PARI గ్రంథాలయం: 2025లో దృష్టిపెట్టిన

2025వ సంవత్సరంలో, PARI గ్రంథాలయం తన ఆర్కైవ్‌కు 102 నివేదికలను జోడించింది. ప్రాదేశిక హక్కులు, ద్వేషపూరిత ప్రసంగాలు, కార్మిక సర్వేలు, వాతావరణ న్యాయం వంటి మరెన్నోవాటిపై మా దృష్టిని కేంద్రీకరించాం.

ముఖ్యంగా మా సాహిత్య విభాగంలో పని మరింత హడావిడిగా ఉండేది. మేం మేఘాలయలోని వివిధ సముదాయాలకు చెందిన సచిత్ర కథనాల పుస్తకాలను (ఇలారీస్ జైన్‌సెమ్, ది ట్యూన్స్ ఆఫ్ కాంగ్‌థాంగ్), బెంగాల్‌లోని పటచిత్ర కళాకారులు బొమ్మలు వేసి, వివరించి, యువ పాఠకులకు చరిత్రలోని భావనలను అందించే పుస్తకాలను (మొదటి చరిత్ర పాఠాలు: క్రీడలు, ఆటలు, దుస్తులు, వస్త్రధారణ) జోడించాం.

ఋతుపవనాల సమయంలో వచ్చిన వరదలు, రికార్డు స్థాయి వేసవి ఉష్ణోగ్రతల కారణంగా మన చుట్టూ ఉన్న గాలి విషపూరితంగా మారిపోతున్నందున, ఈ శీతాకాలంలో మన గ్రంథాలయంలో వాతావరణ మార్పులపై వచ్చే నివేదికలు ఎప్పటిలాగే వాటికి సంబంధించినవిగానే ఉన్నాయి.

భారతదేశం ఈ ఏడాది మొదటి తొమ్మిది నెలల్లో 99 శాతం రోజులు తీవ్ర వాతావరణ సంఘటనలను ఎదుర్కొంది. ఈ సంఘటనలు 36 రాష్ట్రాలలో, కేంద్రపాలిత ప్రాంతాలన్నింటిలోనూ నమోదయ్యాయి. అంటే, మొత్తం 273 రోజులలో 270 రోజుల పాటు ఈ సంఘటనలు సంభవించాయి. ఈ సంఘటనల వల్ల 4,064 మంది మనుషుల ప్రాణాలు పోయాయి, 9.47 మిలియన్ హెక్టార్ల పంటలు దెబ్బతిన్నాయి, 99,533 ఇళ్ళు ధ్వంసమయ్యాయి, సుమారు 58,982 జంతువులు మరణించాయి.

వాయు కాలుష్యం, వడగాలులు, వాతావరణ మార్పుల వల్ల అత్యంత దుర్బల వర్గాలపై పడే విభిన్న ప్రభావం వంటి అంశాలపై అవగాహనను పెంపొందించేందుకు గ్రంథాలయం కొత్త నివేదికలు వీలు కల్పిస్తున్నాయి.

దేశీయంగా, ప్రపంచానికి సంబంధించి ఆహార న్యాయంపై సమగ్ర అవగాహనకు సహాయపడేందుకు మేం ఆహార భద్రతకు సంబంధించిన వనరులను జోడించాం – ఇందులో ఆహార లభ్యత, కొనుగోలు సామర్థ్యం, మానవ శరీరంలో దాని శోషణ వంటి అంశాలున్నాయి. ప్రపంచ జనాభాలో సుమారు 29 శాతం మంది - అంటే 2.33 బిలియన్ల మంది - మధ్యస్థంగానో, లేదా తీవ్రంగానో ఆహార అభద్రతను ఎదుర్కొంటున్నారు, అంటే వారికి తగినంత ఆహారం క్రమం తప్పకుండా లభించడంలేదు. మన దేశ వ్యవసాయంపై నివేదికలను అందించటం ద్వారా మేం ఈ విశ్లేషణను మరింత బలోపేతం చేశాం.

