سمندر کے ساحل سے غائب ہوتی سیپیاں

سورج طلوع ہونے سے پہلے ہی کٹوپَلّی کے ساحل پر زندگی کی چہل پہل شروع ہو جاتی ہے۔ گھٹنوں تک سمندر کے پانی میں کھڑے ایرولر برادری کے لوگ خلیجِ بنگال کی لہروں کے پیچھے ہٹنے کا انتظار کرتے ہیں۔ وہ خاص طور پر تیار کیے گئے جالوں کی مدد سے مدّوجزر کے دوران ساحل پر بہہ کر آنے والی کلِنجل (سمندری سیپیاں) تیزی سے جمع کرتے ہیں۔

’’مد (ہائی ٹائڈ) کے دوران ہم سیپیاں جمع نہیں کر سکتے، اس لیے ہم اس وقت تک انتظار کرتے ہیں جب تک پانی اترنا شروع نہ ہو جائے۔ اس دوران یا تو ہم کھانا کھانے گھر چلے جاتے ہیں یا پھر یہیں ساحل پر انتظار کرتے رہتے ہیں،‘‘ رمیش (جو صرف اسی نام سے اپنی شناخت ظاہر کرتے ہیں) کہتے ہیں۔ رمیش جیسے ایرولر برادری کے لوگوں کے لیے سیپیاں جمع کرنا محض ایک پیشہ نہیں، بلکہ ایک روایتی ذریعۂ معاش ہے، جو تمل ناڈو کے ترووَلّور ضلع میں سمندر کی مدّوجزر کے قدرتی نظام سے گہرا تعلق رکھتا ہے۔

جمع کی گئی سیپیوں کو پہلے دھوپ میں خشک کیا جاتا ہے، پھر بیل گاڑیوں کے ذریعے ان مقامات تک پہنچایا جاتا ہے جہاں انہیں پیس کر چونے کے پتھر میں تبدیل کیا جاتا ہے۔ ایک بیل گاڑی سیپیاں پہنچانے پر مزدوروں کو تقریباً ۵۰۰ روپے اجرت ملتی ہے، اور ایک آدمی ہفتہ میں اوسطاً سات چکر تک لگا لیتا ہے۔ بعد ازاں ان سیپیوں سے چونا اور سُنّامبو (پیسی ہوئی سیپیاں، جنہیں تعمیراتی کاموں میں استعمال کیا جاتا ہے) تیار کیا جاتا ہے۔

جب میں نے پہلی بار ساحل پر کلِنجل سیپیوں کے ڈھیر دیکھے تو مجھے بالکل اندازہ نہیں تھا کہ ان کا تعلق لوگوں کے ذریعۂ معاش سے بھی ہے۔ کلِنجل جمع کرنے والے مزدور سب کی نظروں کے سامنے کام کر رہے تھے، مگر ان کی محنت بڑی حد تک نظروں سے اوجھل ہی رہی۔

سمندری سیپیوں کو جمع کرنا پلیکٹ (پڑویرکاڈو) اور کٹوپَلّی کے ساحلی علاقوں میں آباد ایرولر برادری کے خاندانوں کی کئی نسلوں کے لیے روزگار کا ذریعہ رہا ہے۔ ایک ٹب سیپیاں جمع کرنے پر ایک مزدور کو ۲۵ روپے ملتے ہیں۔

ماضی میں اس ساحلی پٹی پر بے شمار دلدلی علاقے، مینگرووز کے جنگلات، ریت کے ٹیلے، اور ماہی گیری کے مقامات موجود تھے۔ مگر اب ان کی جگہ آہستہ آہستہ صنعتی راہداریاں قائم ہو رہی ہیں۔ اینّور–کٹوپَلّی خطہ میں بندرگاہوں کی توسیع، خصوصاً اڈانی کے زیرِ انتظام کٹوپَلّی بندرگاہ، کے علاوہ تھرمل پاور پلانٹس، پیٹروکیمیکل صنعتوں اور بڑے بنیادی ڈھانچے کے منصوبوں میں تیزی سے اضافہ ہوا ہے۔ اسی دوران چنئی اور اس کے گرد و نواح میں سمندری طوفانوں، مدّوجزر سے آنے والے سیلاب اور شدید موسمی واقعات کی تعداد بھی بڑھ رہی ہے، جیسا کہ اس رپورٹ میں بتایا گیا ہے۔

