नफरत के लकीर

“जब मंय काँटावाले तार मन ला देखेंय, त लगिस जइसने सब्बो कुछु खतम होगिस... मोला लगिस के मंय कभू अपन देस लहूटे नइ सकहूँ. मोर दादोस दादो ( बुढवा धन डोकरा बबा ) इहींचे मुर्शिदाबाद मं रहत रहिस. मोर नानी भगवानगोला [ब्लॉक] के इहीच गाँव मं रहत रहिस, जिहां अब हमर घर हवय.”

बलिया हसननगर के अपन घर मं 36 बछर के महबूब शेख, जेन ह साफ झलकत रहिस के वो ह हलाकान हवय, हमन ला मुर्शिदाबाद जिला मं अपन परिवार के मूल ला बतावत हवय. वोला ‘बांग्लादेशी घुसपैठिया’ करार देके अऊ सरहद पार ले जाके छोड़ आय मुस्किल ले महिना भरेच होय हे.

“वोटर कार्ड, राशन कार्ड, आधार कार्ड –मोर करा सब्बो कुछु हवय. मंय भारी मिहनत करे हवं अऊ थोकन जमीन घलो बिसोय हवं. अब मोला बांग्लादेशी कइसे कहे जावत हे?” प्रवासी मजूर सवाल करत कहिथे.

महबूब अकेल्ला नो हे. देस भर के मुर्शिदाबाद ले अवेइय्या प्रवासी – मजूर, घर मन मं काम-बूता करेइय्या मजूर, गली चौक मं ठेला लगेइय्या अऊ फेरीवाले- एकेच सवाल करथें: हमर जिला के बंगाली बोलेइय्या मुसलमान प्रवासी मजूर मन ला कतको राज मं काबर निशाना बनाय जावत हवय?

कांदी के गोकर्ण गाँव के 52 बछर के बिशाखा मंडल (बदले नांव) कहिथे, “अब तक ले कोनो [हमर भारतीय होय] सवाल नइ उठाय हवय. फेर ये सब्बो दिक्कत ला देखत, हम बंगाली मुसलमान मजूर मन हर जगा संसो मं परे हवन.” वो ह 30 बछर ले दिल्ली मं घर मन मं काम-बूता करथे. उहाँ पांच ठन घर मं काम करके महिना के 25,000 रूपिया कमा लेथे. ओकर करा एक ठन प्रमानिक वोटर कार्ड अऊ रासन कार्ड हवय. संग मं, ओकर दिल्ली के पता वाले एक ठन आधार कार्ड अऊ बैंक खाता घलो हवय.

मुर्शिदाबाद, जेन ह अंगरेज मन के रजधानी कोलकाता बनाय के पहिली तक ले अविभाजित बंगाल के प्रशासनिक केंद्र रहिस, कभू ओकर समृद्धि के नांव रहिस. आज, ये ह पश्चिम बंगाल ले सबले जियादा प्रवासी मजूर देथे. मई 2025 तक, इहाँ ले करीबन 4 लाख मजूर मन पश्चिम बंगाल के प्रवासी श्रमिक कल्याण योजना बर पंजीयन कराय हवंय. [अचंभा के बात ये आय के, ये आंकड़ा के हवाला देवेइय्या दस्तावेज सरकारी वेबसाइट ले गायब होगे हे]. कतको प्रवासी संगठन मन के अंदाजा हवय के मुर्शिदाबाद मं अइसने दस लाख ले जियादा मजूर हवंय. राज्य शिक्षा मंत्रालय के एक झिन अफसर नांव उजागर नइ करे के शर्त मं कहिथें, “कोनो घलो सरकारी आंकड़ा मं येकर जिकर नइ होही... फेर असल बात ये आय के अनगिनत बाल मजूर घलो हरेक दिन काम करे बर बहिर जावत हवंय.”

महबूब के छोटे भाई 33 बछर के मुजीबर शेख, अऊ ओकर ददा 60 बछर के हुसैन शेख, दूनों प्रवासी मजूर रहिन. हुसैन ये बखत घलो कोलकाता मं राजमिस्त्री के काम करथें. मुजीबर, जेन ह अब ड्राइवर हवंय, राजमिस्त्री के काम करे महबूब के संग दिल्ली अऊ मुंबई गे रहिन. दूनों भाई बचपन ला गरीबी ले जूझत रहे ला सुरता करथें. महबूब सुरता करथें: “एक बखत रहिस जब मंय दूसर मन के छेरी चरावत रहंय. मंय जियादा पढ़े नइ. हमर परिवार भारी गरीब रहिस. गरीबी के बोझा ह मोला कम उमर लेच काम करे बर मजबूर कर दे रहिस.”

