देस के सबले अमीर राज के सबले गरीब विधायक

जब वोला लगिस के वो ह महाराष्ट्र विधानसभा के चुनाव लड़ही, वो बखत ओकर नांव मं एक ठन बैंक खाता तक ले नइ रहिस. ओकर घरवाली ह ओला 15,000 रूपिया उधर दिस. ओकर घरवाली ह एक ठन आदिवासी हास्टल वाले स्कूल मं टीचर रहिस. ओकर पार्टी के कार्यकर्ता मन घलो अपन हौसियत मुताबिक मदद करिन, अऊ चुनाव के परचा भरे के पहिली वो ह 52,000 रूपिया जुटा लिस.

विनोद निकाले के हालत येकर ले जियादा खराब नइ हो सकत रहिस. ओकर आगू ये बखत के विधायक धनारे पास्कल जान्या रहिस, जेन ह साल 2014 मं दहानू विधानसभा इलाका ले 16,000 ले जियादा वोट के अंतर ले जीते रहिस. वो ह भारतीय जनता पार्टी ले रहिस, सरकारी आंकड़ा मुताबिक वो ह वो बछर विधानसभा चुनाव मं 82 करोड़ ले जियादा खरचा करे रहिस.

फेर जब चुनाव के नतीजा आइस, त साधन के कमी के कोनो खास फरक नइ परिस. निकोले ह 5,000 ले कुछेक कम वोट के अंतर ले विधायक बन गे रहिस.

“मोर भाई (कका के बेटा) ह मोला 70,000 रूपिया उधर देय रहिस. चुनाव के पहिली मोर करा बस इहिच 70,000 रूपिया नगदी रहिस,” वो ह मुचमुचावत कहिथे, अऊ दहानू शहर मं अपन दफ्तर के बहिर रखाय प्लास्टिक के एक ठन कुर्सी मं बइठे हवय – ये शहर पालघर के वो जिला मं आथे जिहां आदिवासी मन के आबादी जियादा हवय.

ये कहिनी अइसने भारत देस के लागथे जेन ह नंदा गे हवय. फेर ये ह साल 2019 मेंच होय रहिस. अऊ ओकर बाद 2024 मं घलो. अइसने बखत मं जब बीजेपी ह एक के बाद एक चुनाव मं विपक्ष ला बुरा तरीका हरावत रहिस,अऊ राजनीति एक ठन अइसने खेल बनगे हवय जेन मं अंधाधुंध पइसा खरचा करे बगेर जीते नइ जाय सके, 48 बछर के निकोले जेन ह कम्युनिस्ट पार्टी ऑफ़ इंडिया (मार्क्सवादी) ले हवंय अपन दूसर कार्यकाल ला पूरा करत हवय. अऊ ये सब्बो वो राज मं होवत हवय जिहां 93 फीसदी विधायक करोड़पति आंय. ग्रॉस स्टेट डोमेस्टिक प्रोडक्ट (जीएसडीपी) के मामला मं महाराष्ट्र सबले अमीर राज आय.

दहानू शहर ले डेढ़ कोस दूरिहा वाकी गाँव मं ईंट भट्ठे मजूर के घर जन्मे निकोले, महाराष्ट्र के सबले गरीब विधायक आंय. महाराष्ट्र एक अइसने राज आय जेन ह जम्मो देस मं चुनाव मं सबले जियादा खरचा करेइय्या राज के रूप मं जाने जाथे. निकोले न त वोटिंग के पहिली पइसा बाँट सकथे अऊ न अपन एजेंडा ला आगू ले जाय बर कोनो बड़े सोशल मीडिया टीम राख सकथे. ओकर असल ताकत अपन माटी ले जुड़े, जमीनी स्तर के आन्दोलन मन मं भाग लेय अऊ आम लोगन मन के, खासकरके आदिवासी किसान अऊ मजूर मन बर हर बखत मिले मं हवय.

ये जनवरी मं, 10 दिन के भितरीच, सीपीआई (एम)ले जुड़े अखिल भारतीय किसान सभा (एआईकेएस) ह पालघर, नासिक अऊ अहिल्यानगर (पहिली अहमदनगर) के आदिवासी इलाका मन मं आदिवासी किसान मन के दू ठन बड़े विरोध रैली निकारे रहिस. 19 जनवरी, 2025 के दिन 50,000 किसान मन पालघर के जिला कलेक्टर आफिस डहर रैलीनिकारिन अऊ जमीन के हक, रोज़गार ला बढ़िया ढंग ले लागू करे, अऊ कतको जिनिस के मांग करिन.

