’طلباء میرے جیسی ماؤں کے لیے احتجاج کر رہے ہیں‘

ثنا کا ایک خواب تھا۔ وہ ۱۹ سال کی تھیں اور اپنے والد جعفر حسین کے نام پر ایک اسپتال کھولنا چاہتی تھیں۔

حسین (۵۰ سالہ) اپنے کاروبار میں زبردست خسارہ کے بعد، ۱۲ سال پہلے آندھرا پردیش میں واقع اپنے گاؤں، پرودّاتور سے کویت چلے گئے تھے۔

ان کی اہلیہ، حبیب النساء شیخ (۴۰) اپنی تین بیٹیوں کو بہتر تعلیم دلانا چاہتی تھیں، لہٰذا وہ انہیں لے کر حیدر آباد چلی گئیں۔ یہ لڑکیاں وہاں ایک اپارٹمنٹ میں اپنی ماں کے بغل میں رہتی تھیں۔

’’ثنا کو اپنے والد سے کافی لگاؤ تھا،‘‘ حبیب النساء بتاتی ہیں۔ ’’دونوں روزانہ صبح کو ایک دوسرے سے بات کیا کرتے تھے۔ وہ جانتی تھی کہ اس کے والد نے اس کے لیے کتنی قربانیاں دی ہیں۔ اسے معلوم تھا کہ انہوں نے کتنے نقصان برداشت کیے ہیں، اس لیے وہ اپنی کامیابی اپنے والد کے نام منسوب کرنا چاہتی تھی۔‘‘

گزشتہ ۱۳ مئی، ۲۰۲۶ کو جب ثنا امتحان والے کمرے سے باہر نکلیں، تو انہوں نے سب سے پہلے کویت میں اپنے والد کو فون کیا۔ ’’اس نے بڑی خوشی سے مجھے بتایا کہ اس کا پیپر بہت اچھا گیا ہے،‘‘ حسین نے کہا۔ ’’میں نے اس سے کہا کہ اپنی ماں کے ساتھ خوشیاں مناؤ یا کسی ہوٹل میں جا کر اچھا کھانا کھاؤ۔‘‘

ایس انیتا (۱۷) نام کی ایک اور نوعمر لڑکی کا بھی ایسا ہی ایک خواب تھا۔ ان کا تعلق تمل ناڈو کے کُڑومور گاؤں کی ایک دلت فیملی سے تھا۔ جب وہ سات سال کی تھیں، تو کسی بیماری کی وجہ سے ان کی ماں اس دنیا سے چل بسیں۔ ان کے والد سبزی منڈی میں یومیہ اجرت پر کام کرتے تھے۔ انتیا ڈاکٹر بننا چاہتی تھیں۔

ان کے بھائی منی رتنم (۳۶) بتاتے ہیں، ’’وہ بڑی ہو کر ہمارے جیسے محروم کنبوں کو صحت کی سہولیات فراہم کرنا چاہتی تھی۔ وہ شروع سے ہی ایک ذہین اور قابل طالبہ تھی۔‘‘

ریاستی بورڈ کے امتحانوں میں انیتا نے ۹۸ فیصد نمبرات حاصل کیے تھے۔ اپنی پسند کے کسی کالج میں داخلہ لینے اور اپنے خوابوں کو پورا کرنے کے لیے یہ نمبر کافی تھا۔

یہ دونوں لڑکیاں پس ماندہ خاندانوں سے تعلق رکھتی تھیں۔ دونوں کو اپنی صلاحیتوں پر یقین تھا کہ وہ سماجی رکاوٹوں پر قابو پا کر ایک خوشحال زندگی تعمیر کر سکتی ہیں۔ لیکن دونوں کے خواب ادھورے رہ گئے۔ یہ دونوں سانحے نو سال کے وقفہ سے پیش آئے، مگر ان میں ایک مشترک کڑی تھی: قومی اہلیتی و داخلہ جاتی امتحان (این ای ای ٹی)۔ میڈیکل کی پڑھائی کے لیے ہندوستان میں ہونے والے داخلہ جاتی امتحان نے مختلف طریقوں سے ان دونوں کے ساتھ نا انصافی کی۔

