اگریوں کے زخموں پر نمک چھڑکتا پانی کا بحران

رضوانہ حاجی کی شخصیت میں جو پہلی چیز آپ کو نظر آتی ہے وہ ان کی خوبصورت، نم آلود اور بھوری بادامی آنکھیں ہیں۔ وہ انہیں پونچھتی ہیں، اپنے دوپٹے کے نیچے اپنے بالوں کو نفاست سے سنوارتی ہیں، اور رازدارانہ انداز میں مجھے بتاتی ہیں کہ دھوپ کے چشمے مردوں کے لیے ہوتے ہیں۔

’’میرے شوہر انہیں پہنتے ہیں،‘‘ وہ شریف کی طرف اشارہ کرتے ہوئے کہتی ہیں، جو نمک کے قریبی کھیت میں کرسٹل (بلوروں) پر بانچا (ریک) چلا رہے ہیں، اور ان کی آنکھیں سیاہ شیشوں کے پیچھے چھپی ہوئی ہیں۔

’’آپ کیوں نہیں پہنتیں؟‘‘ وہ دل کھول کر قہقہہ لگاتی ہیں گویا یہ خیال ناممکن ہونے کے ساتھ ساتھ عجیب بھی ہے۔ ’’یہاں بزرگ افراد ہیں، وہ کیا کہیں گے! ہماری برادری میں عورتیں دھوپ کا چشمہ نہیں پہنتیں،‘‘ وہ نرمی سے ہاتھ ہلاتی ہیں جیسے سوال سے پیچھا چھڑا رہی ہوں۔ وہ اپنی نم آلود آنکھیں ایک بار پھر پونچھتی ہیں، اور مزید کہتی ہیں، ’’میں شرمیلی ہوں۔‘‘ ان کی شرمندگی ان کے الفاظ کی طرح بھلی معلوم ہوتی ہے۔

رضوانہ کی آنکھوں سے مسلسل جاری رہنے والا پانی اور اس کی وجہ سے بینائی کو پہنچنے والا نقصان دراصل خشک اور نمکین ہواؤں کے طویل مدتی اثرات کا نتیجہ ہے۔ یہ ہوائیں آنکھوں میں دھول اور نمک کے ذرات جمع کر دیتی ہیں، جس کی وجہ سے آنکھیں رفتہ رفتہ خشک ہو جاتی ہیں اور بینائی کو نقصان پہنچتا ہے۔ یہ اگریوں میں پائی جانے والی سب سے عام بیماریوں میں سے ایک ہے۔ گجرات کے نمک کے طاسوں میں کام کرنے والوں کو اگریا کہا جاتا ہے۔ یہ اصطلاح ’’اگر‘‘ سے نکلی ہے، جو نمک کے کھیتوں کے لیے گجراتی لفظ ہے، جو علاقہ کچّھ کے چھوٹے رن میں تقریباً ۵۰۰۰ مربع کلومیٹر کے رقبے میں پھیلے ہوئے ہیں۔ رن ایک نشیبی اور پیالہ نما خطۂ زمین ہے، جو مانسون کے دوران ایک دلدلی علاقہ میں تبدیل ہو جاتا ہے، لیکن گرمیوں اور سردیوں میں خشک رہتا ہے۔

صحرا سے دلدلی زمین میں تبددیلی کی وجہ سے رن کے اس منفرد منظرنامہ میں غیرمعمولی حیاتیاتی تنوع پایا جاتاہے۔ یہ برسات کے موسم میں راج ہنس (فلیمنگوں) اور پیلیکن جیسے مہجری پرندوں کی پناہ گاہ بن جاتا ہے، جبکہ کالے ہرن، جنگلی سور اور چنکارہ جیسے جانوروں کے لیے ایک محفوظ ٹھکانہ ہے، جو یہاں پورے سال رہتے ہیں۔ جنگلی حیات کی آمد اس بات کی پیشین گوئی کرتی ہے کہ موجودہ سال کیسا ہوگا، اسی وجہ سے یہاں ایک مقامی کہاوت مشہور ہے: کچّھ ما کالے شوآوسے، ای آجیج دیکھائے۔ [کچّھ میں کل کو آج ہی دیکھا جا سکتا ہے]۔

جب پانی نکل جاتا ہے، تو اگریا اندر آ جاتے ہیں، خیمے نصب کرتے ہیں اور آٹھ ماہ تک یہیں قیام کرتے ہیں، اور زیر زمین کھارے پانی کو نمک میں تبدل کر دیتے ہیں۔ وہ ہندوستان کا ۷۵ فیصد سے زیادہ نمک پیدا کرتے ہیں۔

