ಪರಿ ಲೈಬ್ರರಿ: 2025ರ ಒಂದು ಪಕ್ಷಿನೋಟ

2025ನೇ ಸಾಲಿನಲ್ಲಿ ಪರಿ ಲೈಬ್ರರಿ ತನ್ನ ದಾಖಲೆಗಳ ಸಂಗ್ರಹಕ್ಕೆ ಒಟ್ಟು 102 ವರದಿಗಳನ್ನು ಸೇರಿಸಿದೆ. ಈ ವರ್ಷ ಮುಖ್ಯವಾಗಿ ನಮ್ಮ ಗಮನವು ಮೂಲನಿವಾಸಿಗಳ ಹಕ್ಕುಗಳು, ದ್ವೇಷ ಭಾಷಣ, ಕಾರ್ಮಿಕ ಸಮೀಕ್ಷೆಗಳು, ಹವಾಮಾನ ನ್ಯಾಯ ಮತ್ತು ಇನ್ನಿತರ ಮಹತ್ವದ ವಿಷಯಗಳ ಮೇಲಿತ್ತು.

ನಮ್ಮ ಲೈಬ್ರರಿಯ ಸಾಹಿತ್ಯ ವಿಭಾಗದಲ್ಲಿ ಈ ವರ್ಷ ಕೆಲಸದ ಒತ್ತಡ ವಿಶೇಷವಾಗಿ ಹೆಚ್ಚಿತ್ತು. ನಾವು ಮೇಘಾಲಯದ ವಿವಿಧ ಸಮುದಾಯಗಳ ಸಚಿತ್ರ ಕಥಾ ಪುಸ್ತಕಗಳನ್ನು (ಇಲಾರಿಸ್ ಜೈನ್ಸೆಮ್, ದಿ ಟ್ಯೂನ್ಸ್ ಆಫ್ ಕೊಂಗ್ರಾಂಗ್) ಸೇರಿಸಿದ್ದೇವೆ. ಇದರೊಂದಿಗೆ ಬಂಗಾಳದ ಪಟಚಿತ್ರ ಕಲಾವಿದರು ಚಿತ್ರಿಸಿರುವ ಪುಸ್ತಕಗಳನ್ನೂ ಸಂಗ್ರಹಿಸಿದ್ದೇವೆ; ಇವು ಇತಿಹಾಸದ ವಿಷಯಗಳನ್ನು ಎಳೆಯ ಓದುಗರಿಗೆ ಆಕರ್ಷಕವಾಗಿ ಪರಿಚಯಿಸುತ್ತವೆ (ಫಸ್ಟ್ ಹಿಸ್ಟರಿ ಲೆಸನ್ಸ್: ಸ್ಪೋರ್ಟ್ಸ್ ಅಂಡ್ ಗೇಮ್ಸ್, ಕ್ಲೋತ್ಸ್ ಅಂಡ್ ಅಟೈರ್).

ಭಾರತವು ಈ ವರ್ಷದ ಮೊದಲ ಒಂಬತ್ತು ತಿಂಗಳುಗಳಲ್ಲಿ ಶೇಕಡಾ 99ರಷ್ಟು ದಿನಗಳ ಕಾಲ ತೀವ್ರ ಹವಾಗುಣ ವೈಪರೀತ್ಯಗಳನ್ನು ಎದುರಿಸಿದೆ - ಇದು ದೇಶದ ಎಲ್ಲಾ 36 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ವರದಿಯಾಗಿದೆ. ಅಂದರೆ ಒಟ್ಟು 273 ದಿನಗಳಲ್ಲಿ 270 ದಿನಗಳು ಇಂತಹ ಘಟನೆಗಳು ಸಂಭವಿಸಿವೆ. ಈ ಹವಾಗುಣ ವೈಪರೀತ್ಯ ಘಟನೆಗಳು 4,064 ಜನರ ಜೀವಗಳನ್ನು ಬಲಿ ಪಡೆದಿವೆ, 9.47 ಮಿಲಿಯನ್ ಹೆಕ್ಟೇರ್ ಬೆಳೆಗಳ ಮೇಲೆ ಪರಿಣಾಮ ಬೀರಿವೆ, 99,533 ಮನೆಗಳನ್ನು ನಾಶಪಡಿಸಿದೆ ಮತ್ತು ಸರಿಸುಮಾರು 58,982 ಪ್ರಾಣಿಗಳ ಸಾವಿಗೆ ಕಾರಣವಾಗಿದೆ.

