सबसे अमीर राज्य के सबसे गरीब विधायक

महाराष्ट्र विधान सभा के चुनाव में खड़ा भइलन, त समझ में आईल कि उनकर नाम पर त बैंक खाता तक नइखे. इनकर मेहरारू इनके 15,000 रूपया उधार दिहली. उ एगो आदिवासी आवासीय विद्यालय में शिक्षिका रहली. इनके पार्टी कार्यकर्ता लोग भी आपन भरपूर प्रयास कईलें. चुनाव फारम भरे से पहिले ई 52,000 के रकम जुटा लिहलें.

हालात हर तरह से भारतीय कम्युनिस्ट पार्टी (मार्क्सवादी) के सदस्य विनोद निकोले के खिलाफ रहे. उनकर सीधा टक्कर मौजूदा विधायक धनारे पास्कल जन्या से रहे, जे 2014 में दहानू से 16,000 से अधिक वोटन से जीतल रहस. धनारे के सम्बन्ध भारतीय जनता पार्टी से भी रहे, जे ओ साल विधान सभा चुनावन में 82 करोड़ रूपया से ऊपर खर्चा करे के बात खुदे मानले रहे.

बाकिर नतीजा आवते सब उलट गईल, कमी के बावजूद निकोले लगभग 5,000 मतन के मामूली अंतर से जीत के विधायक बन गईल रहलें.

“हमार चचेरा भाई हमके लगभग 70,000 रूपया उधार देले रहे. चुनाव से पहिले इहे हमरी लगे नकद राशि रहे,” पालघर जिला के आदिवासी बहुल क्षेत्र दहानू टाउन में अपनी दफ्तर के बाहर कुर्सी पर बईठल निकोले तीखा मुस्कान संघे कहेलन.

सुने में ई भारत के बीतल दौर के कहानी लागेला. बाकिर हाले में 2019 में घटल ई कहानी दुबारा 2024 में भी दोहराइल, जब बीजेपी हर चुनाव में विपक्ष के ध्वस्त करत रहल ह. बुझात रहल ह कि राजनीति अईसन खेल बन गईल बा जवन धन के अश्लील रूप से उपयोग कईले बिना ना जीतल जा सकेला. निकोले (48) आपन दूसर कार्यकाल पूरा कर रहल बाड़ें. उहो एगो अइसन राज्य में जहां 93 प्रतिशत विधायक करोड़पति बाड़ें सन. महाराष्ट्र सकल राज्य घरेलू उत्पाद (जीएसडीपी) के हिसाब से सबसे अमीर राज्य के रूप में दर्ज बा.

दहानू शहर से चार किलोमीटर दूर वाकी गांव में ईंट भट्ठा मजदूर के परिवार में जनमल निकोले, देश में सबसे ढेर चुनाव खर्च करे वाला राज्य महाराष्ट्र के सबसे गरीब विधायक हवें. निकोले चुनाव से पहिले पईसा ना बांट सकेलन आ ना अपनी एजेंडा के आगे बढ़ावे खातिर कवनो भारी-भरकम सोशल मीडिया टीम राख सकेलन. उनकर असली धन जमीनी आंदोलन, आदिवासी, किसान आ मजदूर जइसन आम लोग खातिर हमेशा सुलभ रहल बा.

सीपीआई (एम) से जुड़ल अखिल भारतीय किसान सभा (एआईकेएस) जनवरी में 10 दिन के भीतर पालघर, नासिक आ अहिल्यानगर (पहिले अहमदनगर) के आदिवासी क्षेत्रन में आदिवासी किसानन के दू गो विशाल रैली के आयोजन कईलें. लगभग 50,000 किसान लोग 19 जनवरी, 2025 के भूमि अधिकार आ रोजगार सहित अन्य मांगन संघे पालघर जिला कलेक्टर के कार्यालय के ओर मार्च कईलें.

एक हफ्ता या ओकरी बाद नासिक के हजारों किसान लोग राज्य सरकार पर दबाव डाले के प्रयास में मुंबई के ओर मार्च करे लागल.

