ಚಾಂಗ್‌ಕಿ ಗ್ರಾಮದ ಕುಂಬಾರ ಮಹಿಳೆಯರು

ಚಾಂಗ್‌ಕಿ ಮಹಿಳೆಯರು ತಯಾರಿಸಿದ ಮಣ್ಣಿನ ಮಡಕೆಗಳು ಸ್ಥಳೀಯ ಯುದ್ಧಗಳಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸಿದ್ದವು. ಈ ಮಡಕೆಗಳಷ್ಟೇ ಈ ಪ್ರದೇಶದಲ್ಲಿ ಅಡುಗೆ ಮಾಡಲು ಇದ್ದ ಸಾಧನವಾಗಿದ್ದ ಕಾರಣ ಬೇರೆ ಊರಿನವರು ಈ ಊರಿನ ಮೇಲೆ ದಾಳಿ ಮಾಡಿ ಇಲ್ಲಿನ ಮಡಕೆಗಳನ್ನು ಹಾಳು ಮಾಡುತ್ತಿರಲಿಲ್ಲ. ಬೇರೆ ಊರುಗಳಲ್ಲಿ ಬೆಂಕಿ ಅಥವಾ ಇತರ ವಿಪತ್ತುಗಳಿಂದ ಧಾನ್ಯಗಳು ನಾಶವಾದರೆ ಚಾಂಗ್‌ಕಿಯಲ್ಲಿ ಮಡಕೆಗಳಲ್ಲಿ ಸಂಗ್ರಹಿಸಿಟ್ಟಿದ್ದ ಧಾನ್ಯಗಳನ್ನು ಆ ಊರಿನವರಿಗೆ ಕೊಡಲಾಗುತ್ತಿತ್ತು. ಚಾಂಗ್‌ಕಿ ಮಡಕೆಗಳ ಬಾಳಿಕೆಯೇ ಅಂತಹದ್ದು ಎಂದು ಇಲ್ಲಿನ ಆವೊ ಬುಡಕಟ್ಟಿನ ಮಹಿಳೆಯರು ಹೆಮ್ಮೆಯಿಂದ ಹೇಳುತ್ತಾರೆ.

ಶತಮಾನಗಳ ನಂತರವೂ ಈ ಊರಿನಲ್ಲಿ ಈ ಮಡಕೆಗಳನ್ನು ಕೈಯಿಂದಲೇ ತಯಾರಿಸಲಾಗುತ್ತಿದೆ. “ನಾವು ಇಲ್ಲಿ ಕುಂಬಾರಿಕೆ ಚಕ್ರ ಅಥವಾ ಇತರ ಯಾವುದೇ ಯಂತ್ರಗಳನ್ನು ಬಳಸುವುದಿಲ್ಲ. ಇದನ್ನು ಆರಂಭದಿಂದ ಅಂತ್ಯದ ತನಕ ಕೇವಲ ಕರಕುಶಲ ಮಾದರಿಯಲ್ಲೇ ತಯಾರಿಸಲಾಗುತ್ತದೆ” ಎಂದು ತಿಯಾಮೊಂಗ್ಲಾ ಲಾಂಗ್ಚಾರಿ ಹೇಳುತ್ತಾರೆ. ಈ ಮಡಕೆಯ ತಯಾರಿಗೆ ಬೇಕಾಗುವ ಮಣ್ಣನ್ನು ಇಲ್ಲಿನ ಎತ್ತರದ ಪ್ರದೇಶಗಳು ಮತ್ತು ಗದ್ದೆ, ಕಾಡು ಮತ್ತು ನದಿ ದಡದಿಂದ ತರಲಾಗುತ್ತದೆ. ಈ ಪ್ರದೇಶದ ಮಿಶ್ರ ಜೇಡಿಮಣ್ಣೇ ಈ ಮಡಕೆಗಳ ಗುಣಮಟ್ಟಕ್ಕೆ ಕಾರಣ ಎನ್ನಬಹುದು.

