करजा के फांदा, ले जावत किडनी बेचे के रद्दा

रोशन सदाशिव कुले अपन सधारन स्मार्टफोन मं अपन फेसबुक अकाउंट खोलथे अऊ जुन्ना नोटिफ़िकेशन मन ला देखत आगू बढ़त जाथे, जब तक के वो ह एक ठन अइसने नोटिफ़िकेशन मं रुक नइ जावय जेन ह ओकर जिनगी बदल दीस. वो ह पारी ला अपन मुस्किल के बखत के दूसर घड़ी के बारे मं बतावत हवय.

मिन्थुर गाँव मं ओकर घर मं ओकर परिवार के लोगन मन ओकर तीर मं बइठे हवंय; ओ मन कठवा कस परे अऊ थके हारे नजर आवत हवंय. कलेचुप सुनत हवंय अऊ अभू घलो सदमा ले उबरे नइ सके हवंय.

रोशन बताथे के अक्टूबर 2023 मं झुलझुलहा 5 बजे उधार देवेइय्या तीन झिन लोगन मन कार ले आइन. जब ओ मन ​​दरवाजा खटखटाइन, त घर के लोगन मन सुते रहिन; ओकर मन के हाथ मं लउठी रहिस. आरोप हवय के ओ मन रोशन ला गंदा-गंदा गारी दीन अऊ कहिन के ओकर उपर बनेच अकन उधारी बांचे हवय, अऊ पइसा चुकाय ला घलो कहिन.

ओ मन घेरी-बेरी आवत रहंय.

ओ मन कहिन के ओकर उपर अभू घलो 16 लाख रूपिया बकाया हवय.

फेर रोशन करा उधार लेगे के जम्मो रद्दा बंद होगे रहिस अऊ घर के सब्बो जिनिस गिरवी राखे जा चुके रहिस धन बेचागे रहिस. नउकरी पाय के जम्मो उदिम घलो काम नइ आइस.

रोशन ला सुरता हवय के छै आरोपी सूदखोर मन ले एक झिन ह बइठका बखत ओकर ले कहे रहिस, “अपन करजा चुकाय बर किडनी बेच दे. नइ त, मंय तोर घर मं डेरा डारहूँ.”

सूदखोर ह ओला किडनी दान करेइय्या लोगन मन के एक ठन फ़ेसबुक ग्रुप के बारे मं बताइस अऊ ओला ये मं जुड़े ला कहिस.

वो ह कहिथे, “सुरु मं मंय [अपन किडनी बेचे ला लेके] हिचकत रहंय. फेर जब ओ मन हथियार अऊ लउठी लेके वसूली बर घेरी-बेरी घर आय लगिन, त हमन सब्बो डर गेन. तहां ले मंय ये उपाय उपर बिचात्र करे लगंय.”

नवंबर 20 23 मं एक दिन, वो ह (फेसबुक मं किडनी डोनर कम्युनिटी' ग्रुप के) जॉइन बटन ला क्लिक करिस.एकेच दिन मं रोशन ला एक ठन WhatsApp ग्रुप मं सामिल होय बर मैसेज मिलिस. वो ह पारी ला बताथे, “ मोला शक घलो रहिस अऊ डर घलो, फेर मंय सामिल हो गें.”

ओकर बाद ले फेसबुक ग्रुप ला हटा दे गे हवय.

वॉट्सऐप ग्रुप चलेइय्या (एडमिनिस्ट्रेटर) ह ओला कतक दिन तक ले सरलग कतको मैसेज भेजिस. ओ मं बताय गे रहिस के किडनी दान करे एक ठन बनेच बड़े नेक काम अऊ जिनगी देवेइय्या तियाग आय. येकर ले किडनी फेल वाले कोनो मइनखे ला नवा जिनगी मिल सकथे. ओला बताय गे रहिस के येकर निकारे के काम ह सुरच्छित आय.

रोशन कहिथे, “ अब मोला गम होइस के वो अनजान मइनखे मोर हैंडलर (संभलेइय्या) रहिस.”

