بِھنراری کے لوم اب خاموش پڑے ہیں

’’جب میں چھوٹی تھی، تو ہم نے کبھی نہیں سوچا تھا کہ ہمارا کام رک جائے گا۔‘‘

تاہم رادھا دیوی کے گھر کے مچان پر لاوارث پڑے گرد آلود اوزار ایک الگ کہانی بیان کرتے ہیں۔ ایک چرخہ اور لکڑی کا ایک پرانا شٹل (کپڑا بننے کی نال)، جو قدرتی اون سے بنے اور کبھی نہ رنگے جانے والے کمبلوں کی بُنائی کے دوران کئی دہائیوں تک ان کے ساتھ رہے، اب خاموش پڑے ہیں۔

’’سوتا بناوت کے کلا ہمار ہاتھ سے چھوٹت جاتا [سوت کاتنے کا ہنر ہمارے ہاتھ سے پھسل رہا ہے]،‘‘ بھوجپور میں مقیم کتائی اور بنائی کرنے والی یہ خاتون کہتی ہیں۔ ’’میں نے اس کے بعد [۲۰۱۶ میں] کمبل نہیں بُنا ہے۔‘‘ وہ جس کمبل کی طرف اشارہ کرتی ہیں وہ موٹا ہے اور بھورے رنگوں میں بُنا ہوا ہے، اور اس پر دھاریاں بنی ہیں۔

’’میں بچپن سے اپنی مائی [ماں]، چاچی [چچی] اور دادی کے ساتھ مل کر کمبل بُنتی آ رہی ہوں،‘‘ بزرگ خاتون بنکر مزید کہتی ہیں۔ انہیں اپنی صحیح عمر کا اندازہ نہیں ہے، لیکن وہ آپ کو اتنا بتا سکتی ہیں: ’’میں نے اندرا گاندھی کا زمانہ دیکھا ہے!‘‘

گڑھنی بلاک کے بھِنراری گاؤں کی گلیوں میں کبھی بھیڑوں کے اون کا اپنا آہنگ تھا۔ سردیوں کے بازاروں میں، پال کاریگروں کے بُنے ہوئے کمبل ایک ہاتھ سے دوسرے ہاتھ میں منتقل ہوتے تھے، ان کے موٹے ریشے والے اون طویل سرد راتوں میں لوگوں کو گرم رکھتے تھے۔ آج، وہ بازار قدرے خاموش ہیں اور رادھا دیوی گاؤں میں اپنی برادری کی آخری خاتون ہیں، جنہوں نے ایسے کمبل بُنے تھے۔

’’ایہی جات با ہمار [یہی ہماری ذات ہے]،‘‘ رادھا دیوی کہتی ہیں۔ ’’ہم نے شروع سے یہی کام کیا ہے۔‘‘

سبز اور گلابی رنگ کی ساڑی میں ملبوس، رادھا دیوی دھوپ سے گرم اپنے گھر کے اینٹوں کی دیوار کے سہارے کھڑی اس زمانے کو یاد کرتی ہیں جب انہوں نے آٹھ یا نو سال کی عمر میں کمبل بُننا سیکھا تھا۔ وہ کبھی اسکول نہیں گئیں اور انہوں نے یہ ہنر اپنی والدہ سے سیکھا تھا۔ ان کے والد اور دادا کے پاس سو سے زیادہ بھیڑیں تھیں۔ عام طور پر گھر کی خواتین اون سے کمبل اور سویٹر بُنتی تھیں، جبکہ مرد انہیں قریبی گاؤوں یا دوسرے اضلاع میں فروخت کیا کرتے تھے۔ شادی کے بعد بھی انہوں نے یہی طریقہ دیکھا۔ ان کے شوہر اور سسر بھیڑیں پالتے تھے اور ان کی ساس کمبل بُنتی تھیں۔

پال برادری کے تقریباً ۴۰ سے ۴۵ کنبے، جنہیں بہار میں دیگر پسماندہ طبقات (او بی سی) کے طور پر درج کیا گیا ہے، طویل عرصہ سے اس گاؤں میں رہ رہے ہیں۔ ذات پات کے نظام کا مطلب یہ تھا کہ نسل در نسل، ہر کنبہ ایک ہی پیشہ اختیار کرنے پر مجبور رہے۔

مرد چار یا پانچ کے گروپ میں بھیڑیں چراتے تھے، تازہ گھاس کی تلاش میں ندی کے کنارے آگے بڑھتے تھے۔ وہ اناج، برتن، چھوٹے خیمے، سائیکلیں اور کچھ بنیادی سامان اپنے ساتھ لے جاتے تھے، اور اپنے ریوڑ کے ساتھ ایک سے دو ماہ تک ڈیرے ڈالتے تھے۔

’’عام طور پر ہر کنبہ لگ بھگ ۱۰۰ سے ۱۵۰ بھیڑیں پالتا تھا، ان کے اون جمع کرتا تھا اور اس سے کمبل بُنتا تھا،‘‘ رادھا دیوی کہتی ہیں۔ خواتین بنائی کرنے کے لیے ایک ساتھ اکٹھی ہوتی تھیں اور مختلف نمونوں اور ڈیزائنوں کے کمبل تیار کرتی تھیں۔

اس کام کی ایک موسمی ترتیب ہوا کرتی تھی: مانسون کے دوران اون جمع کرنا، خزاں میں کاتنا اور سردیوں میں بنائی کرنا۔ بھیڑیں ان کے لیے روزگار، شناخت اور معاشرہ میں مقام و مرتبے کی علامت تھیں۔

