‘हमन रोड ला मुड़सरिया बनाके सुत जाथन’

भगवती कहिथे, “बुहारी ह सात हिस्सा मं पूरा होथे.”

वइसे भगवती के उमर सिरिफ 20 बछर हवय, फेर वो ह अपन कला ला जानथे, वो ह ये काम ला अपन दाई अऊ परिवार के आन लोगन मन ले सीखे हवय. वो ह ये रिपोर्टर ला बताथे, “सबले पहिली हमन खजूर के पाना मन ला आधा काट लेथन, ओकर बाद पाना मन ला अलग करके राख देथन.”

वो ह ये पाना मन ला “टुकड़े टुकड़े [नान नान टुकड़ा]” कहिथे –नान नान पाना जेकर ले एक ठन बड़े पांख जइसने पाना बनथे. बुहारी बनेइय्या मन हरेक ला काटथें अऊ बंडल बनाके राखत जाथें. ओकर बाद वोला बांस के एक ठन छड़ी ले बंधे जाथे अऊ पन्नी [पॉलीथीन] ले कसके लपेटे जाथे. आखिरी हिस्सा के काम मं पाना मन ला पातर करे अऊ किनारा के छंटई करे ला होथे, वो ह हमन ला बुहारी बनाय के काम के हिस्सा मन ला बतावत कहिथे. ओकर चचेरी बहिनी देवली काम परथे तभेच बोलथे.

करीबन 20 बछर उमर के चेचेरी बहिनी मन काम के हरेक हिस्सा ला जान ले हवंय. पंजाब के मलौट मं भगवती के दाई सोनी देवी के संग फुटपाथ मं बइठे माइलोगन मन एक-दूसर के आगू कम जगा मं घेरा बनाके ठाढ़े हवंय. बढ़िया ढंग ले सीखे नाचा कस, जइसने वो मन एक-एक करके नाचत होंय, हरेक के काम पूरा हो जाथे त दूसर ला आगू के काम करे बर दे देथें.

देवली के घर के कला ला लेके उछाह ओकर अवाज मं साफ झलकथे: “हमन ला बचपना लेच बुहारी बनाय के मन करत रहय [ बहुत मन करते थे]. अऊ अभू घलो हवय.” वो ह ये कला अपन दाई रुखमनी ले सीखे हवय अऊ येला वो ह अपन तीन छोटे भाई-बहिनी मन ला घलो सिखाय ला चाहत हवय.

ओकर चचेरी बहिनी भगवती, विसे परिवार के काम ला लेके ओकरे जइसने उछाह मं हवय, फेर वो ह जियादा बेवहारिक हवय: “क्योंकि जब मेहनत करेंगे तो खाने को मिलेगा या मेहनत नहीं करेंगे तो क्या खाएंगे [काबर के जब मिहनत करबो त खाय ला मिलही धन मिहनत नइ करबो त काय खाबो]?” वो ह सवाल करत कहिथे. वो अपन दाई सोनी देवी ले ये सुनत बड़े होय हवय: “गर हमन बुहारी नइ बनाबो त हमन काय खाबो?” ये एक ठन अइसने भाव आय जेन ला राजस्थान के मेवाड़ इलाका ले पंजाब मं अवेइय्या आन बुहारी बनेइय्या मन घलो जताथें.

बुहारी बनाय के बूता परिवार मं कतको पुरखा ले चले आवत हवय. सोनी ह 10 बछर के उमर मं अपन दाई ले ये काम ला सिखिस अऊ अपन तीनों लइका मन ला घलो ये काम ला सिखाइस. येकरे सेती भगवती जब 10 बछर के होइस, त ये नानचिक नोनी ला घलो ये कमा सिखाय गीस.

“जब दाई ह बुहारी बनावत रहय, त वो ह मोला घलो बुहारी हाथ मं धरा देवय. मंय ओकर बताय ला मानंव, ठीक वइसने जइसने कोनो लइका अपन गुरूजी ले सीखथे. आँखों में लेकर सीख लेते हैं [हमन हरेक चीज ला देख के सीख लेथन],” भगवती कहिथे.

देवली हांसत कहिथे, “गर हमन सीखत रहिथन, त हमर महतारी मन हमन ला खिसियाथें धन थपरा मार के सिखाथें के हमन सही सीखत हवन धन नइ.”

