उत्तर प्रदेस के बिछलात सड़क प जचगी

खून से लाथाइल स्ट्रेचर देखके श्री कृष्ण बाजपयी घबरा गईलन. सीतापुर जिला के फरवरी महिना के करकरात ठंडा में अपना घर के बहरी आगी तापत इ 70 बरीस के किसान मन पारत कहलन, “हमनी के चेतावल रहे कि परसव आसन ना होई. गांव के आसा कार्यकर्ता हमारा पतोह के 'जोखिम भरल' डिलीवरी के चीन्हा लगवले रहली.

अइसे इ बात सितम्बर 2019 के ह. बाकिर श्रीकृष्ण एकरा के ऐतरे मन पारेलन जईसे इ काले के बात होखे. “(बाढ़ के पानी) पानी अभी कम भाईले रहे. बाकिर इ सड़क के तूर देले रहे. एहिसे एम्बुलेंस हमनी के दुआरी ले णा आ सकत रहे.” श्री कृष्ण के गांव टांडा खुर्द, लहरपुर ब्लॉक में परेला. जे शारदा औरी घाघरा नदी के लगे बा. इंहां के गांव बेर-बेर औरी अचक्के आवे वाला बाढ़ के लापता में आवत रहेला. जेकरा चलते आफत-बिपत में सवारी के बेवस्था कइल मस्किल हो जाला.

टांडा से सीतापुर के जिला अस्पताल के 42 किलोमीटर ले जेल कौनो गर्भवती मेहरारू खातिर बहुत लमहर आ मस्किल बा. औरी जे पहिलका पांच किलोमीटर बिछलहर वाला सड़क दुपहिया से जाए के होखे त इ औरियो मस्किल हो जाला. श्री कृष्ण कहेलन " हमनी के एम्बुलेंस ले जाए खातिर अइसन करे के परल. बाकिर मस्किल त तब भईल जब हमनी जिला अस्पताल पहुंचनी.”

लईकी के जनम देला के बादो ममता के खून बहल बंद ना भईल. श्री कृष्ण कहलन कि हमनी उम्मीद लगा के बईठल रहनी, “इ अचक्के ना रहे. हमनी के पटा रहे कि मस्किल हो सकेला, बाकिर हमनी के बुझाइल कि डाक्टर ओकरा के बचा लीहें.”

बाकिर जब ओकरा के स्ट्रेचर प ले जाईल जात रहे तब श्री कृष्ण के ओकरा ऊपर उज्जर चादर लउकबे ना करत रहे. "एतना खून पसरल रहे. ओकरा के देख के हमारा अपना पेट में गोला जइसन बुझाइल. डाकतार हमनी के खून के इंतजाम करे के कहलस. हमनी जल्दिये ओकर इंतजाम क लहनी. बाकिर जब ले ब्लड बैंक से अस्पताल लौटानी, तब ले ममता के मिरतु हो गईल रहे.”

उ बस 25 बरीस के रहली.

मिरतु से ठीक एक दिन पहिले, मेडिकल जांच में उनकर वजन 43 किलो रहे. कम वजन भईला के चलते उनका देह में प्रोटीनो के कमी रहे. उनका देह में हीमोग्लोबीन के स्तर 8 ग्राम/डीएल रहे. जौन गंभीर खून के कमी ह. (गरभवती महिला में हीमोग्लोबीन के स्तर 11 ग्राम/डीएल होखे के चाहीं)

राष्ट्रीय परिवार स्वास्थ्य सर्वेक्षण 2019-21 के अनुसार, उत्तर प्रदेस में, खासकर के महिला औरी लईकन के बीचे खून के कमी एगो बडका सार्वजानिक स्वास्थ्य से जुडल मुद्दा बा. राज्य में 15-49 के उमिर् वाला सब महिला लोग में से 50 परतिसत से बेसी महिला एनीमिया के सिकार बा लोग.

पोषक तत्त्व के कमी एनीमिया के सबसे साधारण कारण ह. देह में लोहा के कमी दुनिया में एनीमिया के लमसम सब मामला के जिम्मेदार ह. बाकिर छुतहा रोग औरी बंस से मिलल स्थिति के अलावे फोलेट (बिटामिन बी9) औरी बिटामिन ब 12 के कमियों एनीमिया के कारण बनेला.

