مغربی گھاٹ: پہاڑی دراڑیں مکینوں کو ڈرا رہی ہیں

میموریل (یادگار) کا لوہے کا دروازہ آج بھی کھڑا ہے، لیکن اس کے آگے کوئی گاؤں نہیں ہے۔

اب وہاں صرف ایک ویران اسکول بچا ہے، جس کے قریب ہی بیسالٹ پتھر کی سیڑھیاں پہاڑی پر اوپر کی طرف جاتی ہیں، جہاں کبھی ۷۰ کنبے رہتے تھے – مہاراشٹر کے مغربی گھاٹ میں آباد مالن گاؤں میں۔ اب اس میموریل کے آس پاس لگے درختوں کے درمیان صرف ہوا کی سرسراہٹ سنائی دیتی ہے، اسی جگہ جہاں ۳۰ جون ۲۰۱۴ کو زمین کا تودہ کھسکنے سے ۱۵۱ لوگوں کی جان چلی گئی تھی۔

رگھوناتھ جھانجرے (۶۲ سالہ) اُس میموریل کے پاس کھڑے ہیں، جس پر مذکورہ حادثہ کے دوران مارے گئے تمام لوگوں کے نام کندہ ہیں۔ وہ انگلیوں سے حروف کو چھوتے ہوئے بلند آواز میں پڑھتے ہیں، ’’جنا بائی دگڈو جھانجرے۔‘‘ پھر کہتے ہیں، ’’میری ماں۔‘‘

وہ کچھ وقفہ کے لیے رکتے ہیں اور یادوں میں کھو جاتے ہیں۔ رگھوناتھ، آمبے گاؤں بازار میں ایک چھوٹی پنساری کی دکان چلاتے ہیں اور بنیادی جگہ سے چند کلومیٹر کے فاصلہ پر ریاستی حکومت کے ذریعہ بسائے گئے نئے مالن گاؤں میں رہتے ہیں۔ لیکن ۲۰۱۴ میں وہ پونے شہر میں رہتے تھے اور وہیں کام کرتے تھے۔

رگھوناتھ کہتے ہیں، ’’میرے بھائی نے اُس دن کا پورا واقعہ مجھے بتایا تھا۔ صبح کے تقریباً سات بجے تھے۔ میرے والد کھیت پر جا چکے تھے۔ میری ماں گھر پر تھیں اور چائے پی رہی تھیں۔ میرا بھائی ایک اسکول میں کام کرتا تھا۔ ماں نے اس سے کہا تھا، ’جانے سے پہلے کچھ کھا لو۔‘ وہ جیسے ہی گھر سے باہر نکلا، اس کی پیٹھ پر گیلی مٹی کا ایک زوردار تھپڑ پڑا۔ اس نے مڑ کر دیکھا کہ پہاڑی گر رہی تھی۔ کیچڑ بھرے پانی، درختوں اور ہر چیز کی ایک گرجتی ہوئی لہر اُس طرف آ رہی تھی۔ وہ جان بچا کر بھاگا۔ وہ اور کر بھی کیا سکتا تھا۔ میری ماں کے بچنے کی کوئی امید ہی نہیں تھی۔‘‘

کچھ ہی سیکنڈوں میں مالن پوری طرح ختم ہو گیا تھا۔ ہندوستانی ارضیاتی سروے (جی ایس آئی) کی نومبر ۲۰۱۴ کی ایک رپورٹ کے مطابق، یہ ایک ’ڈیبریز سلائڈ‘ تھی، یعنی پہلے سے غیر مستحکم ڈھلانوں پر شدید بارش کے سبب ڈھیلی مٹی اور چٹانوں کے ٹکڑوں کا تیزی سے کھسکنا۔ انسانی سرگرمیوں کی وجہ سے یہ حالت اور بھی خطرناک ہو گئی تھی۔ کئی دنوں کی مسلسل بارش نے مٹی کو پوری طرح بھگو دیا تھا۔ نیچے آتش فشانی چٹان ہونے کی وجہ سے پانی کے نکلنے کا کوئی راستہ نہیں تھا، جب تک کہ پوری پہاڑی ہی ڈھے نہیں گئی۔