ಪರಿ ಲೈಬ್ರರಿಯ ಈ ಹೊಸ ವರದಿಗಳು ವಾಯು ಮಾಲಿನ್ಯ, ಹೀಟ್‌ವೇವ್ಸ್ (ಉಷ್ಣ ಮಾರುತಗಳು) ಮತ್ತು ಸಮಾಜದ ಅತ್ಯಂತ ದುರ್ಬಲ ವರ್ಗದವರ ಮೇಲೆ ಹವಾಗುಣ ಬದಲಾವಣೆಯು ಬೀರುತ್ತಿರುವ ವಿಭಿನ್ನ ಪರಿಣಾಮಗಳ ಕುರಿತು ಬೆಳಕು ಚೆಲ್ಲುತ್ತವೆ.

ಆಹಾರ ಭದ್ರತೆಗೆ ಸಂಬಂಧಿಸಿದಂತೆ ರಾಷ್ಟ್ರೀಯ ಮತ್ತು ಜಾಗತಿಕ ಸಂದರ್ಭಗಳನ್ನು ಸಮಗ್ರವಾಗಿ ಅರ್ಥಮಾಡಿಕೊಳ್ಳಲು ನೆರವಾಗುವಂತೆ ನಾವು ಲೈಬ್ರರಿಗೆ ಹೊಸ ಸಂಪನ್ಮೂಲಗಳನ್ನು ಸೇರಿಸಿದ್ದೇವೆ. ಇವು ಆಹಾರ ಲಭ್ಯತೆ, ಜನರ ಕೊಳ್ಳುವ ಆರ್ಥಿಕ ಶಕ್ತಿ ಮತ್ತು ಮಾನವ ದೇಹದ ಪೌಷ್ಟಿಕಾಂಶ ಹೀರಿಕೊಳ್ಳುವ ಸಾಮರ್ಥ್ಯದಂತಹ ಪ್ರಮುಖ ಅಂಶಗಳ ಮೇಲೆ ಬೆಳಕು ಚೆಲ್ಲುತ್ತವೆ. ಜಾಗತಿಕ ಜನಸಂಖ್ಯೆಯ ಸುಮಾರು ಶೇಕಡಾ 29 ರಷ್ಟು ಜನರು – ಅಂದರೆ 2.33 ಬಿಲಿಯನ್ ಜನರು – ಸಾಧಾರಣ ಅಥವಾ ತೀವ್ರವಾದ ಆಹಾರ ಅಭದ್ರತೆಯನ್ನು ಎದುರಿಸುತ್ತಿದ್ದಾರೆ. ಇದರರ್ಥ ಅವರಿಗೆ ನಿಯಮಿತವಾಗಿ ಪೌಷ್ಟಿಕ ಆಹಾರ ಲಭ್ಯವಾಗುತ್ತಿಲ್ಲ. ಈ ಜಾಗತಿಕ ವಿವರಗಳ ಜೊತೆಗೆ ನಮ್ಮ ದೇಶದ ಕೃಷಿಗೆ ಸಂಬಂಧಿಸಿದ ವರದಿಗಳನ್ನು ಸೇರಿಸುವ ಮೂಲಕ ಈ ಅಧ್ಯಯನವನ್ನು ನಾವು ಇನ್ನಷ್ಟು ಬಲಪಡಿಸಿದ್ದೇವೆ.