یہاں کا رن سیدھی لکیروں کی ایک الگ دنیا ہے، جس میں نمک کے طاسوں کی سفید کیاریاں، چوکور شمسی پینل اور زمین پر یکسانیت سے بنے مستطیل نمک کے ان وسیع طاسوں کی سفاکانہ فطرت میں مزید اضافہ کرتے ہیں۔

صبح ۱۰ بجے ہی رن میں سورج کسی پگھلے ہوئے گولے کی طرح دہکنے لگتا ہے، اور ہر شے کو ایک ناقابل برداشت سفید روشنی سے ڈھانپ لیتا ہے۔ یہ ایک ماورائی خطہ ہے، جس میں نمک کی ایک موٹی پرت افق تک پھیلی ہوئی ہے۔ نیچے کی سفیدی اور اوپر کی چمک سے مل کر ایک ایسی چکاچوند پیدا کرتی ہے جو اذیت ناک حد تک پہنچ جاتی ہے۔ گرمی ہر شے سے پانی نچوڑ لیتی ہے: ہونٹ پھٹ جاتے ہیں، پیاس سے حلق جلنے لگتا ہے، آنکھوں سے مسلسل پانی بہتا ہے اور ایڑیوں میں تپتی ہوئی زمین کی طرح گہرے اور تکلیف دہ شگاف پڑ جاتے ہیں۔

گرمیوں کے عروج پرصرف جھلسا دینے والی ہوائیں ہی دماغ کو ماؤف کرنے کے لیے کافی ہیں، لیکن یہ اگریوں کی زندگی کے ان بے شمار صدمات میں سے محض ایک صدمہ ہے۔ ’’گزشتہ چند سالوں سے یہاں ہر شخص کھارے پانی میں کھڑے ہونے کے لیے ربر کے جوتے پہنتا ہے۔ ہمارے بزرگ ایسا نہیں کرتے تھے،‘‘ نمک کے طاسوں میں کام کرنے والے ایک مزدور سَکلا اہیر کہتے ہیں۔ ’’اور ہمیں معلوم ہوا کہ (بزرگوں کی موت کے بعد) چتا کی آگ ان کے پیروں کو نہیں جلا پاتی تھی۔ کبھی ہم ان پر مزید گھی ڈالتے، اور کبھی ان کے جسم کے نہ جلنے والے اعضا کو اکٹھا کر کے الگ سے نمک کی قبر میں دفن کر دیتے تھے۔‘‘

ان نمک کے طاسوں میں کام کرنے والے ہندو اور مسلمان کنبوں کا مقدر ایک جیسا ہے، ان کی جلد کی رنگت ایک جیسی پیلی ہے، آنکھیں ایک جیسی نم آلود ہیں، ان کا کھانا باجری نو روٹلو، ماگ نی دال (باجرے کا روٹلہ اور مونگ کی دال) ایک جیسا ہے، اور سب سے بڑھ کر یہ کہ ان سب کے لیے پانی کی قلت بھی ایک جیسی ہے۔ یہاں زندگی کا دارومدار ایک اہم ترین وسیلہ، میٹھے پانی پر ہے۔ یعنی پینے کا وہ پانی جس میں نمک کی آمیزش نہ ہو۔

رضوانہ کی عمر ۲۲ سال ہے، ان کے چار بچے ہیں، اور انہوں نے اپنی پوری زندگی اگریا کے طور پر گزاری ہے۔ نہ تو وہ اسکول گئی ہیں اور نہ ہی شارق۔ آگریا گھرانے آٹھ مہینے رن میں گزارتے ہیں جس کی وجہ سے ان کے بچے اسکول نہیں جا پاتے۔ یہ ایک ناقابل یقین حد تک سخت اور مشکل طرز زندگی کا ایک پہلو ہے۔ جس دن پاری نے رضوانہ سے ملاقات کی، انہوں نے چار یا پانچ دن سے غسل نہیں کیا تھا۔ وہ عید کے موقع پر جب اپنے گاؤں تگا (راپر بلاک میں) واپس جائیں گی، تو غسل کریں گی۔ پچھلے تین سالوں سے رضوانہ کا کنبہ ایک پرائیویٹ ٹینکر سے پانی خرید رہا ہے، جو ہر ۱۰ سے ۱۵ دن بعد پانی فراہم کرتا ہے۔ مقامی لوگوں کا کہنا ہے کہ کلکٹر کے دفتر نے ۲۰۲۳ سے علاقہ کے لیے ٹینکر سے پانی کی فراہمی کا ٹھیکہ نہیں دیا ہے۔ اس سے پہلے پنچایت مفت میں پانی فراہم کرتی تھی، لیکن پانی کی فراہمی کے محکمہ نے کبھی بھی واجبات کی ادائیگی نہیں کی، اس لیے یہ کام اب رک گیا۔ اب ان کنبوں کو پانی کے پرائیویٹ سپلائر کے رحم و کرم پر چھوڑ دیا گیا ہے۔

