بڑھاپے میں گزارہ کیلئے گوبر اٹھانے کی مجبوری

امرجیت کور بیچ راستے میں ٹھٹھک سی جاتی ہیں۔ جس تسلہ کو وہ اپنے سر پر اٹھانے کی کوشش کر رہی ہیں، وہ کچھ سیکنڈ کے لیے ڈگمگاتا ہے۔ پھر وہ دھیرے دھیرے لڑکھڑاتے قدموں سے روڑی (گوبر کا ڈھیر) کی طرف بڑھتی ہیں، تاکہ بھینسوں کے باڑے سے لایا گیا اپنا تسلہ وہاں خالی کر سکیں۔ ایک زمانہ تھا جب وہ سر پر ۱۰-۱۲ کلو کا بھرا ہوا تسلہ لے کر آسانی سے چل لیتی تھیں۔ لیکن ۷۲ سال کی عمر میں اب یہ مشکل کام ہے۔

حالانکہ، آج ان کا دل ان کے سر پر رکھے تسلہ سے بھی زیادہ بھاری ہے، یہی وجہ ہے کہ آج ان کے قدم بھی لڑکھڑا رہے ہیں۔

ان کی فیملی سے متعلق میرے ایک سیدھے سے سوال کو سن کر امرجیت ۲۴ سال پرانی یادوں میں گم ہو گئیں۔ ’’اُنہاں دسیہ، پٹّی موڑ تے تیرا مُنڈا مر گیا ایکسیڈنٹ نال [انہوں نے بتایا کہ پٹّی موڑ پر تیرا بیٹا مر گیا ایکسیڈنٹ سے]۔‘‘ اتنا کہہ کر وہ پھر سے گوبر اکٹھا کرنے کے لیے بیٹھ جاتی ہیں۔ ان کے ہاتھ مشین کی طرح چلتے رہتے ہیں۔ زمین پر دو زانو بیٹھتے ہوئے ان کے گھٹنوں سے چرچر کی آواز آتی ہے۔ ’’وہ رکشتہ چلاتا تھا۔ صرف ۱۸ سال کا تھا۔‘‘ پانچ سال بعد انہوں نے اپنا دوسرا بیٹا بھی کھو دیا۔ تب اس کی عمر ۲۱ سال تھی۔

تقریباً ۳۶ سال پہلے جب ان کے شرابی شوہر کی موت ہوئی تھی، تب ان کے بیٹے صرف چھ اور چار سال کے تھے۔ اگر شادی کے بعد وہ گوہا کوڑا (جانوروں کا گوبر) اٹھانے کا کام نہیں کرتیں، تو وہ اپنے بیٹوں اور دو بیٹیوں (جن کی شادی ہو چکی ہے) کی پرورش نہیں کر پاتیں۔ اپنے ننگے ہاتھوں سے وہ پھر سے گوبر اٹھاتی ہیں، جیسے اپنے دکھ کو بھی گوبر کے ساتھ ساتھ مٹھی میں بھر کر تسلہ میں ڈال رہی ہوں۔ تسلہ سر پر رکھتے وقت وہ ایک لمبی سانس چھوڑتی ہیں اور تقریباً ۱۰۰ میٹر دور روڑی کی طرف لڑکھڑاتے قدموں سے بڑھ جاتی ہیں۔ آج صبح کام شروع کرنے کے بعد یہ ۲۰ویں بار ہے، جب وہ ایسا کر رہی ہیں۔ ان کا تعلق مہرے سکھ برادری سے ہے، جسے پنجاب میں درج فہرست ذات کا درجہ حاصل ہے۔ امرجیت بے زمین دلت ہیں، جو پٹّی قصبہ کے سات گھروں میں گوہا کوڑا اٹھا کر اپنا گزارہ کرتی ہیں۔

