پلامو کی عورتوں کا سہارا – سنئی کی رسی

پھگونی چٹخ دار زرد رنگ والی ساڑی کی سلوٹیں اپنی کمر میں کھونسے ہیں اور اسے ٹخنوں تک رکھے ہیں، تاکہ وہ ان کی گھسی ہوئی چپلوں میں نہ الجھ جائے۔ جنوری کی کڑاکے کی ٹھنڈ میں وہ تیزی سے چل رہی ہیں۔ اپنے سر پر انہوں نے گہرے گلابی رنگ کا دوپٹہ لپیٹ رکھا ہے جو کبھی کبھی ہوا میں لہرا جاتا ہے۔ ہلکے بھورے سنہرے رنگ کا تقریباً ایک کلو سنئی (کروٹے لیریا جُنسیا) کا مڑا ہوا ایک لچھّا کسی فیشن ایکسیسری کی طرح ان کے کندھے سے لٹکا ہوا ہے۔

بائیں ہاتھ میں انہوں نے ایک دھاگہ سے لٹکا ’ڈھیرا‘ پکڑ رکھا ہے۔ ڈھیرا ایک عام، چار دانتوں والا لکڑی کا ایک تکلہ ہے، جس میں ایک ہُک ہوتا ہے۔ بیچ بیچ میں وہ اپنے دائیں ہاتھ سے اپنے چاروں طرف لپٹے بنڈل سے ایک دو ریشے کھینچتی ہیں، ڈھیرا کو تیزی سے گھماتی ہیں اور پھر دونوں ہاتھ سے ریشہ کو ایک پتلی رسی میں موڑ دیتی ہیں۔ جادو کی طرح چلنے والی ان کی انگلیاں موٹے سنئی (یا سَن) کے ریشوں کو ایک چمکدار، چکنے دھاگے میں بدلتی جاتی ہیں، جو ڈھیرا کے زمین پر گرنے تک لمبا ہوتا جاتا ہے۔ ’’ہی…ہی…چل چل۔‘‘ زمین سے تکلہ اٹھا کر سب کچھ پھر سے شروع کرتے ہوئے پھگونی دھیرے سے اپنی تین گایوں اور دو بکریوں کو ہانکتی ہیں اور پتلی رسی کو تکلہ کے چاروں طرف لپیٹ دیتی ہیں۔

خود سے باتیں کرتے ہوئے وہ کہتی ہیں، ’’پل بھر کو نظر ہٹی اور وہ بھاگ جائیں گی – سیدھے سرسوں یا گیہوں کے کھیتوں میں،‘‘ ۵۶ سال کی پھگونی دیوی جس صفائی سے یہ سب کرتی ہیں، آگے سڑک پر اپنی بکریوں پر نظر بنائے رہتی ہیں اور اپنی سہیلی سے باتیں کرتی جاتی ہیں، وہ مجھے حیران کر دیتا ہے اور میں اپنی حیرانی ظاہر کرتا ہوں۔ مجھے ان کی آواز میں فخر کا احساس ہوتا ہے، ’’ہم چودھری اس ہنر کے ساتھ ہی پیدا ہوتے ہیں۔ ہم اسے ماں کے پیٹ سے ہی سیکھ لیتے ہیں! اس گاؤں میں ہر بچہ یہ جانتا ہے۔‘‘

’’آپ کیا بنا رہی ہیں؟‘‘

پھگونی کے ساتھ چل رہی ان کی ۶۰ سالہ سہیلی ریتی دیوی کہتی ہیں، ’’ہم سُتری بناوَت ہئیں [ہم سُتری بنا رہے ہیں]۔‘‘ ان کے کندھے پر بھی ایک لچھا ہے اور دونوں تنگ اور سنسان ڈامبر کی سڑک پر چراگاہ کی طرف تب تک چلتی جاتی ہیں، جب تک وہ دوراہے پر نہیں پہنچ جاتیں۔ یہاں سے ریتی دیوی کا راستہ جدا ہو جاتا ہے، وہ دوسری طرف چل رہے اپنے مویشیوں کے پیچھے جاتی ہیں۔ پھگونی اپنی آبائی ناگپوری بولی میں ان سے اونچی آواز میں کہتی ہیں، ’’اپنے مویشیوں کو دوسرے حصہ میں وہاں لے آؤ۔‘‘ جس پر ریتی دیوی فوراً جواب دیتی ہیں، ’’ہو [ٹھیک ہے]…!‘‘