ಈ ಕುಂಬಾರಿಕೆಯಲ್ಲಿ ಈಗಲೂ ಹಿಂದಿನ ಪರಂಪರೆಯನ್ನೇ ಮುಂದುವರೆಸಿಕೊಂಡು ಬರಲಾಗಿದೆ, “ನಮ್ಮ ಅಜ್ಜಿ ಹಾಗೂ ಮತ್ತು ಮುತ್ತಜ್ಜಿಯರು ತಯಾರಿಸುತ್ತಿದ್ದ ರೀತಿಯನ್ನೇ ಮುಂದುವರೆಸಿಕೊಂಡು ಬಂದಿದ್ದೇವೆ” ಎನ್ನುತ್ತಾರೆ 55 ವರ್ಷದ ತಿಯಾಮೊಂಗ್ಲಾ. ನಾಗಾಲ್ಯಾಂಡ್‌ನ ಚಾಂಗ್‌ಕಿ ಗ್ರಾಮದ ಕೆಲವೇ ಮಡಕೆ ತಯಾರಕರಲ್ಲಿ ಒಬ್ಬರಾದ ಅವರು, ತಮ್ಮ ಇಳಿ ವಯಸ್ಸಿನ ತಾಯಿಯೊಂದಿಗೆ ವಾಸಿಸುತ್ತಿದ್ದು, ಅದೇ ಮನೆಯಲ್ಲಿ ಮಡಕೆಯನ್ನು ತಯಾರಿಸುತ್ತಾರೆ. ಹಿಂದೆಲ್ಲ ತಮ್ಮ ಮನೆ ಬಳಕೆಗಾಗಿ ಹಾಗೂ ಮಾರಾಟಕ್ಕಾಗಿ ಪ್ರತಿ ಮನೆಯ ಮಹಿಳೆಯರೂ ಮಡಕೆ ತಯಾರಿಸುತ್ತಿದ್ದರು. ಆದರೆ ಪ್ರಸ್ತುತ ನಾಗಾಲ್ಯಾಂಡ್‌ನ ಚಾಂಗ್‌ಕಿ ಗ್ರಾಮದಲ್ಲಿ ಕೇವಲ 15 ಮಹಿಳೆಯರಷ್ಟೇ ತಮ್ಮ ಮನೆಗಳನ್ನು ಮಡಕೆ ತಯಾರಿಸುವುದನ್ನು ಮುಂದುವರೆಸಿದ್ದಾರೆ.

ಈ ವರದಿಯನ್ನು ಚಿತ್ರೀಕರಿಸುವಾಗ ಪರಿಯನ್ನು ಭೇಟಿಯಾದ ಮಹಿಳೆಯರು, ತಮ್ಮ ಬುಡಕಟ್ಟಿನ ಮಹಿಳೆಯರಿಗೆ ಸೇರಿದ ಈ ಪುರಾತನ ಕಲೆಯನ್ನು ಒಟ್ಟಿಗೆ ಸೇರಿ ಅಭ್ಯಾಸ ಮಾಡುವುದು ಮತ್ತು ಅದನ್ನು ಮುಂದಿನ ಪೀಳಿಗೆಗೆ ದಾಟಿಸುವುದು ನಮಗೆ ಸಂತೋಷ ನೀಡುತ್ತದೆ ಎಂದು ಹೇಳಿದರು. ಜೊತೆಗೆ ಈ ಕೆಲಸದಿಂದ ಸಿಗುವ ಹೆಚ್ಚುವರಿ ಆದಾಯವು ಅವರ ಮಕ್ಕಳ ಶಿಕ್ಷಣ ಹಾಗೂ ಇತರ ಅಗತ್ಯಗಳಿಗೆ ಒತ್ತಾಸೆಯಾಗಿ ನಿಲ್ಲುತ್ತದೆ.