करीबन हफ्ता भर बाद, नासिक ले हजारों किसान मन राज सरकार उपर दुवाब डारे के कोसिस मं मुंबई कूच करिन.

साल 2006 में, भारत सरकार ह एक ठन ऐतिहासिक कानून, वन अधिकार अधिनियम' (एफआरए) पारित करिस. ये कानून अनुसूचित जनजाति अऊ आने पारंपरिक वन निवासी मन ला वन भूमि अऊ संसाधन के हक देथे, जेन मन कतको पुस्त ले वो इलाका मं रहत हवंय. ग्राम सभा मन ये हक बर दावा करथें, जेकर पुष्टि उप-विभागीय अऊ जिला समिति मन करथें; ये काम के बखत, जब तक बासिंदा मन के हक पूरा नइ मिल जावय, तब तक ले वो मन ला बेदखल नइ करे जाय सकय.

वइसे जमीनी स्तर मं ये कानून लागू करे अभू घलो संदेहा हवय. एआईकेएस ह एक ठन बयान मं ये बात ला कहे हवय के किसान मन दू ठन रैली निकार के राज सरकार ला जेन सबले महत्तम बात ला मनवाइन, वो मं एक ठन एफआरए के तहत खारिज करे कतको दावा ला फिर ले खोले रहिस.

निकोले, जेन ह खुदेच वारली आदिवासी आंय, दूनो रैली मं सबले आगू रहेइय्या म ले एक रहिन. वो ह किसान मन के संग चलिन, सबके संग भूंइय्या मं सुतिन, अऊ सब्बो बर बने खाना खाइन. एआईकेएस के अध्यक्ष अशोक धवले कहिथे, “ ओकर एक ठन बड़े ताकत ये आय के वो ह अपन आप ला सामूहिक अगुवई अऊ एकजुट आंदोलन के हिस्सा मानथे.”

ईश्वती गहाला, जेकर उमर अंदाजन 60 बछर ले जियादा होय के अंदाज हवय, विरोध रैली के एक ठन हिस्सा रहिस. वो ह कहिथे के कोनो विधायक आम रैली मं हिस्सा लेवत देखे मन भारी तसल्ली देथे. “आज के बखत मं अइसने देखे ला नइ मिलय, वो ह कहिथे. “ येकर ले लागथे के तुंहर बात ला सही तरीका ला उठाय जावत हवय अऊ सुने जावत हवय.”

पालघर जिला के जमशेत गाँव के बासिंदा इशवती घलो एक झिन वारली आदिवासी आय. ओकर परिवार करा गाँव मं दू एकड़ खेत हवय, जेन मं वो ह अधिकतर लोगन मन के जइसनेच, बरसा के सीजन मं धान कमाथे. “हमन सिरिफ एकेच फसल कमाथन,” वो ह मोला बताथे. “अपासी के बगेर, हमन बाकि सीजन मं जियादा कुछु करे नइ सकन.”

ये इलाका मं आदिवासी मन के आबादी जियादा हवय, येकरे सेती इहाँ के दू ठन सबले बड़े मुद्दा हवय, मजूर के अऊ जमीन के हक,” निकोले कहिथे. “हमर इहाँ 50-60 कंपनी मन मं यूनियन हवय, अऊ हमन बढ़िया मजूरी बर बखत बखत मं गोठ-बात करत रहिथन, संगे संग, हमन ये घलो तय करथन के कंपनी मन ला कोनो नुकसान झन होय.”

जउन दिन मंय दहानू मं निकोले ले मिले रहेंय, वो ह बोइसर शहर ले – जेन ह इहाँ ले करीबन घंटा भर दूरिहा हवय – अभिचे-अभिचे लहूटे रहिस, उहाँ वो ह ठेका मजूर मन के एक ठन सभा ला संबोधित करे रहिस. “हमन वो मन के तनखा 12,000 ले बढ़ाके 13,050 रूपिया करवाय लेन,” वो ह कहिथे.

इहाँ अडानी ग्रुप के एक ठन थर्मल पावर प्लांट घलो हवय. येला पहिली अनिल अंबानी संभालत रहिस. निकोले कहिथे के ओकर पार्टी के पावर प्लांट मं घलो एक ठन यूनियन हवय, जिहां वो ह ठेका मं बूता करेइय्या मजूर मन के तनखा के बढ़ोत्तरी ला लेके बखत-बखत मं जोर दे हवंय. वो ह कहिथे, “जब नेता बिका जाथे, त यूनियन बेअसर हो जाथे. हमर संग अइसने कभू नइ होही.”

