ಝುಮ್‌ ಗದ್ದೆಯಲ್ಲಿ ಗಬೀ ಅಡುಗೆ

“ನಾವು ಸಾಮನ್ಯವಾಗಿ ಇಲ್ಲಿ ಕೆಲಸಕ್ಕೆ ಬಂದ ಸಮಯದಲ್ಲಿ ಗಬೀ ತಯಾರಿಸುತ್ತೇವೆ” ಎನ್ನುತ್ತಾರೆ ರೈತರಾದ ಅಸಿನೋ ಮ್ಹೀಸಿಸೀನೋ ಮೆಯಾಸೆ. ಕಡಿಮೆ ಮಸಾಲೆ ಪದಾರ್ಥಗಳನ್ನು ಬೇಡುವ ಈ ಅಡುಗೆಯ ಸಾಮಾಗ್ರಿಗಳು ನಾಗಾಲ್ಯಾಂಡಿನ ಖೋನೊಮಾ ಎನ್ನುವ ಈ ಊರಿನಲ್ಲೇ ಸಿಗುತ್ತವೆ. ಮತ್ತು ಅವರು ಕೆಲಸ ಮಾಡುವ ಗದ್ದೆಯ ಸುತ್ತಮುತ್ತವೇ ಕೈಗೆಟುಕುತ್ತವೆ.

“ಕೆಲವು ಸಲ ನಾವು ಗಾಲ್ಹೋ ಕೂಡಾ ಮಾಡ್ತೀವಿ” ಎಂದು ಅವರು ಮಾತು ಮುಂದುವರೆಸುತ್ತಾ ಹೇಳಿದರು. ಇದೊಂದು ಸ್ಥಳೀಯವಾಗಿ ನೆಚ್ಚಿನ ಅನ್ನದ ಖಾದ್ಯ. ಸಾಮಾನ್ಯವಾಗಿ ಇದನ್ನು ಅನ್ನದ ಜೊತೆ ಹಸಿ ಸೊಪ್ಪು ಮತ್ತು ಅಥವಾ ಕಾಡು ತರಕಾರಿ, ಮತ್ತು ಸ್ಥಳೀಯ ಮಸಾಲೆ ಪದಾರ್ಥಗಳನ್ನು ಅನ್ನದೊಂದಿಗೆ ಬೇಯಿಸಿ ತಯಾರಿಸಲಾಗುತ್ತದೆ. ಅಲ್ಲದೆ ಸುಟ್ಟ ಹಂದಿ ಮತ್ತು ದನದ ಮಾಂಸವನ್ನು ಬಳಸಿಯೂ ತಯಾರಿಸಲಾಗುತ್ತದೆ. “ಇದು ಅಂಗಾಮಿ ಸಮುದಾಯದ ವಿಶೇಷ ಅಡುಗೆ” ಎಂದು 36 ವರ್ಷದ ಅಸಿನೋ ಪಾರಿಗೆ ತಿಳಿಸಿದರು.

ಆ ಹಿತವಾದ ಚಳಿಯ ಬೆಳಗಿನಲ್ಲಿ ಅಸಿನೊ ತನ್ನ ಗೆಳತಿಯಾದ ಉತ್ಸೊನೊ ಮೆರು ಜೊತೆಗೂಡಿ ಖೊನೊಮಾದ ಝುಮ್‌ ಗದ್ದೆಗಳತ್ತ ಕರೆದೊಯ್ಯುವ ಕಿರಿದಾದದ ಹಾದಿಯಲ್ಲಿ ನಡೆಯುತ್ತಿದ್ದರು. ನಾಗಾಲ್ಯಾಂಡ್‌ ರಾಜ್ಯದ ಬೆಟ್ಟಗುಡ್ಡಗಳ ಪ್ರದೇಶಗಳಲ್ಲಿ ಈ ಝುಮ್‌ ಕೃಷಿ ಬಹಳ ಸಾಮಾನ್ಯ. ದಾರಿಯುದ್ದಕ್ಕೂ ಹರಟುತ್ತಾ, ತಮಾಷೆ ಮಾಡುತ್ತಾ ಸಾಗುತ್ತಿದ್ದ ಅವರು ಅಲ್ಲಲ್ಲಿ ಸಿಗುತ್ತಿದ್ದ ಗಿಡಮೂಲಿಕೆ ಹಾಗೂ ಸೊಪ್ಪುಗಳನ್ನು ಕೊಯ್ದು ಒಟ್ಟುಗೂಡಿಸುತ್ತಿದ್ದರು. "ನಾವಿಬ್ಬರೂ ಬೆಸ್ಟ್ ಫ್ರೆಂಡ್ಸ್. ಒಟ್ಟಿಗಿದ್ದಾಗ ಸಿಗುವಷ್ಟು ಸಂತೋಷ ಬೇರೆಲ್ಲೂ ಸಿಗೋದಿಲ್ಲ" ಎಂದು ಅಸೊನೊ ನಸುನಗುತ್ತಾ ಹೇಳಿದರು. ಬಾಲ್ಯ ಸ್ನೇಹಿತರಾದ ಇವರಿಬ್ಬರು ಕೆಲಸದ ಸಮಯವನ್ನು ಹೊಂದಿಸಿಕೊಂಡು ಒಟ್ಟಿಗೆ ಝುಮ್‌ ಗದ್ದೆಗಳಿಗೆ ದುಡಿಯಲು ತೆರಳುತ್ತಾರೆ.