’’جدوں میں ڈنگراں دا گوہا چُکّن تھلّے بہندی آں تاں اوہ اکثر میرے سر تے ہی مُوت دِندے نے۔ میں روز روز سر نہیں دھو سکدی تے شیمپو صابن کا خرچہ وی نہیں چُک سکدی۔ اسے لئی آہ لفافہ پا لینی آں [جب میں گوبر اٹھانے کے لیے نیچے بیٹھتی ہوں، تو بھینسیں کئی بار میرے سر پر پیشاب کر دیتی ہیں۔ میں روز سر نہیں دھو سکتی اور نہ ہی روز صابن شیمپو کا خرچ اٹھا سکتی ہوں۔ اس لیے سر پر پلاسٹک کا یہ تھیلا باندھ لیتی ہوں]۔‘‘ امرجیت مجھے ایک کالا تھیلا دکھاتی ہیں، جو اس وقت ان کے ہاتھ میں ہے۔ وہ ایک گھر کا کام ختم کر چکی ہیں۔ یہ گھر ایک کسان کا ہے، جس کے پاس زمینیں ہیں، ۱۰ بھینسیں ہیں۔ اب وہ یہاں سے دوسرے گھر جائیں گی۔

ان کا دن صبح چھ بجے ایک کپ چائے کے ساتھ شروع ہوتا ہے۔ اگلے نو گھنٹوں میں وہ اپنے گھر سے ۱۲-۱۳ کلومیٹر کے دائرہ میں کل سات گھروں میں کام کرتی ہیں۔ بیچ میں کوئی آرام نہیں ہوتا – نہ ناشتہ کے لیے، نہ دوپہر کے کھانے کے لیے۔ اتنی محنت کے عوض ملنے والی مزدوری بھی بہت کم ہے۔ ’’زیادہ تر لوگ، جن کے پاس تین چار جانور ہیں، مجھے مہینہ کے ۵۰۰ روپے دیتے ہیں۔ زمیندار کے گھر سے ۱۰۰۰ روپے اور آدھا لیٹر دودھ ملتا ہے۔‘‘

وہ پورے دن میں تقریباً ۳۰ سے ۳۵ مویشیوں کا گوبر صاف کرتی ہیں۔ ’’اچھے دنوں میں مہینہ کے ۳۵۰۰ سے ۴۰۰۰ روپے تک کما لیتی ہوں۔ سردیوں میں کام کم ہو جاتا ہے۔‘‘ اُس وقت ترن تارن ضلع میں کڑاکے کی ٹھنڈ پڑتی ہے۔ ’’ٹھنڈ میں جانور مر جاتے ہیں یا لوگ انہیں اندر رکھتے ہیں، اس لیے انہیں میری ضرورت نہیں پڑتی۔ میری صحت بھی سردیوں میں اتنی اچھی نہیں رہتی کہ میں زیادہ محنت کر سکوں۔ میں بہت صبح کام شروع نہیں کر سکتی اور دوپہر ۳ بجے تک گھر لوٹنا پڑتا ہے۔ پورے دن کام نہیں کر سکتی۔ لوکیں پیسے نیں بھردے، کم بھاویں پورا دن کراؤندے رہن [لوگ پیسے نہیں دینا چاہتے اور کام ان کو پورا پورا دن چاہیے]۔‘‘

ان کی آمدنی کا تقریباً آدھا حصہ گھر کا کرایہ دینے میں چلا جاتا ہے۔ وہ اپنی پوتی کے ساتھ ایک کمرہ کرایے پر لے کر رہتی ہیں، جس کا کرایہ دینے میں ان کی پوتی بھی مدد کرتی ہے۔ کرایہ دینے کے بعد بچی رقم سے وہ اپنا باقی خرچ چلاتی ہیں۔ امرجیت کو دوسروں پر منحصر رہنا پسند نہیں ہے۔ وہ اپنی دیکھ بھال خود کرتی ہیں اور اپنا کھانا بھی خود بناتی ہیں۔ ان دنوں راشن اور آٹا خریدنے میں زیادہ پیسے خرچ ہو رہے ہیں۔ امرجیت کی بڑی بیٹی، ۵۰ سالہ بلوندر کور کہتی ہیں، ’’جب سرکار گیہوں دیتی تھی، تو ۲ روپے کلو کے حساب سے اناج کی سات بوریاں [بیوہ عورتوں کا کوٹہ] مل جاتی تھیں۔ لیکن موجودہ سرکار نے آٹا دال اسکیم ہی بند کر دی۔‘‘

امرجیت کے پاس نیلا کارڈ ہے، جو عوامی نظام تقسیم (پی ڈی ایس) کے تحت خط افلاس سے نیچے زندگی بسر کرنے والے خاندانوں کو دیا جاتا ہے، تاکہ وہ رعایتی قیمتوں پر اناج خرید سکیں۔ لیکن ۲۰۲۲ میں پنجاب کی بھگونت مان سرکار نے کارڈوں کی جانچ پڑتال کرنے کے نام پر اس اسکیم پر عارضی پابندی لگا دی۔ سال ۲۰۲۶ آدھا گزر چکا ہے، اور اب بھی انہیں اس اسکیم کے تحت اناج اور دوسری چیزیں نہیں مل رہی ہیں۔