थर्मल प्लांट मं ठेका मजूर 54 बछर के सुरेश जाधव बताथें के साल 2010 मं, जब वो ह पहिली बेर यूनियन बनाय रहिस, वो बखत ओकर तनखा 2,600 रूपिया रहिस. वो बखत निकोले विधायक नइ रहिस, फेर यूनियन के देखरेख उहीच करत रहिस. विधायक बने के बाद घलो वो ह यूनियन मं पद मं हवय, फेर अब ओकर उपर जियादा जिम्मेदारी के भार हवय.

“ साल 2010 मं थर्मल प्लांट मं हमन करीबन 1,000 झिन काम करत रहेन,” जाधव कहिथे. “आज, हमन महीना के 28,000 रूपिया कमावत हवन.”

ये 16 बछर मं तनखा मं करीबन 1,000 फीसदी बढ़ोत्तरी आय, जेन ह वो जमाना के मजूर मन के सोच के बहिर के बात रहिस.

जाधव, जेन ह प्लांट के पर्यावरणीय असर के जाँच बर जिम्मेदार हवंय, कहिथें के ओकर बात के असर अपन आप बढ़ जाथे काबर के विधायक ओकर संग हवय. जाधव कहिथे, “साल 2019 के पहिली हमन ला नजरंदाज करे आसान रहिस. अब हमर मांग मन ला गहिर ले बिचार करे जाथे.”

आम लोगन मन निकोले ले भेंट करे अऊ अपन समस्या मन ला बताय बर लाइन मं लगे रहिथें. वो ह वो मन के समस्या ला सुनथे अऊ ओकर उपर कार्रवाई करे बर अपन लोगन मन ला फोन मं बात करथे. “चुनाव जीते के इहीच एक तरीका आय,” वो ह कहिथे. “हरेक बिहनिया 10 बजे के बाद तुमन मोला इहाँ अपन दफ्तर के बहिर मिल सकथो. कोनो घलो आके मोर ले बात कर सकथे.”

साल 2024 मं, जब निकोले ह दूसर बेर चुनाव लड़े बर अपन चुनावी हलफनामा जमा करिस, त ओकर घोषित संपत्ति 87 लाख रूपिया रहिस – जेकर अधिकतर पइसा वो 0.25 एकड़ जमीन ले आय रहिस जेन ला वो ह हालेच मं बिसोय रहिस, अऊ वो मं एक ठन सधारन घर बनाय रहिस.

जब 2019 मं वो ह विधायक बनिस, त वोला हरेक महीना 1.5 लाख रूपिया तनखा मिले लगिस, महाराष्ट्र मं साल 2024 के चुनाव के बाद ये रकम बढ़के 2 लाख रूपिया हो गीस. 41 बछर के उमर मं, वो ह अपन जिनगी मं पहिली बेर ठीक-ठाक मासिक आमदनी मिलत रहिस. वो ह वो रकम ले बचाके अपन अऊ अपन परिवार बर एक ठन घर बनवाइस.

“येकर पहिली, पार्टी ह मोला महीना मं 3,000 रूपिया देवत रहिस,” निकोले कहिथे. “आज मंय घलो अपन महीना के आधा तनखा पार्टी ला दान कर देथों.”

येकर उलट, जब 'एसोसिएशन ऑफ डेमोक्रेटिक रिफॉर्म्स' (एडीआर) ह साल 2024 के महाराष्ट्र विधानसभा के विश्लेसन करिस, त पता चलिस के 93 फीसदी विधायक मन करोड़पति हवंय. अऊ सबले अमीर विधायक ह 500 करोड़ ले जियादा के संपत्ति के घोसना करे रहिस. साल 2024 के विधानसभा चुनाव के नतीजा आय के बाद, जेन मं भाजपा ह भारी जीत हासिल करिस, एडीआरह एक अऊ रिपोर्ट निकारिस. ओ मं ये पाय गिस के विश्लेसन करे गे 279 करोड़पति विजेता मन ले 157 (56 फीसदी) ह 50 फीसदी ले जियादा वोट पाके जीते रहिन.

विपक्षी पार्टी मन ये बात पूरा विश्वसनीयता के संग उठाय हवंय के बीजेपी हरेक चुनाव के सुरु मं साफ बढ़त करथे जेकर सेती ओकर अऊ सत्ताधारी पार्टी के साधन मन मं भारी अंतर हवय. सिरिफ वित्त वर्ष 2024-25 मं , बीजेपी ला राष्ट्रीय स्तर मं 6,000 करोड़ ले जियादा चंदा मिलिस, जेन ह सबले बड़े विपक्षी पार्टी, कांग्रेस ला मिले चंदा ले 12 गुना जियादा हवय. इहाँ सब्बो बर समान मऊका नइ ये.

