’நாங்கள் வாழ மலைகள், வனங்கள் உள்ளன’

நாகி ஷிவா கர்நாடகாவின் பந்திப்பூர் தேசிய பூங்காவை ஒட்டியுள்ள லோக்கிரே கிராமத்தில் தனது குடும்பத்துடன் வசிக்கிறார். அவர் குருபா கவுடா சமூகத்தைச் சேர்ந்தவர். வீடுகளில் உதவியாளராக அவர் வேலை செய்கிறார்.

ஆறு மாத காலங்களில் அவர் தனது அன்றாட வாழ்க்கையை படங்களாக பிடித்துள்ளார்- மரங்கள், வயல்களும் அறுவடையும், விலங்குகள்- கர்நாடகாவின் சாம்ராஜநகர் மாவட்டத்தில் உள்ள இந்தியாவின் முதன்மை புலிகள் காப்பக எல்லையில் அவர் வசிக்கிறார். கேமராவை (ஒரு புஜிஃபிலிம் ஃபைன்பிக்ஸ் S8630) கையாள அவர் முதன்முறையாக கற்றுக் கொண்டார். அவரது புகைப்படக் கட்டுரை வனவிலங்குகளுடன் வாழ்வது பற்றிய மாபெரும் கூட்டு புகைப்படத் திட்டத்தின் ஒரு பகுதியாகும். பாரியில் வெளியான ஆறு புகைப்படத் தொடரில் இது இரண்டாவது. (சிறுத்தையை ஜெயாம்மா கண்டபோது என்ற தொடரின் முதல் கட்டுரை மார்ச் 8, 2017 அன்று வெளியானது.)

“என் மக்களை புகைப்படம் எடுக்க எனக்கு பிடித்திருக்கிறது. இதனால் மற்றவர்கள் இங்கு நாங்கள் எப்படி வாழுகிறோம் போன்ற எங்கள் பிரச்னைகளை புரிந்துகொள்ள முடியும்,” என்கிறார் 33 வயதாகும் நாகி ஷிவா. “நான் நிறைய புகைப்படங்கள் எடுக்க நினைத்தேன். ஆனால் நேரமில்லை. பசுக்கள் வீடு திரும்புவதை புகைப்படங்களாக எடுக்க நினைத்தேன். மழைக்கு பிறகு எங்கும் பசுமையாக உள்ளது. செம்மறி ஆடு அல்லது ஆடுகள் மேய்வதை அல்லது ஏரியில் பறவைகள் தண்ணீர் குடிப்பதை புகைப்படங்களாக எடுக்க விரும்புகிறேன்.”

தனி மரம்: “இது ஜகலா கந்தி மரம்[வேங்கை மரம்]. இதை யாரும் வீட்டில் அல்லது வயலில் வைக்க விரும்ப மாட்டார்கள். வீட்டில் வைத்தால் சண்டை வரும் என அவர்கள் நம்புகின்றனர். இந்த மரத்திற்கு நீண்ட காலமாகவே இப்பெயர் உள்ளது. நாங்களும் இம்மரத்தை வைத்துக் கொள்வதில்லை. ஆனால் விறகுக்கு பயன்படுத்துகிறோம்.”

வயல்களில் அறுவடை: “ எனது கிராமத்திற்கு அருகே பெண்கள் அவரை அறுவடை செய்கின்றனர். இப்புகைப்படத்தில் உள்ள அனைவரையும் எனக்கு தெரியும். இப்புகைப்படத்திற்காக காலை 7 மணிக்கு அங்குச் சென்றேன். ஆண்கள் மட்டுமல்ல பெண்களும் அதிகாலை வயல் வேலைக்குச் செல்வார்கள். நானும் வயல்களில் வேலை செய்துள்ளேன். இப்போது எனக்கு வேறு வேலை உள்ளது. வனத்திற்கு அருகில் உள்ள வயல்களில் நாங்கள் அனைவரும் கடுமையாக வேலை செய்கிறோம்.”