42 ವರ್ಷದ ಉತ್ಸೊನೊ, ತಮ್ಮ ಕೈಯಲ್ಲಿದ್ದ ತಾಜಾ ಗಿಡಮೂಲಿಕೆಗಳ ಕಟ್ಟನ್ನು ತೋರಿಸುತ್ತಾ ಅವುಗಳ ಹೆಸರನ್ನು ಟೈನಿಡೀ ಭಾಷೆಯಲ್ಲಿ ಪಟಪಟನೆ ಹೇಳಿದರು: ಗಾಥಾ (ಫಿಶ್ ಮಿಂಟ್), ಗಾಗೆಯಿ (ಹಿಮಾಲಯನ್ ನಾಟ್‌ವೀಡ್), ಖಮ್ಹು (ಜಂಗಲ್ ಪೆರಿಲ್ಲಾ) ಮತ್ತು ಗಾಕ್ರಾ (ಜಾವಾ ವಾಟರ್ ಡ್ರಾಪ್‌ವರ್ಟ್).

ನಾವು ಗಾಥಾ ಸೊಪ್ಪನ್ನು ಕಿಂಗ್‌ ಚಿಲ್ಲಿ (ಒಂದು ಜಾತಿಯ ಮೆಣಸು) ಸೇರಿಸಿ ಚಟ್ನಿ ಮಾಡಿ ಅದನ್ನು ಗಬೀ ಜೊತೆ ತಿನ್ನುತ್ತೇವೆ. ಉಳಿದ ಸೊಪ್ಪುಗಳನ್ನು ಗಬೀ ತಯಾರಿಯಲ್ಲಿ ಬಳಸುತ್ತೇವೆ. ಅಡುಗೆ ಮಾಡಿ ಉಳಿದ ಸೊಪ್ಪನ್ನು ಮನೆಗೆ ತೆಗೆದುಕೊಂಡು ಹೋಗುತ್ತೇವೆ" ಎಂದು ಅವರು ವಿವರಿಸಿದರು.

ಅದು ಫೆಬ್ರವರಿ ತಿಂಗಳ ಕೊನೆಯ ದಿನಗಳು ಖೊನೊಮಾ ಗ್ರಾಮದ ಅಸಿನೊ ಮತ್ತು ಉತ್ಸೊನೊ ರೀತಿಯ ರೈತರು ತಮ್ಮ ಝುಮ್‌ ಗದ್ದೆಗಳಲ್ಲಿ ಆಲೂಗಡ್ಡೆ ಬಿತ್ತನೆಯಲ್ಲಿ ತೊಡಗಿದ್ದರು. ಕೆಲಸ ಹೆಚ್ಚಿರುವ ದಿನಗಳಲ್ಲಿ ಅವರು ಮಧ್ಯಾಹ್ನದ ಊಟಕ್ಕಾಗಿ ಒಟ್ಟಿಗೆ ಸೇರಿ ಅಡುಗೆ ಮಾಡುತ್ತಾರೆ. "ಮನೆಯಿಂದ ಅನ್ನ, ಹಂದಿ ಕೊಬ್ಬಿನ ತುಪ್ಪ, ಕಿಂಗ್‌ ಚಿಲ್ಲಿ, ಹುಳಿ ಬಂದ ಸೋಯಾಬೀನ್‌ ಪೇಸ್ಟ್‌ ಮತ್ತು ಉಪ್ಪನ್ನು ತಂದಿರುತ್ತೇವೆ" ಎನ್ನುತ್ತಾ ಅಸಿನೊ ತಾನು ಬೆಳಗ್ಗೆ ಆಯ್ದು ತಂದಿದ್ದ ನಾಲ್ಕು ಬಗೆಯ ಸೊಪ್ಪುಗಳನ್ನು ಆರಿಸತೊಡಗಿದರು. ಓದಿ: ರಾತ್ರಿ ಊಟದ ತಟ್ಟೆಯ ಅನ್ನ ಹುಡುಕುತ್ತಾ