बाद मं चंद्रपुर पुलिस के जांच ले पता चलिस के हैंडलर हिमांशु भारद्वाज रहिस, जेन ह अब ये मामला मं आरोपी हवय अऊ न्यायिक हिरासत मं हवय. ओकर काम रोशन ला अपन किडनी बेचे बर मनाय रहिस.

एकर बाद होय गोठ-बात ले पता चलथे के हैंडलर ह रोशन ला ओ पइसा बर घेरी बेरी बिनती करिस, ओला मनाइस अऊ मोल-भाव करिस जेन ह ओला आखिर मं मिलना रहिस. ऑफ़र 8 लाख रूपिया के रहिस. आपरेसन के तुरते बाद ये पइसा रोशन के घरवाली रोहिणी के अकाउंट मं डारना रहिस. आखिर मं, अक्टूबर 2024 के आखिर मं होय आपरेसन के बाद रोशन ला करीबन 7.5 लाख रूपिया मिलिस.

रोशन ने सुरूच ले अपन परिवार ले ये बात ला छिपाय रहिस. वो ह जानत रहय के ओ मन राजी नइ होय रइतिन.

रोहिणी संसो करत कहिथे, “हमन ला थोकन घलो अंताज नइ रहिस के रोशन ह अपन किडनी बेचे के फइसला कर ले रहिस. मंय ओला कभू बेचे ला नइ देतेंय.” ओकर ददा रोशन उपर परत भार ला समझत रहिस, फेर ये फइसला ले वो ह घलो हैरान हवय.

वॉट्सऐप ग्रुप मं एक झिन अऊ रहिस- असरदार मइनखे, जेकर पहिचान डॉ. कृष्णा के रूप मं करे गे रहिस. रोशन सुरता करत कहिथे, “ वो ह भारी भरोसा देवत मेडिकल अऊ कानूनी पक्ष ला समझावत रहिस. वो ह येला जिनगी देवेइय्या एक ठन अइसने दान बतावय जेन ह जम्मो कोती ले सुरच्छित हवय.” गोठ-बात हमेसा WhatsApp मैसेज अऊ बनेच बखत तक ले, समझाय- बुझाय वाले चैटिंग ले होवय, कभू घलो वाइस कॉल मं नइ.

डॉ. कृष्णा 36 बछर के सरगना रामकृष्ण सुंचू के फर्जी नांव रहिस. वो ह करीबन बछर भर बाद वीडियो कॉल मं वो बखत नजर आइस, जब रोशन कंबोडिया के नोम पेन्ह जाय रद्दा मं कोलकाता जावत रहिस, जिहां निकारे के (एक्सट्रैक्शन) सर्जरी होना रहिस.

आठ महीना तक खींचतान अऊ करजा देवेइय्या मन के बढ़त दुवाब के बाद, रोशन आखिरकार जून 2024 मं अपन किडनी बेचे बर राजी हो गे.

हैंडलर अऊ स्थानीय साहूकार मन तुरते नागपुर ले पासपोर्ट बनवाय मं ओकर मदद करिन. ब्रह्मपुरी मं खून जांच होइस. चार महीना बाद, जाय के तियारी सुरू होइस.

ओकर परिवार अऊ गाँव के लोगन मन ला एकर बारे मं एको कनी घलो पता नइ रहिस. रोशन ह वो मन ला बताइस के वो ह बिदेस मं कंप्यूटर ऑपरेटर के नउकरी करे बर जावत हवय. ग्रेजुएशन के बाद, वो ह कंप्यूटर प्रोग्रामिंग के एक ठन कोर्स पास करे रहिस.

रोशन ला अपन फोन मं टिकट मिलिस. पहिली, ब्रह्मपुरी ले नागपुर तक बस ले तीन घंटा के रद्दा. ओकर बाद, अपन लाइव लोकेशन अऊ नागपुर रेलव टेसन हबरे के सबूत के रूप मं फोटो भेजे के बाद, ओला कोलकाता के ट्रेन टिकट मिलिस, जिहां भारद्वाज ओकर ले मिलिस अऊ वोला एक ठन खस्ताहाल होटल मं ले गीस.

