर खजाना ला घलो भरिन. पुरुषोत्तम ठाकुर ह छत्तीसगढ़ अऊ झारखंड ले आदिवासी समाज के जिनगी, जीविका अऊ तिहार के फोटू अऊ वीडियो के संग ओकर मन के कहिनी पठोइन. शालिनी सिंह ह यमुना नदी तीर ले विस्थापित करे गे किसान मन के पीरा ला बताईन. उर्वशी सरकार ह सुंदरबन मं केंकरा मछरी धरेइय्या अऊ ओकर बारे मन के बारे मं लिखेइय्या एक ठन संपादक ले भेंट घाट करिन. कविता अय्यर ह ओडिशा मं गाँव देहात के स्कूल मन ला बंद करे ले लइका मन के पढ़ई-लिखई मं काय असर परत हवय, वोला बताइन. एस. सेंथलीर ह बेल्लारी मं खदान मं बूता करेइय्या माई मजूर ऊपर, स्वेता डागा ह हिमाचल प्रदेश मं प्राइड मार्च ऊपर लिखीन. जिज्ञासा मिश्रा ह बताइन के अभू घलो समाज मं बिहाव बर नोनी मन ला कइसने बेंचे जावत हवय. उमेश सोलंकी ह लिफाफा अऊ चलनी जइसने जरूरी जिनिस ला लेके लिखीन. मुंबई मं इहाँ के बाजा-साज बजेइय्या मन के ऊपर आकांक्षा, अऊ तमिलनाडु के इरुलर समाज ऊपर स्मिता तुमुलुरु जानकारी देइन.
पारी सेती साल 2023 मं शिक्षा अऊ शिक्षन ले जुरे कतको जानकार अऊ नामी विद्वान लोगन मन लिखीन. नित्या राव कडलूर के मछुआरिन अऊ डॉ. ओवी थोराट हिमालय मं पशुपालन ऊपर लिखीन. ये लोगन मन के छोड़ कतको पढ़ेइय्या अऊ शोध करेइय्या लइका मन घलो पारी बर लिखीन. जेन बखत वो मन ये समाज अऊ लोगन मन के बारे मं लिखत रहिन, ओकर मन के बारे मं वो मन पढ़त रहिन, ये मं घुमंतू जनजाति, बिहार के गाँव के नचनिया, कोच्चि के धोबी मरद अऊ महतारी जात अऊ ओकर जिनगी ला नजीक ले जाने के मऊका मिलिस. स्कूल मं पढ़ेइय्या एक झिन नोनी ह पारी खातिर गाँव के डाकिया के कहिनी लिखिस.
हमन आदिवासी लइका मन के बनाय चित्रकारी के नव खजाना बनायेन (डेरी) अऊ आरे, मुंबई मं आदिवासी मन के विरोध-प्रदर्सन ला जगा देन (जउनि)
अब पारी 2023 के सबले बढ़िया के एक झलक. जऊन ह अवेइय्या हफ्ता आवत हे, एक नजर डारव
हमन अपन कविता, छंद अऊ अवाज ले सुरु करबो. येकर ले हमर खजाना ह अऊ पोठ होईस अऊ कतको नवा आयाम जुरिस. एकर बाद लाइब्रेरी टीम के लेख मन आय. ये ह मं सबले बढ़िया अऊ चुनिंदा किताब अऊ रिपोर्ट के झलक मिलही, जेन ला ये बछर मं हमन पारी के लाइब्रेरी मं जोरे हवन. पारी फिलिम टीम ह कतको सुपरहिट फिलिम लेके आइस. कतको नवा फिलिमकार अऊ वीडियोग्राफर हमर ले जुड़ीन. पारी मं सबले शानदार फिलिम आय- बिहार शरीफ के मदरसा अजीजिया के जरे बखत श्रेया कात्यायिनी, अऊ जैसलमेर के ओरण के बचाय के कोसिस ऊपर ऊर्जा के फिलिम. कचरा संकलेइय्या सफाईकर्मी के बारे मं कविता कार्नेइरी के फिलिम विंटेज पारी मं सब्बो के नजर लगे रहिस. ये सब्बो के झलक पारी फिलिम के लेख मं पढ़े, देखे-सुने ला मिल जाही.