رضوانہ کہتی ہیں، ’’میرا کنبہ چھ افراد پر مشتمل ہے، جس میں دو بیٹیاں، دو بیٹے اور ہم میاں بیوی شامل ہیں۔ جب بھی ٹینکر آتا ہے، تو ہم تین بیرل [فی بیرل ۱۰۰ لیٹر] پانی خریدتے ہیں۔‘‘ اگر ٹینکر دس دنوں میں ایک بار آتا ہے، تو اس کا مطلب ہوا فی کس روزانہ تقریباً پانچ لیٹر پانی۔ ’’جتنی زیادہ گرمی بڑھتی ہے ہمیں پانی کی اتنی ہی زیادہ ضرورت ہوتی ہے۔ جب پانی کم ہو جاتا ہے اور ٹینکر کے آنے میں کچھ اور دن باقی رہتے ہیں، تو ہمیں تمام غیرضروری سرگرمیاں جیسے غسل کرنا، کپڑے دھونا، برتن دھونا وغیرہ کو روکنا پڑتا ہے۔ ہمارے پاس بس اتنا ہی ہے۔‘‘ جس پانی کی طرف وہ اشارہ کر رہی ہیں وہ پلاسٹک کے ڈرم کے اندر گدلا، تقریباً سیاہ نظر آ رہا ہے۔ پاس ہی ایک چھوٹا پیالہ پرندوں کے لیے رکھا گیا ہے، جو پیاس بجھانے کے لیے یہاں رکتے ہیں۔

یہاں ہر شخص اور ہر چیز پیاسی ہے۔

اس بات کا کوئی طے شدہ معیار نہیں ہے کہ کسی شخص کو روزانہ کتنے پانی کی ضرورت ہوتی ہے، لیکن اقوام متحدہ کا کہنا ہے کہ ہر انسان کو یہ حق حاصل ہے کہ روزانہ اسے کم از کم ۵۰ لیٹر پانی دستیاب ہو۔ اگر ممبئی، دہلی اور بنگلورو جیسے شہری علاقوں کے سیاق و سباق میں دیکھا جائے، تو وہاں ہر شخص روزانہ ۱۵۰ سے ۲۰۰ لیٹر پانی استعمال کرتا ہے۔ جل جیون مشن کے تحت، حکومتوں کا مقصد دیہی علاقوں میں فی شخص ۵۵ لیٹر پانی فراہم کرنا ہے، لیکن رن جیسے علاقوں میں یہ مقدار گر کر محض پانچ لیٹر رہ جاتی ہے۔

گزشتہ دو دہائیوں کے دوران گجرات میں پانی کے انتظام و انصرام کی مکمل تشکیل نو کر کے اسے نجی شعبہ کے حوالے کر دیا گیا ہے۔ ’’گجرات میں آبی وسائل کا محکمہ پانی فراہم نہیں کرتا ہے۔ یہ نجی کمپنیوں کو ٹھیکے فراہم کرتا ہے،‘‘ پنکتی جوگ کہتی ہیں، جو ایک مقامی کارکن ہیں اورکئی دہائیوں سے ریاست میں آبی وسائل کے انتظام و انصرام پر نظر رکھے ہوئے ہیں۔ ’’کچھ سال پہلے سریندر نگر میں پانی کے شدید بحران کے دوران، میں نے اس علاقہ میں پانی فراہم کرنے والے ٹینکروں کی تعداد کے بارے میں معلومات کے حق (آر ٹی آئی) کے تحت سوالات جمع کرائے تھے۔ محکمہ نے کوئی جواب نہیں دیا، اور پرائیویٹ کمپنیاں ہمیں جوابدہ نہیں ہیں۔ لوگ جب رن میں داخل ہوتے ہیں تو وہ غائب ہو جاتے ہیں، اس لیے حکومت انہیں کچھ نہیں دیتی، پانی بھی نہیں۔‘‘