वो ह सुरता करथे, “मंय अकेल्ला नइ रहंय; हमन 12 झिन कोलकाता के एक ठन खोली मं रहेन, जिहां छोटे कन पैथोलॉजी लैब मं हमर खून अऊ दीगर टेस्ट करे जावत रहिस.” रोशन ला लगिस के ओ लैब घलो उहिच नेटवर्क के हिस्सा रहिस.

सुंचू करीबन हरेक दिन डोनर ग्रुप के संग ऑनलाइन बात करय अऊ समझावय के ओ मन ला काय करना हे अऊ काय नइ, काबर के वो ह अगुवा हैंडलर्स ले मंज़ूरी ला अगोरत रहय.

“भारद्वाज हमन उपर भारी नजर राखत रहिस अऊ हमन ला अपन खोली ले बहिर निकरे नइ देवत रहिस.”

ओ मन के फोन ला छीन ले जावत रहिस अऊ घर फोन करे बर कभू-कभू बनेच कम बखत बर देय जावत रहिस. ओ मन ला चेताय जावय के फोन मं कोनो जानकारी झन देवंय. रोशन के कहना रहिस के ये ह ग़ैर-क़ानूनी नजरबंदी जइसने रहिस.

ओला सुरता हवय के ओ मन ये काम ला भारी सफई ले करे मं माहिर रहिन.

12 झिन लोगन मन ले के झिन मइनखे ह नोम पेन्ह के बिमान मं सवार होय के पहिलीच फारिग होय बर जाय के बहाना करत कोलकाता एयरपोर्ट ले भाग निकरिस. रोशन थोकन हांसत कहिथे, “त्याचीफटली [वो ह भारी डेर्रागे रहिस].”

बाकी लोगन मं उहिंचे रहिन; ओ मन ला पइसा के सख्त जरूरत रहिस.

रोशन कहिथे, “अक्टूबर 2024 के वो एक महीना भीतरी हमन सब्बो पक्का संगवारी बन गेन. हमन आस छोड़े नइ रहेन.”

ओ मन करीबन 10 दिन कोलकाता मं अऊ करीबन 20 दिन कंबोडिया मं रहिन. कंबोडिया मं ओ मन ला 'प्रेह केट मियालिया हॉस्पिटल ले जाय गीस, जेन ह सरकारी मिलिट्री सुविधा वाले अऊ जाना-माना मेडिकल सेंटर आय. आपरेसन के पहिली वो ह करीबन हफ्ता भर गुजारिस अऊ आपरेसन के बाद घलो करीबन दू हफ्ता उहिंचे रहिस; रोशन बताथे के वो बखत ओला भारी दरद अऊ डर लगत रहय. ओ दू हफ्ता अपन परिवार ले गोठ-बात करे नइ सकिस.

रोशन कहिथे, “ हमन ला छोटे-छोटे खोली मं राखे गीस अऊ बहिर के दुनिया ले हमर कोनो संपर्क नइ रहिस.” वो ह बतावत जाथे, “जब हमर टांका मन सूखागे, त हमन ला एक एके करके अलग अलग रद्दा मं बिमान ले घर भेजे गीस.” वो ह विशाखापत्तनम के रद्दा ले आय रहिस.

पुलिस के जांच के काम राष्ट्रीय सीमा मं जाके खतम हो जाथे.

रोशन के मदद ले, पुलिस ह देस (भारत) के अलग-अलग जगा ले करीबन एक दर्जन अइसने दानदाता के पता लगाइस, जेन मन कहे जाथे के उहिच नेटवर्क के जरिया ले पइसा के बदले अपन किडनी दे रहिन.

एक झिन मइनखे जुआ मं पइसा हार गे रहिस. दूसर शेयर बजार मं सट्टेबाजी सेती बरबाद होगे रहिस.

