किडनी बेचागे, अब नउकरी के फांदा मं हबर गे बिदेस

रोशन सदाशिव कुले करा एक झिन संगवारी के फोन आइस. ओ ह पूछिस के काय वो ह कंप्यूटर ऑपरेटर के काम करे बर लाओस आना चाही. तनखा घलो बढ़िया रहिस – महीना के 90,000 ले 1 लाख रूपिया अऊ कंपनी आय-जाय अऊ रहे के खरचा घलो उठाही.

ओ संगवारी जम्मू-कश्मीर के बासिंदा रहिस अऊ ओ ह घलो बीते बछर रोशन के ग्रुप के संग कंबोडिया मं अपन किडनी बेचे रहिस; ओ ह हाल-फिलहाल मं उहाँ काम करे सुरु करे रहिस.

रोशन ह ग्रेजुएशन के बाद कंप्यूटर प्रोग्रामिंग के कोर्स करे रहिस अऊ वोला ऑफिस मं काम करे के बिचार जियादा बने लगिस. वो ह कहिथे, “ मोर एक झिन संगवारी ह बताय रहिस के ये नउकरी मं देह के मिहनत जियादा नइ लगय, ते पायके मंय येला लेके बिचार करे लगेंय.”

करजा चुकाय बर अपन किडनी बेचे अऊ आपरेसन के बाद के बखत घलो, रोशन ला ब्रह्मपुरी के छै आरोपी सूदखोर मन हलाकान करे छोड़त नइ रहिन.

परिवार के घर चार अलग-अलग बैंक करा गिरवी रहिस, ददा के जिनगी भर के जमा पूंजी ले बिसोय खेत छै साहूकार मन ले एक झिन ह ले ले रहिस, बाकी संपत्ति मन बेच दे गे रहिन, अऊ ओकर बाद घलो करजा के रकम 10 लाख रूपिया ले जियादा रहिस.

ओकर ददा के पेंसन, घरवाली के आंगनवाड़ी के तनखा अऊ भाई के रोजी-मजूरी धन बनिहारी घलो पूरत नइ रहिस. कुछु बखत बर बैंकिंग संगी (बैंकिंग कॉरेस्पोंडेंट) के काम करे के बाद,,जब कोरोना महामारी बखत ओकर नउकरी छूटगे, त ओकर बाद ले रोशन ला कोनो काम-धंधा नइ मिल पावत रहिस.

वो ह ये काम करे बर राजी होगे.

ओकर एक झिन संगवारी (जेकर नांव बताय नइ गे हवय) ह रोशन के भेंट फिदी नांव के एक झिन दलाल ले करवाइस, जेन ह मूल रूप ले जम्मू-कश्मीर के बासिंदा आय अऊ अब लाओस मं बस गे हवय. रोशन ह पारी ला बताइस, मोर संगवारी ह कहिस के फिदी ह मोर आय-जाय अऊ दीगर काम मं मदद करही.

चंद्रपुर के एक झिन संगवारी रहिज जेकर नांव विशाल रहिस; वो ह घलो अपन एक ठन किडनी बेचे रहिस अऊ ओला नउकरी के भारी जरूरत रहिस. रोशन मजाक मं कहिथे,”एक से भले दो.”

त, जून 2025 मं वो मन लाओस जवेइय्या बिमान मं सवार होइन. रद्दा रहिस; कोलकाता ले बैंकॉक, बैंकॉक ले लाओस के रजधानी विएंतियान, अऊ तहां ले बोकेओ राज बर घरेलू बिमान. ये पईंत ओकर परिवार ला पता रहिस के वो ह सिरतोन नउकरी करे बर जावत हवय.

बोकेओ हबरे के बाद, फ़िदी ओकर मनके पासपोर्ट ले लिस; वो ह रोशन के विरोध ला धियान नइ देवत कहिथे के एकर कंपनी ला जरूरत हवय. वो ह ओ मन ला अपने खोली मं बिठाइस अऊ खाय-पिए ला दीस.

दूसर बिहनिया फ़िदी ओ मन ला टैक्सी ले ओकर मन के काम के जगा मं ले गीस – ये सुन्ना पहाड़ी इलाका मं टेढ़गा-मेड़गा रद्दा ले होवत 40 मिनट के रद्दा रहिस. रोशन सुरता करथे, “मंय ओ पहाड़ी मन के बीच मं कतको ऊंच ऊंच इमारत देखेंय: उही ह ठगी के ठीहा (स्कैमिंग कंपाउंड) रहिस. जिहां लाल, हरियर अऊ नीला रंग के इमारत रहिस.

