‘हमर अऊ कतक पीढ़ी ला अइसने लूटे जाही?’

54 बछर के किरण गाहला अऊ ओकर जइसने करको दीगर आदिवासी किसान मन बर ये लड़ई ह कोनो नाव बात नो हे, बनेच जाने चिन्हे जुन्ना लड़ई आय.

19 जनवरी, 2026 के दिन, वो ह पालघर जिला के डोल्हारीबुद्रुक गाँव मं अपन नान कन घर ले लाली टी-शर्ट अऊ गमछा पहिरे निकरिस. वो ह दीगर आदिवासी किसान मन के संग अगोरत टेम्पो-ट्रक मं बइठिस अऊ सारोटी गाँव कोति निकर परिस. ये ह ऑल इंडिया किसान सभा, महाराष्ट्र डहर ले बलाय एक ठन अऊ बड़े रैली के सुरुआत रहिस.

इहां हजारों किसान हवंय, कतको मीडिया रिपोर्ट अऊ एआईकेएस के अंताज मुताबिक 50,000 के करीबन. ये अधिकतर पालघर जिला के आदिवासी समाज के हवंय. वो मन कलेक्टर ऑफिस कोती रैली सुरु करे रहिस, जेन मं वो मन जमीन के हक ला बढ़िया ढंग ले लागू करे, मनरेगा ला फिर ले सुरु करे, बाढ़वन पोर्ट ला रद्द करे अऊ अपासी बर पानी देय जइसने मांग करत रहिन.

विरोध वाले गीत बजावत, भारी जोस संग आगू बढ़त अऊ नारा लगावत, प्रदर्सन करेइय्या 20 जनवरी के संझा पालघर कलेक्टर आफिस पहुँचिन, जिहां वो मन अपन मांग मन पूरा होवत तक ले धरना देय के बिचार करे हवंय – जउन मं सबले जुन्ना मांग जमीन के हक ला लागू करे हवय. आदिवासी मन सदियों ले जंगल अऊ चरी-चरागान के जमीन मं खेती करत हवंय, फेर ओकर बाद घलो वो मन वो जमीन के मालिक नो हें जेन मं वो मन खेती करत हवंय.

वन अधिकार अधिनियम, 2006 अनुसूचित जनजाति अऊ आने पारंपरिक वनवासी मन ला वन भूमि अऊ संसाधन के हक देथे, जेन मन कतको पीढ़ी ले अइसने इलाका मन मं रहत हवंय. ग्राम सभा मन दाबा करथें जेकर जाँच सब-डिविजनल अऊ जिला समिति मन करथें, अऊ जब तक वो मन के हक तय नइ हो जावय, तब तक ले बासिंदा मन ला बेदखल करे नइ जावय. फेर रैली मं अधिकतर आदिवासी किसान मन के दावा ला मंजूरी मिले नइ ये.

ये ह पहिली बेर नो हे जब महाराष्ट्र मं आदिवासी किसान मन अइसने विरोध प्रदर्सन करिन. अऊ हो सकथे ये ह आखिरी बेर घलो नइ होही. गाहला वो बड़े रैली मं सामिल रहिस जेन ह साल 2018 मं नासिक ले मुंबई के आज़ाद मैदान तक गे रहिस – ये ह 60 कोस पदयात्रा रहिस, जेन ह हफ्ता भर चलिस, अऊ ये मं कतको झिन जुच्छा गोड़ रेंगत रहिन.

आदिवासी मन के वारली समाज के गाहला कहिथे, “ मंय घलो वो सब्बो मं सबले आगू रहेंय. मुंबई हबरत-हबरत हमर गोड़ मन मं फोरा परगे रहिस.”

ये ह किसान मन बर ऐतिहासिक पल रहिस, काबर के सार मुंबई शहर परघनी कस उमड़ परिस. जब वो मन के रैली निकरत रहिस, त हाईवे मं घलो लोगन मन मदद करिन. रैली के आखिर मं, मुख्यमंत्री देवेंद्र फडणवीस के अगुवई वाले महाराष्ट्र सरकार ला किसान नेता मन के संग गोठ-बात करे ला परिस अऊ वो मन के मांग मन ला मने ला परिस.

आज करीबन आठ बछर बाद, फडणवीस फिर ले महाराष्ट्र के मुख्यमंत्री हवंय, अऊ गाहला जइसने किसान फिर ले रैली करत हवंय. वो ह कहिथे, “सरकार सिरिफ वादा करथे जेकर ले हमन हमन गाँव लहूट जावन. फेर कोनो काम नइ होय हवय.”

गाहला के अंताजा हवय के साल 2018 अऊ 2026 के बीच, किसान सभा ले जुड़े किसान मन प्रशासन अऊ सरकार ले अपन मांग मनवाय बर 30-40 रैली (छोटे बड़े) निकारे होही. ये रैली एक दिन ले लेके हफ्ता तक, धन कभू-कभू येकर ले जियादा बखत तक ले चलिस. फेर गर हरेक रैली बर अऊसतन तीन दिन घलो माने जय, त आदिवासी किसान मन बीते आठ बछर मं करीबन चार महीना सिरिफ अपन हक बर विरोध-प्रदर्सन मं गुजरे हवंय. जेन लोगन मन रैली मं सरलग सामिल रहे हवंय, वो मन थक गे हवंय अऊ सियान होगे हवंय, फेर वो मन के हिम्मत अभू घलो बने हवय.

