پڑویرکاڈو کے پانی میں مچھلی کا شکار

یہ نومبر کی نئے چاند کی رات ہے اور ۹ بجے کا وقت ہے۔ تمل ناڈو کے ساحل کے قریب پڑویرکاڈو (جسے پُلیکٹ بھی کہا جاتا ہے) میں ندی کے دہانے (اسچوئری) پر خاموشی چھائی ہوئی ہے۔ نیلے رنگ کی ایک کشتی پانی پر موجود ہے، جو لہروں کے ساتھ کھلے سمندر کی طرف آگے بڑھ رہی ہے۔

سرت کمار، ارون کمار اور سیوت کمار کشتی پر پاؤں پھیلائے کھڑے ہیں۔ ان کے پیروں کے پاس لکڑی کے سات کمبھے اور نائیلان کے جالوں کے گولے پڑے ہوئے ہیں۔ ان تینوں کا تعلق ساحل پر واقع گاؤں تونیریوو سے ہے، اور یہ بچپن سے ہی مچھلیاں پکڑ رہے ہیں۔

اگرچہ میری پرورش سمندری ساحل سے بہت دور نہیں ہوئی تھی، اور میں اکثر سمندر میں اترنے کے خواب دیکھا کرتی تھی، لیکن میری والدہ (جو تنہا ماں تھیں) میری اور میری بہن کی حفاظت کے لیے بہت زیادہ فکرمند رہتی تھیں۔ لہٰذا سمندر میں اترنے کی سخت ممانعت تھی۔

پڑویرکاڈو کا میرا پہلا دورہ اس وقت ہوا جب میں ۱۶ سال کی تھی۔ میں نے چنئی کلائمیٹ ایکشن گروپ کے زیر اہتمام منعقدہ فوٹو گرافی کی ورکشاپ میں شرکت کی تھی، جہاں فوٹو جرنلسٹ پلنی کمار نے میری رہنمائی کی تھی۔ میں سمندری ساحل کو اپنا گھر کہنے والے لوگوں کی زندگیوں کو جاننا چاہتی تھی۔

پانی میں اترنے کے لیے مجھے خود کو حوصلہ دلانے میں مزید کچھ سال لگ گئے۔

میری یہ دیرینہ خواہش بالآخر اس وقت پوری ہوئی، جب پڑویرکاڈو کے تغیر پذیر منظرنامہ اور آبی وسائل کے ساتھ ماہی گیروں کے بدلتے ہوئے رشتے کے بارے میں جانکاری حاصل کرنے کے لیے میں نیلی کشتی پر سوار ہو کر ماہی گیری کے سفر پر نکلی تھی۔

’’ندی، ساحل پر زور صرف کرتی ہے، اور جزر کے دوران، مچھلیاں، جھینگے اور دیگر جاندار لہروں کے ساتھ حرکت کرتے ہیں،‘‘ جب ۳۰ سالہ سرت مجھے سمجھاتے ہوئے کہتے ہیں تو میں غور سے سنتی ہوں۔

ایک گھنٹہ بعد، رات ۱۰بجے، وہ جال پھیلانے کے لیے پہلا کھمبا پانی میں گاڑتے ہیں۔ ’’کھمبا گاڑنے کا مطلب ہے اپنی سانسیں روکنا اور پانی کے بہاؤ کے خلاف خود کو مضبوطی سے سنبھالنا،‘‘ سرت مزید کہتے ہیں۔ ارون اور سیوت، جن کی عمریں چالیس کی دہائی میں ہیں، باقی ماندہ کھمبوں کو گاڑتے ہیں اور اس بات کو یقینی بناتے ہیں کہ پوری رات کے لیے جال پھیل جائیں۔ ہر جال کی پیمائش تقریباً ۳۲ میٹر ہوتی ہے۔ ایک کشتی تین یا چار جال لگاتی ہے اور انہیں تقریباً چھ گھنٹے تک پانی میں چھوڑ دیا جاتا ہے۔

پڑویرکاڈو چنئی کے شمال میں تقریباً ۶۰ کلومیٹر کے فاصلہ پر، ضلع تیرو ولور میں، پلیکٹ جھیل کے جنوبی کنارے پر واقع ہے۔ یہ جھیل ہندوستان کے سب سے بڑے کھارے پانی کے جھیلوں میں سے ایک ہے اور اس کا ماحولیاتی نظام تقریباً ۷۲۰ مربع کلومیٹر میں پھیلا ہوا ہے۔

