سڑک اسٹیج ہے، ڈرامے کی پیشکش زندگی کا مقصد

وہ پوری رات جاگتے رہے۔ جب وہ ۱۵ سال کے تھے، تو انہوں نے پہلی بار تمل ناڈو کے انومندئی گاؤں کی ماری یمّن کوئل اسٹریٹ پر تیروکوتو دیکھا تھا۔ ویر راگھون (۷۰) اپنی نوجوانی کے دنوں کو یاد کرتے ہوئے بتاتے ہیں، ’’وہ تمام لوگ وزنی پوشاکوں میں ملبوس تھے۔ چمکتے تاج، سنہرے زیورات پہنے ہوئے اور مختلف رنگوں کی زیبائش کیے ہوئے۔ انہوں نے گانے گائے، رقص کیا اور اداکاری کی، اور تمام لوگ انہیں حیرت کی نگاہوں سے دیکھ رہے تھے۔ ناظرین میں تاتا اور پاتی (دادا اور دادی) ہاتھ جوڑ کر ایسے بیٹھے تھے جیسے ان کے سامنے کوئی بھگوان آ گیا ہو۔ یہ دیکھنے میں کافی مزیدار تھا۔‘‘

جس رات انہوں نے پہلی بار تیروکوتو (جو نکڑ ناٹک کی ایک قسم ہے، جس کا لفظی معنی بھی یہی ہے) دیکھا، ان کے ذہن پر اس کا گہرا نقش پڑ گیا۔ وہ بتاتے ہیں، ’’میں نہ تو کچھ کھا پا رہا تھا اور نہ ہی سو پا رہا تھا۔ میرے اندر کچھ ایسا چل رہا تھا، جو مجھ سے کہہ رہا تھا، ’مجھے ان کے ساتھ رہنا ہے۔ میں وہی کرنا چاہتا تھا جو وہ اس دن کر رہے تھے‘۔‘‘ وہ ان دنوں درجہ ۶ میں پڑھ رہے تھے، لیکن ان کا مستقبل طے ہو گیا تھا۔ موسیقی، رقص یا قصہ گوئی میں بغیر کوئی رسمی تعلیم حاصل کیے انہوں نے پڑھائی درمیان میں ہی چھوڑ دی اور ایک تیروکوتو گروپ کے ساتھ شامل ہو گئے۔

ان کے والدین، جو ریاست میں دیگر پس ماندہ طبقہ میں درج وَنّیار برادری سے تعلق رکھنے والے زرعی مزدور تھے، انہوں نے ان کے فیصلہ پر کوئی اعتراض نہیں کیا۔ وہ یاد کرتے ہوئے کہتے ہیں، ’’ہم زیادہ نہیں کماتے تھے، لیکن مجھے سیکھنے میں مزہ آتا تھا۔ وہ مجھے شروع میں چھوٹے چھوٹے کام دیتے تھے۔‘‘ لیکن پھر بعد میں، ویر راگھون کو مہا بھارت پر مبنی ایک ڈرامہ میں دُریودھن کے طور پر کردار نبھانے کو ملا، جس کے لیے انہوں نے رات دن ایک کر کے محنت کی۔ وہ اپنے چہرے پر فخریہ مسکراہٹ کے ساتھ بولے جو عمر کی اس گھڑی میں بھی بالکل پھیکی نہیں پڑی ہے، ’’میں بالکل بھی نہیں گھبرا رہا تھا، بلکہ میں تو کافی جوش میں تھا۔‘‘

ویر راگھون نے نہ صرف اس فن کو سیکھنے میں من لگایا، بلکہ انہوں نے ان رزمیوں کو بھی سمجھنے کی کوشش کی جن کی بنیاد پر یہ ڈرامے پیش کیے جاتے تھے۔ انہوں نے اپنے علم میں اضافہ کرنے کے لیے تمل زبان میں تحریر کردہ نول اگراتی، پیریا پرانم اور بھارتم جیسی قدیم کتابوں کا مطالعہ کیا۔