انیتا کی موت ۲۰۱۷ میں ہوئی۔ نیٹ سے متعلق یہ پہلی خودکشی تھی۔ ثنا نے پچھلے مہینہ اپنی زندگی ختم کر لی۔ آن لائن نیوز پورٹل، نیوز لانڈری، کے ایک تجزیہ کے مطابق، اس دہائی میں میڈیا کی رپورٹوں میں مختلف امتحانوں کے دوران پیپر لیک کے ۸۹ الگ الگ معاملے قلم بند کیے گئے ہیں، جن کی وجہ سے نیٹ میں شامل ہونے والے طلباء سمیت کم از کم ساڑھے چھ کروڑ طلباء متاثر ہوئے ہیں۔

جب ہندوستان کے نوجوانوں کا برسوں سے جمع ہو رہا غصہ ۲۰ جولائی، ۲۰۲۶ کو دہلی کے جنتر منتر پر پوری شدت کے ساتھ پھوٹ پڑا، تو انیتا اور ثنا کے گھر والے بھی اس میں شامل ہوئے۔ وہ اپنی اپنی ریاستوں سے لمبا سفر کر کے قومی راجدھانی پہنچے، تاکہ وہاں احتجاج کر رہے طلباء سے اظہارِ یکجہتی کر سکیں۔ پڑھیں: ’پارلیمنٹ کو یاد دلانے آیا ہوں کہ ہم زندہ ہیں‘

کاکروچ جنتا پارٹی – ایک میم پیج، جو نوجوانوں کی تحریک میں تبدیل ہو گیا – نے آل انڈیا اسٹوڈنٹس ایسوسی ایشن (آئیسا) اور آل انڈیا اسٹوڈنٹس فیڈریشن (اے آئی ایس ایف) جیسی طلبہ تنظیموں کے ساتھ مل کر ۲۰ جولائی، ۲۰۲۶ کو پارلیمنٹ تک ایک پرامن مارچ کی کال دی تھی۔

یہ لوگ مرکزی وزیر تعلیم، دھرمیندر پردھان کے استعفیٰ کا مطالبہ کر رہے تھے۔ اس سے پہلے، لداخ سے تعلق رکھنے والے ماحولیاتی کارکن سونم وانگچُک اور طلبہ کارکن نیہا بورا، منیش کمار، اور آمین امیتوج بھی تعلیمی امتحانوں اور ریاستی بھرتیوں میں جوابدہی اور شفافیت کے مطالبات کے ساتھ جنتر منتر پر ۲۵ دنوں سے بھوک ہڑتال پر بیٹھے ہوئے تھے۔

ہزاروں نہیں بلکہ دسیوں ہزار، جن میں اکثریت نوجوانوں کی تھی، سخت پولیس اور سیکورٹی انتظامات کے باوجود جنتر منتر کی سڑکوں پر امڈ آئے۔ فضا حکومت مخالف نعروں سے گونج اٹھی اور یہ مقام مزاحمت اور احتجاج کے ایک ولولہ انگیز منظر میں تبدیل ہو گیا۔

اس کے جواب میں، مرکزی حکومت نے انٹرنیٹ بند کیا اور وہاں پولیس اور نیم فوجی دستوں کو بڑی تعداد میں تعینات کر دیا۔

جوں جوں دن گزرتا گیا، حکومت مخالف نعروں کی جگہ پر امن مظاہرین پر آنسو گیس کے گولوں اور لاٹھی چارج کی چیخ و پکار نے لے لی۔ کئی مظاہرین بری طرح زخمی ہوئے، ان کے سر پھوٹے اور خون بہنے لگا۔ نوجوان خواتین کے کپڑے پھٹے۔ چھوٹی عمر کے طلبہ بھی بخشے نہیں گئے۔ کم از کم تین طلبہ کو پیلٹ گن سے نشانہ بنایا گیا، جو کہ ایک ایسا بدنامِ زمانہ ہتھیار ہے جس کے استعمال سے کشمیر میں بہت سے افراد اپنی بینائی سے محروم ہو چکے ہیں۔