اس علاقہ میں ماہی گیروں کی تقریباً ۴۰ بستیاں ہیں، جو اپنی روزی روٹی کے لیے ان آبی وسائل پر انحصار کرتی ہیں۔ تونیریوو سے تعلق رکھنے والے اس طرح کے بہت سے کنبے، شمالی چنئی سے متصل بندرگاہوں اور صنعتی راہداریوں کے وجود میں آنے سے بہت پہلے سے اپنی تاریخ کا سراغ لگاتے ہیں۔ زیادہ تر کنبوں کا تعلق دلت برادریوں سے ہے۔

آج کی رات، گاؤں کے ۱۰ دوسرے ماہی گیر چار کشتیوں میں سوار ہوکر ایک اچھی مقدار میں مچھلیاں پکڑنے کی امید میں نکلے ہیں۔

ندی کے دہانے پر مچھلی کے شکار کو لے کر کسی زمانے میں مختلف گاؤوں کے درمیان تنازع کھڑا ہوجاتا تھا۔ جمات – یعنی مقامی برادری کا اجتماع – پاڈو نظام کی پیروی کرتی ہے۔ یہ مخصوص علاقوں میں باری باری سے ماہی گیری کے حقوق کا ایک روایتی طریقہ ہے۔ اس نظام کے تحت راتوں کو تین گاؤوں کے درمیان تقسیم کیا جاتا ہے: تونیریوو، لائٹ ہاؤس اور سینباپلّی۔ ہر گاؤں میں تقریباً ۴۰ ماہی گیروں کی ایک ٹیم ہوتی ہے۔

’’ہم تقریباً چھ گھنٹے تک جال کو پانی میں رکھتے ہیں،‘‘ سرت کہتے ہیں۔ ’’کسی دن ہم صرف ایک کلو جھینگوں کے ساتھ واپس لوٹتے ہیں، اور کسی دن پورے ایک ٹن کے ساتھ۔ جب تک ہم واپس نہیں آتے، ہم میں سے کوئی نہیں جانتا کہ کتنا شکار ملے گا۔‘‘

اگلی صبح، رات میں پکڑےگئے جھینگوں کو اکٹھا کرکے ساحل پر لایا جاتا ہے اور ’ایدے پراگر‘ کے پاس لے جایا جاتا ہے، جو ایک درمیانی شخص (بچولیا) ہوتا ہے جو ماہی گیروں اور اس علاقہ میں مچھلی بیچنے والی خاتون دکانداروں کے بیچ کڑی کا کام کرتا ہے۔

جھینگوں کے ساتھ مچھلیاں اور کیکڑے بھی پکڑے جاتے ہیں۔ لیکن اب پکڑے جانے والے شکار میں زیادہ تر تعداد جھینگوں ہی کی ہوتی ہے۔ جو رات اچھی جاتی ہے، اس رات ایک ماہی گیر تقریباً ۱۰۰۰ روپے کما کر گھر لے جا سکتا ہے۔ بارش کے دن زیادہ منافع بخش ثابت ہوتے ہیں، لیکن وہ اتنے ہی خطرناک بھی ہوتے ہیں۔ سیوت کہتے ہیں، ’’شدید بارش کے دوران جب ہم ندی کے دہانے میں داخل ہوتے ہیں تو اپنی جان خطرے میں ڈالتے ہیں۔ بعض اوقات ہم تیز لہروں یا سمندری طوفانوں میں اپنے جال بھی کھو دیتے ہیں۔‘‘

اگر کوئی جال سمندر میں بہہ جائے، تو انہیں ہر ایک جال پر ۷۰۰۰ سے ۸۰۰۰ روپے کا نقصان اٹھانا پڑتا ہے۔

سیوت اپنے ایک دوست کو کھو دینے کا تذکرہ کرتے ہیں جو طوفان کے دوران اچانک بپھرے ہوئے پانی میں گر گئے تھے۔ وہ پاری کو بتاتے ہیں، ’’ہم نے اپنے کامریڈ ویل مروگن کو کھو دیا۔ حکومت نے کوئی مالی امداد یا معاوضہ فراہم نہیں کیا۔ ہم کام کے دوران اپنی جان خطرے میں ڈالتے ہیں، کیونکہ ہم نہیں جانتے کہ آگے کیا ہونے والا ہے۔‘‘

ان کا کام ایک چکر میں چلتا ہے: ایک رات ندی کے دہانے پر اور دو دن کوساس تلیّار ندی میں جال پھینک کر مچھلی کا شکار کرتے ہیں۔ ان دنوں میں، ماہی گیر کٹامران (لکڑی کی روایتی کشتی) پر اکیلے نکلتے ہیں۔ وہ پانی میں ایک کاسٹ نیٹ (چھوٹا، گول اور وزنی جال جو کشتیوں پر استعمال ہونے والے بڑے جالوں سے مختلف ہوتا ہے) پھینکتے ہیں، چند منٹ انتظار کرتے ہیں، اور پھر اسے شکار سمیت واپس کھینچ لیتے ہیں، جس میں جھینگے، مچھلیاں اور کیکڑے شامل ہوتے ہیں۔ گاؤں کے زیادہ تر لوگ اسی طرح کام کرتے ہیں۔

