दरकत माटी, उजरत घाटी, बदलत मऊसम के तबाही

स्मारक (सुरता मं बने) के लोहा के गेट अभू घलो ठाढ़े हवय, फेर ओकर आगू कोनो गाँव नइ ये.

जेन बांचे हवय वो ह एक ठन सुन्ना स्कूल आय जेकर बगल ले होके पथरा वाले सीढ़ी एक ठन डोंगरी कोती जाथे, जिहां कभू 70 ठन परिवार रहत रहिन - महाराष्ट्र के बूड़ति घाट में बसे मालिन गाँव मं. अब सिरिफ मेमोरियल के चरों डहर रुख-रई मन ले हवा के सरसराहट आथे, जिहां 30 जून, 2014 के दिन जमीन धसके ले 151 लोगन के परान चले गीस.

62 बछर के सियान रघुनाथ झांझरे तउन स्मारक के तीर ठाढ़े हवंय, जेन मं जान गंवाय सब्बो लोगन मन के नांव लिखाय हवय. वो अपन हाथ ले आखर मन ला छुवत जोर ले पढ़थे,” जनाबाई दगडू झांझरे. मोर महतारी.”

वो ह सुरता करे लागथे. रघुनाथ अंबेगांव बजार मं एक ठन नान-कन किराना के दुकान चलाथे अऊ मूल गाँव ले कुछेक कोस दूरिहा राज सरकार डहर ले बनाय गे नवा मालिन गाँव मं रहिथे. फेर साल 2014 मं वो ह पुणे शहर मं रहत रहिस अऊ काम करत रहिस.

रघुनाथ कहिथे, “मोर भाई ह मोला वो घटना ला बताय रहिस. बिहनिया के करीबन 7 बजत रहिस. मोर ददा ह खेत गे रहिस. वो अऊ मोर दाई घर मं चाय पीयत रहिन. मोर भाई स्कूल मं काम करत रहिस. दाई ह वोला कहिस, ‘जाय के पहिली कुछु खा लेबे.’ वो ह घरले निकरेच रहिस के चिखला के छिटका ओकर पीठ मं लगिस. वो ह मुड़ गे- अऊ देखथे के डोंगरी धसकत हवय. माटी-चिखला वाले पानी, कतको रुख-रई, जम्मो कोती ले बोहावत हवय. वो ह अपन परान बचाय भर भागिस. वो अऊ करे घलो काय सकतिस? मोर महतारी करा बांचे के कोनो उपायच नइ रहिस.”

घड़ी भर मं मालिन गाँव नंदा गे. जियोलॉजिकल सर्वे ऑफ इंडिया (जीएसआई) के नवंबर 2014 के एक ठन रिपोर्ट मं कहे गे रहिस के ये ह एक ठन 'डेब्रिस स्लाइड' (माटी, बड़े पथरा, रुख-रई, कचरा के मलवा रपट के गिरे) रहिस, जेन ह पहिलीच ले अस्थिर ढलान सेती फीले माटी अऊ पथरा मन के तेजी ले खसके सेती होय रहिस. लोगन मन के काम-धाम ह येला अऊ खराब कर दे रहिस. कतको दिन तक ले सरलग बरसा ले पानी भरे रहिस. येकर तरी ज्वालामुखी चट्टान होय सेती, पानी निकासी नइ होय सकिस- जब तक के डोंगरी धसक नइ गीस.

देस के (भारत) जम्मो जमीन के एरिया के करीबन 0.42 मिलियन वर्ग किलोमीटर धन 12.6 फीसदी (बर्फ मं ढंके एरिया ला छोड़के) भूस्खलन के चपेट मं हवय. ये मं 0.09 मिलियन वर्ग किलोमीटर बूड़ति घाट अऊ कोंकण के डोंगरी मन मं हवय.