ہندوستان کے کل زمینی رقبہ کا تقریباً صفر اعشاریہ ۴۲ ملین مربع کلومیٹر، یعنی ۶ء۱۲ فیصد حصہ (برفیلے علاقوں کو چھوڑ کر)، زمین کا تودہ کسھکنے کا خطرہ کے زمرہ میں آتا ہے۔ اس میں سے ۰۹ء۰ ملین مربع کلومیٹر کا رقبہ مغربی گھاٹ اور کونکن کی پہاڑیوں میں ہے۔

تقریباً ۱۲ سال بعد، ۲۰۲۶ میں، مالن میموریل سے چند کلومیٹر دور ایک اور گاؤں اُسی خطرے کے سایہ میں زندگی بسر کر رہا ہے۔ پسار واڑی، جہاں مہادیو کولی قبیلہ کے ۳۵ کنبے رہتے ہیں، پونے ضلع کے آمبے گاؤں تعلقہ میں ایک کھڑی ڈھلان سے ملحقہ آباد ہوا ہے۔

پھسا بائی بالچِم کہتی ہیں، ’’اب یہ پہاڑی مجھے ڈرانے لگی ہے۔‘‘ پھسا بائی بالچم سے اس رپورٹر کی ملاقات اگست ۲۰۲۵ میں ہوئی تھی۔ وہ اپنے اینٹ اور لکڑی سے بنے گھر کے باہر تقریباً دو فٹ گہری دراڑ کے پاس کھڑی ہیں۔ ’’یہ بھیگ [دراڑ] گزشتہ اگست [۲۰۲۴] میں پڑی تھی۔ اس کے ارد گرد گھاس اُگ آئی ہے۔‘‘ زمین میں پڑنے والی دراڑیں زمین کا تودہ کھسکنے کے ابتدائی اشاروں میں سے ایک تصور کی جاتی ہیں، جو ڈھلان کے غیر مستحکم ہونے کی پہچان ہے۔

پھسا بائی اور ان کے شوہر منوہر، کسان ہیں اور سیزن کے حساب سے زرعی مزدوری بھی کرتے ہیں۔ ان کے خاندان کی چار نسلیں اسی گھر میں رہی ہیں، جس نے انہیں ہمیشہ تحفظ اور سہارا فراہم کیا ہے۔ لیکن ۳۷ سالہ پھسا بائی کو اب وہ سکون محسوس نہیں ہوتا۔

’’میرا بیٹا یہاں پیدا ہو کر اقامت اختیار کرنے والی چوتھی نسل ہے۔ پہلے یہ جگہ ہمیشہ محفوظ لگتی تھی۔ لیکن اب یہ کہنا مشکل ہے کہ آگے کیا ہوگا۔ سگل ڈونگر ڈھاسل توئے جس [ایسا لگتا ہے جیسے پوری پہاڑی ڈھہنے کے لیے تیار کھڑی ہو]۔‘‘

انہیں شک ہے کہ یہ دراڑ نیچے سڑک کی تعمیر کے دوران پڑی ہے۔ زیر تعمیر یہ سڑک پسار واڑی کو آمبے گاؤں بازار سے جوڑے گی، جس سے گاڑیوں کی آمد و رفت اور سفر دونوں آسان ہو جائیں گے۔

وہ کہتی ہیں، ’’سڑک کے لیے مٹی بچھانے سے پہلے پیڑ اور جھاڑیاں صاف کر دی گئیں۔ زمین اُگھڈی پڈلی نا [زمین تو پوری ننگی پڑی ہے]۔‘‘

بارش بھی اب بدل گئی ہے۔ ’’میں یہاں ۳۰ سال سے رہ رہی ہوں، لیکن ایسی بارش پہلے کبھی نہیں دیکھی۔ یہ ایک ساتھ، بہت تیز اور بغیر رکے ہوتی ہے۔ ہر سال یہ ہمیں مالن کی یاد دلا دیتی ہے۔‘‘

یہ خطرہ کوئی وہم نہیں ہے۔ جیسے جیسے آب و ہوا گرم ہو رہی ہے، فضاؤں میں نمی کی مقدار بھی بڑھ رہی ہے۔ پونے میں واقع گوکھلے انسٹی ٹیوٹ کے سنٹر فار سسٹین ایبل ڈیولپمنٹ کے ڈائرکٹر، ڈاکٹر گروداس نُلکر کہتے ہیں، ’’بارش کی مقدار اور بارش کا وقت، دونوں بدل گئے ہیں۔ جتنی بارش پہلے تین مہینوں میں ہوتی تھی، اب وہ صرف دو ہفتوں میں ہو جاتی ہے۔‘‘ وہ مزید بتاتے ہیں کہ بارش کے بدلے ہوئے پیٹرن اور بے قابو تعمیراتی کام زمین کا تودہ کھسکنے کے بڑھتے خطرے کی بنیادی وجہ ہیں۔ (پڑھیں: تھانے میں بارش شرارتی ہو گئی ہے)

