पारी लाइब्रेरी: 2025 उपर एक नजर

साल 2025 मं, पारी लाइब्रेरी ह अपन खजाना मं 102 रिपोर्ट डारिस. हमर नजर आदिवासी मन के हक, घिनहा भाखा, लेबर सर्वे, क्लाइमेट जस्टिस अऊ बनेच अकन उपर रहिस.

हमर साहित्य सेक्शन मं बनेच जियादा काम रहिस. हमन मेघालय के समाज ले सचित्र कहिनी मन के किताब (इलारी के जैंसेम, कोंगथोंग के धुन) अऊ बंगाल के पट्टचित्र कलाकार मन के डहर ले सचित्र किताब जोरे गीस, जेन ह नवा पीढ़ी के पढ़ेइय्या मन ला इतिहास के बारे मं सोच-बिचार देथे (इतिहास के पहिली सबक : खेल अऊ खेल-तमाशा, कपड़ा अऊ पहनावा).

ये जड़कल्ला मं, बरसा के बाढ़ अऊ रिकार्ड तोड़ घाम के बाद हमन तीर-तखार के हवा तेजी ले जहरीला होवत जावत हवय, अइसने मं हमर लाइब्रेरी मं मऊसम मं बदलाव उपर रपट मन पहिली के जइसने जरूरी बने हवंय.

ये बछर के पहिली नौ महीना मं देस (भारत) मं 99 फीसदी दिन खराब मऊसम के अलहन घटिस – ये सब्बो 36 ठन राज अऊ केंद्र शासित प्रदेश मन ले लिखे गीस. कहे के मतलब जम्मो 273 दिन ले 270 दिन. ये अलहन मन मं 4,064 लोगन के परान गीस, 9.47 मिलियन हेक्टेयर फसल खराब हो गीस, 99,533 घर तबाह होगे, अऊ करीबन 58,982 मवेसी मारे गीन.

लाइब्रेरी के नवा रिपोर्ट हवा मं प्रदूसन, लू अऊ मऊसम मं बदलाव ले सबले जियादा गरीब लोगन मन के उपर अलग-अलग असर जइसने कतको बात ला उजागर करथे.

हमन देस अऊ दुनिया दूनों ला लेके खाद्य नियाव के पूरा समझ मं मदद करे बर खाद्य सुरच्छा – पहुँच, हासिल करे अऊ खाय मं खपत – ला लेके संसाधन जोड़ेन. अंदाजन, दुनिया के 29 फीसदी आबादी -2.33 अरब मइनखे- मध्यम धन गंभीर रूप ले खाय के कमी ले जूझत रहिन, जेकर मतलब रहिस के वो मन ला बखत मं भरपूर खाय पीये ला नइ मिलत रहिस. हमन अपन देस मं खेती उपर रिपोर्ट के संग येकर समझ ला अऊ मजबूत करेन.

तुमन भारत सरकार के सांख्यिकी अऊ कार्यक्रम कार्यान्वयन मंत्रालय डहर ले करे गे पीरियोडिक लेबर फोर्स सर्वे (पीएलएफएस) उपर हमर रिपोर्ट घलो देख सकथो. ये सर्वे मं मजूर मन के रोजगार/ बेरोजगार के हालत अऊ वो मन जेन क्षेत्र (खेती, सेकेंडरी धन टर्शियरी) मं काम करथें, ओकर ले जुड़े आंकड़ा सामिल हवय. पीएलएफएस रिपोर्ट हमर लेबर सेक्शन के एक ठन जरूरी हिस्सा आय, जउन मं देस (भारत) अऊ दुनिया मं काम के दुवाब के बदलत हालत ला लेके रिपोर्ट लिखे जाथे.

हमर काम के मूल मं हमर वालेंटियर आंय जउन मन हमर हरेक रिपोर्ट बर ‘फोकस अऊ फैक्ट्स’ (मुख्य बिंदू अऊ तथ्य) ला सार रूप मं राखथें. हमर संग कालेज पढ़ेइय्या लइका मन, काम करत अऊ रिटायर विशेषज्ञ मन घलो अपन मन ले वालेंटियर के रूप मं जुड़े हवंय. ये मन जटिल अऊ बड़े बिसय ला सरल अऊ आसान भाखा मं संजोय बर अपन बखत अऊ हुनर हमन ला देथें. वो मन के ये काम ले हमर संग्रह/ खजाना न सिरिफ सब्बो तीर हबराथे फेर वो मं आनी-बानी के जानकारी घलो होथे.

ये बखत, पारी लाइब्रेरी मं करीबन 450 वालेंटियर हवंय, जेन मन हमर सुरुआत ले हमर संग काम करत हवंय.

ये संदेसा साल के आखिर (दिसंबर 2025) मं लिखे गे हवय. येकर उद्देश्य वो लोगन मन ला सम्मान देय आय जेन मन हमर संग सरलग काम करत रहे हवंय. वो वालेंटियर मन अपन बिचार राखत हवंय के वो मन के अनुभव कइसने रहिस अऊ ये बखत मं वो मन काय महत्तम जिनिस ला सिखिन.

