अगिला जनम मोहे अगरिया ना कीजो

रिजवाना हाजी के देखम, त राउर नजर सबले पहिले उनकर चिनिया बदाम जइसन भुअर आंख पर ठहर जाई. सुंदर आ तनी पनियाइल. ऊ आपन आंख पोंछेली आ केस (बाल) सब समेट के ओढ़नी के नीचे करत कहेली, ‘चश्मा त मरद लोग खातिर होखेला.’

“हमार घरवाला पहिरेलन,” ऊ आपन मुड़ी हिलावत शरीक ओरी इशारा कइली. शरीक लगहीं के नीमक के खेत में रेक खींचत बाड़न. उनकर आंख पर करियर चश्मा चढ़ल बा.

“तू काहे ना?” ऊ जोर से हंस देत बाड़ी, जइसे ई कोई अजीब आ असंभव बात होखे. “इहंवा बूढ़ लोग रहेला. ऊ लोग का कही! हमनी के समाज में मेहरारू लोग धूप के चश्मा ना पहिरे,” ऊ तनी हाथ हिलावत कहली, जइसे बात के हवा में उड़ावत होखस. आंख से आवत पानी फेरो पोछली आउर कहली, “लाज लागेला.” उनकर ई संकोच भी उनकर बाते जइसन मीठ रहे.

आंख से बेर-बेर पानी आवे से रिजवाना के लउके में दिक्कत आवला. जादे देर ले सूखल आ खारा हवा में काम करे के ई सब नतीजा बा. नीमक के खेत में काम करे से आंख में धूरा आ नून के कण भर जाला आ धीरे-धीरे आंख के खराब कर देवेला. ई बेमारी कच्छ (गुजरात) के अगरिया मजूर लोग के बीच आम बा. अगरिया शब्द ‘अगर’ से निकलल बा, गुजराती में एकर मतलब नून के खेत होखेला. गुजरात के छोट कच्छ के रण में नीमक के खेत कोई 5,000 वर्ग किमी ले फइलल बा.

मौसम के मिजाज बदलते रेगिस्तानी रण, पानी वाला इलाका बन जाला आ नाना प्रकार के जीव-जंतु से भर जाला. बरसात में ई फ्लेमिंगो आ पेलिकन जइसन परदेसी चिरइयन खातिर शरणस्थली बन जाला. एकरा अलावे ब्लैकबक, सूअर आ हिरन जइसन जानवर सब त इहंवा सालो भर घूमत रहेला. जंगली जानवर सब के आवे से अंदाजा लागेला कि आवे वाला साल कइसन रही. इहंवा एगो कहावत प्रचलित बा, कच्छ में काल्ह का होई, आजे देखाई दे जाला.

पानी निकल गइला पर अगरिया लोग इहंवा आके डेरा डाल लेवेला. आठ महीना ऊ लोग इहंई रहेला आ जीमन के नीचे के खारा पानी से नून बनावे के काम करेला. भारत के 75 प्रतिशत से जादे नीमक इहंई बनेला.

रण के दुनिया में हर चीज रउआ एक लाइन में लउकी. नीमक के उज्जर चमकत खेत, चौकुठ सोलर प्लेट आ जमीन पर बिछल आयताकार ढांचा. ई सब एह इलाका के कठोर रूप के आउर मारक बनावेला. भोरे दस बजे रण में सूरूज आग के गोला नियर धधके लागेला, चारो ओरी चुभे वाला उज्जर रोशनी फइल जाला. ई जगह बाकी दुनिया से एकदम अलगे लागेला. दूर क्षितिज तक नीमक के मोट परत फइलल रहेला. धरती आ आसमान के सफेदी एक होके अइसन तेज चमकेला कि आंख चुंधिया जाला. गरमी एतना तेज कि लागी देह के पानी पी गइल. होठ फाटेला, गला पियास से जरत रहेला, आंख से हरदम पानी आवत रहेला. एड़ी अइसे फाट जाला जइसे सूखल धरती में दरार पड़ जाला.

गरमी चरम पर होला, त दिमाग एकदम सटक जाला. बाकिर एही स्थिति में अगरिया लोग हर दुख झेल के जी रहल बा. नीमक के खेत में काम करे वाली सकला अहीर कहेली, “पछिला कुछ साल से खारा पानी में काम करे घरिया लोग रबर के जूत्ता पहिरे लागल बा. पहिले अइसन सुविधा ना रहे. एही से पहिले मरला पर चिता में जल्दी गोड़ ना जरत रहे. केतना बेरा त हमनी के चिता में घीव डाल के आग तेज करे के पड़े. जवन हिस्सा ना जर पावत रहे, ओकरा निकाल के अलग से नीमक में गाड़ देवल जात रहे.”