17 बछर के उमर मं, महबूब राजमिस्त्री के अपन खानदानी हुनर धरे कमाय खाय बर पलायन कर गीस. दिल्ली, पंजाब, तमिलनाडु, राजस्थान अऊ कतको दीगर राज मं काम करेइय्या मइनखे, वोला अपन प्रवास बखत के काम के जगा मं आय भयानक बदलाव ले हैरान हवय. मीडिया रिपोर्ट अऊ निजी अनुभव मुताबिक ओकर जइसने प्रवासी मजूर मन ला तुच्छ आधार ले बांग्लादेश मं फेंक आय के कतको उदाहरन हवंय.

संदेहा अऊ अबिस्वास के माहौल साफ हवय. ये मं कोनो अचरज के बात नइ ये: बछर भर ले घलो जियादा बखत ले, केंद्र अऊ राज सरकार, दूनों के कानून प्रवर्तन एजेंसी मन वो मन ला निशाना बनावत हवंय. मुजबीर हमन ला बताथें, “हमर नांव तुंहर जइसने मेल नइ खावय. ते पायके हमन ला अपमानित करे जावत हे.” बीते बछर भर मं, पश्चिम बंगाल के मुसलमान प्रवासी मजूर मन ला ‘बांग्लादेशी’, ‘रोहिंग्या’, ‘घुसपैठिया’ धन 'अवैध' कहिके उठा ले गे हे.

ये सब्बो भाखा, धरम, जात धन क्षेत्रीय पहिचान के आधार ले नफरत करथें अऊ ओकर बारे मं बोलथें, जेन ह बीते दसक मं अऊ घलो बढ़गे हवय, अऊ येकरे सेती ये ह आज के हालत अऊ घलो जियादा गहिर होगे हवय. मुसलमान प्रवासी मजूर सबले जियादा असुरच्छित तबका आय, जेन ह कट्टरपंथी संगठन अऊ राजनीतिक नेता मन के बगराय नफरत भरे बोली के सबले जियादा शिकार होथें.

दियारजाली बागीचा के लोगन मन ये रिपोर्टर ले शिकायत करिन, “हमन ला जिनगी अऊ काम के बीच चुनाव करे ला परत हवय.” 32 बछर के नजमा बीबी, जेन ह प्लास्टर के भिथि वाले दू खोली के पक्का मकान मं रहिथे, उत्तरप्रदेश के कानपूर मं काम करेइय्या अपन घरवाला रफीकुल इस्लाम ला लेके चिंता मं परे हवय. वो ह कहिथे, “गर वो ह कुछु बखत बर घलो मोर फोन नइ उठाय, त मोर मन घबराय लागथे.”

महबूब ये बछर मई मं ईद-उल-अज़हा (जून के सुरु मं) मनाय बर अपन परिवार संग बलिया हसननगर आय रहिस. अपन ढाई मंज़िला मकान ये राजमिस्त्री परिवार ह बरसों के मिहनत ले एक-एक ईंटा जोडके बनाय रहिस. ये मं पांच ठन खोली हवंय अऊ तरी मं अवेइय्या बखत दुकान खोले बर कुछु जगा हवय. जेन हिस्सा मं महबूब अपन घरवाली 30 बछर के सुरना बीबी अऊ अपन तीन झिन लइका के संग रहिथे, ओकर बहिर भीतरी मं अब तक ले प्लास्टर (छबाई) नइ होय हे. ओकर सबले बड़े बेटा 16 बछर के बकुल शेख स्कूल छोड़ चुके हवय अऊ लकठा के एक ठन दुकान मं काम करत हवय. छोटे बेटा 12 बछर के सागर शेख अऊ 7 बछर के रेहान शेख इहाँ के एक ठन स्कूल मं पढ़त हवंय. पवित्र कुर्बानी अऊ महबूब के घर आय सेती, ओकर परिवार ह रस्मी कुर्बानी के इंतजाम घलो करे रहिस.