وحشیانہ کریک ڈاؤن کے باوجود طلباء دوبارہ جنتر منتر پہنچے اور پہلے سے بھی زیادہ عزم، حوصلے اور جوش کے ساتھ اپنے احتجاجی مقام پر دوبارہ قبضہ جما لیا۔

تشدد کو دیکھ کر حبیب النساء ڈر گئی تھیں، لیکن مظاہرین کے حوصلے نے انہیں ہمت بخشی۔ ’’میں ایک عام ماں ہوں، اور میرے بچے ہی میری دنیا ہیں،‘‘ مرحومہ ثنا شیخ کی والدہ نے پاری سے کہا۔ ’’میں نے ایک خاتون خانہ کی زندگی بسر کی ہے، لیکن اقتدار میں بیٹھے لوگوں نے اس میں رکاوٹ ڈال دی ہے۔ انہیں کے فیصلوں نے میری بیٹی کی جان لی۔ آپ سے توقع کی جاتی ہے کہ آپ ہماری حفاظت کریں گے، نہ کہ ہماری زندگی برباد کریں گے۔‘‘

ثنا نے ۳ مئی، ۲۰۲۶ کو امتحان دیا تھا، لیکن اس کے بعد مرکزی حکومت نے اعلان کر دیا کہ نیٹ کا پیپر لیک ہوا تھا، اور طلباء کو یہ امتحان دوبارہ دینا پڑے گا۔ ثنا یہ سن کر پوری طرح ٹوٹ گئیں، ان کی کڑی محنت پر پانی پھر چکا تھا۔ نیٹ (این ای ای ٹی) ایک بڑا مقابلہ جاتی امتحان ہوتا ہے، جس میں بیس لاکھ سے زیادہ بچے میڈیکل کالجوں کی ۱۳۰ ہزار سے بھی کم سیٹوں پر داخلہ حاصل کرنے کے لیے جدوجہد کرتے ہیں۔ کئی سالوں تک لگاتار محنت کرنے کے بعد، ثنا نے سوچا تھا کہ اب ان کا تناؤ کم ہوگا۔ لیکن پتہ چلا کہ انہیں ویسی ہی کڑی محنت دوبارہ کرنی پڑے گی۔

بدقسمتی سے، امتحان دوبارہ دینے سے زیادہ انہیں اپنی خودکشی کا نوٹ لکھنا آسان لگا۔ یہ امتحان دوبارہ ۲۱ جون کو ہونے والا تھا، لیکن اس سے ایک دن پہلے انہوں نے اپنے کمرے میں پھانسی کا پھندا لگانے سے پہلے صرف اتنا لکھا، ’’مجھے معاف کر دیجئے گا۔‘‘

وہ اُن ۲۰ طلباء میں شامل ہیں، جن کی موت پیپر لیک ہونے کی وجہ سے ہوئی ہے۔

’’اُس دن صبح کو اس نے میری کال کا جواب نہیں دیا تھا،‘‘ جعفر کہتے ہیں۔ ’’اگر میں اس سے کسی طرح بات کر پاتا تو شاید آج وہ ہمارے ساتھ ہوتی،‘‘ اندر سے پوری طرح ٹوٹ چکے ان کے والد جنتر منتر پر ہم سے بات کرتے ہوئے کہتے ہیں۔