سال ۲۰۲۴-۲۵ کی سی اے جی رپورٹ میں بتایا کیا گیا ہے کہ ۲۰۰۹ اور ۲۰۲۵ کے درمیان ریاست نے واٹر لون (پانی کے قرضوں) پر ۷۳ء۳۲۳ کروڑ روپے خرچ کیے، جو انفرادی گھریلو پمپ، بورویل، پائپ لائنیں، ٹریٹمنٹ پلانٹ وغیرہ لگانے میں مدد فراہم کرنے کے لیے حکومت کا ایک مالیاتی میکنزم ہے۔ یہ رقم اب ’’غیر فعال قرضوں کے کھاتوں‘‘ میں پڑی ہے۔ اس کا مطلب ہے کہ پانی کی فراہمی اور صفائی کے محکمہ نے ۱۶ سالوں میں اتنی بڑی رقم ایسے کھاتوں کو جاری کی جو جلد ہی غیرفعال یا بند ہو گئے۔ لہذا قرضے تو اب بھی ریکارڈ میں موجود ہیں، لیکن وہ پیسہ (جس مقصد کے لیے دیا گیا تھا) موجود نہیں ہے۔

سی اے جی کی رپورٹ اس بات کی نشاندہی نہیں کرتی ہے کہ وہ پیسہ کہاں گیا، جس کا مطلب یہ ہے کہ اب اس کی وصولی ناممکن ہے اور اسے طے شدہ منصوبہ کے مطابق خرچ نہیں کیا گیا۔ یہ صورتحال یقینی طور پر پانی کے بہتر اور فعال بنیادی ڈھانچہ کی جانب اشارہ نہیں کرتی ہے۔

کچّھ کے ضلع کلکٹر آنند پٹیل کو ارسال شدہ ای-میلز کا ابھی تک کوئی جواب نہیں ملا ہے۔

گجرات میں پانی کا انتظام و انصرام ابتری کا شکار ہے، اور اس میں فریقین کی اتنی بڑی تعداد شامل ہے کہ ان کا احتساب تقریباً ناممکن ہے۔ زیادہ تر لوگ ہمت ہار جاتے ہیں۔ ’’سیزن کے آغاز میں، میں نے رن میں مقیم افراد کی تعداد کا تخمینہ لگایا، تاکہ ان کے لیے پانی کی مناسب فراہمی کو یقینی بنایا جا سکے،‘‘ برادری کی فلاح و بہبود کے لیے کام کرنے والی تنظیم ’اگریا ہت رکشک منچ‘ سے تعلق رکھنے والے گھنشیام بھائی کہتے ہیں۔ ’’کاغذی کارروائی کو بلاک سے ضلع کی سطح تک منتقل کرنے میں مہینوں لگے۔ جب تک کاغذی کارروائی بھج پہنچی [جہاں کچّھ کلکٹریٹ واقع ہے]، سیزن ختم ہو گیا تھا۔ اس دوران لوگوں نے پرائیویٹ ٹینکروں سے مہنگے داموں پر پانی خریدا۔‘‘

پاری نے ریاستی سطح پر بُھج کے راپر بلاک میں موجود حکام اور ٹینکر چلانے والی پانی کی کمپنیوں سے رابطہ قائم کرنے میں ہفتوں گزارے۔ حکومتی نمائندوں نے کسی بھی سوال کا جواب نہیں دیا، جبکہ نجی کمپنیوں کے اہلکاروں نے ہمیں جواب طلب کرنے کے لیے مقامی حکام سے رابطہ کرنے کو کہا۔ یہاں کی تین بڑی کمپنیوں میں سے ایک سلور سالٹ انڈسٹریز کے مالک بھومک پنج تبصرہ کے لیے دستیاب نہیں تھے۔ ان کے مینیجر بھولا رام نے دعویٰ کیا کہ کمپنی نے پانی کے ٹینکروں کی ادائیگی کر دی ہے۔ یہ ایسا دعویٰ ہے جسے مسترد کرتے ہوئے اگریوں نے ہمیں ایک سیزن کی سپلائی کے لیے ۶۰۰۰ سے ۷۰۰۰ روپے کے درمیان کی ادائیگیوں کی رسیدیں دکھائیں۔