एनएफएचएस -5 के आंकड़ा से पता चलता कि यूपी में खाली 22.3 परतिसत माता लोग अपना गर्भावस्था के बेरिया कम से कम 100 दिन के आयरन औरी फोलिक एसिड के खुराक लहल. ईहे डर राष्ट्रीय स्तर प (2019-21) प 44.1 परतिसत के साथे लमसम दुगुना बा. बाकिर सीतापुर जिला में खाली 18 परतिसत माता लोग सप्लीमेंट लहल.

एनीमिये के चलते जच्चा-बच्चा प दूर ले नतीजा आवेला. एही के चलते समय से पहिले जचगी औरी जचगी के बेरा लईकन के वजन कम होला. औरी त औरी, इ सीधा माता-मृत्यु दर औरी जचगी के बेरा के मृत्यु दर से सीधे जुडल बा.

भारत में माता-मृत्यु दर के अनुपात, 2017-19 में प्रति 100,000 जीयत जनम प 103 मृत्यु के रहे. एही बेरा में, यूपी में इ आंकड़ा 167 रहे. राज्य के शिशु मृत्यु दर साल 2019 में प्रति 1,000 जीयत जनम प 41 रहे, जौन राष्ट्रीय दर 30 से 36 प्रतिसत बेसी रहे

बाजपेयी परिवार में खाली ममता के मिरतु के ही दुःख ना रहे, 25 दिन बाद उ नया जनमल बेटियों के मिरतु हो गईल. श्री कृष्ण कहलन, “हमनी पहिला दुःख से उबरल ना रहनी कि इ दुसरका दुःख आ गईल. हमनी सदमा में रहनी.”

कोविड महामारी अभी छाव महीना दूर रहे, जब ममता औरी उनकर लईकी के मिरतु तानियके दिन के भीतर भईल. बाकिर जब कोविड-19 पसरल, त देस के सार्वजानिक स्वास्थ्य सेवा कुल परभावित भईल. जौना में माता लोग के स्वास्थ्य संकेतकन में भारी गिरावट आईल.

पॉपुलेशन फाउंडेशन ऑफ इंडिया के स्वास्थ्य प्रबंधन सूचना प्रणाली के आंकड़ा के विश्लेषण से पता चलता कि अप्रेल औरी जून 2020 के बीच साल 2019 के एही बेरा में गर्भवती महिला लोग के जचगी से पहिले के देखभाल औरी अस्पताली राय में 27 प्रतिसत के गिरावट आईल रहे. पीएफआई के एगो बयान में कहल बा कि "माता लोग के स्वास्थ्य सेवा में बाधा, स्वस्थ रहे के चाह के कमी औरी स्वास्थ्य सेवा देवे वाला से कोरोना हो जाए के डर गर्भावस्था के जोखिम औरी बढ़ा दहलस. महिला औरी लईका के स्थिति औरी खराब हो गईल.”

पप्पू औरी उनकर परिवार महामारी के परभाव के एकदम सामने से देखल.

कोविड के दुसरका लहर अपना चरम प रहे, त उनकर मेहरारू सरिता देवी पांच महीना के पेट से रहली. औरी एनिमीया के मरीजो रहली. जून 2021 में एगो सांझ के उनका सांस लेवे में तकलीफ भईल- (कम हीमोग्लोबीन स्तर के संकेतक) औरी उ घरही भहरा गईली. पप्पू (32 बरीस) कहेलन, “ओ बेरा घरे केहू ना रहे. हम काम खोजे बहरा निकलल रहनी. हमार माइयो बहरा रहे.”

पप्पू के 70 साल के माई मालती कहली, उ बिहाने सरिता एकदम ठीक लगत रहली. “उ दोपहरिया में लईकन खातिर खिचड़ीयो बनवले रहली.”

बाकिर जब पप्पू सांझ के घरे अइलन त सरिता, जे 20 साल के रहली, उ पीयर हो गईल रहली औरी कमजोर लउकत रहली. “ उ (ठीक से) सांस ना ले पावत रहली.” एहीसे से उ बनारस के बडगांव के आपन गांव दल्लीपुर से 35 किलोमीटर दूर के भदोही जाए खातिर तुरंते एगो औटो रिक्सा किराया प लहलन. उ कहलन, “इंहा (बडगांव के) अस्पताल में मरीज भरल रहे. औरी इंहा के प्राथमिक स्वास्थ्य केंद्र में कौनो सुविधा नईखे. हमनी सोचनी कि हमनी के निजी अस्पताल जाए के चाहीं. जहां उचित इलाज मिल जाई.”

