بہار میں سیلاب کا خطرہ اور حکومت کی اندیکھی

سیلاب کی وارننگ انہیں وہاٹس ایپ گروپ پر ملی تھی۔ ایک غیر سرکاری تنظیم نے لوگوں کو ہندی میں میسج بھیج کر آگاہ کیا تھا کہ راتو ندی کی آبی سطح میں اضافہ ہو رہا ہے۔ ستمبر کی اُس شام کو ۳۲ سالہ گنیش صافی اپنے گھر پر ہی تھے اور انہیں یہ بات سمجھ میں آ گئی کہ ان کے پاس اپنی فیملی اور گھر کے سامان کو کسی محفوظ جگہ پہنچانے کے لیے صرف دو گھنٹے بچے ہیں۔

نیپال کے جنوبی میدانی علاقہ میں کافی بارش ہوئی تھی، جو سرکھنڈیو بِٹھا گاؤں سے تقریباً ۲۲۰ کلومیٹر شمال میں واقع ہے۔ گنیش اسی گاؤں میں رہتے ہیں، جو بہار کے سیتامڑھی ضلع کے سُرسنڈ بلاک میں واقع ہے۔

آٹھ مہینے بعد، مئی ۲۰۲۵ کی گرم دوپہر میں، آم کے درخت کے سایہ میں بیٹھے گنیش بتاتے ہیں کہ کیسے انہوں نے اپنے جڑواں بچوں (پانچ سال کا ایک لڑکا اور ایک لڑکی)، بیوی نگینہ دیوی (۲۸ سال)، دو بکریوں اور تقریباً ایک کوئنٹل اناج (گیہوں، دال اور چاول) کو پڑوسی کے پختہ مکان تک بحفاظت پہنچایا۔

گنیش کی جھونپڑی کے برعکس، ان کے پڑوسی کا اینٹ اور سیمنٹ سے بنا پختہ مکان ہے، جو تقریباً چھ فٹ اونچے پلیٹ فارم پر بنا ہے، تاکہ سیلاب کا پانی اندر نہ پہنچ سکے۔

راتو ندی میدانی علاقے کی پہاڑیوں سے نکلتی ہے اور گنیش کے گاؤں سے ہو کر گزرتی ہے۔ جب اوپری علاقوں میں تیز بارش ہوتی ہے، تو پانی کو سرکھنڈیو بِٹھا گاؤں تک پہنچنے میں تقریباً دو گھنٹے لگتے ہیں۔

گنیش اور ان کی فیملی کچھ دنوں تک اپنے پڑوسی کے گھر رہی۔ کیا پڑوسی نے بن بلائے مہمانوں کا خیرمقدم کیا؟ گنیش مسکراتے ہوئے کہتے ہیں، ’’ہاں، کیوں نہیں؟ مصیبت میں اگر پڑوسی کام نہیں آئیں گے، تو کون آئے گا؟‘‘

وہیں، گنیش کی بانس اور پھوس سے بنی جھونپڑی سیلاب کے پانی میں تین فٹ تک ڈوب گئی۔ جب پانی اترا، تو فرش پر اور وہاں رکھے سبھی سامانوں پر موٹی کیچڑ کی پرت جم گئی تھی۔ ان کا مٹی کا چولہا اور برتن بھی خراب ہو گئے تھے۔

جھونپڑی کی مرمت کرنے میں ایک ہفتہ لگا اور اس کے لیے گنیش کو تقریباً ۱۰ ہزار روپے (۱۱۷ ڈالر) خرچ کرنے پڑے۔ یہ رقم ایک بے زمین مزدور کے لیے بہت بڑی ہے، جس کی روزانہ کی کمائی صرف ۴۰۰ روپے ہے۔

گنیش اس بات کو تسلیم کرتے ہیں کہ وہاٹس ایپ پر دو گھنٹے پہلے ملی وارننگ کی وجہ سے ہی وہ اپنی فیملی، مویشیوں اور اناج کو بچا پائے۔ جیسا کہ اس گاؤں کے تقریباً ۲۴ ہزار لوگوں میں سے زیادہ تر نے تجربہ کیا ہے۔ کچھ لوگ گاؤں سے ۲۵۰ میٹر دور نیشنل ہائی وے ۲۲۷ پر چلے گئے، تو کچھ لوگوں نے پل پر پناہ لی، اور راتو کے گاؤں میں پانی بھرنے سے پہلے ہی گاؤں سے بحفاظت نکل گئے۔