ಚಳಿಗಾಲದಲ್ಲಿ ತಯಾರಿಸಲಾಗುವ ಈ ಮಡಕೆಗಳಿಗೆ ಅವಧಿ ಪೂರ್ವ ಬೇಡಿಕೆಯ ಸುರಿಮಳೆಯೇ ಆಗುತ್ತದೆ. ಮೊಕೊಕ್‌ಚುಂಗ್‌ ಜಿಲ್ಲೆಯಲ್ಲಿ ಇಂತಹ ಮಡಕೆಗಳನ್ನು ತಯಾರಿಸುತ್ತಿರುವ ಕೆಲವೇ ಊರುಗಳಲ್ಲಿ ಚಾಂಗ್‌ಕಿ ಕೂಡಾ ಒಂದಾಗಿರುವ ಕಾರಣ, ಬೇಡಿಕೆ ಯಾವಗಲೂ ನಾನು ಪೂರೈಸಬಹುದಾದ್ದಕ್ಕಿಂಂತಲೂ ಹೆಚ್ಚಿನ ಸಂಖ್ಯೆಯಲ್ಲಿರುತ್ತದೆ ಎಂದು ತಿಯಾಮೊಂಗ್ಲಾ ಹೇಳುತ್ತಾರೆ. ವ್ಯಕ್ತಿಗಳಲ್ಲದೆ, ಸರ್ಕಾರಿ ಕಾರ್ಯಕ್ರಮಗಳಲ್ಲಿ ಉಡುಗೊರೆಯಾಗಿ ನೀಡಲು ಸರ್ಕಾರಿ ಅಧಿಕಾರಿಗಳು ಮತ್ತು ಸಂಸ್ಥೆಗಳು ಸಹ ಮಡಕೆಗೆ ಬೇಡಿಕೆ ಸಲ್ಲಿಸುತ್ತವೆ.

ಅನುಭವಿ ಕುಂಬಾರ ಮಹಿಳೆ ತಿಯಾಮೊಂಗ್ಲಾ ತನ್ನ ಆರೋಗ್ಯ ಸರಿಯಿರುವಾಗ ಮತ್ತು ತಾನು ಕುಟುಂಬದ ಬಳಕೆಗೆ ಸಾಕಾಗುವಷ್ಟು ಮಾಡುವ ಕೃಷಿಗೆ ಸಂಬಂಧಿಸಿದ ಕೆಲಸಗಳಿಂದ ಬಿಡುವು ದೊರೆತಾಗ ಈ ಮಡಕೆ ತಯಾರಿಕೆಯಲ್ಲಿ ತೊಡಗುತ್ತಾರೆ. ಈ ಸಮಯದಲ್ಲಿ ಸುಮಾರು 150-200 ಮಡಕೆಗಳನ್ನು ತಯಾರಿಸುವ ಅವರು, ಮಡಕೆಯ ಗಾತ್ರ ಮತ್ತು ವಿನ್ಯಾಸವನ್ನು ಅವಲಂಬಿಸಿ ಒಂದು ಮಡಕೆಯನ್ನು 600-900 ರೂಪಾಯಿಗಳಿಗೆ ಮಾರಾಟ ಮಾಡಬಹುದು ಎನ್ನುತ್ತಾರೆ.

ಮಣ್ಣನ್ನು ಸ್ಥಳೀಯವಾಗಿ ಸಂಗ್ರಹಿಸಲಾಗುವುದರಿಂದ ಮತ್ತು ಉಪಕರಣಗಳನ್ನು ಸ್ಥಳೀಯ ಮಣ್ಣು ಮತ್ತು ಮರದಿಂದ ತಯಾರಿಸಲಾಗುವುದರಿಂದ, ಮನೆಯಲ್ಲಿ ಮಡಕೆಗಳನ್ನು ತಯಾರಿಸುವ ಕುಂಬಾರ ಮಹಿಳೆಯರು, ಮಡಕೆ ತಯಾರಿಕೆಯ ವೆಚ್ಚವೆಂದರೆ ಶ್ರಮ ಮಾತ್ರ ಎಂದು ಹೇಳುತ್ತಾರೆ.