पूरा दुनिया के स्तर प, महामारी से निपटे में स्वास्थ्य प्रणाली कुल के मातृ स्वास्थ्य प खराब असर परल बा. मार्च 2021 में परकासित 17 देस के अध्ययन के मेटा विश्लेषण में, द लैसेंट मातृ, भ्रूण और नवजात लईकन के स्वास्थ्य प महामारी के लेखा-जोखा कइलस औरी नतीजा निकललस कि महामारी, ‘माता औरी शिशु के मिरतु के कारन भईल, जेकरा से बचावल जा सकत रहे.” द लैसेंट में एकरा के ले के तत्काल कारवाई के जरुरत बतावल गईल रहे , कि "जच्चा-बच्चा के मिरतु दर कम करे खातिर सालन से कईल काम बेकार ना हो जाय.”

बाकिर राज्य के ओर से गर्भवती महतारी कुल खातिर आफत में तत्काल में कवनो कदम ना उठावल गईल

अस्पताल पहुंचे से पहिलही सरिता ऑटो में ख़तम हो गईली.पप्पू कहलन, “लौक डाउन के चलते हमनी के रास्ता में देर होत रहे. रास्ता में कई गो चौकी बनल रहे जेकरा से जाए आवे में बिघिन होत रहे.”

जब पप्पू के बुझाइल कि सरिता के मौत हो गईल बा, त पुलिस के डरे उ आपन मेहरारू के गम लुका लहलें. उनका इ डर रहे कि पुलिस का करी जब जानी कि उ एगो लास के साथे जतरा करतारन. उ औटो रिक्सा चालक से कहलन कि उ वापस घुमा ले औरी गांवे लौट चले. उ कहलें, “हमनी के जब निचित कईनी जा कि ओकर देह सोझ बा, तब हमनी के एगो चौकी से गुजरनी जा. भाग से हमनी के ना रोकल गईल.”

पप्पू औरी मालती लास के अंतिम किरीया करे खातिर लगे के घाट पर ले गईल लोग. एकरा खातिर ओ लोग के अपना नातेदार सब से 2,000 रोपया उधार लेवे के परल. पप्पू कहेलें, “हम एगो ईंटा भट्टा प कार करत रहनी, बाकिर लौकडाउन मार्च 2020 में ऊहो बंद हो गईल” पप्पू मुसहर समुदाय से बाडन-जौन यूपी में सबसे बेसी छांटल जात में से एगो ह.

लौकडाउन से पहिले उ इंटा के भट्टा प कार करत रहलन. जहां से उनका 6,000 रोपया महीना मिला जात रहे. उ कहलन, “इंटा भट्टा त फेर से खुल गईल बा. बाकिर मेहरारू के मिरतु के बाद हम ऐतरे के कार कईल बंद क देले बानी. हम घर से बहरा ओतना नईखी रह सकत जेतना पहिले रहत रहनी. हमरा अपना लईकन के साथे रहे के बा.”

ज्योती औरी रानी 3,2 साल के उनका के कालीन बीनत देखेली. जौन उनकर नायका रोजी ह. उ कहलन, “हम इ काम कुछे महीना पहिले सीखले बानी. देखल जाता कि इ कइसन चलता. इ काम के मदद से हम अपना लईकन के साथे घरही रह सकेनी.हमार माई बहुत बूढ़ बीया. उ आपन देखभाल अपनही ना कर सकेले. जब सरिता रहली त उ हमारा मई के साथे-साथे लयिकनो के देखभाल करत रहे. हमरा नईखे मालूम कि जब उ पेट से रहे त हमनी के ओकर देखभाल करे खातिर औरी का करे के चाहत रहे. हमनी के ओकरा के अकेले ना छोड़े के चाहत रहे.”

बनारस के पीपल्स विजिलेंस कमीटी औन ह्यूमन राइट्स से जुडल सामजिक कार्यकर्ता मंगला राजभर कहलन कि कोविड -19 के परकोप के बाद से, बडगांव ब्लॉक में मातृ देखभाल के औरीयो अनदेखी भईल बा. राजभर कहलन, “इ ब्लॉक के कई गो महिला लोग एनीमिया से पीड़ित बा. ओ लोग बहुत देखभाल औरी आराम के जरुरत बा.” राजभर बीस साल से बेसी समय ले बडगांव में स्थानीय समुदाय के साथे मिल के काम कईले बाड़न. उ कहेलें, “गरीबी मरद लोग के घर छोड़ के काम खोजे के मजबूर करेला. एहीसे मेहरारू कुल घरे औरी खेत में कार करत रहेली.