वो मन पहिली के रैली जइसने एकजुटता लाल कमीज पहिरे समंदर लहरावत दिखत रहय. एआईकेएस, कम्युनिस्ट पार्टी ऑफ़ इंडिया (मार्क्सवादी) ले जुड़े हवय.

ईश्वती गाहला कहिथे, “मोर गोड़ अऊ माड़ी पीरावत हवय.” वोला अपन उमर पता नइ ये, फेर ओकर अंताजन “ साठ बछर ले जियादा”, यानि 60 पार कर ले हवय. वो ह कहिथे, जब हमन मुंबई रेंगत जाय रहेन, वो बखत मंय बनेच छोटे रहेंय,” वो ह मनोर फाटा ( टेसन) के तीर खुल्ला जगा मं भूंइय्या मं बइठे रहिस, जिहां किसान मन भारी जाड़ वाले रतिहा मं डेरा डारे रहिन. वो मन के कुछु मन अपन संगवारी मन बर खिचड़ी बनाय के काम संभले रहिन. दूसर बड़े-बड़े लोगन मन चुरत चूल्हा तीर बइठे आगि तापत रहिन. ईश्वती कहिथे, “दूसर किसान मन के संग एक होके रैली निकारे ले ताकत मिलथे. येकर ले आस बंधथे. हात नइ मानके लड़े बने लागथे.”

पालघर जिला के जामशेत गाँव के बासिंदा ईश्वती घलो वारली जनजाति ले हवय. ओकर परिवार के तीन झिन रैली मं रहिन. गाँव मं ओकर करा 2 एकड़ खेत हवय, जिहां अधिकतर दीगर लोगन मन के जइसने बरसात मं धान कमाथे. वो ह मोला बताथे, “हमन सिरिफ एकेच फसल कमाथन. बिन अपासी के, हमन बाक़ी सीजन मं जियादा कुछु नइ करे सकन.”

पालघर जिला के ये आदिवासी किसान मन बर, गुजारा बर मजूरी करे जरूरी आय काबर के वो मन के फसल सिरिफ खाय भर के होथे. अइसने मं, मनरेगा ला कमतर करे वो मन बर एक ठन बनेच बड़े झटका आय.

दिसंबर 2025 मं, भारत सरकार ह महात्मा गांधी राष्ट्रीय ग्रामीण रोज़गार गारंटी अधिनियम के जगा विकसित भारत - जी राम जी अधिनियम (वीबी-जी राम जी) लागू करिस. वइसे सरकार ह कागज मं गारंटी वाले काम के दिन ला 100 ले बढ़ा के 125 कर दे हवय, फेर नव कानून पइसा के बड़े बोझा राज सरकार उपर डारथे. ये देखत घलो के अधिकतर राज सरकार के आर्थिक हालत खराब हवय, जानकार मन के मानना आय के येकर ले वो योजना खतम हो सकथे जउन ह कभू देस के गाँव-देहात के लोगन मन ला गारंटी वाले काम देय रहिस.

पालघर जिला के दहानू ले ये बखत के विधायक विनोद निकोले, जेन ह किसान मन के रैली मं सामिल रहिन, कहिथें, “मनरेगा मं घलो कतको दिक्कत रहिस. काम जियादा नइ रहिस, अऊ मजूरी कम रहिस, अऊ अक्सर बखत मं नइ मिलत रहिस.” फेर येला बंद करे कोनो निदान नइ रहिस. “हमन मजूर मन बर बढ़िया मजूरी अऊ जियादा दिन काम के मांग करत हवन.”

जब तक मांग पूरा नइ हो जाही, किसान पालघर कलेक्ट्रेट मं धरना देय के बिचार करत हवंय. 45 बछर के रुबति आड़गा कहिथे, “गर सरकार ह साल 2018 मं हमर ले करे गे वादा मन ला पूरा करे रइतिस, त आज हमन ला एक पईंत अऊ रैली निकारे ला नइ परतिस.”

आड़गा वो लोगन मन ले एक आय जेन ला मुआवजा पैकेज नइ मिलिस, काबर के जेन जमीन मं ओकर परिवार पीढ़ियों ले खेती करत रहिस, वो जमीन वो मनके नइ रहिस. वो ह आगू बताथे, “मोर खेत ला पाट देय गीस काबर के उहाँ ले होवत हाईवे प्रोजेक्ट जावत रहिस. अब मोर करा कमई के कोनो साधन नइ ये.”

वो ह वो जमीन मं धान अऊ जुवार कमावत रहिस, जिहां खजूर रुख अऊ अनानास घलो लगे रहिस. गर ओकर तीर जमीन के मालिकाना हक रइतिस, त वोला 2 करोड़ ले जियादा के मुआवजा मिले रइतिस. येला छोड़, वोला कुछु नइ मिलिस –अऊ ओकर रोजी रोटी छिनगे. वो ह कहिथे, “पालघर के मोर गाँव झारी मं मोर जइसने 45 झिन हवंय. हमर अऊ कतक पीढ़ी ला अइसने लूटे जाही? ये पईंत सिरिफ वादा ले काम नइ चलय .”

अनुवाद: निर्मल कुमार साहू