पारी मं छपे हरेक कहिनी 14 भारतीय भाखा मं नवा जनम लेथे. हमन पारी के कहिनी मन के अनुवाद ला कहिनी के नवा रूप मं देखथन, जेन ह पारी ला जियादा लोकतांत्रिक अऊ समावेशी बनाय के एक ठन उदिम आय. ये ह भारतीय भाखा मं अनुवादक अऊ संपादक मन के टीम पारी भाषा के कोशिश ले होय सके हवय. ये लोगन मन के बछर भर के काम ला नापे ले वो मन के काम के दायरा के अंदाजा मिल जाही.
साल 2023 मं फोटू पारी के सबके नजर मं रहिस. ये बछर फोटू के दुनिया मं जब हमन जाथन त ये बात ह नजर मं आथे. हमन पारी के काम अऊ पारी इंटर्नशिप ला घलो नापथन. इही बछर पारी सोशल मीडियो मं जऊन घलो पोस्ट करिस, ओकर हाईलाइट रील ला देखे बर नई बिसोरिस. अऊ आखिर मं हमन पारी के फेसेज प्रोजेक्ट के लेख संग साल 2023 ला बिदा देवत हवन अऊ साल 2024 के परघनी करत हवन. अऊ लोगन मन ला ये काम के जरिया ले एक बेर अऊ मसूस कराथन के हरेक भारतीय के चेहरा कतका अलग अऊ कतक किसिम के हवय.
साल 2023 जवेइय्या हवय. ये बछर पारी के झोली मं कतको नवा पुरस्कार परिस. नौ बछर मं पारी ला राष्ट्रीय अऊ अंतरराष्ट्रीय पुरस्कार मिले के आंकड़ा कुल जमा 67 होगे. ये मं सबले नवा, दिसंबर मं पारी के को-फाउंडर शालिनी सिंह ला संयुक्त राष्ट्र संवाददाता संघ डहर ले मिले पुरस्कार आय. हमर मानना आय के ये ईनाम ऊपर सबले पहिली हक वो मन के आय जऊन मन अपन कहिनी उदार मन ले हमन ला बताइन. संग मं तऊन पत्रकार लोगन मन के हाथ हवय जेन मन ये कहिनी मं ला लिखीन. येकर बर तऊन लोगन ला घलो साबासी जेन मन पाठ, फोटू अऊ फिलिम के संपादन अऊ अनुवाद करके अलग-अलग भाखा के लोगन मन तक लेके जाय हवंय.
पारी के संपादक मन, पत्रकार मन के संग मिलके काम करथें. जरूरत परथे त वो लोगन मन के सलाह लेके कहिनी ला अऊ जियादा असरदार अऊ सटीक बनाथें. पारी संग काम करेइय्या अंगरेजी अऊ दीगर भाखा के संपादक, चुनिंदा लेख ऊपर काम करेइय्या फोटू संपादक अऊ फ्रीलांस संपादक मन घलो हमर काम के जरूरी अऊ महत्तम भूमका निभाथें.
एक ठन ऑनलाइन जर्नल ला छापे अऊ संकेल के रखे, पारी डेस्क ले संभव हो सके हवय, जेन ह संपादन, बात के जाँच-पड़ताल अऊ लेआउट बनाथे. जम्मो टीम सब्बो संवाददाता ले आखिरी तक ले जुरे रहिथे. जम्मो बदलाव ला धियान मं रखत लेख के पेश करे तक तक ले सब्बो छोटे-बड़े जानकारी ऊपर समान ढंग ले काम करथें.
हमन 2 जनवरी 2024 ले अपन सरलग प्रकाशन के संग लहूंट के आबो. अगरतला के मेला मं 'मौत के कुआं', बिहार मं छपाई कारीगर, महाराष्ट्र मं दंगा, मेरठ के लोहार अऊ घलो बनेच अकन, पारी ह अपन पढ़ेइय्या मन बर लेके आही.
अवेइय्या साल 2024 मं हमन अपन पढ़ेइय्या मन बर अऊ घलो एक से बढ़के एक कहिनी लेके आबो. बढ़िया रिपोर्टिंग, बढ़िया शॉट अऊ बढ़िया फिलिम. ये सब्बो कहिनी मं आम लोगन के रोजमर्रा के कहिनी होही.
जय जोहार!
पारी टीम
अनुवाद: निर्मल कुमार साहू