پلامو ضلع کے براؤں گاؤں کی ان عورتوں کا تعلق ملاّح برادری سے ہے، جو اکثر اپنے نام کے آگے ’چودھری‘ لگاتے ہیں۔ وہ جھارکھنڈ میں دیگر پس ماندہ طبقہ (او بی سی) میں درج ہیں۔ یہ برادری روایتی طور سے کھیتی، ماہی پروری اور اس سے متعلق سرگرمیوں میں مصروف ہے۔ حالانکہ، مچھلی پکڑنا موسم پر منحصر ہے اور پلامو میں ان کے گاؤں اور آس پاس کے علاقوں کے زیادہ تر تالاب برہمنوں اور راجپوتوں جیسی اونچی ذات کے قبضہ میں ہے۔ اس کا مطلب ہے کہ اگر ملاح مچھلی پکڑنے کے لیے ان کے تالاب استعمال کرتے ہیں، تو انہیں پیسے ادا کرنے پڑیں گے۔ لیکن یہ برادری سنئی (سَن) بھی اُگاتی ہے۔ انہیں کھیتی کے بعد اور ریشہ نکالنے سے پہلے سنئی (کروٹے لیریا جُنسیا) کے ڈنٹھل بھگونے کے لیے تالابوں تک رسائی مفت میں حاصل ہو جاتی ہے۔ یہی وہ ریشہ ہے، جس کا استعمال پھگونی سُتری بُننے میں کرتی ہیں۔

’’اب گائے چرائے جات ہی، تا کھالی کاہے بئی ٹھب، تا سُتری لے لے جات ہی اونَہی بانبھ [اب اگر مویشیوں کو چرانا ہی ہے، تو بیکار کیوں بیٹھیں؟ اس لیے ہم ریشہ ساتھ لے جاتے ہیں اور یہیں سُتری لپیٹتے ہیں۔]‘‘ گھر سے چراگاہ تک تقریباً پانچ کلومیٹر کے راستہ میں پھگونی کی انگلیوں کی متواتر رفتار ایک بار بھی نہیں رکتی۔ وہ ہمیشہ کی طرح صبح چار بجے سے اٹھی ہیں اور مویشی چرانے سے پہلے کھانا پکانے اور صفائی جیسے گھر کے سبھی کام نمٹا چکی ہیں۔

جب تک پھگونی صبح کے وقت چراگاہ پہنچتی ہیں، تب تک گاؤں کی ۳-۴ دوسری عورتیں وہاں پہنچ چکی ہیں۔ وہ چراگاہ کے ایک کونے میں چلی آئی ہیں اور رسی بنا رہی ہیں۔ ان کی نظریں ایک لمحہ دھاگے پر، تو دوسرے لمحہ مویشیوں پر تیزی سے گھومتی رہتی ہیں۔ ان کے آس پاس کچھ عورتیں جھک کر اپنے ننگے ہاتھوں سے مقامی گھاس پھوس، بَن تُلسی (اوسیمم گریٹی سِمم) کی خشک ٹہنیاں اکھاڑنے میں مصروف ہیں۔ یہ شام کو جلاون کے کام آئے گی۔ دوسری عورتیں بکریوں کے لیے گھاس کاٹ کر اکٹھا کر رہی ہیں۔

چراگاہ کے ٹیلہ پر گاؤں کے دہاڑی مزدور، ۴۵ سالہ نارائن چودھری بیٹھے ہیں۔جن دنوں راج مستری کا کام نہیں ہوتا، وہ بھی اپنے مویشی چرانے آتے ہیں۔ پھگونی کہتی ہیں، ’’وہ ہمارے گاؤں کا ہے، میرے سسر کی طرف سے رشتہ میں لگتا ہے۔‘‘