ಪೂರ್ವ ಹಿಮಾಲಯದಲ್ಲಿರುವ ಖೋನೋಮಾ ಗ್ರಾಮವು ಸಣ್ಣ ಇಳಿಜಾರು ಹಾಗೂ ಕಡಿದಾದ ಬೆಟ್ಟಗುಡ್ಡಗಳನ್ನು ಹೊಂದಿದ್ದು, ದಟ್ಟವಾದ ಹಸಿರು ಕಾಡುಗಳಿಂದ ಆವೃತವಾಗಿದೆ. ಅಳಿವಿನಂಚಿನಲ್ಲಿರುವ ರಾಜ್ಯದ ಹಕ್ಕಿ ಬ್ಲಿತ್ಸ್ ಟ್ರ್ಯಾಗೋಪನ್ ಇಲ್ಲಿ ಕಂಡುಬರುತ್ತದೆ. ಊರಿನ ಬಹುತೇಕ ಪ್ರತಿಯೊಬ್ಬರೂ ಕೃಷಿ ಮಾಡುತ್ತಾರೆ, ಮತ್ತು ಅಸಿನೊ ಹಾಗೂ ಉತ್ಸೊನೊ ಇಬ್ಬರೂ ತಲಾ ಸುಮಾರು 50 ಚದರ ಮೀಟರ್ ಅಳತೆಯ ಭೂಮಿಯನ್ನು ಹೊಂದಿದ್ದಾರೆ.

"ವರ್ಷದ ಬೇರೆ ಟೈಮಲ್ಲೂ ಬೇರೆ ಬೇರೆ ಬಗೆಯ ಕಾಡು ತರಕಾರಿಗಳು ಬೆಳೆಯುತ್ತವೆ, ಆದರೆ ಮಳೆಗಾಲದಲ್ಲಿ ಅವು ದೊಡ್ಡ ಪ್ರಮಾಣದಲ್ಲಿ ಸಿಗುತ್ತವೆ. ಬಳಸಿ ಉಳಿದ ಗಾಗೆಯಿ (ಹಿಮಾಲಯನ್ ನಾಟ್‌ವೀಡ್, ಕೊಯೆನಿಜಿಯಾ ಪಾಲಿಸ್ಟಾಕಿಯಾ), ಗಾಥಾ (ಫಿಶ್ ಮಿಂಟ್, ಹೌಟ್ಟುನಿಯಾ ಕಾರ್ಡೇಟಾ), ಮತ್ತು ಗನ್ಯಾನ್ಯು (ಮಿಚಿಂಗಾ, ಜಾಂಥೊಕ್ಸೈಲಮ್ ರೆಟ್ಸಾ) ತರಹದ ಕಾಡು ತರಕಾರಿಗಳನ್ನು ಸ್ಥಳೀಯ ವ್ಯಾಪಾರಿಗಳಿಗೆ ಕಂತೆಯೊಂದಕ್ಕೆ 10ರಿಂದ 20 ರೂಪಾಯಿಗಳಂತೆ ಮಾರಾಟ ಮಾಡುತ್ತೇವೆ" ಎಂದು ಅಸಿನೊ ಹೇಳುತ್ತಾರೆ.

ಈ ಊರು 1,943 ಜನರಿಗೆ (2011ರ ಜನಗಣತಿ) ನೆಲೆಯಾಗಿದ್ದು, ಇವರಲ್ಲಿ ಬಹುತೇಕರು ಅಂಗಾಮಿ ಬುಡಕಟ್ಟಿಗೆ ಸೇರಿದವರು. ಈ ಗ್ರಾಮವು ಖೇಲ್‌ ಕುಲಾಧರಿತ ನೆಲೆಯಾಗಿ ಸಂಘಟಿತಗೊಂಡಿದೆ. ಇಲ್ಲಿನ ಜನರು ಟೆನ್ಯಿಡಿ ಭಾಷೆ ಮಾತನಾಡುತ್ತಾರೆ - ಇದೊಂದು ಪ್ರಮುಖ ಟಿಬೆಟೊ-ಬರ್ಮನ್ ಭಾಷೆಯಾಗಿದ್ದು, ಅಂಗಾಮಿ ಭಾಷೆ ಎಂದೂ ಕರೆಯಲ್ಪಡುತ್ತದೆ. ಇದನ್ನು ಮುಖ್ಯವಾಗಿ ನಾಗಾಲ್ಯಾಂಡ್‌ ರಾಜ್ಯದ ಕೊಹಿಮಾ ಜಿಲ್ಲೆಯಲ್ಲಿ 1.5 ಲಕ್ಷಕ್ಕೂ ಹೆಚ್ಚು ಜನರು ಮಾತನಾಡುತ್ತಾರೆ.