భారత ప్రభుత్వ గణాంకాల, కార్యక్రమాల అమలు మంత్రిత్వ శాఖ నిర్వహించిన పీరియాడిక్ లేబర్ ఫోర్స్ సర్వే (పిఎల్ఎఫ్ఎస్)ల గురించిన మా నివేదికలను కూడా పరిశీలించండి. ఈ సర్వేలలో కార్మికుల ఉపాధి/నిరుద్యోగ స్థితి, వారు పనిచేసే సంబంధిత రంగం (వ్యవసాయం, రెండవ లేదా మూడవ రంగం) గురించిన డేటా ఉంటుంది. భారతదేశంలోను, ప్రపంచంలోనూ మారుతోన్న శ్రామిక శక్తి స్వరూపాలపై మా కార్మిక విభాగంలో ఒక అంతర్భాగంగా ఉన్న పిఎల్ఎఫ్ఎస్ నివేదికలు ఉంటాయి.

మా వాలంటీర్లే మా కార్యకలాపాలకు కేంద్ర బిందువులు. వారు మేం వెలువరించే ప్రతి నివేదికలో 'స్పష్టతను, వాస్తవికతల'ను సంగ్రహంగా రూపొందిస్తారు. మా వద్ద కళాశాల విద్యార్థులు, ఉద్యోగాలు చేస్తున్నవారు, పదవీ విరమణ చేసిన నిపుణులు ఉన్నారు. వారు సాంద్రమైన, విస్తృతమైన అంశాలను సరళంగా చదువుకునే విధంగా తిరిగి రూపొందించడానికి మాతో స్వచ్ఛందంగా కలిసి పనిచేస్తారు. మా ఆర్కైవ్ పరిజ్ఞానాన్ని అందుబాటులోనూ, వైవిధ్యంగానూ ఉండేలా చూసుకుంటూ వారు తమ సమయాన్ని, నైపుణ్యాలను మాకు అందిస్తారు.

ప్రస్తుతం, PARI గ్రంథాలయంలో మా ప్రారంభం నుండి మాతో కలిసి పనిచేస్తోన్న దాదాపు 450 మంది వాలంటీర్లు ఉన్నారు.

2025 సంవత్సరాన్ని ముగిస్తోన్న ఈ సందర్భంలో, మా రెగ్యులర్ వాలంటీర్లలో కొంతమంది అనుభవాలను, వారు నేర్చుకున్న ముఖ్యమైన విషయాలను మీ ముందుకు తీసుకురావడం మాకు చాలా ఆనందంగా ఉంది.

యాళిని

సత్యమూర్తి

బాంబే ఐఐటిలో ఎన్విరాన్‌మెంటల్ సైన్స్, ఇంజనీరింగ్‌లో ఎమ్‌టెక్ చదువుతున్నారు.

నేను 'స్పష్టత, వాస్తవికతల' కోసం సంకలనం చేసిన ప్రతి నివేదిక నాకు నాలో నిలిచివుండేలా ఒక కొత్త దృక్పథాన్ని అందించింది. ఉదాహరణకు, టెయింటెడ్ కార్పెట్స్: భారతదేశ చేనేత తివాచీల రంగంలో బానిసత్వం, బాల కార్మిక వ్యవస్థ, లేదా క్లైమేట్ ఇండియా 2024: తీవ్ర వాతావరణ సంఘటనలపై ఒక అంచనా వంటి కొన్ని నివేదికలు నన్ను కలచివేశాయి, దానినించి బయటపడటానికి నాకు చాలా రోజులు పట్టింది. అయితే నేను అధ్యయనం చేస్తోన్న దాన్ని పరిగణనలోకి తీసుకుంటే, ఈ నివేదికలపై పనిచేయడం వల్ల సంబంధిత విషయాలపై నేను మరింత అవగాహనను పెంచుకోవడానికి అవకాశాలు లభించాయి.

అది ఒక్క పేజీ నిడివి ఉన్న పోస్టర్ అయినా, 500 పేజీల గణాంక నివేదిక అయినా, PARI గ్రంథాలయపు నిర్మాణాత్మకమైన 'స్పష్టత, వాస్తవికతల' సమాహారం మిమ్మల్ని సమస్య మూలంలోకి తీసుకువెళ్తుంది. దురదృష్టవశాత్తు, ఈ నివేదికలలో చాలా వరకు ఇంకా ప్రధాన స్రవంతిలోకి రాలేదు.