पारी ह ओ मन ले चार झिन मन ये शर्त मं गोठ–बात करिन के ओकर मन के चिन्हारी नइ करे जाही. काबर के ओ मन ले करीबन सब्बो मन अपन परिवार ले ये बात ला बताय नइ रहिन.

ओ मन ले एक झिन ह फोन मं पारी ला बताइस, “ मोर उपर करजा रहिस अऊ मोर नान कन कारोबार बरबाद होगे रहिस.” अब ये मइनखे ह अपन गाँव घर इलाहबाद ले दूरिहा केरल मं नउकरी करत हवय.

मार्च 2026 के आखिर मं, चंद्रपुर पुलिस ह सेशंस कोर्ट मं आरोपपत्र दाखिल करिस. सैकड़ों पन्ना के ये आरोपपत्र के संग 6,000 पन्ना के दस्तावेजी सबूत घलो हवय. मुख्य आरोपी सुंचू (उर्फ़ डॉ. कृष्णा) अऊ मामला मं नामजद कंसल्टिंग ट्रांसप्लांट सर्जन के बीच के कॉल डिटेल रिकॉर्ड अऊ वॉट्सऐप बातचीत घलो सबूत मन के हिस्सा आय अऊ ये ह सैकड़ों पन्ना मं हवय.

सबूत, जेन मं यात्रा के दस्तावेज अऊ पइसा के लेन-देन घलो हवय, ये ह चलत बड़े अकन नेटवर्क डहर आरो करथे.

आरोपपत्र के मुताबिक, सुंचू- करीबन 40 बछर के मइनखे जेन ह जनवरी 2026 के सुरू मं सोलापुर शहर के ओकर आलिशान घर ले गिरफ्तार करे गे रहिस– ह खुदेच अपन एक ठन किडनी बेचे रहिस अऊ बाद मं इही तजुरबा ले एक ठन सुचारू कारोबार सुरु करिस.

जांच करेइय्या मन के आरोप आय के डाक्टर, एजेंट, दलाल, होटल मालिक अऊ टैक्सी चलेइय्या मन के मदद ले वो ह सोशल मीडिया के जरिया ले तंगी ले जूझत लोगन मन ला अपन जाल मं फंसाइस. पुलिस के कहना आय के ये नेटवर्क जरूरतमंद मरीज मन ला भारत अऊ कंबोडिया मं दानदाता मन ले जोड़त रहिस, अऊ अस्पताल अऊ दलाल मन के जरिया ले मेडिकल टेस्ट, यात्रा अऊ ट्रांसप्लांट के काम के इंतजाम करत रहय.

ट्रांसप्लांट करवेइय्या लोगन मन ले 50-70 लाख रूपिया ले जावत रहिस, कुछ मामला मं त ये ह दान लेवेइय्या के हैसियत मुताबिक करोड़ों तक ले हबर जावत रहिस. ये रकम ले, दानदाता मन ला 5-8 लाख रूपिया, सर्जन ला 10-15 लाख रूपिया अऊ अस्पताल ला घलो 10-15 लाख रूपिया मिलत रहिस; बाकि खरचा अऊ दलाल मन ला देय के बाद, सुंचू करा बनेच बड़े रकम बांचत रहिस.

जांचकर्ता मन ला पता चलिस के ये नेटवर्क ह कंबोडिया के संगे-संग तमिलनाडु के त्रिची मं स्टार किम्स हॉस्पिटल अऊ बेंगलुरु मं आशा हॉस्पिटल मं 30 ले 35 अवैध किडनी ट्रांसप्लांट करवाए रहिन. स्टार किम्स हॉस्पिटल ला अब बंद कर दे गे हवय.