پسار واڑی کی ڈھلان پر اور نیچے، پھسا بائی کے پڑوسی جاوجی بالچِم گھروں کے پیچھے پڑے بڑے بڑے پتھروں کی طرف اشارہ کرتے ہیں، جن میں سے کچھ ان کے گھٹنوں تک اور کچھ کمر تک اونچے ہیں۔ تقریباً ۸۰ سال کے کسان جاوجی کہتے ہیں، ’’یہ پتھر پچھلے سال ہی نیچے آئے تھے۔ چھوٹے پتھر پیڑوں میں پھنس گئے اور یہ بڑے بڑے پتھر نیچے آ گرے۔ ابھی تک انہوں نے کسی کا گھر نہیں توڑا ہے۔‘‘

پسار واڑی کے گھر – ہلکے اور کچی اینٹوں سے بنے ڈھانچے – بالکل ویسے ہی دکھائی دیتے ہیں جیسے کبھی مالن میں موجود کمزور گھر ہوا کرتے تھے۔ ایک دہائی بعد بھی یہاں کے کنبوں کے پاس کوئی مضبوط بنیادی ڈھانچہ نظر نہیں آتا۔ گرتے پتھروں کو روکنے کی امید میں ڈھلان کے کنارے لکڑی کی باڑ لگائی گئی ہے۔

جاوجی کہتے ہیں، ’’پہلے ایسا نہیں تھا۔ لیکن جب سے سڑک کا کام شروع ہوا ہے، پوری ڈھلان ڈھیلی سی لگنے لگی ہے۔ وہ لگاتار کھدائی کرتے ہیں اور مٹی پھینکتے رہتے ہیں۔ ہم نے پوری زندگی یہیں گزاری ہے۔ اب تو اپنے ہی گھر کے اندر ڈر لگتا ہے، یہ جگہ محفوظ نہیں لگتی۔‘‘ جاوجی اور ان کی بیوی یمنا بائی اپنے ایک گُنٹھا سے کم، یعنی تقریباً ۰۲۵ء۰ ایکڑ زمین پر ۲ سے ۳ کوئنٹل دھان اُگاتے ہیں۔ اس کے علاوہ، وہ زرعی مزدوری کرتے ہیں اور پونے میں رہنے والے اپنے بیٹوں کے ذریعہ بھیجے گئے پیسوں سے گھر کا خرچ چلاتے ہیں۔

یمنا بائی بالچم دھیمی آواز میں کہتی ہیں، ’’ہمارے بچے اب پونے میں رہتے ہیں۔ وہ کہتے ہیں کہ دراڑوں اور ڈر کی وجہ سے وہ واپس نہیں آنا چاہتے۔ گھر کے یہ دو کمرے ان کے لیے بنائے گئے تھے، لیکن اب یہاں بس ہم ہی رہ گئے ہیں، بوڑھے اور پیچھے چھوٹے ہوئے۔‘‘

پسار واڑی اکیلا نہیں ہے۔ گرد و نواح کے گاؤوں میں بھی پہاڑیوں پر اسی قسم کی دراڑیں سانپ کی طرح پھیلی ہوئی ہیں اور ہر دراڑ ایک اندیکھی وارننگ ہے۔ ضلع کے اور بھی کئی گاؤوں کو باضابطہ طور پر ’مٹی کے تودے کھسکنے کے بحران سے گھرا‘ قرار دیا گیا ہے۔ لیکن ایسے گاؤوں کی صحیح تعداد کتنی ہے؟ خود سرکاری ایجنسیاں بھی آپس میں متفق دکھائی نہیں دیتیں۔ پونے ڈسٹرکٹ ڈیزاسٹر مینجمنٹ پلان ۲۰۲۵-۲۶ میں ۲۳ گاؤوں کو ’مٹی کے تودے کھسکنے کے بحران سے گھرا‘ بتایا گیا ہے، جب کہ مہاراشٹر کے لینڈ سلائڈ مینجمنٹ پلان ۲۰۲۴ (جاری مسودہ) میں یہ تعداد ۹۰۸ بتائی گئی ہے۔ ان گاؤوں میں رہنے والے لوگوں کے لیے یہ فرق صرف کاغذی نہیں ہے، بلکہ اسی سے طے ہوتا ہے کہ کسے نگرانی والی فہرست، ابتدائی وارننگ اور باز آبادکاری کے دائرے میں رکھا جائے گا۔

