پتھوراگڑھ کے پہاڑوں میں ’سونے‘ کی لوٹ

اس اسٹوری میں سرکاری اہلکاروں کو چھوڑ کر، سبھی افراد کے نام بدل دیے گئے ہیں، تاکہ ان کی شناخت کو پوشیدہ رکھا جا سکے؛ اسی لیے، ان کے گاؤوں کا نام بھی نہیں لکھا گیا ہے۔ دو حصوں پر مشتمل اسٹوری کا یہ دوسرا حصہ ہے۔

’’کیڑا جڑی نے یہاں کی زندگی بدل دی ہے،‘‘ ہمارے ٹیکسی ڈرائیور سنیل سنگھ کہتے ہیں۔ سنیل (۲۳) دو سالوں سے گاڑی چلا رہے ہیں، اور قریبی گاؤوں کے مسافروں کو دھارچُلا پہنچاتے ہیں، جہاں وہ اسکول یا کالج، بازار یا صحت کی نگہداشت کے مرکز تک جاتے ہیں۔ دھارچلا بلاک اتراکھنڈ کے پتھورا گڑھ ضلع میں واقع ہے، جہاں سے ہند-نیپال سرحد چند میٹر کے فاصلہ پر ہے۔

قیمتی کیڑا جڑی پھپھوندی فروخت کر کے بچائے گئے ۵ء۳ لاکھ روپے اور کچھ بینک سے قرض لے کر سنیل نے ایک بولیرو ٹیکسی خریدی۔ وہ تقریباً آٹھ سال کی عمر سے اپنے اہل خانہ کے ساتھ پھپھوندی جمع کرنے جا رہے ہیں، اور اس سے ہونے والی آمدنی سے قرض واپس کر رہے ہیں۔

’سونڈی پھپھوندی‘ یا کیڑا جڑی تبت کے سطح مرتفع کے آلپی سبزہ زاروں میں ۳۵۰۰ سے ۵۰۰۰ میٹر کی اونچائی پر پیدا ہوتے ہیں۔ جنسی خواہشات کو ابھارنے والی اپنی خصوصیات کے لیے ’ہمالیائی ویاگرا‘ کے نام سے مشہور پھپھوندی کو چین میں ’یارسا گُمبا‘ کہا جاتا ہے اور یہ چین کی روایتی ادویات میں شامل ایک اہم جزو بھی ہے۔ ایک کلو اعلیٰ معیار کی کیڑا جڑی کی قیمت سرحد پارغیرقانونی بازار میں کبھی کبھی ۱۲ لاکھ روپے تک مل جاتی ہے۔ اتراکھنڈ میں جمع اور فروخت کی جانے والی زیادہ تر پھپھوندی ایجنٹوں کے ذریعے نیپال اور پھر چین کو اسمگل کی جاتی ہے۔

اتراکھنڈ کے اونچائی والے سرحدی اضلاع پتھورا گڑھ اور چمولی میں پھپھوندی جمع کرنے کا موسم ابتدائی مئی سے شروع ہوتا ہے اور مانسون کی آمد کے ساتھ جون کے وسط یا آخر تک ختم ہو جاتا ہے۔ لوگ اپنے پورے کنبے کے ساتھ سبزہ زاروں میں منتقل ہو جاتے ہیں، ہفتوں تک خیموں میں قیام کرتے ہے، اور پھپھوندی جمع کرنے کے لیے طویل اور مشکل اوقات میں کام کرتے ہیں۔ (دیکھیں: پتھوڑا گڑھ میں لوگوں کا گھر چلانے والی پھپھوندیِ)

وہ اتنی مقدار میں پھپھوندی لے کر واپس لوٹتے ہیں جو ان کے اہل خانہ کے اخراجات کا ایک بڑا حصہ پورا کرنے کے لیے کافی ہوتی ہے۔ ’’اس کا انحصار اس بات پر بھی ہوتا ہے کہ آپ کتنے عدد کیڑا جڑی چنتے ہیں۔ کچھ کنبوں کی کمائی چند مہینوں میں ختم ہو جاتی ہے اور کچھ کے ایک سال تک کے اخراجات پورے ہوتے ہیں،‘‘ پاروتی دیوی، جو سنیل کے ہی گاؤں سے تعلق رکھتی ہیں، کہتی ہیں۔ ’’یہ کاروبار خطرناک اور مشکل ہے۔ لیکن کالج کی ڈگریوں والے پڑھے لکھے لوگوں کے پاس بھی یہاں کوئی روزگار نہیں ہے۔ اس لیےسبھی اس کام میں شامل ہیں۔‘‘