याझिनी सतियामूर्ति

आईआईटी बॉम्बे में एनवायरनमेंटल साइंस एंड इंजीनियरिंग मं एमटेक करत हवंय

मंय जेन घलो रिपोर्ट बर फोकस अऊ फैक्ट्स’ बनाय हवं, ओकर ले मोला एक ठन नवा नजरिया मिलिस जेन ह मोर मन मं बस गे हवय. कुछेक रिपोर्ट, जइसने के भारत के कालीन उदिम मं बंधुआ अऊ बल मजूरी उपर आधारित 'दागी कालीन' (Tainted Carpets) धन ‘क्लाइमेट इंडिया 2024’ (Climate India 2024) जेन मं मऊसम मं बदलाव के बढ़ती के कतको घटना के बात करेगे हवय, मोला हलाकान करके राख दीस अऊ वो मन ला पढ़े मं मोला कतको दिन लाग गे. फेर अपन पढ़ाई ला देखत, ये रिपोर्ट मन के उपर काम करे ले मोला वो बिसय मन ला बढ़िया ढंग ले समझे के मऊका मिलिस.

चाहे वो ह एक पेज के पोस्टर होय धन 500 पेज के स्टैटिस्टिकल (आंकड़ा वाले) रिपोर्ट, पारी लाइब्रेरी वोला 'फोकस अऊ फैक्टॉइड्स' के रूप मं छोटे अऊ साफ हिस्सा मं बाँट देथे अऊ असल बात तक ले जाथे. फेर सोचे के बात आय के ये मन ले कतको रिपोर्ट अब तक ले आम जनता धन मुख्यधारा (Mainstream) के चर्चा के हिस्सा बने नइ सके हवंय.

अबिजार शेख

30 बछर ले जियादा के तजुर्बा वाले कम्युनिकेशन अऊ फाइनेंशियल सर्विसेज़ विशेषज्ञ

मोर करा खाली बखत रहिस अऊ मंय कुछु बढ़िया करे ला चाहत रहेंय. पारी लाइब्रेरी के संग वालेंटियर बढ़िया मऊका रहिस. पारी जेन काम करते, ये ह मोर बोर एकदम सही रहिस, काबर के ये ह हमेसा ले मोर पंसद के जिनिस मन ले एक रहे हवय.

एक पाठक के रूप मं, मंय लाइब्रेरी मं बिसय मन के बने सूची अऊ खोजे के सुविधा देखे ला चाहत हवं.

जेरी जोस

कोट्टायम, केरल के जलवायु वैज्ञानिक

पारी ले मोर परिचय वेबसाइट सुरु होय के बखत पी. साईनाथ के एक ठन लेक्चर से होय रहिस. गाँव-देहात के भारत ला सहेजे के ये कोसिस, जउन ला एक महाद्वीप के भीतरी महाद्वीप’ कहे जाथे, मोर मरम ला छू गीस. पारी के बाढ़त लाइब्रेरी मं अपन सहयोग देय बर मंय वालेंटियर के रूप मं दूरिहा ले काम करे सुरु करेंय, जेकर ले गाँव-देहात के कहिनी मन ला देस-दुनिया मं लाय सकेंय.”

ये सुग्घर बात आय के लाइब्रेरी मं बढ़िया व्यवस्थित रिपोर्ट मन ला आसान ‘फोकस अऊ फैक्टॉइड्स’ के रूप मं दिखाय गे हवय. मोला लागथे के येकर बढ़े दायरा पारी के पत्रकारिता बर भारी काम के आय. मोला अपन विशेषज्ञता के क्षेत्र मं अऊ ओकर ले बहिर के रिपोर्ट मन संग काम करत भारी मजा आइस, जिहाँ शोध ह अपन आप मं सीख रहिस.

साल 2026 मं, हमन ला आस हवय के हमन विकलांगता अऊ सियान मन के उपर हमर रिपोर्ट के संकलन ला अऊ बढ़िया बनाबो, जेन मं सार अऊ खास बात घलो होही.

पारी लाइब्रेरी अब जब अपन 12 वां बछर मं पांव धरत हवय, हमन अऊ घलो अइसने रिपोर्ट अऊ दस्तावेज लानबो जेन ह गाँव-देहात के हरेक रंग ला समझे मं मदद करही. हमन अपन जुन्ना अऊ नवा वालेंटियर मन के संग मिलके काम करे अऊ लाइब्रेरी का अऊ आगू ले जाय बर आतुर हवन!

गर तुमन ला हमर काम पसंद हवय अऊ पारी लाइब्रेरी अऊ पारी मं सहयोग देय ला चाहत हव, त बिनती हवय के वालेंटियर फार्म ला इहाँ भरव. हमन फ्रीलांस अऊ स्वतंत्र लेखक, रिपोर्टर, फ़ोटोग्राफ़र, फिलिम निर्माता, अनुवादक, संपादक, इलस्ट्रेटर अऊ शोधकर्ता मन के हमर संग काम करे बर स्वागत करत हवन.

कवर डिज़ाइन: स्वदेशा शर्मा

अनुवाद: निर्मल कुमार साहू