ಭಾರತ ಸರ್ಕಾರದ ಸಾಂಖ್ಯಾಶಾಸ್ತ್ರ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯವು ನಡೆಸುವ ಪೀರಿಯಾಡಿಕ್‌ ಲೇಬರ್‌ ಫೋರ್ಸ್‌ ಸರ್ವೇ (ಪಿಎಲ್‌ಎಫ್‌ಎಸ್)‌ ಕುರಿತಾಗಿಇರುವ ನಮ್ಮ ವರದಿಗಳನ್ನು ಸಹ ನೀವು ಈ ನಿಟ್ಟಿನಲ್ಲಿ ಗಮನಿಸಬಹುದು. ಈ ಸಮೀಕ್ಷೆಗಳಲ್ಲಿ ಕಾರ್ಮಿಕರ ಉದ್ಯೋಗ ಅಥವಾ ನಿರುದ್ಯೋಗ ಮತ್ತು ಅವರು ಕೆಲಸ ಮಾಡುವ ವಲಯಗಳಿಗೆ (ಕೃಷಿ, ದ್ವಿತೀಯ ಅಥವಾ ತೃತೀಯ ವಲಯ) ಸಂಬಂಧಿಸಿದಂತೆ ವಿವರಗಳನ್ನು ನೀವು ಗಮನಿಸಬಹುದು. ಭಾರತ ಹಾಗೂ ಜಾಗತಿಕ ಮಟ್ಟದಲ್ಲಿ ಬದಲಾಗುತ್ತಿರುವ ಕಾರ್ಮಿಕ ವರ್ಗದ ಜನರ ಸ್ಥಿತಿಗಳ ಕುರಿತು ವರದಿಗಳನ್ನು ನಮ್ಮ ಕಾರ್ಮಿಕ ವಿಭಾಗ ಹೊಂದಿದೆ. ಪಿಎಲ್‌ಎಫ್‌ಎಸ್ ಸರ್ವೇಗಳನ್ನು ಈ ವಿಭಾಗದ ಪ್ರಮುಖ ಭಾಗ ಎಂದೇ ಕರೆಯಬಹುದು

ನಮ್ಮ ಈ ಎಲ್ಲಾ ಕೆಲಸಗಳ ಹೃದಯಭಾಗದಲ್ಲಿರುವುದು ನಮ್ಮ ಸ್ವಯಂಸೇವಕರು. ನಮ್ಮಲ್ಲಿರುವ ಪ್ರತಿಯೊಂದು ವರದಿಯ ಸಾರಾಂಶವನ್ನು ‘ಫೋಕಸ್ ಮತ್ತು ಫ್ಯಾಕ್ಟೋಯ್ಡ್ಸ್’ (focus and factoids) ರೂಪದಲ್ಲಿ ಇವರು ಸಿದ್ಧಪಡಿಸುತ್ತಾರೆ. ನಮ್ಮೊಂದಿಗೆ ಕಾಲೇಜು ವಿದ್ಯಾರ್ಥಿಗಳು, ಉದ್ಯೋಗಿಗಳು ಹಾಗೂ ನಿವೃತ್ತ ವೃತ್ತಿಪರರು ಸ್ವಯಂಸೇವಕರಾಗಿ ಕೆಲಸ ಮಾಡುತ್ತಿದ್ದು, ಇವರು ಅತ್ಯಂತ ಕ್ಲಿಷ್ಟಕರ ಮತ್ತು ಸಂಕೀರ್ಣ ವರದಿಗಳನ್ನು ಸರಳವಾಗಿ ಓದುವಂತೆ ಮಾಡುತ್ತಾರೆ. ಇವರು ತಮ್ಮ ಅಮೂಲ್ಯ ಸಮಯ ಮತ್ತು ಕೌಶಲವನ್ನು ನಮಗೆ ನೀಡುವ ಮೂಲಕ, ನಮ್ಮ ಲೈಬ್ರರಿಯ ಸಂಪನ್ಮೂಲಗಳು ಎಲ್ಲರಿಗೂ ಸುಲಭವಾಗಿ ಲಭ್ಯವಾಗುವಂತೆ ಮತ್ತು ವಿದ್ವತ್ಪೂರ್ಣವಾಗಿ ವೈವಿಧ್ಯಮಯವಾಗಿರುವಂತೆ ನೋಡಿಕೊಳ್ಳುತ್ತಿದ್ದಾರೆ.

