‘केतना पीढ़ी ले हमनी ठगात रहम?’

किरण गहाला, 54 बरिस, आ उनकर जइसन दोसर आदिवासी किसानन खातिर ई लड़ाई नया नइखे.

19 जनवरी, 2026 के ऊ पालघर के डोलहारी बुद्रुक गांव के आपन छोट घर से लाल बुश्शर्ट पहिरले, गरदन में गमछा लपेटले निकलन. गांव में इंतजारी कर रहल टेंपो-ट्रक में दोसर आदिवासी किसानन संगे चढ़ गइलन. सभे केहू चारोटी गांव ओरी निकल पड़ल. महाराष्ट्र ऑल इंडिया किसान सभा (एआईकेएस) के बैनर तले निकले वाला ई एगो आउर बिशाल मार्च बा.

मैदान में हजारों-हजार के तादाद में किसान लोग जुटल बा. मीडिया आ एआईकेएस के मानल जाव, त रैली में मोटा-मोटी 50,000 लोग जुटल बा. सब लोग पालघर के आदिवासी इलाका से आइल बा. ऊ लोग कलेक्टर के ऑफिस ओरी पैदले निकल पड़ल. जमीन पर हक ठीक से लागू होखे, मनरेगा फेरो बहाल होखे, वाढवण पोर्ट बंद होखे आ पिए आ खेती करे के पानी के इंतजाम कइल जाव. ऊ लोग के इहे सब खास मांग बा.

20 जनवरी के सांझ में आंदोलन गीत गावत, तेज कदम बढ़ावत, नारा बुलंद करत लोग पालघर के कलेक्टर के ऑफिस पहुंचल. उहंवा ऊ लोग तय कइलक, जबले ओह लोग के मांग पूरा ना कइल जाई, ऊ लोग उहंवा से टस से मस ना होई. मांग सब उहे पुरनका बा- जमीन के हक के. आदिवासी लोग सदियन से जंगल आ चरागाह वाला जमीन जोतत आइल बा. बाकिर आजो ओह जमीन पर ऊ लोग के मालिकाना हक नइखे.

वन अधिकार कानून, 2006 आदिवासी आ सदियन से जंगल में रहे वाला के जंगल आ जमीन के हक देवेला. ग्राम सभा दावा करेला, जेकरा सब-डिवीजनल आ जिला समिति जांचेला. जबले हक तय ना हो जाए, लोग के घर-दुआर से बेदखल ना कइल जा सकेला. बाकिर रैली में आइल जादेतर आदिवासी किसान लोग के कइल दावा अबले मंजूर नइखे भइल.

महाराष्ट्र में कोई पहिल बेर आदिवासी लोग एह तरीका से सड़क पर नइखे उतरल. आउर संभवत: अंतिमो बेरा ना. किरण गहाला 2018 में नासिक से मुंबई क आजाद मैदान तक जाए वाला ओह विशाल रैलियो में रहस. ऊ रैली एक हफ्ता ले चलल रहे. लोग 180 किमी लमहर पैदल मार्च में खालिए गोड़ निकलल रहे.

वरली आदिवासी समुदाय से आवे वाली गहाला कहेलन, “हमनी ओह रैली में सबले आगू रहीं. मुंबई पहुंचत-पहुंचत गोड़ में छाला पड़ गइल रहे.”

किसान लोग खातिर ऊ एगो ऐतिहासिक क्षण रहे. पूरा मुंबई शहर ओह लोग के स्वागत खातिर उमड़ पड़ल रहे. रस्ता भर लोग मदद देत गइल. रैली खतम भइल, त मुख्यमंत्री देवेंद्र फडणवीस के किसान नेता लोग के सामने बइठ के ओह लोग के मांग माने पड़ल.

आज कुछ आठ बरिस बाद, फडणवीस फेरु महाराष्ट्र के मुख्यमंत्री बानी आउर गहाला जइसन किसान लोग फेरु आपन मांग संगे सड़क पर निकल गइल बा. ऊ कहलन, “हमनी रैली खतम करके जल्दी से गांव लउट जाईं, सरकार बस इहे खातिर वादा करेला. बाकिर अबले एगो वादा पूरा नइखे भइल.”

सन् 2018 से 2026 के बीच, गहाला के अनुमान के हिसाब से, किसान सभा प्रशासन आ सरकार पर दबाव डाले खातिर मोटा-मोटी छोट-बड़ 30 से 40 रैली निकाल चुकल होई. एक दिन से लेके एक हफ्ता तक चले वाला रैली निकालल गइल. केतना बेरा ओकरो से जादे दिन खातिर. औसतन प्रति रैली तीन दिन मान लेवल जाव, त आदिवासी किसान पछिला आठ बरिस में कोई चार महीना खाली आपन हक खातिर सड़क पर रहल. लगातार रैली निकालत लोग थाक गइल, बुढ़ा गइल, बाकिर हिम्मत ना हारलक.