ان تبدیلیوں کے نتیجہ میں ساحلوں پر کٹاؤ میں اضافہ ہوا ہے اور سمندری سیپیوں کے ذخائر بھی کم ہو گئے ہیں۔ پہلے کلِنجل جمع کرنے کے لیے پورا سال موزوں ہوتا تھا، لیکن اب یہ کام صرف چند مہینوں تک محدود ہو کر رہ گیا ہے۔ خاص طور پر برسات کے موسم میں، نومبر سے جنوری کے وسط تک، جب مدّوجزر کی طاقتور لہریں سیپیوں کو ساحل تک لے آتی ہیں، تب ہی نسبتاً زیادہ مقدار میں سیپیاں دستیاب ہوتی ہیں۔

’’بعض اوقات اگر ہمیں کافی مقدار میں سیپیاں نہیں ملتیں تو ہمیں خالی ہاتھ گھر واپس لوٹنا پڑتا ہے،‘‘ رمیش پاری کو بتاتے ہیں۔ بزرگ مزدور یاد کرتے ہیں کہ تقریباً ایک دہائی پہلے وہ روزانہ ۳۰۰ روپے تک کما لیتے تھے، مگر آج انہیں پورے ہفتہ میں ۱۰۰۰ روپے بھی مشکل سے نصیب ہوتے ہیں۔

’’جب میں جوان تھا تو سمندر آج جیسا نہیں تھا۔ اُس وقت پانی ساحل سے تقریباً ایک کلومیٹر دور ہوتا تھا،‘‘ معمر مزدور دھنم (بدلا ہوا نام) بتاتے ہیں۔

یومیہ اجرت پر کام کے مواقع محدود ہونے کے باعث کلِنجل جمع کرنا آج بھی بہت سے لوگوں، خصوصاً بزرگ افراد، کے لیے روزگار کا بنیادی ذریعہ ہے۔

کٹوپَلّی کے رہائشی سریش کہتے ہیں، ’’کئی برسوں تک ہمارے علاقہ میں سیپیاں جمع کرنا ایک عام پیشہ تھا۔ ہم انہیں [ایرولر خاندانوں سے] خریدتے تھے اور تقریباً ہر ماہ فروخت کرتے تھے۔ میرے بیٹے کی چنئی میں ڈاکٹر بننے کی تعلیم بھی اسی کام کی بدولت ممکن ہو سکی۔‘‘ مگر وہ مزید کہتے ہیں کہ سیپیوں کی خرید و فروخت سے وابستہ ان کی کئی دہائیوں پر محیط روزی اب ان کی ضروریات پوری کرنے کے لیے کافی نہیں رہی، اس لیے انہیں دوسرے کام بھی کرنے پڑتے ہیں۔

صرف سمندری سیپیوں کے ذخائر ہی نہیں، بلکہ شمالی چنئی کے ماہی گیر، جن میں اکثریت دلت برادری سے تعلق رکھتی ہے، یہ بھی کہتے ہیں کہ صنعتی فضلے کے سمندر میں شامل ہونے کے باعث مچھلیوں کی پیداوار میں بھی نمایاں کمی آئی ہے۔ پڑھیں: پڑویرکاڈو کے پانی میں مچھلی کا شکار

رمیش کٹوپَلّی میں واقع ایرولر بستی میں رہتے ہیں، جہاں ان کے ساتھ مزید ۱۰ سے ۱۵ خاندان آباد ہیں۔ یہ خاندان حکومت کی جانب سے مختص کی گئی اس بستی میں منتقل تو ہو گئے ہیں، لیکن یہاں بجلی، پینے کے صاف پانی، سڑکوں اور طبی نگہداشت جیسی بنیادی سہولتیں موجود نہیں ہیں۔ زیادہ تر گھر ترپال کی چادروں سے بنائے گئے ہیں اور ان کی زمین کچی مٹی کی ہے۔