राजभर बतावेलन कि महिला लोग के अपना भोजन में प्रोटीन, बिटामिन, आयरन के जरुरत बा. बाकिर उ लोग सार्वजनिक बितरण प्रणाली से मिले वाला रासन से खयका बनावेला. तरकारी कीने के काबू नईखे ओ सबके.” ओ सब के बढ़िया स्वास्थ्य सेवा ले पहूंच नईखे, सारा हालत ओ सब के खेलाफ बा.”

सीतापुर के टांडा खुर्द में, आसा कारकर्ता आरती देवी कहली कि कई गो महिला लोग एनिमीया से पीड़ित बा/ औरी ओ लोग के वजन बहुत कम बा. जेकरा से गर्भावस्था में बहुत मस्किल होला. उ कहली, “इंहां के लोग खाली दाल भात खाला. ओ लोग के ठीक से पोसन नईखे होत. तरकारी ओ लोग के खयका से गायबे बा. केहू के लगे ठीक ठाक पईसा नईखे.”

श्री कृष्ण के पत्नी कांति (55 बरीस) कहली कि खेती से होखे वाला आय में गिरावट आईल बा. “हमनी लगे खाली दू एकड़ जमीन बा, जहां हमनी धान, गेहूं के खेती करनी. हमनी के फसलो बेर-बेर बाढ़ में बह जाला.”

कांती के लईका औरी ममता के मरद विजय (33 बरीस) गुजर करे खातिर औरी खाली किसानी के आसरा तूरे खातिर सहर में नौकरी क लहलन. बाकिर कोविड-19 के परकोप के चलते उनकर नौकरी चल गईल. अइसे साल 2021 के अंत में वपसो मिल गईल रहे. कांति कहेली "उनकर महीना 5,000 रोपया बा. ईहे हमनी के लौकडाउन के पहिले जियवले रहे. बाकिर हमनी के तरकारी में कटौती करे के परल. ताला बंदी से पहिलही दाल-चाउर के अलावे कुछु कीनल मस्कील हो गईल रहे. कोविड के बाद त हमनी के कोसिसो ना करेनी.”

एगो अध्ययन में कहल गईल बा कि साल 2020 में कोविड-19 के परकोप के तुरंत बाद आय में आईल गिरावट पूरा भारत के 84 परतिसत घर के परभावित कयिलस. बदला में आहार औरी पोषण प काफी असर परल.

राजभर औरी आरती देवी के मानता बा कि बढ़त गरीबी, मातृ देखभाल के कम साधन औरी आय्रान औरी फोलिक एसिड के खोराक के अनियमित सेवन से उच्च जोखिम वाला गर्भवस्था के के मामला के कम कईल मस्किल हो जाई. खास कर के गांव देहात में , जहां सार्वजनिक स्वास्थ्य सुविधा के पहुंच मस्किल बनल रहेला.

ममता के मुअला के डेढ़ साल बाद विजय दोसर बियाह कईलन. उनकर दुसरकी मेहरारू प्रिया साल 2021 के सुरुआत में गर्भवती रहली. ऊहो एनीमिया के शिकार रहली. औरी उन्कारो गर्भावस्था के उच्च जोखिम वाला गरभ के रूप में चीन्हा दहल रहे. जब नवम्बर 2021 में जचगी के बेरा आईल त, टांडा खुर्द में बाढ़ के पानी फेर से आ गईल रहे.

जौना परिस्थिति में ममता के अस्पताल ले गईल रहे अब ओकर फेर से सामना करे के हिम्मत ना रहे श्री कृष्ण के. बाकिर बाढ़ ए पारी ओतना भीषण ना रहे. एंबुलेंस उनका दुआरी ले पहुंचे में कामयाब रहल. परिवार प्रिया के 15 किलोमीटर दूर के निजी अस्पताल में ले जाए के फैसला कईलस. भाग से हर मस्किल पार भईल औरी एगो स्वस्थ लईकी स्वस्तिका के जनम भईल. ए पारी हालात ओ सब के साथे रहे

पार्थ एम्. एन, ठाकुर परिवार फाउंडेशन से मिलल एगो स्वतंत्र पत्रकारिता अनुदान से, सार्वजानिक स्वास्थ्य औरी नागरिक स्वतंत्रता के बिसय प रिपोर्टिंग करेलन. ठाकुर फैमिली फाउंडेशन इ रिपोर्ताज के बिसय प संपादन से जुडल कवनो नियंत्रण नईखे रखले.