मथवा पर गोबर, मनवा में पीर

अमरजीत कौर बीच रस्ता में ठमक जात बाड़ी. तसली माथ पर रखे खातिर उठावत-उठावत तनी देर ला गोड़ डगमगाए लागता. फेरु अपना के संभारत, छोट-छोट डेग धरत भइंस के खटाल से उठावल गोबर के एगो आउरी खेप धरे रूड़ी (गोबर के ढेर) ओरी बढ़त बाड़ी. एगो जमाना रहे जब गोबर से भरल तसला माथ पर उठा के ऊ आराम से चलत रहस. दस-बारह किलो उनका खातिर कुछो ना रहे. बाकिर अब 72 बरिस में ई काम मुस्किल हो गइल बा. आज माथा पर धइल तसला से जादे मन भारी बा, एही से उनकर गोड़ लड़खड़ा रहल बा.

परिवार के बारे में एगो मामूली सवाल अमरजीत के मन में याद के अइसन बवंडर उठा देलक कि ऊ 24 साल पीछे लउट गइसी. “उनहां दसया पट्टी मोड़ ते तेरा मुंडा मर गया ऐक्सीडेंट नाल (ऊ बतइलन कि पट्टी मोड़ पर तोहार लइका ऐक्सीडेंट से मर गइल).” एतना कहके ऊ फेरु गोबर बटोरे में लाग जात बाड़ी. उनकर हाथ मसीन जइसन चले लागता. जमीन पर चुक्के-मुक्के बइठे लगली, त ठेहुना आवाज करे लागल. “ऊ रिक्सा खींचत रहे. खाली 18 के रहे.” पांच बरिस बाद उनकर दोसरो लइका चल बसलन. तब ऊ 21 के रहस.

कोई 36 बरिस पहिले जब उनकर पियक्कड़ घरवाला मरलन, त अपना पाछू बस छव आ चार साल के दू गो बेटा छोड़ गइलन. जदि ऊ गोहा-कूड़ा (गाय-बैल के गोबर) उठावे के काम ना करती, जे ऊ बियाह के बाद से करे लागल रहस, त आपन बेटा आ दुनो बेटी (जेकर बियाह हो गइल बा) के पाल ना सकती. ऊ खालिए हाथे गोबर उठावत जात रहस. जइसे मन में उमड़त दुखो के गोबर संगे मुट्ठिए-मुट्ठिए तसला में डालत जात होखस. तसला माथ पर रखत एगो लमहर सांस छोड़त बाड़ी आउर कोई 100 मीटर दूर रूड़ी ओरी लड़खड़ात बढ़े लागत बाड़ी. आज भोर में काम सुरु कइला के बाद, ई पचासवां खेप बा. ऊ महरे सिख समुदाय से आवेली, जे पंजाब में अनुसूचित जाति के रूप में दर्ज बा. अमरजीत भूमिहीन दलित बाड़ी, आ पट्टी कस्बा के सात घरन में गोहा-कूड़ा उठाके आपन गुजारा करेली.

“जदों मैं डंगरां दा गोहा चुक्कन थल्ले बहंदी आ तां उह अकसर मेरे सिर ते ही मूत दिंदे ने. मैं रोज रोज सिर नहीं धो सकदी ते शैंपू साबन का खरचा वी नहीं चुक सकदी. इसे लई आह लिफाफा पा लैनी आं (गोबर उठावे खातिर नीचे बइठिला, त भइंस सब केतना बेरा हमार माथे पर मूत देवेला. हम रोज बाल ना धो सकीं आउर ना रोज साबुन-शैंपू के खरचा उठा सकीं. एहि से माथा पर पन्नी बान्ह लीहिला).” अमरजीत हमरा हाथ में धइल एगो करिया पन्नी देखावत बाड़ी. उनकर एक घर के काम खतम हो चुकल बा. ई किसान के घर बा, जेकरा लगे जमीन बा, 10 गो भइंस बा. अब इहंवा से ऊ दोसर घरे जइहन.

उनकर दिन भोरे 6 बजे एक कप चाय से सुरु हो जाला. अगिला नौ घंटा में ऊ आपन घर से 12-13 किमी के दायरा में कुल सात घर में काम करे जाली. बीच में सुस्ताए के टाइम ना होखे. ना नस्ता करे आ ना दुपहरिया खाए के. एतना मेहनत के बदले मिले वाला मजुरियो बहुत कम बा. “जादेतर लोग, जिनका लगे तीन-चार मवेसी बा, हमरा 500 रुपइया महीना देवेला. जमींदार के घर से 1,000 रुपइया आ आधा लीटर दूध मिल जाला.”

ऊ दिन भर में कोई 30 से 35 जानवर सब के गोबर उठावेली. “दिन अच्छा रहल, त महीना के 3,500 से 4,000 रुपइया के कमाई हो जाला. जाड़ा में काम जादे ना होखे.” ओह घरिया तरन-तारन जिला में खूब ठंडा पड़ेला. “ठंडा में जानवर सब मरे लागेला, चाहे लोग ओकरा भीतरी रखेला. एही से हमार जरूरत ना पड़े. ठंडा में हमार तबियतो अइसन ना रहे कि एतना मिहनत के काम कर सकीं. हम जादे भोर में काम ना कर सकीं आउर दुपहरिया के 3 बजे ले घरे लउटे पड़ेला. पूरा दिन काम ना होखे. लोकीं पैसे नीं बरदे कम भावें पूरा दिन कराउंदे रहन (लोग पइसा ना देवे के चाहे, आउर काम भी सबके पूरा-पूरा दिन चाहीं).”

