डबा स्कूल मं बघवा मन के डेरा

अपन पचास के उमर मं, अशोक रानी गोंड कभू स्कूल नइ गीस, फेर वो ह हांसत कहिथे के ओकर नौ बछर के पोता “एक भी दिन नहीं छोड़ा [एको दिन घलो नागा नइ मारे हवय]” वो ह पारी ला बताथे.

ओकर पोता डबा के प्राइमरी स्कूल मं दाखिला लेवइय्या 39 लइका मन ले के झिन आय. करीबन 500 लोगन मन (जनगणना 2011) वाले ये गाँव दमोह जिला के एक ठन कोनहा मं बसे हवय, जेन ह छोटे छोटे डोंगरी, खुला चरागान अऊ खेत-खार मन के बीच मं हवय. अधिकतर परिवार – खास करके गोंड आदिवासी – थोर-बहुत खेती करथें अऊ मवेसी पालथें.

कतको सियान मन कभू स्कूल नइ गे हवंय – साल 2013 के ये रिपोर्ट बताथे के 50 फीसदी गोंड आदिवासी साक्षर नइ यें.

फेर, डबा स्कूल मं हमेसा कुछु अइसने लइका घलो रहे हवंय जेन मन स्कूल जाय बर आनाकानी करथें, अऊ वो मन के आंकड़ा सीजन के हिसाब ले बदलत रहिथे: जब काम-बूता बंद हो जाथे अऊ घर के लोगन मन अपन लइका मन ला धरके कोनो आने जगा चले जाथें, त स्कूल ले गैर-हाज़िर रहेइय्या लइका मन के संख्या अचानक ले बढ़ जाथे. कुछु लइका मन ला तो घरेच मं रहे अऊ खेले कूदे भाथे- आमा, जाम अऊ दीगर रुख मन मं चढ़े, 6 ले 9 बछर के कोनो घलो लइका बर स्कूल जाय ले कहूँ जियादा मजेदार होथे.

स्कूल के दू झिन गुरूजी मन ले एक झिन – जेन ह इहाँ जन्मे अऊ पले बढ़े हवय - ताराचंद यादव करा ये झिझकत लइका मन बर एक ठन उपाय हवय. वो ह एक दू दिन अगोरथे, अऊ ओकर बाद कुछु चाकलेट धरे वो लइका मन के घर हबर जाथे जेन मन स्कूल नइ आवत रहंय. वो ह कहिथे, “मंय सबले पहिली ओकर दाई-ददा मन ले गोठ-बात करथों अऊ वो मन ले बिनती करथों के वो मन अपन लइका मन ला स्कूल पठोवंय.” वो मन मोला जुवाब देथें, “मास्टर जी, हमन त बिहनिया- बिहनियाच काम-बूता बर निकर जाथन ... हमन काय करे सकथन?”

जइसने- जइसने देस (भारत) के जंगल मन ला आदिवासिसी अऊ जंगल के भरोसे रहे आने समाज बर बंद करे जावत हवय, मजबूरी मं पलायनेच ह एकेच रद्दा बांचथे. लइका मन –खासकरके नान नान नोनी मन – ला घलो अपन संग ले जाथें अऊ वो मन के पढ़ई-लिखई छूट जाथे.

गाँव मं जाने चिन्हे होय के नाते, यादव वो मन ला आगू के बात ला बताके मनाथे: “मंय वो मन ला कहिथों, ‘ये बखत तुमन सब्बो मजूरी करत हव, फेर तुहंर लइका मन पढ़हीं अऊ बढ़िया नउकरी करहीं, त वो वो मन तुंहर सियान होय बखत जतन करहीं.’ अइसने कहिके मंय वो मन ला समझाय के कोसिस करथों.”

गोठ-बात के आखरी मं दाई-ददा लकठा मं लुकाय वो उतइल लइका मन ला नरियाके कहिथें, “देखो! मास्टर साहब आय हवंय: ओकर ले कहव के तुमन स्कूल जाहू.”

ये बखत ताराचंद लइका मन ला चॉकलेट देथे. वो ह कहिथे के ये ‘घूस’ जादू कस काम करथे: दूसर दिन लइका मन स्कूल आ जाथे अऊ पढ़ई-लिखई मं मगन हो जाथें. ओकर ये ‘गुरतुर’ जिनिस बनेच काम के आय – साल 2022 के ‘एनुअल स्टेटस ऑफ़ एजुकेशन रिपोर्ट' (ग्रामीण) के मुताबिक, एम पी मं दूसरी क्लास (7-8 बछर के लइका) के करीबन आधा लइका मन 1 ले 9 तक के अंक घलो पढ़े नइ पावंय.