آٹھ مہینوں کے بعد رضوانہ اور شارق کی کمر توڑ محنت کا نتجہ یعنی کرسٹلائزڈ نمک ان کے پاس ہے۔ کسی اچھے سیزن میں اس کے لیے انہیں۵۰ ہزار روپے تک مل جاتے، لیکن آج کل وہ ایک سیزن میں تقریباً ۳۰ ہزار روپے ہی کما پا رہے ہیں۔

حالانکہ قیمتوں میں اتار چڑھاؤ آتا رہتا ہے، لیکن نمک طاس مالکان کو فروخت ہونے والے ہر کلوگرام نمک پر اوسطاً ۵۸ پیسے ملتے ہیں۔ اگر ایمیزون سے ۲۷ روپے فی کلوگرام کے حساب سے خریدے گئے ٹاٹا نمک کا طاس مالکان کو ملنے والی قیمت سے موازنہ کریں تو یہ قیمت حیرت انگیز طور پر ۴۵۵۵ فیصد زیادہ ہے۔ جہاں تک طاس مزدوروں کا تعلق ہے، ان کا کہنا ہے کہ انہیں فی کلو صرف ۱۵ پیسے ملتے ہیں۔ یہی نہیں کھارا پانی جلد پر پپڑی پڑنے اور موٹا ہونے، السر ہونے، دراڑیں پڑنے، چھالے پڑنے کے ساتھ ساتھ جلد کی سوزش اور جلد کے زخموں کا سبب بنتا ہے۔ پانی کی کمی کے ساتھ زندگی گزارنے سے یہاں کے لوگوں میں ہائی بلڈ پریشر، آنکھوں کے مسائل، غذائیت کی کمی پائی جاتی ہے، اور سب سے بڑھ کر وہ معدے کی بیماریوں، پیٹ درد، یرقان، اسہال اور ٹائیفائیڈ کا شکار بن جاتے ہیں۔

آدیسر کا پرائمری ہیلتھ سینٹر (پی ایچ سی) نمک کے طاس سے ایک گھنٹہ کی مسافت پر واقع ہے۔ یہ سینٹر مذکورہ بیماریوں میں سے کسی سے بھی نمٹنے کی صلاحیت نہیں رکھتا ہے۔ ہم نے دیکھا ہے کہ اس میں نہ تو کھانسی کی دوا ہے، نہ درد کش ادویات اور نہ ہی پٹی دستیاب ہے۔ سب سے اہم بات یہ ہے کہ وہاں پانی تک نہیں تھا۔ نہ تو بیت الخلاء استعمال کے قابل تھا اور نہ ہی آپریشن تھیٹر کام کر رہا تھا۔

’’چونکہ یہ پی ایچ سی ایک نشیبی علاقہ میں تعمیر کیا گیا ہے، اس لیے مانسون کے دوران یہاں پانی بھر جاتا ہے۔ مزید یہ کہ، گزشتہ سات سالوں سے جب سے یہ مرکز قائم ہوا ہے، اس کا بیت الخلاء تک قابل استعمال نہیں ہے۔ ہمارے پاس عمارت اور ڈھانچہ تو بہترین ہے، لیکن اس کا کوئی فائدہ نہیں،‘‘ نام ظاہر نہ کرنے کی شرط پر ایک مقامی اہلکار نے بتایا۔ انچارج ڈاکٹر اس وقت چھٹی پر تھے۔

رن کے قریب ترین گاؤں پلانسوا کا ذیلی مرکز بدھ کی دوپہر کو مقفل تھا۔ ہمیں بتایا گیا کہ ڈاکٹر صاحب کسی رشتہ دار کی شادی میں شرکت کے لیے گئے ہوئے ہیں۔

بچے کی پیدائش کے لیے گاؤں والے ۱۲۰ کلومیٹر دور پاٹن شہر کے ایک پرائیویٹ ہسپتال میں جاتے ہیں۔ وہاں بشمول ٹرانسپورٹ اور قیام ۲۰ سے ۲۵ ہزار روپے تک خرچ ہو جاتے ہیں۔ بہت سے کنبے گھر پر ہی بچے کی پیدائش کو ترجیح دیتے ہیں، جس سے بچے اور ماں دونوں کے لیے خطرات بڑھ جاتے ہیں۔ لیکن ’’اگریا بہنیں سرکاری ریکارڈ سے غائب ہیں،‘‘ سماجی کارکن پنکتی جوگ کہتی ہیں۔ ’’انہیں تولیدی صحت کی کوئی سہولت فراہم نہیں کی جاتی ہے، اور جب وہ رن میں ہوتی ہیں تو زچگی یا بچوں کی اموات کے اعداد و شمار حاصل کرنا تقریباً ناممکن ہو جاتا ہے۔ یہ ایک شماریاتی بلیک ہول ہے۔‘‘