ایجنٹ یا ڈیلر پھپھوندی خریدنے عموماً ستمبر اور اکتوبر کے مہینوں میں گاؤں آتے ہیں؛ اس کے بعد وہ دور افتادہ پہاڑی راستوں سے انہیں سرحد پار پہنچاتے ہیں۔ ’’جب ہم اپنی جمع کی ہوئی پھپھوندی لے کر واپس لوٹتے ہیں تو اسے خشک کر کے صاف کرتے ہیں، محفوظ کرتے ہیں اور پھر دلالوں کے آنے تک اپنی جان کی طرح ان کی حفاظت کرتے ہیں۔ کیڑا جڑی سے ہونے والی آمدنی پر پورے سال ہمارا گزارہ ہوتا ہے۔ زراعت اور نوکریوں کی عدم موجودگی میں یہ ہمارے لیے سونے سے بھی زیادہ قیمتی ہے،‘‘ کیڑا جڑی جمع کرنے والے انل سنگھ کہتے ہیں۔

اس منافع بخش پھپھوندی کی دریافت سے قبل گاؤں والوں کا گزر بسر زراعت، یومیہ مزدوری یا بھیڑ بکریوں سے ہوتا تھا۔ لیکن اس مشکل اور دشوار گزار علاقہ میں زراعت کوئی قابلِ عمل متبادل نہیں ہے۔ ’’زمین زرخیز نہیں ہے۔ ہم زیادہ تر راجما اور آلو اُگاتے ہیں۔ اگر فصل اچھی ہو جائے، جو کہ شاذ و نادر ہی ہوتی ہے، تو ہم پیداوار کا کچھ حصہ فروخت بھی کر دیتے ہیں۔ عموماً ہم اسے اپنے کھانے پینے کے لیے ہی رکھتے ہیں،‘‘ بھانو سنگھ کہتے ہیں۔ ’’دوسرا متبادل منریگا کے تحت مزدوری ہے لیکن وہ کیڑا جڑی اکٹھا کرنے جتنی سودمند نہیں ہے۔‘‘

بہت سے لوگ روزگار کی تلاش میں ہجرت بھی کرتے ہیں۔ لیکن سونڈی پھپھوندی کی وجہ سے اب وہی گاؤں والے جو پہلے کام کے لیے شہروں کا رخ کرتے تھے، اب ہمالیہ کے بلند و بالا سبزہ زاروں کا رخ کرتے ہیں۔

سنیل جیسے نوجوانوں نے باقی سال میں آمدنی حاصل کرنے کے لیے ٹیکسیاں خرید لی ہیں۔ ’’میں اس موسم میں جنگل میں صرف ۱۶ دن رہا، اور مجھے ۳۰۰ پھپھوندیاں ملیں،‘‘ وہ کہتے ہیں۔ ان کی جمع کردہ پھپھوندی سے انہیں کم از کم ۴۵۰۰۰ روپے کی آمدنی حاصل ہوگی۔ ان کے دوست منو سنگھ نے، جو ہمارے ساتھ سفر کر رہے ہیں، ۵۰۰ عدد پھپھوندیاں جمع کی ہیں۔ ’’میرا ہدف کم از کم ۷۵۰۰۰ روپے حاصل کرنے کا ہے،‘‘ منو مسکراتے ہوئے کہتے ہیں۔

سنیل کے گاؤں میں پھپھوندی کی تجارت سے آنے والی خوشحالی کے آثار ہر جگہ موجود ہیں۔ پہاڑی ڈھلان پر نئے مکان اور دکانیں تعمیر ہو گئی ہیں۔ بہت سے گاؤں والے نیپالی سم کارڈ والے مہنگے اسمارٹ فون رکھتے ہیں۔ ہندوستانی موبائل نیٹ ورک یہاں شاذ و نادر ہی کام کرتے ہیں۔ ’’کیڑا جڑی نے ہماری گھریلو آمدنی میں کئی گنا اضافہ کیا ہے اور ہماری معاشی حالت کو بہتر بنایا ہے۔ ہم بہتر خوراک کے متحمل ہو سکتے ہیں۔ ہم تعلیم اور طبی نگہداشت کے لیے دہرہ دون اور دہلی کے سفر پر بھی جاسکتے ہیں،‘‘ ۱۴ سالہ منوج تھاپا کہتے ہیں۔ انہوں نے تن تنہا ۲۰۱۷ کے سیزن میں۴۵۰ عدد پھپھوندیاں جمع کی تھیں۔