گنیش کہتے ہیں، ’’اگر ہمیں وارننگ نہ ملتی، تو ہمارے مویشی، اناج اور باقی سامان سب ڈوب جاتے۔‘‘ ان کا تعلق دھوبی برادری سے ہے، جسے درج فہرست ذات کے تحت رکھا گیا ہے۔

بہار میں سیلاب ایک ایسی قدرتی آفت ہے، جو ہر سال آتی ہے۔ ہندوستان کے کل امکانی علاقوں کا ۱۸ فیصد حصہ صرف بہار میں ہے، جب کہ یہ ریاست ملک کے کل رقبہ کا محض ۳ فیصد ہے۔ بہار اسٹیٹ ڈیزاسٹر مینجمنٹ اتھارٹی کے مطابق، ریاست کا تقریباً ۶۳ء۷۳ فیصد حصہ، جس میں بنیادی طور پر اس کے شمال مشرقی علاقے شامل ہیں، سیلاب کی چپیٹ میں آنے والا خطہ مانا جاتا ہے۔

بہار میں کل ۸ بارہ ماسی (سال بھر رہنے والی) اور تقریباً ۶۰۰ موسمی ندیاں بہتی ہیں۔ ان میں سے کوسی، گنڈک، باگ متی، کملا بلان، مہانندا اور گھاگھرا جیسی ندیاں نیپال یا تبت سے نکلتی ہیں۔ گنگا ندی بہار میں ۴۴۵ کلومیٹر تک بہتی ہے۔ باقی ندیاں چھوٹی چھوٹی دھاراؤں کے ذریعہ گنگا میں مل جاتی ہیں۔

ان ندیوں کا کل آبی علاقہ بہار میں ۶۱۵۳۷ مربع کلومیٹر میں پھیلا ہوا ہے۔ نیپال کے اوپری علاقے بھی اسی گنگا ندی والے نظام کا حصہ ہیں۔ اس کا مطلب یہ ہے کہ جب ہندوستان یا نیپال، کسی بھی خطہ میں زیادہ بارش ہوتی ہے، تو پورے علاقہ میں سیلاب کا خطرہ بڑھ جاتا ہے۔ بہار کے ۳۸ میں سے ۲۹ ضلعے امکانی سیلاب والے ہیں، جن میں سے ۱۵ کو ’انتہائی سیلاب متاثرہ‘ قرار دیا گیا ہے۔

گزشتہ ۲۳ جون، ۲۰۰۲۵ کو وزارت داخلہ کو بھیجی گئی ایک رپورٹ میں بہار ڈیزاسٹر مینجمنٹ ڈپارٹمنٹ نے بتایا کہ ۲۰۲۴ کے سیلاب میں ریاست کے ۲۷ ضلعوں کی ۳۶۶۲ پنچایتیں غرقاب ہو گئی تھیں۔ اس قدرتی آفت میں ۱۹ لوگوں کی موت ہوئی اور تقریباً ۵۶ لاکھ لوگ متاثر ہوئے۔ (گرام پنچایتیں عام طور پر کئی گاؤوں کے مجموعہ کی نمائندگی کرتی ہیں۔)

بہار اسٹیٹ ڈیزاسٹر مینجمنٹ ڈپارٹمنٹ کے مطابق، ۲۰۱۵ سے ۲۰۲۴ کے درمیان سیلاب کی وجہ سے ریاستمیں ۱۷۵۲ لوگوں کی موت ہوئی اور ۷۶ء۶ لوگ متاثر ہوئے۔

سال ۱۹۵۴ میں بنی آزاد ہندوستان کی پہلی قومی سیلاب کنٹرول پالیسی میں شمالی بہار کی کئی ندیوں کے کنارے بند (باندھ) بنانے کی تجویز پیش کی گئی تھی۔ سب سے پہلے کوسی ندی پر، پھر دیگر ندیوں پر کل ۳۷۳۲ کلومیٹر کی لمبائی میں یہ بند بنائے گئے۔ لیکن اس کے باوجود، سیلاب متاثرہ علاقوں میں کوئی خاص کمی نہیں آئی۔ سال ۱۹۹۷ میں قلم کار اور سماجی کارکن دنیش مشرا نے اکنامک اینڈ پولیٹکل ویکلی میں لکھا تھا کہ ۱۹۵۴ میں بہار کا سیلاب متاثرہ رقبہ ۲۵ لاکھ ہیکٹیئر تھا، جو بڑھ کر ۳ء۶۹ لاکھ ہیکٹیئر ہو گیا ہے۔ دنیش مشرا بہار میں آبی خطہ کے مشہور و معروف ماہر ہیں اور سیلاب کے کنٹرول پر چار دہائیوں سے کام کر رہے ہیں۔