سال ۲۰۲۳ کی ایک میڈیا رپورٹ میں حکومتی صحت کے انتظام کے اعداد و شمار کا حوالہ دیتے ہوئے کہا گیا ہے کہ کچّھ ریاست کے بدترین علاقوں میں شامل ہے، جہاں تین ماہ کی مدت میں ’’نوزائیدہ بچوں کی اموات‘‘ کے ۱۶۵ معاملے درج کیے گئے۔

رضوانہ ایک بار پھر اپنی آنکھیں پونچھتی ہیں، اپنے شوہر کی طرف دیکھتی ہیں، جو اب بھی کھارے پانی میں پانجا چلا رہے ہیں، اور کہتی ہیں، ’’مجھے یہاں کام کرنا پسند نہیں ہے، لیکن مجھے اپنے شوہر کا ہاتھ بٹانا پڑتا ہے۔ ان کا بلڈ پریشر کم ہے، اور گرمی کی شدت کی وجہ سے وہ بیہوش ہو جاتے ہیں۔ ان کے سر میں مسلسل درد رہتا ہے جس میں گرمیوں کی شدت کے ساتھ مزید اضافہ ہو جاتا ہے۔‘‘ وہ اپنی بات ختم کرتے ہوئے مدھم آواز میں کہتی ہیں، ’’یہاں کون کام کرنا چاہے گا…اس تپتی ہوئی گرمی میں۔‘‘

پانی کی شدید تجارت کاری (کموڈیفِکیشن) نے اگریوں جیسے خشک سالی کے شکار گروہوں پر قلت مسلط کردی ہے، جبکہ چند دیگر عناصر اس بحران سے فائدہ اٹھا رہے ہیں۔ اگر رضوانہ کو صحت کی سہولیات تک رسائی حاصل ہوتی، تو ان میں ’ایپی فورا‘ کی تشخیص ہو گئی ہوتی۔ اس میں آنسوؤں کی نالی میں رکاوٹ کی وجہ سے آنکھوں سے مسلسل پانی نکلتا رہتا ہے۔ یہ قابلِ علاج ہے، اس سے بچاؤ ممکن ہے، اور بعض اوقات اسے جزوی طور پر ٹھیک بھی کیا جا سکتا ہے۔ اگر اگریا برادری کو اپنی صحت سے متعلق صحیح جانکاری ہوتی، تو لُبریکیٹنگ (چکنائی والے) آئی ڈراپس اور دھوپ کے چشمے ہی ان کے لیے بہت مددگار ثابت ہوسکتے تھے۔ انشورنس کی غیر موجودگی میں ایپی فورا کے علاج پر۱۰ ہزار روپے تک لاگت آ سکتی ہے، اور اگر پاٹن کے ہسپتالوں تک پہنچنے کے لیے پرائیویٹ جیپ کرایہ پر لیا جائے تو مزید ۵۰۰۰ روپے خرچ ہوتے ہیں۔ اسی لیے یہاں لوگ تشخیص اور علاج کے لیے کبھی کبھار لگنے والے مفت طبی کیمپوں پر ہی بھروسہ کرتے ہیں۔

رضوانہ کہتی ہیں، ’’میں ان لوگوں پر لعنت بھیجتی ہوں جو ہمیں اس طرح کی زندگی گزارنے پر مجبور کرتے ہیں۔ میں چاہتی ہوں کہ وہ بھی اس تکلیف سے گزریں۔‘‘

رن میں پانی کا بحران ۲۱ویں صدی کے ڈسٹوپیا کی یاد دلاتا ہے – جہاں مختلف طبقوں کو ان کی قوت خرید کے مطابق پانی فراہم کیا جاتا ہے۔ نجکاری کا ایک ’بٹر فلائی ایفیکٹ‘ یہ ہے کہ اب پوری کی پوری آبادیاں ایسی بیماریوں میں مبتلا ہیں جن سے آسانی سے بچا جا سکتا تھا اور جن کا علاج ممکن ہے۔

بہرحال، کَچّھ میں کل کی جو تصویر ہونی چاہیے، وہ آج ہی صاف نظر آ سکتی ہے۔

یہ اسٹوری پاری سینئر فیلوشپ ۲۰۲۵ کے تحت شائع کی گئی ہے۔