"प्राइमरी स्कूल शिक्षा के नींव होथे,” नर्मदा पटेल कहिथे, जेन ह दूसर टीचर आय अऊ साल 2010 मं डाबा स्कूल मं पढ़ाय आय रहिस. ये उमर मं वो मन जेन घलो सीखथें, वोला कभू नइ भुलायेंव.” येकरे सेती वो मन ला स्कूल मं लाय अऊ वो मन के स्कूल मं पढ़ई चलत रहे भारी जरूरी आय, खासकरके मध्य प्रदेश मं, जेन ह प्राइमरी स्तर मं नामांकन के मामला मं देस मं सबले तरी मं आथे.

ये दूनों टीचर 39 नामांकित लइका मन के जिम्मेदारी आपस मं बाँट लेथें, जेन मं 30 झिन गोंड आदिवासी आंय. बाकी लइका अन्य पिछड़ा वर्ग (ओबीसी) ले हवंय, अऊ कुछेक दलित हवंय,जेन मन अपन आप ला ‘हरिजन’ कहलाय पसंद करथें. पटेल कहिथे, “हमर करा वो सब्बो साधन हवय जेकर जरूरत एक लइका ला होथे – वो मन ला बछर भर मं दू ठन ड्रेस मिलथे, पढ़े के सब्बो किताब अऊ कापी दे जाथे, अऊ मध्यान्ह भोजन घलो मिलथे.”

येकर बाद घलो, लइका मन अपन दाई दाई के कमाय खाय बर बहिर जाय सेती पढ़ई छोड़ देथें, येकरे सेती टीचर मन करा वो मन ला बांचे लइका मन के बरोबर लाय बर एक ठन ‘ब्रिज’ क्लास होथे. यादव कहिथे, “वो मन 2-4 महीना बर चले जाथें, अऊ वो मन के पढ़ई थोकन घलो नइ होवय. जब वो मन लहूट के आथें, त वो मन ला मंय एक ठन अलग टोली मं डार देथों अऊ ओकर हिसाब ले वो मन ला पढ़ाथों.”

“बनेच अकन मन [मजूरी करे बर] हमेसा बर पढ़ई छोड़ दिहीं. चरों कोती बेरोजगारी हवय,” वो ह आगू बताथे.

नौरादेही वन्यजीव अभयारण्य के जंगल के सरहद संग संग जावत, हो सकथे के तुमन ‘डबा’ लिखाय वो नान कन पथरा के चिन्हा देखे नइ सके होवव. ये धरसा वाले रद्दा मं कोस भर अऊ जाय के बाद तुमन ला लइका मन के गोठियाय सुने ला मिलही - डबा प्राथमिक शाला (प्राइमरी स्कूल) ह ये गाँव के मुहटा के चिन्हारी आय.

“एक बखत रहिस जब कोनो जानत नइ रहिस के ‘डबा’ नांव के कोनो जगा घलो हवय,” ताराचंद यादव कहिथे. “ये गाँव अपन नांव जइसनेच रहिस – ‘डबा’ [दबे],” वो ह मुचमुचावत कहिथे. आज घलो ये गाँव मं बिजली नइ ये, अऊ इहाँ के लोगन मन सोलर बैटरी लेच अपन काम चलाथें.

प्राइमरी स्कूल के इमारत बने ले सरकारी अफसर मन के नजर ये डहर गीस अऊ येला पहिचान मिलिस. “सरकारी लोग [सरकारी अफसर] इहाँ आय लगिन. अइसने करके येला एक ठन निशान [चिन्हा] मिलिस. “गाँव मं स्कूल लाय मं यादव के रहे ह बड़े काम के रहिस.

डबा मं एक झिन किसान घर मं जन्मे ताराचंद यादव ह तीर के कस्बा मं स्कूली पढ़ई करे रहिस अऊ आखिर मं जबलपुर चले गीस – जेन ह उहाँ ले तीन घंटे के रद्दा रहिस –जिहां वो ह भूगोल मं एम एम के डिग्री हासिल करिस.