नीमक के खेत में काम करे वाला हिंदू होखे, चाहे मुसलमान, सबके हालत एके बा. पियर पड़ल मुंह, आंख से हरदम आवत पानी. दूनो के खाना एक- बाजरा के रोटी आ मूंग दाल. डर एक- पानी. आ जिनगियो एक- पिए के साफ पानी, जे खारा ना होखे.

बाइस बरिस के रिजवाना के चार ठो बच्चा बा. उनकर पूरा जिनगी अगरिए बन के बीतल. ऊ आ उनकर घरवाला, शारीक कबो स्कूल नइखन गइल. अगरिया परिवार के साल के 8 महीना रेगिस्तान में नीमक उगावे के काम करे के पड़ेला. एही से बच्चा लोग के स्कूल में नाम लिखावल मुश्किल हो जाला. ई बहुते कठिन जिनगी के बस एगो दुख बा, असली संघर्ष त एकरा से भी बड़ा बा. जवन दिन पारी रिजवाना से भेंट करे गइल, ऊ चार-पांच दिन से नहइले ना रहस. ऊ ईंद पर आपन गांव टागा (रापर ब्लॉक) जाली तबे उनकर नहान होखेला. पछिला तीन बरिस से, रिजवाना के परिवार एगो प्राइवेट टैंकर से पानी कीन रहल बा. टैंकर हर 10 से 15 दिन में आवेला. इलाका के लोग के हिसाब से 2023 के बाद से उहंवा सरकारी पानी के टैंकर आवल बंद हो गइल. पहिले पंचायत मुफ्त पानी देत रहे. बाकिर जब वाटर सप्लाई डिपार्टमेंट (पानी आपूर्ति विभाग) पइसा ना चुका पाएल, त इहो सेवा बंद हो गइल. अब हालत ई बा कि लोग पानी खातिर पूरा तरीका से कंपनी (प्राइवेट टैंकर) के भरोसे हो गइल बा.

“परिवार में छव लोग बा. दू ठो लइकी, दू ठो लइका आ हमनी दुनो प्राणी. टैंकर आवेला, त हमनी कोई 300 लीटर (तीन बैरेल) पानी कीनिला,” रिजवाना बतावत बाड़ी. टैंकर जदि दस दिन पर आई, त हर आदमी के हिस्सा में दिन भर के कोई 5 लीटर पड़ी. “गरमी जइसे-जइसे बढ़ेला, पानी के जरूरतो बढ़ेला. फेरु पानी कम हो जाला, आ अगिला टैंकर देरी से आवेला, त लोग नहाए, कपड़ा फींचे, बरतन साफ करे जइसन काम ना कर पाए आउर पिए खातिर पानी बचावेला.”

इहंवा के घट-घट पियासल बा. हर आदमी, हर चीज पानी खातिर तरसता.

रोज एक आदमी के केतना पानी चाहीं, एकर कवनो तय नियम नइखे. बाकिर संयुक्त राष्ट्र कहेला कि हर आदमी के कम से कम रोज 50 लीटर जरूर मिले के चाहीं, ई ओकर हक बा. मुंबई, दिल्ली, बेंगलुरु जइसन शहर में लोग एक दिन में 150 से 200 लीटर पानी बहा देवेला. सरकार के जल जीवन मिशन के तहत इहे कोशिश बा कि गांव में हर आदमी के रोज कम से कम 55 लीटर पानी मिलो.

गुजरात में, पछिला बीस बरिस में पानी के सिस्टम में आमूल-चूल परिवर्तन देखल गइल. अब पानी सप्लाई के जादेतर काम प्राइवेट लोग के हाथ में आ गइल बा. राज्य में पानी के व्यवस्था पर दसियो बरिस से नजर रखत आइल एगो स्थानीय कार्यकर्ता पंक्ति जोग कहेली, “गुजरात के पानी विभाग अपने पानी ना सप्लाई करे, प्राइवेट कंपनी के पानी पहुंचावे के ठेका देवेला.” ऊ इहो बतइली, “कुछ साल पहिले जब सुरेंद्रनगर में बहुत बड़ा जल संकट भइल, त ऊ सूचना के अधिकार (आरटीआई) के तहत पूछली कि उहंवा पानी के केतना टैंकर चल रहल बा. बाकिर विभाग जवाब ना देलक. प्राइवेट कंपनी भी कवनो जवाबदेही ना रखे. रण में आवते लोग सरकार के नजर से ओझल हो जाला. सरकार ओह लोग के कवनो सुविधा के ख्याल ना रखे, पानियो के ना.”

