सीपियन से सून पड़त किनारा, मुस्किल होत गुजारा

काट्टुपल्ली के किनारन पर सूरज उगे से पहिले ही समुद्र तट के माहौल रौनक से भरपूर रहेला. इरुलर समुदाय के लोग लहरन में घुटना तक ले खड़ा होला आ बंगाल के खाड़ी में ज्वार उतरे के इंतजार करेला. खास तरीका से बनावल गईल जाल के उपयोग से उ लोग तेजी से किलिंजल (समुद्री सीपी/शंख) एकट्ठा करेला जवन ज्वार के समय किनारा पर धंस जाला.

“ज्वार के समय हमनी के सीपी एकट्ठा ना कर सकेनी जा, एसे हमनी के भाटा शुरू होखे के इंतजार करेनी जा. ए बीच या त हमनी के खाए-पीये घरे चल जायेनी जा या त एइजे समुद्र तट पर रहेनी जा,” रमेश (उ खाली इहे नाम के उपयोग करेलन) कहेलन. इरुलर समुदाय के उनकी जईसन लोगन खातिर सीपी एकट्ठा कईल खाली एगो पेशा ना हवे, बल्कि तमिलनाडु के तिरुवल्लुर जिला के समुद्र से जुड़ल एगो पारम्परिक आजीविका हवे.

एकट्ठा कईल गईल सीपियन के सुखावल जाला आ बैलगाड़ियन से ले जाके ओके पीस के चूना बनावल जाला. कामगारन के एगो गाड़ी के लोड खातिर लगभग 500 रूपया मिलेला. औसतन एक आदमी हफ्ता में सात गो ले ट्रिप कर सकेला. शंख के चूना अ सुन्नाम्बू, निर्माण में उपयोग होखे वाला पीसल समुद्री शंख, में प्रोसेस कईल जाला.

पहली बेर तट पर जुटावल गईल किलिंजल के ढेर देखनी त तनिको अंदाजा ना रहे कि ई एह से कइक लोग के रोजी-रोटी चलत बा. सीपी बटोरे वाला लोग सबकी आंखीं के सोझा काम करत रहें, बाकिर उनकर मेहनत दुनिया से लगभग ओझले बनल रहेला.

पुलीकट आ काट्टुपल्ली तट के किनारे रहे वाला इरुलर समुदाय के परिवारन के कई पीढ़ियन के आजीविका ए समुद्री सीपन के बटोरे पर टिकल रहल बा. एगो मजदूर के सीपन से भरल एगो टब एकट्ठा कईला के बदला में 25 रूपया मिलेला.

ए समुद्री तट पर कब्बो बड़ संख्या में आर्द्रभूमि (वेटलैंड), मैंग्रोव वन, रेत के टीला आ मछरी पकड़े के समृद्ध क्षेत्र भईल करे. बाकिर धीरे-धीरे ओकरी जगह औद्योगिक गलियारा लेत जा रहल बा. एन्नोर-काट्टुपल्ली क्षेत्र में बंदरगाहन के विस्तार भईल बा. एमे अदानी समूह के काट्टुपल्ली बंदरगाह भी शामिल बा. एकरी अलावा एइजा ताप विद्युत् संयत्र, पेट्रो-रासायनिक उद्योग आ बड़ बुनियादी ढांचन के परियोजना भी तेजी से बढ़ल बा. एकरी संघे चेन्नई में चक्रवात, ज्वारीय बाढ़ आ अन्य मौसमी घटनन के आवृत्ति भी बढ़ रहल बा, ई रिपोर्ट बतावेला.

ए परिवर्तनन के वजह से समुद्र तटन के कटाव बढ़ल बा आ सीपियन के जमाव में भारी कमी आईल बा. पहिले पूरा साल किलिंजल (समुद्री सीपी) एकट्ठा करे के मौसम रहल करे. बाकिर अब ई खाली साल के कुछ महीनन ले सीमित रहि गईल बा. बरखा के मौसम के दौरान, नवम्बर से जनवरी के मध्य ले, जब ज्वार समुद्र के सीपियन के बहा के तट पर ले आवेला, तब्बे ओकर संग्रह अपेक्षाकृत अधिक हो पावेला.

“कब्बो-कब्बो पर्याप्त सीपी ना मिल पावेला त हमनी के खालिए हाथ घरे लौटे के पड़ेला,” रमेश पारी के बतावेलन. बुजुर्ग श्रमिक रमेश याद करेलन कि एक दशक पहिले ले उ एक दिन में 300 रूपया ले जमा कर लेवें. आज हालत अइसन बा कि पूरा हफ्ता में 1000 रूपया कमाइल भी मुश्किल बा.

“जब हम जवान रहनी, तब के समुद्र आज निहर ना रहे,” बुजुर्ग श्रमिक धनम (बदलल नाम) कहेलन. “ओ समय समुद्र के पानी तटरेखा से लगभग एक किलोमीटर दूर होखल करे.”

दिहाड़ी मजदूरी के अवसर सीमित होखे के वजह से किलिंजल बटोरल आज भी अनेक लोगन के आजीविका के मुख्य आधार बनल बा, खासकर बुजुर्ग लोगन खातिर.