फिदी ओ मन ला एक ठन बिल्डिंग कॉम्प्लेक्स मं ले गीस, जिहां दो-तीन ऊँच टावर रहिस. रोशन के कहना रहिस के जब वो ह मोठ अऊ ऊँच भिथि वाले कंपाउंड के भीतरी बड़े अकन ऑफिस के जगा देखिस, त वो ह अचंभा मं पर गे. सैकड़ों जवान टूरा-टूरी मन, जेकर मन के हाथ मं 10-15 ठनमोबाइल फोन रहिस, कम्प्यूटर के आगू रोबोट जइसने बइठे रहिन अऊ कलेचुप अपन काम मं मगन रहिन.

वो ह कहिथे, “एकदम भयानक, भयानवतथोटे माला (ये ह भयंकर रहिस. मंय डेर्राय लगेंय).”

तब तक, रोशन ला लाओस के बारे मं जियादा जानकारी नइ रहिस – ये ह 76 लाख आबादी वाले देस आय जेन ह म्यांमार, चीन, थाईलैंड, कंबोडिया अऊ वियतनाम ले घिरे हवय. इहाँ ले मेकांग नदी बोहाथे अऊ टे देस ह अपन पहाड़ी इलाका, पहाड़ी जनजाति मन के बस्ती अऊ बौद्ध मठ मन बर जाने जाथे. अब वो ह अपन फोन मं येकर बारे मं खोजे सुरु करिस.

वो ह बताथे के काम के जगा ह उत्तर-पच्छिम लाओस के एक ठन दूर-दराज इलाका मं रहिस, जिहां बदनाम गोल्डन ट्राएंगल इलाका – म्यांमार, लाओस अऊ थाईलैंड के बगेर कानून-कायदा वाले सरहदी इलाका- मं जंगल के एक हिस्सा का काटके कैसीनो शहर बसाय गे हवय.

कतको अंतरराष्ट्रीय मीडिया रिपोर्ट के मुताबिक,बोकेओ राज मं बसे 'गोल्डन ट्रायंगल स्पेशल इकोनॉमिक ज़ोन (जीटीएसइजेड),जेन ला कहे जाथे के जुआ के एक ठन इलाका ले बदलके बड़े पैमाना मं साइबर-ठगी अऊ मइनखे मन के तस्करी के वैश्विक केंद्र बन गे हवय.

रोशन अऊ विशाल तेजी ले बढ़त ऑनलाइन साइबर-ठगी के नवा शिकार बनिन – एक ठन अइसने धंधा जेन मं माने जाथे के विकासशील देस मन के हजारों काम करेइय्या मन ला बंधक बनाके काम मं लगाय गे हवय. ये काम करेइय्या मन ला ऑनलाइन बिक्री अऊ आईटी इंडस्ट्री मं बढ़िया नउकरी के लालच देके फंसाय जाथे अऊ ओकर बाद ओ मन ले अंतरराष्ट्रीय स्तर मं साइबर-धोखाधड़ी करवाय जाथे.

रोशन कहिथे, “हमन असल मं दुनिया भर के लोगन मन ला धोखा देवत रहन. पहिलीच दिन ले हमन ला फेसबुक मं नकली आईडी बनावन, दीगर लोगन मन के रूप धरके, लोगन मन ला काल करे बर एआई टूल काम मं लावन, बड़े-बड़े वादा करके बड़े इन्वेस्टर्स मन ला फंसावन अऊ ठगी (बैंकिंग फ्रॉड) करत रहेन.” वो ह कहिथे, “ओ मन काम करेइय्या मनले कुछु घलो करवा लेथें.”

रोशन ह अफ्रीका, भारत, बांग्लादेश अऊ कतको आने देस मन के बीस-तीस बछर के उमर के लइका मन ला देखिस. ओ मन हफ्ता मं छै दिन, रोज के 12-14 घंटा काम करत रहंय. ओ मन ला तय तनखा त मिलत रहिस, फेर गाँव घर लहूटे ओकर मन के हाथ मं नइ रहिस.

रोशन सुरता करत कहिथे, “विशाल तुरते निकरे ला चाहत रहय. वो ह भारी डरे रहिस; अऊ मंय घलो.”

कइसने करके, रोशन ह पहिलीच हफ्ता मं फ़िदी ले बात करके विशाल ला छुड़वा लिस; वो ह बहाना बनाइस के विशाल ला कंप्यूटर चलाय ओतक बढ़िया नइ आवय, जतक वोला आथे.