انل پرکاش، جنہوں نے ۱۹۹۰ کی دہائی کی شروعات میں ماہی گیر برادری کے لیے ندیوں کو ٹیکس سے مبرا کرانے کے مقصد سے گنگا مُکتی آندولن کی قیادت کی تھی، کہتے ہیں، ’’اعدادوشمار سے واضح ہے کہ بند سیلاب کو روکنے میں ناکام رہے ہیں۔‘‘

حالیہ برسوں میں پرکاش نے مظفرپور ضلع میں باگ متی ندی کے کنارے بند کی تعمیر کے خلاف تحریک بھی چلائی ہے۔

پرکاش کہتے ہیں، ’’دنیا بھر میں اور خاص کر ہمالیہ سے نکلنی والی ندیوں میں، جس میں بہت زیادہ گاد ہوتی ہے، ان پر بند بنانا بہت ہی خطرناک ثابت ہوا ہے۔ پھر بھی بہار کی حکومتیں بند بنواتی رہتی ہیں، تاکہ ٹھیکیداروں کو فائدہ ہو اور وہ سیاسی پارٹیوں کو پیسہ دے سکیں۔‘‘

جب کہ ماہرین کے درمیان اس بات پر اتفاق بنتا جا رہا ہے کہ علاقہ میں سیلاب آنے سے پوری طرح روکا نہیں جا سکتا، تو سیلاب سے متعلق پالیسیوں اور کوششوں کی سمت سیلاب سے ہونے والے نقصان کو کم کرنے پر مرکوز ہو گئی ہے۔ اسے خاص طور پر لوگوں کو وقت پر سیلاب کی پیشگی خبر دینے سے جوڑ کر دیکھا جا سکتا ہے، تاکہ لوگ گاؤں میں پانی داخل ہونے سے پہلے اپنے سامان اور فیملی کو لے کر بحفاظت نکل سکیں۔

سیلابی کی ابتدائی وارننگ کی اہمیت کو سمجھتے ہوئے گوگل کے فلڈ فورکاسٹنگ انیشیٹو نے ۲۰۱۹ میں مرکزی آبی کمیشن کے ساتھ معاہدہ کرتے ہوئے لوگوں کو وارننگ دینی شروع کی۔ اس کے تحت بہار کی ایک غیر سرکاری تنظیم (جو اپنا نام ظاہر کرنا نہیں چاہتی) نے ۲۰۲۱ سے لے کر اب تک ریاست کے ۱۲ سیلاب متاثرہ علاقوں میں رہنے والے ۳۶ لاکھ لوگوں تک یہ وارننگ پہنچائی ہے۔

اس پہل سے جڑے امر کمار شرما بتاتے ہیں، ’’ہمارے پاس ۱۲ ضلعوں میں ۳۲۰ رضاکار ہیں جو مانسون کے دوران سیلاب کی وارننگ بھیجتے ہیں۔ ہمیں گوگل کے فلڈ ہب اور مرکزی آبی کمیشن سے یہ الرٹ ملتے ہیں۔‘‘

سپول میں فلڈ الرٹ سروس سے منسلک رضاکار ارون کمار منڈل کہتے ہیں، ’’سب سے پہلے الرٹ ضلع کے رابطہ کاروں کے پاس آتا ہے۔ وہ یہ اطلاع گرام پنچایت کی سطح پر کام کرنے والے رضاکاروں کو دیتے ہیں، جو پھر اس گاؤں کے مکھیا، وارڈ ممبر اور لوگوں کے وہاٹس ایپ گروپ میں اسے بھیجتے ہیں۔‘‘

الرٹ ملنے کے ۳۰ منٹ کے اندر رضاکار اسے وہاٹس ایپ اور ایس ایم ایس کے ذریعہ بھیجتے ہیں۔ اس کے علاوہ، اہم لوگوں کو انفرادی طور پر بتاتے ہیں اور گاؤوں میں مائک سے عوامی اعلان بھی کرتے ہیں۔

شمالی بہار کے کوسی خطہ میں سیلاب متاثرہ لوگوں کے ساتھ کام کرنے والا این جی او کوسی نو نرمان منچ (کے این ایم) ایک وہاٹس ایپ گروپ چلاتا ہے، جس میں کم از کم ۴۰ گاؤوں کے لوگ جڑے ہوئے ہیں۔ اس کے رابطہ کار مہندر یادو بتاتے ہیں، ’’ہمیں چار ذرائع سے سیلاب کی وارننگ ملتی ہے: نیشنل ڈیزاسٹر رسپانس فورس (این ڈی آر ایف)، نیپال محکمہ موسمیات کی ویب سائٹ، مرکزی آبی کمیشن، اور بہار آبی وسائل محکمہ کی ویب سائٹ۔‘‘