फेर ये ह नइ होय सकिस. “ठाणे के कमा के जगा ले घेरी-बेरी फोन आय लगिस,” वो ला बलाय गीस. महबूब महाराष्ट्र लहूट गे अऊ अपन काम मं लग गे –घर परिवार अऊ तिहार ला छोड़के.

9 जून के दिन इहाँ एक ठन ठेला मं चाहा पिये बखत, पुलिस ह बगेर कोनो कारन बताय वोला उठा लीस अऊ ठाणे के मीरा रोड मं बने श्री एल.आर. तिवारी कॉलेज ऑफ इंजीनियरिंग के तीर अपन चौकी मं ले गीस. रतिहा मं, वोला मीरा रोड पुलिस थाना मं ले जाय गीस जिहां वोकर ले नागरिकता साबित करे बर कागजात मांगे गीस.

महबूब ह ये रिपोर्टर ला बताइस, “तंय बांग्लादेशी अस, है ना ?” अफसर मन मोला हिंदी मं पूछिन. मंय कहेंय, “मंय पश्चिम बंगाल ले हवं.” अऊ वो मन ला अपन आधार अऊ पैन कार्ड दिखायेंय. वो मन कहिन, ‘आजकल ये ह पांच रूपिया मं मिल जाथे.”

कइसनो करके, वो ह कलेचुप बलिया हसननगर के अपन परिवार करा फोन करिस, वो मन तुरते महिषस्थली पंचायत गीन अऊ जरूरी सब्बो कागजात ला मीरा रोड पुलिस थाना भेज दीन. महबूब कहिथे, “चार दिन तक ले मोला भारी मानसिक अतियाचार झेले ला परिस. दिन मं मोला थाना के बहिर बइठाय जावय अऊ रतिहा मं पुलिस केंप मं रखे जावत रहिस.”

मीरा रोड पुलिस ह महबूब के ये आरोप ला खारिज कर दीस के पुलिस ह कुछु गलत करे हवय, सीनियर इंस्पेक्टर मेघना बुरादे ह कहिस के ओकर मन के “कोनो गलती नइ रहिस.” अऊ महबूब शेख अऊ दीगर मन ला पुलिस कमिश्नर के आर्डर ले हिरासत मं ले गेय रहिस.

वइसे, 13 जून के दिन ह महबूब बर भयंकर साबित होइस.

महबूब बताथे, “वो दिन हमन ला तार के जाली वाले बड़े अकन पुलिस गाड़ी मं बइठाय गीस. कतको अऊ गाड़ी मन हमर पाछू-पाछू चलत रहय, जइसने हमन कोनो बड़े नेता धन मंत्री आन. आखिर मं गाड़ी पनवेल के तीर कोनो सिक्युरिटी केंप मं जाके रुकिस.”

14 जून मं, उहिच गाड़ी मं महबूब समेत करीबन 30 झिन पुणे हवाई अड्डा पहुँचिन. मंझनिया 2 बजे वो मन ला तुरते एक ठन विमान मं बइठा देय गीस. विमान ले उतरतेच महबूब ला गम होइस के ये ह पश्चिम बंगाल के बागडोगरा हवाई अड्डा आय. वो ह कहिथे, “ वो मन गिनती करिन अऊ हमन ला छोटे-छोटे टोली मं बाँट दीन. मंय सुने रहेंय के अपराधी मन के गिनती करे जाथे. फेर हमर गिनती घलो उहिच माफिक काबर करे जावत हे? संदेहा ले मोर पोटा कांप गे...” हवाई अड्डा ले वो मन ला सिलीगुड़ी बीएसएफ कैंप ले जाय गीस अऊ उहाँ ले अनजान जगा डहर ले जाय सुरु होइस.

“गाड़ी सरलग 5-6 घंटा चलत रहिस. ओकर बाद वो मन हमन ला बीच जंगल मं बने एक ठन नान कन बीएसएफ कैंप के तीर उतार दीन. उहाँ रहेइय्या गिनती के अफसर मन हमन ला उतारिन अऊ पूछिन, ‘तंय कहाँ के अस?’ मंय अपन पता बतायेंव. तुरते, हमर बेरहमी ले पिटाई सुरु कर दीन. वो मन हमर घेंच मं भरे बंदूक ला तान दीन. ओकर बाद बीएसएफ अफसर मन हमर फोटू खींचिन अऊ हमन ला जंगल ले होवत चले जाय ला कहिन.