“कई बरिस ले हमनी के इलाका में सीपी एकट्ठा कईल बहुत आम बात रहे. हमनी के ओके इरुलर परिवारन से एकट्ठा करीं जा आ लगभग हर महीना बेचीं जा,” काट्टुपल्ली के निवासी सुरेश कहेलन. “हमार बेटा चेन्नई में डॉक्टर बने के पढ़ाई कर रहल बा. ई कुल हम खाली एही काम के वजह से कर पवनी.” बाकिर सीपियन के कीने बेचे के ई दशकन पुरान कारोबार उनकी गुजारा खातिर पर्याप्त नईखे रहि गईल. एकरी वजह से आजीविका चलावे खातिर उनके दूसर काम भी करे के पड़ेला.

खाली समुद्री सीपियन ले ही ना, बल्कि उत्तर चेन्नई के मछुआरा लोगन, जेमे अधिकांश लोग दलित बा, के कहनाम बा कि औद्योगिक कचरा के समुद्र में बहावे जाए के वजह से मछरियन के उपलब्धता भी तेजी से घट गईल बा. पढ़ीं: पानी के बदलत चाल, जीउका बेहाल

रमेश काट्टुपल्ली के इरुलर बस्ती में रहेलन. उनकरी संघे 10-15 परिवार भी सरकारी आवंटित पुनर्वास स्थल पर आ के बस गईल बा जबकि एइजा बिजली, पिए के पानी, सड़क आ स्वास्थ्य सेवा जइसन बुनियादी सुविधा तक ले उपलब्ध नईखे. अधिकांश घर तिरपाल के चादर से बनल बा आ ओकर फर्श कच्चा माटी के बा.

“हमनी के रेत पर सुत्तेनी जा. राती के सांप आ दूसर कीड़ा मकोड़ा काट सकेला. बिना कवनो सहारा के हमनी के एइजे रह रहल बानी जा,” रमेश पारी से कहेलन. पेयजल, खाना बनावे आ नहाये खातिर समुदाय के लोगन के मुख्य सहारा एगो प्राकृतिक जलस्रोत (झरना) बा. एही जलस्रोत के उपयोग जानवर भी करेलें सन. बरसात के मौसम में आसपास से बह के आवे वाला गन्दा पानी एमे मिल जाए से ई जलस्रोत दूषित हो जाला.

मुख्य सड़क से लगभग 500 मीटर दूर स्थित ए बस्ती ले पहुंचे के एकमात्र रास्ता रेतीला पगडण्डीनुमा मार्ग बा, जेपर मोटरसाइकिल चलावल भी मुश्किल हो जाला.

ओ लोगन के विस्थापन कवनो अपवाद नईखे. एइजा समुद्र पर आजीविका खातिर निर्भर रहे वाला अधिकांश मछुआरा आ अन्य समुदायन के तट से दूर, भीतर के ओर बसावल गईल बा. ए पुनर्वास बस्तियन ले सार्वजनिक परिवहन के सुविधा भी कई जगहन ले ना पहुंचेला जेकरी वजह से लोगन के रोज लम्बा दूरी पैदल तय करे के पड़ेला. कुछ मामलन में त काम पर पहुंचे खातिर लोगन के हर सबेरे तट ले पहुंचे खातिर लगभग तीन मील (करीब पांच किलोमीटर) पैदल चले के पड़ेला.

रमेश हमके अपनी घुटना के गहरा खुला घाव देखवलें जवन उनके काम करत के लागल रहे. खुले घाव के संघे घंटन ले खारा समुद्री पानी में खड़ा रहल बहुत पीड़ादायक होखेला. “दर्द असहनीय हो जाला बाकिर एइजा ए घाव के इलाज करावे खातिर पर्याप्त चिकित्सा सुविधा नईखे,” उ बतावेलन. अइसना में ओ लोगन के कभी-कभार डॉक्टरन पर ही निर्भर रहे के पड़ेला आ इलाज खातिर लगे वाला समय में उनकरी दिहाड़ी के घंटा में भी कटौती हो जायेला.

साठ बरिस पार कर चुकल राजम्मल (बदलल नाम) जेतना संभव हो सके, ओतना कमाई खातिर समुद्र तट पर सीपी बटोरे आवेली. “हमार आदमी अब बेमार रहेलें आ उनकर उमिर भी 60 से ढेर हो चुकल बा. हम उनकरी दवाई बीरो के खर्चा आ परिवार के गुजारा नईखी चला पावत. एसे जब भी मौका मिलेला त हम सीपी बटोरे चल आवेनी. एसे हमके करीब 25 रूपया मिल जायेला,” उ कहेली. उमिर आ बेमारी के वजह से उनकर हाथ कांप रहल बा.

काट्टुपल्ली के इरुलर समुदाय खातिर जीवन यापन आज भी ओही तटरेखा पर निर्भर बा जवन दिन-ब-दिन अधिक असुरक्षित होत जा रहल बा. जवन समुद्र कब्बो ओ लोगन के पीढ़ियन के पालन पोषण कईले रहे, उ अब ऐसे बदल रहल बा जेकर भरपाई संभव नईखे बुझात. तब्बो तटीय कटाव, अनिश्चितता आ उपेक्षा के बीच ई परिवार ओही आजीविका से जुड़ल रहे खातिर हर दिन सूर्योदय से पहिले समुद्र के लहरन में उतर जाला जवन पीढ़ियन ले उनकर सहारा रहे.

स्टोरी पारी फेलोशिप 2025 के तहत छापल गइल बा.