करेला कइसने बने गुरतुर भाजी

छाया उबाले ला अपन दाई के पथरा के जांता चलावत गाये गीत सुरता हवय – जांता के गाना अऊ लोकगीत जेन ह घर परिवार के नाता-गोता-रिस्ता के मया-पीरा ला समेटे हवय 

महाराष्ट्र के पुणे के शिरुर तालुका मं जब हमन ओकर ले भेंट करेन त छाया उबाले ह पारी ला बताइस, “मोर दाई ह बनेच अकन गीत गाये हवय, फेर मोला वोला सुरता करे मुस्किल आय.” ग्रिंडमिल सॉन्ग्स प्रोजेक्ट (जीएसपी) मं गीत गवेइय्या मन ला एक पईंत अऊ खोजे बर, हमन अक्टूबर 2017 मं सविंदने गांव मं पवार परिवार करा जाय रहेन. घर मं बेटा, बेटी अऊ लइका मन सब्बो रहिन.            

फेर हमन गायिका गीता पवार ले मिले नइ सकेन, जेन ह चार बछर पहिली ये दुनिया ले बिदा ले ले रहिस. ओकर बेटी छाया उबाले ह हमन ला अपन दाई के गाये गीत ला सुरता कराय ला कहिस. 43 बछर के ये महतारी ह अपन दाई के चांदी के जोड़े (बिछिया) ला दिखाइस, जेन ला वो ह भारी मया ले संभाल के रखे रहिस अऊ फ्रेम वाले फोटू तीर रखे रहिस.       

अपन दाई ले सुने ओवी ला सुरता करे के कोसिस के बाद, छाया ह चार ठन ग्रिंडमिल गीत गाईस, जेन ला वो हा दू ठन छोटे लोकगीत के बीच मं गाइस, एक दुख-पीरा के अऊ दूसर मया के. वो ह दू पांत के कहिनी ले सुरु करिस, जऊन मं भद्रा के पुन्यवान राजा अश्वपति के बेटी, पुरान के सावित्री के गुन सुनाय रहिस. ये दोहा एक आम चलन आय, जेन ह आगू अवेइय्या गीत मन बर धुन बनाय सेती गाला (राग) रहिस. 

पहिली लोकगीत मं, वो ह महाभारत मं अपन सौ चचेरा भाई, कौरव मन के संग लड़ई मं पांचों पांडव के हालत ला, एक ठन बड़े अकन कुनबा मं रोज के बूता काम करेइय्या अकेल्ला माइलोगन के अपन हालत ले तोलत हवय. वो ह पंढरपुर के मंदिर के विट्ठल-रुक्मिणी उपर भक्ति भाव ला जगाथे अऊ देंवता मन ला अपन दाई-ददा ले तोलत हवय. छाया के अवाज अपन दाई-ददा के जिकर करतेच भर जाथे अऊ अपन गाल मं बोहावत आंसू ला रोके नइ सकय. जइसने के आरो करत अचानक ले बदल फट जाथे अऊ घर के टीना के छानी मं बरसत भारी जोर ले अवाज करथे.              

आगू के छंद मं, वो ह अपन भाई ला अपन चार जेठ अऊ जेठानी मन के फरमाइस ला पूरा करे मं होवेइय्या दिक्कत मन ला बतावत वो ह गाथे.   

लोकगीत के बाद आगू के चार ओवी मं छाया ह कका-काकी ले लइका मन ला मिलत मया-दुलार अऊ     मिले भेंट के बारे मं गाये हवय. लाल कुरता अऊ पागा (टोपी) जेन ह लइका के ममा डहर ले भेंट मं मिले हवय.जब लइका रोये लगथे, हो सकत हे वो ह भूखाय होय, त गायिका ह लइका ला दही-भात खवाय ला कहिथे.

आंसू पोंछत अऊ दुख ला बिसोरत जल्दीच छाया ह हँसी ले भरे एक ठन लोकगीत गाइस: एक झिन बहुरिया ला हलाकान करेइय्या अपन सास ला खुस करे कतक मुस्किल आय, जऊन ह जइसने करेला कस होय. येला जइसने घलो रांध लेव, करूच लगही; येला गुरतुर बनाय नइ जाय सकय. ये आखिरी गीत मं हमन छाया के संग अपन हाँसी ला रोके नइ सकेन.           

लोकगीत:

ओवी (जांता गीत):

लोकगीत:

कलाकार/गायिका: छाया उबाले

गांव: सविंदाने

तालुका: शिरुर

जिला: पुणे

तारीख: ये गाना अक्टूबर 2017 मं रिकॉर्ड करे अऊ फोटू लेय गीस