’’میں اتنا لمبا سفر کر کے یہی بتانے آئی ہوں کہ میرے اوپر کیا گزر رہی ہے،‘‘ صدمہ میں ڈوبی ہوئی حبیب النساء کہتی ہیں۔ انہیں اب بھی یقین نہیں ہو رہا ہے کہ ان کی سب سے بڑی بیٹی اب اس دنیا میں نہیں ہے۔ ’’ہو سکتا ہے کہ ہم پانچ سال میں مر جائیں، یا بوڑھا ہونے تک زندہ رہیں، لیکن یہ غم زندگی بھر ہمارے ساتھ رہے گا،‘‘ وہ کہتی ہیں۔ ’’رات میں، مجھے ٹھیک سے نیند نہیں آتی، آدھی رات کو میرے ہاتھ پیر کانپنے لگتے ہیں۔‘‘

اس کے باوجود، ثنا کے والدین اپنی ۱۵ اور ۱۱ سال کی دو بیٹیوں کو چھوڑ کر دہلی پہنچے۔ ’’میں ان کے بارے میں سوچتی رہتی ہوں اور پریشان ہو جاتی ہوں۔ میں یہاں اقتدار میں بیٹھے لوگوں کو یہ بتانے آئی ہوں کہ وہ غلط ہیں۔ کیا اقتدار نے آپ کو اندھا کر دیا ہے؟ طلباء میرے جیسی ماؤں کے لیے احتجاج کر رہے ہیں۔ وہ حساس ہیں۔ کافی تکلیف پہنچی یہ دیکھ کر کہ جو لوگ میرا دکھ بانٹ رہے ہیں، انہیں پولیس ڈنڈے مار رہی ہے۔ اگر آپ ہمارا دکھ درد نہیں سمجھ سکتے، تو آپ کے اقتدار میں رہنے کا کیا مطلب ہے؟ بچوں پہ اتنا ظلم مت کیجئے۔‘‘

منی رتنم کے لیے یہ منظر گویا ماضی کی تلخ یادوں کے دوبارہ لوٹ آنے جیسا ہے۔

نیٹ کا تصور پہلی بار ۲۰۱۰ میں پیش کیا گیا تھا اور وزیر اعظم نریندر مودی کی قیادت والی مرکزی حکومت کا خیال تھا کہ ۲۰۱۶ میں این ای ای ٹی (نیٹ) کے نفاذ سے طبی تعلیم کے نظام میں صفائی اور بہتری آئے گی۔ لیکن ایک دہائی بعد یہ بات کہی جا سکتی ہے کہ نتائج توقعات کے مطابق سامنے نہیں آئے۔

تمل ناڈو اُن اولین ریاستوں میں شامل تھا جنہوں نے نیٹ کے نفاذ کی مخالفت کی تھی اور اسے ایک سال کی چھوٹ بھی حاصل ہوئی – اُس وقت جے للتا وہاں کی وزیر اعلیٰ تھیں۔ ریاستی حکومت کا خیال تھا کہ ان کا اپنا تعلیمی نظام کافی مضبوط ہے اور میڈیکل کالجوں میں داخلے کے لیے کسی اضافی مرکزی امتحان کی ضرورت نہیں ہے۔ سال ۲۰۲۱ میں نیٹ پر جسٹس اے کے راجن کمیٹی کی رپورٹ شائع ہونے کے بعد یہ مؤقف درست بھی ثابت ہوا۔

رپورٹ میں بتایا گیا کہ نیٹ دراصل پس ماندہ بچوں کے لیے میڈیکل کالجوں میں داخلہ حاصل کرنے کو مزید مشکل بنا دیتا ہے۔

سال ۲۰۱۰ میں تمل ناڈو کے مختلف میڈیکل کالجوں میں داخلہ لینے والوں میں ۸۰ فیصد طلباء انگریزی میڈیم اسکولوں کے تھے۔ یہ تعداد ۲۰۱۷ میں بڑھ کر ۴۱ء۹۸ فیصد ہو گئی تھی۔ دوسری طرف، تمل میڈیم والے طلباء کی تعداد تقریباً ۲۰ فیصد سے گھٹ کر صرف ۲ فیصد کے آس پاس ہی تھی، جنہیں ان کالجوں میں داخلہ مل سکا۔