रोशन के मदद ले पुलिस ह एक झिन अऊ दानदाता के पता लगाइस, जेकर कंबोडिया मं ऑपरेसन नइ हो सकिस काबर के ओकर खून रिपोर्ट मं कुछु दिक्कत रहिस. आरोपपत्र के मुताबिक, छै महीना बाद नई दिल्ली के ऑर्गन ट्रांसप्लांट सर्जन डॉ. रविंदर पाल सिंह ह स्टार किम्स हॉस्पिटल मं ओकर किडनी निकारिस. वो ह पुलिस ला बताइस, “डॉ. कृष्णा ह मोला 8 लाख रूपिया देय के वादा करे रहिस, फेर असल मं मोला सिरिफ 5.5 लाख रूपियाच मिलिस.” ओला घलो इही लगत रहय के सुंचू क्वालिफ़ाइड डॉक्टर आय.

आरोपपत्र मं डॉ. रविंदर पाल सिंह अऊ स्टार किम्स के प्रमोटर डॉ. राजारत्नम गोविंदस्वामी के नांव तउन दू झिन डॉक्टर के रूप मं सामिल हवंय जेन मन मानव अंग तस्करी के रैकेट मं सामिल रहिन.

डॉ. गोविंदस्वामी अऊ सुभजीत पाल- एक झिन दलाल जेन ह मेडिकल टेस्ट अऊ अस्पताल के काम के इंतजाम करे मं संचु के मदद करे रहिन – फरार हवंय.

ये बखत पुलिस के जांच, आरोपपत्र मं नामजद दू फरार आरोपी मन के गिरफ़्तारी अऊ डॉ. रविंदर पाल सिंह के भूमका के पता लगाय उपर लगे हवय.

डॉ. सिंह करीबन छै महीना तक ले गिरफ्तारी ले बचत रहय, फेर 24 जून के दिन वो ह चंद्रपुर पुलिस के आगू समर्पन कर दीस. ये ह तब होइस जब बॉम्बे हाई कोर्ट के नागपुर बेंच ह ओकर अग्रिम ज़मानत के अरजी ला खारिज कर दीस अऊ बाद मं ओकर खिलाफ दर्ज एफआईआर ला रद्द करे के ओकर अरजी ला घलो सुनवई के लइक नइ मानत खारिज कर दीस. मई 2026 मं सुप्रीम कोर्ट ह हाई कोर्ट के ओ आदेस मन मं दखल देय ले मना करिस अऊ डॉ. सिंह ला समान्य जमानत लेगे बर कहिस.

अप्रैल मं हाई कोर्ट मं अग्रिम ज़मानत अरजी के विरोध करत,सरकारी वकील देवेंद्र चौहान ह बेंच के आगू सुंचू के डिवाइस ले मिले वॉट्सऐप गोठ-बात के जिकर करिस अऊ ओला पेश करिस – जेन ह अब पब्लिक रिकॉर्ड मं हवय. सुनवई बखत कोर्ट मं पेश करे गे अऊ पारी के हासिल करे गे ये सबूत मन ले चिंता मं डरेइय्या कतको बात उजागर होय हवय.

एक ठन गोठ-बात मं, आरोप हवय के सुंचू ह डॉ. सिंह ला बताय रहिस के बांग्लादेश के ढाका के तीर के एक ठन गाँव ले लाय गे एक झिन गरीब किडनी दानदाता के बेंगलुरु मं किडनी निकारे के आपरेसन बखत परान चले गीस. ओला ओ गाँव जाके दानदाता के जवान घरवाली ला 1 करोड़ रूपिया मुआवजा देय ला परिस जेकर ले पुलिस तक बात झन हबरय. सबूत नंबर 3393 अऊ 3415 के रूप मं दरज ये वॉट्सऐप गोठ-बात मन मं ये बात के जिकर हवय के दानदाता के कफन-दफन बेंगलुरु मं कलेचुप कर दे गे रहिस. सबूत मन मं सामिल एक ठन वॉट्सऐप गोठ-बात ले पता चलथे के सुंचू ह डॉक्टर ले कहे रहिस के ये घटना ले होय खरचा ला जम्मो टीम ला बांटके उठाय ला परही.