ಪ್ರಸ್ತುತ, ಪರಿ ಲೈಬ್ರರಿಯ ಆರಂಭದಿಂದ ಇದುವರೆಗೆ ನಮ್ಮೊಂದಿಗೆ ಸುಮಾರು 450 ಮಂದಿ ಸ್ವಯಂಸೇವಕರು ಕೈಜೋಡಿಸಿದ್ದಾರೆ.

2025ರ ವರ್ಷ ಅಂತ್ಯಗೊಳ್ಳುತ್ತಿರುವ ಈ ಸಂದರ್ಭದಲ್ಲಿ, ನಮ್ಮೊಂದಿಗೆ ನಿರಂತರವಾಗಿ ಕೆಲಸ ಮಾಡುತ್ತಿರುವ ಕೆಲವು ಸ್ವಯಂಸೇವಕರ ಅನುಭವಗಳು ಮತ್ತು ಅವರು ಗಳಿಸಿದ ಪ್ರಮುಖ ಒಳನೋಟಗಳನ್ನು ನಿಮ್ಮ ಮುಂದೆ ಪ್ರಸ್ತುತಪಡಿಸುತ್ತಿದ್ದೇವೆ.

ಯಾಳಿನಿ ಸತ್ಯಮೂರ್ತಿ

ಮುಂಬೈ ಐಐಟಿಯಲ್ಲಿ ಪರಿಸರ ವಿಜ್ಞಾನ ಮತ್ತು ಎಂಜಿನಿಯರಿಂಗ್ ವಿಭಾಗದಲ್ಲಿ ಎಂಟೆಕ್ ವ್ಯಾಸಂಗ ಮಾಡುತ್ತಿದ್ದಾರೆ.

ಪರಿ ಲೈಬ್ರರಿಯ ಸುಸಂಬದ್ಧ ರೀತಿಯಲ್ಲಿ ಸಂಯೋಜಿಸಿದ 'ಫೋಕಸ್ ಮತ್ತು ಫ್ಯಾಕ್ಟೋಯ್ಡ್ಸ್' ಬರೆಹಗಳು, ಅದು ಕೇವಲ ಒಂದು ಪುಟದ ಪೋಸ್ಟರ್ ಆಗಿರಲಿ ಅಥವಾ 500 ಪುಟಗಳ ಅಂಕಿಅಂಶಗಳ ವರದಿಯಾಗಿರಲಿ, ನಿಮ್ಮನ್ನು ಆ ವಿಷಯದ ಮೂಲ ತಿರುಳಿಗೆ ಕರೆದೊಯ್ಯುತ್ತದೆ. ದುರದೃಷ್ಟವಶಾತ್, ಇಂತಹ ಅನೇಕ ವರದಿಗಳು ಇನ್ನೂ ಮುಖ್ಯವಾಹಿನಿಯ ಚರ್ಚೆಗಳಲ್ಲಿ ಸ್ಥಾನ ಪಡೆದಿಲ್ಲ.

ಅಬಿಜಾರ್ ಶೇಖ್

ಸಂಪರ್ಕ ಮತ್ತು ಹಣಕಾಸು ಸೇವೆಗಳ ಕ್ಷೇತ್ರದಲ್ಲಿ 30 ವರ್ಷಗಳಿಗೂ ಹೆಚ್ಚಿನ ಅನುಭವ ಹೊಂದಿರುವ ತಜ್ಞ.

ನನ್ನ ಬಿಡುವಿನ ವೇಳೆಯಲ್ಲಿ ಏನಾದರೂ ಸಾರ್ಥಕ ಎನ್ನಿಸುವಂತಹದ್ದನ್ನು ಮಾಡಬೇಕೆಂಬ ಹಂಬಲ ನನಗಿತ್ತು. ಪರಿ ಲೈಬ್ರರಿಗೆ ಸ್ವಯಂಸೇವಕನಾಗಿ ಕೆಲಸ ಮಾಡುವುದು, ಈ ನಿಟ್ಟಿನಲ್ಲಿ ಸಿಕ್ಕ ಅತ್ಯುತ್ತಮ ಅವಕಾಶವಾಗಿತ್ತು. ಪರಿ ಮಾಡುತ್ತಿರುವ ಕೆಲಸಗಳು ನನ್ನ ವೈಯಕ್ತಿಕ ಆಸಕ್ತಿಯ ವಿಷಯಗಳೂ ಆಗಿದ್ದರಿಂದ, ಈ ಕೆಲಸ ನನಗೆ ಬಹಳ ಆಪ್ತವೆನ್ನಿಸಿತು.