करीबन 12 बछर बाद साल 2026 मं, मालिन स्मारक ले कुछेक कोस दूरिहा, एक ठन अऊ गाँव उपर इहीच खतरा बने हवय. पसारवाड़ी, जिहाँ 35 ठन महादेव कोली आदिवासी परिवार हवंय, पुणे के आंबेगाँव तालुका मं एक ठन डोंगरी के ढलान मं बसे हवय. “ ये डोंगरी ले मोला डेर्रावत रहिथे,” फसाबाई बालचिम कहिथे, जेकर ले ये रिपोर्टर ह अगस्त 2025 मं भेंट करे रहिस. वो अपन ईंटा अऊ लकरी ले बने घर के बहिर दू फूट के भरका/ भोरका करा ठाढ़े हवय. ये भेग (भरका/ भोरका) बीते अगस्त 2024 मं दिखे रहिस. येकर चरों कोती बन–कांदी जाम गे हवय. भूंइय्या मं भोरका सुरु के चेताय के आरो मन ले एक ठन आय जेन ह ढलान के अस्थिर होय ला उजागर करथे.

फसाबाई अऊ ओकर घरवाला मनोहर किसान आंय अऊ सीजन के मुताबिक बनिहारी घलो करथें. ओकर चार पीढ़ी ये घर मं रहत हवय, जेन ह वोला ठीहा अऊ आसरा दीस. फेर 37 बछर के फसाबाई ला अब इहाँ मन नइ लगय. ”मोर बेटा चौथा पीढ़ी के आय जेन ह इहाँ जनम लीस अऊ इहींचे रहिथे. हर घड़ी बने लगत रहय. फेर अब कहना मुस्किल आय के आगू काय होही. सगला डोंगर धसल तोई जसो [अइसने लागथे के डोंगरी धसके ला अगोरत हवय].”

वो मन ला संदेहा हवय के तरी मं रोड बनाय के बखत भोरका परे होही. जउन रोड बनत हवय, वो ह पसारवाड़ी ला अंबेगांव बजार ले जोड़ही, जेकर गाड़ी घोड़ा बर रद्दा बनही अऊ आय जाय मं सुभीता होही. वो ह कहिथे, “वो मन गिट्टी बिछाय बर रुख-रई मन ला काट दीन. जमीन उखड़ी पड़ी ना [ माटी भीतरी ले पोंडा होगे रहिस].”

बरसा घलो बदल गे हवय. “मंय इहाँ 30 बछर ले रहत हवं, फेर पहिली कभू अइसने बरसा देखे नइ रहंय. झड़ी धरे रहिथे. ये ह हरेक बछर हमन ला मालिन के सुरता कराथे.”

ये खतरा ह मन के भरम नो हे. जइसने-जइसने मऊसम तिपत जावत हवय, हवा मं नमी बढ़त जावत हवय. पुणे के गोखले इंस्टीट्यूट मं सेंटर फॉर सस्टेनेबल डेवलपमेंट के डायरेक्टर डॉ. गुरुदास नुलकर कहिथें, “बरसा के मात्रा अऊ बखत बदलगे हवय. पहिली तीन महीना मं जतक पानी गिरत रहिस, अब सिरिफ दू हफ्ता मं गिर जाथे.” वो ह बतावत जाथे के बरसा के बदलत तरीका अऊ बे रोक-टोक के कंस्ट्रक्शन, जमीन धसके के बढ़त खतरा के बड़े कारन आय ( पढ़व: अब बरसा के कोनो भरोसा नइ ये)

पासवाड़ी के ढलान के थोकन तरी, फसाबाई के परोसी जावजी बालचिम, घर मन के पाछू परे बड़े-बड़े पथरा कोती आरो करथे, जेन ह जावजी के माड़ी जतक ऊँच हवंय अऊ कुछु त ओकर जंघा तक छू जाथे. 80 बछर के सियान किसान कहिथे, “ ये पथरा मन बीतेच बछर उपर ले गिरके आय हवंय. नान-नान पथरा रुख मन मं अरझ गीन अऊ बड़े पथरा मन तरी मं आ गीन. अब तक ले ककरो घर येकर ले टूटे नइ ये.”

पसारवाड़ी के घर - हल्का, माटी के ईंटा ले बने नींव – तउन कमजोर घर जइसनेच दिखथें जेन ह कभू मालिन मं होवत रहिस. दस बछर बाद घलो, इहाँ के लोगन मन करा कोनो मजबूत ढांचा नइ ये, अऊ वो मन अब डोंगरी के लकरी के बाड़ा के भरोसे हवंय, जेन ह गिरत पथरा मन ला रोके के कोसिस भर आय जेन ह काम नइ आय.

