चरवाहन बिना अरावली के का होई

बीड़ी के धुआं संघे फरीदाबाद के मंगलर गांव में गुज्जर समुदाय के एगो चरवाहा रतन सिंह अपनी बकरियन के देखभाल कर रहल बाड़ें. अरावली में एगो उंच चढ़ाई के बाद एगो हरा भरा जगह पर पहुंच के उ बकरियन के पानी पीये खातिर बोला रहल बाड़ें. “तर्र तर्र,” के तेज आवाज लगावते 45 गो बकरी एक जगह पर इकट्ठा होवे लागेली सन.

“हर बोलावा के ध्वनि आ स्वर अलग-अलग होखेला जवन विशेष आदेशन के संकेत देला आ झुण्ड के नियंत्रित करे खातिर अइसन दर्जनों अलग-अलग आवाज होखेला,” उ बतावेलन.

एगो आवाज होला, “आओ, आओ”, जवन बकरियन के चरवाहा के ओर ले आवे खातिर एगो कोमल बोलावा होला. एकर सीधा मतलब बा कि ‘हेइजा आव सन’. एकरी बाद होला “लेह लेह लेह”, ई बकरियन के खास बोलावा ह जेकर माने होला की नमक खाए के समय आ गईल बा.

“आओले, आओले -उउउह उउउह” के बोलावा के दू गो मतलब होला, एगो ई की चरवाहा लगहीं बा आ दूसर संभावित शिकारियन खातिर चेतावनी होला की ई झुण्ड अकेल नईखे.

रतन सिंह (65) हर आवाज के अभिनय कर के देखावेलें की कईसे ई स्वर आ लय में अलग बा आ समझावेलन की कईसे ई आवाज से चरवाहा आ जानवरन के बीच के प्राचीन सम्बन्ध जीयत रहेला.

सिंह लम्बा आ दुबला बाड़ें आ कुरता पायजामा आ एगो पगड़ी पहिनेलन. उनकर चमड़ा के जूता भारी बा आ पहाड़ियन में नुकीला चट्टान आ कांटन पर चले खातिर उपयुक्त बा.

सिंह मंगार के रहे वाला हउवे जवन दिल्ली-हरियाणा सीमा पर स्थित एगो गांव हवे आ अपनी समृद्ध जैवविविधता खातिर प्रसिद्ध हवे.

अरावली पर्वतमाला जवन देश के उत्तर-पश्चिम में दिल्ली से हरियाणा आ राजस्थान होत के गुजरात ले फईलल बा, वर्तमान में देश खातिर एगो पर्यावरणीय संकट के केंद्र बन गईल बा. सुप्रीम कोर्ट के नवम्बर 2025 के आदेश के बाद क़ानूनी सुरक्षा खाली ओ हिस्सा ले सीमित कर दिहल गईल बा. एकर ऊंचाई 100 मीटर से अधिका बा.

पर्यावरणविद लोग आ नागरिक समाज समूह जहां ए निर्णय पर निराशा व्यक्त कईले बा; ओइजे रतन सिंह जईसन परिवारन खातिर इ जमीनन के पारम्परिक देखभाल आज भी ओही तरे चलता. सर्वोच्च न्यायालय 31 दिसम्बर 2025 के जन-आक्रोश पर स्वतः संज्ञान ले के अरावली पर अपनी पुरान आदेश रोक दिहलस. कोर्ट कहलस कि एगो ताकतवर समिति बनावल जाव, जे देखे कि नया परिभाषा से बाहर पड़ गइल इलाका सब में हो रहल खनन अरावली के पर्यावरण खातिर नुकसानदेह त नइखे.

मंगर के कुल 4,262 एकड़ के लगभग 90 प्रतिशत इलाका जंगल से ढकल बा. एह में उष्णकटिबंधीय शुष्क पतझड़ी आ उष्णकटिबंधीय कांटेदार पेड़ पावल जाला. एइजा कम से कम 40 प्रकार के पेड़ आ 30 प्रकार के झाड़ीदार पौधा बाड़ें सन आ उ एमे से हर एक के पहचान सकेलन. धौ (तर्मिनालिया पेंदुला) प्रमुख पेड़ के प्रजाति हवे जवन अब भारी चराई के वजह से अक्सर झाड़ी के रूप में देखाई देला. एकरी अलावे गंगेर (ग्रेविया तेनाक्स), आटन (ग्रेविया फ्लावेसेंस), रोंझ (वाचेलिया ल्युकोफेलिया) आ झरबेर (जिजिफस नुम्मुलेरिया) बा, जेकर इस्तेमाल आमतौर पर चराई खातिर कईल जाला.