महाराष्ट्र के स्थानीय चुनाव मन मं घलो, महीना भर के घलो कम बखत मं सिरिफ ऑनलाइन विज्ञापन मन के उपर 55 करोड़ रूपिया खरचा करे गीस. अऊ चुनाव के पहिली वोटर मन ला बेहिसाब करोड़ रूपिया बांटे गीस.

फेर निकोले कहिथे के ये भारी नुकसान ला घलो कम करे जा सकथे, गर तुमन “वोटर मन के दिल अऊ दिमाग मं अपन जगा बना लेय. तुमन ला ओ मन के भरोसा जीते ला होही,” वो ह कहिथे. “त ओकर बाद, जब आने लोगन मन ओ मन ला पइसा के लालच दिहीं, तब ले घलो वो मन अपन वोट नइ बेचहीं. मोर बीजेपी विरोधी ह जतक पइसा खरचा करिस, वो ह हो सकथे मोर खरचा ले 100 गुना जियादा रहे होही.”

साल 2019 के विधानसभा चुनाव के बाद. कोनो घलो पार्टी करा सरकार बनाय बर स्पष्ट बहुमत नइ रहिस. बीजेपी ला अपन विधायक मन ला टोरे ला रोके बर, शिवसेना ह अपन 56 विधायक मन ला रातों-रात एक ठन रिसॉर्ट मं भेज दिस.अइसने बखत मं जब बाकी विपक्षी विधायक रिसॉर्ट मं जमा रहिन, निकोले खुलेआम दहानू मं घूमत रहिस.

“ बेबखत बरसा ले हमर इलाका के किसान मन ला भारी नुकसान होय रहिस,” वो ह कहिथे. “मंय जाके जायजा लेंय अऊ अपन काम मं जुट गेंय. मोर पार्टी धन मोर वोटर मन ला ये बात के चिंता करे के जरूरत नइ रहिस के मंय पाला बदल लिहूँ.”

माली हालत ठीक नइ होय सेती कालेज छोड़े के बाद, निकोल दहानू मं एक ठन कैंटीन मं खाना परोसे अऊ बरतन मांजे के काम करत रहिस.

सीपीआई (एम) के एक झिन बड़े नेता के नजर ओकर उपर परिस अऊ ओ ह वोला पार्टी मं सामिल होय ला मना लिस. “वो बखत सदस्यता शुल्क 5 रूपिया रहिस,” वो ह सुरता करत बताथे. निकोल ला सुरता हवय के वो ह वो बड़े नेता ला ताना मारत कहे रहिस, “तंय मोर कैंटीन मं कलेवा करेय, अऊ अब मोला तोला पांच रूपिया देना हे? काय ये ह येकर उलट नइ होय ला चाही?”

5 रूपिया के रसीद काटे के बाद, नेता ह जुवाब दिस, “अब तंय पार्टी के सदस्य बन गे.”

“वो बखत मोला समझ मं नइ आय रहिस के येकर काय मतलब रहिस,” निकोल कहिथे. “फेर वो ह मोला अपन देख रेख मं ले लिस, अऊ मंय पार्टी बर काम करे सुरु कर देंय.”

निकोले के दहानू ले चुनाव लड़े के बनेच पहिली, वो अपन संगे मन संग मिलके कतको जमीनी आन्दोलन मं सबले अगुवा रहिस अऊ ताकतवर लोगन मन ले जूझत रहिस.

साल 2013 ले 2015 के बीच मं, पुलिस ह निकोल उपर ओकर आंदोलन-प्रदर्सन बर जबरदस्ती जुरियाय अऊ दंगा-फसाद के मामला लाद दे रहिस. ओ ला जिला बदर कर के पांच जिला ले निकारे के हुकूम घलो सुना दे गे रहिस. फेर दहानू थाना के आगू मं जब 25,000 मन एके संग जुरिन, त पुलिस ला वो हुकूम ला वापस लेय ला परिस. निकोले ह कहिथे, “इहाँ तक के विधायक बने के बाद घलो, मंय अपन जमीन ले नइ हटेंय. असल बात त ये आय के मंय अऊ जियादा फुरतीला हो गे हवंव. आगू बर मोर इही सुमत आय के अपन इलाका मं एक ठन बढ़िया अस्पताल बनवाय जाय, जेकर कमी आज घलो खलथे.”

अनुवाद: निर्मल कुमार साहू