भूख के आगू बेबस

अमरजीत कौर आधाच मं रुक जाथे; लोहा के तसला (घमेला) जेन ला वो ह अपन मुड़ मं बोहे के कोसिस करत हवय, कुछेक घड़ी थोकन डगमगा जाथे. ओकर बाद धीरे-धीरे, वो ह कम-कम अऊ लड़खड़ावत रूडी (घुरूआ) कोती जाथे, भंइसी कोठा ले निकारे गोबर ला ऊहां फेंके बर. एक बखत रहिस जब वो ह मुड़ मं गोबर भरे तसला करीबन 10 -12 किलो वजनी – धरके जावत रहिस. फेर 72 बछर के उमर मं ये करे मुस्किल आय. वइसे, आज ओकर हिरदे के पीरा ह तसला ले कहूँ जादा गरू हवय, जेन ह ओकर रेंगे ला बिलम करत हवय.

मंय सोचे रहेंय के ओकर परिवार के बारे मं पूछे सोझ बात जइसने होही, फेर ये सवाल ह सुरता के अइसने तूफ़ान ला दिस जेन ह अमरजीत ला 24 बछर पाछू ले गिस. वो ह कहिथे, “'उनहांदसयापट्टीमोड़तेतेरामुंडामरगयाऐक्सीडैंटनाल[वो ह आके बताइस के पट्टी के मोड़ करा तोर बेटा के एक ठन अलहन मं परान गे हवय’],” अऊ ओकर बाद गोबर संकेले मं लग जाथे. ओकर दूनों हाथ बगेर सोचे अपन आप चलत हवंय; भूंइय्या मं कुला के भार बइठे ले ओकर माड़ी मन के चटके के आवाज आथे. “वो ह रिक्सा चलावत रहिस. सिरिफ 18 बछर के रहिस.” पांच बछर बाद, वो ह अपन दूसर बेटा ला घलो गंवा परिस जेन ह 21 बछर के रहिस.

36 बछर पहिली जब अमरजीत के दरूहा घरवाला गुजरगे, वो बखत ओकर बेटा मन छै अऊ चार बछर के रहिन. गर अमरजीत बिहाव के बाद ले गोहा-कूड़ा (गोबर उठाय )के काम करे नइ रइतिस, त वो ह अपन दूनों बेटा अऊ दूनों बेटी (जेकर मन के बिहाव होगे हवय) मन पा पाले पोसे नइ सके रइतिस. वो ह अपन हाथ ले गोबर उठाथे अऊ ओकरे संग ओकर मन मं जुन्ना सुरता घलो हरियर हो जाथे: वो ह एक बेर मं एक अंजुरी गोबर तसला मं डारथे. तस्ला ला मुड़ मं बोहत पीरा के बोल मुंह ले निकर जाथे अऊ लड़खड़ावत करीबन 100 मित्र दूरिहा रूडी (घुरुआ) धर जाय ला धरथे. आज बिहनिया गोबर उठाय के बाद ले ये ह 20 वां बेर आय. वो ह पंजाब मं अनुसूचित जाति के रूप मं राखे गे मेहरे सिख समाज ले हवय. भूमिहीन दलित अमरजीत अपन गुजारा बर पट्टी शहर के सात ठन घर मं गोहा-कूड़ा (गोबर उठाय) के बूता करथे.

“जदों मैं डंगरां दा गोहा चुक्कण लई थल्ले बहिंदी हां, तां ओ अकसर मेरे सिर ते ही मूत दिंदीआं ने. मैं रोज़-रोज़ सिर नहीं धो सकदी ते शैंपू-साबण दा खरचा वी नहीं चुक्क सकदी. एस लई आह लिफ़ाफ़ा पा लैनी हां [ मोला ये झिल्ली अपन मुड़ मं डरे ला परथे काबर के अक्सर जब मंय गोबर उठावत रहिथों, त भंइसी मन मूत देथें. मंय रोजके अपन केस धोये नइ सकंव, काबर के साबुन अऊ शैम्पू के खरचा उठाय नइ सकंव].” अमरजीत मोला वो करिया झिल्ली दिखाथे जेन ला वो ह अपन हाथ मं धरे हवय. वो ह अभिचे-अभिचे दिन के पहिला घर के बूता सिराय हवय. 10 ठन भंइसी वाले एक झिन जमींदार किसान के घर के. वो ह इहाँ ले दूसर जगा जाही.

बिहनिया 6 बजे एक कप चाय पिये के संग ओकर दिन के बूता सुरु हो जाथे. नौ घंटा, वो ह अपन घर ले चार–सवा चार कोस के दायरा मं बगरे सात ठन घर मं जाथे. ये काम के बखत ओला सुस्ताय ला नइ मिलय – न कलेवा बर अऊ न बेरा बखत खाय बर. ओकर भारी मिहनत के बदला मं ओला बनेच कम पइसा मिलथे. “जेन लोगन मन करा तीन ले चार मवेसी हवंय, वो मन मोला महीना के 500 रूपिया देथें. जमींदार कम घर ले मोला 1,000 रूपिया अऊ आधा लीटर गोरस मिलथे.”

