'நாங்கள் நிறுவனத்துக்கு அடிமைகள்'

கிருஷ்ணா மாவட்டம் வட்லமானு கிராமத்தில் 2.5 ஏக்கர் குத்தகை நிலத்தில் ராமகிருஷ்ண ரெட்டி சோளம் பயிரிட்டுள்ளார். அவரும் மற்ற எட்டு விவசாயிகளும் ஹைதராபாத்தின் IML விதை நிறுவனத்திற்கு விற்பதற்காக ஆந்திராவில் உள்ள அகிரிபள்ளே மண்டலத்தில் உள்ள கிராமத்தில் 30 ஏக்கரில் சோளம் பயிரிட்டனர். “நாங்கள் செப்டம்பர் 2016-ல் பயிரிட்டு, விதைகளை [சுமார் 80 டன்கள்] மார்ச் 2017-ல் விற்றோம். ஒரு வருடத்திற்கு மேலாகியும், எங்கள் ஒன்பது பேருக்கும் கொடுக்க வேண்டிய 10 லட்ச ரூபாய்க்கு மேற்பட்டத் தொகையை நிறுவனம் கொடுக்கவில்லை,” என்கிறார் 45 வயதான ராமகிருஷ்ணா.

ஒவ்வொரு ஆண்டும் செப்டம்பர் மாதத்தில் அந்த நிறுவனம், விவசாயிகளுக்குக் கலப்பின விதைகளை வழங்குகிறது. விதை விவசாயிகள் அவற்றை வளர்த்து, பெருக்கப்பட்ட விதைகளை அடுத்த ஆண்டு மார்ச் மாதத்தில் நிறுவனத்திடம் திருப்பிக் கொடுக்கிறார்கள். நிறுவனம் அவற்றை, லாபத்துக்கு நடவு விவசாயிகளிடம் சந்தையில் விற்பனை செய்கிறது. விதை விவசாயிகள் நிறுவனத்திடமிருந்து தங்களுக்குக் கிடைக்க வேண்டியப் பணத்தைப் பூச்சிக்கொல்லிகளாகவும் 24 முதல் 36 சதவிகிதம் வருடாந்திர வட்டி விகிதக் கடனாகவும் பெறுகிறார்கள். கடனும் வட்டியும் விவசாயிகள் பெறும் இறுதித் தொகையிலிருந்து கழிக்கப்படும்.

நிறுவனம் மார்ச் இறுதிக்குள் பணம் செலுத்த வேண்டும், ஆனால் பணம் வழக்கமாக 2-3 மாதங்களுக்குப் பிறகு வரும். 2017-ம் ஆண்டுக்கானப் பணத்தை விவசாயிகளுக்கு நிறுவனம் கொடுக்கவில்லை. கொடுக்கப்படாத நிலுவைத் தொகை, கடந்த சில ஆண்டுகளாக அதிகரித்து வரும் இடுபொருள் செலவுகளுடன் பொருந்தாத விலைகள், பல மக்காச்சோள விதை விவசாயிகளை கடனில் தள்ளியது. சிலர் விவசாயத்தை விட்டு வெளியேற வேண்டிய கட்டாயமும் நேர்ந்தது.

வட்லமானு கிராமத்தின் ஒன்பது விவசாயிகளில் ஒருவரான 40 வயது பில்லி ஸ்ரீனிவாஸ், 15 ஆண்டுகளாக மக்காச்சோள விதைகளை பயிரிட்டவர். “எனக்கு [தனியார் வட்டிக்காரர்களிடம்] மொத்தம் 15 லட்ச ரூபாய் கடன் உள்ளது. எனக்கு சொந்தமாக அதிக நிலம் இல்லாததால் ஆண்டுக்கு 15,000 ரூபாய் குத்தகையாக செலுத்துகிறேன். அதனால் விவசாயத்தை விட்டுவிட்டு விவசாயக் கூலி வேலை செய்ய முடிவு செய்தேன். ஸ்ரீனிவாஸ் இப்போது தினசரி ஊதியமாக ரூ. 250-300 ஈட்டுகிறார். தனக்குச் சொந்தமான அரை ஏக்கரை விற்று கடனைச் அடைக்க முடியும் என்று நம்புகிறார்.