रोशन सुरता करत कहिथे, “हमन ले हरेक ला भर्ती करे बर फ़िदी ला कंपनी ले 10,000 युआन (करीबन 1.3 लाख रूपिया) मिले रहिस. वो ह विशाल के पासपोर्ट लहूटाय अऊ वोला घर लहूट के जाय बर 10,000 युआन के मांग करिस. असल मं हमन बंधुआ बना ले गे रहेन. हमन ला अपन परान जाय के डर घलो रहिस. मंय ओला मनायेंव के वो ह धीरे-धीरे मोर तनखा ले महीना के क़िस्त काट लेवय अऊ विशाल ला लहूट जाय ला देवय.” रोशन कहिथे, किस्मत के बात रहिस के वो ह मान गीस अऊ विशाल घर लहूट गे.

विशाल ये कहिनी बर पारी ले गोठ-बात करे ला नइ चाहय; वो ह वो घटना ला एक ठन खराब सपना समझ के भूले ला चाहथे.

एकर बाद, रोशन ह कइसने करके ब्रह्मपुरी के कांग्रेस नेता अऊ महाराष्ट्र विधानसभा मं विपक्ष के नेता विजय वडेट्टीवार ला व्हाट्सएप कॉल करिस अऊ ओकर ले मदद मांगिस. वडेट्टीवार ह मुख्यमंत्री देवेंद्र फडणवीस को जानकारी दिस, जेन ह केंद्रीय गृह मंत्रालय ले संपर्क करिस. लाओस मं भारतीय दूतावास ला सूचना दे गीस; दूतावास ह उहाँ के पुलिस के मदद ले रोशन के पता लगाइस अऊ वडेट्टीवार ला कॉल करे के दू दिन बाद ओला वो जगा ले सुरच्छित बहिर निकारिस.

वो ह कहिथे, “लाओस पुलिस बनेच अकन लोगन मन के संग आइस, मोर पासपोर्ट लिस, मोला लहूटाइस अऊ मोला अहमदाबाद होवत जवेइय्या बिमान मं बइठा दिस.” रोशन अहमदाबाद वो बखत हबरे रहिस, जब 12 जून के दिन एयर इंडिया के बिमान 171 ह क्रैश होगे रहिस अऊ ओ मं सवार 260 लोगन मन के परान चले गे. वो ह लाओस मं करीबन हफ्ता भर गुजारे रहिस.

जम्मू-कश्मीर के ओकर संगवारी घलो देस (भारत) लहूट आय हवय अऊ केरल मं काम करत हवय. पारी ह ओकर ले गोठ-बात करे के कोसिस करिस फेर ओकर ले बात नइ होय सकिस. ओला अपन परिवार के देखभाल करना हवय अऊ लइका मन के लालन-पालन करना हवय.

मिन्थुर लहूटे के बाद रोशन ह वडेट्टीवार ला अपन पाँच बछर के दुख भरे कहिनी ला सुनाइस, जेन ला सुनके वो ह अचमित रहिगे. फेर एकर कुछु बखत बाद वडेट्टीवार के दाई ह गुजर गे अऊ पुलिस मं कोनो सिकायत करे नइ गीस. ये मामला ह ठंडा बस्ता मं चले गीस, फेर नवंबर 2025 मं जब रोहिणी ह आत्महत्या के कोसिस करिस, त एक ठन स्थानीय यूट्यूब चैनल ह रोशन के आपबीती ला दिखाइस.

आखिर मं पुलिस ह एफआईआर दर्ज करिस अऊ इहाँ के सूदखोर मन के संगे संग किडनी रैकेट के आरोपी मन ला घलो गिरफ्तार करिस. रोशन ह अपनी पुलिस शिकायत मं लाओस के स्कैमिंग कंपाउंड के जिकर नइ करिस.

केस दर्ज होय के बाद वाडेट्टीवार ह एक ठन प्रेस कॉन्फ्रेंस करिस, जेन मं वो ह आरोपी मन के खिलाफ सख्त कार्रवाई करे अऊ रोशन ला राहत देय के मांग करिस.

डेयरी किसान अब अपन परिवार के जमीन अऊ सोना वापस पाय अऊ बैंक मन ले लेगे करजा माफ़ करवाय बर कानूनी लड़ई लड़त हवय. महाराष्ट्र साहूकारी (नियमन) कानून, 2014 के तहत, संपत्ति ज़ब्त करे अऊ ओकर मालिक ला लहूटाय के प्रावधान हवय. ये मं बनेच बखत लागही.