ಇಲ್ಲಿನ ಭೂಪ್ರದೇಶವನ್ನು ವಿಶಾಲವಾಗಿ ಮೂರು ವಲಯಗಳಾಗಿ ವಿಂಗಡಿಸಲಾಗಿದೆ. ಮೇಲ್ಭಾಗದ ಇಳಿಜಾರುಗಳು ಕಾಡುಗಳಿಂದ ಆವೃತವಾಗಿದ್ದು, ಸುಮಾರು 20ರಿಂದ 25 ಚದರ ಕಿಲೋಮೀಟರುಗಳಷ್ಟು ದಟ್ಟವಾದ ಅರಣ್ಯ ಪ್ರದೇಶವನ್ನು ಸಂರಕ್ಷಿಸುವ ಖೋನೋಮಾ ಪ್ರಕೃತಿ ಸಂರಕ್ಷಣೆ ಮತ್ತು ಟ್ರ್ಯಾಗೋಪನ್ ಅಭಯಾರಣ್ಯವನ್ನು ಒಳಗೊಂಡಿದೆ. 1998ರಲ್ಲಿ, ಖೋನೋಮಾದ ಜನರು ತಮ್ಮ ಅರಣ್ಯದ ಬಹುದೊಡ್ಡ ಭಾಗವನ್ನು ಸಮುದಾಯ ಸಂರಕ್ಷಿತ ಮೀಸಲು ಪ್ರದೇಶವಾಗಿ ಸ್ವಯಂಪ್ರೇರಿತರಾಗಿ ಮೀಸಲಿಟ್ಟರು, ಇದು ಗ್ರಾಮಕ್ಕೆ ಭಾರತದ ಮೊದಲ ಹಸಿರು ಗ್ರಾಮ ಎನ್ನುವ ಮಾನ್ಯತೆಯನ್ನು ತಂದುಕೊಟ್ಟಿತು ಎಂದು ಖೊನೊಮಾ ಪರಿಸರ ಪ್ರವಾಸೋದ್ಯಮ ನಿರ್ವಹಣಾ ಸಮಿತಿಯಲ್ಲಿ ಸ್ವತಂತ್ರ ಮಾರ್ಗದರ್ಶಕರಾಗಿ ಕಾರ್ಯನಿರ್ವಹಿಸುತ್ತಿರುವ ಸ್ಥಳೀಯ ನಿವಾಸಿ ಖ್ರೀಬು ಮೇಯಾಸೆ ಹೇಳಿದರು.

ಮಧ್ಯಭಾಗದ ಇಳಿಜಾರುಗಳನ್ನು ಝುಮ್‌ ಬೇಸಾಯಕ್ಕಾಗಿ ಮೀಸಲಿಡಲಾಗಿದ್ದು, ಇದರಲ್ಲಿ ಅಸಿನೊ ಮತ್ತು ಉತ್ಸುನೊ ಅವರಿಗೂ ಪಾಲಿದೆ. ಇಲ್ಲಿನ ರೈತರು ಸಾಂಪ್ರದಾಯಿಕ ಅಲ್ಡರ್-ಆಧಾರಿತ ಝುಮ್‌ ಬೇಸಾಯ ಪದ್ಧತಿಯನ್ನು ಅನುಸರಿಸುತ್ತಾರೆ. ಇದು ನಾಗಾಲ್ಯಾಂಡ್‌ ರಾಜ್ಯದ ರಾಜ್ಯ ವೃಕ್ಷವಾದ, ಸಾರಜನಕವನ್ನು ಸ್ಥಿರೀಕರಿಸುವ ಅಲ್ಡರ್ ಮರಗಳನ್ನು (ಅಲ್ನಸ್ ನೆಪಲೆನ್ಸಿಸ್) ಒಳಗೊಂಡಿರುವ ಒಂದು ಸ್ಥಳೀಯ ಕಾಡುಕೃಷಿ ಪದ್ಧತಿ.