“कहाँ जावन? अऊ कइसने? हमन ला थोकन घलो अंदाजा नइ रहिस. हमन डेर्रावत रहेन के गर हमन नजर आ गेन, त बीएसएफ धन बॉर्डर गार्ड बांग्लादेश (बीजीबी) हमन ला सीधा गोली मार दिहीं. हमर भीतरी डर समागे रहिस. रतिहा बर जंगल हमर ठीहा बन गे,” सदमा मं परे महबूब सुरता करथे.

बिहान होतेच सात अऊ घलो चिंता बढ़गे. आखिरी बखत वो मन पुणे हवाई अड्डा मं कुछु खाय रहिन. अऊ तब ले 24 घंटा होगे रहिस, बिना एक कौरा खाये. महबूब कहिथे, “अइसने लगत रहय जइसने हमन उहिंचे गिरके मर जाबो. हमर चरों डहर सिरिफ रुख रहिस. हमन टोली मं चलत रहेन.” छिन भर रुके के बाद वो ह आगू कहिथे, मंझनिया करीबन 2 बजे रहिस जब हमन बांग्लादेश के एक ठन नान-कन बस्ती मं हबरेन. हमन उहाँ के लोगन मन ला बतायेन के हमन भारतीय आन. वो मन नुहाय ला कहिन अऊ हमन ला खाय बर भात दीन. [ वो मन के मदद ले] मंय इमो ऐप [ मोबाइल ऐप जेकर ले चैट अऊ दूसर देस मं फोन करे जा सकथे] ले अपन परिवार ले बात करेंय. मंय रोवत रहंय. मोर अवाज रोंवासी रहिस. मंय मुस्किल ले बोले सकत रहेंय...”

महबूब ह लहूटे के सब्बो आस छोड़ दे रहिस. इही बीच, ओकर भाई मुजीबर सिलीगुड़ी अऊ रायगंज समेत कतको जगा मन मं मदद अऊ सहयोग के गुहार लगावत रहय. पंचायत आफिस ले लेके जिला प्रशासन तक ले, इहाँ तक के राज स्तर के सरकारी अफसर मन तक ले.आख़िरकार, महबूब घर लहूट आइस. “वोला लाय के बाद घलो, सरकारी लोगन मन [विभाग नामालूम] जमीन के कागजात जाँच करे बर हमर घर आवत रहंय.”

ये चैन दू घड़ी कस रहिस अऊ ओकर चिंता कम नइ होइस. महबूब ले हमन पलायन के मजबूरी ला जानथन –समझथन. “घर मं ठलहा रहे के कोनो मतलब नइ ये, कोनो कमई नइ. मंय उहाँ [दीगर राज मं] रोज के 800-1200 रूपिया कमा सकथों. उपराहा कमई बर दूसर पाली मं घलो काम कर सकथों...” फेर डर ह मोर भीतर के भरोसा ला टोर दे हे. “मंय कतको बछर ले पुणे, मुंबई अऊ ठाणे जइसे शहर मन मं राजमिस्त्री के काम करत रहे हवं. कभू घलो सोचे नइ रहंय के मोला अइसने बखत घलो देखे ला परही.”

ये रिपोर्टर ला देखतेच सात, नजीमुद्दीन मंडल अपन गुस्सा ला काबू करे नइ सकिस. मुर्शिदाबाद के हरिहरपाड़ा ब्लॉक के ये बासिंदा ला मीडिया ले ओतकेच गुस्सा हवय जतक सरकार अऊ प्रशासन ले. जब ले बांग्लादेश मं भारतीय अफसर मन के डहर ले छोड़े गे नजीमुद्दीन के एक ठन वीडियो वायरल होय हवय, पत्रकार मन तरतीपुर गाँव के ये 35 बछर के राजमिस्त्री ले सरहद पार ले जाके फेंक देय ला लेके अक्सर सवाल करत रहिथें. वो ह भड़क जाथे, “ येकर ले तुंहर काय लेना-देना. तुमन (हमर उपर होय जुलुम ला लेके काबर नइ लिखव? आखिर हमन ला बांग्लादेशी काबर कहे जावत हे? अब बखत आ गे हवय के मीडिया खुलके बोलय.”