ಸಿಂಗಲ್‌ ಪೇರೆಂಟ್‌ ಆಗಿರುವ ತಿಯಾಮೊಂಗ್ಲಾ ಮಡಕೆ ತಯಾರಿಕೆಯಿಂದ ಗಳಿಸಿದ ಹಣ ಇದೀಗ ಪೊಲೀಸ್‌ ಇಲಾಖೆಯಲ್ಲಿ ಕೆಲಸದಲ್ಲಿರುವ ಮಗಳ ಶಿಕ್ಷಣಕ್ಕೆ ಬೇಕಾದ ಹಣವನ್ನು ಒದಗಿಸಲು ಸಹಾಯ ಮಾಡಿತು ಎನ್ನುತ್ತಾರೆ.

ಕುಂಬಾರಿಕೆಯಿಂದ ಬರುವ ಹಣ ಹಾಗೂ ಚಳಿಗಾಲದಲ್ಲಿ ತಾನು ಹೆಚ್ಚಾಗಿ ಬೆಳೆಯುವ ಹುರುಳಿಕಾಯಿ (ಬೀನ್ಸ್)‌ ಸಾಸಿವೆ ಎಲೆ ಮತ್ತು ಬೇಸಗೆ ಬೆಳೆಯುವ ಬೆಳೆಗಳು ಮನೆ ನಡೆಸಲು ಸಹಾಯ ಮಾಡಿದವು ಎನ್ನುತ್ತಾರೆ. ಇಲ್ಲಿನ ಬಹುತೇಕರ ಜೀವನ ಹೀಗೇ ಸಾಗುತ್ತದೆ.

ತಿಯಾಮೊಂಗ್ಲಾ ಕೂಡಾ ತನ್ನ ಒಂದಷ್ಟು ಭೂಮಿಯಲ್ಲಿ ಜುಮ್‌ ಬೇಸಾಯ ಮತ್ತು ಉಳಿದ ಜಾಗದಲ್ಲಿ ಭತ್ತವನ್ನು ಬೆಳೆಯುತ್ತಾರೆ. ಇದರಿಂದ ಬರುವ ಫಸಲಿನ ಬಹುತೇಕ ಭಾಗ ಮನೆ ಬಳಕೆಗೆ ಖರ್ಚಾಗುತ್ತದೆ. ವರ್ಷಗಳ ಕಾಲದ ನಂತರ ಒಂದಷ್ಟು ಧಾನ್ಯ ಉಳಿದರೆ ಅದನ್ನು ಕಾಡಿನಿಂದ ತರುವ ತರಕಾರಿಯೊಂದಿಗೆ ಮಾರುತ್ತಾರೆ. “ಚಹಾ ಪುಡಿ, ಸಕ್ಕರೆ ಮೊದಲಾದ ದಿನಸಿ ವಸ್ತುಗಳ ಅಗತ್ಯ ಬಿದ್ದಾಗ ನಾನು ರಸ್ತೆಯ ಬಳಿಯಿರುವ ಸಂತೆಯ ಶೆಡ್ಡಿನಲ್ಲಿ ಒಂದಷ್ಟು ಉತ್ಪನ್ನಗಳನ್ನು ಇಟ್ಟು ಮಾರುತ್ತೇನೆ” ಎಂದು ಅವರು ಹೇಳುತ್ತಾರೆ.

ನಾಗಾಲ್ಯಾಂಡ್‌ನ ಮೊಕೊಕ್‌ಚುಂಗ್ ಜಿಲ್ಲೆ ಆಯೋ - ಒಂದು ಪ್ರಮುಖ ನಾಗಾ ಬುಡಕಟ್ಟಿನ ತವರು. ಅವರು ಮೂರು ಭಾಷೆಗಳನ್ನು ಮಾತನಾಡುತ್ತಾರೆ: ಚುಂಗ್ಲಿ, ಮೊಂಗ್‌ಸೆನ್ ಮತ್ತು ಚಾಂಗ್ಕಿ. ಸುಮಾರು ಎರಡು ಲಕ್ಷ ಜನರಿರುವ ಈ ಜಿಲ್ಲೆಯು ಮೂರು ಪ್ರಮುಖ ಕಣಿವೆಗಳಾದ ತ್ಸುರಾಂಗ್, ಚಾಂಗ್‌ಕಿ ಮತ್ತು ಮಿಲಕ್ ಹಾಗೂ 114 ಗ್ರಾಮಗಳಲ್ಲಿ ಹರಡಿಕೊಂಡಿದೆ.