ಒಬ್ಬ ಓದುಗನಾಗಿ ನಾನು ಬಯಸುವುದೆಂದರೆ ಇನ್ನಷ್ಟು ಉತ್ತಮವಾದ ವಿಷಯ ವರ್ಗೀಕರಣ ಮತ್ತು ವರದಿಗಳನ್ನು ಸುಲಭವಾಗಿ ಸಿಗುವಂತೆ ಮಾಡುವುದು.

ಜೆರ್ರಿ ಜೋಸ್‌

ಕೇರಳ, ಕೊಟ್ಟಾಯಂ ಮೂಲದ ಹವಾಮಾನ ವಿಜ್ಞಾನಿ

ನನಗೆ ಪರಿ ಪರಿಚಯವಾಗಿದ್ದು‌ ವೆಬ್ಸೈಟ್‌ ಬಿಡುಗಡೆ ಸಂದರ್ಭದಲ್ಲಿ ಮಾಡಿದ ಭಾಷಣದ ಮೂಲಕ. "ಉಪಖಂಡದೊಳಗಿನ ಖಂಡವಾಗಿರುವ" ಭಾರತದ ಗ್ರಾಮೀಣ ಪ್ರದೇಶವನ್ನು ದಾಖಲಿಸುವ ಪರಿಯ ಪ್ರಯತ್ನ ಅತ್ಯಂತ ಸ್ಫೂರ್ತಿದಾಯಕ ಮತ್ತು ವಿಶಿಷ್ಟ. ನಿಂರಂತರ ವಿಸ್ತಾರವನ್ನು ಕಾಣುತ್ತಿರುವ ಪರಿ ಲೈಬ್ರರಿಗೆ ಸ್ವಯಸೇವಕನಾಗಿ ಕೆಲಸ ಮಾಡಲು ಸಾಧ್ಯವಾಗಿದ್ದು ನನಗೆ ಖುಷಿ ಕೊಡುವ ಸಂಗತಿ.

ಪರಿ ಲೈಬ್ರರಿ ಸುಲಭವಾಗಿ ಅರ್ಥವಾಗುವ 'ಫೋಕಸ್ ಮತ್ತು ಫ್ಯಾಕ್ಟೋಯ್ಡ್ಸ್' (focus and factoids) ಮೂಲಕ ಆಯ್ದ ವರದಿಗಳನ್ನು ಪ್ರಸ್ತುತಪಡಿಸುತ್ತಿರುವುದು ಅಭಿನಂದನೀಯ. ಈ ಲೈಬ್ರರಿಯ ವಿಸ್ತೃತ ವ್ಯಾಪ್ತಿ ಪರಿ ವರದಿಗಾರಿಕೆಗೆ ಪೂರಕವಾಗಿ ಎನ್ನುವುದು ನನ್ನ ಅಭಿಪ್ರಾಯ. ನನ್ನ ಪರಿಣತಿಯ ಕ್ಷೇತ್ರಕ್ಕೆ ಸಂಬಂಧಿಸಿದ ಹಾಗೂ ಕೆಲವೊಮ್ಮೆ ನನ್ನ ವ್ಯಾಪ್ತಿಯಾಚೆಗಿನ ವರದಿಗಳೊಂದಿಗೆ ಕೆಲಸ ಮಾಡುವುದು ನನಗೆ ಸಂತಸ ಕೊಟ್ಟಿದೆ. ಪರಿ ಲೈಬ್ರರಿಗಾಗಿ ನಡೆಸಿದ ಸಂಶೋಧನೆ ನನ್ನ ಪಾಲಿಗೆ ಒಂದು ಹೊಸ ಕಲಿಕೆಯ ಅನುಭವವಾಗಿತ್ತು.