आज के हालत उपर अधिकतर मीडिया ला कलेचुप देख के नज़ीमुद्दीन अऊ घलो जियादा हलकान हो जाथे. वो ह सफ्फा सफ्फा देखत हवय के खबर के नांव ले कुछू मीडिया संस्थान बांग्लाभाषी मुसलमान के बारे मं शक ला बढ़ावा देवत हवंय.

ये “धक्का” ह नजीमुद्दीन ला भारी हलाकान करे हवय. अपन घरवाली अऊ दसवीं क्लास मं पढ़ेइय्या ओकर बेटी ला घर छोड़के दीगर राज मं काम करे के सोचे ले घलो डर लागथे. वो ह कहिथे, “मंय पहिली मीरा रोड पुलिस थाना मं काम करेंय.” उहाँ जोड़े अऊ मरम्मत के काम करेंय. “अब उहिच थाना मं पुलिस ह मोला आधा रतिहा मं मोर भाड़ा के खोली ले उठा के ले आइस अऊ मोला ‘बांग्लादेशी’ कहिस. ये कइसने सिस्टम आय?” महाराष्ट्र पुलिस ह ओकर जनम प्रमाण पत्र ला लेके सवाल उठाय रहिस. नजीमुद्दीन फोर के कहिथे, “मंय 35 बछर पहिली हरिहरपाड़ा मं पइदा होय रहेंय. मोर बाप-ददा (ददा-बबा) के जनम इहींचे होइस. मोर ददा-बबा मन कभू स्कूल नइ गीन. वो मन मोर जनम प्रमाण पत्र घलो नइ बनवाइन. गरीबी ह हालत ला अऊ मुस्किल बना दे रहिस. मंय प्रायमरी स्कूल के पढ़ई घलो पूरा करे नइ सकंय.”

ओकर जिनिस-पत्तर महाराष्ट्र के मीरा रोड के खोलीच मं परे हवय. कोनो ला नइ पता के ठेकादार ले बकाया मजूरी कइसे वसूल करहीं. पुलिस ह जब्त करे ओकर मोबाइल फोन ला अब तक ले लहूटाय नइ ये. वो ह बगियावत सवाल करत कहिथे, “नवा जगा मं काम मिले सिरतोन मुस्किल आय. पांच बछर कोनोया जगा काम कर लेय ले जान-पहिचान अऊ सुभीता त होतेच. ये सब ला कइसने छीने जा सकथे?”

नजीमुद्दीन के दू झिन भाई केरल अऊ तमिलनाडु मं मजूरी करथें. इहाँ के मजूर मन के कहना आय के दक्खिन भारत के राज बंगाली प्रवासी मजूर मन बर जियादा सुरच्छित हवंय. महाराष्ट्र, गुजरात धन दिल्ली ले लहूटे बर मजबूर कतको मजूर अब दक्खिन मं मजूरी करे बर लगे हवंय.

नजीमुद्दीन बताथे के मुर्शिदाबाद के बेलडांगा-1 के काजीसाहा के मीनारुल शेख अऊ बर्धमान जिला के मोंटेश्वर के मुस्तफा कमाल शेख ह घलो ओकर संग अपन उपर गुजरे बात ला बताइन. “13 जून के दिन हमन ला सिलीगुड़ी के रद्दा ले बांग्लादेश भेज देय गीस अऊ 15 तारीख के हमन ला उहाँ ले लाय गीस.”

“येकर बाद... दुबारा बहिर जाय आसान नई होही. फेर अपन गाँव मं रहे के मतलब आय (काम मिले ले) रोजी मं सिरिफ 500 रूपिया अऊ रोज के खरचा 250 रूपिया. (दीगर राज मं) रोज के 300 रूपिया खरचा हो सकथे, फेर मजूरी 800 रूपिया रोज के. हमन परिवार ला 500 रूपिया पठोय सकथन. ते पायके, (पलायन) बहिर निकरे ह एकेच रद्दा आय,” नज़ीमुद्दीन बताथे. “हमन ला अपन जोखम उठा के (बहिर) काम मं जाय ला परही.”