مجھے بتایا گیا ہے کہ گاؤں کے چند نوجوانوں نے سول سروس کے امتحانات کے لیے دہرہ دون میں کوچنگ کلاسز میں شمولیت اختیار کی ہے۔ ان کی فیس کیڑا جڑی سے حاصل شدہ آمدنی سے ادا کی جا رہی ہے۔ اس علاقہ کے بہت سے کنبوں کا تعلق درج فہرست قبائل سے ہے، اور سول سروسز میں شمولیت اختیار کرنا ان میں سے بہتوں کا ایک خواب ہے، جسے ایس ٹی کے لیے مخصوص نشستوں نے کچھ آسانی پیدا کر دی ہے۔ لیکن یہ ایسا خواب ہے جس کی کوچنگ کا خرچ اٹھانا کیڑا جڑی کی تجارت شروع ہونے سے قبل ان کے لیے مشکل تھا۔

جون ۲۰۱۳ میں گلیشیئر سے آنے والے سیلابی پانی نے گاؤں کی زرعی زمین کو کافی نقصان پہنچایا تھا۔ گاؤں والوں کی زندگیاں بہت حد تک پھپھوندی سے ہونے والی آمدنی سے بحال ہو گئیں۔ ’’یہ صرف کیڑا جڑی کی وجہ سے ممکن ہوا،‘‘ بھانو سنگھ کہتے ہیں، جنہوں نے پھپھوندی سے ہونے والی اپنی آمدنی سے ۲۰۱۶ میں اپنی بڑی بیٹی کی شادی کے لیے ایک شاندار تقریب کا انعقاد کیا۔ انہوں نے تین کمروں والا ایک شاندار گھر بھی بنوایا ہے۔

لیکن اس سارے جوش و خروش کا ایک منفی پہلو بھی ہے۔ گزشتہ کچھ سالوں میں، ساتپیر گھاس کا میدان جیسے مشترکہ سبزہ زاروں تک رسائی کو لے کر گاؤوں کے درمیان تشدد اور جھگڑے ہونے لگے ہیں۔ ’’مشترکہ سبزہ زاروں میں ہلدوانی اور لال کنواں سے بھی کئی کنبے کیڑا جڑی جمع کرنے آتے ہیں۔ لہٰذا پھپھوندی کی تعداد فی کنبہ کم ہوتی جا رہی ہے اور لوگ اس سبزہ زاروں تک رسائی کے لیے جھگڑنے لگے ہیں،’’ لال سنگھ کہتے ہیں۔

’’جب بہت زیادہ کنبے ایک ہی علاقے میں پھپھوندی تلاش کرنے آ جاتے ہیں تو ہر کنبے کے حصے میں آنے والی پھپھوندی کم ہو جاتی ہے۔ لیکن ہم جھگڑوں کی شکایت پولیس کو نہیں کرتے، کیونکہ ایسے میں ہم خود جیل پہنچ جائیں گے،‘‘ بھانو سنگھ مزید کہتے ہیں۔ پچھلے سال انہوں نے اور ان کے اہل خانہ نے ساتپیر میں تقریباً ۱۴۰۰ عدد پھپھوندیاں جمع کی تھیں اور انہیں پرانے شیشے کے مرتبانوں میں بھر کر واپس لائے تھے۔ ان کی قیمت کم از کم ۲ لاکھ روپے تھی۔

یارساگُمبا کی مانگ میں ۱۹۹۳ میں مبینہ طور پراس وقت اضافہ ہواجب تین چینی ایتھلیٹس نے بیجنگ نیشنل گیمز میں پانچ عالمی ریکارڈ توڑ دیے۔ کہا جاتا ہے کہ وہ باقاعدگی سے ایک ٹانک پیتے تھے جو غالباً اسی پھپھوندی سے تیار کیا جاتا تھا۔ سال ۱۹۹۹ میں چین نے اس پھپھوندی کو معدوم ہوتی انواع میں شامل کر لیا۔ اس کے فوراً بعد اس پھپھوندی کو چننے کا عمل ہندوستان تک پہنچ گیا۔ ’’۲۰۰۰ کی دہائی [کی شروعات] میں ہم نے تبتی کھامپاؤں کو ہندوستانی سبزہ زاروں میں اس پھپھوندی کو تلاش کرتے دیکھا۔ ان کا کہنا تھا کہ تبتی علاقے میں یہ اب شاذ و نادر ہی ملتے ہیں۔ وہ ہندوستان کے ان چھوئے علاقوں میں پھپھوندی تلاش کرتے اور ہم سے مدد مانگتے تھے،’’ ۴۱ سالہ کرشنا سنگھ کہتے ہیں۔ اُس وقت بازار میں کیڑا جڑی کی قیمت نسبتاً کم تھی، لیکن ۲۰۰۷ کے آس پاس یہ کاروبار نہایت منافع بخش بن گیا اور زیادہ سے زیادہ لوگ اس کی تلاش میں شامل ہونے لگے۔