جس طالبہ نے یہ صورتحال پہلے ہی بھانپ لی تھی، وہ تھیں انیتا – منی رتنم کی بہن اور کُڑومور گاؤں سے تعلق رکھنے والی ایک دلت طالبہ۔

اگست ۲۰۱۷ میں انہوں نے ہندوستان کے سپریم کورٹ سے رجوع کیا، اور مطالبہ کیا کہ پچھلے سال کی چھوٹ کو آگے بھی جاری رکھا جائے۔ لیکن، عدالت عظمی نے ان کے مطالبہ کو ٹھکرا دیا۔ آخرکار، یکم ستمبر ۲۰۱۷ کو، جب کوئی گھر پر نہیں تھا، انہوں نے خودکشی کر لی۔ وہ ۱۷ سال کی تھیں۔

’’اسے پورا یقین تھا کہ تمل ناڈو کو ملنے والی یہ چھوٹ جاری رہے گی،‘‘ منی رتنم کہتے ہیں۔ ’’اس نے ریاستی بورڈ کے امتحانوں میں خود کو ثابت کیا تھا اور وہ تجربہ کے طور پر نیٹ کے امتحان میں بیٹھی تھی۔ اسی لیے، نیٹ کے امتحان میں اسے اتنا اچھا نمبر نہیں ملا۔ لیکن جب سپریم کورٹ کا فیصلہ آیا، تو اس کی دنیا ہی اجڑ گئی۔ اس نے جس امتحان کی اتنی کڑی محنت سے تیاری کی تھی، اب اسے شمار ہی نہیں کیا جانا تھا۔‘‘

ان کی موت کے بعد پورے تمل ناڈو میں بڑے پیمانے پر مظاہرے ہونے لگے۔ اچانک شروع ہونے والے ان مظاہروں میں طلباء بڑی تعداد میں شریک ہوئے اور سڑکوں کو بند کرنا شروع کر دیا۔ کچھ بھوک ہڑتال پر بیٹھ گئے۔ مظاہرین نے مودی کے پُتلے پھونکے۔ سینکڑوں لوگوں کو گرفتار کر لیا گیا۔ جب منی رتنم ۲۰ جولائی، ۲۰۲۶ کو جنتر منتر پر کھڑے تھے تو ستمبر ۲۰۱۷ کے وہ احتجاجی مناظر ان کی آنکھوں کے سامنے ایک بار پھر تازہ ہو گئے۔

’’مجھے لگتا ہے کہ نو سال پہلے تمل ناڈو نے جو محسوس کیا تھا، آج پورا ملک وہی محسوس کر رہا ہے،‘‘ وہ کہتے ہیں۔ ’’اس طرح دیکھا جائے تو، مجھے اس بات کی خوشی ہے کہ یہ مسئلہ اب قومی سطح کا بن چکا ہے۔ یہ فسطائی حکومت ہے، اور یہ اپنے طلباء کو یکساں مواقع نہیں فراہم کرنا چاہتی۔‘‘

ثنا کی موت کو ایک مہینہ سے کچھ زیادہ عرصہ ہوا ہے۔ جعفر اب کویت سے حیدر آباد لوٹ آئے ہیں اور گھر پر ہی روزی روٹی کے کچھ مواقع تلاش کر رہے ہیں۔

’’اب میں اپنی بیوی اور بیٹیوں کو چھوڑ کر نہیں جا سکتا،‘‘ وہ کہتے ہیں۔ ’’ہم بہت نازک حالت میں ہیں اور ذہنی دباؤ کا شکار ہیں۔ مجھے یہیں کچھ تلاش کرنا ہوگا۔ لیکن اب میں ۵۰ سال سے زیادہ کا ہو چکا ہوں، اور اس عمر میں کام تلاش کرنا آسان نہیں ہے۔‘‘

