चीता के घर बसी, अउर स्कूल सब बंद होई…

लगभग पचास साल के अशोक रानी गोंड कब्बो स्कूल ना गइली, बाकिर ऊ हंसत कहेली कि ऊनकर नौ साल के नाती एक्को दिन भी स्कूल ना छोड़ेला. “एक भी दिन ना छोड़ले बा,” ऊ पारी के बतावत हईं.

ऊनकर नाती डबा के प्राइमरी स्कूल में दाखिला लेवे वाला 39 बच्चन में से एक बा. एह गांव में 2011 के जनगणना के अनुसार लगभग 500 लोग बा. ई गांव दमोह जिला के एक कोने में बा, जवना के चारों तरफ छोट-छोट पहाड़ी, खुला घास के मैदान अउर खेती करे लायक जमीन से घिरल बा. मुख्य रूप से गोंड आदिवासी आ जादातर परिवार थोड़-बहुत खेती करेने आ गाय-भैंस पालन भी.

अधिकतर सेयान लोग कब्बो स्कूल नाही गईल बा लोग, गोंड आदिवासी के पचास प्रतिसत आबादी अनपढ़ ह, 2013 के ई रिपोर्ट कहेला.

डबा स्कूल में हरमेस्सा कुछ अईसन लइका रहल बाने, जेकर पढ़े में मन नाही लागेला अउर ऊनकर संख्या मौसम के साथ बदलत रहल बा: जब माई-दादा लगे काम ना रहेला, त स्कूल ना जाए वाला बच्चन के संख्या बढ़ी जाला. परिवार मजूरी खातिर पलायन करेला, त आपन छोट बच्चा के साथ ले जाला. कुछ लइकन के घरे रहल अच्छा लागेला कि उनके खेले के मिली. आम, अमरूद अउर दूसरे पेड़ पर चढ़ल, 6 से 9 साल के लईकन खातिर स्कूल गईले से निम्मन बा.

स्कूल के दूगो में से एगो मास्टर जी ताराचंद यादव एहिजा जनमल अउर पोसाइल बाने. उनकर एगो तरीका ह. ऊ एक या दू दिन देखेने, फेर भगौड़ लईका के घरे चॉकलेट लेके जाने. "पहिले हम माई बाप से बात करीके अनुरोध करेनी कि ऊ लोग आपन बच्चन के भेजे," ऊ कहेने. "ऊ लोग कहेला, ‘मास्टर, हमनी के त भिन्ही भिन्ही मजूरी करे चली जानी के...हमनी के का करी सकत बानी?’"

भारत के जंगल आदिवासी अउर जंगल पर निर्भर समुदाय के लोगन खातिर धीरे-धीरे बंद हो रहल बा. अब त तनाव में पलायन के एकेगो रस्ता लऊकत बा. छोट बच्चन, खासकर छोट लईकियन के लोग साथे लेले जाला, अउर ओकर पढ़ाई छूट जाला.

गांव के एगो जानल पहीचानल चेहरा यादव जी ओ लोगन के व्यवहारिक सलाह देके मनावे के कोशिश करेने: "हम सबसे कहनी, ‘तू लोग त मजूरी कर रहल बाड़, बाकिर अगर तो लोगन के लइका लईकी पढ़ी लिखी के बढ़िया नौकरी पा जईहें, ता बुढ़ापा में तो लोगन के खयाल रखीहें'. ए तरे हम ओ लोगन के समझावे के कोशिश करेनी."

ई बात खतम होते माई बाप आस पास मंडरात अपना अपना लइकन के डांटी के कहेलन, "देखू रे! मास्टर साहब आईल बानी। बोलू कि ते पढ़े जईबे."

ए बेरा ताराचंद लइकन के चॉकलेट देने. ऊ बतावेने कि ई घूस हमेशा काम करी देला, अगला दिन से लइका पढ़े खातिर स्कूल वापस आ जाने. मध्य प्रदेश में उनकर ई मीठ व्यवहार जरूरी बा, कक्षा 2 में पढ़े वाला 7 से 8 साल के आधा लईका 1 से 9 के बीच के अंक नाही चीन्ह पावेने, एनुअल स्टेटस ऑफ एजुकेशन रूरल रिपोर्ट 2022 बतावेला.