ನಾಗಾಲ್ಯಾಂಡ್‌ನಲ್ಲಿ, ಗ್ರಾಮ ಪಂಚಾಯಿತಿಯ ಬದಲಿಗೆ ಗ್ರಾಮ ಸಮಿತಿಯೇ ಗ್ರಾಮ ಮಟ್ಟದಲ್ಲಿ ಪ್ರಾಥಮಿಕ ಆಡಳಿತ ಸಂಸ್ಥೆಯಾಗಿ ಕಾರ್ಯನಿರ್ವಹಿಸುತ್ತದೆ. ಇದು ಗ್ರಾಮಾಭಿವೃದ್ಧಿ ಮಂಡಳಿಯ (ವಿಡಿಬಿ) ಜೊತೆಗೆ ಗ್ರಾಮದ ಮೂಲಭೂತ ಆಡಳಿತ ಮತ್ತು ಅಭಿವೃದ್ಧಿಯನ್ನು ಒದಗಿಸುತ್ತದೆ. ಸ್ಥಳೀಯ ಮಹಿಳೆಯರ ಬೇಡಿಕೆಯ ಮೇರೆಗೆ, ವಿಡಿಬಿ ಚಾಂಗ್‌ಕಿ ಮಡಕೆಗಳ ತಯಾರಿಕೆಯನ್ನು ಅದು ಆದ್ಯತೆಯ ಮೇರೆಗೆ ಪುನಃಶ್ಚೇತನಗೊಳಿಸುತ್ತಿದೆ, ಏಕೆಂದರೆ ಚಾಂಗ್‌ಕಿ ಮಡಕೆಗಳು ಈ ಊರಿನ ವೈಶಿಷ್ಟ್ಯ.

ಅದು 2025ರ ಆರಂಭ ಕಾಲ, ಮತ್ತು ಈ ಊರಿನಲ್ಲಿ ಕುಂಬಾರಿಕೆಯ ಹಂಗಾಮು (ಡಿಸೆಂಬರ್‌ನಿಂದ ಮಾರ್ಚ್‌ ತನಕ) ಪೂರ್ಣ ಪ್ರಮಾಣದಲ್ಲಿ ಪ್ರಗತಿಯಲ್ಲಿತ್ತು. ಹಲವು ಕುಂಬಾರ ಮಹಿಳೆಯರು ವಿಡಿಬಿಯ ಕುಂಬಾರಿಕೆ ಕೇಂದ್ರದಲ್ಲಿ ಕೆಲಸ ಮಾಡುತ್ತಿದ್ದರು, ಅವರೆಲ್ಲ ಸೇರಿ ಈ ಕಲೆಗೆ ಸಂಬಂಧಿಸಿದ ಹಲವು ಪ್ರಕ್ರಿಯೆಗಳನ್ನು ಜೋಡಿಸುತ್ತಿದ್ದರು.

“ವಿಡಿಬಿಯ ಮಹಿಳಾ ವಿಭಾಗದಲ್ಲಿ ಈ ಮಡಕೆಗಳನ್ನು ವೃತ್ತಿಪರವಾಗಿ ತಯಾರಿಸಲು ಆರಂಭಿಸಿ ಆರು ವರ್ಷಗಳಾಗಿವೆ” ಎಂದು ಕುಂಬಾರ ಮಹಿಳೆ ಅನೊಕ್ವಾಲಾ ಲುಸಾಂಗ್ ಹೇಳುತ್ತಾರೆ. ಈ ಉತ್ಪಾದನಾ ಕೇಂದ್ರವನ್ನು ವಿಡಿಬಿ ಬೇಕೆಂದಷ್ಟು ಮಡಕೆಗಳನ್ನು ತಯಾರಿಸಿ ಕೊಡುವುದಕ್ಕೆ ಬಳಸುವುದರ ಜೊತೆಗೆ, ಮಹಿಳೆಯರು ತಮ್ಮ ವ್ಯವಹಾರ ಮತ್ತು ಬಳಕೆಗೆ ಬೇಕಾಗುವ ಮಡಕೆಗಳನ್ನು ತಯಾರಿಸಲು ಸಹ ಬಳಸಿಕೊಳ್ಳಬಹುದು.