गोठ-बात मं जबानी पइसा के लेन-देन के बात हवय. सिंह के अग्रिम जमानत अरजी के सुनवाई बखत पुलिस ह अदालत ला बताइस के सब्बो लेन-देन हवाला ले करे गे रहिस.

आरोपपत्र मं आपराधिक साज़िश, मानव तस्करी, मानव अंग के अवैध कारोबार अऊ 'ट्रांसप्लांटेशन ऑफ़ ह्यूमन ऑर्गन्स एंड टिश्यूज़ एक्ट' (THOTA) के तहत मानव अंग के कारोबारी लेन-देन ले जुड़े धारा मन के संगे संग डराय-धमकाय, जबरन वसूली, ग़लत तरीका ले बंधक बनाय अऊ अवैध रूप ले पइसा उधार देय जइसने अपराध मन के जिकर घलो हवय.

अग्रिम जमानत देय ले इनकार करत, बॉम्बे हाई कोर्ट के नागपुर बेंच ह कहिस के आरोपी डॉक्टर, जेन ह देस भर के कतको अस्पताल मं कंसल्टिंग सर्जन के रूप मं काम करत हवय, ओला अंग दान ले जुड़े कानून-कायदा के जानकारी रहिस. कोर्ट ह जोर देके कहिस के ये आरोप मन मं कानून ला टोरे, जबरदस्ती अऊ संदेहा वाले पइसा के लेन-देन हवय.

ये मामला बनेच अकन पैमाना मं बेवस्था के फेल होय कोती आरो करथे.

गाँव-देहात मं करजा के बोझा अऊ बगेर कोनो कानून कायदा के साहूकारी; पइसा-कउड़ी के जानकारी के कमी अऊ स्थानीय स्तर मं कानून-कायदा के पालन मं कड़ई नइ होय; दवई-इलाज मं धोखाधड़ी अऊ देस-बिदेस के तस्करी के जाल – रोशन के कहिनी सोसन के करीबन हरेक परत ले जुड़े हवय.

अंग बेचे के फइसला सायदेच कभू अकेल्ला करे जाथे. ये फइसला दुवाब, करजा अऊ कम होवत जावत उपाय सेती होथे, जब तक के सिरिफ एकेच रद्दा नइ रहि जाय. कतको मामला मं, बेचेइय्या मन ला लागथे के ओ मन गरीबी ले निकरत हवंय. फेर अधिकतर मामला मं, ओ मन गरीबी मं जिनगी गुजारत रहिथें.

कैलिफ़ोर्निया यूनिवर्सिटी, बर्कले मं ऑर्गन्स वॉच प्रोजेक्ट के संस्थापक अऊ मानवविज्ञानी नैन्सी शेपर-ह्यूज़ ह एकर बारे मं बनेच कुछु लिखे हवय के कइसने ग्लोबल ऑर्गन मार्केट खरीददार अऊ बेचेइय्या, दूनों के मजबूरी के फ़ायदा उठाथें, अऊ अंग अक्सर गरीब ले अमीर मन तक हबर जाथे.

विश्व स्वस्थ्य संगठन ह दस बछर ले पहिली ले घलो अंताज लगाय रहिस के दुनिया भर मं बिसोय गे मइनखे के अंग मन ले होवेइय्या ब्लैक मार्केट ट्रांसप्लांट ऑपरेसन के सालाना पैमाना 10,000 हवय.

“जउन मरीज मन ऑपरेशन बर चीन, भारत धन पाकिस्तान जाथें, ओमन अइसने गिरोह मन ला एक ठन किडनी बर $200,000 (लगभग £128,000, धन करीब 2 करोड़ रुपिया) तक दे सकथें जेन मन गरीब अऊ लाचार लोगन मन ले अंग मन ला निकालथें—कभू-कभू त सिरिफ $5,000 जतका कम पइसा मं,” डब्ल्यूएचओ ह ये बात के पता लगाय रहिस.