ஐஎம்எல் விதைகள் நிறுவனம், பணம் தரப்படுவதில் பிரச்சினை இருக்கும் தகவலை மறுக்கிறது. "[விவசாயிகளால் பயிரிடப்பட்ட] இந்த விதைகளுக்கு 'முளைக்கும் பிரச்சனை' உள்ளது, ஆனாலும் 10 நாட்களில் அவர்களுக்கு பணம் கொடுத்து விடுவோம்," என்று 2018ம் ஆண்டின் மே மாதம் பேசியபோது, ​​கிருஷ்ணா மாவட்டத்திற்கான நிறுவனச் செயல்பாடுகளைக் கையாளும் செருகூரி வெங்கட சுப்பா ராவ் கூறினார். விவசாயிகளுக்கு இன்னும் பணம் கிடைக்கவில்லை. ஜூலை நடுப்பகுதியில் நான் அ மீண்டும் தொடர்புகொண்ட போது, விவசாயிகளுக்கு 10 முதல் 15 நாட்களில் பணம் வழங்கப்படும் என அவர் மீண்டும் சொன்னார்..

"ஒரு வருடத்திற்கும் மேலாக எங்களுக்கு பணம் தருவதாக நிறுவனம் கூறி வருகிறது" என்கிறார் ராமகிருஷ்ணா. “நிறுவனம் கொடுத்த அதே விதைகளைத்தான் நாங்கள் பயிரிட்டோம். அவர்களின் சொந்த விதைகளில் முளைக்கும் பிரச்சனைகள் இருந்தால் நாங்கள் எப்படி பொறுப்பாக முடியும்?"

விவசாயிகளுக்கு விதை நிறுவனங்கள் வழங்கும் ஒரு டன் விலை மக்காச்சோள விதையின் தரத்தைப் பொறுத்து அமைகிறது. எனினும் சோளம் முதன்முதலில் 2002-2004-ல் மேற்கு கிருஷ்ணா பகுதியான நுஸ்விட், அகிரிபள்ளே, சத்திராய் மற்றும் முசுனூரு மண்டலங்களில் பயிரிடப்பட்டதிலிருந்து விதைகளுக்கான விலை உயரவில்லை என்கின்றனர் விவசாயிகள்.

கிருஷ்ணா மாவட்ட வேளாண்மை இணை இயக்குநர் மோகன் ராவ் கூறும்போது, ​​“2017-18 விவசாயப் பருவத்தில் 20 நிறுவனங்களுக்காக 15,887 ஏக்கர் பரப்பளவில் 4,000 விவசாயிகள் விதைகளுக்காக சோளம் பயிரிட்டனர். மக்காச்சோளம் அதன் விதைகளுக்காக மேற்கு கோதாவரி, கிழக்கு கோதாவரி மற்றும் பிரகாசம் போன்ற மாநிலத்தின் பிற மாவட்டங்களிலும் பயிரிடப்படுகிறது.

முசுனூர் மண்டலம் சிந்தலவல்லி கிராமத்தில் மக்காச்சோள விதைகளை பயிரிட முதன்முதலில் விற்பனைக்கு வந்தவர்களில் ஒருவர் பெத்திநேனி வெங்கட ஸ்ரீனிவாச ராவ். 11 ஏக்கர் நிலத்தை அவர் கொண்டுள்ளார். பெங்களூருவை தளமாகக் கொண்ட சிபி சீட்ஸ் இந்தியா நிறுவனத்திற்காக 10 ஏக்கரில் மக்காச்சோளம் பயிரிடுகிறார். நிறுவனத்துக்கென நுஸ்விட் நகரில் ஒரு தொழிற்சாலை உள்ளது. "எட்டு ஆண்டுகளுக்கு முன்பு [2010 இல்], ஒரு டன் விலை சுமார் 12,000-14000 ரூபாயாக இருந்தது, இந்த ஆண்டு விலை 16,000-18,000 ரூபாயாக உள்ளது. அதே நேரத்தில் நடவுச் செலவுகள் இரண்டு மற்றும் மூன்று மடங்கு அதிகரித்துள்ளது" என்று 54 வயது ராவ் கூறுகிறார்.