नर्मदा पटेल, दूसर मास्टर जी जे डबा स्कूल में 2010 से पढ़ावेने, ऊ कहेने कि प्राथमिक विद्यालय शिक्षा के नेई ह. ई साल में जवन भी बच्चा सीखी ऊ कब्बो ना भुलाई." त ओ लोग के बोलावल अउर स्कूल में रोकल जरूरी ह, विशेष रूप से मध्य प्रदेश में जे प्राथमिक स्तर पर नामांकन के मामला में देश में सबसे निचलके स्तर प बा.

ए दूनू गुरु जी लोग के लगे 39 गो छात्र बाने, जेमें से 30 गो गोंड आदिवासी हवें. बाकी में से कुल अन्य पिछड़ा वर्ग, आ कुछ दलित भी बाने, जे खुद के हरिजन कहवावल पसंद करेने. "एगो बालक के जवन चाही ऊ सब सुविधा हमनी के लगे बा, साल में दूगो ड्रेस, सब कापी किताब अउर दुपहरिया में भोजन भी," पटेल बतावेने.

तब्बो, कुछ लईका बीच में माई बाप के साथ बाहर चल जाने, त अईसन लईकन खातिर एगो अलग से क्लास बा, ताकि भुलाइल चीज़ मन पर सके. “ई लोग 2-4 महीना ले बाहर रहेने, अउर ऊनकर पढ़ाई-ओढाई सब बंद रहेला. जब ई लोग आवेला, त हम ए सबके एगो अलग ग्रुप में करी के पढ़ावेनी," यादव जी कहेने.

"एमे से अधिकतर मजूरी खातिर स्कूल छोड़ी दिहे. चारो ओर बेरोजगारी बा न," ऊ कहने.

अगर रउरा नौरादेही वन्य अभयारण्य के जंगली बाउंड्री से सटी के जाएब, त शायद रउरा के डबा जाए वाला रस्ता पर तीर लागल पत्थर के चीन्हा ना लऊकी. ए माटी से सनल रस्ता पर तीन किलोमीटर गईला, पर बच्चन के आवाज सुने के मिली, गांव के सामने ही डबा के प्राथमिक शाला आपन हाजिरी जनावत लऊक जाई.

"एगो समय रहे कि केहू के मालूम ना रहे कि डबा नाम के कवनो जगह भी बा," ताराचंद यादव कहने फिर मुस्कुरा के आगे कहने "गांव के नाम डबा ह न जईसे दबाईल होखे,". आज ले गांव में बिजली, नईखे अउर रहवईया के सोलर बैटरी से काम चलावे के पड़ेला.

प्राथमिक शाला भवन के निर्माण से सरकारी ध्यान आ पहचान मिलल. "सरकारी लोग आवे लागल. ओही से हमनी के सड़क पर पत्थर के निशान मिलल," यादव जी बतवने उन्ही के गांव में रहले से गांव में स्कूल खुलल.

डबा के एगो किसान के घरे जनमल ताराचंद यादव आसपास के कस्बा में पढ़ी के, तीन घंटा दूरी पर बसल जबलपुर गईने जहां से ऊ भूगोल में स्नातक कईने.

नब्बे के शुरु के दशक में जब यादव जी अपना बाऊ जी के मदद करे गांव लौट के अईने, गांव के बाकी माई बाप खातिर ऊ एगो उम्मीद रहने कि उनकर लईकन के पढ़ले में मदद करिहे. साल 1997 में मध्य प्रदेश सरकार के शिक्षाशाला योजना के तहत उनके 500 रुपया तनखाह मिले लागल. ए शिक्षा गारंटी योजना के अंतर्गत राज्य सरकार एगो प्राइमरी स्कूल शुरू करेले, अगर लईका के घर के एक किलोमीटर के अंदर कवनो स्कूल नईखे तब.