शक्कर/सुगर (डायबिटीज) अऊ आने पाचन शक्ति (मेटाबोलिक) बीमारी मन के बढ़े के सेती किडनी के मांग ह दिनों दिन बढ़त जावत हवय, फेर एकर बनिस्बत पूरती (सप्लाई) ह एकदम कम परगे हवय.

जानकार शरदामयी चटर्जी ह बढ़त अर्थव्यवस्था मन के एक ठन अध्ययन मं लिखथें: “हाल के बखत मं पाचन शक्ति मं गड़बड़ी वाले बीमारी मन के बढ़े सेती दुनिया भर मं अंग बदलवे के मांग ह बहुते जादा बढ़गे हवय, फेर ओकर बनिस्बत पूरती ह एकदम कम हवय. ये बात ह बिकाऊ अंग मन के एक ठन बड़े अऊ चोखा कमई वाले ग्लोबल ब्लैक मार्केट के रद्दा खोल दे हवय.”

यूनाइटेड नेशंस ऑफिस ऑन ड्रग्स एंड क्राइम के रिपोर्ट मन मं अंग निकारे बर होवइय्या तस्करी ला एक ठन अंतरराष्ट्रीय अपराध बताए गे हवय, काबर के लोगन मन ला फुसलाय मनाय के काम, ओमन ला लाय-ले जाय के काम, ऑपरेसन अऊ पइसा-कउड़ी के लेन-देन ह अमूमन अलग-अलग देस धन राज मन के अधिकार मं होथे.

कतको दस्तावेजी जांच मन मं बांग्लादेश अंग दान करेइय्या मन के एक ठन बड़े ठीहा बने हवय. उहिंचे, कंबोडिया अंग तस्करी, साइबर-स्कैम के ठीहा, मजूर मन के तस्करी अऊ नवा जमाना के बंधुआ के मामला मं एक दूसर ले जुड़े सेती बदनाम हवय.

रोसन के कहिनी घलो एकदम इहीच रद्दा के पाछू धरे रहिस.

ये फइसला घड़ी भर मं नइ लेगे गे रहिस. येला हफ्तों अऊ महीनों तक ले चले गोठ-बात, हिसाब-किताब अऊ दीगर रद्दा धन उपाय के नइ रहे जाय के बाद तय करे गे रहिस. जब किडनी बेचे के बात जोर ले चले लगिस, त ये बात अब कोनो नवा धन अनोखा नइ लगत रहिस.

आज, रोशन के पेट के डेरी कोती एक ठन लंबा चिन्हा हवय अऊ ओला जिनगी भर कुछु खास बात के पालन करना हे. ओला ये बात के संग जीना हवय के सेहत ला लेके ओला कोनो गलती करना नइ ये.

पइसा जल्दी खतम हो गीस.जमीन वापस नइ मिलिस. करजा घलो चुकता नइ होइस. बस ये बात साफ होगे के जेन फइसला ले ओला लगे रहिस के ओकर परिवार बच जाही, उहिच ह ओला एक ठन बनेच बड़े सिस्टम मं फँसा दे रहिस.

फेर वो रद्दा जेन ह गाँव के करजा के फांदा ले सुरू होइस अऊ जेन ह कोलकाता अऊ कंबोडिया ले होके गुजरिस, वो ह अब तक ले सिराय नइ रहिस. अस्पताल अऊ आपरेसन थियेटर मन के पार एक ठन दूसर अंधियार संसार (काला कारनामा के बजार) छिपे रहिस- दक्खिन-पूरब एशिया के गोल्डन ट्राएंगल के कंप्यूटर-इंटरनेट ठगी के ठीहा अऊ ओती जाय के तस्करी के रद्दा - जिहां एक अइसन लालच दीस जेकर उपर भरोसा करे मुस्किल रहिस.

पढ़व: मिन्थुर सीरीज़:
भाग 1 – खेती के करजा-बोड़ी, खींचत अंग तस्कर कोती
भाग 3 –किडनी बेचागे, अब नउकरी केफांदा मं हबर गेबिदेस