2026ರಲ್ಲಿ ಅಂಗವಿಕಲರು ಮತ್ತು ಹಿರಿಯ ನಾಗರಿಕರಿಗೆ ಸಂಬಂಧಿಸಿದ ವರದಿಗಳ ಸಂಗ್ರಹವನ್ನು ಅವುಗಳ ಸಾರಾಂಶ ಹಾಗೂ ಪ್ರಮುಖ ಅಂಶಗಳೊಂದಿಗೆ ಲೈಬ್ರರಿಗೆ ಸೇರಿಸುವ ಮೂಲಕ ನಮ್ಮ ಸಂಪನ್ಮೂಲವನ್ನು ಇನ್ನಷ್ಟು ಗಟ್ಟಿಗೊಳಿಸುವ ಆಶಯದಲ್ಲಿ ನಾವಿದ್ದೇವೆ.

ಈ ಸಂದರ್ಭದಲ್ಲಿ ಪರಿ ಲೈಬ್ರರಿ 12ನೇ ವರ್ಷಕ್ಕೆ ಕಾಲಿಡುತ್ತಿದೆ. ಇಂತಹ ಸಂದರ್ಭದಲ್ಲಿ ಗ್ರಾಮೀಣ ಭಾರತಕ್ಕೆ ಸಂಬಂಧಿಸಿದ ಎಲ್ಲಾ ಆಯಾಮಗಳನ್ನು ಮತ್ತು ವೈವಿಧ್ಯತೆಯನ್ನು ಅರ್ಥಮಾಡಿಕೊಳ್ಳಲು ಸಹಕಾರಿಯಾಗುವಂತೆ ಇನ್ನಷ್ಟು ವರದಿ ಹಾಗೂ ದಾಖಲೆಗಳನ್ನು ನಾವು ನಿಮ್ಮ ಮುಂದೆ ತರಲಿದ್ದೇವೆ. ನಮ್ಮ ಹಳೆಯ ಮತ್ತು ಹೊಸ ಸ್ವಯಂಸೇವಕರೊಂದಿಗೆ ಕೈಜೋಡಿಸಿ ನಮ್ಮ ಈ ಜ್ಞಾನದ ಭಂಡಾರವನ್ನು ಮತ್ತಷ್ಟು ಬಲಪಡಿಸುವ ನಿಟ್ಟಿನಲ್ಲಿ ನಾವು ಉತ್ಸುಕರಾಗಿದ್ದೇವೆ!

ನಮ್ಮ ಕೆಲಸಗಳು ನಿಮಗೆ ಆಸಕ್ತಿದಾಯ ಎನ್ನಿಸಿದ್ದು ಹಾಗೂ ನೀವು ಪರಿ ಮತ್ತು ಪರಿ ಲೈಬ್ರರಿಗೆ ಸ್ವಯಂ ಸೇವಕರಾಗಿ ಕೊಡುಗೆ ನೀಡಲು ಬಯಸಿದಲ್ಲಿ ದಯವಿಟ್ಟು ಇಲ್ಲಿ ನೀಡಿರುವ ಅರ್ಜಿಯನ್ನು ತುಂಬಿಸಿ. ನಮ್ಮ ತಂಡದೊಂದಿಗೆ ಕೆಲಸ ಮಾಡಲು ನಾವು ಫ್ರೀಲ್ಯಾನ್ಸ್ ಮತ್ತು ಸ್ವತಂತ್ರ ಬರಹಗಾರರು, ವರದಿಗಾರರು, ಛಾಯಾಗ್ರಾಹಕರು, ಚಲನಚಿತ್ರ ತಯಾರಕರು, ಅನುವಾದಕರು, ಸಂಪಾದಕರು, ಚಿತ್ರಕಲಾವಿದರು ಮತ್ತು ಸಂಶೋಧಕರನ್ನು ಪ್ರೀತಿಯಿಂದ ಸ್ವಾಗತಿಸುತ್ತೇವೆ.

ಕವರ್‌ ಡಿಸೈನ್:‌ ಸ್ವದೇಶಾ ಶರ್ಮಾ

ಅನುವಾದ: ಶಂಕರ. ಎನ್. ಕೆಂಚನೂರು