پانچ عورتیں اور پچیسی کا کھیل

’’آہ ہ ہ!‘‘ ان پانچوں کے منہ سے ایک ساتھ نکلی غیر یقینی اور مایوسی کی آواز، اور اس کے فوراً بعد ان کا قہقہہ اُس گلی کی خاموشی کو توڑ دیتا ہے۔ ظاہر ہے، ہم پھر سے خود کو بیوقوف بنا بیٹھے تھے۔ چاروں چیرے ہوئے املی کے بیج سپاٹ گرنے کے بعد چار الگ الگ سمتوں میں بکھر گئے تھے۔ ہمیں انہیں اُس طرح نہیں اُچھالنا تھا جیسے لوڈو کے کھیل میں پانسہ کو اُچھالا جاتا ہے۔ ہالمّہ فوراً بیچ میں آ کر صحیح طریقہ بتاتی ہیں۔ وہ ہمیں غور سے دیکھنے کو کہتی ہیں، پھر وہ بیجوں کو سمیٹ کر کلائی کے ایک تیز، لیکن ہلکے سے گھماؤ کے ساتھ اچھالتی ہیں، جیسے کوئی لیگ اسپِن گیند باز گوگلی کرتا ہے۔

اس بار بیج حسب توقع الگ الگ طرح سے نیچے گرتے ہیں – کچھ اپنے سپاٹ، سفید پیٹ اوپر کی طرف کیے ہوئے۔ جتنے بیجوں کے پیٹ اوپر ہیں، اس کے حساب سے المنہ اپنی گوٹی آگے بڑھاتی ہیں۔ گوٹی ٹوٹی ہوئی، گہرے ہرے رنگ کی کانچ کی چوڑی کا ایک ٹکڑا ہے۔ ’’ایک گرتا ہے تو ایک، دو گرتا ہے تو دو، تین گرتا ہے تو تین، چار گرتا ہے تو چار،‘‘ وہ سمجھاتی ہیں۔ باہر سے آئیں دو نوآموز کھلاڑیوں کو، جنہیں کنّڑ زبان بہت کم یا بالکل نہیں آتی، کھیل سمجھانے کی ایک اور کوشش میں وہ ٹوٹی پھوٹی ہندی میں بات کرتی ہیں۔ وہ رنگے ہوئے خانوں پر ’ہماری‘ گوٹی آگے بڑھاتی ہیں اور پھر سے املی کے بیج اچھالتی ہیں۔ اب ان کی باری ہے۔

’’ہم نے انہیں اپنے گھر بنائے ہیں،‘‘ ہالمّہ ۵ ضرب ۵ کے کناروں پر بنے چار کراس والے خانوں کی طرف اشارہ کرتے ہوئے کہتی ہیں۔ یہ ڈھانچہ اور اس کے خانے گاؤں کے مندر کے پیچھے بنے ایک اونچے چبوترے کی گرد آلود ٹائلوں پر رنگے ہوئے ہیں، جہاں وہ بیٹھ کر کھیلتی ہیں۔ ہر کراس والا خانہ ایک کھلاڑی کا ’گھر‘ ہوتا ہے۔ ہر گھر میں اُس کھلاڑی کی چار گوٹیاں ہوتی ہیں، جنہیں چوڑی کے ٹکڑوں کے الگ الگ رنگوں یا سائزوں سے پہچانا جاتا ہے۔ املی کے بیج (پانسہ) پھینکنے پر کھلاڑی طے کرتا ہے کہ کس گوٹی کو آگے بڑھانا ہے۔ اس میں کچھ حکمت عملی بھی نظر آتی ہے، لیکن ہمیں وہ سمجھ میں نہیں آتی۔ بیچ میں بنا ایک کراس والا خانہ ہمارے لیے اب بھی ایک راز بنا رہتا ہے۔