అబిజార్ షేక్

30 ఏళ్ళకు పైగా అనుభవం ఉన్న కమ్యూనికేషన్స్, ఆర్థిక సేవల నిపుణులు

నాకు తీరిక సమయం ఉండటంతో, ఏదైనా ప్రయోజనకరమైన పని చేయాలనుకున్నాను. PARI గ్రంథాలయంతో స్వచ్ఛందంగా పనిచేయడం ఒక అద్భుతమైన అవకాశం. ఎల్లప్పుడూ నా వ్యక్తిగత ఆసక్తులలో ఒకటిగా ఉన్న PARI చేసే పని నాకు సరిగ్గా సరిపోయింది.

గ్రంథాలయంలోని అంశాల వర్గీకరణ, శోధనా సామర్థ్యం మెరుగుపడాలని ఒక పాఠకుడిగా నేను కోరుకుంటున్నాను.

జెర్రీ జోస్

కేరళలోని కోట్టయంకు చెందిన ఒక పర్యావరణ శాస్త్రవేత్త

PARIతో నా పరిచయం, ఆ వెబ్‌సైట్‌ను ప్రారంభించే సమయంలో పి. సాయినాథ్ ఇచ్చిన ఒక ఉపన్యాసం ద్వారా జరిగింది. "ఉపఖండంలోని ఒక ఖండం" వంటి గ్రామీణ భారతదేశాన్ని డాక్యుమెంట్ చేసే ఆ ప్రయత్నం స్ఫూర్తిదాయకంగానూ, అద్వితీయంగానూ ఉంది. నిరంతరం విస్తరిస్తోన్న PARI గ్రంథాలయానికి దూరంగా ఉంటూ కూడా నా వంతు సహకారాన్ని స్వచ్ఛందంగా అందించడమే నా మార్గం.

గ్రంథాలయంలో అందుబాటులో ఉండేలా 'స్పష్టత, వాస్తవికతల'తో కూడిన క్యూరేటెడ్ నివేదికలు ఉండటం ప్రశంసనీయం. విస్తరించిన పరిధి PARI జర్నలిజానికి చాలా పరిపూరకంగా ఉందని నేను భావిస్తున్నాను. పరిశోధనే ఒక అభ్యాసం లాంటిదైన సందర్భంలో, నాకు నైపుణ్యమున్న రంగంలోనూ, దాని వెలుపలా కూడా నివేదికలపై పనిచేయడం నాకు చాలా ఆనందంగా ఉంది.

2026లో, మా నివేదికల సేకరణను వైకల్యం, వృద్ధుల గురించిన సారాంశాలతో ముఖ్యాంశాలతో కూడినవిగా మరింత బలోపేతం చేయాలని మేం ఆశిస్తున్నాం.

PARI గ్రంథాలయం తన 12వ సంవత్సరంలోకి అడుగుపెడుతోన్న సందర్భంగా, గ్రామీణ భారతదేశాన్ని దాని అన్ని కోణాల్లో అర్థం చేసుకోవడానికి సహాయపడే మరిన్ని నివేదికలను, పత్రాలను మేం తీసుకువస్తాం. మా పాత, కొత్త వాలంటీర్లతో కలిసి పనిచేయడానికి, మా గ్రంథాలయాన్ని మరింత బలోపేతం చేయడానికి మేం ఎదురుచూస్తున్నాం!

మేం చేస్తోన్న ఈ పని మీకు ఆసక్తిని కలిగిస్తే, మీరు PARI గ్రంథాలయానికి, PARIకి సహకరించాలనుకుంటే, దయచేసి ఇక్కడ ఉన్న వాలంటీర్ ఫారమ్‌ను పూర్తిచేయండి. మాతో కలిసి పనిచేయడం కోసం మేం ఫ్రీలాన్సర్లను, స్వతంత్ర రచయితలను, రిపోర్టర్లను, ఫోటోగ్రాఫర్లను, చలనచిత్ర నిర్మాతలను, అనువాదకులను, సంపాదకులను, చిత్రకారులను, పరిశోధకులను స్వాగతిస్తున్నాం.

కవర్ డిజైన్: స్వదేశ శర్మ

అనువాదం: సుధామయి సత్తెనపల్లి