दयानिता सिंह ह 2022 मं पारी के संग मिलके दयानिता सिंह- पारी डॉक्यूमेंट्री फ़ोटोग्राफ़ी अवार्ड के स्थापना करिस. ये पुरस्कार पीपुल्स आर्काइव ऑफ़ रूरल इंडिया के एम. पलानी कुमार ला दे गेय रहिस.
ये बछर के 2 लाख रूपिया के दयानिता सिंह- पारी डॉक्यूमेंट्री फोटोग्राफी पुरस्कार वो मन के चुने एक झिन दीगर उभरत प्रतिभाशाली फोटोग्राफर, पीपुल्स आर्काइव ऑफ रूरल इंडिया के आयना ला देय गे हवय.
आयना अपन मन ले फोटोग्राफी मं आइस- अपन सुरता मं तउन असलियत मन ला बचा के रखे के तरीका के रूप मं जेन ला नइ त वो ह बिसोर देवत रहिस. वो ह सीखिस के जेन चीज ह भीतर तक ले लचीला बनाय के अऊजार जइसने लागथे वो ह कतको लोगन मन के अनकही कहिनी मन ला बताय बर, काम मं अवेइय्या राजनीतिक अऊजार घला हो सकथे. ये गम वोला तब होईस जब वो ह सेबेस्टिन सेलगारो, विवियन मैयर, शंकर सरकार, पलानी कुमार अऊ दीगर लोगन मन के काम ला देखिस. कोविड-19 महामारी के चरम बखत मं पारी के संग काम करके वो जागरूकता ला अऊ घलो मजबूत करिस.
ओकर कैमरा ह कोविड-19 महामारी बखत फुटपाथ मं इलाज बगेर कामठीपुरा के सेक्स वर्कर्स (देह के धंधा करेइय्या माइलोगन मन) के अऊ गाँव ले कमाय खाय बर आय लोगन मन के भारी भाव ला भरे फोटो खींचे हवय. आयना के कुल 23 फोटो कहिनी मन हमन ला महानगर के कोनहा मं परे लोगन मन के एक अचमित मेल दिखाथे - मुंबई लोकल मं एक झिन राजस्थानी प्रवासी संगीतकार, शहर के टैक्सी ड्राइवर, गेटवे ऑफ़ इंडिया के फ़ोटोग्राफ़र, गधी के दूध बेचेइय्या, मुंबई के सड़क मन मं नाचत अऊ अपन ला कोड़ा मार्ट एक झिन कर्नाटक के प्रवासी. जेन संवेदनशीलता अऊ सहानुभूति के संग वो ह ये कहिनी मन मं सहर ला गाँव देहात ला दिखाथे, ओकर बराबरी बनेच कम लोगन मन कर सकथें.