मुर्शिदाबाद जिला मं सब्बो दिन काम नइ मिलय, इहाँ तक ले गुजारा लइक मजूरी घलो. मनरेगा के गारंटी वाले 100 दिन के काम अभू घलो अधर मं लटके हवय. मजूर तबका के लोगन मन बर पलायन एकेच रद्दा नजर आथे. भारत के सबले अविकसित जिला मन ले एक, मुर्शिदाबाद, अधिकतर गाँव-देहात वाले इलाका आय. इहाँ के करीबन 80 फीसदी आबादी 2,166 गाँव मं रहिथे. 66 फीसदी साक्षरता दर के संग, इहाँ के साक्षरता दर राज के औसत 76 फीसदी (जनगणना 2011) ले बनेच कम हवय. दू तिहाई आबादी मुसलमान आंय. जाहिर बात आय, तबका, इलाका अऊ धरम के नजरिया ले कोनहा मं परे ये लोगन मन सबले जियादा जबरदस्ती मजूरी बर पलायन करथें.

हबसपुर पंचायत के एक ठन नान कन बस्ती, दियारजाली बागीचा के हालत ये असलियत ला उजागर करथे. 60 फीसदी ले जियादा घर मं कम से कम एक परानी प्रवासी मजूर आय. इहाँ के बासिंदा लतीबुल हक़,आईनल हक़ अऊ रज्जाक हुसैन शेख, जेन मन कभू कुली के काम करत रहिन, अपन काम ला छोड़ के ओडिशा चले गीन जेकर ले वो मन ठेला/फेरी लगाके बने कमई करे सकंय. वो मन हमन ला फोन मं बताइन के महाजन वो मन ला घरेलू अऊ स्टेशनरी के समान उधर मं देथे. वो मन ये समान मन ला अपन सइकिल धन फटफटी मं लादके गाँव मन मं बेचथें. ठेकदार के हिस्सा काटे के बाद, वो मन ला रोज के 700- 800 रूपिया के कमई हो जाथे. वो मन भाड़ा मं नान-नान खोली मं टोली बनाके रहिथें.

ये प्रवासी मजूर मन के घर के लोगन मन हमन ला दियारजाली बागीचा मं बताइन के सितंबर 2024 ले मुर्शिदाबाद ले अवेइय्या कतको बंगाली मुसलमान सेल्समेन मन के उपर ओडिशा मं हमला करे गे हे अऊ वो मन ला हिरासत मं रखे गे हवय. ये सब बांग्लादेश अऊ मुर्शिदाबाद के समसेरगंज मं हिंदू मन के खिलाफ हिंसा के आड़ मं करे गीस. फेर प्रवासी मन ये बात ले डेर्रावत हवंय के अइसने घटना मन मं ओडिशा पुलिस के बढ़त हाथ हवय.

जब पुलिस ह लतीबुल हक़ के कागजात मन के वैधता ला लेके सवाल उठाइस, त दियारजाली बागीचा मं रहेइय्या ओकर परिवार के लोगन मन भगवानगोला पुलिस थाना ले मदद मांगिन. लतीबुल अऊ दीगर लोगन मन ला पुलिस थाना मन के बीच कागजात के देय-लेय के बादेच रिहा करे गीस, फेर वो मन अभू घलो ओडिशा मं फंसे हवंय. झारसुगुड़ा के एक ठन केंप मं चार दिन तक ले बंद रहेइय्या लतीबुल ह हमन ला फोन मं बताइस: “पुलिस ह कहिस के वो अभू घलो भारतीय नागरिकता ले जुरे हमर दस्तावेज मन के जाँच करत हवंय अऊ हमन ला एक महिना तक ले अपन राज के घर मं झन जाय के निर्देस देय हे.”

महाराष्ट्र, ओडिशा, उत्तर प्रदेश अऊ दिल्ली जइसने दूरिहा के राज मं काम करेइय्या मजूर मन के परिवार अब सदमा मं हवंय. दियारजाली बागीचा मं, हमर भेंट आइनल हक़ के 60 बछर के महतारी मदीना बीबी ले होइस, जेन ह दुब्बर त हवय फेर ओकर नजर तेज हवय. हमन ले गोठियावत, जटिल डिज़ाइन वाले कंथा (हाथ ले सिले कथरी) बनावत ओकर हाथ तेजी ले चलत रहिस. लोगन मन ओकर ले कंथा बनवाथे अऊ सिलवाथें, वोला कंथा पाछू सिरिफ 20 ले 30 रूपिया मिलथे. वइसे ये रकम कम आय, फेर घर के गुजारा चल जाथे. ओडिशा मं काम करत अपन बेटा अऊ पोता के संग होय अतियाचार अऊ पीरा ला बतावत मदीना अपन आंसू रोके नई सकिस.