जब साल 90 के दसक के शुरु मं वो ह अपन ददा संग काम करे बर लहूट के आइस, इहाँ के लइका मन के दाई-ददा बर लइका मन के पढ़इ-लिखई मं मदद बर सबके पसंद रहिस. ये ह थोकन आगू तब अऊ बढ़गे, जब 1997 मं वोला मध्य प्रदेश सरकार की 'शिक्षाशाला योजना' (शिक्षा गारंटी योजना) के तहत पढ़ाय बर 500 रूपिया देय गीस. ये योजना के तहत राज सरकार ह तउन बस्ती मं रहेइय्या लइका मन ला प्राथमिक शिक्षा के सुविधा के गारंटी देथे, जिहां ओकर घर ले कुछु फर्लांग दायरा मं अइसने कोनो सुविधा नइ होवय.

“मंय एक ठन रुख तरी सुरु करे रहेंय ,” यादव सुरता करथे. “ओकर बाद हमन एक ठन कुरिया मं पढ़ाय लगेन,” वो ह कहिथे. तीन बछर बाद, स्कूल बन गीस अऊ वो ह राज सरकार के तनखा मं गुरूजी बने बर सब्बो परीक्षा दीस, अऊ विधिवत तैनाती होइस.

यादव कहिथे के बीते कुछेक बछर मं ओकर पढ़ाय के तरीका बदल गे हवय. “पहिली हमन लइका मन ले रट्टा मारके सिखावत रहेन- जइसने अच्छर अऊ गिनती. अब हमन कहिथन, 10 धन एक, 10 धन दू – न के 11 अऊ 12; येकर ले लइका मन गणित के गिनती ला आसानी ले सीख जाथें.” अच्छर मन ला रट के सीखे के जगा, वो मन पहिली अलग-अलग शब्द के कोनो अच्छर ला चिन्हे सीखथें.

ये नवा बिचार मन के बीजहा हर दू महीना में होइय्या शिक्षक मन के ट्रेनिंग मं डारे गे हवय. असीफ बेग, जेन ह अजीम प्रेमजी फाउंडेशन मं टीचर मन के ट्रेनिंग के काम देखथें, कहिथें के - “हमन मन ओमन के संग मिल के पढ़ाथन, अऊ ओमन अपन हुनर के जाँच अपन संगी मन के बीच में करथें.”

जब वो मन प्राइमरी स्कूल के पढ़ई पूरा कर लेथें, तो अधिकतर लइका मनका धन हरदुआ गाँव मं बने आवासीय स्कूल मं चले जाथें, जेन ह करीबन डेढ़ कोस दूरिहा हवय. यादव कहिथे, “हरेक दिन [जंगल के धरसा मं] आय-जाय होय नइ सकाय, ते पायके हमर लइका मन उहिंचे रहे पसंद करथें.”

फेर येकर बाद घलो, संख्या मं गिरावट आथे. शिक्षा मंत्रालय के साल 2021 के ये रिपोर्ट के मुताबिक, अनुसूचित जनजाति मन के सिरिफ छै फीसदी लइकाच उच्च शिक्षा बर दाखिला लेहीं.

डबा मं पूरा बिजली नइ होय ले हालत अऊ घलो बिगड़ गे हवय. 40 बछर के किसान अऊ एक कजिन लइका के ददा हरीश सिंह आदिवासी कहिथे, “हमन सिरिफ सोलर लाइट बउरथन. कभू-कभू वो काम नइ करय. रतिहा मं हमर लइका मन बर पढ़ई दिक्कत हो जाथे.”

स्कूल के करीबन तीस बछर के इतिहास मं, कुछु लइका पुलिस अऊ टीचर जइसने सरकारी नउकरी करत हवंय ; फेर कतको लइका मन कॉलेज के डिग्री हासिल करे हवंय. ये गुरूजी गरब ले कहिथे के ओकर पढ़ाय नोनी मन अब डेरी ले बिहाव करत हवंय. येकर बाद घलो, एमपी मं स्कूल नइ जवेइय्या नोनी मन के संख्या सबले जियादा (17 फीसदी) हवय (एएसइआर 2022).

साल 2022 मं, एमपी सरकार ह ‘सीएम राइज़’ नांव के एक ठन नवा योजना लाइस- येकर तहत के-12 (किंडरगार्टन ले 12 वीं क्लास तक) के बड़े स्कूल मन बनाय जाही, जेन मं डेढ़ कोस ले तीन कोस के दायरा के लइका आहीं. दमोह के आदिवासी बहुल ब्लॉक तेंदूखेड़ा मं ये नवा स्कूल मन ला बनाय के काम पहिलीच ले सुरु हो चुके हवय.