حکومت بہار بھی مقامی پنچایت کے نمائندوں کے توسط سے سیلاب کا الرٹ بھیجتی ہے۔

پھر بھی، ان الرٹ کا اثر محدود ہی رہتا ہے، کیوں کہ کئی لوگ وقت پر خود کو اور اپنے سامان کو نہیں بچا پاتے۔

بہار ڈیزاسٹر مینجمنٹ ڈپارٹمنٹ کے اپنے اعداد و شمار کے مطابق، ۲۰۱۵ سے ۲۰۲۴ کے درمیان سیلاب کے دوران صرف ۵۲ء۴۶ لاکھ لوگوں کو ہی بحفاظت نکالا جا سکا، جو کہ سیلاب سے متاثر کل آبادی (۷۶ء۶ کروڑ) کا صرف ۹۴ء۶ فیصد ہے۔

کنچن کماری (۲۸) بچپن سے ہی کئی بار سیلاب کا سامنا کر چکی ہیں، وہ بتاتی ہیں، ’’ہم لوگوں کو خبر تو ملتی ہے سیلاب کی، لیکن ہم لوگ نکل کر جائیں گے کہاں؟ کوئی انتظام ہی نہیں رہتا ہے۔ کہاں راحت کیمپ بنا ہے، یہ بھی نہیں پتہ چلتا ہے۔‘‘

گرمیوں کی شام ہے۔ کنچن سپول ضلع کے صدر بلاک کی گھورن پنچایت کے نرملی گاؤں میں رہتی ہیں۔ وہ اپنی بانس اور پھوس سے بنی جھونپڑی کے آنگن میں کھڑی ہیں۔

نرملی گاؤں کی آبادی تقریباً ۱۲ ہزار ہے (مردم شماری ۲۰۱۱)، جس کے دونوں جانب کوسی ندی بہتی ہے اور یہ چاروں طرف بندوں سے گھرا ہوا ہے۔ کنچن بتاتی ہیں کہ ۲۰۲۴ کے ستمبر و اکتوبر مہینے میں آئے سیلاب نے یہاں جم کر تباہی مچائی تھی۔ آٹھ مہینے بعد بھی گاؤں کی دیواروں پر کیچڑ کے نشان دیکھے جا سکتے ہیں۔

بہار میں اب زیادہ تر لوگ یہ سمجھنے لگے ہیں کہ ندیوں کے گھماؤدار کناروں پر بند بنانا اپنے آپ میں ایک بڑا مسئلہ ہے، کیوں کہ یہ طے کرنا ہی مشکل ہو جاتا ہے کہ انہیں کہاں بنایا جائے۔ اگر بند ندی کے بہاؤ سے تھوڑا دور بنائے جائیں، تاکہ وہ سیلاب کے میدان کا کچھ حصہ گھیر سکیں، تو اس سے پورا گاؤں اس کے اندر پھنس جاتا ہے اور سیلاب کا خطرہ پہلے سے بھی زیادہ بڑھ جاتا ہے۔

یہ مسئلہ سب سے زیادہ صاف طور پر کوسی ندی کے کنارے دکھائی دیتا ہے۔ یہ ندی ہمالیہ سے نکلتی ہے اور بہار میں ۲۶۰ کلومیٹر بہنے کے بعد گنگا میں مل جاتی ہے۔ اس کے دونوں جانب بنے بند کے درمیان پڑنے والے علاقے میں ہزاروں لوگ رہتے ہیں، اور ہر سال سیلاب کا مسئلہ پہلے سے زیادہ سنگین ہو جاتا ہے۔

وارننگ ملنے کے کچھ گھنٹے بعد ہی کوسی کا پانی گاؤں میں پھیلنے لگا۔ شام چار سے پانچ بجے کے درمیان پانی ان کے کھیتوں تک پہنچا اور پھر جھونپڑی تک آ گیا۔ وہ بتاتی ہیں، ’’ہم لوگ چوکی پر بیٹھ گئے تھے، ساتھ میں ۱۰-۱۲ لیٹر پانی اور ۱۰-۱۵ کلو چاول دال رکھ لیے تھے۔‘‘