ಇಲ್ಲಿನ ರೈತರು ಬೇಸಾಯಕ್ಕೆಂದು ಭೂಮಿ ಸಿದ್ಧಪಡಿಸುವಾಗ ಮರಗಳನ್ನು ಬುಡಸಮೇತ ಕಡಿಯುವುದಿಲ್ಲ. ಮರ ಮತ್ತೆ ಚಿಗುರುವಂತೆ ಮಾಡಲು ಅದರ ಮುಖ್ಯ ಕಾಂಡವನ್ನು ನೆಲದಿಂದ ಎರಡು ಮೀಟರ್‌ ಎತ್ತರಕ್ಕೆ ಆಗಾಗ ಕತ್ತರಿಸುತ್ತಾರೆ. "ನಮ್ಮ ಹೊಲಗಳ ಸುತ್ತಲಿನ ಅಲ್ಡರ್ ಮರಗಳು ಸುಮಾರು ನಲವತ್ತು ವರ್ಷ ಹಳೆಯವು. ಕೆಲವು ಮರಗಳಂತೂ ನೂರು ವರ್ಷಕ್ಕಿಂತಲೂ ಹಿಂದಿನವು" ಎನ್ನುತ್ತಾರೆ ಅಸಿನೊ.

ಈ ಪದ್ಧತಿಯು ನೈಸರ್ಗಿಕವಾಗಿಯೇ ಮಣ್ಣಿನ ಫಲವತ್ತತೆಯನ್ನು ಹೆಚ್ಚಿಸುತ್ತದೆ. ಇದು ಸಾಂಪ್ರದಾಯಿಕ ಸ್ಥಳಾಂತರ ಕೃಷಿಯಲ್ಲಿ ಸಾಮಾನ್ಯವಾಗಿರುವ ದೀರ್ಘಾವಧಿಯವರೆಗೆ ಭೂಮಿಯನ್ನು ಪಾಳು ಬಿಡುವ ಅಗತ್ಯವನ್ನು ಕಡಿಮೆ ಮಾಡುತ್ತದೆ.

"ವಸಂತ ಮಾಸ ಮತ್ತು ಬೇಸಗೆಯ ಆರಂಭದ ದಿನಗಳಲ್ಲಿ ಮುಖ್ಯವಾಗಿ ನಾವು ಆಲೂಗಡ್ಡೆ ಬೆಳೆಯುತ್ತೇವೆ. ಜೊತೆಗೆ ಬೇಸಗೆಯಲ್ಲಿ ಝುಮ್‌ ಗದ್ದೆಗಳಲ್ಲಿ ಜೋಳ, ಸಿರಿಧಾನ್ಯಗಳು, ಕುಂಬಳಕಾಯಿ, ಸೌತೆಕಾಯಿ, ಮೆಣಸಿನಕಾಯಿ ಹಾಗೂ ಇತರ ಬೆಳೆಗಳನ್ನು ಬೆಳೆಯುತ್ತೇವೆ" ಎಂದು ಉತ್ಸೊನೊ ಪಾರಿಗೆ ತಿಳಿದರು.

"ನಮಗೆ ಬೇಕಾಗುವಷ್ಟನ್ನು ಇಟ್ಟುಕೊಂಡು ಉಳಿಯುವ ಎಲ್ಲ ಬೆಳೆಯನ್ನೂ ಸ್ಥಳೀಯ ವ್ಯಾಪಾರಿಗಳಿಗೆ ಮಾರಾಟ ಮಾಡುತ್ತೇವೆ, ಅವರು ಅದನ್ನು ಕೊಹಿಮಾಗೆ ಕಳುಹಿಸುತ್ತಾರೆ" ಎಂದು ಅವರು ಹೇಳಿದರು. ಈ ಕೃಷಿಯಿಂದ ವರ್ಷಕ್ಕೆ ಸುಮಾರು 40,000 ರೂ. ಆದಾಯ ಸಿಗುವುದಾಗಿ ಇಬ್ಬರೂ ಮಹಿಳೆಯರು ಹೇಳಿದರು. ಇವರ ಗಂಡಂದಿರೂ ಕೃಷಿಕರಾಗಿದ್ದು, ಅರೆಕಾಲಿಕವಾಗಿ ಡ್ರೈವರ್‌ ಕೆಲಸವನ್ನೂ ಮಾಡುತ್ತಾರೆ, ಆ ಮೂಲಕ ಅವರು ವರ್ಷಕ್ಕೆ ಸುಮಾರು ಒಂದು ಲಕ್ಷ ರೂಪಾಯಿ ಸಂಪಾದಿಸುತ್ತಾರೆ.