கவி ருத்ரேஸ்வரா: “மலைக்குன்றுகள், காடுகள் கொண்ட நிலப்பரப்பில் தான் நாங்கள் வாழுகிறோம். இது கவி ருத்ரேஸ்வரா மலைக் கோயில். இது புலிகள் காப்பகத்திற்கு பின்னால் உள்ளது. மலைக்குள் சிலையும், குகையும் உள்ளது. அது நம்மை மலை உச்சிக்கு அழைத்துச் செல்லும். யாரும் உள்ளே செல்ல முடியாது. சிறு பாதை உள்ளது. அவை பாம்புகளால் நிரம்பியுள்ளது. மலை உச்சியில் சிறிய கோயில் உள்ளது. நாங்கள் மலையேறி செல்வோம். மலை உச்சிக்கு யானைகளும், புலிகளும் வருகின்றன. ஆனால் நாங்களும் அங்குச் செல்கிறோம். அங்கு வழிபாடு நடத்துகிறோம். இது எனது லோக்கிரே கிராமத்திலிருந்து ஒரு கிலோமீட்டர தொலைவில் உள்ளது.”

வீட்டின் முன் காளைகளை மேய்க்கும் சகோதரர்: “இது பெங்களூரைச் சேர்ந்த ரெட்டிக்கு சொந்தமான வீடு. அவரையும், அவரது குடும்பத்தையும் எங்களுக்குத் தெரியும். அவர்கள் கிராமப் பள்ளிக்கு நிதியுதவி செய்துள்ளனர். பள்ளி மாணவர்களுக்கு உதவித்தொகை மற்றும் நோட்டு புத்தகங்களை அவர்கள் அளிக்கின்றனர். நான் அவர்கள் வீட்டில் முன்பு வேலை செய்தேன். அந்த வீட்டின் அருகே எனது சகோதரர் காளைகளை தனது வீட்டிற்கு அழைத்துச் செல்கிறார். அவர் தனது சொந்த வயலில் பசுக்களை மேய்க்கிறார். இந்த காளைகள் அவருக்கு சொந்தமானவை. எங்கள் கிராமங்களுக்கு அருகே வெளியாட்கள் பலரும் இதுபோன்ற பெரிய வீடுகள் கட்டுகின்றனர்.”

காளை: “இந்த காளை எனது சகோதரருக்கு சொந்தமானது. விவசாயத்திற்கு பசுக்கள் மிக உதவியாக உள்ளன. அவை வயல்களில் கடுமையாக வேலை செய்வதால் நாங்கள் அவற்றை வழிபடுகிறோம். இந்த காளையை பசவா என அழைக்கிறோம்.”

உணவு எடுத்துச் செல்லும் பெண்: “இது என் சகோதரி. காலையில் வயலில் வேலை செய்யும் கணவருக்காக அவள் உணவு எடுத்துச் செல்கிறாள்.”

காட்டுத்தீ: “ காட்டுக்கு யார் தீ வைத்தது என்று தெரியவில்லை. யாராவது காட்டிற்குள் சென்று தான் தீ வைத்திருக்க வேண்டும். பீடி குடித்துவிட்டு தீக்குச்சியை அணைக்காமல் போட்டிருக்கலாம். அல்லது இயற்கையாகவே இது நிகழ்ந்திருக்கலாம். காட்டிற்குள் கால்நடைகளை மேய்ப்பதற்கு அல்லது காட்டிற்குள் செல்வதற்கு கூட யாரும் இதை செய்திருக்கலாம். லோக்கிரே அருகே உள்ள தீயை அணைக்க வனத்துறையினர் போராடி வருகின்றனர். இரவு 11 மணி வரை அவர்கள் வேலை செய்கின்றனர்.”

மயில்: “ இந்த அழகிய மயிலைப் போன்று எங்கள் காட்டிற்குள் நிறைய அழகான பறவைகள், விலங்குகள் உள்ளன. நான் வேலை செய்யும் இடத்தில் இப்புகைப்படத்தை எடுத்தேன். மலையின் பாறையில் அது அமர்ந்துள்ளது. அது நீண்ட நேரம் அசையாமல் அங்கு நின்றது.”

உழுதல்: “நாங்கள் வயல்களில் வேலை செய்கிறோம். உழுகிறோம், விதைக்கிறோம், அறுவடை செய்கிறோம். காட்டிற்கு அருகில் வசித்தாலும் விவசாயம் செய்கிறோம். நாங்கள் கேழ்வரகு, சோளம், வெங்காயம் பயிரிடுகிறோம். இங்கு தண்ணீர் அதிகம் இல்லை. பெரும்பாலானவர்கள் பயிர்களுக்கு மழையை நம்பியுள்ளனர்.”