سیلاب کا پانی بہت تیزی سے بڑھا۔ آدھی رات تک تو چوکی پر بھی پانی چڑھ گیا تھا۔ اندھیرے میں صرف بہتے پانی کی آواز سنائی دے رہی تھی۔ کنچن کہتی ہیں، ’’بہت ڈر لگ رہا تھا، رونگٹے کھڑے ہو گئے تھے۔ لگ رہا تھا کہ ہم نہیں بچیں گے، کیوں کہ پانی لگاتار بڑھ رہا تھا۔‘‘

کنچن نے پہلی چوکی (سونے کا تخت) پر ایک اور چوکی رکھی اور اپنے دو بچوں اور شوہر سنجے یادو (۳۲ سالہ) کے ساتھ اوپر چڑھ گئیں۔

پانی اترنے سے پہلے سیلاب کی سطح دوسری چوکی سے بس چار انچ نیچے رہ گئی تھی۔ کنچن ننگے پیر تھیں، اور ہاتھ میں ایمرجنسی ٹارچ پکڑے ہوئے تھیں جسے وہ ہر رات اپنے سرہانے رکھتی ہیں۔ پوری بستی دو دن تک پانی میں ڈوبی رہی۔ تقریباً ۴۸ گھنٹے بعد پانی پوری طرح اترا۔

اس کے بعد بھی تین دن تک ان کی فیملی چوکیوں پر ہی رہی، کیوں کہ زمین اتنی گیلی تھی کہ ہر بار پیر کیچڑ میں دھنس جاتا تھا۔ جب زمین سوکھ کر تھوڑی سخت ہو گئی، تب انہوں نے اپنے نقصان کا اندازہ لگایا۔

ان کا سارا اناج سڑ گیا تھا۔ کنچن بتاتی ہیں، ’’ہمارا ۴۰۰ کلو اناج خراب ہو گیا، تقریباً ۵۰ ہزار روپے کا نقصان ہوا۔‘‘ کچھ ہفتوں بعد ان کے شوہر سنجے کو مزدوری کرنے دہلی جانا پڑا۔ یادو فیملی دیگر پس ماندہ طبقہ (او بی سی) سے تعلق رکھتی ہے، جو بہار کی ایک اہم سماجی و سیاسی آبادی ہے۔

نرملی گاؤں کے ہی ۶۰ سالہ جے رام ساہ نے اپنی بیوی ریکھا دیوی (۵۵) اور ۱۵ سال کے بیٹے کے ساتھ اپنی جھونپڑی کی چھپر پر پناہ لی تھی۔ سیلاب کے تیز بہاؤ میں ان کا تقریباً ۷ کوئنٹل اناج بہہ گیا۔

ساہ فیملی کا تعلق تیلی ذات سے ہے، جو بہار کی انتہائی پس ماندہ ذاتوں (ای بی سی) میں شمار کی جاتی ہے۔ یہ او بی سی میں شامل ایک ذیلی زمرہ ہے، جن کی سماجی و اقتصادی اور تعلیمی حالت عام او بی سی برادری سے بھی کمزور مانی جاتی ہے۔

ساہ فیملی کا بڑا بیٹا (۲۲ سال) دہلی میں مزدوری کرتا ہے، جو گاؤں سے ۱۲۰۰ کلومیٹر دور ہے۔ ان کی اکلوتی بیٹی کی شادی ہو چکی ہے۔

جے رام بتاتے ہیں، ’’جب پانی گھر میں داخل ہوا، تو ۴ کوئنٹل گیہوں، ۵۰ کلو مونگ دال، ۸۰ کلو مسور اور ۲ کوئنٹل مٹر برباد ہو گئے۔ گیہوں میں تو نئی پود نکل آئی تھی۔‘‘

وہ بھیگے ہوئے مٹر دکھاتے ہیں، جو سیاہ پڑ چکے ہیں۔ ایک بوری گیہوں کیچڑ میں ڈوبا ہوا ہے۔ جے رام کہتے ہیں، ’’یہ اناج تو مویشی بھی نہیں کھاتے۔‘‘ جب ان سے پوچھا گیا کہ وہ اپنا اناج کیوں نہیں بچا پائے، تو غصہ میں بولے، ’’اپنی جان کا ٹھکانہ نہیں تھا، اناج کہاں رکھتے؟‘‘

انہیں سیلاب کی وارننگ تو دے دی گئی تھی، لیکن پانی اس سے پہلے پہنچ گیا۔ وہ بتاتے ہیں، ’’مکھیا اناؤنس کر کے بتایا تھا کہ جتنا بھی کوسی بیلٹ کا آدمی ہے، گھر چھوڑ کر باہر نکل جائے۔ لیکن ہم لوگوں کے پاس اس وقت کوئی سرکاری کشتی نہیں تھی۔ لیکن پانچ گھنٹے کے اندر ہی سیلاب کا پانی تین چار فٹ تک پہنچ گیا۔ ہمارے پاس کہیں جانے کا ذریعہ نہیں تھا۔ اس لیے ہم لوگ جھونپڑی کی چھت پر بیٹھ گئے۔‘‘