ಮೆಟ್ಟಿಲು ಮಾದರಿಯ ಭತ್ತದ ಕೃಷಿಗೆ ಮೀಸಲಾಗಿರುವ ಗ್ರಾಮದ ಕೆಳ ಇಳಿಜಾರುಗಳತ್ತ ಕೈತೋರಿಸುತ್ತಾ, "ನಮ್ಮಲ್ಲಿ ಭತ್ತದ ಗದ್ದೆಗಳೂ ಇವೆ" ಎಂದು ಅಸಿನೊ ಹೇಳಿದರು. ಭತ್ತದ ಕೊಯ್ಲು ಅಕ್ಟೋಬರ್ ಸುಮಾರಿಗೆ ನಡೆಯಲಿದ್ದು, ರೈತರು ಜಿಗುಟು ಅಕ್ಕಿ ಸೇರಿದಂತೆ ಹಲವು ಸಾಂಪ್ರದಾಯಿಕ ತಳಿಗಳನ್ನು ಬೆಳೆಯುತ್ತಾರೆ. ಓದಿ ಮತ್ತು ನೋಡಿ: ಚಾಂಗ್ಕಿಯಲ್ಲೊಂದು ಮಿಪಾಂಗ್‌ಮಿಂಗ್ ಹಬ್ಬ

ಮಧ್ಯಾಹ್ನದ ಊಟದ ಸಮಯ ಇನ್ನೇನು ಹತ್ತಿರದಲ್ಲಿತ್ತು. ಉತ್ಸೊನೊ ಕಾಡಿನಿಂದ ಸಂಗ್ರಹಿಸಿ ತಂದ ತರಕಾರಿಗಳನ್ನು ಸ್ವಚ್ಛಗೊಳಿಸಿ ಸಿದ್ಧಪಡಿಸಿಟ್ಟಿದ್ದರು. ಇತ್ತ ಅಸಿನೊ ಒಲೆಯ ಉರಿಯನ್ನು ಸರಿಪಡಿಸುತ್ತಿದ್ದರು. ನಂತರ ಅವರು ಬೆಂಕಿಯ ಮೇಲೊಂದು ದೊಡ್ಡ ಪಾತ್ರೆಯಲ್ಲಿ ಡ್ಜು (ನೀರು) ಇಟ್ಟು ಒಂದೊಂದಾಗಿ ಪದಾರ್ಥಗಳನ್ನು ಸೇರಿಸಲಾರಂಭಿಸಿದರು. ಮೊದಲಿಗೆ ಚೂಸಿ (ಮೆಣಸಿನಕಾಯಿ), ನಂತರ ಮೆತ್ಸಿಯೆ (ಉಪ್ಪು), ಆ ಬಳಿಕ ಝತಿ (ಹುದುಗಿಸಿದ ಸೋಯಾಬೀನ್ ಪೇಸ್ಟ್) ಮತ್ತು ಥೆವೊಪಿ (ಹಂದಿ ಕೊಬ್ಬು) ಸೇರಿಸಿ ಬೆರೆಸಿದರು. ಅವು ಕುದಿಯತೊಡಗಿದಂತೆ ಗಾಳಿಯಲ್ಲಿ ಈ ಮಸಾಲೆ ವಾಸನೆ ಹರಡತೊಡಗಿತು. ಇದರ ನಂತರ ಅವರು ಕೊಯ್ದು ತಂದ ಹಸಿ ಸೊಪ್ಪುಗಳನ್ನು ಅದಕ್ಕೆ ಬೆರೆಸಿದರು.

ಪಾತ್ರೆಯೊಳಗೆ ಸೌಟು ಹಾಕಿ ತಿರುಗಿಸುತ್ತಾ, "ಇದನ್ನು ಹೆಚ್ಚು ಹೊತ್ತು ಒಲೆಯ ಮೇಲಿಟ್ಟು ಬೇಯಿಸಬಾರದು. ಹಾಗೆ ಬೇಯಿಸಿದರೆ ಸೊಪ್ಪುಗಳ ರುಚಿ ಮತ್ತು ಪರಿಮಳವನ್ನು ಕಳೆದುಕೊಳ್ಳುತ್ತವೆ" ಎಂದು ಉತ್ಸುನೊ ಮಾಹಿತಿ ನೀಡಿದರು. ತರಕಾರಿಗಳು ಹದವಾಗಿ ಬೆಂದ ನಂತರ, ಅದಕ್ಕೆ ಮೊದಲೇ ಬೇಯಿಸಿಟ್ಟುಕೊಂಡಿದ್ದ ಅನ್ನವನ್ನು ಸೇರಿಸಿ ಪಾತ್ರೆಯ ಮುಚ್ಚಳ ಮುಚ್ಚಿದರು. ಆ ಎಲ್ಲಾ ಪದಾರ್ಥಗಳ ರುಚಿ ಮತ್ತು ಪರಿಮಳಗಳು ಅನ್ನದೊಂದಿಗೆ ಹದವಾಗಿ ಬೆರೆಯಲು ಸ್ವಲ್ಪ ಹೊತ್ತು ಹಾಗೆಯೇ ಬಿಡಲಾಯಿತು.