’’ڈبل سائز کا ایک کمبل کم از کم ۱۰۰۰ سے ۱۲۰۰ روپے میں فروخت ہوتا تھا۔‘‘ تقریباً ۱۵ سال پہلے تک وہ سال میں سات سے دس کمبل بُنتی تھیں۔ ’’ہم نے شروع میں کئی کمبل فروخت کیے،‘‘ ان کے بیٹے راکیش ان دنوں کو یاد کرتے ہیں جب وہ اپنے والد کے ساتھ سائیکل پر سوار ہو کر ہاتھ سے بنے ہوئے کمبل فروخت کرتے تھے۔ ’’پھر آہستہ آہستہ ہماری فروخت کم سے کم ہوتی چلی گئی۔‘‘ بازار میں ان کے مقابلے آدھی قیمت پر ملنے والے مشین سے بنے کمبلوں نے آہستہ آہستہ ہاتھ سے بنے کمبلوں کی جگہ لے لی۔ یہ کمبل زیادہ سستے، نرم اور رنگ برنگے تھے۔ یہاں تک کہ اب انہوں نے خود بھی انہی کمبلوں کا استعمال شروع کر دیا ہے۔

کمبل کی مانگ میں کمی کے ساتھ اون کی دستیابی میں بھی کمی واقع ہوئی ہے۔ ’’پہلے چراگاہ کے لیے کافی کھلی زمین ہوا کرتی تھی،‘‘ راکیش کہتے ہیں۔ ’’اب کھیتوں میں باڑ لگا دیے گئے ہیں اور ایسی سڑکیں بن گئی ہیں، جن پر ریوڑ کے ساتھ چلنا مشکل ہوگیا ہے۔‘‘ اس طرح کی تبدیلیاں پہلے سے ہی زوال پذیر پیشہ کو مزید نقصان پہنچاتی ہیں، جن میں ایک خراب موسم یا ایک حادثہ سال بھر کی کمائی کو ختم کر سکتا ہے۔

راکیش کے کزن دھرمیندر کہتے ہیں، ’’پہلے لوگ کھیتوں میں ہمیں جانور چرانے کی اجازت دینے کے معاملے میں نرمی برتتے تھے۔ اب بحث کرتے ہیں۔‘‘ وہ ایک ریلوے سٹیشن کے قریب ہونے والے حادثہ کو یاد کرتے ہیں، جس میں ایک ٹرین نے ان کی ۱۰۰ کے قریب بھیڑوں کو کچل کر ہلاک کر دیا تھا۔ ’’یہ بہت بڑا نقصان تھا، جس میں ہمیں کوئی مدد نہیں ملی تھی۔‘‘ اس طرح کی غیر یقینی صورتحال میں اضافہ کی وجہ سے برادری کے مردوں نے زیادہ سے زیادہ تعداد میں مزدوری کے لیے بہار سے باہر ہجرت کرنا شروع کر دیا ہے۔ دھرمیندر کے اپنے بیٹے اب دہلی میں کام کرتے ہیں اور صرف دیوالی اور چھٹھ کے تہواروں پر واپس آتے ہیں۔

کچھ سال پہلے بھیڑیں چرانے کے دوران لو لگنے سے راکیش کے والد کی موت ہو گئی تھی۔ اس کے بعد انہوں نے اپنے والد کا کام سنبھال لیا تھا۔ لیکن وہ اپنی بیوی نیلم کے ساتھ مل کر، جو ایک زرعی مزدور کے طور پر کام کرتی ہیں، صرف ۳۰ سے ۴۰ جانور ہی رکھتے ہیں۔ ان کا بیٹا سنیل اور بہو رینا گاؤں میں ایک چھوٹا سا جنرل اسٹور چلاتے ہیں، اور ان کا اسکول جانے والا بیٹا بھی آگے چل کر گلہ بانی (مویشی چرانے) کا کام نہیں کرے گا۔

آج یہ کنبہ اپنی کفالت کے لیے اپنی دکان، دو گایوں کے دودھ، اجرت کی مزدوری اور کبھی کبھار بھیڑوں کو قصابوں کے ہاتھوں فی جانور ۲۵۰۰ سے ۳۰۰۰ روپے کے حساب سے فروخت کرنے سے حاصل ہونے والی آمدنی پر انحصار کرتا ہے۔

رادھا دیوی اس رپورٹر کو ایک تہہ شدہ کمبل دکھاتی ہیں، جو ان کا نبا ہوا آخری کمبل ہے۔ انہوں نے اسے ۲۰۱۲ کے آس پاس بُننا شروع کیا تھا اور ۲۰۱۶ میں مکمل کیا تھا۔ کام سست ہو گیا تھا کیوں کہ عمر کے ساتھ ساتھ ان کے ہاتھوں میں رعشہ آگیا تھا۔ انہوں نے محض خود کو مصروف رکھنے کے لیے یہ کام شروع کیا تھا۔

ان کے بیٹے نے اون اتار کر ندی میں دھویا اور دھوپ میں خشک کیا۔ ان کی بہو نے اسے ڈنڈے سے نرم کیا۔ اور رادھا دیوی نے اپنے لکڑی کے پرانے چرخہ پر اسے کاتا تھا۔

یہ کمبل اب ایک کونے میں تہہ کیا ہوا پڑا ہے، جس کے ساتھ بھیڑوں کی ان گھنٹیوں کی یادیں ہیں جو اب نہیں بجتیں، اور ان چرخوں کی یادیں ہیں جو اب نہیں گھومتے۔