भगवती घलो हांसत कहिथे, “डर दूनों डहर लगे रहिथे. एक कोती दाई के खिसियाय के, त दूसर कोती ताड़ पान के नोंक वाले धार के.”

अपन तीर मं पाना अऊ बुहारी धरे फुटपाथ मं बइठे तीनों झिन कभू-कभू मलौट टर्मिनल ले आवत–जावत बस मन ला हारन बजावत देखथें. श्री मुक्तसर साहिब, जेन ह दक्खिन मं राजस्थान अऊ उत्ती मं हरियाणा के सरहद पार करथे, राजस्थान के बनेच लकठा मं हवय. ये शहर के नांव अपन पंजाबी जूती सेती हवय. पढ़व: मोर जइसने पनही कऊनो घलो नई बनाय सकय’

नोनी मन ये बूता ला ‘औखा’ (कठिन) बताथें अऊ हरेक दिन येला बनाथें. परिवार के घुमंतू जिनगी सेती स्कूल जाय संभव नो हे – नोनी मन कभू स्कूल पढ़े बर नइ गीन.

ये मन के काम बिहनिया 10 बजे ले संझा 6 बजे तक ले चलत रहिथे, बीच मं थोकन सुस्ताथें घलो. भगवती कहिथे, “ एक परिवार दिन भर मं करीबन 20-25 बुहारी बनाथे.” वइसे बुहारी बेचे के काम धीरत हो सकथे. सोनी ह ये रिपोर्टर ला बताइस, “20-25 बुहारी बनाय मं पांच दिन लाग जाथे. हमन हरेक बुहारी ला सिरिफ 10 धन 15 रूपिया मं बेचथन.”

अवेइय्या-जवेइय्या लोगन मन के नजर मं लाय बर बुहारी ला लकरी के स्टेंड मं राखे जाथे. देवली कहिथे, “जेन ह खजूर पाना के बुहारी ला पसंद करथे, वो ह हरेक दिन बुहारी नइ बिसोवय. आखिर बुहारी अइसने जिनिस आय जेन ह हरेक घर मं पहिलीच ले होथे.”

जब वो ह बोलत रहिस, त ओमकार अऊ सुरजीत कौर नांव के महतारी-बेटा 5 कोस (16 किमी) दूरिहा पक्की टिब्बी गाँव के अपन दूकान मं बेचे बर बुहारी बिसोय बर रुक गीन. ओमकार के कहना आय के खजूर पाना ले बने बुहारी ह सीमेंट ईंटा वाले छत मं बढ़िया काम आथे. सुरजीत कौर कहिथे, “आन बुहारी मन सपाट सतह मन मं बढ़िया करके काम आथे.”

ग्राहेक ह चले जाथे अऊ माइलोगन मन अपन छोड़े काम ले आगू ला बनाय सुरु कर देथें.

“यहां रोटी-पानी कमाने के लिए आते हैं. हमारे बाप-दादा से आ रहे हैं [हमन इहाँ रोजी रोटी सेती आथन. जइसने हमर पुरखा मन आवत रहिन]”, सोनी कहिथे.

सोनी अऊ ओकर परिवार राजस्थान के कोनहा मं परे घुमंतू टोली बागड़िया समाज ले हवय. ओकर राज मं, समाज ला पिछड़ा वर्ग (बीसी) के रूप मं सूचीबद्ध करे गे हवय. सोनी कहिथे, “राजस्थान मं हमर करा पक्का घर नइ ये, सिरिफ नानकन जमीन के टुकड़ा हवय जिहां हमन अइसनेच एक ठन बस्ती मं रहिथन.”

बागड़िया समाज जंगल मं बस करेइय्या समाज आय अऊ पंजाब मं विमुक्त जनजाति (डीएनटी) मन मं सामिल हवय. मंथन के संस्थापक निदेशक तेजराम माली कहिथें, “ एक पईंत वो मन ला अपराधी करार देके समाज ह ओकर मन ले दूरिहा बना लीस, जेकर ले वो मन के विकास मं बाधा आइस. अब प्राकृतिक संसाधन नइ होय सेती वो मन ला अपन जिनगी गुजरे बर समाज डहर आय ला परत हवय.” ओकर गैर-सरकारी संगठन अजमेर, राजस्थान मं हवय अऊ ये जिला मं बागड़िया लोगन मन के संग काम करथे.