جھونپڑی کی ٹوٹی پھوٹی چھت کے گرنے کا بھی ڈر تھا، اس لیے وہ پوری رات جاگتے رہے۔ وہ بتاتے ہیں، ’’وہاں سانپ بھی تھے جو پانی میں تیرتے ہوئے اوپر چڑھ آتے تھے۔ ہمیں انہیں بھگانا پڑتا تھا۔‘‘

تینوں نے بغیر کچھ کھائے پیے دو دن چھپر پر گزارے۔ جے رام کہتے ہیں، ’’ہم کوسی علاقے کے لوگ بارش کے موسم میں ہمیشہ پانچ دس کلو چیوڑا خرید کر رکھ لیتے ہیں۔ لیکن اس بار وہ بھی سیلاب میں بھیگ کر خراب ہو گیا۔ ہم جتنی دیر چھپر پر رہے، نہ کوئی سرکاری کشتی آئی، نہ کوئی سرکاری افسر۔‘‘

حکومت بہار کی سیلاب راحت پالیسی کے تحت صرف پوری طرح ٹوٹے پھوٹے گھروں اور کھیت میں لگی فصل کے نقصان کا معاوضہ دیا جاتا ہے، گھر میں رکھے اناج کا نہیں۔ کنچن کماری اور جے رام ساہ دونوں نے بتایا کہ انہیں سیلاب میں برباد ہوئے اناج کے لیے کوئی سرکاری معاوضہ نہیں ملا۔

متاثرین کا کہنا ہے کہ صرف سیلاب کا الرٹ موصول ہو جانا اپنے آپ میں کافی نہیں ہے۔ ان کے مطابق، مقامی انتظامیہ کو سیلاب متاثرہ لوگوں کے لیے عارضی طور پر رہنے کا انتظام بھی کیا جانا چاہیے۔

فروری میں کیے گئے ایک سروے میں کوسی نو نرمان منچ نے ۱۰۸۱ خاندانوں سے پوچھا کہ کیا انہیں سیلاب سے پہلے الرٹ موصول ہوا تھا، اور انہیں اس سے کیا مدد ملی۔ تنظیم کے سربراہ مہندر یادو بتاتے ہیں کہ ۷۶۰ خاندانوں کو سیلاب آنے کی معلومات حاصل ہو گئی تھیں، لیکن ان میں سے صرف ۳۵۷ خاندان ہی محفوظ مقامات تک پہنچ پائے۔ صرف ۱۴ خاندان سرکاری راحت کیمپ تک پہنچے۔ اس کے علاوہ، ۲۹۸ خاندانوں نے بند پر پناہ لی، جب کہ ۵۵ خاندان اپنے رشتہ داروں کے یہاں چلے گئے۔

مہندر کہتے ہیں، ’’میں ہر سال سیلاب کو آتے ہوئے دیکھتا ہوں۔ متاثرہ لوگوں کو محفوظ مقامات تک پہنچنے کے لیے کوئی ذریعہ نہیں ملتا ہے۔‘‘ جب کہ بہار ڈیزاسٹر مینجمنٹ ڈپارٹمنٹ کے پروٹوکول کے مطابق، جہاں سیلاب شدید ہو، وہاں کشتیوں کا انتظام لازمی ہے۔

راجندر یادو (۵۵)، جو سپول میں کوسی نو نرمان منچ کے ذریعہ چلائے جا رہے ایک وہاٹس ایپ گروپ کے ممبر اور سابق پنچایتی نمائندہ ہیں، کہتے ہیں کہ حکومت کی راحت اور بچاؤ کی اسکیم صرف کاغذوں پر ہی اچھی لگتی ہے۔

وہ بتاتے ہیں، ’’کاغذی طور پر ہر سیلاب متاثرہ پنچایت کے لیے کشتیوں کا انتظام ہے، لیکن سیلاب کے وقت ایک بھی کشتی نہیں دکھائی دیتی۔ لوگوں کو ان کے حال پر چھوڑ دیا جاتا ہے۔‘‘

سال ۲۰۲۴ میں آئے سیلاب کے دوران، ان کے گاؤں میں رہنے والے ۶۵ خاندانوں میں سے ایک بھی خاندان کو بحفاظت باہر نکلنے کے لیے سرکاری راحت نہیں ملی، انہیں چوکی یا چھپر پر پناہ لینی پڑی۔