"हम पेड़ के नीचे पढ़ावल शुरू कईनी," यादव कहने. "फेर हमनी के झोपड़ी में गईनी.” ओकरी तीन साल के बाद स्कूल बनल, अउर ऊ मास्टर बने खातिर राज्य के सब परीक्षा पास कईने, फेर उनकर नियुक्ति भईल आ वेतन भी मिले लागल.

यादव जी कहेने कि उनकर पढ़वला के ढंग पहिले से बदल गईल बा. " पहिले हमनी के छात्रन के वर्णमाला, गिनती सब कुछ रटा के पढ़ावल जाव, लेकिन अब हमनी के कहेनी के दस धन एक, दस धन दू पढ़, ग्यारह बारह नाही. ऐसे बच्चा के गणित और आसानी से समझ आवेला." वर्णमाला के रटी के याद कईले से अच्छा एक अक्षर के अलग-अलग शब्द में चीन्हे के सिखावे के प्रयास होखे.

ई सब नया तरकीब हर दू महीना पर होखे वाला अध्यापक कौशल प्रशिक्षण के नतीजा ह. "हमनी के ओ सब के साथ सह शिक्षण भी कईल जाला, अउर ऊ लोग आपन कौशल आपन आपन सहकर्मी पर परखेने," आसिफ बेग बतावेने. दमोह में काम करे वाला एगो एनजीओ अज़ीम प्रेमजी फाउंडेशन में आसिफ काम करेने, जवन अध्यापक कौशल प्रशिक्षण के सहयोग करेला.

प्राइमरी स्कूल खतम होखला के बाद अधिकतर छात्र करीब पांच किलोमीटर दूर आवासीय विद्यालय में चली जाने. "जंगली धूल भरल रस्ता पर रोज आईल गईल कहां संभव बा, त लईका ओहिजा रही के पढ़ेने," यादव जी कहेने.

लेकिन तब्बो संख्या बढ़त नईखे. आदिवासी समाज से उच्च शिक्षा खातिर बस छ: प्रतिशत छात्र दाखिला लीहे, साल 2021 के ई रिपोर्ट कहेला.

बिजली के ना होखला से भी डबा दबाईल रही गईल. "हमन के खाली सोलर लाइट के इस्तेमाल कर रहल बानी. कब्बो कब्बो ई काम ना करेला. हमनी के बच्चन के राती के पढ़ल बड़ा मुश्किल हो गईल बा," 40 साल के किसान अभिभावक हरीश सिंह आदिवासी बतावेने.

तीस साल से स्कूल चल रहल बा, कुछ छात्र सरकारी नौकरी जईसे, पुलिस अउर अध्यापन में गईल बाने; बाकी कुछ कॉलेज डिग्री लेहले बाने. अध्यापक लोग अब गर्व से कहेला कि लईकी लोग अब देरी से बियाह कर रहल बा. ओकरी बावजूद एएसईआर 2022 के रिपोर्ट के हिसाब से मध्य प्रदेश में 17 प्रतिशत लईकी स्कूल नाही जाली, जवन बाकी राज्य से सबसे अधिक ह.

साल 2022 में, एमपी सरकार एगो नया योजना शुरू कईलस, जेके सीएम राइज कहल जाला - एमे नर्सरी से बारहवीं तक बड़ शिक्षण संस्थान खुली, अउर इहां से पांच से दस किलोमीटर तक रहे वाला छात्रन के एकर फायदा मिली. दमोह के तेंदूखेड़ा जवन आदिवासी विकास खंड ह, ओहिजा ई नवका स्कूल के निर्माण हो रहल बा.

एहिजा आदिवासी इलाका में स्कूल के वर्णन ओके ‘शिक्षक विहीनशाला’ बोल के कईल जाला. "अजीम प्रेमजी फाउंडेशन दमोह के डिस्ट्रीक्ट लीडर उपेंद्र सिंह बतावेने, "ए आदिवासी इलाका में जहां अध्यापक जाए में असमर्थ बाने, नीति आयोग के 2018 के योजना के अनुसार प्राइमरी, मिडिल आ इंटर कालेज के एक्के में मिला दिहल गईल. एके एक परिसर एक शाला के नाम से जानल जाला, अउर 16,076 कैंपस में 35,113 स्कूल के मिलावल गईल. ओमे से तकरीबन 75 प्रतिशत त एक से आठ तक के स्कूल रहे.