پسار واڑی سے تقریباً سات کلومیٹر دور پنچال خورد میں، سنگیتا لکشمن مینڈے اور اندو بائی بالو پوٹے کو بھی ایسا ہی ڈر ستا رہا ہے۔ جب پاری کی ٹیم ان سے ملنے پہنچتی ہے، تو وہ اپنے کھیت کا کام روک کر پریشان کر دینے والی تبدیلی دکھاتی ہیں، جو انہوں نے دیکھی ہے۔ یہی کنبے اپنے گھروں کے اوپر ڈھلان پر چھوٹے چھوٹے دکھان کے کھیتوں ک سیڑھی نما کیاریاں بنا کر کھیتی کرتے ہیں؛ ان کے نیچے پہاڑی اکثر تیزی سے ڈھلان لیتے ہوئے وادی سے گزرنے والی سڑکوں کی طرف اتر جاتی ہے۔ تقریباً ۳۲ سال کی سنگیتا کہتی ہیں، ’’یہ برگد کا درخت پہلے مضبوطی سے کھڑا رہتا تھا۔ اب یہ نیچے کی طرف کھسک گیا ہے۔ زمین جتی واٹتے [زمین زندہ سی لگتی ہے]۔ جیسے وہ ہمارے پیروں کے نیچے ہل رہی ہو۔‘‘

اندو بائی دھیمی آواز میں کہتی ہیں، ’’اب یہاں کام کرنا خطرے سے خالی نہیں لگتا۔ میری پوری زندگی میں یہ زمین مضبوط رہی ہے، لیکن اب ہر تیز بارش کے بعد یہ کانپنے لگتی ہے۔‘‘

سال ۲۰۲۳ میں جاری لینڈ سلائڈ ایٹلس آف انڈیا کے مطابق، ۲۰۲۱ تک مہاراشٹر میں ۵۱۱۲ سے زیادہ زمین کے تودے کھسکنے کے واقعات درج کیے گئے۔ مالن کے بعد کے برسوں میں بھی تلیے (۲۰۲۱) اور اِرشال واڑی (۲۰۲۳) گاؤوں میں آنے والی آفات میں ۱۱۴ لوگوں کی جان جا چکی ہے۔ پھسا بائی اور جاوجی جیسے گھاٹ کے علاقہ والے رہائشیوں کے درمیان یہ احساس تیز ہوتا جا رہا ہے کہ ریاستی حکومت نے خاموشی کے ساتھ ان سے منہ موڑ لیا ہے۔

پسار واڑی، پنچال خورد اور آس پاس کے گاؤوں کے خاندان، نسلوں سے پہاڑی ڈھلانوں پر دھان اور سبزیاں اُگاتے آ رہے ہیں۔ زمین کے تودے کھسکنے کا خطرہ صرف ان کے گھروں پر ہی نہیں، بلکہ ان کے معاش پر بھی منڈلا رہا ہے۔ گاؤں والوں کا کہنا ہے کہ انہوں نے بار بار انتظامیہ کو بڑھتی ہوئی دراڑوں کے بارے میں بتایا ہے، لیکن نہ تو کوئی افسر وہاں معائنہ کرنے آیا اور نہ ہی کوئی روک تھام کی تدبیر کی گئی ہے۔ پھسا بائی پرامید آواز میں کہتی ہیں، ’’نقل مکانی تو ہوگی۔ بس یہیں، اسی پہاڑی کے اوپر۔‘‘