سرکاری مدد کے بغیر صرف وہی لوگ محفوظ مقامات پر پہنچ پاتے ہیں، جنہیں اپنے ارد گرد کی محفوظ جگہوں کی معلومات ہو یا جن کے پاس خود کی کشتی ہو۔

کملیش شرما، سپول ضلع کی گوپال پور شرے پنچایت کے گونوا گاؤں میں رہتے ہیں۔ انہیں ایک وہاٹس ایپ گروپ کے ذریعہ سیلاب کی اطلاع ملتی رہتی ہے۔ ستمبر ۲۰۲۴ کی ایک صبح انہیں سیلاب کے کئی میسج ملے۔ اس میں بتایا گیا تھا کہ شام تک کوسی ندی کی آبی سطح بڑھ جائے گی اور علاقہ میں زبردست سیلاب آ سکتا ہے۔ یہ سنتے ہی کملیش اپنا ۱۰ کوئنٹل اناج بچانے کی کوشش میں لگ گئے۔

کملیش نے سب سے پہلے اپنے گھر کی چوکی کے ہر پایہ کے نیچے پانچ پانچ اینٹیں رکھیں۔ پھر انہوں نے اناج کی بوریوں کو چوکی پر رکھا۔ دوپہر تقریباً چار بجے ان کے گھر میں پانی داخل ہو گیا۔ کملیش (۵۱) کہتے ہیں، ’’جب تک میں اناج رکھنے کا انتظام پورا کرتا، تب تک پانی گھر میں آ چکا تھا۔‘‘

کملیش، چوپال ذات [درج فہرست ذات] کے ہیں۔ سیلاب کے دوران ان کے ساتھ ان کے دو پوتے پوتی اور دو بھتیجیاں بھی تھیں، جو اسو قت ان کے ساتھ رہ رہی تھیں۔ انہوں نے انہیں اپنی کشتی میں بیٹھایا اور گھر سے ۴۰۰ میٹر دور ایک ٹیلہ [حکومت کے ذریعہ بنائی گئی اونچی جگہ] پر پہنچایا۔ پھر وہ اپنی بیوی چندر کلا دیوی (۴۵) کو ایک رشتہ دار کے پختہ مکان پر بحفاظت چھوڑ کر آئے جو وہاں سے آدھا کلومیٹر دور تھا۔

جب وہ تینوں بھینسوں کو لینے واپس لوٹے، تب تک پانی پانچ فٹ تک چڑھ چکا تھا۔ انہوں نے بتایا، ’’میں نے بھینسوں کی رسیاں پکڑیں اور تیرنے لگا۔ بھینسیں میرے پیچھے پیچھے آ گئیں۔ میں انہیں اسی رشتہ دار کے گھر لے گیا جہاں میری بیوی تھی۔ پھر میں واپس لوٹا اور بیٹے کے ساتھ اناج کی دیکھ بھال کرنے لگا۔‘‘

کملیش کا ۲۱ سال کا بیٹا چوکی پر اناج کی بوریاں چڑھا کر اس پر لیٹا، جب کہ کملیش کشتی میں سوئے۔ ’’ہم نے ۲۴ گھنٹے اسی طرح گزارے۔ ہمیں کوئی سرکاری مدد نہیں ملی۔‘‘

کملیش ایک چھوٹے کسان ہیں، جن کے پاس ڈھائی ایکڑ کی زرعی زمین ہے۔ وہ ان چند خوش قسمت لوگوں میں سے ہیں جن کے پاس کشتی ہے۔ لیکن اس کے لیے انہیں اچھی خاصی قیمت ادا کرنی پڑتی ہے۔ پانچ فٹ کی ایک کشتی ۲۰ ہزار روپے میں آتی ہے، جس کے رکھ رکھاؤ پر سالانہ ۲۰۰۰ روپے خرچ کرنے پڑتے ہیں۔ کملیش کے مطابق، گاؤں میں رہنے والے ۵۰۰ خاندانوں میں سے صرف ۲۵ سے ۳۰ خاندانوں کے پاس ہی اپنی کشتی ہے۔

گونوا سے تقریباً پانچ کلومیٹر دور موسہرنیا گاؤں کے ۴۰ سالہ کسان پرمود یادو کو سیلاب کی وارننگ پہلے ہی مل گئی تھی۔ لیکن اس کے باوجود انہیں اپنے والد، بیوی اور تین بچوں کے ساتھ بانس اور پھوس کی چھت پر پناہ لے کر کسی طرح جان بچانی پڑی۔