نارائن کی ۱۰ اور ۱۲ سال کی دو بھتیجیاں چراگاہ میں دوڑ رہی ہیں اور ہر ایک کے ہاتھ میں ایلومینیم کا ایک چھوٹا سا ڈبہ ہے۔ ان کا کام طے ہے – تازہ گوبر اکٹھا کرنا۔ جیسے ہی کوئی گائے گوبر کرتی ہے، بچے دوڑ کر اسے اپنے ننگے ہاتھوں سے بڑے قرینہ سے اپنے ڈبوں میں بھر لیتے ہیں۔ جب ان کے چھوٹے چھوٹے ڈبوں کا بوجھ بھاری ہو جاتا ہے، تو وہ انہیں پاس ہی ایک ڈھیر میں خالی کر دیتے ہیں اور جلدی سے مزید گوبر جمع کرنے نکل پڑتے ہیں۔

بعد میں گوبر سے ’چِپری‘ یعنی گوبر کے اُپلے بنیں گے، جو برادری کا کھانا پکانے کا بنیادی ایندھن ہے۔ پھگونی جیسی حاشیہ بردار برادریوں میں یہ کام عورتوں کے حصہ میں آتا ہے۔ ساتھ ہی پانی لانا، کپڑے دھونا، صفائی کرنا اور مویشیوں کی دیکھ بھال جیسے دوسرے کام بھی ان کے ذمہ ہوتے ہیں۔

لیکن پھگونی پر بوجھ زیادہ ہے۔ گھر کے تمام کاموں کے علاوہ انہیں فیملی کے لیے کمانا بھی پڑتا ہے۔ اس کا مطلب ہے اپنی تین ایکڑ زمین پر کھیتی اور سنئی کے ریشہ سے رسیاں بنانا۔ اپنے ۵۸ سالہ شوہر، شیام بہاری چودھری کے بارے میں وہ کہتی ہیں، ’’میں پورا گھر چلاتی ہوں۔ وہ کہیں جانے یا کمانے کی حالت میں نہیں ہیں۔‘‘ انہیں کئی سال پہلے پولیو ہو گیا تھا اور وہ کام کا بوجھ نہیں اٹھا سکتے۔ پھگونی کہتی ہیں، ’’اگر اناج کی ایک بوری بھی ڈھونی ہوتی ہے، تو وہ مجھے ہی کرنا پڑتا ہے۔‘‘

لیکن اس بار لگاتار تیسرے سال بھی کھیت میں کوئی اناج نہیں ہے۔ پھگونی خریف کے موسم میں دھان اور سنئی کی کھیتی کرتی تھیں اور ربیع میں گیہوں کی۔ وہ کہتی ہیں، ’’اس سال بھی ہم کھیتی نہیں کر پائے۔ دو سال سوکھا پڑا اور اس سال کھیت میں پانی نہیں رہا۔ ہماری زمین اونچائی پر ہے اور ہمارے پاس کنواں یا ٹیوب ویل نہیں ہے۔ جن کے پاس ہے [زیادہ تر اونچی ذات کے کسان] وہ کھیتی کر پا رہے تھے۔ یہ…‘‘ وہ اس ریشہ کی طرف اشارہ کرتے ہوئے کہتی ہیں جس پر وہ کام کر رہی ہیں، ’’یہ تین سال پہلے کا ہے۔‘‘