ಇತ್ತ ಅಸಿನೊ ಅಪಾಯಕಾರಿ ತೀಕ್ಷ್ಣತೆಯುಳ್ಳ ರಾಜಾ ಮಿರ್ಚಾವನ್ನು (ಕಿಂಗ್ ಚಿಲ್ಲಿ) ಬರಿಗೈಯಿಂದ ಮುಟ್ಟದಂತೆ ಎಚ್ಚರವಹಿಸುತ್ತಾ ಜಾಗರೂಕತೆಯಿಂದ ಹೆಚ್ಚತೊಡಗಿದರು. ಈ ಮೆಣಸಿನಕಾಯಿಯನ್ನು ಅಸ್ಸಾಂನ ಕೆಲವು ಭಾಗಗಳಲ್ಲಿ ಅದರ ತೀವ್ರ ಖಾರ ಮತ್ತು ಉರಿಯ ಕಾರಣಕ್ಕಾಗಿ ಭೂತ್ ಜೊಲೋಕಿಯಾ (ಭೂತದ ಮೆಣಸು) ಎಂದೂ ಕರೆಯಲಾಗುತ್ತದೆ. ರಾಜಾ ಮಿರ್ಚಾ ತನ್ನ ಘಾಟು ಮತ್ತು ಖಾರದ ಖ್ಯಾತಿಗೆ ತಕ್ಕಂತೆಯೇ ಇದೆ. ವಿಶ್ವದ ಅತ್ಯಂತ ಖಾರವಾದ ಮೆಣಸಿನಕಾಯಿಗಳಲ್ಲಿ ಒಂದಾಗಿ ಸ್ಥಾನ ಪಡೆದಿರುವ ಇದು, ಅನೇಕ ನಾಗಾ ಸಮುದಾಯಗಳ ಅಡುಗೆಮನೆಗಳಲ್ಲಿ ಬದಲಿಸಲಾಗದ ಸ್ಥಾನವನ್ನು ಪಡೆದಿದೆ. "ಈ ಮೆಣಸು ಇಲ್ಲದೆ ಅಡುಗೆ ಮಾಡುವುದನ್ನು ಕಲ್ಪಿಸಿಕೊಳ್ಳುವುದು ಕೂಡಾ ಸಾಧ್ಯವಿಲ್ಲ" ಎಂದು ಮುಗುಳ್ನಗುತ್ತಲೇ ಹೇಳಿದ ಅಸಿನೊ, "ಇದು ಕೊಡುವ ಆ ತೀವ್ರ ಖಾರದ ಅನುಭವ ನಮಗೆ ಬಹಳ ಇಷ್ಟ" ಎಂದರು. ಅದು ಎಷ್ಟರಮಟ್ಟಿಗೆ ಕಿಕ್‌ ಹತ್ತಿಸುತ್ತದೆ ಎನ್ನುವುದನ್ನು ಈ ವರದಿಗಾರರು ಸ್ವಲ್ಪ ಹೊತ್ತಿನಲ್ಲೇ ಅನುಭವಿಸಲಿದ್ದರು.

ಅಸಿನೊ ಇದನ್ನು ನುಣ್ಣಗೆ ಹೆಚ್ಚಿದ ಗಥಾ (ಫಿಶ್ ಮಿಂಟ್), ಝತಿ (ಹುಳಿ ಬರಿಸಿದ ಸೋಯಾಬೀನ್ ಪೇಸ್ಟ್) ಮತ್ತು ಉಪ್ಪಿನೊಂದಿಗೆ ಜಾಣ್ಮೆಯಿಂದ ಬೆರೆಸಿ ಅತ್ಯಂತ ತೀಕ್ಷ್ಣ, ಖಾರವಾದ ಚಟ್ನಿಯನ್ನು ತಯಾರಿಸಿದರು.