’’جب کسی کھلاڑی کی تمام گوٹیاں بیچ والے کراس تک پہنچ جاتی ہیں، تو کھیل ختم ہو جاتا ہے،‘‘ ناگ راج بتاتے ہیں۔ وہ پچاس کے آس پاس کی عمر کے ایک تماش بین ہیں، جو عورتوں کے پیچھے خاموشی سے بیٹھے ہوئے ہیں، اور اب بات سمجھانے کے لیے اچانک سرگرم ہو جاتے ہیں۔ ’’دھان کے کھیتوں میں کام کرنے اور دوپہر کا کھانا کھانے کے بعد وہ یہاں کھیلنے کے لیے اکٹھا ہوتی ہیں۔ گھر کے اندر تفریح کا کوئی ذریعہ نہیں ہے۔ نہ بجلی، نہ ٹیلی ویژن۔ اس لیے وہ چار بجے تک کھیلتی رہتی ہیں،‘‘ وہ بتاتے ہیں۔

ہالمّہ املی کے بیج ہمارے ہاتھوں میں پکڑا دیتی ہیں۔ ہمیں پھر سے کھیل میں کھینچ لاتی ہیں۔ خود کو ثابت کرنے کا یہ ایک اور موقع ہے۔ اس بار بیج رنگے ہوئے بورڈ پر ٹھیک سے گرتے ہیں۔ چار میں سے دو صحیح طرف سے اوپر۔ تالیاں بجتی ہیں، اور ہماری چوڑی کی گوٹی دو خانے آگے بڑھتی ہے۔ ہمیں اب بھی اس کھیل کا نام معلوم نہیں ہے۔

’’اسے کٹّے منے کہتے ہیں،‘‘ پاس کھڑا گاؤں کا ایک اور نوجوان، جو عورتوں سے ہونے والی ہماری گفتگو کو سن رہا تھا، درمیان میں بول پڑتا ہے۔

’’چکّا، چکّا چارہ۔ چوکا بارہ،‘‘ ہالمّہ اس کھیل کے وہ تمام نام گناتی ہیں جو وہ جانتی ہیں۔ چمک دار لال ساڑی پہنے وہ پانچوں میں سب سے بڑی لگتی ہیں، اور تقریباً ۶۰ سال کی ہونے والی ہیں۔ ان کے قہقہہ کی آواز سب سے تیز ہے اور مسکراہٹ دور تک پھیلتی ہے۔ اگر ہم ان پانچوں عورتوں کو اس سرد دوپہر میں، ایک چھوٹے سے گاؤں کی گلی کے درمیان، یوں قہقہہ لگاتے اور مستی کرتے ہوئے نہ دیکھتے، تو اُس گلی سے سیدھے تُنگ بھدرا کی طرف نکل جاتے۔ سال کے اس وقت ندی پرسکون رہتی ہے۔ کشتی ہمیں اُس پار لے جا کر ہمپی پہنچا دیتی، جس کے کھنڈہر اس اس طرف سے دکھائی دیتے ہیں۔ لیکن کرناٹک کے کوپّل ضلع میں جس آنے گونڈی گاؤں میں ہم ہیں، اور جس کھیل کو یہ عورتیں کھیل رہی ہیں، دونوں یونیسکو کے ذریعہ تسلیم شدہ تاریخی مقامات ہمپی سے بھی قدیم ہیں۔ دیومالائی کہانیوں پر اگر یقین کریں، تو پتھروں سے بھری پہاڑیوں سے گھرا یہ گاؤں رامائن کی کہانی میں بندروں کے راجا سُگریو کا پایہ تخت کِشکِندھا ہے۔

جو کھیل یہ عورتیں کھیل رہی ہیں، بعد میں ہمیں احساس ہوتا ہے کہ دیومالائی کہانیوں کے مطابق اس کا تعلق ایک اور رزمیہ مہابھارت سے بھی ہو سکتا ہے۔ چوکا بارہ کھیل کی ہی ایک شکل کبھی راجاؤں کے ذریعہ کھیلی جاتی تھی، جن میں پانچوں پانڈو بھی شامل تھے۔ انہوں نے جوئے میں اپنی ریاست گنوائی اور اپنی بیوی کو کورووں کے ہاتھوں ہار گئے۔ یہاں، اس کے برعکس، ۲۰ سے ۶۰ سال کی عمر کی پانچ دیہی عورتیں – ہنومَوّا، ہالمّہ، کویتا، گیتا اور لکشمی ہر دن چوکا بارہ کھیلتی ہیں۔ اور مزیدار بات یہ ہے کہ کسی نے بھی اس کھیل میں اپنا شوہر نہیں کھویا ہے۔

ترجمہ نگار: قمر صدیقی