भारत सरकार 2006 में ऐतिहासिक वन अधिकार अधिनियम (एफआरए) पास कईलस. अधिनियम अनुसूचित जनजातियन आ अन्य पारंपरिक वनवासियन के वन भूमि आ संसाधन प्रदान करेला जे लोग पीढ़ियन से अइसन क्षेत्र में रहत आईल बा. पहिले ग्राम सभा दावा शुरू करेला जेके उप-क्षेत्रीय आ जिला समिति जांच करेला, आ तबले तक बासिंदा लोग के बेदखली से बचावेला.

हालांकि जमीनी स्तर पर कानून के लागू होखल अबहियो संदेह में बा. एआईकेएस एगो बयान में पुष्टि कईलस कि दू गो किसान रैली के दबाव में राज्य सरकार एफआरए के कइएक ठुकरावल दावा के दोबारा शुरू करे पर राजी भईल.

निकोले खुद वारली आदिवासी हवें आ रैली के अगिला कतार में रहलें. एकरी संघे उ किसानन संघे चलल, सबकी संघे जमीन पर सुतल आ सबकरी बनावल खाईल में भी बराबरी से शामिल रहलें. “उनकर सबसे बड़ ताकत ई बा कि ऊ अकेले ना, सबके संघे मिलके नेतृत्व में भरोसा रखेलन,” एआईकेएस अध्यक्ष अशोक धावले कहेलन.

आपन उमिर 60 बरिस से ढेर बतावे वाली इश्वती गहाला एगो विरोध मार्च में शामिल रहली. उनकर कहनाम बा कि ई देखे में बहुत आश्वस्ति देवेला कि एगो विधायक आम लोगन निहर रैली में भाग ले रहल बा. “आजकल अइसन देखे के ना मिलेला,” उ कहेली. “एसे आपके महसूस होखेला कि आपके आवाज के सही ढंग से प्रतिनिधित्व मिलल बा, आ सुनल जा रहल बा.”

इश्वती पालघर जिला के जमशेत गांव के वारली आदिवासी हई. उनकरी परिवार के लगे गांव में दू एकड़ जमीन बा, जहां अधिकतर लोगन निहर उहो लोग मानसून में मौसम में धान के खेती करेली. “हमनी के खाली एगो फसल बोवेनी जा,” उ हमके बतावेली. “सिंचाई के बिना हमनी के बाकी मौसम में कुछ खास कर ना सकेनी जा.”

“ई आदिवासियन के प्रभुत्व वाला इलाका हवे. एइजा दू गो सबसे महत्वपूर्ण मुद्दा मजदूर अधिकार आ जमीन के अधिकार हवे,” निकोले कहेलन. “हमनी के एइजा 50-60 कंपनियन में यूनियन बा. हमनी के नियमित रूप से उनकी संघे बेहतर वेतन खातिर बातचीत करत रहेनी जा आ साथे इहो सुनिश्चित करेनी जा कंपनियन के कवनो प्रकार के नुकसान ना होखे.”

हम जवनी दिने दहानू में निकोले से मिलनी, ऊ लगभग एक घंटा के दूरी बोईसर से एगो संविदा मजदूरन के बैठक के संबोधित कर के आईल रहलें. “हमनी के ओ लोगन के वेतन 12,000 रूपया से बढ़वा के 13,050 रूपया करवा दिहनी जा,” उ बतावेलन.

एइजा अदानी समूह के एगो थर्मल पॉवर प्लांट भी बा. एके पहिले अनिल अम्बानी संभालत रहलें. निकोले के कहनाम बा कि उनकरी पार्टी के पॉवर प्लांट में भी एगो यूनियन बा जहां उ नियमित रूप से अनुबंधित कर्मचारियन के वेतन बढ़ावे खातिर दबाव बना रहल बाड़ें. “नेता लोग बिका जाला त यूनियन बेअसर हो जाला,” उ बतावेलन. “अइसन हमनी संघे कब्बो ना होई.”

थर्मल प्लांट में संविदा कर्मचारी सुरेश जाधव (54) बतावेलन कि उनकर वेतन 2010 में 2600 रूपया रहे जब उ लोग पहली बेर यूनियन बनवलें. निकोले ओ समय विधायक ना रहलें बाकिर यूनियन पर नजर राखें. नीति निर्धारक के भूमिका में आवे के बावजूद उ ओइजा पद पर बाड़ें बाकिर अब उनकर जिम्मेदारी बढ़ गईल बा.