‘शिक्षकविहीन शाला’ एक ठन अइसने वाक्य आय जेन ला इहाँ के आदिवासी इलाका मं बने स्कूल मन ला बताय बर करे जाथे. एपीएफ दमोह के जिला प्रमुख उपेंद्र सिंह बताथें, “आदिवासी इलाका मन मं, जिहां टीचर मन जाय ले बचत रहिन, उहाँ साल 2018 के नीति आयोग के वो योजना ले लइका मन ला मदद मिलिस, जेकर तहत एकेच इलाका के प्राथमिक, माध्यमिक अऊ उच्च माध्यमिक स्कूल मन ला मिलाके एकेच जगा मं कर दे गे रहिस.” ये विलय ला ‘एक परिसर एक शाला’ के नांव देय गे रहिस, अऊ येकर तहत 35, 113 स्कूल मन ला मिलाके 16,076 स्कूल बना दे गे रहिस. ये मं 75 फीसदी स्कूल प्राथमिक स्तर के रहिस (पहिली ले आठवीं क्लास तक)

दूसर शब्द मं, 19, 037 स्कूल जेन ह कभू ये इलाका मं काम करत रहिन, अब नइ हवंय. वो मन ला दूसर स्कूल मन मं “मिला दे गे’ हवय, जेन ह लइका अऊ ओकर दाई-ददा मन बर बनेच जियादा दूरिहा हो सकथे. सरकार के सोच ये आय के येकर ले वो मन ला जियादा बढ़िया सुविधा वाले स्कूल मिलथे.

फेर उपेंद्र सिंह के मानना आय के ये नवा [बड़े] इमारत मन जंगल के तीर रहेइय्या आदिवासी अऊ आने लइका मन के उछाह ला टोर दिही, वो मन ला अब जियादा दूरिहा जाय ला परही. वो ह चेताथे, “पढ़ई छोड़ेइय्या मन के आंकड़ा बढ़ जाही.”

येकर छोड़, समाज के वो टीचर मन, जेन मन लइका मन के हालत ला समझथें- बूझथें अऊ ओकर मन के उपर जियादा संवेदनशील हवंय, ओकर जगा अब ये 2,000-3,000 लइका वाले बड़े-बड़े स्कूल (मेगा स्ट्रक्चर) मं स्मार्ट बोर्ड अऊ एड-टेक (शिक्षा तकनीक) ले लेही. वइसे तकनीक के अपन महत्तम हवय, फेर ये ह अक्सर गुरु-चेला के वो खास नाता ला दबा देथे, जेकर जरूरत पहिली पीढ़ी के पढ़ेइय्या मन बर भारी जरूरी हवय —जइसे के इहां के हमर आदिवासी लइका मन हवंय.

यादव अऊ पटेल रिटायर होय के करीब हवंय, अऊ वो मन डबा के स्कूल के आखिरी टीचर होहीं. देस (भारत) के 54वां टाइगर रिज़र्व, जेन ला 'वीरांगना दुर्गावती टाइगर रिज़र्व' (वीडीटीआर) के नांव दे गे हवय, ये स्कूल के संगे संग 40 ले जियादा गाँव मन ला घलो अपन मं समेटत हवय.

वीदीटीआर के नौरादेही ला असल मं नंदावत जावत हुंर्रा मन बर इहाँ के दू ठन अभयारण्य मन ले एक ठन मं बनाके राखे गे रहिस. फेर, बघवा मन उपर एकतरफा नजर सेती - जेन ला हमन दूसर सब्बो नंदावत जावत जानवर मन ला नजरअंदाज कर देन – ये ठीहा घलो अब बघवा मन बर एक ठन अऊ ठीहा बनके रहिगे हवय. अऊ अब, बघवा मन ला घलो वो चितवा मन बर घलो जगा देय ला परही, जेकर भारी चर्चा होवत हवय अऊ जल्दीच अवेइय्या हवंय. पढ़व: हुंर्रा के ठीहा मं झन मचावव बेबात के हल्ला

“स्कूल चले जाही, हमन घलो चले जाबो,” यादव कहिथे. फेर वोला आस हवय के ओकर पढ़ाय लइका मन पढ़ई नइ छोड़हीं.

अशोक रानी ला पूरा भरोसा हवय के ओकर पोता ह पढ़ई नइ छोड़ही. “जब हमन कहूँ आने जगा जाबो, त वो ह उहिंचे के स्कूल मं पढ़ही,” वो ह पारी ले जोर देवत कहिथे; लकठाच मं ठाढ़े 8 बछर के लइका घलो राजी होवत मुड़ हलावत रहिस.

अनुवाद: निर्मल कुमार साहू