ಆ ಇಬ್ಬರು ಸ್ನೇಹಿತೆಯರು ನಮಗೂ ಊಟ ಮಾಡುವಂತೆ ಒತ್ತಾಯಿಸಿದರು. ಅವರು ಒಲೆಯ ಸೌದೆ ತುಂಡುಗಳನ್ನೇ ಬಳಸಿ ಒಂದಷ್ಟು ಚಮಚಗಳನ್ನು ತಯಾರಿಸಿದರು. ಎಲ್ಲರೂ ಅವರು ತಯಾರಿಸಿದ್ದ ಊಟದ ಸುತ್ತ ಕುಳಿತೆವು. ಈ ಗೆಬೀ ನೋಡಲು ಸರಳವಾಗಿ ಕಂಡರೂ ಇದರ ರುಚಿ ಮಾತ್ರ ಅಸಾಧಾರಣವಾಗಿತ್ತು. ಹಂದಿ ಕೊಬ್ಬು ಮತ್ತು ಹುಳಿ ಬರಿಸಿದ ಸೋಯಾಬೀನ್ ಪೇಸ್ಟ್‌ ಜೊತೆ ಬೆಂದ ಕಾಡು ಸೊಪ್ಪುಗಳ ಮಣ್ಣಿನ ಘಮದ ರುಚಿಯನ್ನು, ಆ ಮಾಂಸದ ಸಾರಿನ ಸಮೃದ್ಧ ಸವಿಯನ್ನು ಕೊಡುತ್ತಿತ್ತು. ಜತೆಗೆ ಫಿಶ್ ಮಿಂಟ್ ಮತ್ತು ಕಿಂಗ್ ಚಿಲ್ಲಿಯ ತೀವ್ರ ಖಾರ ಹಾಗೂ ಮೀನಿನಂತಹ ಘಾಟಿನ ಚಟ್ನಿ ಇದರ ರುಚಿಯನ್ನು ಹೆಚ್ಚಿಸಿ ನಾಲಿಗೆಗೆ ಚುರುಕು ಮುಟಿಸುತ್ತಿತ್ತು.

ಆದರೆ ಕೆಲವೇ ತುತ್ತುಗಳನ್ನು ತಿಂದ ನಂತರ, ಸದ್ದಿಲ್ಲದೆ ಸ್ವಲ್ಪ ದೂರಕ್ಕೆ ಸರಿದು ಕುಳಿತೆ. ನನ್ನ ಕಣ್ಣುಗಳಿಂದ ನೀರು ಸುರಿಯುತ್ತಿತ್ತು ಮತ್ತು ಬಿಕ್ಕಳಿಕೆ ಕಾಡತೊಡಗಿತು. ಕಿಂಗ್ ಚಿಲ್ಲಿ ನಾನು ಊಹಿಸಿದ್ದಕ್ಕಿಂತಲೂ ಎಷ್ಟೋ ಪಟ್ಟು ಹೆಚ್ಚು ಘಾಟು ಮತ್ತು ಖಾರವನ್ನು ಹೊಂದಿತ್ತು. ಆದರೂ ನನ್ನ ನಾಗಾ ಆತಿಥೇಯರ ಮುಂದೆ ಸೋಲೊಪ್ಪಿಕೊಳ್ಳಬಾರದು ಎಂದು ಪಣತೊಟ್ಟ ನಾನು, ಅವರಿಂದ ಸ್ವಲ್ಪ ಅಂತರ ಕಾಯ್ದುಕೊಂಡು, ಪ್ರತಿಯೊಂದು ತುತ್ತಿನಲ್ಲೂ ನಿಧಾನವಾಗಿ ಸಾವರಿಸಿಕೊಳ್ಳುತ್ತಾ ಊಟವನ್ನು ಮುಗಿಸಿದೆ.

ಊಟ ಮುಗಿಯುತ್ತಿದ್ದ ಹಾಗೆ, ಅಲ್ಲಿದ್ದ ಇತರ ರೈತರು ತಮ್ಮ ಗದ್ದೆಗಳತ್ತ ಹೊರಡತೊಡಗಿದರು. "ನಮ್ಮ ಊರಿನಾಚೆಗಿನ ಜಗತ್ತನ್ನು ನೋಡುವ ಆಸೆಯಿದೆ ನಮಗೆ. ಆದರೆ ಊರನ್ನು ಬಿಟ್ಟು ಇನ್ನೆಲ್ಲೋ ಬದುಕುವುದನ್ನು ನಮ್ಮಿಂದ ಕಲ್ಪಿಸಿಕೊಳ್ಳುವುದು ಕೂಡ ಸಾಧ್ಯವಿಲ್ಲ. ಇದೇ ನಮ್ಮ ನೆಲೆ" ಎಂದು ಗೆಳತಿಯರಿಬ್ಬರೂ ಹೇಳಿದರು.

ಟೆನ್ಯಿಡಿಯೆ ಭಾಷಾ ಅನುವಾದದಲ್ಲಿ ಉದಾರವಾಗಿ ನೆರವಾದ ಖ್ರೀಬು ಮೇಯಸೆ ಮತ್ತು ರೊಕೊಸತೊ ಚೂಚಾ ಅವರಿಗೆ ಈ ವರದಿಗಾರರು ಹೃತ್ಪೂರ್ವಕ ಧನ್ಯವಾದಗಳನ್ನು ಅರ್ಪಿಸುತ್ತಾರೆ.