“हमनी के 2010 में थर्मल प्लांट में काम करे वाला लगभग 1000 लोग रहनी जा आ आज हमनी के महीना के 28,000 रूपया कमा रहल बानी जा,” जाधव कहेलन.

वेतन में 16 बरिस में लगभग 1000 प्रतिशत के वृद्धि भईल, जवन ऊ समय के मजदूरन खातिर कल्पान से बाहर रहे.

पर्यावरण पर प्लांट के पड़त असर के निगरानी करे वाला जाधव के कहनाम बा कि आज ओ लोगन के आवाज जादे असरदार हो गईल बा, काहें कि विधायक ओ लोगन के पक्ष में बा. “हमनी के 2019 से पहिले नजरंदाज कईल आसान रहे, बाकिर अब हमनी के मांग के अधिक गंभीरता से लिहल जाला,” जाधव कहेलन.

आम जनता निकोले से मिले खातिर लम्बा लाईन लगा के खड़ा होले आ उनसे आपन समस्या साझा करेले. उ ओ लोगन के समस्या के दूर करेलन आ उनकरी मामलन पर फ़ॉलोअप करे खातिर अपनी सूत्रन से लगातार संपर्क में रहेलन. “इहे एगो तरीका बा जेसे हम चुनाव जीत सकेनी,” उ कहेलन. “सबेरे 10 बजे के बाद आप हमके एइजा हमरी ऑफिस के बाहर मिल सकेनी. केहू भी आ के हमसे बात मुलाकात कर सकेला.”

2024 में निकोले जब दूसरा चुनाव खातिर आपन हलफनामा दाखिल कईलें त उनकर घोषित सम्पति 87 लाख रूपया के रहे. एकर अधिकांश भाग हाले में कीनल 0.25 एकड़ जमीन आ ओपर बनल मामूली घर से रहे.

2019 में जब ऊ विधायक बनलें, त उनके महीना के 1.5 लाख रूपया वेतन मिले लागल. ई 2024 के चुनावन के बाद महाराष्ट्र में 2 लाख हो गईल. अपनी जिनगी में पहिली बेर 41 बरिस के उमिर में उ सही मासिक आमदनी पावत रहलें. एकरा में से उ अपना आ अपनी परिवार खातिर घर बनावे खातिर पईसा बचवलें.

“ओकरी पहिले पार्टी से हमके महीना के 3,000 रूपया मिलत रहे. आज भी हम अपनी मासिक वेतन के आधा हिस्सा पार्टी के दान करेनी,” निकोले कहेलन.

एकरी उलट, एसोसियेशन ऑफ़ डेमोक्रेटिक रिफोर्म्स (एडीआर) जब 2024 के महाराष्ट्र विधान सभा के विश्लेषण कईलस त 93 प्रतिशत विधायक लोग करोड़पति निकललें. सबसे अमीर विधायक के संपत्ति 500 करोड़ रूपया के घोषित भईल. एडीआर विधानसभा चुनाव के समापन के बाद 2024 में एगो अउरी विश्लेषणात्मक रिपोर्ट प्रस्तुत कईलस जेमे भाजपा आगे रहल आ पावल गईल कि 279 करोड़पति विजेता लोगन में से 157 (56 प्रतिशत) लोग 50 प्रतिशत आ ओसे ढेर वोट शेयर के संघे जीत हासिल कईले बाड़ें.

विपक्षी दल पूरा विश्वास से बता रहल बाड़ें सन कि भाजपा हर चुनाव में एगो स्पष्ट बढ़त के संघे आगे कईसे बढ़ेले काहें कि ओकरी लगे सत्ता पक्ष के तुलना में संसाधनन में बहुत बड़ अंतर बा. खाली वित्तीय वर्ष 2024-25 में ही भाजपा राष्ट्रीय स्तर पर 6,000 करोड़ रुपया से ढेर के अनुदान प्राप्त कईलस जवन सबसे बड़ विपक्षी पार्टी कांग्रेस से 12 गुना अधिका बा. मुकाबला बराबरी के नईखे.