चाची के आधा कमाई त घर के किराया खा जाला. ऊ आपन पोती संगे एगो कमरा किराया पर लेके रहेली. किराया देवे में उनकर पोतियो मदद करेली. बाकी जवन पइसा बचेला, ओकरा से उनकर बाकी के खरचा चलेला. अमरजीत के दोसरा पर निर्भर रहल पसंद नइखे. ऊ आपन देखभाल अपने करेली, आपन खाना भी अपने बनावेली. आजकल त रासन आ आटा कीने में जादे पइसा लाग रहल बा. अमरजीत के बड़की लइकी, 50 बरिस के बलविंदर कौर कहेली, “सरकार जब गोहूं देत रहे, त 2 रुपइया किलो के भाव से अनाज के सात ठो बोरा (विधवा मेहरारू को कोटा) मिल जात रहे. आजकल सरकार आटा-दाल स्कीम बंद कर देले बा.”

अमरजीत के हाथ में बुल्लु रंग के कार्ड बा, सार्वजनिक वितरण प्रणाली (पीडीएस) के तहत गरीबी रेखा से नीचे के परिवार के मिले वाला कार्ड. एकरा से ऊ लोग रियायती दाम पर अनाज कीन सकेला. बाकिर सन् 2022 में पंजाब के भगवंत मान सरकार कार्ड सब के जांच-पड़ताल के नाम पर एह योजना पर अस्थायी रूप से रोक लगा देले बा. आधा 2026 बीत गइल. अबले ओह लोग के एह योजना के तहत अनाज आ दोसर जरूरी चीज सब नइखे मिलत.

उनका प्रधानमंत्री गरीब कल्याण अन्न योजना से साल में दू बेरा 15 किलो गेहूं मिल जाला. अमरजीत पूछेली, “इनी कु कनक नाल कित्थे गुजारा हुंदा है (एतना में केकरो गुजारा कइसे चल सकेला)?” उनका हर महीना वृद्धावस्था पेंशन से 1,500 रुपइया भी मिलेला, जेकरा से तनी राहत बा. बाकिर बढ़त उमिर संगे उनकर तबियतो खराब रहे लागल बा. एही से खरचो बढ़ल जा रहल बा. पेट में निकलल गांठ देखावत ऊ कहली, “ई देख, दुख के गांठ!” सरकारी अस्पताल उनका घर से बस तीन किमी पर बा, पर ऊ कबो डॉक्टर लगे ना गइली. उनकर कहनाम बा, “सरकारी अस्पाल में हमनी जइसन नीच जात के के पूछेला? आ जदि प्राइवेट में जा, त पइसा कमाए खातिर ऑपरेशन के बहाना बनाके, डाकटरां ने मैनूं चीर के रख देना, मैं मर जाना (डॉक्टर हमरा के चीर-फाड़ दी, हम त मर जाएम).”

गांठ में अब दरद ना होखे, बाकिर अब अमरजीत एक बखत के खानो ठीक से ना खा पावेली. एह चलते ऊ कमजोर भइल जा रहल बाड़ी. पछिला कुछ महीना में काम पर जाए, आवे गरिया केतना बेरा ऊ रोड पर गिरियो चुकल बाड़ी. उनका से पूछल गइल कि पैदले काहे चलिले, त कहली, “पैदल ना चलीं त का करीं. रिक्सा के पइसा कहंवा से आई?” पूछला से ऊ तनी परेसान हो जात बाड़ी.

“मैं पढ़ी-लिखी नहीं ना इसे करके गोहा चुक रही आं. कोई होर कम करना वी नई आउंदा. (पढ़ल-लिखल नइखी, एही से गोहा-कूड़ा उठावत बानी. दोसर आउर कोई कामो करे ना आवे.) खेत में लोग काम खातिर खाली जवान लोग के रखे चाहेला. ओह लोग से काम मांगे जा, त कहेला, ‘मात, तू घर बह (माई, तू घरे बइठे)’. हमरा लगे एको जमीन नइखे. ना त नइहर, ना ससुराल में रहे.” पंजाब में शामलात (मतलब गांव के साझा जमीन) के लेके जे आंदोलन चलता, ओकर फायदा अबले तरन तारन के दलित लोग तक नइखे पहुंचल. एही से, फिलहाल त अमरजीत लगे कवनो दोसर रस्ता नइखे.

ऊ कहेली, “मैं वी बुढापे च अराम करना चाहुंदी हां पर जे मैं बह गई तां मर जाऊंगी (हमहू बुढ़ापा में आराम करे के चाहिला. जदि हम काम ना करम, त मर जाएम).”

कहानी मूल रूप से हिंदी में लिखल गइल रहे.