“इहां लोगन के लगे पहिले बहुत सारा पालतू पशु रहे, हर घर में कम से कम 100 गो बकरी रहे,” सिंह बतावेलन. उनकी लगे दू गो बड़ गाय, दू गो छोट गाय, एगो भैंस आ ओकर दू गो बच्चा बा. “अब बाहर से आके इहंवा फैल जाए वाला ई प्रजाति देसी पारंपरिक रूप से चारा देवे वाला पेड़न आ झाड़ियन के जगह ले लेले बा.”

प्रोसोपिस जूलीफ्लोरा बाहर से आके नुकसान पहुंचावे वाला पेड़ के प्रजाति ओह में से एगो बा, जे कइक महाद्वीप में फैल चुकल बा. हरियाणा सरकार 2017 में ए प्रजाति के पंजाब भूमि संरक्षण अधिनियम (पीएलपीए, जवन माटी के कटाव रोके खातिर अंग्रेजन द्वारा 1900 में लागू कईल रहे) के तहत संरक्षित पेड़न के सूची से हटावे के कोशिश कईलस आ एके ‘विदेशी आक्रामक प्रजाति’ कहलस जबकि राज्य सरकार दू दशक पहिले अरावली में ए पेड़न के लगवले रहे.

अरावली खुला आ झाड़ी वाला जंगल के रूप में गिनाला. एकर मतलब तात्पर्य अइसन जंगलन से हवे जेमे सबसे कम पेड़ होला (10 से 40 प्रतिशत), अइसन इलाका जेके अक्सर राज्य के रेकॉर्ड में ‘बंजर भूमि’ बतावल गइल बा. आउर एके वानिकी परियोजना के माध्यम से ‘सुधारे’ या आर्थिक रूप से लाभकारी बनावे के प्रयास कईल जाला. सिंह जइसन स्थानीय गड़ेरिया लोग हमेशा से प्रोसोपिस जूलीफ्लोरा के स्थानीय रूप से ‘विलायती कीकर’ कहेला आ एके चारा के रूप में कम उपयोगी मानेला. अइसे त अब मवेशी एकर फल खालें सन आ ई पेड़ ए क्षेत्र में ईंधन के लकड़ी के प्रमुख स्रोत हवे.

“अब पहाड़ में पुराने पेड़ों की जगह विलायती कीकर जैसी प्रजातियों ने ले ली है (पहाड़ में अब पुरान पेड़न के जगह विलायती कीकर निहर प्रजाति उग आईल बाड़ी सन). देसी पेड़ आ झाड़ी ज्यादातर जानवरन के चारा के रूप में काम आवत रहे,” सिंह दुखी हो के बतावेलन.

प्रोसोपिस जूलीफ्लोरा के 1990 के दशक में अरावली में लगभग 38,500 हेक्टेयर सरकारी जमीन पर लगावल गईल रहे. एके दुनिया के ईंधन संकट से निपटे खातिर यूरोपीय संघ से आर्थिक मदद मिलल रहे.

सिंह के सम्बन्ध हरसाना (गुज्जर) समुदाय से हवे जे ऊंट, गाय, बकरी, भैंस आ भेड़ पालेला. सैकड़न साल से इ लोग अपनी आजीविका खातिर ए जंगलन पर निर्भर रहल आईल बाड़ें आ एके संरक्षित करे में महत्वपूर्ण भूमिका निभवले बाड़ें. पवित्र वन, मंगर बानी जेके समुदाय अपनी देवता गुदड़िया बाबा के याद में संरक्षित कईले बा, संरक्षण के एगो बढ़िया उदाहरण हवे.

मंगर बानी राष्ट्रीय राजधानी दिल्ली के सीमा पर आखिरी बाचल प्राकृतिक जंगल बा. अरावली में वन आ वन क्षेत्र के बाहर के गतिविध के कारन अन्य जगहन पर विलुप्ति के कगार पर पहुंचल स्थानीय प्रजाति इहां फल-फूल रहल बा. अरावली क्षेत्र के प्रमुख वृक्ष प्रजाति ‘धौ’ या तर्मिनालिया पेंदुला, जवन कबो चट्टानी ढालन पर आमतौर से मिलत रहे, अब चारागाह के दबाव में बा. मंगर बानी राष्ट्रीय राजधानी के लगे एकमात्र अइसन क्षेत्र बा जहां हजारन धौ के सैकड़न साल पुरान पेड़ उत्कृष्ट स्थिति में मौजूद बा. एकर एगो कारण स्थानीय गुज्जर समुदाय के गुदड़िया बाबा के प्रति भक्ति हवे. मान्यता बा कि उ जंगल में तपस्या कईलें आ आखिर में जंगल में विलीन हो के पेड़-पौधन में निवास करे लगलें.