सोनी कहिथे, “राजस्थान मं कोनो काम नइ ये. पानी घलो बनेच कम हवय –हमन ला येला बिसोय ला परथे. इहाँ हमन ला दाना-पानी मिलथे अऊ हमन बुहारी घलो बेचे सकथन. इहाँ हमन ला बुहारी बनाय बर खजूर के पाना घलो मिल जाथे.”

त सोनी अऊ ओकर घरवाला सुखलाल, जेन मन दूनों चालीस बछर के हवंय, अपन तीन झिन लइका मन ला धरके राजस्थान के भीलवाड़ा जिला के गंगापुर ले करीबन 234 कोस (700 किमी) ले जियादा दूरिहा ले आवत रहे हवंय. वो मन के वोटर आईडी मं वो मन के पता ‘बस टेसन के तीर’, माली खेड़ा गांव, भीलवाड़ा लिखाय हवय – जेन ह वो मन के घुमंतू जिनगी के चित्र आय.

वो मन मलौट जाथें, कतको ट्रेन अऊ बस ला बदलत. ये बखत, ओकर मन के सबले बड़े बेटी अऊ बेटा के बिहाव हो चुके हवय अऊ अपन परिवार के गुजारा बर इहींचे रहिथें, सिरिफ वो मन के कुंवारी सबले छोटे बेटी भगवतीच ह वो मन के संग रहिथे. तीन परानी के ये परिवार बस टेसन तीर मं एक ठन झुग्गी (कुरिया) मं रहिथे.

वो मन अक्सर बरसात तक ले मलौट मं रहिथें - जून अऊ जुलाई बरसात के महिना मं वो मन ला फुटपाथ मं रहे मुस्किल हो जाथे. येकर छोड़, वो बखत वो मन के खजूर के पाना भींग जाथे अऊ करिया हो जाथे, जेकर ले बुहारी बनाय मुस्किल हो जाथे. बरसात सिराय के बाद, वो मन मलौट लहुट आथें.

बीते बछर, सोनी के गाँव ले 17 कोस (50 किमी) दूरिहा राजसमंद जिला के कलेसरिया गाँव ले अपन चार लइका मन ला धरके ओकर बहिनी रुखमनी अऊ 34 बछर के ओकर घरवाला शंकर घलो वो मन के संग आ गीन. वो मन सोनी के कुरिया के आगू रोड के वो पार झुग्गी मं रहे लगिन.

अब अइसने छै ठन झुग्गी मं राजस्थान के मेवाड़ इलाका ले आये लोगन मन रहिथें, जेन मन खजूर पाना के बुहारी बनाके अऊ बेचके अपन जिनगी गुजारथें. सोनी ह बताइस के बुहारी बनेइय्या आन परिवार मन बठिंडा, जालंधर, मोगा, जगरांव, कोटकपूरा जइसने शहर मन मं जाथें. वो ह कहिथे, “हमन अइसने शहर मन मं घूमत रइथन. हमन कभू एके जगा नइ टिकन.”

सोनी के कुरिया के पाछू एक ठन पनपनी ले घिराय नहानी के जगा हवय. फारिग होय बर थोकन दूरिहा मं तीर के झाड़ी आय. माईलोगन मन बर ये ह भारी दिक्कत के आय, खास करके महवारी के बखत मं. वो मन ला पैड (सैनिटरी नैपकिन) के जगा जुन्ना कपड़ा ला बऊरे ला परथे – पैड भारी महंगा आय जेकर खरचा वो मन उठाय नइ सकंय.

खुल्ला मं रहे सेती कुचराय के डर लगे रहिथे: “सड़क पर माथा टेक कर सोते हैं [हमन सड़क ला मुड़सरिया बनाके सुतथन]. हमर कुरिया रोड ले जियादा दूरिहा नइ ये अऊ गर कोनो अलहन होगे त हमर जम्मो परिवार खतम हो सकथे. फेर हमर करा काय उपाय हवय?” बेबस रुखमणी सवाल करथे.