وہ ۹۰ کی دہائی کے آخر تک ایک پیشکش کے لیے صرف ۵ سے ۱۰ روپے کماتے تھے۔ وہ مسکراتے ہوئے بتاتے ہیں، ’’ہمارے شو تقریباً سال بھر چلتے تھے۔ تقریباً ۲۵۰ دن اسی میں گزر جاتے تھے۔‘‘ ڈرامے کا خرچ گرام پنچایت کے ذریعہ لوگوں سے چندہ جمع کر کے اٹھایا جاتا تھا۔ وہ مزید کہتے ہیں، ’’ناظرین ہمارے ہنر کے تئیں اپنی محبت کا اظہار کرتے ہوئے بھی پیسے دے دیتے تھے، سوچتے تھے کہ یہ بھگوان کے لیے ہے۔‘‘ بقول ان کے، لوگ زیادہ نہیں کماتے تھے، لیکن یہ سب جنون کے لیے کرتے تھے۔

کئی الگ الگ ناٹک منڈلیوں کے ساتھ ایک دہائی تک پروگرام کرنے کے بعد ۲۰۰۰ میں انہوں نے اپنی خود کی ایک ناٹک منڈلی تیار کرنے کا فیصلہ کیا، جس کا نام (سدھی ونائگر ناگڑ سبھا) انہوں نے بھگوان گنیش کے نام پر رکھا۔ انہوں نے کھلے میدان اور خالی جگہوں پر مشق کرنی شروع کر دی۔ ان کی منڈلی نے اپنا پہلا شو ان کے گاؤں میں کیا۔ حالانکہ، یہ شو مفت میں پیش کرنے کے باوجود کافی کامیاب رہا۔

ویر راگھون کہتے ہیں، ’’بڑی تعداد میں ایسے لوگوں کو ڈھونڈنا مشکل تھا، جو اس فن میں گہری دلچسپی رکھتے تھے۔ اسے دیکھنے میں تو مزہ آتا ہے، لیکن اچھی پیشکش کے لیے آپ کو کافی محنت کرنی پڑتی ہے۔ آپ لاپروائی نہیں دکھا سکتے۔ اُس وقت ہم صرف چار لوگ ہی تھے۔ وقت لگا، لیکن اب ہماری ٹیم کافی بڑی ہو گئی ہے۔‘‘ ویر راگھون پانچ سے زیادہ دہائیوں سے تیروکوتو پیش کر رہے ہیں۔ بھلے ہی ان کی عمر زیادہ ہو گئی ہو اور وقت بدل گیا ہو، لیکن ان کے جوش میں کوئی کمی نہیں آئی ہے۔ ان کا گروپ، جس میں اب کل ۱۷ ممبران ہیں، گزشتہ ۲۵ برسوں سے کام کر رہا ہے۔

تیروکوتو کی مقبولیت میں کمی آئی ہے، جس کی وجہ سے ویر راگھون نے بھی دیگر کاموں میں ہاتھ آزمائے ہیں۔ مثال کے طور پر، انہوں نے تمل سنیما میں اپنی قسمت آزمانے کی کوشش کی، یا جب شو کی مانگ میں کمی آئی، تو پھل سبزیاں بیچیں۔ ان کے گروپ کے سب سے نوجوان رکن، ای کارتک کا کہنا ہے کہ ذات بھی اس فن کی راہ میں ایک بڑا روڑہ ہے۔ وہ پریئن برادری سے تعلق رکھتے ہیں، جسے ریاست میں درج فہرست ذات کا درجہ دیا گیا ہے۔ وہ سوال کرتے ہیں، ’’اپنے فن کا مظاہرہ کرنے کے لیے ہماری فلموں یا کسی بھی صحیح چینل تک رسائی نہیں ہے۔ لیکن مجھے اداکاری کرنا پسند ہے۔ اگر یہاں نہیں کروں گا تو پھر کہاں کروں گا؟‘‘ پچھلے ۱۳ سالوں سے اس فن سے وابستگی کے باوجود کارتک کو اب بھی یومیہ اجرت پر مزدوری کرنی پڑتی ہے۔ جب وہ اسٹیج سے باہر ہوتے ہیں، تو کسی تعمیراتی مقام پر بطور مزدور کام کرتے ہیں۔ ویر راگھون کہتے ہیں، ’’یہاں سبھی کو اپنے گزارہ کے لیے کچھ اور کام کرنا پڑتا ہے۔‘‘ ان کے سبھی پانچ بچوں میں ان کا بڑا بیٹا ہی اس کام میں لگا ہوا ہے، جو معاش کے لیے ویلڈنگ اور پرنٹنگ بزنس بھی کرتا ہے۔