सिंह के कहनाम बा कि ई स्थानीय लोगन के ही वजह से सम्भव भईल बा कि ए क्षेत्र में 245 गो पक्षियन के संरक्षण कईल गईल बा. एह में संकट में पड़ल मिस्र गिद्ध आ लाल सिर वाला गिद्ध शामिल बा. इहे ना, फ्लाईकैचर्स आ भारतीय पिट्टस जइसन प्रवासी प्रजाति एइजा प्रजनन करेला. जंगल में कम से कम 20 स्तनपायी प्रजातियन के भी घर हवे जेमे तेंदुआ, धारीदार हाईना, जंगली बिल्ली, भारतीय सुनहरा गीदड़, छोट भारतीय सिवेट, एशियाई पाम सिवेट आ भारतीय ग्रे मोंगूज शामिल बा.

सिंह के दिन भोर से पहिले शुरू होला. उ सबेरे 5 बजे हरियर डंठल काटेलन ताकि बाद में अपनी देसी बकरियन के छोट बच्चन के खिया सकें- चारागाह जाए खातिर अभी बहुत छोट बाड़ें सन. उ रेवाड़ा (बकरियन खातिर बाड़ लगावल क्षेत्र) में ही रहिहें सन.

एकरी बाद उ निपुणता से बकरियन के दूध निकालेलन, स्टील के बाल्टी में पौष्टिक गरम दूध एकट्ठा करेलन. सबसे छोट बच्चा बिलबिलात के पीये खातिर उनकी लगे आवेलें सन आ सिंह देखेलन कि उन्हनी के उनकी माई के थन से प्यार से दूध पियावल जाओ.

चरवाहा के लगे अब रेवाली (चराई) खातिर निकले से पहिले मुश्किल से एक घंटा के समय बाचल बा. उ जल्दी से नहायेलें आ लहसुन आ लाल मरिचा के चटनी संघे परोसल गेहूं के रोटी चांप के खालें आ एगो बड़का गिलास मट्ठा पी के दिन भर के जरूरी सामान– एगो साफी (कपास के कपड़ा), एगो डंडा आ लम्बा दिनचर्या खातिर पानी के बोतल एकट्ठा करेलें.

चराई मार्ग के शुरुआती बिंदु मंगर के बाहरी इलाका में बा जहां समय आ गईल बा की झुण्ड चरवाहा के नेतृत्व करे, बकरियन के रास्ता आ रोज के रूटीन एकदम स्पष्ट बा. जानवर आगे-आगे कूदेलन सन बाकिर सिंह सतर्क रहेलें. मंगर बानी के आसपास के क्षेत्र हरियाणा अरावली के घना जंगल वाला क्षेत्र हवे आ एइजा बड़ी संख्या में वन्य जीव मिलेला जेमे तेंदुआ भी शामिल बा.

“पहले के समय में बहुत लोग पशु रखते थे, इसलिए नुकसान वितरित हो जाता था (पहिले के समय में बहुत से लोग पशु राखें एसे नुकसान बंट जात रहे). आज जवन पशुपालक लोग बाचल बाड़ें, ओ लोगन के ई नुकसानन के बहुत बड़ हिस्सा अपने बरदास करे के पड़ेला,” सिंह बतावेलन.

जइसहीं सूरज सीध में आवेला, सिंह एगो चट्टान पर आराम कर रहल बाड़ें, अपनी पशुअन पर नजर राखत बीड़ी के आनंद ले रहल बाड़ें तबले उत्साह के माहौल बन जाला. झुण्ड में एगो बकरी बच्चा के जनम देले बिया आ कुछे देरी बाद दुसरका बच्चा भी देले. माई बाकी के दुपहरिया अपनी बच्चन के चाटे आ उनके आपन दूध पियावे में बितावेले. जल्दिये, माई आ ओकर नया बच्चा एक स्वर में मिमिया के बतियावे लागल बाड़ें सन.

अचानक होखे वाला अइसन घटना से निपटल चुनौती होला काहें की नवजात बच्चा कम से कम छह-सात घंटा ले अपनी गोड़ पर खड़ा ना हो सकेलन सन. जईसहीं सूरज ढले लागेला, घरे जाए के समय हो जाला आ सिंह विशेष आवाज दे के झुण्ड के बोलावेलें. उ नवजात बच्चन के दुनो हाथ में ले के झुण्ड के बीच में ना बल्कि किनारे पर चलेलें.