रोशन उपर अलग-अलग बैंक अऊ गैर-बैंकिंग वित्तीय संस्थान मन के 50 लाख रूपिया ले जियादा के करजा हवय, संगे संग रिश्तेदार अऊ संगवारी मन के घलो कुछु-कुछु रकम बकाया हवय.

फेर वो ह खुस हवय के आखिर मं ओकर बात सुने जावत हवय.

वो ह पारी ला बताथे, “एक बखत इसने घलो आय रहिस जब हमन जमू परिवार के संग मिलके आत्महत्या करे के सोचत रहेन. मंय कतको तरीका ला लेके बिचार करत रहंय, जेन मं साइनाइड खाय घलो रहिस.”

ए बछर के सुरु मं बजट सत्र बखत ओकर मामला ह राज के विधानसभा मं हलचल मचा दिस. वाडेट्टीवार ह सबले पहिली दिसंबर 2025 मं नागपुर मं विधानसभा के शीतकालीन सत्र बखत ये मुद्दा उठाय रहिस. महाराष्ट्र सरकार ह हालेच मं रोशन ला 5 लाख रूपिया के सहायता राशि जारी करे हवय अऊ स्वयंसेवी संस्था मन घलो आर्थिक मदद बर आगू आय हवंय.

रोशन अऊ ओकर भाई अमोल अपन डेयरी ला फिर ले सुरू करना चाहत हवंय – सुन्ना परे कोठा मं गाय राखे ला चाहत हवंय अऊ ये काम ला दुबारा सुरु करे चाहत हवंय. ओ मन सरकारी नउकरी बर जिला कलेक्टर अऊ राजनीतिक नेता मन ला घलो चिठ्ठी लिखे हवंय.

अपन घर मं रोशन कहिथे के ओकर जइसने हजारों लोगन मन मुस्किल हालत मं फंसे हवंय.

रोशन ला ये चेत राखे जिनगी गुजारे ला हवय के ओकर सिरिफ एकेच ठन किडनी हवय. वो ह कहिथे, “मोला नइ पता के जइसने जिसने उमर होवत जाही, मोर उपर एकर काय असर परही.” वो ह अपन जिनगी के बीते पाँच बछर ला मिटाय ला चाहत हवय.

साल 2026 के सुरु मं पारी ह पहिली बेर रोशन के कहिनी के जाँच-पड़ताल सुरु करे रहिस. अब सात महीना बाद, वो ह सरकार, अपन चाहने वाले अऊ सिविल सोसाइटी संगठन मन ले मिले कुछु आर्थिक मदद के सहारे धीरे-धीरे अपन जिनगी ला फिर ले संवारे मं लगे हवय.

अगस्त 2026 मं ये रिपोर्टर ले गोठ-बात करत, रोशन कहिथे के वो ह अपन डेयरी फिर ले सुरु करे चाहत हवय अऊ सुन्ना कोठा मं नव गाय अऊ भंइसी लाय ला चाहत हवय. राज सरकार ह हालेच मं ओला खेती बर पाँच एकड़ जमीन देय के वादा करे हवय; रोशन ला आस हवय ये वादा ले ओकर परिवार के माली हालत मं कुछु सुधार आही. वो ह अपन ददा के लंबा बखत ले रुके परे कुल्हा के जोड़ के आपरेसन के तियारी घलो करत हवय.

ये सब्बो के बीच मं, ओकर इहाँ के पुलिस थाना अऊ चंद्रपुर पुलिस मुख्यालय के सरलग चक्कर लगाय चलत हवय. पुलिस अभू घलो किडनी रैकेट मामला मं फरार दू झिन आरोपी ला खोजत हवय - त्रिची के स्टार किम्स अस्पताल के डॉ. राजारत्नम गोविंदस्वामी अऊ कोलकाता के कथित दलाल सुभजीत पाल.

रोशन तउन लोगन मन के संपर्क मं हवय जेन मं अपन किडनी बेचे रहिन. ओ मन अब ओकर संगवारी बनगे हवंय.

गर तुंहर मन मं आत्महत्या के बिचार आवत हवय धन कोनो आने दिक्कत मं हवव, त बिनती हवय के किरण, नेशनल हेल्पलाइन मं 1800-599-0019 (24/7 टोल फ्री) मं फोन करव, धन अपन तीर के ये मन ले कोनो घलो हेल्पलाइन मं फोन करव.

पढ़व मिन्थुर सीरीज़:
भाग 1 - खेती के करजा-बोड़ी, खींचत अंग तस्कर कोती
भाग 2 - करजा के फांदा, ले जावत किडनी बेचे के रद्दा