जावजी कहिथे, “पहिली अइसने नइ रहिस. फेर जब ले रोड के काम सुरु होय हवय, ढलान के माटी मं पकड़ नइ ये. वो मन सरलग खनत हवंय अऊ माटी निकारत हवंय. हमन अपन सरी जिनगी इहींचे गुजारे हवन, अब हमन ला अपन घर भीतरी घलो सुरच्छित नइ लगय.” जावजी अऊ ओकर सुवारी यमुनाबाई अपन एक गुंठा (0.025 एकड़) ले घलो कम खेत मं 2-3 क्विंटल धान कमाथें. बाकी के आमदनी बनिहारी अऊ पुणे ले बेटा मन के भेजे कुछु पइसा आय, जेकर ले गुजारा हो जाथे.

यमुनाबाई बालचिम धीरे गोठियाथे. “ हमर लइका मन अब पुणे मं रहिथें. वो मन कहिथें के भरका परे अऊ डर सेती वो मन लहूटे ला नइ चाहंय.घर के ये दू ठन खोली ओकर मन बर बनाय गे रहिस, फेर अब हमन दूनों बुढ़वा इहींचे अकेल्ला रहिगे हवन.”

पसारवाड़ी भर नइ ये. लकठा के गाँव मन मं घलो, डोंगरी मं अइसने भोरका बगरे परे हवय, हरेक अनदेखी के चेतावनी के आरो आय. जिला के अऊ घलो कतको गाँव ला सरकारी रूप मं 'भूस्खलन संभावित' के रूप मं चिन्हारी करेगे हवय. आखिर कतक? सरकारी विभाग घलो एक दूसर ले सहमत नजर नइ आवंय. पुणे जिला आपदा प्रबंधन योजना 2025 -26 मं 23 ठन गाँव ला 'भूस्खलन संभावित' के रूप मं चिन्हारी करेगे हवय, ये आंकड़ा महाराष्ट्र के भूस्खलन प्रबंधन योजना 2024 मं चिन्हारी करेगे 908 गाँव ले बनेच अलग हवय. ये गाँव के लोगन मन बर, ये फेरफार सिरिफ कागजी नो हे – ये ह तय करथे के कोन ला निगरानी, सुरवाती चेतावनी अऊ आने जगा बसाय बर लिस्ट मं जोड़े जाही.

पसारवाड़ी ले करीबन ढाई कोस दूरिहा पांचाल खुर्द मं, संगीता लक्ष्मण मेंढे अऊ इंदुबाई बालू पोटे के घलो इही चिंता आय. जब पारी वो मन ले मिले गे रहिस, त वो मन अपन खेत के बूता छोड़के हमन ला वो मन हलाकान करेइय्या बदलाव ला दिखाथें जेन ला वो मन देखे हवंय. इहाँ के लोगन मन अपन घर के उपरी ढलान मं नान-नान धान के डोली बनाथें. ओकर खाल्हे, डोंगरी घाटी ले होक जावत रोड मं तेजी ले गिरथे. 32 बछर के संगीता कहिथे, ये बरगद के रुख पहिली मजबूत ठाढ़े रहिस, अब तरी डहर खसक गे हवय. जमीन जीती वाटटे [“अब इहाँ बूता करे बने (सुरच्छित) नइ लागय.ये भूइय्या मोर सरी जिनगी थिर रहे हवय. अब हरेक बरसा के बाद कांपे ला लागथे,” इन्दूबाई धीरे ले कहिथे.

साल 2023 मं जारी देस (भारत) के लैंडस्लाइड एटलस के रिपोर्ट के मुताबिक, साल 2021 तक महाराष्ट्र मं 5,112 ले जियादा भूस्खलन दरज करेगे हवय. मालिन के बाद के कतको बछर में घलो, तालिये (2021) अऊ इरशालवाड़ी (2023) गाँव के बड़े आपदा मन मं 114 लोगन के जान चले गे. फसाबाई अऊ जावजी जइसने गति के बासिंदा मन ला लागत हवय के राज सरकार कलेचुप अपन पांव खींच ले हवय.