ஆடு மேய்ச்சல்: “ நாங்கள் கால்நடைகளை நம்பியுள்ளோம். அவை எங்கள் வாழ்வாதாரம். அவற்றை காட்டில் நாங்கள் மேய்க்கிறோம். செம்மறியாடுகளையும், ஆடுகளையும் மக்கள் வளர்க்கின்றனர். எங்களுக்கு கம்பளி கிடைக்கிறது. சில சமயம் பணத்திற்கு ஒன்று அல்லது இரண்டு ஆடுகளை விற்கிறோம். எங்கள் கிராமத்தில் பலரது வாழ்வாதாரம் அது. ஒவ்வொருவரிடமும் 50 ஆடுகள், செம்மறிகள் உள்ளன. எங்களிடம் 25 ஆடுகள் இருக்கின்றன. ஆனால் செம்மறி இல்லை. எங்களிடம் மேய்ப்பர் இல்லை. என் அம்மாவிற்கும் வயதாகிவிட்டதால் வெளியே செல்ல முடியாது. செம்மறி ஆடுகளையும் வெளியே விட முடியாது. அவற்றை உடனிருந்து மேய்க்காவிட்டால் திரும்பி வராது, விலங்குகளால் தாக்கப்படும். ஆடுகள் காணாமல் போனாலும் வீட்டிற்கு திரும்பி வந்துவிடும். இப்புகைப்படத்தில் என் மருமகன் அவற்றை மேய்த்துக் கொண்டிருக்கிறார். செம்மறிகள் என் சகோதரிக்கும், ஆடுகள் எனக்கும் சொந்தமானவை.”

லந்தனா செதுக்குதல்: "இவர் எனது மச்சான். இவர் லந்தனாவிற்கு வேலை செய்து கொண்டிருக்கிறார். [லந்தனா கமாரா நிலப்பரப்பின் பெரும்பகுதியை ஆக்கிரமிக்கும் களை தாவரம், இது குறிப்பாக தேசிய பூங்காவிற்குள் நிறைய உள்ளன]. அவர் பெயர் பசவா. அவர் ஒரு மாற்றுத்திறனாளி. எங்கள் சுய உதவிக்குழுவில் 9 பெண்களும், ஒற்றை ஆணாக பசவாவும் இருக்கிறார். எங்கள் குழுவிற்கு நாங்கள் லந்தனா சங்கம் என பெயரிட்டுள்ளோம். லந்தனாவில் மர சாமான்கள் போன்ற பொருட்கள் செய்ய நாங்கள் பயிற்சிப் பெற்றுள்ளோம். நான் தினக்கூலியாக 150 ரூபாய் பெற்றேன். உழைப்பிற்கு ஏற்ற பணம் கிடைக்கவில்லை. எனவே இதைவிட்டு வீட்டு வேலைகளுக்கு செல்ல தொடங்கினேன்.”

பயிற்சி: “குட்டேகரே கிராமத்தைச் சேர்ந்த ஜெனு குருபா பழங்குடி பெண்களுக்கு லந்தனா பதப்படுத்துதல் கற்பிக்கும் என் சகோதரி.”

கர்நாடகாவின் மங்கலா கிராமத்தில் உள்ள மாரியம்மா தொண்டு அறக்கட்டளை ஒருங்கிணைப்புடன் இப்பணியை மேற்கொள்ள ஜாரெட் மார்குலிஸ் உதவினார். 2015-2016 ஃபுல்பிரைட் நேரு மாணவர் ஆராய்ச்சி மானியம், பால்டிமோர் கவுண்டியின் மேரிலாண்ட் பல்கலைக்கழகத்தின் பட்டதாரி மாணவர் சங்க ஆராய்ச்சி மானியம், மாரியம்மா அறக்கட்டளையின் ஆதரவுடன், புகைப்படக் கலைஞர்களின் உற்சாகமான பங்கேற்பும், முயற்சிகளும் இத்திட்டம் வெற்றிப் பெற உதவியது. இக்கட்டுரையை மொழிபெயர்க்க உதவிய பி.ஆர்.ராஜீவின் பங்கு விலைமதிப்பறது. பாரியின் கிரியேட்டிவ் காமன்ஸ் கொள்கைகளின்படி புகைப்படக்காரர்களிடம் அனைத்து காப்புரிமைகளும் உள்ளன. அவற்றின் பயன்பாடு அல்லது மறுஆக்கம் குறித்த ஏதேனும் கேள்விகள் இருந்தால் அவற்றை பாரியில் தெரிவிக்கவும்.

When Jayamma spotted the leopard
Home with the harvest in Bandipur
Close encounters with the Prince of Bandipur
'That is where the leopard and tiger attack'
'This calf went missing after I took this photo'

தமிழில்: சவிதா