पुरनका रैली जइसन एकजुटता जतावत उहंवा लाल बुश्शर्ट के समंदर लहरात देखाई पड़ल. एआईकेएस भारतीय कम्युनिस्ट पार्टी (मार्क्सवादी) से जुड़ल बा.

“हमार गोड़ आ ठेहुना दुखाता,” ईसवती गहाला कहली. उनका आपन उमिर नइखे पता, बाकिर अंदाजा लगावेली “साठच्या पुढे (साठ बरिस),” चाहे 60 से जादे. ऊ इहो कहली, “मुंबई रैली में आइल रहीं, त जादे उमिर ना रहे.” ऊ मनोर फाटा (स्टेशन) लगे खुलल आकास तरे बइठल बाड़ी. इहंई किसान लोग डेरा डालके सरदी वाला रात गुजरलक. केहू आपन हजारन साथी लोग खातिर खिचड़ी बनावत देखाई पड़ल. केहू चूल्हा पर चढ़ल डेगची लगे बइठ के आंच तापत मिलल. ईसवती कहेली, “प्रदर्शन में किसान लोग के साथ आवे से ताकत मिलेला. आस बन्हाला. हार ना माने आ लड़े से अच्छा लागेला.”

वरली आदिवासी ईसवती पालघर के जामशेत गांव से बाड़ी. उनकर घर से तीन आउर लोग रैली में आइल बा. गांव में उनका लगे 2 एकड़ खेत बा, जहंवा ऊ दोसरा लोग जेका बरसात में धान उगावेली. “हमनी एक बेरा में खाली एगो फसल लगाइला. सिंचाई के दोसर साधन ना रहे से बाकी मौसम में जादे कुछ ना संभव ना हो पावेला.”

पालघर जिला के रहे वाला एह आदिवासी किसान लोग खातिर मजूरिए आजीविका के प्रमुख साधन बा. काहेकि फसल जादेतर परिवार के पेट भरे खातिर होखेला. एह हाल में, कमजोर मनरेगा ओह लोग खातिर बहुते बड़ झटका बा.

दिसंबर 2025 में भारत सरकार महात्मा गांधी राष्ट्रीय ग्रामीण रोजगार गारंटी कानून के नाम बदल के विकसित भारत- जी राम जी कानून (वीबी- जी राम जी) रख देलक. अइसे त सरकार के नयका कानून के हिसाब से कागज पर काम के दिन 100 से बढ़ाके 125 कर देवल गइल बा. बाकिर नयका कानून के खरचा के भारी-भरकम जिम्मेदारी राज्य सब पर डाल देवल गइल बा. जादेतर राज्य सब आर्थिक रूप से कमजोर बा. एह चलते जानकार लोग के कहनाम बा, जवन पहिले ग्रामीण भारत में लोग के रोजगार के गारंटी देत रहे, अब खतरा में बा.

किसान लोग संगे प्रदर्शन में हिस्सा लेवे वाला, पालघर जिला के डहाणु से आवे वाला विधायक विनोद निकोले के कहनाम बा, “मनरेगो में बहुत दिक्कत रहे. काम पूरा ना पड़त रहे, मजूरी कम रहे आ अक्सरहा देर से मिलत रहे.” बाकिर ओकरा समाप्त कर देवे से समस्या समाप्त ना होई. “हमनी के मांग मजूर लोग खातिर अच्छा मजूरी आ जादे दिन काम बा.”

किसान लोग ठान लेले बा कि जबले ओह लोग के मांग पूरा ना होई, ऊ लोग कलेक्टर के ऑफिस के घेराव कइले रही. रुबदी आडगा, 25 बरिस, के कहनाम बा, “सरकार 2018 में कइल आपन वादा जदि पूरा कइले रहित, त हमनी के आज फेरो रैली निकाले के जरूरत ना पड़ित.”

आडगा वइसन लोग में से बाड़न जे मुआवजा से वंचित रह गइल. काहेकि जवन जमीन उनकर परिवार पीढ़ियन से जोतत आ रहल बा, उऩका नाम पर नइखे. “हमार जमीन सपाट कर देवल गइल काहेकि उहंवा से एगो सुपरपास्ट हाईवे गुजरे वाला बा. अब आमदनी के कवनो जरिया नइखे बचल.”

ओह जमीन पर ऊ धान आ ज्वार उगावत रहस. एकरा पर खजूर के गाछ आ अन्नासो उगत रहे. जदि ऊ जमीन उनका नाम पर रहित, त उहो 2 करोड़ से जादे मुआवजा के हकदार रहतन. ऊ कहेलन, “पालघर के हमार झारी गांव में हमरा जइसन कोई 45 लोग बा. हमनी आउर केतना पीढ़ी ले अइसे ठगात रही?”

अनुवाद: स्वर्ण कांता