آمبے گاؤں کے تحصیل دار سنجے ناگ تلک نے اس رپورٹر سے فون پر بات چیت میں تصدیق کی ہے کہ باز آبادکاری کے لیے اسی پہاڑی کی چوٹی کی تجویز پیش کی گئی ہے، اسی ڈھلان کے اوپر جہاں پہلے سے دراڑیں دکھائی دے رہی ہیں۔ انہوں نے کہا، ’’ہم نے زمین خرید لی ہے، لے آؤٹ تیار کر لیے ہیں اور اب سی ایس آر تعاون یا پنچایت کمیٹی کے توسط سے فنڈ کا انتظام کرنے کا عمل جاری ہے۔ جیسے ہی یہ کام مکمل ہو جائے گا، باز آبادکاری شروع ہو جائے گی۔‘‘

اس رپورٹر نے اگست ۲۰۲۵ میں ہندوستانی ارضیاتی سروے (جی ایس آئی) کے پونے دفتر کا بھی دورہ کیا تھا۔ جی ایس آئی وہ ایجنسی ہے جس پر زمین کے تودے کھسکنے کی جانچ اور جوکھم کو کم کرنے کے طریقوں کا منصوبہ بنانے کی ذمہ داری ہے۔ دورہ کے دوران اور بعد میں ای میل اور فون کال کے ذریعہ اس رپورٹر نے سوال اٹھائے کہ حساس علاقوں میں سڑکوں اور دیگر بنیادی ڈھانچوں کی تعمیر کا سائنسی تجزیہ ایجنسی کس طرح کرتی ہے۔ اور اگر پسار واڑی کی باز آبادکاری ایسی پہاڑی پر متوقع ہے، جہاں پہلے سے دراڑیں موجود ہیں، تو اس کی حفاظت کو یقینی بنانے کے لیے کن طریقوں کا استعمال کیا گیا ہے۔ اشاعت کے وقت تک جی ایس آئی کی طرف سے جواب کا انتظار ہے۔

ایک اہم مداخلت، جو مددگار ثابت ہو سکتی ہے، لیکن اب تک لاگو نہیں کی گئی، وہ ہے سہیادری کے کوہستانی سلسلہ کی چوٹی پر خودکار طریقہ سے چلنے والے بارش کے پیمائشی آلات کو نصب کرنا۔ ڈاکٹر نُلکر کہتے ہیں، ’’ہاتھ سے چلنے والے پیمائشی آلات کسی کام کے نہیں ہیں۔ ہمیں حقیقی وقت میں [ہر لمحہ] الرٹ کی ضرورت ہے۔ اگر اوپر ۱۵۰ ملی میٹر بارش ہوتی ہے، تو فوراً کلکٹر آفس کو اطلاع ملنی چاہیے۔ اس سے ایک یا دو گھنٹے کا وقت ملتا ہے لوگوں کو نکالنے کے لیے۔ اس طرح زیادہ جانیں بچائی جا سکتی ہیں۔‘‘

قدرتی آفات کے خطرات کو کم کرنے میں خودکار نگرانی اور ابتدائی آگاہی کے نظام بہت اہم ہیں۔ نُلکر مزید کہتے ہیں، ’’ماحولیاتی تبدیلی سے نمٹنے کے لیے ایک جامع نظام پر مبنی نظریہ کی ضرورت ہے۔ جی ایس آئی، ڈیزاسٹر مینجمنٹ، آبپاشی اور دیہی ترقیاتی محکموں کو مل کر کام کرنا ہوگا۔ اب پرانے طریقوں سے کام نہیں چل سکتا۔‘‘

جب تک ایسا نہیں ہوتا، پسار واڑی اور اس کے جیسے سینکڑوں گاؤوں کی کہانی وہی رہے گی، دراڑیں مزید گہری ہوں گی، پہاڑ اور کمزور ہوں گے اور اندیکھی کے بوجھ تلے لوگوں کی آواز دبتی چلی جائے گی۔

پھسا بائی مایوسی بھری آواز میں کہتی ہیں، ’’سال ۲۰۱۴ کے اُس دن ہم سب نے ایک آواز سنی تھی، جیسے کوئی بہت بڑا بم پھٹ گیا ہو۔ ہم آواز سن کر باہر بھاگے اور سوچتے رہے کہ آخر ہوا کیا۔ میں بار بار مالن کے بارے میں سوچتی رہتی ہوں۔ بھیگالیلا ڈونگر وِسروچ دیت ناہی [دراڑوں والی پہاڑی ہمیں بھولنے ہی نہیں دیتی]۔‘‘

ترجمہ نگار: قمر صدیقی