تیروکوتو میں جو لوگ نئے نئے آئے ہیں، انہیں کسی شو میں کام کرنے کے لیے ۵۰۰ روپے ملتے ہیں۔ لیکن تجربہ کار فنکاروں کو شو وغیرہ ہونے پر ہر شو کے ۱۰۰۰ سے ۲۰۰۰ روپے ملتے ہیں۔ تیروکوتو کی پیشکش سے ہونے والی آمدنی اتنی نہیں ہوتی کہ اس سے گھر کا خرچ چلایا جا سکے۔ جب بھی گروپ کو کسی خاص تہوار پر فن کی پیشکش کے لیے بلایا جاتا ہے، تو اسے تقریباً ۲۰ سے ۲۵ ہزار روپے ملتے ہیں، جسے گروپ کے ۱۷ ارکان کے درمیان ان کی سینئرٹی اور تجربہ کو دیکھتے ہوئے تقسیم کیا جاتا ہے۔ لیکن جب پرفارمنس نہیں ہو رہی ہوتی ہے تو یہ سبھی فنکار کسی تعمیراتی مقام پر یا ریلوے اسٹیشن یا کھیتوں میں مزدوری کرتے ہیں۔

انہیں حکومت سے بھی کوئی مستقل مدد نہیں ملتی کہ وہ اپنے فن کو محفوظ رکھ سکیں۔ معدوم ہوتے فنون کی تشہیر کے لیے تیار کی گئی اسکیمیں محض کاغذی ہیں۔ اور ہاں، کبھی کبھی انہیں کسی موقع پر ایوارڈ ضرور مل جاتا ہے۔ جیسے کہ ویر راگھون کو ۲۰۲۳ میں ایوارڈ دیا گیا تھا۔ وِلو پورم ضلع نے انہیں تیروکوتو میں تعاون کے لیے ۲۰ ہزار روپے کے کلائی مودھو منی ایوارڈ سے سرفراز کیا تھا۔ حکومت اور عوام کی اندیکھی کے درمیان یہ ایوارڈ چھوٹا ہی سہی مگر بامعنی تھا۔

ویر راگھون پرانے دنوں کو یاد کرتے ہیں، جب گاؤں کی سڑکوں پر ناظرین کا مجمع لگ جاتا تھا، ’’وہ زمانہ الگ تھا۔‘‘ آج جب وہ بہت کم ناظرین کے درمیان اپنے فن کا مظاہرہ کرتے ہیں، تب بھی ان کے اپنے فن کے تئیں لگن میں کوئی کمی نہیں آئی ہے۔ وہ کہتے ہیں، ’’ایمانداری سے کہوں تو، میں یہ کام اپنی آخری سانس تک کروں گا۔‘‘

رپورٹر تصویریں کھینچنے میں رہنمائی اور مدد کے لیے ایم پلنی کمار کا شکریہ ادا کرتی ہیں۔ ساتھ ہی، اسٹوری میں مدد کے لیے وہ کارتی کیئن کے کا بھی شکریہ ادا کرتی ہیں۔

ترجمہ نگار: قمر صدیقی