महाराष्ट्र के नागरिक चुनावन में भी खाली एक महीना से भी कम समय में ऑनलाइन विज्ञापनन पर 55 करोड़ रुपया खर्च कईल गईल. चुनाव से पहिले मतदाता लोगन के करोड़ों करोड़ रुपया बांटल गईल.

निकोले के कहनाम बा कि ई विशाल नुकसान भी कम कईल जा सकेला अगर आप “मतदाता लोगन के दिल दिमाग में जगह बना लिहीं. आपके उनकर विश्वास जीते के पड़ी,” उ कहेलन. “त फिर जब बाकी लोग उनकरी पर पैसा फेंके के कोशिश करी त मतदाता लोग आपन वोट ना बेचिहें. हमार भाजपा प्रतिद्वंदी हमरी खर्चा कईल गईल पैसा से शायद 100 गुना ढेर पैसा खर्च कईले होई.”

विधानसभा चुनाव 2019 के बाद कवनो पार्टी के लगे सरकार बनावे खातिर स्पष्ट बहुमत ना रहे. शिवसेना अपनी 56 विधायकन के बीजेपी द्वारा संपर्क कईला से बचे खातिर रातोरात एगो रिसोर्ट में भेज देले रहे. जब बाकी विपक्षी विधायक लोग रिसोर्ट में जमा रहे, तब निकोले दहानू में आराम से खुले में घूमत रहलें.

“बेमौसम बरखा से हमनी के क्षेत्र में किसानन के गम्भीर नुकसान भईल रहे. हम एकर निरीक्षण कईनी आ अपनी काम में लागल रहनी. हमरी पार्टी या हमरी मतदाता लोगन के हमरा में कवनो कमी निकलला के चिंता ना रहेला,” उ कहेलन.

निकोले दहानू में एगो कैंटीन में काम करें जहां उ खाना परोसें आ बर्तन साफ़ करें. आर्थिक समस्या के वजह से उ कॉलेज बीच में छोड़ दिहलें.

एगो वरिष्ठ सीपीआई (एम) नेता उनके देखलें आ पार्टी में शामिल होखे खातिर राजी कईलें. “ओ समय सदस्यता शुल्क 5 रुपया रहे,” उ याद करेलन. निकोले याद करेलें कि उ हलके फुल्के अंदाज में वरिष्ठ नेता से पूछले रहलें, “आप हमरी कैंटीन में नाश्ता कईनी हं त आप न हमके पईसा देब? आप त उल्टा कह रहल बानी.”

उ पांच रुपया के रसीद कटवा लिहलें त नेता जी कहलें, “अब आप पार्टी के सदस्य हो गईल बानी.”

“हम ओ समय एकर मतलब ना समझनी,” निकोले कहेलन. “बाकिर उ हमके अपनी छत्रछाया में ले लिहलें आ हम पार्टी खातिर काम करे शुरू कर दिहनी.”

दहानू से चुनाव लड़े से बहुत पहिले से निकोले अपनी सहकर्मियन संघे शक्तिशाली लोगन के खिलाफ कई गो जमीनी आन्दोलनन में अग्रिम पंक्ति में शामिल रहलें.

पुलिस 2013 आ 2015 के बीच निकोले पर उनकी आन्दोलन के वजह से अवैध सभा आ दंगा कईला के मामला में मुकदमा कईलस. उनके पांच जिलन से बाहर करे खातिर एगो तड़ीपार करे के आदेश भी दिहल गईल रहे. बाकिर दहानू पुलिस स्टेशन के बाहर 25,000 किसानन के जुटान के वजह से ओ आदेश के मजबूरी में रद्द करे के पड़ल. “विधायक बनला के बाद भी हम क्षेत्र से गायब नईखी भईल. बल्कि हम अउरी सक्रिय हो गईल बानी. आगे बढ़त के हम सुनिश्चित कईल चाहतानी कि हमनी के अपनी निर्वाचन क्षेत्र में एगो प्रथम श्रेणी के अस्पताल ले आयीं जा. ई अभी ले नईखे भईल.”