سنئی خریف کی فصل ہے، جسے عموماً دھان سے پہلے بویا جاتا ہے۔ اسے دو بار کاٹا جا سکتا ہے، یا تو اکتوبر میں جب فصل میں ابھی بھی پھول آ رہا ہوتا ہے اور وہ پوری طرح سے پکی نہیں ہوتی، لیکن ریشے تیار ہو چکے ہوتے ہیں، یا پھر مارچ میں جب پودا بڑا ہوتا ہے اور بیج پک جاتے ہیں۔ پھگونی بتاتی ہیں، ’’جب پورا بیج پک جائے گا نا، تا چھن چھن بجتا ہے پودا سوکھنے پر۔‘‘ حالانکہ، وہ مارچ تک انتظار نہیں کرتیں۔ وہ اکتوبر میں کٹائی کر کے کھیت کو ربیع کی فصل کے لیے تیار کر دیتی ہیں۔ سنئی ایک قدرتی کھاد کا بھی کام کرتا ہے۔ وہ کہتی ہیں، ’’اگر آپ اُس کھیت میں دھان یا گیہوں اُگاتے ہیں، تو پیداوار کافی اچھی ہوتی ہے۔‘‘

حالانکہ، تقریباً تین سال پہلے اپنے بیٹوں کی مہاجرت کے بعد پھگونی نے سن اُگانا بند کر دیا۔ وہ کہتی ہیں، ’’سنئی اُگانے میں کسی بھی دوسری فصل کے مقابلے زیادہ محنت لگتی ہے۔‘‘ سب سے پہلے فصل کو کاٹ کر کچھ دن کے لیے کھیت میں سوکھنے کے لیے چھوڑ دیا جاتا ہے۔ سوکھنے پر ڈنٹھلوں کے سرے کاٹے جاتے ہیں اور پھر ڈنٹھلوں کو ۵۰-۵۰ کے برابر ڈنٹھلوں میں باندھا جاتا ہے۔ پھر انہیں گاؤں کے پاس کے تالاب میں لے جایا جاتا ہے اور چار چھ دنوں تک ڈبویا جاتا ہے، جب تک کہ وہ نرم نہ ہو جائیں۔ پھگونی بتاتی ہیں، ’’جب یہ نرم ہو جاتا ہے تو ہم اسے پیٹتے ہیں، جس طرح دھوبی کپڑے کو پتھر پر پٹختا ہے۔ ہمارے بازوؤں میں درد ہونے لگتا ہے۔‘‘

اور اتنی محنت کے بعد آپ ریشہ کھینچتے ہیں۔ وہ کہتی ہیں، ’’ایک دم چرک بگولا کے پانکھ جئیسن سنئی کے ریشہ نکلے لا [ریشہ بالکل بگولا کے پروں جیسا نکلتا ہے]۔‘‘ اب انہیں یہ سارا کام اکیلے ہی کرنا پڑتا ہے۔ وہ کہتی ہیں، ’’اگر میں مزدوری کے پیسے دے دوں گی، تو ہمارے لیے کیا بچے گا؟‘‘ پہلے ان کے بیٹے کھیتوں میں ان کی مدد کرتے تھے۔ پھر ان کی شادی ہو گئی، بال بچے ہو گئے اور صرف کھیتی پر کئی لوگوں کی زندگی چلنا ناممکن ہو گیا۔ تین سال پہلے تیس سال کے ہو چکے دونوں بیٹے مزدوری کرنے چنئی چلے گئے۔

’’لیکن اس میں بھی پیسے نہیں ہیں۔ جو کماؤ، ٹھیکیدار لے لیتا ہے۔ وہ مجھے کبھی ۴۰۰ روپے بھیجتے ہیں تو کبھی ۵۰۰ روپے۔ کہیں کام پڑ گئیل تا، مہرارو بیر کھُرہورا میں باندھے بھر ناہیں ہوکھیلا، جنلی [یہاں تک کہ کسی ناگہانی حالت میں عورتوں کے پاس پلّو میں باندھنے لائق پیسہ بھی نہیں ہوتا]۔ چاہے کتنا بھی کما لیں، ٹھیکیدار ہمیں لوٹتے ہی ہیں۔‘‘ پھگونی لاک ڈاؤن سے پہلے کے اُس دور کو یاد کر کے غصے میں ہیں، جب ان کے بیٹے کو ایک ٹھیکیدار نے چھ مہینے سے تنخواہ نہیں دی تھی۔ وہ کہتی ہیں، ’’میں نے کسی طرح قرض لے کر گھر چلایا۔‘‘