ಈ ಕೇಂದ್ರದಲ್ಲಿ ಕೆಲಸ ಮಾಡುವ ಅನೊಕ್ವಾಲಾ ಮತ್ತು ಜೆಂತಿಕಲಾ ಅವರಂತಹ ಮಹಿಳೆಯರು ವರ್ಷಕ್ಕೆ ಸುಮಾರು 40-50 ಮಡಕೆಗಳನ್ನು ಮಾರಾಟ ಮಾಡುತ್ತಾರೆ, ಇದು ತಿಯಾಂಗ್ಮೊಲಾ ಒಂದು ವರ್ಷದಲ್ಲಿ ಮನೆಯಲ್ಲಿ ಮತ್ತು ಇಲ್ಲಿ ತಯಾರಿಸುವ ಮಡಕೆಗಳ ಮೂರನೇ ಒಂದು ಭಾಗ. ಅನೇಕ ಮಹಿಳೆಯರು ಪರಿಗೆ ತಿಳಿಸಿದಂತೆ, ಅವರು ಈ ಕೆಲಸವನ್ನು ಒಬ್ಬರೇ ಮಾಡುವುದಕ್ಕಿಂತಲೂ ಗುಂಪಾಗಿ ಮಾಡುವುದಕ್ಕೆ ಆದ್ಯತೆ ನೀಡುತ್ತಾರೆ. ಗುಂಪಿನಲ್ಲಿ ಕೆಲಸ ಮಾಡಿದಾಗ ಕೆಲಸಗಳು ಹಂಚಿ ಹೋಗುವುದರಿಂದಾಗಿ ಅಷ್ಟು ಕಷ್ಟವೆನ್ನಿಸುವುದಿಲ್ಲ ಎನ್ನುವುದು ಇದಕ್ಕೆ ಕಾರಣ. ಅನೊಕ್ವಾಲಾ ಮತ್ತೊಂದು ಸಂಗತಿಯನ್ನು ಇದಕ್ಕೆ ಸೇರಿಸಿದರು: “ಇದು ತುಂಬಾ ಕಷ್ಟದ ಕೆಲಸ, ಮತ್ತು ಯುವ ಪೀಳಿಗೆ ಇಷ್ಟು ಕಷ್ಟಪಡಲು ಬಯಸುವುದಿಲ್ಲ.”

ಈ ಗುಂಪಿನಲ್ಲಿ ಕೆಲಸಕ್ಕೆ ಬರುವ ಪ್ರತಿಯೊಬ್ಬ ಮಹಿಳೆಯೂ ದಿನಕ್ಕೆ 500 ರೂಪಾಯಿಗಳನ್ನು ಗಳಿಸುತ್ತಾರೆ ಮತ್ತು ಈ ಮಡಕೆಗಳ ಮಾರಾಟದಿಂದ ಬಂದ ಹಣವು ವಿಡಿಬಿ ಸಂಚಯ ನಿಧಿಗೆ ಸೇರುತ್ತದೆ. ತಮ್ಮ ಗಳಿಕೆಯ ಕೊಡುಗೆಯಿಂದ ಈ ಕೇಂದ್ರ ಸ್ಥಾಪನೆಯಾಗಿದೆ ಎನ್ನುವುದು ಈ ಮಹಿಳೆಯರ ಪಾಲಿನ ಹೆಮ್ಮೆ.