पासवाड़ी,पांचाल खुर्द अऊ ओकर तीर-तखार के गाँव मन मं लोगन मन कतको पीढ़ी ले डोंगरी के ढलान मं धान अऊ साग-भाजी कमावत हवंय. जमीन धसके ले न सिरिफ ओकर मन के घर-दुवार फेर रोजी-रोटी उपर घलो खतरा हवय. गाँव के लोगन मन के कहना आय के वो मन अफसर मन ला बढ़त भरका ला लेके घेरी बेरी चेताय हवन, फेर कोनो घलो अफसर मऊका जाँच करे धन बचाय के उपाय बर नइ आइस. “आने जगा जाके बसेच ला परही. बस इहींचे, इही डोंगरी के उपर डहर,” फसाबाई आस धरे कहिथे.

अंबेगांव के तहसीलदार संजय नाग तिलक ह फोन मं ये रिपोर्टर ला बताइस के उही डोंगरी उपरी लोगन मन ला बसाय के प्रस्ताव हवय, जेन ढलान मं भोरका परे के चिन्हा दिखत हवय. वो ह कहिथे, “ हमन जमीन बिसो ले हवन, लेआउट तियार हवय, अऊ अब सीएसआर कंट्रीब्यूशन धन पंचायत समिति के जरिया ले फंड जुटाय के काम चलत हवय. ये सब्बो हो जाय के बाद लोगन मन ला बसाय जाही..”

ये रिपोर्टर ह अगस्त 2025 मं जियोलॉजिकल सर्वे ऑफ इंडिया (जीएसआई) के पुणे ऑफिस घलो जाय रहिस.जीएसआई वो विभाग आय जउन ह जमीन धसके के जाँच करे अऊ बचाव के उपाय बनाय बर जिम्मेवार आय. जाय बखत अऊ बाद मं मेल अऊ फोन करके, ये रिपोर्टर ह ये सवाल करिस के ये विभाग संवेदनशील इलाका मन मं रोड अऊ दीगर ढांचा बनाय के वैज्ञानिक तरीका ला कइसने जाँचथे. अऊ गर पसारवाड़ी ला डोंगरी उपर बसाय के योजना हवय जिहां पहिलीच ले कतको जगा भोरका हवंय, त ओकर सुरच्छा तय करे बर कोन तरीका काम मं लाय गे रहिस. ये कहिनी छपे बखत तक ले जीएसआई के जवाब के अगोरा हवय.

एक ठन जरूरी काम जेन ह काम आ सकथे फेर अब तक ले करे नइ गे हे, वो आय सह्याद्री के चोटी मं ऑटोमैटिक रेन गेज (अपन आप बरसा नापे के जंतर) लगाय. “मैनुअल गेज कोनो काम के नो हे. हमन ला रियल-टाइम अलर्ट (उहिच बखत चेतावनी) चाही. गर उपर 150 मिमी बरसा होथे, त कलेक्टर आफिस ला तुरते जानकारी मिले ला चाही. येकर ले लोगन मन ला बहिर निकारे बर एक दू घंटा मिल जाही,” डॉ. नुलकर कहिथे. “ये तरीका ले हमन जियादा लोगन मन के जान बचाय सकथन.”

आपदा जोखम ला कम करे मं ऑटोमैटिक मॉनिटरिंग अऊ शुरुआती चेतावनी सिस्टम बनेच कीमती आय. “बदलत मऊसम सेती एक ठन सिस्टम अप्रोच के जरूरत हवय. जीएसआई,आपदा प्रबंधन, सिंचाई, ग्रामीन विकास ला मिलके काम करे ला चाही,” नुलकर कहिथे. “अब हमन जुन्ना तरीका ले काम करे नइ सकन.”

जब तक अइसने नइ होही, पसारवाड़ी अऊ ओकर जइसने सैकड़ों गाँव के हालत वइसनेच रइही: भोरका गहिर होवत जाही, डोंगरी कमजोर होवत जाही, अऊ अनदेखी के बोझा तरी आवाज दबत जाही.

“साल 2014 मं वो दिन, हमन सब्बो एक ठन बड़े बम के धमाका जइसने सुने रहेन. वोला सुनके हमन सब्बो बहिर निकर गेन, सोचे लगेन के काय होय होही,” फसाबाई टूटे मन ले कहिथे. “मंय मालिन ला लेके सोचत रहिथों.भेगालले डोंगर विसुर देत नाय [भरके/दरके डोंगरी हमन ला बिसोरे नइ दिही].”

अनुवाद: निर्मल कुमार साहू