گھر سے نکلے تقریباً تین گھنٹے گزر چکے ہیں اور پھگونی ایک بار بھی نہیں بیٹھی ہیں۔

’’آپ اتنی دیر سے کھڑی ہیں، کیا بیٹھ کر رسی نہیں بنا سکتیں؟‘‘

جواب میں وہ ہنس پڑتی ہیں اور مجھے یہ دکھانے کو کہ بیٹھ کر یہ کام کرنا کتنا مشکل ہے، وہ گھٹنوں کے بَل بیٹھ جاتی ہیں۔ ’’ہم کر سکتے ہیں۔ لیکن دیکھئے، جب میں کھڑی ہوتی ہوں تو میں اسے ایک ساتھ گھما اور رول کر سکتی ہوں، جس سے مجھے ایک لمبی رسی بنانے میں مدد ملتی ہے۔‘‘ جب پھگونی اس طرح آٹھ گھنٹے کام کرتی ہیں اور تقریباً ۳۰۰۰ بار ڈھیرا کاتتی ہیں، تو وہ ایک کلو سُتری بنانے لائق ضروری دھاگہ بناتی ہیں۔ کام ابھی آدھا ہی ہوا ہے۔ بعد میں وہ اسی طرح ایک اور لچھّا بنائیں گی۔

وہ بتاتی ہیں، ’’ابھی ہم ڈھیرا کو دکشناوَرت [گھڑی کی سوئیوں کی سمت میں] گھُما رہے ہیں۔ دوسری بار ہم اسے واماوَرت [گھڑی کی سوئیوں کی مخالف سمت میں] گھمائیں گے۔‘‘ اس کے بعد دونوں دھاگوں کو ایک ساتھ گونتھ کر رسی بنائی جائے گی۔ بازار میں ایک کلو کے عوض اپنی تقریباً ۲۰ گھنٹے کی محنت کو وہ ۱۰۰-۱۲۰ روپے میں بیچ دیں گی۔

’’ہی…چل، چل، ہو…‘‘ پھگونی مویشیوں کو تالاب کی طرف لے جاتی ہیں، تاکہ وہ پانی پی سکیں اور پھر انہیں دوسرے میدان میں لے جا سکیں۔ ڈھائی بج چکے ہیں اور وہ اپنے ساتھ لائے ریشے پر کام ختم کر چکی ہیں۔ اونچے میدان کی طرف بڑھتے ہوئے وہ لپیٹی گئی رسی سر پر رکھ لیتی ہیں۔

وہ میری طرف مڑ کر کہتی ہیں، ’’گاؤں کے اور بھی چرواہے ہیں جو رسیاں بناتے ہیں۔ میں بچپن سے ہی رسی بنا رہی ہوں، تب ایک بنڈل ۱۰-۱۵ روپے میں فروخت ہوتا تھا۔‘‘ پھگونی کہتی ہیں، ’’ایک وقت تھا جب پورا گاؤں سَن کی کھیتی کرتا تھا۔ اگر آپ دیوالی کے وقت آتے تو آپ پاتے کہ لوگ رسیاں بنانے میں اتنے مصروف ہیں کہ ان کے پاس کسی اور کام کے لیے وقت ہی نہیں ہوتا تھا۔ بچوں سے لے کر بزرگوں تک، ہر کوئی اسی میں مصروف ہوتا تھا۔‘‘

مگر کبھی منافع والا سنئی اب فائدہ کا سودا نہیں رہا۔ کئی گاؤں والے پہلے ہی سنتھیٹک پلاسٹک کی رسیاں بنانے لگے ہیں۔ پھگونی کہتی ہیں، ’’موسم کے دوران ہمیں سیمنٹ کی بوریاں مل جاتی ہیں، جنہیں کھول کر وہ رسیاں بناتے ہیں۔‘‘