लौटत समय रास्ता में सिंह के गिरल पतईयन के ढेर में आराम से लुकाईल एगो अजगर लउकल. “देखीं कईसे इंतजार कर रहल बा. अगर हम ओके ना देखले होतीं या अपनी बकरियन के तनी आगे या पीछे चलत रहतीं त उ कवनो बकरी के पकड़ लेईत.” उनकर कहनाम बा की उनके हमला के पता काफी देर बाद चलित काहें कि अजगर जानवरन के अईसे गटई से पकड़ेला की कवनो आवाज ना होला.

ई अइसन कई गो खतरा में से एक बा जेकर सामना चरवाहा लोग जंगली वातावरण में पशुपालन करत के करेला. सिंह बाघ के हमला के कहानी साझा करत के बतावेलन की कईसे हमला करे वाला बिना आवाज कईले कवनो जानवर के सांस रोक देवेला आ फिर ओके खाए खातिर पेड़ पर ले जाला. “पशुअन के सुरक्षित राखे के एक ही तरीका बा – हरदम उन्हनी के संघे रहल. आ एहू से हमेशा बचाव के गारंटी नईखे,” उ बतावेलन.

सिंह बतावेलन की हरियाणा अरावली में अइसन परिवारन के संख्या कम हो रहल बा जे जीविका कमाए खातिर पूरी तरह से पशुपालन पर निर्भर बा. उनकर मानल बा की एकरा पीछे के वजह बढ़त शहरीकरण आ पारंपरिक आजीविका से कम लाभ बा.

एइजा एक दशक से अधिक समय ले शोध कर चुकल सेंटर फॉर इकोलोजी डेवलपमेंट एंड रिसर्च (सीईडीएआर) के वरिष्ठ फेलो चेतन अग्रवाल के कहनाम बा की पहिले ए क्षेत्र में आजीविका के मुख्य स्रोत पशुपालन रहे. “गाय आ बकरी पालक मंगर अरावली पहाड़ी जंगलन के न्यायसंगत प्रबंधन खातिर नियम लागू करें लोग जईसे ईंधन लकड़ी आ चारा के खाली पतला तृतीयक शाखा में एकट्ठा कईल ताकि दीर्घकालिक चारा के उपलब्धता सुनिश्चित कईल जा सके. बाहरी लोगन द्वारा चराई आ कटाई पर भी प्रतिबन्ध लगावल गईल रहे.”

जंगल चराई के मैदान, औषधीय पौधा आ प्राकृतिक आश्रय प्रदान करेला जेसे बदलत मौसमन के दौरान झुण्ड बचल रहेला. बदला में चरवाहा आ उनकर पशु पर्यावरण संतुलन बनाये राखे में मदद करेला. चराई से झाड़-झंखाड़ जरूरत से जादे ना बढ़े, ताजा वनस्पति उगेला, बीज फइलाव होखेला आ जंगल के फेरु से उगान पक्का करेला.

“सामुदायिक जमीन के निजीकरण आ खनन, आ रियल एस्टेट के आवे से ई ढ़ांचा बाधिक हो गइल,” अग्रवाल कहेलन.

सिंह के रेवाड़ा लौटे ले सूरज लगभग अरावली के पहाड़ियन के पीछे छिप गईल रहे आ उनकर थकल बकरी कुल चुपचाप उनकरी पीछे चलत रहली सन, खाली उनकरी गर्दन में बंधल घंटी के मधुर आवाज सुनात रहे.

घरे पहुंचते उ उन्हनी के गिनेलें आ चोट वगैरह के जांच करेलें आ सुनिश्चित करेलें की सबसे छोट जानवरन के भी भोजन मिल चुकल बा. जानवरन के सुरक्षित भईला के भरोसा कर लिहला के बाद उ आपन साधारण भोजन करे बईठेलें जेमे फिर से रोटी, सरसों के साग आ एक गिलास बकरी के गरम दूध शामिल बा.

काल्ह फिर से उ पहाड़ियन के ओर उहे आवाज लगावत, उहे रास्ता अपनावत, उहे संकेत पढ़त के लौटिहें. जंगल बदल गईल बा, काम कठिन हो गईल बा आ अब कमे लोग एके करे खातिर तैयार बा. हालांकि अब्बो मवेशी चरावे वाला आ जंगल एक दूसरा के पहचानता.

अनुवाद: विमल चन्द्र पाण्डेय