वो ह दिन भर मं करीबन 30 ले 35 मवेसी के गोबर उठाथे. “बखत बढ़िया रहिथे त मंय महीना मं करीबन 3,500 ले 4,000 रूपिया कमा लेथों. जाड़ मं काम कम हो जाथे.” ओ बखत तरन तारन जिला मं भारी जाड़ परथे. “जाड़ मं कतको मवेसी मर जाथें, ते पायके लोगन मन ओ मं ला भीतरी मं ले जाथें अऊ मोर जरूरत नइ परय. ये महीना मं मोर देह घलो मोला जियादा मिहनत करे नइ देवय. दिन मं मंय जल्दी निकरे नइ सकंव अऊ मोला मंझनिया 3 बजे तक ले लहूटे ला होथे. मंय सरा दिन बूता करे नइ सकंव. लोकींपैसेनींभरदेकमभावेंपूरादिनकराउँदेरहन [फेर लोगन मन पइसा दे ला नइ चाहंय अऊ आस करथें के मंय जम्मो दिन बूता करंव,]” वो ह कहिथे.

ओकर करीबन आधा कमई अपन पोती संग भाड़ा देय मं सिरा जाथे, जेन ह ओकर संग भाड़ा के खोली मं रहिथे. बांचे पइसा ले ओकर गुजारा होथे. अमरजीत ला अपन भरोसे रहे ला भाथे, अपन जरूरत के जिनिस खुदेच देखथे अऊ अपन बर रांधथे. ये बखत रासन अऊ आटा बिसोय मं जियादा खरचा होथे. अमरजीत कौर के सेबल बड़े बेटी, 50 बछर के बलविंदर कौर कहिथे, “जब येकर पहिली के सरकार ह गहूँ देवत रहिस, 2 रूपिया किलो वाले सात बोरी (बेवा कोटा) मिलत रहिस. अब के सरकर ह ये आटा-दाल योजना ला बंद कर दे हवय.”

अमरजीत करा ‘ब्लू कार्ड’ (नीला कार्ड) हवय, जेन ह गरीबी रेखा ले नीचे वाले परिवार मन ला सरकारी रासन (पब्लिक डिस्ट्रीब्यूशन सिस्टम (पीडीएस)के तहत देय जाथे, जेकर ले वो मन सोसायटी ले कम दाम मं राशन बिसोय सकंय. वइसे, साल 2022 ले पंजाब मं भगवंत मान के अगुवई वाले आम आदमी पार्टी सरकार ह कार्ड के जाँच के नाव मं पीडीएस योजना ऊपर कुछु बखत बर रोक लगा दे हवय. साल 2026 मं घलो वो मन ला ये स्कीम के तहत रासन अऊ दीगर जरूरी जिनिस मिलत नइ ये.

प्रधानमंत्री गरीब कल्याण अन्न योजना के तहत वोला बछर भर मं दू बेर 15 किलो गहूं मिलथे. अमरजीत कौर सवाल करथे, “इनीकुकनकनालकित्थेगुज़ाराहुंदाहै [अतकेच मं कइसने गुजारा होही?]” वोला वृद्धा पेंसन के हरेक महीना 1,500 रूपिया मिलथे, जेकर ले थोकन सुभीता त हो जाथे, फेर उमर बढे के संगे संग गिरत सेहत सेती घलो कुछु लागथे. वो ह मोला पेट के गांठ दिखावट कहिथे, “येला देख, ये मोर पीरा के गांठ आय.” वो ह डाक्टर करा नइ गिस, तीर मं कोस भर मं सरकारी अस्पताल होय के बाद घलो. वो ह कहिथे, “सरकारी अस्पताल मन मं हम जइसने निचला जात के लोगन मन के कोन चिंता करथे? अऊ गर मंय निजी अस्पताल मं जाहूँ, त डाक्टर मन नान-कन बीमारी मिलतेच मोर आपरेसन कर दिहीं [ काबर के वो मन ला अपरेसन मं जियादा पइसा मिलथे].”

अब वो गांठ मं कोनो दरद नइ ये, फेर अमरजीत बने करके खाय नइ पावय, जेकर ले वो ह दुब्बर होगे हवय. हाल के कुछु महीना मं बूता करे जावत अऊ लहूटत कतको बेर गिर चुके हवय. तोला रेंगत जाय ला काबर परथे? “ गर रेंगत नइ जहूँ, त अऊ काय करहूँ? रिक्सा भाड़ा कहाँ ले लाहूँ?” वो ह मोर सवाल सुनके थोकन खिसियावत दिखिस.

“मैंपढ़ी-लिखीनहींनाइसेकरकेगोहाचुकरहीआं. कोईहोरकमकरनावीनईआउंदा [मंय पढ़े लिखे नइ जानंव, न कोनो आने बूता जानंव. कोनो घलो नवा बूता करे बर तजुरबा चाही].” किसान मन खेती के बूता बर सिरिफ जवान लोगन मन ला काम देथें. जब घलो ओकर मन करा जाथों, त वो मन कहिथें: “माता,तूघरबह[ डोकरी दाई तंय घरेच मं रह].” हमरा करा जमीन नइ ये, न मोर ससुराल करा अऊ न मोर दाई-ददा करा.” पंजाब मं सामलत [ गाँव के जमीन] बर आन्दोलन अब तक ले पूरा नइ होय हवय अऊ तरनतारन मं दलित मन पोठ नइ होय सके हवंय. तब तक ले अमरजीत करा कोनो रद्दा नइ ये.

वो ह कहिथे, “मैंवीबुढापेचअरामकरनाचाहुंदीहांपरजेमैंबहगईतांमरजाऊंगी [मंय घलो सियान उमर मं सुस्ताय ला चाहथों अऊ सुभिता के जिनगी गुजारे ला चाहथों, फेर गर मंय बूता करे बंद कर दिहूँ त जिये नइ सकंव.”

ये कहिनी मूल रूप मं हिंदी मं लिखे गे हवय.