لیکن غربت کے سائے میں زندگی بسر کر رہے پتھورا گڑھ اور چمولی اضلاع کے تقریباً ۳۰۰ گاؤوں میں پھپھوندی جمع کرنے کی ’دوڑ‘ جلد ہی ختم ہو سکتی ہے۔ کچھ تحقیقی مطالعات میں بتایا گیا ہے کہ موسمیاتی تبدیلیوں اور ضرورت سے زیادہ کیڑوں کو پکڑنے کی وجہ سے آلپی گھاس کے میدانوں پر انسانی قدموں اور ان سے مرتب ہونے والے منفی اثرات میں اضافہ ہوا ہے، اور تبت کے سطح مرتفع سے پھپھوندی کی پیداوار میں گزشتہ تین دہائیوں میں ۱۰ سے ۳۰ فیصد تک کی کمی آئی ہے۔

جس طرح کھامپاؤں کو نئی چراگاہوں کی تلاش تھی، اسی طرح اتراکھنڈ کے پھپھوندی جمع کرنے والوں کو بھی نئے مقامات کی تلاش کرنا پڑ رہی ہے۔ گاؤں والوں کا کہنا ہے کہ چند سال پہلے کم اونچائیوں پر آسانی سے دستیاب ہونے والی پھپھوندی اب زیادہ بلندی پر پائی جاتی ہے۔ ’’ہمیں اتنی کیڑا جڑی نہیں ملتی جتنی ہم ۱۰ سال پہلے حاصل کرتے تھے،’’ لال سنگھ کہتے ہیں۔ ’’آئندہ کچھ سالوں میں، شاید ہمیں ان مقامات پر کچھ نہیں ملے گا، جہاں ہم اس وقت اکثر آتے ہیں۔ ہمیں اوپر اور اوپر کی جانب بڑھتے رہنا پڑے گا۔‘‘

حکومت اتراکھنڈ تجارت کو منظم کرنے اور پھپھوندی کے زیادہ استحصال کو روکنے کی کوشش کر رہی ہے۔ اتراکھنڈ کے چیف کنزرویٹر آف فاریسٹ رنجن مشرا کہتے ہیں، ’’ہم نے مرکز کو ایک نئی تجویز بھیجی ہے۔ ہم پھپھوندی جمع کرنا اور فروخت کرنا نہیں روک سکتے۔ ہم صرف اسے بہتر پالیسیوں کے ذریعہ منظم کرسکتے ہیں، تاکہ ریاست اور عوام دونوں اس سے فائدہ اٹھا سکیں۔‘‘

مشرا کا کہنا ہے کہ نئی پالیسی کے تحت ہر پھپھوندی جمع کرنے والے کو وَن پنچایت (دیہی برادری کے زیر انتظام چلنے والی جنگلاتی کونسل) یا فاریسٹ رینج آفس میں ان کے آدھار یا ووٹر شناختی کارڈ کے ساتھ رجسٹر کرنے کی تجویز ہے۔ کیڑا جمع کرنے والا شخص بتائے گا کہ وہ کیڑا جڑی جمع کرنے جنگل کے کس مخصوص علاقہ میں جائے گا اور کتنے دن گزارے گا۔ اسے یہ بھی ظاہر کرنا ہوگا کہ اس نے کتنی رقم جمع کی ہے۔ ’’ہر ۱۰۰ گرام پھپھوندی کے لیے محکمہ جنگلات ۱۰۰۰ روپے کی رائلٹی وصول کرے گا۔ پھر خریدار انہیں وَن پنچایتوں یا کسی تیسرے فریق کو فروخت کرنے کے لیے آزاد ہوگا، اور انہیں فروخت کرنا قانونی ہو جائے گا،‘‘ مشرا کہتے ہیں۔ ’’آلپی گھاس کے میدان ماحولیاتی طور پر نازک ہوتے ہیں۔ اس لیے جب یہ پالیسی نافذ ہو جائے گی، تو ہمیں معلوم ہو جائے گا کہ ریاست میں کیڑا جڑی کی کتنی چنائی ہوتی ہے، اور اس خطہ میں کیا ہو رہا ہے۔‘‘

دریں اثنا، بڑھتی ہوئی مانگ اور پھپھوندی کو تلاش کرنے میں درپیش مشکلات کی وجہ سے پچھلی دہائی کے دوران بازار میں اس کی قیمت میں کئی گنا اضافہ ہوا ہے، اور پھپھوندی جمع کرنے والوں کے لیے اسے زیادہ پرکشش بنا دیا ہے۔

ترجمہ نگار: شفیق عالم