सोनी अऊ सुखलाल के कुरिया बहिर मं ईंटा उपर रखाय टिन के डब्बा चूल्हा के काम करथे, जेन मं झिटका ला बारे जाथे. 10 रूपिया मं बिसोय कइंचा पताल के संग रोटी खावत सुखलाल कहिथे, “हमन अइसनेच खाथन.”

खजूर के पाना के जुफ्फा, जेन ला पुली कहे जाथे, ओकर झुग्गी के आगू फुटपाथ ऊपर बढ़िया ढंग ले बगरा के रखे गे हवय. सुखलाल कहिथे, “हमन येला 10 दिन तक ले घाम मं सूखाथन, जब तक के ये ह उज्जर रंग के झन हो जाय.”

ये ह हर बखत होय नइ सकय. सोनी कहिथे, “जब वाल्मीकि (सफई कर्मी) हमर उपर बगियाथें त हमन ला वोला पाछू डहर राखे ला परथे. कतको बेर त वो मन हमर पाना अऊ बुहारी ला घलो छीन लेथें.”

भगवती कहिथे, “वो मन पाना ला कचरा कहिके जराय के धमकी देथें. हमन वो मन ला काय कहि सकथन? आखिर ये ह सरकारी जमीन आय अऊ हर महिना मजूर मन रोड मन मं परे जिनिस मन के सफई करे के आर्डर मिलथे.”

जनवरी के जाड़ के एक बिहनिया, जब पारी ये परिवार ले गोठ बात करत रहिस, त रोड के सफई करत एक झिन सफाईकर्मी आइस अऊ ये परिवार ले पूछथे, “तुमन कब जावत हव?”

सोनी जनम ले अइसने असकत आय जेकर सेती वोला रेंगे मं मुस्किल होथे. ओकर हाथ घलो टेड़गा हवय अऊ ओकर ले काम करे घलो एक ठन चुनोती आय. “मोर बर खुद होक बइठे अऊ रेंगे मुस्किल आय. मोर बेटी भगवती मोर मदद करथे,” सोनी अपन गरम ब्लाउज अऊ घाघरा उपर शाल ला ओढ़त कहिथे.

बीते कुछेक महिना ले वो ह पेट पीरा ला घलो झेलत हवय. घर के लोगन मन निजी दवाखाना मं जाँच अऊ दवई मं 1,500 रूपिया खरचा करे हवय. डाक्टर ह वोला अल्ट्रासाउंड कराय के सलाह दे हवय, फेर ओकर करा ओकर लइक पइसा नइ ये. वो ह कहिथे, “एक कप चाहा बनाय के लइक घलो पइसा नइ ये.”

सरकारी अस्पताल तो हवंय, फेर सोनी फोकट इलाज के लाभ नइ लेगे सकय काबर के ओकर करा आधार कार्ड नइ ये. ओकर करा पहिचान के एकेच कागजात बीते बछर बनाय वोटर कार्ड हवय.

सुखलाल के किडनी मं पथरी हे अऊ जब ओकर करा पइसा होथे त तीर के एक ठन निजी क्लिनिक मं जाथे. ओकर सबले छोटे बेटी भगवती ला घलो किडनी मं पथरी के बीमारी रहिस. बीते बछर, ये परिवार ह ओकर इलाज बर अपन गाँव के एक झिन परोसी ले 40,000 रूपिया उधार लेय रहिस. ये उधारी ला चुकता करे बर वो मन जूझत हवंय.

परिवार ह होली के बाद राजस्थान लहुटे के जुगत करत हवय, जेन ह ये बछर 14 मार्च के परही, वो मन अपन आधार कार्ड बनवाहीं अऊ विकलांगता पेंसन बर अरजी दिहीं. हरेक परिवार करीबन 10,000 ले 12,000 रूपिया धरके राजस्थान लहुटथे.

“हमने तो 1 लाख भी नहीं देखा. 1 लाख कितना होता है हमने कभी देखा भी नहीं. लाख देखा होता तो हम मर भी जाये [हमन अपन जिनगी मं कभू 1 लाख (रूपिया) नइ देखेन. गर हमन देखे घलो होय रइतेन, त हमन मर जाय रइतेन].” रुखमनी ह भगवती अऊ देवली ला वो मन के दिखाय बर लगाय बुहारी के ओधा मं पथरा के संग लूडो खेलत देखके ताना मारत कहिथे.

अनुवाद: निर्मल कुमार साहू