وہ کہتے ہیں، ’’پانی بہت تیزی سے بڑھا…ہم لوگ جاتے تو جاتے کہاں، اس لیے چھپر پر ہی بیٹھے رہے۔ شکر تھا کہ بارش نہیں ہوئی، ورنہ ہم لوگ بچ نہیں پاتے۔‘‘

انہوں نے دو دن بغیر دانہ پانی کے گزارے، اور رات کو سانپوں کو بھگاتے رہے۔

سیلاب میں ان کا ۱۲ کوئنٹل اناج خراب ہو گیا۔ ’’ہم نے پورے سال کا اناج جمع کر کھا تھا، سب برباد ہو گیا۔ یہاں تک کہ ہمارے کپڑے بھی سیلاب میں بہہ گئے۔ ہمیں اناج اور کپڑے خریدنے کے لیے ۳۰ ہزار روپے کا قرض لینا پڑا۔‘‘

پرمود کے گاؤں میں رہنے والے ۶۵ خاندانوں میں سے کوئی بھی سیلاب سے پہلے محفوظ جگہ تک نہیں پہنچ سکا۔

پرمود سوال کرتے ہیں، ’’کیسے نکلتے لوگ؟ سرکاری کشتی کی بحالی تو صرف پیپر پر نکلتی ہے…اور ہم لوگوں کے پاس اتنا پیسہ نہیں ہے کہ اپنی کشتی رکھیں۔‘‘

سپول کے ضلع مجسٹریٹ ساون کمار نے بتایا کہ مانسون کے دوران انتظامیہ ۲۰۰ سے زیادہ کشتیاں کرایے پر لیتی ہے، لیکن لوگوں کو نکالنے میں دوسری پریشانیاں بھی آتی ہیں۔ انہوں نے کہا، ’’لوگوں کو لگتا ہے کہ اگر وہ گھر چھوڑ دیں گے، تو حکومت سے معاوضہ نہیں ملے گا، اس لیے وہ قصداً محفوظ جگہوں پر نہیں جاتے۔‘‘ انہوں نے یہ بھی کہا، ’’جب پانی کا بہاؤ بہت تیز ہوتا ہے، تب کشتیاں اور یہاں تک کہ اسٹیمر بھی نہیں چل پاتے۔‘‘

سیلاب کے ماہر دنیش مشرا کہتے ہیں کہ صرف سیلاب کے الرٹ سے لوگوں کی جان نہیں بچائی جا سکتی۔ ’’اگر سیلاب کا پانی گاؤوں میں داخل ہو جاتا ہے، تو لوگوں کو محفوظ جگہوں تک پہنچانے کے لیے سرکاری کشتیوں کی ضرورت ہوتی ہے۔‘‘ دنیش مشرا ۱۹۸۴ سے بہار میں سیلاب کے مسئلہ پر کام کر رہے ہیں اور بہار کی ندیوں اور سیلاب پر کئی کتابیں لکھ چکے ہیں۔

اسّی سال کے ہو چکے دنیش مشرا سوال کرتے ہیں، ’’کوسی بیلٹ میں کئی گاؤں دو یا تین طرف سے ندی سے گھرے ہوئے ہیں۔ ایسے میں ان کی حالت اور بھی خراب ہو جاتی ہے، کیوں کہ ان لوگوں کو بند تک پہنچنے کے لیے پانی کے تیز بہاؤ کو پار کرنا پڑتا ہے اور کم از کم پانچ کلومیٹر چلنا ہوتا ہے۔ سرکار کی مدد کے بغیر وہ وہاں تک کیسے پہنچیں گے؟‘‘

دنیش کے مطابق، نقصان کم کرنے کے لیے یہی صحیح ہوگا کہ حکومت سیلاب آنے سے پہلے ہی لوگوں کو محفوظ مقامات تک پہنچا دے۔

حالانکہ، سیلاب متاثرین کو حکومت پر اعتماد نہیں ہے۔

جے رام ساہ تلخی سے کہتے ہیں، ’’ہم لوگوں کی کیا امید رہے گی سرکار سے؟ سرکاری راحت اشیاء بھی افسر لوگ ہی ڈکار جاتے ہیں۔ جو کچھ بچتا ہے، وہ ہمارے سامنے ایسے پھینکا جاتا ہے جیسے کتوں کے سامنے چیزیں پھینکی جاتی ہیں۔‘‘

یہ رپورٹ انٹرنیوز کے ارتھ جرنلزم نیٹ ورک کے تعاون سے تیار کی گئی ہے۔

ترجمہ نگار: قمر صدیقی