انہیں پردھان منتری غریب کلیان انّ یوجنا کے تحت سال میں دو بار ۱۵ کلو گیہوں ملتا ہے۔ امرجیت سوال کرتی ہیں، ’’اِنی کو کنک نال کتّھے گزارہ ہوندا ہے [اتنے سے کسی کا گزارہ کیسے ہو سکتا ہے]؟‘‘ انہیں بڑھاپے کا پنشن اسکیم کے تحت ہر مہینے ۱۵۰۰ روپے ملتے ہیں، جس سے انہیں کچھ راحت مل جاتی ہے۔ لیکن بڑھتی عمر کے ساتھ ان کی صحت بھی خراب ہوتی جا رہی ہے، اس لیے ان کا خرچ بھی بڑھتا جا رہا ہے۔ پیٹ پر ابھری گانٹھ دکھاتے ہوئے وہ کہتی ہیں، ’’یہ دیکھو، غم دا گولا۔‘‘ گھر سے تقریباً تین کلومیٹر دور سرکاری اسپتال ہونے کے باوجود وہ کبھی ڈاکٹر کے پاس نہیں گئیں۔ وہ کہتی ہیں، ’’سرکاری اسپتالوں میں ہماری جیسی نیچی ذات کے لوگوں کی کون سنتا ہے؟ اور اگر پرائیویٹ اسپتال جاؤں تو پیسے کمانے کے لیے آپریشن کا بہانہ بنا کر، ڈاکٹراں نے مینوں چیر کے رکھ دینا، میں مر جانا [ڈاکٹر میرا چیر پھاڑ کر دے گا اور میں بچ نہیں پاؤں گی]۔‘‘

ابھی اس گانٹھ میں درد نہیں اٹھتا، لیکن اب امرجیت ایک وقت کا کھانا کھانے کی بھی استطاعت نہیں رکھتیں۔ اس سے ان کا جسم مزید کمزور ہوتا جا رہا ہے۔ پچھلے کچھ مہینوں میں کام پر جاتے اور لوٹتے وقت وہ کئی بار گر بھی چکی ہیں۔ جب ان سے پوچھا گیا کہ پیدل ہی کیوں چلتی ہیں، تو انہوں نے کہا، ’’پیدل نہ چلوں تو کیا کروں۔ رکشہ کے کرایے کے پیسے کہاں سے لاؤں؟‘‘ میرے سوال سے وہ تھوڑا پریشان ہو جاتی ہیں۔

’’میں پڑھی لکھی نہیں ناں اسے کر کے گوہا چُک رہی آں۔ کوئی ہور کام کرنا وی نئیں اوندا [میں پڑھی لکھی نہیں ہوں، اس لیے گوبر اٹھا رہی ہوں۔ مجھے کوئی اور کام نہیں آتا ہے]۔ کھیتی کے کام میں کسان صرف جوان لوگوں کو رکھنا چاہتے ہیں۔ جب بھی میں کام مانگنے جاتی ہوں تو وہ کہتے ہیں، ’ماتا، تو گھر بہ [اماں، تم گھر بیٹھو]۔‘ ہمارے پاس اپنی کوئی زمین نہیں ہے۔ نہ تو میرے میکے اور نہ ہی سسرال میں زمین تھی۔‘‘ پنجاب میں شاملات [یعنی گاؤں کی مشترکہ زمین] سے متعلق جو تحریک چل رہی ہے اس کا فائدہ ابھی تک ترن تارن کے دلتوں تک نہیں پہنچا ہے۔ اس لیے، فی الحال امرجیت کے پاس کوئی دوسرا راستہ نہیں ہے۔

وہ کہتی ہیں، ’’میں وی بڑھاپے چ ارام کرنا چاہوندی ہاں، پر جے میں بہ گئی تاں مر جاؤں گی [میں بھی بڑھاپے میں آرام کرنا چاہتی ہوں، مگر میں کام نہ کروں تو مر جاؤں گی]۔‘‘

یہ اسٹوری سب سے پہلے ہندی میں لکھی گئی تھی۔