वो ह मोला बिन कसूर के मारे. मने मन करत रहिथे संदेहा.
मोला बिन दोस के मारत रहिथे अइसने मोर गोसेईंय्या
कोनो लोकगीत के सुरु के पांत मं ये बात ह अचमित कर दिही ये तय आय. फेर, जइसने ढंग ले ये पांत ह जिनगी के निरदयी असलियत ला आगू रखथे वो ह ओकर ले घलो जियादा भयंकर आय, गुजरात के कच्छ इलाका मं ये ह आम बात आय, जिहां ले ये लोकगीत के जनम होय हवय.
मयारू संगी संग अतियाचार (इंटीमेट पार्टनर वायलेंस), जेन मं सुवारी संग मार-पीट जइसने चालचलन हवय, पहिलीच ले दुनिया के एक ठन बड़े समस्या आय. माइलोगन मन के मानवाधिकार हनन के मामला मं घलो अऊ सार्वजनिक स्वास्थ्य समस्या के रूप मं घलो. माईलोगन के खिलाफ अतियाचार के संयुक्त राष्ट्र के ग्लोबल डेटाबेस के मुताबिक, हरेक तीन झिन माइलोगन मन ले एक झिन माईलोगन ला कोनो न कोनो रूप मं देह अऊ यौन अतियाचार ले जूझे ला परथे.
काय घरवाला के अपन सुवारी ला मारे-पीटे बने आय?
राष्ट्रीय परिवार अऊ स्वास्थ्य सर्वेक्षण 2019-21 ( एनएफएचएस) के मुताबिक गुजरात मं 30 फीसदी ले जियादा माईलोगन मन अऊ 28 फीसदी मरद लोगन मन ये सवाल के जुवाब ‘हव’ मं दीन. अइसने जुवाब देवेइय्या मन अपन सुवारी ला मारे-पीटे बर जेन कारन ला मानिन? ये मं दूसर ले संबंध के संदेहा, मुंह चलाय, संबंध बनाय ले मना करे, घरवाला ला बिन बताय बहिर जाय, घर के लोगन के बात ला नइ माने अऊ बने करके रांधे घलो सामिल हवय.
सांख्यिकीय राष्ट्रीय सर्वे जइसनेच, फेर जियादा मनभावन तरीका ले, लोकगीत घलो हमर समाज के मनोवैज्ञानिक बात ला फोर के आगू रखथे. जऊन ह माइलोगन मन के समाज मं जगा ले लेके वो मन के भीतरी दुनिया ला उजागर करथे. समाज माइलोगन मन के भावना ला कइसने भीतर तक ले असर करथे, ये ह लोकगीत मं देखे ला मिलथे.
हो सकत हे के तुमन ये गीत मन ला दुखियारिन मन के अवाज के रूप मं चिन्हे झन सकव. येला लेके तुंहर अपन समझ हो सकथे. जइसने के, ये गीत मं ये साफ नइ ये के माइलोगन ह अपन मया जताय के बहाना ले अपन गोसेईंय्या के करे अतियाचार ला बखानत हवय धन अपन ये अतियाचार मं खुस सामिल होके परम्परा ला निभावत हवय. ये घलो साफ नइ ये के जब वो ह अपन गोसेईंय्या ला “मालधारी राणों” (चरवाहा मन के मुखिया) कहिके बलाथे त असल मं वो ह अपन जुलुमी गोसेईंय्या के खिलाफ लुका के कोनो विद्रोह करत हवय धन नइ.
हो सकत हे के ये गीत मं माइलोगन मन ला नियाव देवेइय्या धन ताकतवर ढांचा ला हिलाय के ताकत न होय. फेर अइसने गीत वोला अपन रोज के जिनगी के भयंकर असलियत मन के बारे मं बोले के मउका ज्ररूर देथे. ओकर बलशाली, सफ्फा सफ्फा,-संगीतमय धुन मं, वो ह तउन भारी पीरा ले निजात पा सकथे जऊन ला वो ह कोनो आन करा सुनाय नइ सकय. हो सकथे ये जाने चिन्हे धुन के सहजता अऊ जोस हवय जेकर ले वो ह अपन जिनगी के असहनीय असलियत ला समेट सकथे अऊ एक ठन अइसने समाज मं एक दिन अऊ जीये के ताकत हासिल कर सकथे जिहां ढांचागत मदद के नांव मं बनेच कम मदद मिलथे.