ಇಲ್ಲಿನ ಮಹಿಳೆಯರು ತಮ್ಮ ನಾಗಾ ಸಮಾಜದಲ್ಲಿ ಸಮುದಾಯವೇ ಕೇಂದ್ರಬಿಂದು ಮತ್ತು ಸಮುದಾಯ ಮಂಡಳಿಯ ಭಾಗವಾಗಿರುವುದು ಜವಾಬ್ದಾರಿಯಾಗಿಯೂ ಮತ್ತು ಸಮಾನ ಪ್ರಾತಿನಿಧ್ಯಕ್ಕೆ ಒಂದು ಅವಕಾಶವಾಗಿಯೂ ಕಾಣಲಾಗುತ್ತದೆ ಎಂದು ಹೇಳಿದರು.

ಕಳೆದ ವರ್ಷ ಅವರು ಈ ನಿಧಿಯನ್ನು ಬಳಸಿ, ಗ್ರಾಮದ ಸಮೀಪದ ಹೆದ್ದಾರಿಯಲ್ಲಿ ತರಕಾರಿ ಮತ್ತು ಗ್ರಾಮದ ಇತರ ಉತ್ಪನ್ನಗಳನ್ನು ಮಾರಾಟ ಮಾಡಲು ನಾಲ್ಕು ಕೊಠಡಿಗಳ ಮಾರುಕಟ್ಟೆಯೊಂದನ್ನು ನಿರ್ಮಿಸಿದರು. ಈ ಹಿಂದೆ, ಗ್ರಾಮದಲ್ಲಿ ಸಣ್ಣ ದುರಸ್ತಿ ಮತ್ತು ಅಭಿವೃದ್ಧಿ ಕಾರ್ಯಗಳಿಗೆ ಈ ನಿಧಿಯನ್ನು ಬಳಸಲಾಗುತ್ತಿತ್ತು. ಇದು ಅವರಲ್ಲಿ ಗ್ರಾಮದ ಒಟ್ಟಾರೆ ಒಳಿತಿಗೆ ತಾವು ಕೊಡುಗೆ ನೀಡುತ್ತಿರುವ ಧನ್ಯ ಭಾವನೆಯನ್ನು ಮೂಡಿಸಿದೆ.

ತನ್ನ ಅಜ್ಜಿಯಿಂದ ಕಲಿತ ಈ ಕುಂಬಾರಿಕೆ ಕಲೆಯ ಕುರಿತು ತಿಯಾಮೊಂಗ್ಲಾ ಬಹಳ ಗೌರವ ಮತ್ತು ಆತ್ಮೀಯ ಭಾವವನ್ನು ಹೊಂದಿದ್ದಾರೆ. ಸಣ್ಣವರಿದ್ದಾಗ ಅವರು ಅಜ್ಜಿಗೆ ಮಡಕೆ ತಯಾರಿಕೆಯಲ್ಲಿ ಸಹಾಯ ಮಾಡುತ್ತಾರೆ. "ಶಿಕ್ಷಣ ಬಹಳ ಮುಖ್ಯವಾದದ್ದು ಎನ್ನುವುದು ನನ್ನ ನಂಬಿಕೆ. ಆದರೆ ನಾವು ಸ್ವಂತವಾಗಿ ನಮ್ಮ ಕೈಗಳನ್ನು ಬಳಸಿ ಏನನ್ನಾದರೂ ತಯಾರಿಸಬಲ್ಲೆವಾದರೆ ಅದರಿಂದ ಒಂದಷ್ಟು ಸಂಪಾದನೆಯನ್ನು ಕಾಣುವುದರ ಜೊತೆಗೆ ನಮ್ಮ ಬದುಕನ್ನೂ ಒಂದು ಮಟ್ಟಿಗೆ ಸುಧಾರಿಸಿಕೊಳ್ಳಬಹುದು" ಎಂದು ಅವರು ಹೇಳುತ್ತಾರೆ.

ಅನುವಾದ: ಶಂಕರ. ಎನ್. ಕೆಂಚನೂರು