मदीना कहिथे,“जब वो मन कहिन के मोर बेटा अऊ पोता सब्बो बांग्लादेशी आंय, त मंय कइसने धीर धरे सकतेंय? मोर दूसर बेटा आइनल हक़ अऊ मोर सबले बड़े बेटा के दो झिन पोता- आमिर अऊ रज्जाक हुसैन- ओडिशा मं रहत हवंय. पुलिस ह वो मन ला चार दिन हिरासत मं रखिस. वो दिन मन मं मंय सुते नइ सकंय.”

आइनल हक के घरवाली शिउली बीबी ला आये फोन ह जम्मो परिवार ला डरा दीस. आधार कार्ड अऊ माध्यमिक बोर्ड परीक्षा के ‘प्रवेश पत्र’ जइसने कागजात खोजके निकारे ला परिस. आइनल हक के ददा 60 बछर के उमर पार मोइनुल शेख, ला ये सब्बो कागज़ात धरके पुलिस थाना जाय ला परिस. “ उहाँ, देरी ले हबरे सेती वो मन मोर उपर बगियाइन घलो. फेर मंय काय करे सकतेंय? अपन बेटा के हाल जानके मोर देह सुन्न परगे अऊ कव्वा गे रहंय...” डोकरा सियान ह सुरता करत कहिथे.

हलाकान मदीना बीबी हमन ला बताथे: “माध्यमिक परीक्षा के बाद, मोर बेटा [आइनल] ह कहिस, ‘मोला हमर गुजारा बर काम-बूता करेच ला परही.’ वो ह एक ठन ईंटा भट्ठा मालिक बर काम करत रहिस अऊ वोला महिना के 800 रूपिया मिलत रहिस. बाद मं, वो ह एक ठन गोदाम मं समान ढोवत रहिस. ओकर ले घलो वोला जियादा ले जियादा 10,000 रूपिया महिना मिलत रहिस. हमन करजा मं बूड़े रहेन. ते पायके वो ह बहिर चले गे... अब दू बछर होगे हे. हमन बस कइसने करके गुजारा करत हवन,” वो ह कहिथे. “[मोर] ससुर, इहाँ तक के ओकर ददा घलो, सब्बो देसेच (भारत) के आंय... ओकर बाद घलो, डर मोला छोड़े के नांव नइ लेवत हे.”

7 जुलाई के दिन, भगवानगोला I के चरलोबोंगोला गाँव के, करीबन 35 बछर के अमीरुल शेख ला घलो पश्चिम बंगाल ले अवेइय्या 30 झिन आने प्रवासी मजूर मन के संग ओडिशा के झारसुगुड़ा के लखनपुर थाना मं हिरासत मं लेय गीस. खबर मिलतेच, ओकर परिवार के लोगन मन भगवानगोला पुलिस थाना ले इहाँ के दक्खिन हनुमंत नगर ग्राम पंचायत आफिस भाग के गीन. आखिर मं, हिरासत मं लेय गे मजूर मन ला चार दिन बाद ओडिशा के लखनपुर पुलिस थाना ले रिहा जरे गीस. “ मंय ओडिशा मं 10 बछर ले फेरी लगावत हवंव. फेर अब सब्बो कुछु बदल गे हे. लोगन मन ला पहिली घलो पीटे गे हे, फेर ये पईंत सीधा बांग्लादेशी करार दे जावत हे,” सहमे अमीरुल ह फोन मं बताइस. ओकर बाद घलो, चरलोबोंगोला मं अपन परिवार के गुजर-बसर बर ओकर करा ओडिशा मं रहे के छोड़ कोनो उपाय नइ ये.