یہ لوگ حیدر آباد سے اپنے گاؤں واپس جا چکے ہیں۔ ثنا کی موت کے بعد اس فیملی کے لیے وہاں رہنا مشکل تھا۔ وہ جگہ ان کے لیے ایک اذیت ناک یاد بن گئی تھی اور ہر وقت انہیں پریشان کرتی تھی۔ حبیب النساء بتاتی ہیں کہ ثنا کی دراز صاف کرتے وقت انہوں نے اس کی کتابیں دیکھیں۔ ’’اس نے کتنی محنت اور باریک بینی سے پڑھائی کی تھی،‘‘ وہ کہتی ہیں۔ ان کی آواز بھرّا جاتی ہے۔ ’’لیکن ہمیں اپنے ساتھ موجود دو بیٹیوں کے لیے ہمت پیدا کرنی ہوگی۔‘‘

دونوں بیٹیوں نے ڈاکٹر بننے کی خواہش ظاہر کی ہے۔ لیکن اس خواہش پر فیملی کے جذبات ملے جلے ہیں۔ جعفر کہتے ہیں، ’’ہم ان پر کوئی دباؤ نہیں ڈالنا چاہتے۔ ہم نے ان سے کہا ہے کہ انہیں جو مناسب لگے کریں۔ ہم ابھی بھی ثنا کے چلے جانے کے صدمہ سے گزر رہے ہیں۔‘‘

انیتا کی موت کے ایک سال بعد، منی رتنم نے ان کے نام پر اپنے گاؤں میں ایک لائبریری کھولی۔ اپنی چھوٹی بہن کی موت کے صدمہ پر قابو پانے کے لیے وہ کچھ کرنا چاہتے تھے۔ ’’میں اس کی یاد کو عزت دینا چاہتا تھا،‘‘ منی رتنم کہتے ہیں۔ ’’ہم پس ماندہ طبقوں سے تعلق رکھنے والے طلباء کے لیے پروگرام منعقد کرتے ہیں اور انہیں مطالعاتی مراکز فراہم کرتے ہیں۔ امتحان کی تیاری کرنے میں ہم ان کی مدد کرتے ہیں۔‘‘

انہوں نے آٹھ سال تک اس لائبریری کی ذمہ داری سنبھالی، پھر وہ مالی مشکلات میں گھر گئے۔ نو ماہ قبل، انہوں نے یہ لائبریری ایک قابل اعتماد شخص کے حوالے کر دی اور چنئی میں ملازمت اختیار کر لی، جہاں وہ ایک اسکل سینٹر میں منتظم (ایڈمنسٹریٹر) کے طور پر کام کرتے ہیں۔

تمل ناڈو ریاست بھی انیتا کو نہیں بھولی ہے۔ مارچ ۲۰۲۳ میں، اریالور ڈسٹرکٹ میڈیکل کالج – وہی ضلع جس میں انیتا کا گاؤں پڑتا ہے – نے اپنا آڈیٹوریم انیتا کے نام پر منسوب کیا ہے۔ اگست ۲۰۲۳ میں، ڈی ایم کے پارٹی کے صدر ایم کے اسٹالن نے کہا تھا کہ نیٹ (این ای ای ٹی) کا خاتمہ ہی انیتا کے لیے سچا خراج عقیدت ہوگا، جب کہ ان کی پارٹی نے ایک دن کی بھوک ہڑتال بھی کی تھی۔

’’یہ دیکھ کر میرا دل خوشی سے بھر جاتا ہے کہ اس کی یاد کو عزت دی گئی ہے،‘‘ منی رتنم کہتے ہیں۔ ’’اس نے ایک نا انصافی پر مبنی نظام کے خلاف جدوجہد کی، بالکل اسی طرح جیسے آج یہ طلباء جدوجہد کر رہے ہیں۔ ہم انہیں بھی کبھی نہیں بھولیں گے۔‘‘

اگر آپ کے دل میں خودکشی کا خیال آ رہا ہے یا آپ پریشان ہیں تو براہ کرم کرن، قومی ہیلپ لائن، 18005990019 (چوبیسوں گھنٹے ٹال فری) پر، یا اپنے آس پاس موجود ان ہیلپ لائنز میں سے کسی ایک پر کال کریں۔