سرت، ایل اینڈ ٹی شپ یارڈ میں بطور ڈرائیور بھی کام کرتے ہیں، جس سے انہیں تقریباً ۲۰ ہزار روپے ماہانہ کی آمدنی ہوتی ہے۔ ’’ہماری بستی کے زیادہ تر لوگ رات کے وقت ماہی گیری کرتے اور دن میں کاسٹ نیٹ کے ساتھ کام کرتے ہیں،‘‘ وہ کہتے ہیں۔ ’’کچھ لوگ اشوک لے لینڈ اور ایل اینڈ ٹی میں بھی ملازم ہیں۔‘‘

پانی میں تقریباً ۱۰ گھنٹے گزارنے کے بعد، کشتی بالآخر واپس لوٹ آتی ہے۔ جیسے ہی ہم باہر قدم رکھتے ہیں، ہمارے پاؤں ساحل کے ٹھنڈے اور نرم پانی میں دھنس جاتے ہیں۔ ساحل کے ساتھ ساتھ، اِیرولَر قبائلی برادری کے لوگوں کو چارے کے ذریعہ مچھلی پکڑتے ہوئے دیکھا جاسکتا ہے۔ یہ ایک ایسا طریقہ ہے جو نسل در نسل منتقل ہوتا آیا ہے۔

’’چارے سے مچھلی پکڑنا ہمارا سب سے قدیم اور روایتی طریقہ تھا،‘‘ سیوت یاد کرتے ہیں۔ ’’لیکن آج چارے کے ساتھ مچھلی پکڑ کر زندگی گزارنا ممکن نہیں ہے۔‘‘

بھونیش تونیریوو سے تعلق رکھنے والے ایک ماہی گیر ہیں۔ وہ ان دنوں کو یاد کرتے ہیں جب شکار زیادہ ہوا کرتا تھا۔ ’’تین دہائیوں پہلے مچھلیاں اور ندی کا پانی صحت مند حالت میں تھے،‘‘ صنعتی فضلہ سے آلودہ ہونے والے کوساس تلیاّر ندی کے آلودگی پھیلانے والے عناصر کا ذکر کرتے ہوئے وہ کہتے ہیں۔

’’ہم مختلف اقسام کی مچھلیاں پکڑتے تھے۔ ہم نمک میں سنی کیلیتھی مچھلی [کیٹ فش/گلو مچھلی] کو چارے کے کانٹے میں پرو دیتے تھے، کیکڑا اسے پکڑتا اور (کانٹے میں) پھنس جاتا تھا۔ اس طرح ہم ندی کے دہانے پر کیکڑے پکڑا کرتے تھے۔‘‘

حالات اب بدل چکے ہیں، اور ماہی گیروں کا کہنا ہے کہ اب وہ عموماً صرف جھینگے ہی پکڑ پاتے ہیں۔ ماہی گیروں کا کہنا ہے کہ شمالی چنئی کے ساحل پر پہلے ہی بڑے بندرگاہ کا بنیادی ڈھانچہ موجود ہے، جس کی وجہ سے وقت گزرنے کے ساتھ سمندری ساحل تک ان کی رسائی محدود ہو گئی ہے۔ گاد جمع ہونے کی وجہ سے کئی حصوں میں لیگون کی گہرائی تقریباً ۸ء۳ میٹر سے کم ہو کر اب صرف ۲ میٹر رہ گئی ہے۔ اڈانی کٹوپلّی پورٹ پروجیکٹ کی توسیع نے اس غیریقینی صورتحال کو مزید گہرا کر دیا ہے۔

’’اگر بندرگاہ کی توسیع کا یہ منصوبہ مکمل ہو گیا، تو ہم ماہی گیری نہیں کرسکیں گے۔ شمالی چنئی میں تین بندرگاہوں کی کیا ضرورت ہے؟ کس کو ان کی ضرورت ہے؟ چونکہ ہمارا یہ کام نسلوں سے چلتا آ رہا ہے، اس لیے اس کے بغیر ہمارا گزارہ ناممکن ہے،‘‘ سرت کہتے ہیں۔

یہ اسٹوری پاری فیلوشپ ۲۰۲۵ کے تحت شائع کی گئی ہے۔