सन् 2024-25 के कैग (सीएजी) रिपोर्ट बतावता कि 2009 से 2025 के बीच सरकार के मोटा-मोटी 323.73 करोड़ रुपइया ‘वॉटर लोन’ (पानी खातिर करजा) के मद पर खरचा भइल. ई करजा घरे-घरे पानी के पाइप लगावे, बोरवेल बनावे, पानी शुद्ध करे के प्लांट लगावे खातिर उठावल गइल रहे. अब ई लोन वाला खाता सब बंद पड़ गइल बा (चलन में नइखे). मतलब जल आपूर्ति विभाग 16 साल में जवन पैसा देलक, ऊ अकाउंट धीरे-धीरे बेकाम (निष्क्रिय) हो गइल. अब कागज पर त करजा देखाई देता, बाकिर असल में ऊ पइसा कहूं नइखे.

कैग रिपोर्ट से पता ना चले कि ई पइसा सब कहंवा खरचा भइल. मतलब ऊ पइसा अब वापस मिलल मुस्किल बा. आ जइसन काम खातिर रखल गइल रहे, ओह मद में खरचो ना भइल. एही से गांव-शहर में पानी के व्यवस्था में कवनो सुधार नइखे देखाई देत, आ ना सिस्टमें ठीक से चलता.

कच्छ जिला कलेक्टर आनंद पटेल के एह बाबत ईमेल भेजल गइल, बाकिर अबले ओकर कवनो जवाब ना आइल.

गुजरात में पानी के व्यवस्था गड़बड़ बा. अब त एकरा में बहुते तरह के लोग आ संस्था जुड़ गइल बा. एही से जवाबदेही तय कइल लगभग नामुमकिन हो गइल बा. जादेतर लोग थक-हार के एकरा बारे में कुछ कइल छोड़ देले बा. अगरिया हित रक्षक मंच के घनश्याम भाई के कहना बा, “सीजन सुरु होखते हमनी रण में रहे वाला परिवार के गिनती कइनी, ताकी सब के ठीक से पानी मिल सको. बाकिर एह कागज-पत्तर के काम ब्लॉक से जिला तक पहुंचावे में महीना लाग गइल. जबले कागज कच्छ के भुज (जहंवा जिला कलेक्टर के ऑफिस बा) पहुंचल, तबले सीजने खतम हो गइल रहे. ओह बीच परिवार के मजबूरी में महंगा दाम पर प्राइवेट टैंकर से पानी खरीद के गुजारा करे पड़ल.”

पारी टीम कइएक हफ्ता ले रापर ब्लॉक, भुज आ राज्य स्तरीय अधिकारी से संपर्क के कोसिस कइलक. पानी टैंकर चलावे वाला प्राइवेट कंपनी सब से भी बात करे के प्रयास कइल गइल. बाकिर सरकारी लोग कवनो जवाब ना देलक आ प्राइवेट कंपनी जवाब देवे के जगहा लोग के सरकारी अधिकारी लगे भेज देलक. इहंवा एगो बहुते बड़ नीमक कंपनी ‘सिल्वर सॉल्ट इंडस्ट्रीज’ बा, एकरो मालिक भौमिक पुंज बातचीत खातिर उपलब्ध ना भइलन. उनकर मैनेजर भोला राम कहलेन कि कंपनी पानी टैंकर के पइसा देवेला. बाकिर कुछ अगरिया लोग सहमत नइखे. ऊ लोग हमनी के सीजन भर पानी के 6,00 से 7,000 रुपइया के रसीद देखइलक.

आठ महीना के कड़ा मिहनत के बाद रिजवाना आ शारीक के उनकर फल मिलल, तइयार नीमक. पहिले अच्छा कमाई होखत रहे, त ऊ लोग कोई 50,000 रुपइया कमा लेत रहे. बाकिर अब एक सीजन में कोई 30,000 रुपइया ही कमा पावेला.

नीमक के दाम त बढ़त-घटत रहेला, बाकिर अगरिया लोग के मिले वाला मजूरी तय बा, हर किलो पर मात्र 58 पइसा. उधर एक किलो टाटा नीमक ऑनलाइन कोई 27 रुपइया में बिकाला, माने कोई 4555% से जादे दाम पर! नीमक मजदूर लोग बतावता कि अबही ऊ लोग के बस 15 पइसा प्रति किलो ही मजूरी मिल रहल बा. खारा पानी से खाल सूख के मोट हो जाला, घाव, फफोला, फोड़ा-फुंसी हो जाला, चमड़ी फाट जाला आ चर्मरोग हो जाला. एह तरह के पानी के किल्लत में रहला से लोग में हाई बीपी, आंख के रोग, कमजोरी-कुपोषण आ खास करके पेट के बेमारी- पेट दरद, पीलिया, दस्त, टाइफाइड आम बात हो गइल बा.

आडेसर (पीएचसी) प्राथमिक चिकित्सा केंद्र नीमक के खेत से कोई एक घंटा के दूरी पर बा. बाकिर ई एह में से कवनो बेमारी संभारे से लाचार बा. उहंवा कफ सिरप, पेनकिलर, पट्टी जइसन मामूली चीजो ना मिले. सबले जरूरी- पानियो के इंतजाम नइखे. ना त शौचालय काम करेला, ना ऑपरेशन थियेटर.