दूसरे शब्द में कहल जाव, त 19,037 स्कूल जवन ए इलाका चलत रहे, अब बंद हो गईल बा. उनके दूसरे स्कूल में मिला दिहल गईल, जवन दूरी तय कईल बच्चन आ उनकर माई बाप खातिर मुश्किल बा. सरकार के कहल ई बा कि ए तरीका से उनकरा के बढ़िया भवन, अच्छा संसाधन वाला स्कूल मिली गईल.

लेकिन उपेंद्र सिंह के लागेला कि नया तरीका से आदिवासी या जंगल के किनारे रहे वाला दूसर लईकन के भी जादे दूरी तय करे के पड़ी. "ढेर लईका नाम कटवा लिहे," ऊ चेतावेने.

ओहु पर इहो बा कि सहानुभूति आ संवेदना रखे वाला आपन समुदाय के मास्टरन के जगही, अब स्मार्ट बोर्ड आ शिक्षा से जुड़ल तकनीक ले ली, जेमें 2,000 से 3,000 छात्र पढ़ीहे. हालांकि, टेक्नोलॉजी के आपन आपन उपयोग बा, लेकिन ई गुरु चेला के रिश्ता के खा जाई, जवन पहिला पीढ़ी के छात्रन खातिर जरूरी बा, जईसे एहिजा के अधिकतर छात्र हवे.

यादव आ पटेल के रिटायर होखला में अबहिन कुछ साल बा, अउर ई लोग डबा के आखिरी अध्यापक रही जाई लोग. भारत के 54वां टाइगर रिजर्व ए गांव के साथ साथ चालीस अउर गांव लील रहल बा, जौन वीरांगना दुर्गावती टाइगर रिजर्व (वीडीटीआर) बनवले के चक्कर में होत बा.

वीडीटीआर का नौरादेही मूल रूप से लुप्तप्राय भारतीय ग्रे वुल्फ भेड़ियों के लिए बनाए गए दो अभयारण्यों में से एक के रूप में संरक्षित था. लेकिन बाघ, चीतों जैसी बड़ी बिल्लियों की प्रजातियों पर हमारे एकतरफ़ा ध्यान के कारण, अन्य सभी लुप्तप्राय प्रजातियों की उपेक्षा करते हुए, यह भी अब एक और टाइगर रिज़र्व बन गया है. लेकिन अब बाघों को भी बहुप्रचारित और शीघ्र ही आने वाले, नए आयातित चीतों के लिए जगह बनानी पड़ेगी. पढ़ें: ‘यह भेड़ियों का घर है, और हमें इसका ख़याल रखना है’

वीडीटीआर के नौरादेही शुरू से लुप्तप्राय भारतीय ग्रे वुल्फ भेड़िया खातिर बनावल गईल दू गो अभयारण्य में से एक के रूप में संरक्षित भईल रहे. बाकिर, बाघ अउर चीता जइसन बड़ी बिल्ली के प्रजाति पर एकतरफा ध्यान के वजह से, संकट में घिरल बाकी सब प्रजाति के उपेक्षा शुरू भईल, अउर अब इहो जगह टाइगर रिजर्व बन गइल बा. बाकी, अब बाघो के बहुत जल्दी इहवां आवे वाला चीता लोग खातिर जगह खाली करे के पड़ी. पढ़ीं: नौरादेही: ‘भेड़िया आइल, भेड़िया आइल’ अब केहू ना बोली

"स्कूल जाई, त हमनी के भी जाइल जाई," यादव जी कहने. लेकिन उनके उम्मीद बा कि उनकर छात्र नाम ना कटवईहे.

अशोक रानी के यकीन ह कि उनकर नाती नाम ना कटवाई. "जब हमनी के जाइल जाई आ जहां जाइल जाई, ई ओहिजा पढ़ी." ऊ पारी टीम से दृढ़ता से कहली, साथ में उनकर 8 साल के नाती मुड़ी हिला के सहमति दिहलस.

अनुवाद: अविनाश मिश्र