आसिफ फारुक कहिथे, “अकेल्ला इही बछर, ओडिशा मं मुर्शिदाबाद के 5,000 ले जियादा प्रवासी मजूर मन ला पुलिस ह हलाकान करे हवय.” वो ह पश्चिम बंगाल के प्रवासी मजूर मन के हक बर लड़ेइय्या संगठन,परिजयी श्रमिक एक्य मंच (पीएसएएम) के सचिव आंय. वो ह कहिथे, “झारसुगुड़ा अऊ पारादीप समेत ओडिशा के अलग-अलग इलाका मन मं, मुर्शिदाबाद के कतको मजूर मन ला चार-पाँच दिन तक ले पुलिस केंप मन मं हिरासत मं रखे गे हवय अऊ वो मन के नागरिकता साबित करे बर ओकर मन ले पूछताछ करे जावत हे.”

केंद्र अऊ राज सरकार मं राजनीतिक बवाल, जेन ह दूनोंच सरकार के नेता मन के भासन ले उजागर होथे, थमे के नांव नइ लेवत हे. केंद्रीय श्रम मंत्रालय डहर ले महीनों पहिली जारी एक ठन प्रेस विज्ञप्ति मं भारत मं प्रवासी मजूर मन के कल्याण बर केंद्र सरकार के सुरु करे गे कतको परियोजना अऊ योजना मन ला सराहे गे रहिस. फेर वो मन के खिलाफ होय अतियाचार के कोनो सरकारी घोसना धन निंदा नइ करे गे हे.

सीमा सुरक्षा बल ह देस के कतको राज मं कथित रूप ले गैरकानूनी बांग्लादेशी घुसपैठिया मन के उपर चलत कार्रवाई बखत गैरकानूनी आचरन के आरोप मन ला लेके कोनो सरकारी बयान जारी नइ करे गे हे. भगवानगोला के लोगन मन कहिथें: “ तरी के [बीएसएफ] जवान मन हमन ला बताथें के ‘हमन बस उपरवालास (बड़े अफसर मन के) के बताय मुताबिक काम करत हवन.”

राज सरकार ह अपन लोगन मन के हक के रच्छा करे अऊ सरहद पार फेंक आय लोगन मन के समस्या ले निपटे के वादा करे हवय. पीएसएएम के आसिफ फारुक के मानना आय के “पश्चिम बंगाल सरकार पीड़ित मन ला बचाय अऊ वापिस लाय मं लगे हवय. अऊ “अप्रैल ले, हमन मजूर मन बर एक ठन हेल्पलाइन सुरु करे हवन.”

संगठन ह कलकत्ता हाई कोर्ट मं एक ठन जनहित याचिका घलो दायर करे हवय जेन मं बंगाली प्रवासी मजूर मन के उपर अतियाचार के खिलाफ तुरते कार्रवाई के माँग करे गे हवय. पश्चिम बंगाल प्रवासी मज़दूर संघ ह मुर्शिदाबाद जिला मुख्यालय, बहरामपुर मं एक ठन जुलूस निकालिस अऊ दीगर राज मं मजूर मन के सुरच्छा के मांग करिस. पश्चिम बंगाल प्रवासी मज़दूर संघ के जिला सचिव कमाल हुसैन कहिथें, “संबंधित जिला के सांसद मन ला वो राज के दौरा करे ला चाही अऊ दखल देय ला चाही जिहां प्रवासी मजूर मन के उपर हमला होवत हवय.”

येकरे बीच, केंद्र अऊ राज सरकार के झगरा ये सवाल ला कोनहा मं राख देथे: गर मुर्शिदाबाद मं बढ़िया बूता-काम होतिस, अऊ खेती किसानी मं गहिर ले दखल होय रतिस – त काय लोगन मन ला पहिलीच पलायन करे ला परतिस?

बलिया हसननगर मं दहशत मं परे महबूब शेख़ सोचत हवंय के अब वो अपन परिवार ला कइसने पोसही. [कन्ट्रकसन] कंपनी मोला [मुंबई ले] काम करे बर बलावत हवय, फेर वो कोनो जिम्मेवारी लेगे बर तियार नइ ये...”

मास्टर राजमिस्त्री मं निराशा भर गे हवय: “अब मोला काम कहाँ मिलही? मोर तीर येकर कोनो निदान नइ ये...”

कवर चित्रन: लाबनी जंगी
कहानी मूल रूप मं बांग्ला मं लिखे गे रहिस.
अनुवाद: निर्मल कुमार साहू