ڈالٹن گنج کی تیسری نسل کے رسی کے تاجر سندر پاسوان کہتے ہیں، ’’سات سال پہلے بازار میں سنئی کی رسی کے بہت سے گاہک تھے۔ مگر اب کسانوں نے اس کی کھیتی تقریباً بند کر دی ہے۔ کبھی کبھی ایک دو کسان صرف چار پانچ کلو بیچنے آتے ہیں۔ سنتھیٹک نائلان کی رسیوں کی قیمت صرف ۶۰ روپے کلو ہے۔ انہوں نے سنئی رسی کے بازار کو پوری طرح سے برباد کر دیا ہے۔‘‘ پھگونی جو سنئی کی رسیاں بنانے میں مصروف ہیں، کہتی ہیں کہ سنتھیٹک رسی بنانے والوں کو بھی مناسب پیسہ نہیں ملتا۔

پچھلے سال انہوں نے ۴۰ کلو رسی ۴۰۰۰ روپے میں بیچی تھی۔ وہ پوچھتی ہیں، ’’آپ ہی بتاؤ، کیا میں اتنے پیسے میں دو پیٹ پال سکتی ہوں؟‘‘ اس کے علاوہ، ان کی واحد آمدنی ’اندرا گاندھی راشٹریہ دِویانگ پنشن یوجنا‘ کے تحت ان کے شوہر کو ملنے والی ۱۰۰۰ روپے کی ماہانہ پنشن ہے۔ تقریباً ۵۶ سال کی پھگونی خود جھارکھنڈ میں عورتوں کے لیے ’مُکھیہ منتری راجیہ وِرِدھّا وستھا پنشن یوجنا‘ کی ترمیم شدہ عمر کی حد کے تحت پنشن پانے کی حقدار ہیں، لیکن ان کا نام اس اسکیم میں نہیں جوڑا گیا۔ وہ کہتی ہیں، ’’جب تک سَن ہے، کر رہے ہیں، نہیں تو نہیں کریں گے۔‘‘

شام کے ۴:۳۰ بجے ہیں اور یہ لوگ مویشیوں کے ساتھ گھر کی طرف چل پڑے ہیں۔ ’’گاؤں میں ہمارے یہاں سَن کی رسی کے کئی استعمال ہوتے تھے۔ اس کا استعمال کھٹیا (چارپائی) بنانے، کنوؤں سے پانی کھینچنے یا مویشیوں کو باندھنے میں کیا جاتا تھا۔ رسی مضبوط ہوتی ہے، ساتھ ہی اتنی ملائم بھی کہ اس سے مویشی کی گردن پر زخم نہ ہو۔ اس کے علاوہ، ہمارے درمیان سَن کو مبارک مانا جاتا ہے اور ’گرہ پرویش‘ (مکان میں پہلی بار داخلہ) کے دوران یا شادی کا منڈپ سجانے میں اس کا استعمال ہوتا ہے۔‘‘ پھگونی، گروپ کے باقی لوگوں کے پیچھے پیچھے چلتے ہوئے بتاتی جاتی ہیں کہ اس پودے نے ان کی طبعی دنیا کو کس طرح ترتیب دیا ہے۔ وہ دھیرے سے سب سے چھوٹے بچھڑے کی پونچھ پکڑتی ہیں، تاکہ وہ پیچھے نہ چھوٹ جائے۔

’’راؤر بیاہ ہو گئیل؟ [آپ کی شادی ہو چکی ہے؟]‘‘ وہ آنکھوں میں ہلکی شرارت کے ساتھ میری طرف مڑ کر پوچھتی ہیں۔ میں کہتا ہوں، ’’نہیں۔‘‘ وہ ہنستے ہوئے کہتی ہیں، ’’جب شادی ہوتی ہے، تو دولہے کو پہلا سِندور سنئی کے ریشہ سے بھرنا ہوتا ہے۔‘‘

یہ اسٹوری مرنالنی مکھرجی فاؤنڈیشن (ایم ایم ایف) کی فیلوشپ کے تعاون سے لکھی گئی ہے۔

ترجمہ نگار: قمر صدیقی