’’ہم ریت پر سوتے ہیں۔ رات کے وقت سانپ اور دوسرے زہریلے کیڑے مکوڑے ہمیں کاٹ سکتے ہیں۔ ہم یہاں کسی بھی قسم کی سہولت یا مدد کے بغیر زندگی گزار رہے ہیں،‘‘ رمیش پاری کو بتاتے ہیں۔ اس بستی کے لوگوں کے لیے قدرتی چشمہ پینے کے پانی، کھانا پکانے اور نہانے کا بنیادی ذریعہ ہے۔ یہی پانی جانور بھی استعمال کرتے ہیں، جب کہ برسات کے موسم میں بارش کا بہاؤ اس چشمے کے پانی میں شامل ہو کر اسے آلودہ کر دیتا ہے۔

یہ بستی مرکزی سڑک سے تقریباً ۵۰۰ میٹر دور واقع ہے اور وہاں تک پہنچنے کا واحد راستہ ریتیلے پگڈنڈی نما راستے ہیں، جہاں سے موٹر سائیکل کا گزرنا بھی مشکل ہو جاتا ہے۔

ان کی بے دخلی کوئی غیر معمولی واقعہ نہیں ہے۔ اس علاقہ میں ماہی گیروں اور سمندر پر انحصار کرنے والی دیگر برادریوں کی اکثریت کو بھی ساحل سے دور اندرونِ زمین منتقل کر دیا گیا ہے۔ ان نئی آبادیوں میں سے بہت سی جگہوں پر عوامی نقل و حمل کی سہولت موجود نہیں، جس کی وجہ سے مزدوروں کو روزانہ طویل فاصلے پیدل طے کرنے پڑتے ہیں۔ بعض اوقات کام کی خاطر ساحل تک پہنچنے کے لیے لوگوں کو ہر صبح تقریباً تین میل پیدل چلنا پڑتا ہے۔

رمیش نے مجھے اپنے گھٹنے پر لگا ایک گہرا، کھلا زخم دکھایا، جو انہیں کام کے دوران آیا تھا۔ کھلے زخم کے ساتھ گھنٹوں تک سمندر کے کھارے (نمکین) پانی میں کھڑے رہ کر کام کرنا انتہائی تکلیف دہ ہوتا ہے۔ وہ کہتے ہیں، ’’درد ناقابلِ برداشت ہو جاتا ہے، مگر یہاں اس زخم کے علاج کے لیے مناسب طبی سہولتیں موجود نہیں ہیں۔‘‘ اسی لیے انہیں کبھی کبھار آنے والے ڈاکٹروں پر انحصار کرنا پڑتا ہے، اور علاج کے لیے صرف ہونے والا وقت ان کی مزدوری کے اوقات میں بھی کمی کر دیتا ہے۔

ساٹھ برس سے زائد عمر کی راجمّل (بدلا ہوا نام) جتنا ممکن ہو سکے، کچھ کمانے کی امید میں روز سمندر کا رخ کرتی ہیں۔ وہ کہتی ہیں، ’’میرے شوہر بیمار ہیں اور ان کی عمر بھی ساٹھ سال سے زیادہ ہے۔ میں نہ تو ان کی دواؤں کا خرچ اٹھا سکتی ہوں اور نہ ہی گھر کے اخراجات پورے کر سکتی ہوں۔ اسی لیے جب بھی موقع ملتا ہے، میں سیپیاں جمع کرنے آ جاتی ہوں۔ اس کام سے مجھے تقریباً ۲۵ روپے مل جاتے ہیں۔‘‘ عمر اور بیماری کے باعث ان کے ہاتھ مسلسل کانپتے رہتے ہیں۔

کٹوپَلّی کی ایرولر برادری کے لیے زندگی کا انحصار ایک ایسے ساحل پر ہے جو دن بہ دن زیادہ غیر محفوظ اور ناپائیدار ہوتا جا رہا ہے۔ وہ سمندر، جو کبھی ان کے خاندانوں کی روزی روٹی کا ضامن تھا، اب ناقابلِ واپسی انداز میں بدل رہا ہے۔ اس کے باوجود ساحلی کٹاؤ، غیر یقینی حالات اور نظرانداز کیے جانے کے احساس کے درمیان بھی یہ خاندان ہر روز طلوعِ آفتاب سے پہلے سمندر کی لہروں میں اترتے ہیں اور اپنے اس روایتی ذریعۂ معاش سے وابستہ رہنے کی کوشش کرتے ہیں، جو پہلے بھی ان کی کئی نسلوں کا سہارا بنا تھا۔

یہ اسٹوری پاری فیلوشپ ۲۰۲۵ کے تحت شائع کی گئی ہے۔