“नीचा इलाका में होखे के चलते इहंवा बरसात में पानी भर जाला. ऊपर से सात बरिस से शौचालय बंद पड़ल बा. बिल्डिंग त नीमन बा, बाकिर कवनो काम के नइखे,” एगो स्थानीय अधिकारी नाम जाहिर ना करे के शर्त पर बतइलन. उहंई अस्पताल में प्रभारी डॉक्टर छुट्टी पर रहे.

रण से सटले पलांसवा गांव के छोटका स्वास्थ्य सेंटर बुध के दिन दुपहरिया में बंद रहे. हमनी के बतावल गइल कि डॉक्टर कोई घरइया सादी-बियाह में गइल बाड़न.

गांव के लोग के डिलीवरी (प्रजनन) खातिर 120 किमी दूर पाटन शहर के प्राइवेट अस्पताल जाए पड़ेला. आवे-जाए में कोई 20 से 25 हजार के खरचा आवेला. एही चलते केतना परिवार घरहीं जचगी करावेला, जेसे जच्चा आ बच्चा दुनो पर खतरा बढ़ जाला. कार्यकर्ता पंक्ति जोग कहेली, “अगरिया बहिन लोग के त सरकारी कार्डो में गिनती नइखे. प्रजनन से जुड़ल कवनो तरह के सुविधा ना मिले. रण में रहला के दौरान जच्चा-बच्चा के मौत के आंकड़ा जुटावल नामुमकिन जइसन बा. पूरा इलाका में कवनो तरह के रिकॉर्ड ना मिली.”

सन् 2023 के एगो मीडिया रिपोर्ट सरकारी स्वास्थ्य से जुड़ल जानकारी के हवाले से बतावता कि कच्छ जिला राज्य के सबले खराब इलाका में गिनाला. रिपोर्ट के हिसाब से खाली तीन महीना में इहंवा 165 नवजात बच्चा सब के जान जा चुकल बा.

रिजवाना आंख से आवत लोर फेरु पछली आ आपन घरवाला के ताके लगली. ऊ अबहियो खारा पानी में काम पर लागल बाड़न. ऊ कहली, “हमरा ई काम नीमन ना लागे, बाकिर आपन घरवाला के मदद करे पड़ेला.” घरवाला के ब्लड प्रेशर लो रहेला, आ गरमी में बेर-बेर बेहोश हो जालन. कपाड़ हरदम दुखात रहेला. गरमी बढ़ला से दरद आउर बढ़ जाला. एतना गरमी में के काम करे के चाही,” कहत-कहत उनकर आवाज एकदम मद्धम पड़ जाता.

पानी कमाई के जरिया जब से बनल, अगरिया जइसन पहिलहीं से पानी संकट झेल रहल लोग पानी खातिर आउर परेसान हो रहल बा. दोसर लोग इहे संकट से फायदा उठा रहल बा. जदि रिजवाना के इलाज के सुविधा मिलित, त पता चलित कि उनका ‘एपिफोरा’ बा. आंसू के नली जाम होखे से आंख से जरूरत से जादे पानी गिरला के बेमारी. एकर इलाज हो सकता, रोकल जा सकता आउर केतना बेरा त आंशिक रूप से रिवर्स (ठीक) भी हो सकता. अगरिया लोग के आपन बीमारी के बारे में सही जानकारी रहित, त आंख में चिकनाहट वापस लावे वाला (लुब्रिकेटिंग) आई ड्रॉप आ धूप वाला चश्मा से बहुते राहत मिल सकत रहे. एपिफोरा के इलाज में कोई 10 हजार रुपइया के खरचा बा. आ पाटन अस्पताल जाए खातिर प्राइवेट जीप लेवे पर 5 हजार के आउर खरचा. एही से ऊ लोग बीच-बीच में लागे वाला मेडकिल कैंप पर निर्भर रहेला.

रिजवाना कहेली, “हमनी के जे अइसे जिए पर मजबूर कर देले बा, ओकरा श्राप बा. भगवान करे ओकरो इहे हालत होखे.”

रण के जल संकट 21वां सदी के एगो भयावह सच्चाई बा. जेकरा लगे जेतना पइसा बा, पानी भी ओही हिसाब से मिल रहल बा. पानी निजी हाथ में जाए से पूरा के पूरा समाज अइसन बेमारी से जूझ रहल बा, जेकरा आसानी से ठीक कइल जा सकता.

कच्छ के वर्तमान में एकर भविष्य झलक रहल बा.

ईस्टोरी पारी सीनियर फेलोशिप 2025 के अंतर्गत प्रकाशित भइल बा.